Македонски Телеком, преку Фондацијата Телеком за Македонија, ја доби наградата за одржлив развој за иницијативата „Нет без хејт“ – младинско движење кое придонесува за создавање побезбеден, похуман и поинклузивен дигитален простор без сајбер-насилство и говор на омраза.

Наградата ја доделуваат Конект и Министерството за економија и труд и претставува национално признание за најдобрите практики и иновации кои создаваат значајни општествени промени преку одржлив развој, општествена одговорност и меѓусекторска соработка. Во категоријата партнерства за одржлив развој, признанието ги истакнува компаниите кои преку соработка со институции, граѓански организации и други чинители создаваат трајни позитивни промени во заедницата.

„Нет без хејт“ е дел од партнерството помеѓу Фондацијата Телеком за Македонија и УНИЦЕФ, кое ги става младите во центарот на промените и ги охрабрува активно да придонесуваат за побезбедна дигитална иднина.

– Оваа награда е признание за моќта на партнерствата но, пред сѐ, ова е награда за младите кои се дел од „Нет без хејт“ и кои со својата енергија, креативност и посветеност покажуваат дека можат да бидат двигатели на позитивни промени. Горди сме што заедно со УНИЦЕФ градиме иницијатива што создава трајни и одржливи промени во заедницата – изјави Горан Марковиќ, претседател на Фондацијата Телеком за Македонија.

Како дел од следната фаза на проектот, во 2026 година „Нет без хејт“ ќе се фокусира на пилотирање и проширување на младинските иницијативи во најмалку 20 училишта и локални заедници низ државата. Дополнително, ќе продолжи развојот на кампањи и содржини создадени од млади за млади, како и соработката со релевантни институции во насока на унапредување на дигиталната безбедност и благосостојбата на децата и младите.

Со ова признание, Македонски Телеком уште еднаш ја потврдува својата посветеност на создавање позитивни општествени промени преку иновативни и одржливи иницијативи кои придонесуваат за подобра иднина за сите.

The post НЕТ БЕЗ ХЕЈТ Македонски Телеком доби награда за одржлив развој  appeared first on plusinfo.mk.

Македонски Телеком го заврши првиот квартал од 2026 година со раст на бројот на корисници, развој и инвестиции во мрежата, како и со одлични финансиски резултати.

Вкупните капитални инвестиции (CAPEX) на крајот на првиот квартал изнесуваат 411 милиони денари. Оперативната добивка пред камати, оданочување и амортизација (EBITDA) е зголемена за 2,8 проценти споредено со истиот период минатата година, а нето добивката за 0,6 проценти. Зголемени се и приходите од продажба за 5,8 проценти.

Раст и награди за најдобрата мрежа во Македонија

Македонски Телеком повторно ја освои престижната Ookla® награда за најдобра мрежа. Резултатите од мерењата покажаа дека нивната мрежа е најдобра во дури пет категории: најбрза мобилна мрежа, најбрза фиксна мрежа, најдобро мобилно видео искуство, најдобро мобилно гејминг искуство и статус на најдоследна мобилна мрежа во Македонија. Ова се однесува на втората половина на 2025 година. 5G мрежата на Телеком е достапна за 97% од населението во Македонија со гигабитни брзини во речиси сите градови во државата. Бројките го потврдуваат лидерството и во делот на оптичката инфраструктура со која покриваат 377.000 пристапи до оптика, што е речиси двојно повеќе во споредба со сите останати оператори на пазарот заедно и за 7,6 проценти повеќе споредено со истиот период од претходната година. Ова е резултат на стратегијата за големи инвестиции за развој на најдобрата инфраструктура.

Раст на бројот на корисници и лидерство во ИКТ

Посветеноста на компанијата да обезбеди супериорно корисничко искуство донесе зголемување на бројот на корисници и лидерство во сите сегменти.

Бројот на корисници на широкопојасен интернет е зголемен за 3,5 проценти и изнесува 226,5 илјади, а вкупниот број на интернет пристапи порасна за 3,0 проценти. Во мобилните комуникации, базата на корисници е зголемена за 1,9 проценти и изнесува 1,284 милиони.

