Поголема количина на пури во вредност од четири илјади евра се запленети од мобилен царински тим од Одделението за оперативни работи по извршена контрола на автобус на влез во државата на граничен премин Табановце. Против лицето К.Б, македонски државјанин, е поднесена кривична пријава за сторено кривично дело криумчарење. Осомничениот е возач на автобусот вработен во компанија која врши меѓународен патен превоз.

Како што информираат од Царинската управа, во конкретниот случај, мобилен царински тим, поради основано сомневање го застанал автобусот на детална контрола при што под седиштата, како и во фабричка шуплина се пронајдени вкупно 312 парчиња пури од различни производители. Избегнатите давачки се проценети на 174,9 илјади денари. Акцизните производи, кои се предмет на обид за криумчарење се запленети и со донесување на наредба од ОЈО Куманово ќе бидат предадени на Агенцијата за управување со одземен имот.

Царинската управа, велат оттаму, продолжува со засилени контроли со цел спречување на нелегална трговија со акцизни производи, заштита на финансиските интереси на државата, заштита на здравјето на граѓаните и овозможување услови за фер економија.

The post 📽️ ЗАПЛЕНЕТИ ПУРИ ВРЕДНИ 4.000 ЕВРА Возач на автобус се обидел да ги прошверцува во државата appeared first on plusinfo.mk.

Речиси 35.000 евра непријавени пари биле пронајдени во автобус што сообраќал од Германија кон Македонија, при контрола што денеска ја спровела полицијата на подрачјето на Тетово.

Според информациите од МВР, автобусот „мерцедес“, сопственост на туристичка агенција, бил запрен од полициски службеници од Мобилната единица за компензаторни мерки. Возилото го управувал 37-годишниот Р.Ф. од тетовското село Доброште.

При прегледот на автобусот, полицијата во приколката пронашла повеќе канти за кои, како што се наведува, немало соодветна документација и дозволи за транспорт.

Дополнително, кај еден од патниците – 20-годишниот Ф.И. од Теарце, биле пронајдени пет плика со различни апоени во вкупна вредност од 34.965 евра.

Според МВР, парите биле внесени во државата преку граничниот премин Табановце без да бидат пријавени, а патникот не поседувал документи за потеклото и сопственоста на средствата.

Двете лица биле приведени, а по целосното расчистување на случајот против нив ќе бидат поднесени соодветни пријави.

The post ВО АВТОБУС ОД ГЕРМАНИЈА ПРОНАЈДЕНИ РЕЧИСИ 35.000 ЕВРА Патник од Теарце не ги пријавил парите appeared first on plusinfo.mk.

На граничниот премин Табановце е спречен обид за нелегален пренос на околу 500.000 евра во кеш, соопшти директорот на Царинската управа, Бобан Николовски.

Според неговите изјави, парите биле откриени во специјално направен бункер во минибус кој влегувал во земјата, внимателно спакувани во повеќе ќеси.

Минибусот, кој превезувал седум патници и бил сопственост на туристичка агенција од Албанија, бил детално проверен откако царинските службеници забележале сомнителни преправки на возилото.

По првичната проверка, бил ангажиран и царинскиот службен пес, кој укажал на можно присуство на скриена стока на истото место. Потоа возилото било скенирано со мобилни скенери, по што бил потврден сомнежот за криумчарење.

Во специјално конструираниот простор биле пронајдени 14 ќеси со вкупно 500.000 евра.

– Ова е најголема заплена досега во историјата на Царинската управа на Република Македонија. Девизите и возилото се трајно одземени, а сторителот, државјанин на Албанија, со иницијали Џ. Г., кој управувал со минибусот, е соодветно гонет, за што веќе е изречена судска пресуда од Основниот суд во Куманово. Обидот е откриен во акција на Одделението за оперативни работи на влез на државниот граничен премин Табановце, во која е извршена детална контрола на минибусот, сопственост на туристичка агенција од Албанија со која биле превезувани седум патници – рече Николовски.

Николовски изјави дека се работи за една од најголемите, ако не и најголемата заплена на готовина во историјата на Царината.

Според него, одземените пари и возилото се трајно конфискувани, а случајот е веќе процесуиран, при што е донесена и судска одлука од Основниот суд во Куманово.

