Во своето обраќање, поглаварот на МПЦ посочи дека најголемото наследство од Свети Климент е Македонската црква, која, како што рече, е чувар на нашиот идентитет.

– Светата Македонска црква е неговото најголемо наследство. Таа е довековно завештание кое што овој славен првоерарх ни го оставил на сите нас. Затоа, верно запазувајќи ги вистините на верата и доследно чувајќи го светото предание и нашите древни традиции и вредности, ние покрај нашето минато го чуваме и нашиот идентитет. Оттаму, должни сме и во овие дни, кога како црква и како држава го прославуваме неговиот светол спомен, но и преку сите денови од нашиот живот, вистински да се потрудиме да му се уподобиме нему, а преку него и на Христа, да неговиот молитвен покров биде на сите нас и неговото дело да блесне како светлина која што ќе ги озари и ќе ги води нашите срца низ претстојните години и времиња –  порача г.г. Стефан.

Поглаварот на МПЦ, дополни дека Свети Климент ја докажува природноста на светоста, кој како учител подготвувал илјадници ученици за служба на црквата, покажувајќи им ги буквите и обзнанувајќи им ја смислата на напишаното.

– Како мисионер од рана возраст, вклучен во рамноапостолската дејност на своите учители, светите солунски браќа Кирил и Методиј, тој претрпувал сѐ за на народите да им ја засветли светлината на Евангелието. Како книжевник, откако навлегол во морето на свештеното богословие, со стихоплет на словото ни ги опеал божествените длабочини на православното исповедање. Како учител, илјадници ученици подготвувал за служба на црквата, на едни покажувајќи им ги буквите, на други обзнанувајќи им ја смислата на напишаното. А како пастир, тој пак и пак повикувал на духовно очистување, на меѓусебен мир и на нелицемерна љубов, притоа и самиот со дела, а не само со зборови, покажувајќи дека христијаните треба да бидат внимателни чувари на Божјите зборови, а не само нивни слушатели – рече г.г. Стефан.

На академијата свое обраќање имаше и претседателката на земјава Гордана Сиљановска – Давкова, а присуствуваа претседателот на Собранието Африм Гаши, членови на Владата, поранешниот претседател Ѓорѓи Иванов, како и претставници од судската власт, дипломатскиот кор, академската заедница.

The post НАЈГОЛЕМОТО НАСЛЕДСТВО ОД СВЕТИ КЛИМЕНТ Е СВЕТАТА МАКЕДОНСКА ЦРКВА Тој е наша изворна духовна поткрепа, порача г.г. Стефан appeared first on plusinfo.mk.

„Ликот и делото на Св. Климент Охридски се силно врежани во македонската историја.

Св. Климент Охридски е основоположникот на Македонска православна црква и на нашата писменост и култура. Тој претставува фигура која го осветли патот на многу луѓе кон Бога, со зборови ги упатил народите во верата Божја, како прв македонски епископ, а како творец на познатата Охридска школа е најзначајниот македонски средновековен писател и педагог. Со силна вера, дисциплина и посветеност, ги надминуваше пречките коишто му стоеја на патот, неуморно ширејќи ја својата пастирска љубов.

Денес кога се соочуваме со бројни предизвици потребно е да го следиме неговото дело кога со сплотеност и единство ги надминуваше и најсилните пречки. Свети Климент стана заслужен не само за македонскиот народ туку и за целиот христијански свет, насочувајќи го кон идното време“, нотира во објавата.

Нека ни е честит и за многу години големиот празник – Свети Климент Охридски!“, се наведува во честитката на Мицкоски.

The post СООЧЕНИ СО ПРЕДИЗВИЦИ, ДА ГО СЛЕДИМЕ НЕГОВОТО ДЕЛО Премиерот упати честитка за празникот „Св. Климент Охридски“ appeared first on plusinfo.mk.

Првиот македонски архиепископ во исто време и творец на далеку познатата Охридска книжевна школа е најзначајниот македонски средновековен писател и педагог. Со својата активност и со своето дело на повеќе полиња, (црковно, просветно, книжевно итн.) тој стана заслужен не само за македонскиот народ туку и за целиот христијански свет.

Свети Климент заедно со Свети Наум Охридски се најистакнатите ученици на светите браќа Кирил и Методиј. Дваесетина години во Велика Моравија им помагале на солунските браќа во остварувањето на Моравската мисија. Кога кон крајот на 867 или почетокот на 868 година светите браќа Кирил и Методиј биле повикани во Рим со нив бил и Свети Климент. Тогаш бил ракоположен во духовно звање. По смртта на Кирил, во Рим, свети Климент заедно со свети Методиј се вратил во Моравија и му останал верен во одбраната на словенскиот јазик во црковната богослужба.