Во фиксната телефонија компанијата остана на водечката позиција со 239.000 корисници. На ТВ пазарот остана на лидерската позиција со удел од 38,4 проценти. Новата генерација дигитална телевизија – MagentaTV е одлично прифатена, што донесе и раст од 6,1 проценти или 171.000 корисници.

Воведен е нов комуникациски концепт за корисниците – Magenta 1 Unlimited/Magenta 1 Business Unlimited. Со првата дигитална програма за наградување и поволности за корисниците – Magenta Moments, достигнати се 420.000 корисници. Според TRI*M индексот за мерење на задоволството на корисниците, тие се број 1 телекомуникациски бренд во Македонија.

Посветеноста на создавање и спроведување паметни решенија доведе до зголемување на приходите од системската ИТ интеграција за дури 17,1 проценти.

Грижа за вработените, општеството и животната средина

Комапнијата продолжува да работи на еднакво дигитално општество и на намалување на штетните влијанија врз животната средина. Нивнат грижа за вработените во првиот квартал на 2026 година им ја донесе наградата „Најпосакуван работодавач меѓу телекомуникациските компании на национално ниво“. Оваа стратегија и грижата за општеството, за влијанието врз природата и за вработените ќе продолжи и во наредните години.

The post ТЕЛЕКОМ ЈА ПОЧНА 2026 ГОДИНА СО РАСТ И СО ИНВЕСТИЦИИ Компанијата има 1,284 милиони корисници во мобилната комуникација appeared first on plusinfo.mk.

Македонски Телеком ja заврши 2025 година со раст во сите сегменти, финансиски раст и големи инвестиции во развојот на инфраструктурата. Ова е резултат на конзистентниот раст во текот на целата година и следење на стратегијата за најдобра мрежа и врвно корисничко искуство.

Вкупните капитални инвестиции (CAPEX) на крајот на годината изнесуваат 2.860 милиони денари наспроти 2.296 милиони денари на крајот од минатата година.

Оперативната добивка пред камати, оданочување и амортизација (EBITDA) е зголемена за 7 проценти споредено со минатата година, а нето добивката бележи раст од дури 13,2 проценти. И приходите од продажба се зголемени за 3,2%.

– Нашата посветеност на креирање и спроведување паметни решенија доведе до зголемување на приходите од системската ИТ интеграција за дури 19,6 проценти – велат од Телеком.

Најдобра и најбрза мрежа во Македонија

Македонски Телеком повторно ја освои престижната Ookla® награда за најдобра мрежа. Резултатите од мерењата покажаа најголема брзина на мобилната и фиксната мрежа и најдобра мобилна мрежа во првата половина на 2025 година.

Супериорноста на мрежата е резултат на долгорочно и стратешко инвестирање за ширење и модернизација на мрежата и развој на нови технологии.

– Нашата 5G мрежа е достапна за 97% од населението во Македонија со гигабитни брзини во речиси сите градови во државата. Бројките го потврдуваат лидерството и во делот на оптичката инфраструктура со која покриваме 369.000 пристапи до оптика што е речиси двојно повеќе во споредба со сите останати оператори на пазарот заедно и 7,2 проценти повеќе споредено со истиот период од претходната година – велат од компанијата.

Раст на базата на корисници и лидерство

– Нашата посветеност да обезбедиме супериорно корисничко искуство донесе  зголемување на бројот на корисници и лидерство во сите сегменти – нагласуваат од Телеком.

Бројот на корисници на широкопојасен интернет е зголемен за 3,4 проценти и изнесува 225.000, а вкупниот број на интернет пристапи порасна за 3 проценти. Во мобилните комуникации, базата на корисници е зголемена и изнесува 1,3 милиони. Во фиксната телефонија, остануваат на водечката позиција со 238.000 корисници. На ТВ пазарот остануваат на лидерската позиција со удел од 38 проценти. Новата генерација дигитална телевизија – MagentaTV е одлично прифатена што донесе и раст од 6,3 проценти или 169.000 корисници.

– Со првата дигитална програма за наградување и поволности за корисниците – Magenta Moments, достигнавме 400.000 корисници. Според TRI*M индексот за мерење на задоволството на корисниците, ние сме број 1 телекомуникациски бренд во Македонија – додаваат од Телеком

Зголемување на заработката по акција

Успешните резултати на компанијата придонесоа и за повисока заработка по акција во 2025 година кога се бележи раст од 4,7% во споредба со претходната година.

