Поранешниот претседател на Косово и заповедник на ОВК, Хашим Тачи е прогласен за виновен за воени злосторства и осуден на 25 години затвор пред Специјалниот суд за Косово во Хаг.

Судот, исто така, ги прогласи Кадри Весели, Реџеп Селими и Јакуп Красниќи за кривично одговорни за произволно лишување од слобода, суров третман, тортура и за незаконски убиства. Красниќи доби 25 години затвор, Весели 18, а Селими 13 години затвор.

Судот утврди дека злосторствата биле сериозни и географски распространети и дека биле извршени во 14 косовски општини и во две области во северна Албанија. Сепак, тој ги ослободи четворица поранешни водачи на Ослободителната војска на Косово од обвиненијата за Злосторства против човештвото.

Тачи знаел за злосторствата и лично учествувал во нив

Судечкиот совет во Хаг утврди дека Тачи дал клучен придонес во постигнувањето на заедничка криминална цел. Тој и другите обвинети, според судот, назначувале лојални луѓе на различни позиции со цел да ја одржат контролата во рамките на Ослободителната војка на Косово.

Судот, исто така, утврди дека Тачи знаел за значителен број злосторства извршени против луѓе кои се сметале за противници, но не презел мерки за нивно спречување или за казнување на сторителите.

Судот заклучи дека Тачи лично учествувал во злосторствата и дека ширел или помогнал во ширењето лажни информации за нив, со што придонел кон политиката на неказнивост.

Сите четворица дејствувале заедно

Според наодите на судот, одговорноста на четворицата осудени е индивидуална, но тие дејствувале заедно за да постигнат заедничка криминална цел.

Судијата Чарлс Смит рече дека тие заеднички основале притворни установи, им доделувале на други лица улоги и позиции потребни за постигнување на таа цел и ги ширеле своите политики преку публикации.

Целта биле членови и претставници на други политички и воени сили, особено лица поврзани со Демократскиот сојуз на Косово и Вооружените сили на Република Косово. Меѓу нив имало лица поврзани со властите на Сојузна Република Југославија и членови на малцинствата, вклучувајќи ги Србите и Ромите.

96 лица убиени, најмалку 385 нелегално притворени

Судечкиот совет утврди дека од април 1998 до јуни 1999 година, во 12 косовски општини и во една област во Албанија, припадниците на ОВК презеле дејствија што довеле до убиство на 96 лица кои не учествувале активно во борбите.

Исто така, утврди дека најмалку 385 лица биле нелегално уапсени и притворени на локации контролирани од ОВК. Меѓу притворените имало наставници, земјоделци, жени и деца.

Судијата рече дека притворените биле обвинети дека се „српски соработници“, „предавници“ или „шпиони“, иако немало докази дека сториле кривично дело. Некои биле уапсени поради гласини за соработка со српските сили, а други поради нивната етничка припадност.

– Во разни затворски установи, некои членови на ОВК редовно ги клоцале, а во неколку наврати и брутално ги тепале затворениците, удирајќи ги, меѓу другото, со кундаци од пушки, палки, стапови, рачки од секири, метални прачки и електрични кабли. Членовите на ОВК ги обесувале некои затвореници за нозе и ги тепале додека ги виселе наопаку. Некои затвореници биле принудени да се борат едни со други. Многу затвореници биле тепани сè додека повеќе не можеле да стојат, нормално да дишат или сè додека не ја изгубиле свеста – рече Смит.

Судот утврди дека притворените биле држени во нехумани услови и сериозно физички и психички малтретирани. На некои притвореници им биле извадени ноктите и им биле скршени екстремитетите, а многу преживеани сè уште ги чувствуваат последиците од тортурата.

Ослободени од обвинението за злосторства против човештвото

Судот заклучи дека обвинителството не успеало да докаже постоење на широко распространет напад врз цивилното население, што е неопходен правен услов за осуда за злосторства против човештвото.

Четирите обвинети затоа беа прогласени за невини за делото Злосторства против човештвото, кое вклучува прогон, затворање, нехумани дела, тортура, убиство и присилно исчезнување. Тие беа прогласени за виновни за исти или поврзани дела квалификувани како Воени злосторства.

„Ние не ја судиме ОВК или нејзината борба“

На почетокот на изрекувањето на пресудата, судијата Смит нагласи дека не се суди Ослободителната војска на Косово и легитимитетот на нејзината борба, туку четворицата обвинети за конкретни злосторства.

– Овој случај не е за легитимитетот на Ослободителната војска на Косово – рече Смит.

Тој додаде дека судот не ја споредува одговорноста на страните во конфликтот, ниту пак одлучува за злосторствата извршени од српските сили и паравоените единици против Албанците во Косово.

Смит, исто така, рече дека постапката се одржала во „атмосфера на заплашување на сведоците“. Тој изјави дека некои сведоци лажеле или ги промениле своите претходни изјави и дека некои можеби го сториле тоа од страв за безбедноста или чувство на лојалност.

Обвинителството побара 45 години затвор за секој обвинет, додека нивната одбрана побара ослободителни пресуди. Пресудата е од прв степен и може да се обжали.

Во Приштина и во Хаг се одржуваат големи собири за поддршка на Тачи и другите обвинети.

The post ХАШИМ ТАЧИ ОСУДЕН НА 25 ГОДИНИ ЗАТВОР Лично учествувал во воени злосторства appeared first on plusinfo.mk.