Тој додаде дека конечната дестинација на запленетите средства ќе ја утврдат надлежните институции, по што тие ќе бидат уплатени во државниот буџет.

Царинските службеници кои учествувале во акцијата ќе бидат наградени со по 10.000 денари, соопшти директорот.

– Сакам јавно да се заблагодарам на тимовите од Одделението за оперативни работи за брзата реакција и школски одработената професионална контрола. Апелирам до сите, дека секој обид за нелегален прекуграничен пренос на готовина и обид за криумчарење ќе биде најстрого санкциониран од страна на царинските службеници при Царинската управа – потенцира директорот на Царината, Николовски

The post 🎥 ЦАРИНСКО КУЧЕ НАДУШКА 500.000 ЕВРА Парите биле скриени во ќеси и во бункер на минибус appeared first on plusinfo.mk.

44-годишен маж од Прилеп е приведен на граничниот премин Табановце под сомнение дека измамил лице од Валандово за повеќе од 88.000 евра, ветувајќи му лажно лекување во странство за неговата сопруга.

Како што информира полицијата, станува збор за Б.К., кој бил уапсен по координирана акција на криминалистичката полиција во соработка со СВР Струмица и ОВР Валандово.

Според истрагата, измамата се случувала во периодот од јули до ноември 2025 година. Осомничениот го довел во заблуда оштетениот, убедувајќи го дека ќе организира лекување во странство за неговата сопруга. Верувајќи во тоа, мажот во повеќе наврати уплатил вкупно околу 88.300 евра.

Во меѓувреме, жената починала, а ветеното лекување никогаш не било реализирано.

По апсењето, осомничениот е изведен пред судија на претходна постапка во Основниот суд во Гевгелија, кој му одредил мерки за претпазливост додека трае постапката.

The post 📽️ ЗЕЛ 88.000 ЕВРА ЗА ЛАЖНО ЛЕКУВАЊЕ, ЖЕНАТА ПОЧИНАЛА Прилепчанец ветувал дека ќе помогне, но излажал appeared first on plusinfo.mk.

Автобус на компанијата „Дурмо Турс“ бил запрен на граничниот премин Табановце, откако во него била пронајдена муниција, објави Алсат ТВ. По настанот, Јавно обвинителство потврди дека е поведена истрага против две лица, на кои им се определени мерки на претпазливост.

Според информациите, мобилни екипи на Царинската управа при контрола на автобус на компанијата „Дурмо Турс“ пронашле околу 600 патрони со калибар за лесно и долго оружје. Неофицијално, муницијата му припаѓала на еден од возачите, кој ја криел на посебно место во возилото.

Од обвинителството потврдуваат дека постапката е во тек.

„ОЈО Куманово поведе истрага против 2 лица на кои по предлог на обвинителот им се определени мерки на претпазливост. Продолжуваат да се спроведуваат дејствија за целосно расчистување на настанот и испитување на потенцијална инволвираност и на други лица“, соопштија од обвинителството.

Според надлежните, се работи на целосно утврдување на потеклото на муницијата и нејзината намена, како и дали во случајот се вмешани и други лица.

The post 600 ПАТРОНИ ПРОНАЈДЕНИ ВО АВТОБУС НА „ДУРМО ТУРС“ Обвинителството отвори истрага за двајца осомничени appeared first on plusinfo.mk.

Царинската управа откри и спречи обид за криумчарење на 4.800 пакувања никотински ќесички во вредност од околу 1,2 милиони денари, информираа од институцијата. Осомничениот е приведен, а против него ќе биде поднесена кривична пријава за кривично дело „криумчарење“.

Според соопштението, акцијата ја реализирал Секторот за контрола и истраги, откако мобилен царински тим запрел возило во внатрешноста на државата, веднаш по влезот преку граничниот премин Табановце.

При контролата биле пронајдени вкупно 4.752 пакувања никотински ќесички со никотин и уште 48 пакувања никотински ќесички – снус што содржат никотин и тутун. Стоката и возилото се запленети, а лицето е приведено на сослушување кај инспекторите за истраги.

Од Царинската управа посочуваат дека со навремена реакција е спречено нелегално пласирање на производите на домашниот пазар.