По смртта на Св. Методиј кога неговите ученици биле жестоко мачени, а потоа и протерани од Моравија во почетокот на 886 година Свети Климент заедно со Свети Наум и Свети Ангелариј дошле во Бугарија, од каде што биле испратени во Охрид. Овде Св. Климент ја основал познатата Охридска книжевна школа наречена и прв словенски Универзитет во кој оспособил над 3.500 ученици за црковна богослужба.

Паралелно со црковната и педагошката се занимавал и со книжевна и преведувачка дејност. Нему му се припишуваат опширните житија на св. Кирил и Методиј познати како Панонски легенди, најзначајниот извор за проучувањето на животот и делото на солунските браќа. Напишал и поуки за големите христијански празници (Рождество Христово, за Велигден, за Зачатието на Пресвета Богородица, за Благовештението на Пресвета Богородица итн.), пофални слова за други празници на апостоли и маченици (за блажениот пророк Захарија и за раѓањето на свети Јован Крстител, за Светите четириесет маченици, за Свети Лазар, Свети Димитрија, за бестелесните Михаил и Гаврил, за Свети Јован Златоуст, за Свети Климент патријарх Римски и многу други дела.

Не помалку значајна е и неговата преведувачка дејност. На Св. Кирил и Методиј им помагал во преведувањето на потребната литература за црковната богослужба, а самиот го превел целиот Цветен триод.

По смртта Господ го прославил со многу чуда. Но бидејќи Свети Климент уште за време на животот бил многу популарен меѓу народот, веднаш по неговата смрт неговиот култ уште повеќе се раширил. Се создале многу преданија во кои се среќава неговиот лик. Едни од нив содржат биографски податоци за светителот, други содржат мотиви со исцелителска содржина и раскажуваат за неговата моќ да лекува со допир, со лековити води или со лековити билки. Извесен број преданија зборуваат и за неговата просветителска дејност, за тоа како го описменувал населението, како го почувал да ја обработува земјата, да одгледува овошни дрвја и како да гради поубави куќи да живеење. И поголем број топоними (камења, стапалки, дрвја и сл.) во охридскиот крај се поврзани со неговото име.

Свети Климент Охридски е заштитник на градот Охрид и целиот охридски крај. Преданијата раскажуваат дека секогаш кога над градот и околината ќе се надвиснела некоја несреќа се јавувал духот на светецот и го спасувал градот од разурнување, а народот од страдање.

Во преданијата Свети Климент најчесто се среќава со Свети Наум Охридски, со кого најчесто се претставени како браќа. Некои истражувачи сметаат дека тоа се однесува на браќа во духовна смисла – собраќа, но повеќемина се склони да тврдат дека свети Климент и Свети Наум навистина биле родени браќа. Не само затоа што Свети Климент бил епископ, а Свети Наум презвитер, а во православната црква епископ и презвитер никогаш не се нарекувале браќа, туку и поради некои други показатели.

Се претпоставува дека Св. Климент е роден околу 830/840 година. Починал на 27 јули според стариот (односно на 9 август според новиот) календар во Охрид. Бил погребан во гробот што самиот си го подготвил во црквата „Св. Пантелејмон“. Уште за време на животот св. Климент својот именден го празнувал на денот кога Светата христијанска црква го празнувала споменот на Светиот свештеномаченик Климент папа Римски односно на 25 ноември според стариот( или 8 декември според новиот) календар. Поради тоа подоцна Светата црква главниот празник поврзан со неговото име го поместила на денот на неговиот именден, а на денот на неговото упокоение (27 јули/9 август) се празнува споменот на Светите Седмочисленици (светите Кирил и Методиј, Климент, Наум, Ангелариј, Сава и Горазд), како и споменот на Светиот великомаченик Пантелејмон.

The post ТОЈ Е НАШИОТ НАЈГОЛЕМ УЧИТЕЛ И ПРОСВЕТИТЕЛ Денеска го празнуваме Свети Климент Охридски appeared first on plusinfo.mk.

– Неизмерно сме горди што неговото дело е препознаено и признато како европска и цивилизациска големина достојна за почит. А, како не би било кога Климент Охридски е еден од втемелувачите на словенското просветителство. Како еден од најревносните и најистакнатите ученици на Светите браќа Кирил и Методиј, достојно го продолжил нивното дело и од Охрид нашиот Ерусалим направил културен и духовен центар од кој се ширела словенската култура и книжевност. Ракоположен за прв словенски епископ неуморно работел на издигање на својот народ. Бил основоположник на охридската книжевна школа, првиот словенски универзитет во кој творел и преведувал книги и образувал над 3.500 свои ученици. Со тоа се смета за достоен продолжувач на Моравската мисија во која и самиот учествувал и дал свој придонес. Борбата за описменување на родот свој и спречување на асимилацијата ја продолжил до крајот на својот живот и затоа бил и останал духовен водач на овие простори. Се борел против латинизирањето, се борел против асимилирањето на Словените, се борел против сето она кое што значела неправда – рече тој.