Ова е потврда дека нашата стратегија и технолошко визионерство одат во вистинската насока и се препознаени од корисниците.

Одговорност кон вработените, општеството и животната средина

– И оваа година активно работевме на еднакво дигитално општество и намалување на штетните влијанија врз животната средина. Преку проекти за намалување на дигиталниот јаз и еднакво дигитално општество, допревме до над 35.000 корисници. Придонесуваме за намалување на штетните емисии на CO2, со тоа што сме како компанија CO2 неутрални. Нашиот тим го движи прогресот и оваа година сме прогласени за најпосакуван работодавач меѓу телекомуникациските компании на национално ниво и го имаме престижниот сертификат Employer Partner – велат од Телеком.

Ова е нивна долгорочна стратегија и дел од нивната ESG агенда којашто ќе продолжат да ја следат и во наредните години.

The post ТЕЛЕКОМ ЈА ЗАВРШИ 2025 ГОДИНА СО СИЛЕН РАСТ И СО ИНВЕСТИЦИИ Мрежата 5G е достапна за 97% од населението во Македонија appeared first on plusinfo.mk.

Иницијативата #NetWithoutHate – Нет без хејт, која е започната пред две години, е дел од пошироката и долгогодишна соработка меѓу УНИЦЕФ и Фондацијата Телеком за Македонија и е насочена кон справување со најкомплексните предизвици на денешните генерации – оние што ги носи со себе присуството во дигиталниот простор.

Практично, во Македонија нема млад човек на возраст од 15 до 24 години кој не користи секојдневно интернет што со себе повлекува и опасност од сајбер-насилство, онлајн врсничко малтретирање, говор на омраза и штетни содржини.

Статус, коментар, лајк, не-лајк, стикерчиња, или каков било облик на изразен став  во сајбер просторот, е дел од секојдневниот живот на младите и може да биде извор на онлајн насилство.

Иако според истражувањата, речиси две третини од средношколците во Скопје потврдиле дека булингот е присутен во нивните училишта, а секој трет ученик изјавил дека бил жртва на некаква форма на врсничко насилство кое најчесто се случува токму онлајн, преку социјалните мрежи, досега официјално не е пријавен ниту еден ваков случај.

Ова е показател дека е потребна едукација, но дека таа не е доволна, туку е потребно охрабрување, како и сигурен простор во кој младите ќе знаат дека не се сами кога ќе одлучат да проговорат.

Токму ова е и идејата на иницијативата #NetWithoutHate – Нет без хејт, младинско движење за интернет без омраза, поттикнато  од УНИЦЕФ и Фондацијата Телеком за Македонија, а во партнерство со Сојузот на извидници на Македонија.

Имено, во февруари минатата година беа избрани 50 адолесценти од различни средини, поддржани од ментори и експерти, кои се обучуваа да бидат гласници на промена и двигатели на младинското движење за интернет без омраза во своите училишта и заедници.

Целата програма на оваа иницијатива се темели на фактот дека кај адолесцентите од 14 до 18 години, најсилно влијание имаат врсниците, а не институциите, или, како што велат и самите, младите најдобро можат да ги разберат младите.

Учениците кои се дел од иницијативата #Нет без хејт денеска ги претставија своите активности, претстојната кампања и прирачникот, осмислени како алатки за справување со онлајн-насилство, за побезбедна дигитална средина и пријавување сајбер-булинг, кои треба да бидат заокружени до крајот на годинава.

Меѓу нив, беа презентирани идеи за креирање младинска дигитална серија со дебати во подкаст-формат за онлајн омразата, модули родител–дете за поттикнување отворени разговори за сајбер-насилството, како и иницијатива за зајакнување на улогата на детските правобранители во училиштата за заштита на дигиталните права. Дополнително, беа претставени две идеи за онлајн платформи управувани од млади, кои ќе нудат практични совети и врсничка поддршка за деца што се соочуваат со онлајн притисок и предизвици поврзани со менталното здравје.

