Тејлор Свифт отворено проговори за притисокот што доаѓа со светската слава и откри како се справува со моментите кога сè околу неа станува „преголемо за да се контролира“.

Во новото интервју за „The Icon Sessions“, разговор што го водеше извршниот директор на Recording Academy, Харви Мејсон Џуниор, 36-годишната пејачка зборуваше за начинот на кој со текот на годините научила да се справува со јавноста, критиките и огромното внимание.

Како една од своите стратегии таа ја издвојува реченицата која си ја повторува како мантра:

– Ти го избра ова. Го избираш ова секој ден.

Свифт објасни дека кога работите ќе станат премногу тешки, се потсетува дека можела да се откаже пред нејзината кариера да стане толку огромна, но свесно избрала да продолжи. Причината, вели таа, е едноставна – искрено го сака она што го работи.

– Сè што доаѓа со ова, на крајот вреди сè додека можам да продолжам да создавам музика – вели Свифт, нагласувајќи дека нејзината главна мотивација не е да им се допадне на сите. Таа вели дека музиката ја создава за луѓето кои се препознаваат во нејзините емоции и приказни, а не за да добие универзално одобрување.

Во разговорот Свифт зборувала и за критиките, кои со години се составен дел од нејзиниот живот. Денес, вели таа, научила да не дозволува туѓото мислење целосно да го одредува нејзиното чувство за сопствената работа. А понекогаш негативните коментари дури и ја мотивираат. Со карактеристичен хумор откри дека знае да им „врати“ на критичарите преку музиката, па дури и намерно да употреби зборови што тие ќе мора да ги побараат во речник.

Нејзината искреност доаѓа во период на уште една голема пресвртница во кариерата. Во јуни годинава Свифт беше примена во Nashville Songwriters Hall of Fame, признание за нејзиниот придонес како текстописец. Во текот на годинава таа продолжи да се наоѓа во центарот на вниманието и поради приватниот живот, откако се омажи за НФЛ-ѕвездата Тревис Келси, но и поради новите музички проекти.

Иако денес е една од најпознатите личности во светот, Свифт вели дека со текот на времето научила да ја прифати цената што доаѓа со животот кој самата го избрала. За неа, најважното останува можноста да пишува и создава музика, а токму таа свесна одлука – повторно и повторно да го избира својот живот и покрај притисокот – е начинот на кој го зачувува сопствениот баланс.

The post 🎥 ТЕЈЛОР СВИФТ ОТКРИ КАКО СЕ СПРАВУВА СО СЛАВАТА Секогаш кога се чувствува преоптоварено, пејачката си ја повторува својата мантра appeared first on plusinfo.mk.