Мицкоски потенцираше: „Ете затоа тој и денес е инспирација за нас Македонците во овие времиња на предизвици и негирања. Неговата неуморна работа покажува дека нема проблем на кој не можеш да му се спротивставиш и надминеш. Нема сила која може да ја победи цврстата волја на еден народ да се издигне и сплоти против оние кои сакаат да го негираат и асимилираат. Светиот Климент Охридски пред еден милениум знаел дека преку духовно обединување и образование на своите браќа и сестри можат да се достигнат сите победи на еден народ. Неговото верују мора да биде повторно нашата ѕвезда водилка во овие нови времиња. Мораме како народ и како нација да инвестираме во образованието на нашите деца. Образованието било и ќе остане најсилното оружје на една држава. Неговата книжевна школа и неговиот универзитет се аманет и за нас денес. Да градиме индивидуи вооружени со знаење и вештини кои успешно ќе се справуваат со внатрешните и надворешните предизвици. Да изградиме генерации кои со своите силни капацитети ќе се спротивстават на било која злоупотреба, атак или современа форма на поништување. Светиот Климент пред еден милениум знаел дека само еден грамотен народ е силен и неуништлив. Денес грамотен народ може да се спротивстави на современото зло на корупција и криминалот кој ја уништуваат нашата заедница и држава. Грамотен народ може да се спротивстави на полуписмени самонаречени владејачки елити кои го цицаат својот граѓанин до исцрпување“.

Лидерот на ВМРО-ДПМНЕ истакна дека не попусто велат “уништи го образованието на еден народ и тогаш целосно си го завладеал“.

– Ние имаме историска должност, повторувам имаме историска должност, тоа да не го дозволиме. Ние имаме историска должност да оставиме подобро образувани генерации после нас кои ќе продолжат подобро и поуспешно да ја градат Македонија од нас. Гордоста и успехот на секој учител е неговиот ученик да го надмине. Гордост и успех за нас е да направиме силни, образувани и успешни генерации кои ќе ја  продолжат борбата за успешна македонска иднина тука дома, во Македонија. Тоа е аманетот на светиот Климент кој мораме да го продолжиме. Ние Македонците немаме проблем со тоа да ги споделуваме нашите вредности. Свети Климент во таа смисла му припаѓа на секој еден народ кој сака да ги споделува вредностите кој тој ги почнал и ширел од нашата Македонија. Но имаме проблем со тоа кога ударите доаѓаат по темелите, кога врз делото на свети Климент се прави политика, и кога неоправдано се присвојува од источниот сосед, притоа негирајќи се што е македонско. Нашата Света православна црква е Свети Климентова, но и нашата писменост се гради врз неговото слово, и словото на неговите учители. И мене не ме обесхрабрува таа битка да ги штитиме темелите, но длабоко ме разочарува отсуството на стратегија на заштита на тие темели од тие кои живеат во истиот наш дом, а сега се за жал уште кратко власт. Веројатно тие се најдобрите асови на бугарската политика, но лошо е што не се патрони на македонските интереси. И таквите свои компромиси болни за нацијата се многу полезни за нивните кариери затоа што на тој начин тие опстојуваат на тие места неизбрани од народот по игра на случајност сместени во фотелјите платени од тој ист народ – рече Мицкоски.

Тој истакна:

„Но, нашиот предизвик е да ја извадиме државата од бездната на постојаното тонење во калта во која сите сакаат да не извалкаат. 20 процентната инфлација е она што го боли народот, и тоа што храната поскапела за близу 30 проценти во просек за само една година. Тоа значи за 30 проценти е посиромашно секое семејство од лани и за исто толку повеќе има гладни луѓе. Сонува и копнее овој народ за подобар живот но со гладни стомаци, додека власта лаже со полни паричници и џебови.

Со мачнина ја гледам пинг понг играта на новата коалиција на хаосот, Градот Скопје и власта на Ковачевски за проблемите со приватните превозници додека проблемите не се решаваат. Навистина како човек одбивам да влегувам во реториката на обвинувања и недораснати потези каде поважно од решенијата им е да се знае кој бил виновен, и лагите кои непресушно ги кажуваат додека народот страда. И една заедничка порака до коалицијата на хаосот, престанете да правите политика врз грбот на народот и испорачајте решение на проблемите. Вие сте власт и вие ја имате одговорноста наместо пинг понг игра да ги решите проблемите.