– Секторот за контрола и истраги откри и спречи обид за криумчарење на 4.800 пакувања со никотински ќесички со вредност од 1,2 милиони денари. Против сторителот ќе биде поднесена кривична пријава за кривично дело „криумчарење“ – велат од Царинската управа.

Во предистражната постапка било утврдено дека спорната стока требало да биде предадена на лице за кое Царинската управа минатата година веќе поднела кривична пријава за прикривање стоки предмет на криумчарење, цигари без акцизни маркички и царинска измама.

По целосно документирање на случајот, против осомничениот ќе биде поднесена соодветна кривична пријава до надлежното јавно обвинителство.

The post ЗАПЛЕНЕТИ 4.800 ПАКУВАЊА СО НИКОТИНСКИ ЌЕСИЧКИ Царината спречи шверц тежок 1,2 милиони денари appeared first on plusinfo.mk.

Софистициран канал за шверц на марихуана од Македонија кон Србија функционирал под маска на легална трговија со текстилна стока. Дрогата била пакувана во пратки декларирани како „квалитетни лесни перници“, со што се избегнувале детални проверки на граничните премини. На документацијата стоката изгледала како обичен производ со ниска вредност и безбедносен ризик, што им овозможувало на организаторите непречено да ја транспортираат, објави емисијата „Код“ на ТВ Телма.

Обвинителството за гонење на организиран криминал и корупција отвори истрага против шест лица поврзани со околу петте тони марихуана пронајдени во Коњух, Србија, кои од земјава излегле преку граничниот премин „Табановце“.

Имено, според „Код“, марихуаната влегла во Србија во камион декларирана како „квалитетни лесни македонски перници од Прилеп“ кои „требало“ да патуваат за Манчестер, Англија. Перниците биле извадени од камионот и претоварени во друг, а првиот камион бил натоварен со кутиите марихуана. Возач на камионот бил Александар Ивановски, кој сега е притворен.

Според соопштението на Обвинителството, првоосомничен е сопственикот на скопската фирма „Алфафарм“, Предраг Брковиќ, кој заедно со други засега неидентификувани лица организирал набавка на марихуана и нејзино повеќекратно транспортирање од Македонија до Србија со товарни возила, со цел натамошна продажба.

Брковиќ, како што наведуваат од ОЈО ГОКК, им дал насоки на своите вработени за пакување на сув цвет од канабис во вкупна количина од 8.832 килограми, претходно набавен од фирмата „ЦБД Медплант“ од струмичкиот регион.

Во период од околу две недели биле спакувани над 200 кутии, по што првоосомничениот им одобрил колективен одмор на вработените. На 13 јануари 2026 година, во пладневните часови, двајца ортаци, од кои едниот осомничен во Република Северна Македонија, а другиот во Република Србија, организирале пренесување на поголема количина сув цвет од канабис со товарни и патнички возила од објектот на правното лице во Скопје до локација во атарот на Свети Николе.

Од Обвинителството информираат дека првоосомничениот, заедно со други неидентификувани лица, организирал кутиите да бидат натоварени во возилата и во два наврата пренесени до наведената локација.

Клучниот момент, според истрагата, е што товарното возило, кое првично било наменето за превоз на лесни перници, било испразнето и наместо перници во него биле натоварени кутиите со сув цвет од канабис. Од Свети Николе возилото се упатило кон граничниот премин „Табановце“ и ја напуштило државата, носејќи ја пратката кон Србија.

Истрагата е во тек, а Обвинителството најавува натамошни активности за целосно расчистување на случајот и утврдување на одговорноста на сите инволвирани лица.

The post БАЛИЊАТА КАНАБИС КАМУФЛИРАНИ КАКО „КВАЛИТЕТНИ ЛЕСНИ ПЕРНИЦИ“ Се открива софистицираната мрежа за шверцот со марихуана appeared first on plusinfo.mk.

Дваесет и деветгодишен државјанин на Камерун бил уапсен на Граничниот премин Табановце откако се обидел да ја напушти државата со туѓа француска лична карта, која била евидентирана како предмет на потрага од Интерпол.

Инцидентот се случил на 25 јануари 2026 година во 18:12 часот, при излез од Македонија. При редовна гранична контрола, полициските службеници забележале сомнеж во документите што ги приложил П.М.Ф.Б. (29). По проверката било утврдено дека француската лична карта не му припаѓа нему и дека се води како предмет по кој трага Интерпол.

