Одбележувајќи го Меѓународниот ден на волонтерството, 5 декември, и со цел промовирање на одржливоста и корпоративната општествена одговорност, ТАВ Македонија, подружница на ТАВ Аеродроми, членка на ADP групацијата, спроведува активности за садење дрвја во заедниците каде што работи – Општина Илинден и Општина Охрид.

Со активноста за садење дрвја во Општина Илинден, ТАВ Македонија вчера, 4 декември, ја започна својата традиционална зелена иницијатива „Садиме денес за одржливо утре“, која, како што велат од компанијата, има за цел да го зголеми бројот на нови дрвја во земјата и да придонесе за позелена средина во заедниците каде што работат двата македонски аеродроми – Меѓународниот Аеродром Скопје и Аеродромот Св. Апостол Павле Охрид.

Вработените на Меѓународниот Аеродром Скопје и на Општина Илинден, предводени од генералниот директор на ТАВ Македонија, Неџат Курт и градоначалникот на Општина Илинден, Александар Георгиевски, заеднички засадија 30 црвени сливи на просторот до основното училиште „Гоце Делчев“ во оваа општина, кои ќе го разубават местото планирано да се уреди како рекреативен парк за граѓаните на Илинден.

– Горд сум што втора година по ред ја спроведуваме нашата зелена иницијатива „Садиме денес за одржливо утре“ и што нашата стратешка цел кон одржливост се совпаѓа со зелените активности на Општина Илинден. Би сакал да им се заблагодарам на нашите вработени кои волонтираа и ни се придружија, како и на градоначалникот на Илинден и на вработените на Општината, со кои заеднички го дадовме нашиот придонес со секое засадено дрво. Нашите заеднички еколошки активности се симбол на нашата заедничка грижа за иднината. Со оваа акција, на Меѓународниот ден на волонтерството, 5 декември, покажуваме дека малите чекори водат до големи промени, кон почист воздух, позелени заедници и подобар живот за сите – изјави Неџат Курт, Генерален директор на ТАВ Македонија.

Од ТАВ Македонија велат дека нивната цел како општествено одговорна компанија е да придонесат за одржливост, особено во општините каде што работат двата аеродрома, со што ќе се подигне свеста за важноста на еколошката кауза и колективната грижа за природата.

Акцијата „Садиме денес за одржливо утре“ на ТАВ Македонија ќе продолжи во Охрид следната недела, каде што вработените на охридскиот аеродром ќе садат дрвја во оваа општина.

„Со донирање и садење дрвја во општините каде што работат Меѓународниот Аеродром Скопје и Аеродромот Св. Апостол Павле Охрид, ТАВ Македонија уште еднаш ја потврдува својата посветеност кон заедниците и животната средина, акција која станува традиција и преку која ќе продолжи да ја поддржува грижата за природата и проектите што создаваат трајни, позитивни промени во општеството“, порачува ТАВ Македонија.

The post ЗЕЛЕНА ИНИЦИЈАТИВА НА ТАВ АЕРОДРОМИ Втора година по ред вработените засадија дрвја во Илинден appeared first on plusinfo.mk.

Десет нови летови треба да ги поврзат македонските патници со Европа и со Азија, најавува ТАВ Македонија. Од крајот на октомври, започнува зимскиот распоред на летови 2025/26 со кој аеродромите во Скопје и Охрид добиваат нови дестинации и обновени линии.

Генералниот директор на ТАВ Македонија, Неџат Курт, најави директни линии со Данска, Финска и со Блискиот Исток. Паралелно, се подготвува засилена поврзаност со Шпанија и со Обединетото Кралство.

Меѓу најочекуваните летови се новите линии до Бари, Стокхолм и Базел, кои стартуваат на 27 октомври. Ден потоа, на 28 октомври, Скопје првпат ќе се поврзе со Мадрид, а повторно ќе се воспостави и летот до Ларнака. Како што е најавено, на 15 декември треба да почнат летовите за Прага и за Келн.

Проширување следува и кон крајот на март 2026 година. Според најавеното, Виз Ер ќе ја врати линијата Скопје–Будимпешта и ќе воведе нова кон Неапол, додека Охрид ќе добие врска со Милано. Десеттата нова рута е Женева, која ИзиЏет ја обновува на 3 ноември.

ТАВ Македонија и државните институции ќе ги претстават овие новини на туристички настани во Копенхаген, Стокхолм, Тајпеј, Сеул и Токио. Настаните се организирани во соработката со Националното здружение за дојдовен туризам во Македонија (НАИТМ).