Престанете да си поигрувате со интелигенцијата на овој народ. Едната на благодарение на вас е таму каде што е, а овој другиот благодарение на лесната рака за потпишување предавнички договори и се уште опстојува. И едниот и другиот имаат одговорност да ги решат проблемите кога тајно се среќаваат во Владата наместо да шират лаги и да ја префрлаат топката од која што штета имаат скопјани и граѓаните во Македонија. Секое решение што е во интерес на граѓаните и на скопјани ние како ВМРО-ДПМНЕ ќе го поддржиме“.

Во својот говор потенцираше дека криминалот и корупцијата го уништуваат системот.

„И тоа е старата болка на оваа власт за која зборуваме секојдневно. И по објавувањето на информацијата дека американски истражители ќе дошле да откриваат криминал, навистина се смешни но и трагични оние изјави од власта како тоа истите тие ќе го поддржеле. Сакам да бидам прецизен и јасен, дваесет години имаме една политичка партија која е во власт во Македонија. Дваесет години. Седум години истиот овој министер за внатрешни работи е министер за внатрешни работи. Пет години, повеќе од пет години апсолутна власт. Не може луѓето кои што се креатори на истата таа корупција и криминал, кои што се сојузници на криминалците, кои што денеска се уште за волја на вистината уште кратко ги водат тие институции да ги решаваат проблемите со криминалот и корупцијата. Затоа што тие се луѓето кои што се креатори на истиот тој криминал и корупција. Зошто многу се зборува за криминалот и корупцијата? И јас често пати во моите говори криминалот и корупцијата и борбата против истите тие криминал и корупција ги поистоветувам со делата на Илинденците, со делата на Асномците. Затоа што тоа е основата за уништување на една нација. Ако имате корумпирани политички елити кои што ја водат ,државата, тие имаат Ахилова пета, а кога ќе имате Ахилова пета тогаш не носите одлуки кои што се од интерес на вашиот народ и вашата држава туку носите одлуки затоа што тој што ве корумпирал и ве криминализирал и ви наредува да носите такви одлуки. Односно да бидам попрецизен носите одлуки кои што се од интерес на другите. Кога не носите одлука која што е од интерес на народот и државата, тогаш таа се атомизира. Тогаш таа се рони, тогаш идентитетот се губи, и конечно на крај се губи и државата. Затоа битката против криминалот и корупцијата денеска и најмалата победа во таа битка е подеднаква на куршумот кој што го примил в гради и Гули и останатите Илинденци. И најмалата победа во оваа битка е подеднаква на маката на Шатев, подеднаква е на маката на оние македонски преродбеници и дејци кои што се бореле и сонувале за своја македонска држава во срцето Балканот. Ако нешто денеска претставува опасност за македонскиот идентитет, за македонскиот народ и македонската држава тоа е високото, екстремно ниво на корупција“ вели тој.

Мицкоски продолжи:

„Често пати ми го поставуваат прашањето што ќе преземе ВМРО-ДПМНЕ за ова. ВМРО-ДПМНЕ си има своја политика и си има своја програма. Но, не треба многу да лутаме во одговорот една година позади нас, градоначалници на ВМРО-ДПМНЕ после онаа  историска победа на минатогодишните локални избори на два пати во првиот и во вториот круг и тоа е доволен доказ што значи храбро да се работи, посветено и чесно да се работи без ниту една афера која што се поврзува со криминалот и корупцијата. И тоа не се двајца или тројца, зборуваме за повеќе од 42 градоначалника и повеќе од 42 општини каде што ВМРО-ДПМНЕ има свој градоначалник или е дел од локалната власт. Има ли поголем показател што ќе преземе ВМРО-ДПМНЕ?

