Најновиот документарен филм на македонската режисерка Тамара Котевска, „Приказната за Силјан“, ќе ја има својата македонска премиера на 4 јануари 2026 година (недела), со почеток во 20:30 часот, во Македонскиот народен театар.

Филмот, кој веќе зад себе има значајни меѓународни фестивалски прикажувања, ја раскажува интимната и симболична приказна за односот меѓу човекот и природата, преку следење на животот на еден земјоделец и повреден бел штрк – мотив инспириран од македонскиот фолклор и митологија.

За „Приказната за Силјан“ светските критичари пишуваат дека е „триумф“, „апсолутен шармер“ и „импресивно дело“, а го опишуваат и како „прекрасна и нежна меланхолија, деликатно поврзана со екосистемот што трпи притисок од социополитичките кризи во Македонија“.

„Силјан“ е ново авторско остварување на Котевска по светскиот успех на „Ханиленд“, филм кој ја постави Македонија на мапата на современиот документарен филм. Новиот проект продолжува во поетски и хуманистички клуч, со нагласена визуелна тишина и силна метафоричност.

Билетите ќе бидат пуштени во продажба во понеделник, 29.12.2025 преку платформата на drugastrana.mk

По празниците филмот ќе продолжи да се прикажува во Скопје и низ останатите македонски градови.

The post „СИЛЈАН“ ЌЕ СЛЕТА ПРЕД МАКЕДОНСКАТА ПУБЛИКА Премиерата е на 4 јануари во МНТ appeared first on plusinfo.mk.

Во престижниот ИФЦ (International Film Center) во Њујорк вечерва ќе се одржи американската премиера на документарниот филм Приказната за Силјан (The Tale of Silyan) на македонската режисерка Тамара Котевска.

Веднаш по проекцијата ќе следи разговор со публиката на кој ќе учествуваат Тамара Котевска, режисер и продуцент, и Јан Декар (Jean Dakar), кинематографер и продуцент, на кој публиката директно од авторите ќе може да ја чуе приказната за создавањето на филмот и за неверојатниот однос меѓу човекот и штркот кој го инспирираше целиот проект.

Филмот ја започна својата светска промоција во Венеција, каде ја освои престижната награда за Кино-уметност на Венецискиот филмски фестивал. Тоа беше првиот сигнал дека филмот ќе го привлече вниманието на документарниот свет. Следеа значајни награди и номинации од релевантни филмски фестивали: NY Doc, IDA (International Documentary Awards), Bergen, Cinema Eye Honors, Coronado Island Film Festival, Калифорнија и ред други.

Посебен успех на филмот беше откупувањето на правата за емитување од страна на „Нешнал џиографик“.

Овој филм е македонски кандидат за Оскар за категоријата „најдобар странски филм”, како и во категоријата „најдобар документарен филм”, пријавен токму од Нешнал џиографик.

Со вечерашната премиера во Њујорк филмот се среќава со американската публика, критичарите и фестивалските селектори, а се очекува и голем интерес од македонската заедница во овој дел на САД.

The post СИЛЈАН ШТРКОТ ВЕЧЕРВА ЌЕ СЛЕТА НА МЕНХЕТЕН Американска премиера на филмот на Тамара Котевска appeared first on plusinfo.mk.