The post 10 НОВИ АВИОДЕСТИНАЦИИ ЗА ЗИМАТА Летови до Прага, Мадрид, Келн, Базел, Стокхолм, Ларнака… appeared first on plusinfo.mk.

Реномираната авијациска организација Скајтракс (Skytrax) го рангираше Меѓународниот Аеродром Скопје, управуван од ТАВ Македонија, подружница на ТАВ Аеродроми, меѓу најдобрите десет аеродроми во регионот на Источна Европа, во рамки на својата програма наречена Светски Аеродромски Награди (Skytrax World Airport Awards).

Наградите кои Скајтракс ги доделува според гласовите на патниците, беа објавени на авијацискиот саем „Passenger Terminal Expo“ кој се одржа во Мадрид, Шпанија, каде што се собраа над 2.000 професионалци од авиоиндустријата, од повеќе од 120 земји во светот.

Најдобрите аеродроми во Источна Европа за 2025 година, според Скајтракс се: 1. Будимпешта; 2. Софија; 3. Тбилиси; 4. Талин; 5. Рига; 6. Кутаиси; 7. Белград; 8. Букурешт; 9. Батуми; 10. Скопје, информираше денеска во соопштение ТАВ Македонија.

Наградите на Скајтракс (Skytrax), наречени Светски Аеродромски Награди (World Airport Awards), се одредуваат преку резултатите од истражувањето за мислењето на патниците, кое беше направено од август 2024 до февруари 2025 година, односно во период од шест месеци.

The post СКОПСКИОТ АЕРОДРОМ Е МЕЃУ 10 НАЈДОБРИ ВО ИСТОЧНА ЕВРОПА Организацијата Скајтракс го истражи мислењето на патниците appeared first on plusinfo.mk.

ТАВ Македонија, подружница на ТАВ Аеродроми, аеродромскиот оператор на двата македонски аеродроми, ја известува јавноста дека сите аеродромски системи се во функција и засега нема откажани летови.

„Не се соочуваме со прекини или технички проблеми на нашите системи. Факт е дека одредени авиокомпании се соочуваат со тешкотии со нивните системи, но ние презедовме мерки за овозможување на непречени операции на аеродромите.

Сепак, ги советуваме и апелираме до сите патници да ги проверат и потврдат информациите за нивниот лет со авиокомпанијата или туристичката агенција преку која резервирале авиобилет.

Сите аеродромски сектори се во состојба на подготвеност поради глобалниот ИТ прекин и  се преземаат сите неопходни мерки за опслужување на нашите патници на најдобар можен начин“, соопштија од ТАВ Македонија.

The post НЕМА ПРЕКИНИ И ПРОБЛЕМИ Функционираат и двата аеродроми, соопшти ТАВ Македонија appeared first on plusinfo.mk.

Скопје и Сараево се поврзуваат со директна авиолинија. Летовите од Меѓународниот Аеродром Скопје до Меѓународниот Аеродром Сараево, од 2 октомври годинава, ќе ги спроведува грчкиот национален авиопревозник AEGEAN, член на STAR ALLIANCE, најавуваат од ТАВ Аеродроми.

Грчката авиокомпанија ќе почне да лета меѓу двата главни града од 2-ри октомври 2023 година, со воздухоплов ATR72-600, со три лета неделно, или секој понеделник, среда и петок.

– Возбудени сме што можеме да објавиме и да им честитаме на AEGEAN за одлуката да воведат лет од Скопје до Сараево од октомври оваа година и да овозможат одлична регионална поврзаност, од Атина на југ, преку Скопје, до Сараево на северот на Балканот. Оваа авио-конекција во исто време претставува и значајно достигнување во нашата посветеност како аеродромски оператор за подобрување на опциите за авионски патувања за нашите ценети патници – изјави Неџат Курт, генерален директор на ТАВ Македонија.

До крајот на летниот ред на летање за 2023 година, или до крајот на октомври, времето на поаѓање од скопскиот аеродром ќе биде во 19:00 часот, со време на пристигнување на аеродромот во Сараево во 20:10 часот, додека времето на поаѓање од аеродромот во Сараево ќе биде во 20:50 часот, со време на пристигнување на скопскиот аеродром во 21:50 часот. Во текот на зимската сезона 2023/2024, времињата на пристигнување/заминување ќе бидат слични.

Резервација на авионски билети е достапна на веб-страницата на AEGEAN https://en.aegeanair.com/ и преку туристичките агенции.

The post НОВА АВИОЛИНИЈА СКОПЈЕ-САРАЕВО Летовите стартуваат од 2 октомври годинава appeared first on plusinfo.mk.