Кога зборуваме за корупцијата, почитувани присутни, и кога зборуваме какво влијание има корупцијата и криминалот во македонскиот идентитет и зачувување на македонската држава треба исто така да сме свесни дека со корупцијата и криминалот имаме помалку пари во буџетите и во Владата, но и во општините. Затоа што тие пари завршуваат во џебовите на овие криминалци кои што кога ќе корумпираат политичар тие сакаат најмалку десеткратно да се наплатат повеќе од тоа. Затоа имаме помалку пари во буџетите на општините, помалку пари во буџетите на државата, помалку пари за образованието. А, во говорот кажав уништи му го на еден народ образованието, си го уништил народот. Имаме помалку пари за здравството. Ако немаме доволно силна превентива ќе имаме голем притисок во здравството. Ако тоа здравство не може да даде одговор на тој притисок, тогаш луѓето умираат, исчезнува една нација. Има помалку пари за пензии, на пензионерите и тие не можат да го поминат онака како го заслужиле оној дел од својот живот за кој што работеле целиот свој живот. Има помалку пари за земјоделците, затоа што некој тие пари ги краде. Има помалку пари за младите, помалку пари за студентите, помалку пари за студентски стипендии. Има помалку пари за нови градинки, за нови улици, за нови булевари, за нови автопати, за нова железница, за нови хидроцентрали, за нови термоцентрали. Има помалку пари за се. Кога има помалку пари за се, вие сте сиромашна држава и тогаш младите одлучуваат да ја напуштат таа држава. Сега веќе не само младите, туку тие кои што успеале да формираат семејство, заедно со семејствата ја напуштаат државата. И државата се празни. Има ли поголем удар по идентитетот на еден народ кога таа држава во кој што тој народ макотрпно се борел да ја создаде, се празни. Зошто? Затоа што нема вистинска шанса, нема вистинска шанса затоа што има, многу криминал и корупција. Затоа кога зборувам дека борбата со криминалот и корупцијата и секоја битка во таа борба која што ќе ја победиме е подеднакво силна како жртвата на Илинденците и Асномците. Да заклучам, не може никој денеска со истите оние луѓе кои што се причина за тој криминал и корупција се бори против криминалот и корупцијата. Затоа се потребни предвремени парламентарни избори, нови луѓе да ги водат тие институции и тогаш вистински ќе видат како се бори против криминалот и корупцијата. Да видат дали оние нарко банди така слободно ќе влегуваат во полициски станици и ќе ги вадат за уши јадните полицајци од внатре. Или ние ќе ги вадиме од таму каде што се за уши, па да видат што значи борба против криминал и борба против корумпираните политички елити“.

На граѓаните им порача: „Мора да се кренеме гордо високо да ги направиме промените нашата заложба е да направиме големи чекори напред, да направиме големи победи заедно, и да ја покажеме разликата. Овој народ има срце и сила за големи работи. Ние тие заедно ќе ги издејствуваме, Македонија мора да сврти нов лист и нова страница од досегашното битисување и опстој. Нашата култура јазик идентитет се посебно обележје со кои што треба да се гордееме и да ги чуваме. Мисијата на Свети Климент Охридски треба да е поука за сите генерации дека чувањето на културната, јазичната и националната посебност како должност и аманет. Со право го славиме Свети Климент чие духовно книжевно и црковно наследство е значаен белег за Македонија. Нека е честит денот на Светиот Климент Охридски, нека е вечно неговото дело и нека ни е вечна нашата Република Македонија“.

The post ДЛАБОКО МЕ РАЗОЧАРУВА ОТСУТСТВОТО НА СТРАТЕГИЈА Според Мицкоски, власта е асот на бугарската политика и не се патрони на македонските интереси appeared first on plusinfo.mk.

Централен настан е Свечената академија, која ќе се одржи вечерва во 20 часот во Центарот за култура „Григор Прличев“. На Академијата ќе биде врачена Свети Климентовата награда, која, оваа година, ја доби архимандритот Нектариј од манастирот „Св. Наум Охридски“.

Со многубројни свеченоста се одбележува и патрониот празник на гимназијата „Св. Климент Охридски“.

Денеска напладне, во големата сала на Општина Охрид, ќе биде одржана промоција на делото „Книгата за светите браќа Климент и Наум“ од проф. д-р Димитар Пандев и Славе Ѓорѓо Димоски.

Книгата е во издаваштво на општина Охрид, уредник е Митре Вељаноски, по чии заложби досега е објавена едиција на значајни дела од македонската историја, лингвистика и книжевност.

The post ОХРИД ГО ЧЕСТВУВА СВОЈОТ ПАТРОН Вечерва свечена академија по повод Денот на Свети Климент Охридски appeared first on plusinfo.mk.

Вака првиот човек на Комисијата за историски и образовни прашања, Драги Ѓоргиев, ја започна денешната прес-конференција која следуваше веднаш по брифингот со новинарите.

– Објавени се препораки за заедничкото чествување на Светите Кирил и Методиј, Свети Климент, Свети Наум и Цар Самоил. Тоа се текстови за заедничко чествување кои се идентични и со кои ние препорачуваме до двете влади на одредени годишници да се чествуваат заедно овие личности. Во однос на учебниците, усвоени се по 5 препораки. Нашата страна сметаше дека треба да има подорување во бугарските учебници за одредени теми, а истото го направи и бугарската страна. Овие препораки одат до Владата, која треба да ги усвои – рече Ѓоргиев.