Младите учесници го претставија и новиот Прирачник за превенција од сајбер-насилство и говор на омраза, ко-креиран и тестиран заедно со деца и експерти.

Наменет за наставници, психолози, социјални работници и младински работници, прирачникот содржи 19 интерактивни активности кои промовираат дигитална безбедност, емпатија, одговорно онлајн однесување и свесност за влијанието што онлајн постапките го имаат врз другите.

Планирано е младите да реализираат иницијативи во најмалку 20 училишта и заедници, со можност во нив да се вклучат и други млади луѓе. Со  поддршка на институциите, заедниците и професионалците се очекува движењето да направи исчекор кон пошироко и подолгорочно влијание.

На настанот денес беа присутни и министерката за образование Весна Јаневска и министерот за дигитална трансформација Стефан Андоновски.

– Вкупно 34 случаи на врсничко насилство се пријавени годинава во Министерството за образование, но не е пријавен ниеден случај за насилство преку интернет, а вие велите дека го има. Јас би ве охрабрила, доколку сметате дека можеме да ви помогнеме, а можеме, кога ќе наидете на такво насилство, да го пријавите зашто ние имаме стручни служби што ќе поработат и со службите во училиштата и со наставниците, а ако има потреба и со насилникот, како и со жртвата, ако се обрати. Бидете мост меѓу интернетот и стручните служби. Поттикнете ги вашите врсници зашто разбирам дека меѓусебно најмногу се разбирате, дека на младите им требаат млади, но не исклучувајте ги возрасните. Некогаш и тие знаат да бидат корисни – порача министерката Јаневска.

Според министерот кој исто така ги слушна иницијативите на учениците активисти, освен со младите, во однос на сајбер-булингот, многу е важно да се работи и со родителите.

– Често ја повторуваме реченицата дека родителите не се научени да се справуваат со сајбер-насилството и сајбер-булингот зашто можеби тоа не постоело во времето кога тие растеле. Сега е некое друго време, кое го носи овој голем предизвик. Затоа е многу важно да се работи со родителите, но заедно и со сите партнери – училиштата, педагозите, стручните соработници и, секако, најмногу со младите – истакна Андоновски.

Како што информира Александра Ивановска од канцеларијата на УНИЦЕФ во Скопје, официјални пријави за онлајн-насилство генерално нема.

Како што информира Александра Ивановска од канцеларијата на УНИЦЕФ во Скопје, официјални пријави за онлајн-насилство генерално нема.

The post САЈБЕР БУЛИНГ ИМА, АМА НЕ СЕ ПРИЈАВУВА Децата од иницијативата „Нет без хејт“ ќе ги обучуваат да препознаваат онлајн насилство и врсниците и родителите appeared first on plusinfo.mk.

„One Macedonia“, подружница на унгарската 4iG Групација, официјално ја доби националната лиценца за работа како трет мобилен оператор во земјата. Лиценцата денеска свечено беше врачена на церемонија организирана од Агенција за електронски комуникации (АЕК), со што се означува почетокот на долгорочна стратешка инвестиција во екосистемот за поврзаност на Македонија.

На настанот присуствуваа претставници на Агенцијата за електронски комуникации, менаџментот на „One Macedonia“, како и претставници на националните медиуми. Овој значаен чекор следува по успешно завршената постапка за доделување на радиофреквенцискиот спектар.

Пал Заранди, претседател на одборот на директори на „One Macedonia“ и директор за мобилна стратегија во 4iG Групацијата, ја нагласи пошироката визија зад влезот на компанијата на овој пазар.

– Ова не е само лансирање на уште една телекомуникациска компанија. За нас, влегувањето во Северна Македонија претставува стратешко проширување на нашето присуство низ целиот Западен Балкан, регион кој е клучен за нашиот долгорочен раст. Северна Македонија игра важна улога во нашите пошироки амбиции за дигитална инфраструктура. Проектот за подморски кабел Албанија-Египет и поврзаниот проект „Балкански столб“, кој е поддржан од Европската комисија, отвора нов стратешки дигитален коридор помеѓу Европа и Африка. Географската и стратешката положба на Северна Македонија природно ја прави точка за проширување за оваа инфраструктура, зајакнувајќи ја релевантноста на земјата во регионалната и континенталната поврзаност на податоци. Оваа земја ќе служи како клучен јазол во регионалниот екосистем на податоци – изјави Заранди.

