Обвинителството минатата недела ја исцрпи листата на сведоци  во случајот „Пулс“. Општ впечаток е дека сведочењата не посочија на докази дека сите 35 физички и 3 правни лица, опфатени со обвинението, се дел од иста и правно одржлива линија на одговорност.

По месеци рочишта, потресни искази, недостапни сведоци, читање претходни изјави и процесни расправи, во првата фаза од судењето, сведоците ја раскажаа трагедијата во кобната ноќ, ги потврдија ужасот, хаосот, пожарот, паниката и последиците, но не ја докажаа клучната правна теза дека толку широк круг обвинети може да се врзе за истата последица, преку една заедничка логика на одговорност.

Во стручната јавност, веќе подолго време се отвораат дилеми за структурата на обвинението. Минатата недела и поранешната обвинителка Вилма Рускоска укажа дека ваквата поставеност, со голем број обвинети под иста квалификација, отвора сериозни прашања за одржливоста на процесот. Слични позиции, во различни форми, изнесоа и правници и јавни личности како Петре Шилегов, Владимир Туфегџиќ, Јанаки Митровски, Еленко Миланов, Звонко Давидовиќ и други, кои укажуваат дека преголемата ширина на обвинението може да доведе до разводнување на одговорноста наместо нејзино прецизирање.

Најслабата точка на обвинението стана јасно видлива

Од 19 ноември 2025 година до денес, судењето за една од најтешките трагедии во поновата историја на земјава, во која загинаа 63 лица а повеќе од 200 беа повредени, се развива како еден од најобемните предмети во историјата на македонското правосудство. Во првите рочишта, очекувањата беа насочени кон сведоците. Обвинителството излезе со широка листа, со намера преку искази да ја опфати целината на настанот и да ја потврди сопствената конструкција во обвинителниот акт. Во судницата се слушнаа тешки, лични и потресни сведоштва.

Но, колку што повеќе сведоци поминуваа низ судницата, толку појасно се гледаше дека нивните искази ја потврдуваат трагедијата, но не и целината на обвинението. Сведоците упорно се навраќаа на истите непосредни околности на трагедијата – пиротехника во затворен простор, преполн објект, отежната евакуација, нефункционални или недоволно достапни излези, чад што брзо го исполнува просторот и паника што за неколку минути прераснува во стампедо – и самите ја фокусираа расправата на вистинските причини за трагедијата.

Со еден збор, сведоците не ја потврдија теоријата за „верижна“ или „системски поврзана“ одговорност на сите лица опфатени со обвинението. Уште сега е јасно дека сите обвинети, во ист правен обем и со исти правни квалификации, едноставно не можат да бидат поврзани со истата трагична последица. Тоа не значи дека нема одговорност. Напротив, трагедијата бара одговорност. Но бара одговорност што е конкретна, персонализирана и докажлива. Во кривична постапка не е доволно да се покаже дека системот затаил, дека институциите пропуштале или дека низ годините постоеле слабости. Треба да се докаже врска меѓу конкретно дејствие или пропуст и конкретна последица. А токму таа врска, по исцрпувањето на сведоците, останува најслабата точка на обвинителската конструкција.

Што покажаа обдукциските наоди?

Големо внимание предизвика рочиштето на кое беа презентирани обдукциските наоди за 63 жртви. Бројките од судската медицина се сурови и неспорни. Од 63 жртви, 50 починале од труење со јаглерод моноксид, 4 од гмечење, односно притисок врз градниот кош, 3 од недостиг на кислород, а 1 лице од изгореници од трет степен. Сепак, овие наоди, колку и да се потресни, сами по себе не одговараат на клучното правно прашање: кој го предизвикал или дозволил сплетот на услови, во кој чадот, токсичните гасови, недостигот на кислород, гужвата и невозможната евакуација довеле до масовна смрт?

Обдукциските наоди ја враќаат постапката на клучното конкретно прашања: што точно го претворило просторот на дискотеката „Пулс“ во смртоносна стапица? Како чадот и токсичните гасови толку брзо го исполниле објектот? Зошто евакуацијата не функционирала? Дали излезите биле достапни, функционални и доволни за бројот на луѓе внатре? Каква била улогата на гужвата, на пиротехниката и на реакцијата во првите минути?

Големи емоции и непријатна дебата предизвика фактот дека дел од жртвите биле алкохолизирани, а некои ноќта биле под дејство на дроги и на психотропни супстанци. За жал, овие податоци во дел од јавноста беа злоупотребени за двојно виктимизирање на жртвите, наместо да се постави прашањето дали во истрагата имало суштински важен пропуст. Имено, се знае дека вечерта пред избувнувањето на пожарот во објектот „Пулс“ имало полициска рација. Прашањето што остана неодговорено е дали при толку алкохолизирани лица и дел под дејство на дроги, биле создадени законски услови полицијата на теренот ноќта да ја прекине забавата, да го испразни објектот и да го затвори. Ќе остане само да се нагаѓа дали така можело да биде избегната трагедијата.