Во продолжение, ги објавуваме препораките што ги објави Министерството за надворешни работи во целост:

СВЕТИ КИРИЛ И МЕТОДИЈ

Мисионерското дело на Светите браќа Кирил и Методиј ги поставува основите на христијанската култура и духовност на словенските народи. Прифаќањето и ширењето на писменоста и преводите на богослужбените книги им овозможува на словенските народи да се запознаат со христијанското учење на разбирлив јазик. Делото на Св. Кирил и Методиј е сочувано и развивано во книжевните центри Преслав и Охрид, кои тогаш се наоѓале на територијата на средновековната бугарска држава, каде што нивните ученици наоѓаат услови за работа. Тоа дава суштествена основа на современите држави Република Северна Македонија и Република Бугарија заеднички да го одбележуваат денот на Св. Кирил и Методиј.

Бурните културни процеси, кои започнуваат во текот на 19. век, наоѓаат израз и во засилениот интерес кон животот и делото на Св. Кирил и Методиј. Во средината на 19. век сеќавањето за Св. Кирил и Методиј станува дел од светската културна традиција, а денот на нивниот црковен празник започнува да се одбележува во училиштата. За првпат тоа се случува во Пловдив во 1851 година. Процесот на духовно будење и еманципација наоѓа израз во сеприсутното одбележување на празникот во многу училишта на територијата на современа Република Северна Македонија и Република Бугарија. Следствено, делото на Св. Кирил и Методиј и нивните ученици започнува да се одбележува и во други словенски земји, а нивниот придонес за европската цивилизација е признат и од Католичката црква, која ги прогласи за заштитници на Европа.

Досега кажаното дава основа и ги задолжува двете држави со одговорност за зачувување на сеќавањето за делото на Св. Кирил и Методиј и нивните ученици преку годишни заеднички чествувања.

СВЕТИ КЛИМЕНТ ОХРИДСКИ

Делото на светите браќа Кирил и Методиј е продолжено од нивните ученици, меѓу кои се истакнува личноста на Св. Климент (околу 830-916). По Великоморавската мисија Св. Климент е прифатен во средновековната бугарска држава. Околу 886 г. е испратен од кнез Борис-Михаил во областа Кутмичевица, каде што како просветител и творец ги положува основите на Охридската книжевна школа. Околу 893 г. по наредба на бугарскиот цар Симеон е ракоположен за Велички епископ. Неговата проповед и богослужба се од големо значење за распространувањето и утврдувањето на христијанската писменост и култура.

Преку преводите на богослужбена литература и химнографските творби што ги создал, како и благодарение на неговата учителска дејност, се подготвени многубројни ученици. Тоа го прави една од најважните личности за културата на денешните Република Северна Македонија и Република Бугарија.

Сето тоа им дава основа на двете држави да го негуваат споменот за делото на Св. Климент преку заедничко одбележување при соодветни поводи.

СВЕТИ НАУМ ОХРИДСКИ

Делото на светите браќа Кирил и Методиј е продолжено од нивните ученици. Меѓу нив, Св. Наум (околу 830-910) учествувал во Великоморавската мисија, од каде што по смртта на Св. Методиј и прогонувањето на неговите ученици, тој пристигнал во средновековна Бугарија. Тој е еден од основоположниците на Плисковско-Преславската книжевна школа.

Околу 893 г. е испратен од цар Симеон во Охрид, каде што ја продолжува просветителската дејност на Св. Климент во Охридската книжевна школа и гради манастир на брегот на Охридското Езеро, којшто денес го носи неговото име. По неговата смрт, култот на Св. Наум се утврдува на териториите на денешните држави Република Северна Македонија, Република Бугарија и соседните земји. Подоцна неговиот култ се распространува и кај дел од муслиманското население.

Просветителското дело и придонесот на Св. Наум за развојот на писменоста и културата на Република Северна Македонија и на Република Бугарија, им даваат основа на двете земји да го негуваат споменот за неговото дело, преку заедничко одбележување при соодветни годишнини и јубилеи.

ЦАР САМОИЛ

Цар Самоил е владетел на голема средновековна држава, којашто поголемиот дел од современата историска наука ја смета за Бугарско царство со центар во територијата на денешна Република Северна Македонија. Тоа опфаќа значителен дел од земјите и населението на Балканскиот Полуостров. Цар Самоил и неговата драматична судбина се симбол на заедничката историја, којашто се споделува од двете современи држави
Република Северна Македонија и Република Бугарија.

Заедничката комисија им предлага на двете влади, во духот на потпишаниот двостран Договор, одбележувањето на цар Самоил да биде знак на споделени вредности и вистинско добрососедство и пријателство.

Препораки за учебниците по историја за 5-ти клас во Република Бугарија и за 6-то одделение во Република Македонија:

Заедничката комисија ги разгледа и анализира учебниците по историја за 5-ти клас на Република Бугарија и учебниците по историја за 6-то одделение во Република Северна Македонија и констатира извесни недостатоци односно можности за подобрување. Со оглед на тоа, се препорачува избегнување на:

– неосновани историографски сугестии за античката историја,

– недостатоци во историската географија при користење на картите коишто не
соодветствуваат со конкретното историско време и контекст,

– фактографски непрецизности.

