Македонските спортисти го завршија настапот на Медитеранските игри 2026 во Таранто со шест освоени медали, од кои еден златен, два сребрени и три бронзени.

Последен од македонските спортисти настапи атлетичарот Дарио Ивановски, кој вечерва го освои седмото место на трката на 10 километри, со што и официјално беше ставена точка на македонското учество на Игрите.

Најсјајното одличје го освои каратистот Матеј Белистојаноски, кој се искачи на врвот на пиедесталот во категоријата до 67 килограми.

Две сребрени медали за Македонија освоија борачите во слободен стил Фати Вејсели во категоријата до 74 килограми и Реџеп Хајдари во категоријата до 97 килограми.

На македонското конто се најдоа и три бронзени одличја.

Бронза освои Вероника Консевиќ во слободен стил до 57 килограми, како и борачот Ахмад Магомедов во категоријата до 86 килограми.

Третиот бронзен медал го освои боксерот Ален Рустемовски во категоријата до 60 килограми.

За македонските спортисти, Игрите во Таранто беа четврто учество на Медитеранските игри.

На Мерсин 2013, Македонија освои пет медали – едно сребро и четири бронзи.

Четири години подоцна, на Тарагона 2018, македонските спортисти имаа уште поуспешен настап со шест медали – две златни, едно сребрено и три бронзени.

На Оран 2022, македонската експедиција освои три медали – едно злато и две бронзи.

Со шесте одличја од Таранто, Македонија го повтори бројот на медали од Тарагона, но со различна распределба на одличјата.

Пред последниот натпреварувачки ден во Таранто, на кој се предвидени женскиот и машкиот полумаратон, како и машкото финале во ватерполо, најуспешна на Игрите е домаќинот Италија.

Италијанските спортисти имаат освоено 73 златни, 78 сребрени и 72 бронзени медали.

The post ШЕСТ МЕДАЛИ ЗА МАКЕДОНИЈА НА МЕДИТЕРАНСКИТЕ ИГРИ Белистојаноски донесе злато, борачите блескаа со четири одличја appeared first on plusinfo.mk.

Македонскиот борач Реџеп Хајдари освои сребрен медал на Медитеранските игри во Таранто. Во финалето во категоријата до 97 килограми загуби од Даурен Куруглиев од Грција со 0-6.

Хајдари претходно го обезбеди финалето со победата над Французинот Адлан Вишканов со 3-2.

До медалот стигна откако во групната фаза забележа победа и пораз. Токму Куруглиев го совлада и во таа фаза од натпреварувањето.

Македонија така стигна до 3 медали во борење во Таранто. Фати Вејсели исто така освои сребро, а Ахмад Магомедов бронза.

Вејсели во финалето до 74 килограми загуби од Ислам Дудаев од Албанија со 0-4. Магомедов го освои бронзениот медал во категоријата до 86 килограми со победа од 10-0 над Италијанецот Габриеле Николини.

The post МАКЕДОНСКИТЕ БОРАЧИ СО 3 МЕДАЛИ ВО ТАРАНТО Хајдари и Вејсели сребрени, Магомедов бронзен appeared first on plusinfo.mk.

Македонија го почнува своето најмасовно учество досега на Медитеранските игри. Во Таранто пристигна рекордна делегација од 130 членови, меѓу кои 88 спортисти.

Историски момент има и надвор од спортските терени. Претседателката на Македонија Гордана Силјановска-Давкова е во Таранто за да им даде поддршка на македонските претставници.

Ова е првпат претседател на државата да присуствува на Медитеранските игри откако Македонија настапува на оваа спортска манифестација.

Силјановска-Давкова денеска ги посети македонските спортисти во Олимпиското село. Таа се запознала со членовите на делегацијата и им посакала успешни настапи.

Претседателката ќе престојува два дена во Таранто. Вечерва ќе присуствува и на свеченото отворање на Медитеранските игри, кои се одржуваат 20 пат по ред.

Македонските спортисти, сепак, веќе ја почнале својата натпреварувачка програма. Женската одбојкарска репрезентација вчера го одигра првиот натпревар против Турција.

Македонија ќе има претставници во 19 од вкупно 33 спортови. Ќе настапат во атлетика, бадминтон, бокс, велосипедизам, коњички спортови, мечување, ритмичка гимнастика, џудо, карате, стрелаштво, пливање, таеквондо, тенис, триатлон и борење.

Земјата ќе ја претставуваат и женските репрезентации во ракомет и во одбојка. Ќе настапат и машкиот тим во баскет 3×3 и фудбалската репрезентација до 21 година.

Таранто е четвртиот настап на Македонија на Медитеранските игри како независна држава. Претходните учества биле во Мерсин во 2013, Тарагона во 2018 и во Оран во 2022 година.

Македонските спортисти досега освоиле вкупно 14 медали на Медитеранските игри.

Игрите „Таранто 2026“ ќе траат до 3 септември.

The post ИСТОРИСКО УЧЕСТВО НА МАКЕДОНИЈА НА МЕДИТЕРАНСКИТЕ ИГРИ Рекордни 88 спортисти, првпат со поддршка од претседател на државата appeared first on plusinfo.mk.