Одборот на Претставничкиот дом на САД кој ги истражува злосторствата на Џефри Епштајн побара предавање на нови документи, меѓу кои и книга со пораки за неговиот 50. роденден, јави Би-Би-Си.

Судскиот повик, потпишан од претседателот на Одборот Џејмс Комер, означува проширување на истрагата. „Волстрит џурнал“ минатиот месец објави дека книгата ја составила Гислејн Максвел во 2003 година и дека содржи пораки од бројни познаници, меѓу кои и наводна честитка со потпис на американскиот претседател Доналд Трамп. Тој ја негираше автентичноста и поднесе тужба за клевета.

Од извршителите на оставината се бара да ја достават книгата до 8 септември, заедно со договори за доверливост, тестаментот на Епштајн и други документи што би можеле да се толкуваат како список на клиенти вмешани во трговија со луѓе или сексуални злосторства.

Иако Министерството за правда и ФБИ тврдат дека таков список никогаш не постоел, шпекулациите не престануваат. И самата Максвел, која издржува затворска казна, негираше дека постои.

Аферата „Епштајнови документи“ веќе недели го следи Трамп, и покрај тоа што никогаш не бил обвинет во врска со случајот.

Комер претходно упати повици и до Министерството за правда, како и до поранешниот претседател Бил Клинтон и поранешната државна секретарка Хилари Клинтон.

The post РОДЕНДЕНСКИОТ ТЕФТЕР НА ЕПШТАЈН ПОД ЛУПА ВО САД Во Претставничкиот дом се бара проширување на истрагата appeared first on plusinfo.mk.