Тој додаде дека како земја-членка на НАТО, Северна Македонија е релевантна не само економски, туку и геополитички.

– Нашите проширувачки одбранбени и сателитски капацитети наоѓаат силна основа тука, а со градење на робусно, безбедно телекомуникациско присуство, поставуваме темели за поширока соработка во критичните технологии. Ова е ретка можност да се изгради национален оператор од нула, со најнапредни алатки, но исто така и да се обликува корпоративна култура насочена кон потрошувачите, агилна и транспарентна од првиот ден – рече Заранди.

Компанијата планира да инвестира до 100 милиони евра во изградба и развој на мрежата, вклучително и во инфраструктура, отворање нови работни места, обуки, како и долгорочна соработка со домашни ИКТ-компании.

– Ние не влегуваме на пазарот само за да се натпреваруваме, туку за да дадеме конкретен придонес. „One Macedonia“ претставува нов почеток за телекомуникациите во земјата. Без наследена инфраструктура, имаме можност работите да ги поставиме поинаку, односно поефикасно, побрзо и побезбедно. Нашата визија е да станеме доверлив дигитален столб на Северна Македонија, инклузивен, безбеден и отпорен. Оваа лиценца е нашата почетна точка, но вистинската работа започнува сега – изјави Брано Ѓуровиќ, извршен директор на „One Macedonia“.

Со почетна инвестиција за лиценцата, повеќе од 8 милиони евра, One Macedonia ја потврдува својата посветеност на долгорочен развој и градење локални партнерства, целосно усогласени со безбедносните и регулаторните рамки на Европска Унија. Компанијата работи врз принципи на транспарентност, иновации и заштита на јавниот интерес, со цел да ја поддржи дигиталната трансформација на државата и да создаде трајна вредност за граѓаните, институциите и економијата.

Директорот на Агенција за електронски комуникации (АЕК), Јетон Акику, ја истакна важноста на одлуката од аспект на развојот на пазарот и јавниот интерес.

– Доделувањето на лиценцата денес претставува клучен момент во дигиталниот развој на Северна Македонија. Го отвораме пазарот за нова конкуренција, притоа целосно усогласени со европските стандарди. „One Macedonia“ внесува нова динамика и сериозна стратешка посветеност. Веруваме дека овој чекор ќе придонесе за подобри услуги, многу иновации и побезбедна инфраструктура за граѓаните. АЕК ќе продолжи да обезбедува стабилна регулаторна рамка за поддршка на долгорочни инвестиции и соработка – рече директорот на АЕК.

Церемонијата заврши со заедничко изразена определба за поддршка на конкурентен и одржлив развој на телекомуникацискиот сектор во земјата.

The post ДИГИТАЛЕН ПРЕСВРТ ВО МАКЕДОНИЈА „One Macedonia“ доби лиценца и влегува како трет мобилен оператор appeared first on plusinfo.mk.

Секој студент кој е корисник на Македонски Телеком и кој има одобрен ваучер од 15.300 денари за набавка на електронски уреди, ќе може да го искористи својот Фамилијарен буџет како доплата при купување лаптоп, таблет или десктоп компјутер од понудата на Македонски Телеком, информира Телеком.

Право на аплицирање имаат студенти до 29 години запишани на додипломски студии во учебната 2025/2026 година, а акцијата трае до 31.12.2025.

По одобрувањето на ваучерот, студентот треба да одбере уред од официјалниот линк на компанијата и да ја посети најблиската продавница на Телеком, каде што ќе го користи ваучерот. Ваучерот се искористува во целост, а доколку вредноста на уредот е повисока, студентот може да ја покрие разликата преку својот Фамилијарен буџет.

За време на акцијата, секој студент на кој му е одобрен ваучер, ќе може да ја искористи единствената можност да го одбере T Tablet 2 по цена од само 1 денар.

Фамилијарниот буџет е достапен за сите Magenta 1 корисници со активен договор за лојалност, а неговата вредност зависи од минималната месечна обврска за мобилните линии вклучени во пакетот. Буџетот може да се користи за набавка на нови уреди од понудата на Македонски Телеком, вклучително и како доплата при користење студентски ваучер.