Препораки за учебниците по историја за 5-ти клас во Република Бугарија:

1. Вклучување на поширокиот регионален контекст, особено на териториите на запад од древна Тракија, ќе ги претстави посодржински историските процеси и ќе создаде побогата слика за културно-историското наследство во регионот.

2. Заради поголема терминолошка прецизност поими како „денешни бугарски земји“, или „територијата на современа Бугарија“, може да бидат посоодветни за употреба во контекст на античката историја, наместо само изразот „бугарски земји“.

3. Предлагаме повнимателно датирање на појавата на тракиската култура во антиката.

4. При претставување на некои антички заедници потребно е да се земат предвид водечките тези во историографијата за нивните етнокултурни карактеристики (на пример Дарданците).

5. Историските карти треба да се користат согласно со историскиот контекст и поставените методски цели.

Препораки за учебниците по историја за 6-то одделение во Република Македонија:

1. Поголема застапеност на проблематика поврзана со античка Тракија и Тракијците ќе придонесе за подобро запознавање на културно-историското наследство во регионот.

2. Сугестиите за континуитет меѓу античка Македонија и современата македонска држава содржат историски анахронизам.

3. Сугестиите за институционален континуитет меѓу мисијата на апостол Павле и средновековните црковни структури што постоеле на територијата на денешна Република Северна Македонија се неосновани.

4. Историските карти на античката македонска држава ќе бидат попрецизни доколку соодветствуваат на конкретен временски период.

5. При претставување на некои антички заедници потребно е да се земат предвид водечките тези во историографијата за нивните етнокултурни карактеристики (како на пример, Пајонците, Дарданците, Мигдонците).

The post ЦАР САМОИЛ ВЛАДЕЕЛ СО БУГАРСКОТО ЦАРСТВО, НО СО ЦЕНТАР ВО ДЕНЕШНА МАКЕДОНИЈА По 5 измени ќе има во бугарските и во македонските учебници appeared first on plusinfo.mk.

Вака гласеше честитката што денеска ни ја испрати Руската амбасада во земјава, а која предизвика низа негативни реакции кај нашиот источен сосед Бугарија.

Како што објави БГНЕС, универзитетскиот професор Пламен Павлов, кој се смета за еден од најголемите познавачи на бугарската и на балканската средновековна историја, смета дека руската честитка до Македонија е провокативна.

– За жал, имаме уште една руска провокација која има за цел да забие клин помеѓу Бугарија и Северна Македонија и да ја искриви вистината до крајно невозможен степен. Сите историски извори, биографии и други документи јасно говорат за бугарската припадност на Свети Климент Охридски – изјави Павлов за БГНЕС.

Тој ја осуди и честитката на премиерот Зоран Заев, во којашто е истакнато дека Свети Климент е жив споменик на нашата историја и основоположник на Охридската школа.

– Во својата изјава премиерот Зоран Заев воопшто не спомнува дека ликот и делото на Свети Климент Охридски се заеднички со Бугарија и се важни за бугарската историја и култура. Во период кога самот Заев бара помирување со Бугарија, односно бара заеднички јазик за решавање на билатералниот проблем, тој всушност покажува дека не се бара заеднички јазик и дека се продолжува со јазикот на лагите и бугарофобијата – рече Павлов.

Според него, сите историски извори, житија и други документи говореле за бугарска припадност на светителот, а во сите документи Свети Климент бил нарекуван чувар на бугарската духовност.

The post БУГАРИЈА ПАК СЕ НАЛУТИ „Свети Климент е чувар на бугарската духовност“ appeared first on plusinfo.mk.

Таков – свет е нашиот почеток. Со свети апостол Павле започнаа нашето охристовување и христијанизацијата, а со свети Климента – нашата евангелизација, оцрковување, просвета, книжевност, уметност, култура и сè.

Ниедна личност не е толку сврзана со овој народ како што е свети Климент Охридски. Затоа го нарекуваме наш најголем светител, просветител и учител.

Неговиот успех е плод на ученоста и побожноста. Тој бил „учител“, како што бил учител Господ Исус Христос, а тоа значи дека го учел народот во верата, го просветувал, бил проповедник, мисионер, пастир и првосвештеник.

