таксират фестивал Archives - plusinfo.mk

„ЛУЗЕР ФЕСТ“ НА 3 ДЕКЕМВРИ ВО МКЦ Победникот ќе го избира публиката и жири со тајно гласање

МИА — Mon, 28 Nov 2022 11:53:34 +0000

Отворениот конкурс на „Лузер Фест“ за пријава на демо изведувачи заврши и направена е селекцијата на 8 финалисти од апликациите на млади таленти. За победникот ќе одлучува публиката и жири со тајно гласање за една од групите, кои ќе се натпреваруваат на 3 декември во Младинскиот Културен Центар – Скопје.

– Во конкуренција имаме 8 бенда кои ни се придружуваат од повеќе краеви од Македонија, и тоа „БЕСЕДА“ од Куманово, метал група која создава моќен звук што ги пробива човечките емоционални граници, „ХАЛФГАД“ (HALFGOD) од Кичево, „ЕНДЕМСКИ ВИД“ од Кавадарци, прераснати од кавер група до авторски бенд, панк-рокерите од Велес „Оловна Рестрикција“, „Џеф Бахами“ (Jeff Bahami) од Битола музика на „професор“ по роботика и неговите хуманоиди, како и три групи од главниот град хеви-метал бендот „Растејнд“ (Ruststained), „МЕНЗЕЛ“ (MENZEL) алтернативна рок група на студенти кои се наоѓаат според заедничкиот интерес кон уметноста и „ХАРАКИРИ“ проект на музичари од разни бендови кои прават обид да го освежат концептот на рок трио – информираат организаторите.

Публиката и жирито, кое ќе биде непосредно објавено пред концертот, ќе одлучуваат за победникот со тајно гласање на вечерта на настанот. Билетот, кој ќе се продава по цена од 100 денари воедно ќе важи за гласачко ливче, на кое со заокружување на својот омилен изведувач ќе биде одреден најдобриот.

– Речиси 20 години традиционалниот предвесник на главната вечер на „Таксират Фестивал“, го става фокусот на младите нови музичари, поттикнувајќи ги да ги покажат своите таленти и можност да продолжат да ја градат својата музичка кариера професионално. Со таа причина, како и досега, за најдобриот следува награда – снимање и издавање на студиски албум во професионално студио, под етикетата на „Пасворд Продакшн“ – велат организаторите на настанот.

The post „ЛУЗЕР ФЕСТ“ НА 3 ДЕКЕМВРИ ВО МКЦ Победникот ќе го избира публиката и жири со тајно гласање appeared first on plusinfo.mk.

МАНУ ЧАО ДОАЃА НА „ТАКСИРАТ“ Концертот е закажан за 26 септември во МКЦ

плусинфо — Tue, 13 Sep 2022 13:16:22 +0000

Ману Чао пристигнува во Скопје со акустичен концерт кој ќе се одржи на 26 септември со почеток во 20:00 часот во Младинскиот Културен Центар, во склоп на програмата на Таксират фестивал.
Француско-шпанскиот уметник Ману Чао е култно име на бунтовната музика и еден од најважните гласови на музиката на светот, а привилегија на публиката на Таксират е што во својата мапа на секогаш внимателно избрани места за свирење големиот Ману Чао упорно инсистира на Скопје! Неговиот прв настап во Македонија се одржа во 2002 година и остана запаметен како еден од најдобрите што ги има видено македонската публика. Од тој посебен момент Ману Чао важи за другар на Таксират, на Скопје и на Македонија, а секое негово навраќање кај нас носи обострана неизмерна радост, како што впрочем и самиот напиша во најавата за овој концерт.
Во својата музика тој спојува различни култури и влијанија, панк, рок, ска, реге, салса и традиционални песни во кои го пренесува пркосот кон предизвиците на денешниот свет. Од имиграција до консумеризам и глобализација. Од основањето на славната група „Мано Негра“ во 1987 година до денес, Ману Чао е уметникот кој ги наполни дури и најголемите стадиони ширум светот, продаде милиони албуми и сними безброј хитови кои се искачија на врвот на топ листите, особено во земјите од Европа и Латинска Америка, како што се „Clandestino“, „Bongo Bong“, „Me Gustas Tu“, „Mala Vida“ и многу други. Тој е револуционерно продорен и подеднакво мирољубив музичар, пејач, гитарист, текстописец, полиглот, патник и активист кој го започна латинското алтернативно движење во 80-тите и ги надмина музичките стилови и географските граници во неговата музика. Без разлика дали тој настапува со „Мано Негра“, „Радио Бемба“ или „Ла Вентура“, атмосферата и енергијата на неговите концерти се практично неспоредливи.

Овој пат, Ману Чао пред својата публика се враќа во акустична постава. Заедно со гитаристот Лусијано Едуардо Фалико и долгогодишниот музички партнер, перкусионистот Филип Тебул (познат како Гарбансито, член на Mano Negra и Radio Bemba), Ману сега патува со најинтимните концерти во својата кариера, без ѕвездени статуси, без толпа од стотици илјади и по правило во мали концертни простори кои веднаш се распродаваат.
Веќе се распродадени и сите претходно најавени концерти на Ману Чао во регионов, а меѓу нив рекорден е белградскиот настап за кој билетите се распродадоа за помалку од 24 часа.
За концертот на Ману Чао во Скопје, билетите се веќе пуштени во продажба и тоа со нивната најповолна цена, 700 денари која ќе важи само за првите 200 билети достапни за купување во продажната мрежа на МкТикетс низ Македонија.
Концертот на Ману Чао во Скопје е во организација на „Пасворд Продакшн“ и се одржува во склоп на програмата на фестивалот Таксират. Покрај овој концерт, дел од годинашното, 24-то издание на „Таксират“ беа и двата распродадени концерти на светскиот музички феномен „Дед Кен Денс“ кој во мај годинава за прв пат настапи кај нас, а наскоро ќе бидат објавени уште многу нови изведувачи и настани во рамките на Таксират Фестивал.

The post МАНУ ЧАО ДОАЃА НА „ТАКСИРАТ“ Концертот е закажан за 26 септември во МКЦ appeared first on plusinfo.mk.

Таксират Фестивал: ПИН ТВ со културен и динамичен маратон

плусинфо — Mon, 14 Dec 2020 07:22:53 +0000

Првата целодневнa културна програма, спакувана во динамичен телевизиски формат со времетраење од 13 часа, стартуваше вчера.

ПИН ТВ се емитуваше премиерно на МРТ 3 и на Јутуб и Фејсбук каналите на Таксират Фестивал & Пин музичката конференција, со почеток од 11 часот, па се до полноќ!

Таксират Фестивал подготви супер богата и досега најголема културна ТВ-програма!

Од Раде Шербеџија до Фејт Но Мор, од Уганда до Западно Ѓорче, со над 200 гости и изведувачи од 40 држави, Таксират Фестивал подготви досега најдолга и најбогата културна ТВ-програма.

Форматот на ПИН ТВ е лесен и динамичен, со кратки и ефикасни едукативни дискусии, музика и забавни содржини. Низ програмата нè водеше Ида Престер која најави повеќе од 50 различни содржини, во кои на најважните теми дискутираа професионалци од областа на културата.

The post Таксират Фестивал: ПИН ТВ со културен и динамичен маратон appeared first on plusinfo.mk.