Дополнителните проверки покажале дека мажот бил регистриран во Прифатниот центар Визбегово. Тој пред полицијата изјавил дека спорната француска лична карта ја купил од лице од Скопје за сума од 1.000 евра.

По лишувањето од слобода, Камерунецот бил предаден на полициски службеници од СВР Куманово. По целосно документирање на случајот, против него ќе биде поднесена соодветна кривична пријава.

The post СКОПЈАНЕЦ МУ ПРОДАЛ НА МИГРАНТ ОД КАМЕРУН ФРАНЦУСКА ЛИЧНА КАРТА Платил 1.000 евра, го уапсиле на Табановце appeared first on plusinfo.mk.

27-годишна државјанка на Германија беше уапсена на граничниот премин Табановце откако полицијата во возилото со кое влегувала во државата пронашла психотропни супстанци.

Инцидентот се случил вчера околу 9 часот наутро, при редовна гранична контрола на влез во Македонија. Полициските службеници извршиле детален преглед на комбе „фолксваген“ со германски регистарски таблички, во кое патувала М.С. (27).

Во задниот дел од возилото биле пронајдени две тегли со печурки кои содржат психотропни супстанци. Жената пред полицијата изјавила дека пронајдените тегли се нејзини.

По откривањето, таа веднаш била лишена од слобода и предадена на полициските службеници од СВР Куманово, каде што се преземаат понатамошни мерки.

По целосно расчистување и документирање на случајот, против неа ќе биде поднесена соодветна кривична пријава.

The post ГЕРМАНКА ФАТЕНА СО ПЕЧУРКИ НА ТАБАНОВЦЕ Полицијата откри психотропни супстанци во возило appeared first on plusinfo.mk.

Сопружнци му помогнале на Саит Саитов, тинејџерот кој прегази жена во скопски Капиштец, да избега во соседна Србија. Јавното обвинителство соопшти дека покренало обвинение против маж и жена кои се товарат дека се соизвршители во делото. Истовремено, за осомничениот маж, јавен обвинител предложил мерка притвор, додека за жената мерка куќен притвор.

Според соопштението, на 9 јануари, со автомобил „Мерцедес“ со скопски регистарски ознаки, сопружниците веднаш по сообраќајната несреќа дошле до домот на Саитовски. Го зеле него и неговиот татко, па преку граничниот премин Табановце ги пренеле во Србија. Таму ги оставиле и се вратиле назад во Maкедонија околу полноќ.

Осомничениот Саитов, кој предизвикал сообраќајна несреќа со смртни последици, сè уште е во бегство. По него трага полицијата врз основа на издадена меѓународна потерница од ОЈО Скопје.

• САИТОВ СЕ СНИМАЛ КАКО ДИВЕЕ ПО УЛИЦИТЕ По објавите во медиумите, ги избришал видеата

Станува збор за Саитов Саит, роден на 6 април 2007 година во Скопје, од татко Берти и мајка Ганимете, со последна пријавена адреса на улицата Дом Ндуе Битичи во Скопје. Тој се бара поради сомнение за сторено кривично дело тешки дела против безбедноста на луѓето и имотот во сообраќајот.

Според досегашните наоди од истрагата, на 9 јануари осомничениот управувал патничко возило „фолксваген пасат“ по улицата Народен фронт, без да поседува важечка возачка дозвола и со брзина која не била прилагодена на условите на патот и сообраќајот. При непрописно поместување налево, навлегол во коловозна лента наменета за спротивен правец и удрил во пешакот Љуба Јаковлеска, која го преминувала коловозот.

Од ударот, жената се здобила со тешки телесни повреди и била пренесена во Ургентниот центар, каде подоцна починала. Наместо да ѝ укаже помош, возачот го напуштил местото на несреќата и станал недостапен за надлежните органи. објави Скопје1.мк

The post СОПРУЖНИЦИ СО „МЕРЦЕДЕС“ МУ ПОМОГНАЛЕ НА САИТ ДА СЕ СОКРИЕ ВО СРБИЈА Покренато обвинение за две лица, предложен е притвор appeared first on plusinfo.mk.