Односот на Господа Исуса Христа кон апостолите, за свети Климента бил личен пример за неговото однесување кон учениците. Тој другарувал со нив. Постојано биле заедно. Живеел со нив. Со кротост и со татковска љубов се однесувал кон нив, а тие, пак, му возвраќале со полно послушание и со синовска одаданост, како што се вели во житието: „Го слушаа како татко.“ Свети Климент љубел со срце, не – со уста. Неговото деноноќно присуство меѓу учениците и неговото духовно влијание врз нив многу значело во нивната возраст, додека тие се формирале како личности и како Христови пастири. Ја гледале големата трудољубивост, неуморната молитвеност и строгиот подвижнички живот на својот учител. И затоа запишале: „Ние никогаш не го видовме да е без работа.“

Неговата успешност е и во тоа што тој бил од овој народ и ги познавал сите што ги учел. Ако тој бил некој дојденец: Елин или Латин, некој Сириец или Александриец, не ќе можел така да им се доближи на учениците, а ниту тие ќе можеле да го сметаат за толку близок.

Светиклиментовата дејност била просветна, пастирска, духовна и душегрижничка. Наречен е просветител, со полното значење на зборот просвета (prosvyÃenie = prosvetenie). Станува почеток на нашата средновековна книжевност. Неговите творби се најубавите дела на старомакедонскиот словенски јазик и писмо.

Животот го посветил на Бога и на народот. Знаејќи дека не може секаде да појде и да му послужи на својот народ, свети Климент го основал Охридскиот универзитет, кој е првиот словенски универзитет и прв универзитет во Европа.

На Светиклиментовиот универзитет се изучувале сите тогашни науки. Се создавала нова книжевност и просвета. Во Европа влегла христијанската цивилизација на новиот јазик на Словените. Започнал новиот период во историјата на целото средновековно христијанство. Охрид, свети Климент и неговиот Универзитет станале граница меѓу двете големи јазично-културни цивилизации: грчката и латинската, и се издигнала третата – словенската, јазично-културна цивилизација.

Што го натерало свети Климента на оваа посветеност? – Двете најголеми евангелски заповеди: љубовта кон Бога и љубовта кон луѓето. Свети Климент ги исполнил овие две заповеди: ја покажал љубовта кон Бога – со тоа што животот му го посветил на Бога; а љубовта кон луѓето – ја искажал во душегрижништвото за народот. А, во основа на сè е тоа што тој библиски приоѓал на сè и затоа богомудро решавал сè. Библијата била основа на сè што мислел, што зборувал, што пишувал, што творел и како живеел. Затоа постанал тоа што е – Божји светител и народен просветител. За сите прашања од животот ги користел Библијата и учењето на светите отци.

Многу јасно и едноставно го поврзувал Божјиот збор со светот и со животот на луѓето. Такви биле неговите беседи и слова. Во нив ја искажувал Христовата порака до луѓето. Им објаснувал што е човекот, според христијанското учење – и барал да ја исполнат својата човечка и христијанска цел. А која е таа? – Да бидат добри и човечни. Со љубов кон секого. Да се усовршуваат во доброто, во љубовта и во светоста. На тоа сме повикани од Бога. Така се доаѓа до спасението и до светоста. Таков е нашиот живот во Христа. А Христос дојде на земјава и ни даде пример за совршен човечки живот. Ова им го кажувал свети Климент на луѓето, во своите поуки. Неговата проповед била сеење на словото Божјо. Тој се раководел според правилото: „Или не поучувај, или поучувај со својот живот. Инаку, со зборовите ќе ги повикуваш, а со делата ќе ги бркаш.“ Како што говорел, така и живеел. Сè што било изговорено, било и потврдено во неговиот свет и богоугоден живот и дело. Поучувал и со збор и со личен пример.

Не проповедал само в црква или на богослужба, туку секогаш и секаде. Одел кај луѓето, по нивните места, ги посетувал и дома и на работа. Ги поучувал, им помагал. Знаел како да ги придобие за верата, за Христа, за Евангелието и за евангелскиот живот. Им говорел кога биле собрани заедно, но зборувал со нив и одвоено: и со мажите и со жените, и со старите и со младите, а и со децата – и на сите им посочувал што е тоа во Евангелието, а што тие дотогаш не го знаеле и каква светлина можат да доживеат, ако проникнат во спасителното дело на Господа Исуса Христа. И уште повеќе – од какво значење ќе биде тоа за нивниот личен живот, за разбирањето, за радоста, за семејството, за доброто, за заемната љубов и почит.

Тој бил пример: и со животот и со делата, и со добродетелите и со дарбите, и со знаењето и со учењето, и со службата и со подвизите, и со учителството и со творештвото – и со целокупната своја личност, која ја имал изградено според критериумите на Евангелието.

(За МИА подготви проф. д-р Ратомир Грозданоски)

The post Се празнува Свети Климент Охридски Чудотворец appeared first on plusinfo.mk.