Македонски Телеком ги охрабрува студентите да аплицираат за ваучер и да ја искористат оваа единствена можност да набават ново парче технологија по навистина поволни услови. Ова претставува уште еден важен чекор кон обезбедување еднаков пристап до дигитални алатки и знаење – темел на современото, дигитално општество во кое живееме.

The post СО ВАУЧЕР И СО ФАМИЛИЈАРЕН БОНУС ДО НОВ ЛАП ТОП Македонски Телеком им нуди примамлива комбинација на студентите appeared first on plusinfo.mk.

Падна 5Г мрежата на Телеком поради што не можат да се остварат телефонски повици преку овој оператор.

Во функција е 4Г мрежата и преку неа може да се остваруваат телефонски повици, велат од службите на Телеком.

Станува збор за системски проблем на кој во моментов се работи.

Се очекува мрежата наскоро повторно да биде во функција.

The post ПАДНА 5Г МРЕЖАТА Телефонските повици преку Телеком може да се остварат само преку 4Г appeared first on plusinfo.mk.

Македонски Телеком продолжува со успешно работење и во третиот квартал на годината. Продолжува трендот на големи инвестиции во развој и модернизација на мрежата, раст во сите сегменти, зголемување на бројот на корисници и фокус на најдоброто корисничко искуство.

Оперативната добивка пред камати, оданочување и амортизација (EBITDA) е зголемена за 6,1 проценти споредено со минатата година, а нето добивката бележи раст од 14,9 проценти. И приходите од продажба на крајот од првите девет месеци од 2025 година се зголемени за 1,6 проценти.

Како резултат на посветеноста на креирање и спроведување паметни решенија зголемени се и приходите од системската ИТ интеграција за дури 28,6 проценти.

Инвестиции и ширење на мрежата

Со стратешко инвестирање компанијата продолжува да ја шири и модернизира мрежата и да воведува нови технологии. Вкупните капитални инвестиции (CAPEX) на крајот од третиот квартал од 2025 година изнесуваат 1.614 милиони денари, што е зголемување за 44,9% во споредба со истиот период од минатата година.

„Нашата 5G мрежа е достапна за 97 проценти од населението во Македонија со гигабитни брзини во речиси сите градови во државата. Со најголемата оптичка инфраструктура покриваме 60,45 проценти од домаќинствата или 361 илјада пристапи до оптика што е речиси двојно повеќе во споредба со сите останати оператори на пазарот заедно и 6,6 проценти повеќе споредено со истиот период од претходната година“, се наведува во соопштението од Телеком.

Супериорно корисничко искуство

Според TRI*M индексот за мерење на задоволството на корисниците, тие сме број 1 телекомуникациски бренд во Македонија. Нивната посветеност на супериорно корисничко искуство донесе зголемување на бројот на корисници и лидерство во сите сегменти.

„Бројот на корисници на широкопојасен интернет е зголемен за 3,4 проценти и изнесува 224 илјади, а вкупниот број на интернет пристапи порасна за 3,3 проценти. Во мобилните комуникации се бележи благо зголемување на базата на корисници која изнесува 1,3 милиони. Во фиксната телефонија, ја задржуваме водечката позиција со 62,7 проценти. И на ТВ пазарот остануваме на лидерската позиција со удел од 37,4 проценти. Новата генерација дигитална телевизија – MagentaTV е одлично прифатена што донесе и раст од 6,7 проценти или 165,9 илјади корисници“, се додава во соопштението.

Со првата дигитална програма за наградување и поволности за корисниците – Magenta Moments, достигнати се 341.000 корисници.

Позитивните резултати и континуираниот раст во сите сегменти се резултат на нашето стратешко инвестирање во најдобрата мрежа и супериорно корисничко искуство.

The post ТЕЛЕКОМ ОСТВАРИ ОДЛИЧНИ ФИНАНСИСКИ РЕЗУЛТАТИ Капитални инвестиции и раст во првите 9 месеци од годината appeared first on plusinfo.mk.

Во најраните години децата го градат својот поглед кон светот – тогаш, без да знаат, ги учат и предрасудите. Тие не се вродени, туку се стекнуваат преку семејството, училиштето, друштвото. Децата ги имитираат возрасните, ги повторуваат нивните зборови и ставови, дури и кога не ги разбираат.

Психолозите велат дека децата од 2–4 години забележуваат разлики (како боја на кожа или јазик), но не ги вреднуваат. Дури подоцна, по шестата и седмата година, под влијание на околината, почнуваат да кажуваат дека нешто е „чудно“ или „погрешно“ само затоа што е различно.

Околу тинејџерската возраст предрасудите може да се зајакнат или намалат, во зависност од влијанието на врсниците, образованието и контактот со различни групи

Со цел да ја потврди тезата дека предрасудите се учат, Телеком направи едукативен социјален експеримент.

Погледнете го видеото и видете што кажаа децата:

Психолозите советуваат: зборувајте со децата за различностите на позитивен начин. Развивајте толеранција, емпатија и почит.

„Да научиме поинаку. Да ги надминеме предрасудите за да вистински се поврземе“, порачуваат од Телеком.

The post 🎥 НА КОЛКУ ГОДИНИ СЕ СОЗДАВААТ ПРЕДРАСУДИТЕ? Телеком направи едукативен социјален експеримент appeared first on plusinfo.mk.

Македонски Телеком и Министерството за дигитална трансформација организираа заедничка работилница за креирање иновативно решение базирано на вештачка интелигенција (AI) за полесно пребарување на отворениот портал data.gov.mk. На решението работеа дигитални таленти и инженери од Македонски Телеком и студенти-волонтери во министерството коишто се вклучени во работа на национални проекти за дигитализација.

– Со оваа иницијатива, покажуваме како соработката помеѓу институциите, приватниот сектор и младите таленти може да резултира со конкретни, корисни решенија за граѓаните. Решението базирано на вештачка интелигенција ќе го олесни пристапот до податоците на порталот data.gov.mk и претставува чекор напред во нашата заложба за транспарентност, дигитализација и ефикасна јавна администрација. Благодарен сум на Македонски Телеком за партнерството и на волонтерите од нашето Министерство што со ентузијазам се вклучија во овој процес, ова е пример како заедно ја градиме дигиталната иднина на нашата земја – изјави министерот за дигитална трансформација Стефан Андоновски.

Решението „AI асистент“ ќе им овозможи на граѓаните полесен пристап и полесно пребарување на податоците што се достапни на платформата data.gov.mk. Платформите за отворени податоци овозможуваат податоците да се систематизираат и да се објавуваат на лесно разбирлив начин, што овозможува понатамошна анализа и користење од различни корисници, вклучувајќи и граѓански организации и компании. Новиот AI асистент ќе овозможи и подобрување на услугите и ефикасноста во јавниот сектор преку полесен и побрз пристап до информациите.

На работилницата, студентите работеа под менторство на професионалци од Телеком и го адаптираа и го тестираа AI асистентот којшто користи OpenAI GPT технологија за обработка на барањата и испорака на структуриран одговор кон корисниците. AI асистентот ќе биде достапен за сите граѓани наскоро.

– Со ова иновативно AI-решение, ја олеснуваме достапноста до важни податоци и ја поттикнуваме транспарентноста и дигиталната вклученост. Нашите дигитални таленти и инженери, заедно со младите волонтери од министерството, покажаа како со соработка може да се создадат напредни технолошки решенија. Но, ова е само еден чекор, ние ќе продолжиме да го зајакнуваме партнерството со Министерството за дигитална трансформација, со што ја зајакнуваме нашата посветеност да работиме за заедничка дигитална иднина за сите граѓани – изјави Горан Марковиќ, главен извршен директор на Македонски Телеком.

Работилницата се организираше во пресрет на „Western Balkan Digital Summit, Skopje 2025“, којшто почнува утре под покровителство на Министерството за дигитална трансформација, а се реализира во партнерство со Македонски Телеком.

The post СО ВЕШТАЧКА ИНТЕЛИГЕНЦИЈА СЕ ПРАВИ АЛАТКА ЗА ПОЛЕСНО ПРЕБАРУВАЊЕ Заедничка работилница на Телеком и Министерство за дигитална трансформација appeared first on plusinfo.mk.