Недостапноста на сведоците е сериозна слабост на постапката

Рочиштето на кое беа читани искази на сведоци што не се достапни за органите на прогон и на кое сведочеше директорот на Институтот за судска медицина, Александар Станков, покажа дека предметот станува сè покомплексен. Наместо да ги затвори дилемите, рочиштето отвори нови: дали сите клучни сведоци ќе бидат директно сослушани, дали сите снимки и материјални докази се обезбедени, дали е јасно утврдено кој ја внел и поставил пиротехниката, дали причинско-последичната врска е доволно прецизно поставена и дали обвинението ризикува да создаде премногу широка слика на вина без доволно јасна поединечна одговорност.

Една од најважните точки од рочиштето беше читањето на исказите на сведоците Дарио Трифунов и Александра Пепеларовска, кои, според известувањата презентирани во судницата, не биле достапни за органите на прогон. Формално, судската постапка познава можност во одредени случаи да се чита исказ даден во истрага. Но, во предмет од ваков обем и чувствителност, отсуството на сведоци не е само техничко прашање. Тоа е суштинско прашање кое може да го ослаби квалитетот на доказната постапка.

Дали недостапноста на сведоците во процесот, кои инаку се предложени од Јавното обвинителство треба да остане само на техничка фуснота?  Во предмет од ваква тежина, особено кога сведоците може да помогнат во реконструкција на случувањата со пиротехниката, движењето во објектот или моментите пред пожарот, мора да се види дали се преземени сите реални мерки за нивно обезбедување.

Разликата меѓу прочитан исказ и живо сведочење е голема

Сличен проблем претходно се појави и со сведокот Даутовски, менаџер на ДНК, за кого беше наведено дека не можел да биде обезбеден бидејќи бил во Германија. Доколку станува збор за државјани на Македонија кои во меѓувреме влегуваат и излегуваат од државата, прашањето не е само каде се сведоците, туку и колку навистина Обвинителството се обидело да ги донесе пред суд.

Доколку сведокот има сознанија за внатрешноста на објектот, за движењето на луѓето, за евакуацијата, за поставувањето на пиротехниката или за моментите непосредно пред избувнувањето на пожарот, тогаш неговото директно сослушување не е споредна формалност. Тоа е важен дел од утврдувањето на вистината. Разликата меѓу прочитан исказ и живо сведочење е голема. Прочитаниот исказ ја дава само претходно дадената верзија на сведокот. Директното сведочење, пак, овозможува разјаснување, дополнителни прашања, вкрстено испрашување, проверка на противречности и утврдување на кредибилитетот на сведокот.

Во ваков предмет, каде што секоја минута, секое движење и секоја одлука можат да бидат правно значајни, недостапноста на сведоци што можеби располагаат со клучни информации е сериозна слабост. Не затоа што нивните искази нужно се неточни, туку затоа што судот и странките немаат можност целосно да ги тестираат.

Одбраната реагираше дека читањето искази од истражната постапка може да создаде лоша практика, особено кога станува збор за сведоци што се важни за реконструкцијата на настанот. Оваа реакција не треба да се гледа само како адвокатска тактика, затоа што го отвора прашањето за еден од основните принципи на правично судење: можноста доказите да бидат проверени низ директна расправа.

Во секој сериозен кривичен процес, особено кога обвинението опфаќа голем број лица, одбраната мора да има реална можност да ги оспори доказите. Не симболична, не формална, туку суштинска можност. Тоа значи да поставува прашања, да бара појаснувања, да укажува на противречности и да проверува дали исказот на сведокот се совпаѓа со другите докази.

Сведочењата за пиротехниката и снимките се клучни за реконструкција на настанот

Ова е особено важно во делот што се однесува на пиротехниката. Според дел од реакциите на одбраната, сведоците се важни за да се утврди кој ја внел, кој ја поставил и кој можел да ја забележи пиротехниката. Тоа не е периферно прашање. Тоа е едно од централните прашања на предметот.

Ако обвинителската теорија се потпира на одредена верзија за внесувањето и поставувањето на пиротехничките средства, тогаш таа верзија мора да биде докажана со висок степен на процесна сигурност. Не смее да остане како претпоставка, ниту како логичен заклучок изведен од општата трагичност на настанот. Таа мора да биде утврдена преку докази што можат да издржат проверка.

Во ваков процес не е доволно да се каже дека пиротехниката била присутна во објектот. Не е доволно ниту да се каже дека обезбедувањето требало да ја забележи. Судот мора да утврди конкретна линија на движење: од каде дошла, кој ја донел, како влегла, каде била поставена, кој бил присутен, кој имал можност да реагира и дали некој имал службена или фактичка обврска да ја спречи.

Посебно внимание заслужува прашањето за снимките, фотографиите и видеоматеријалите од кобната вечер, зашто во постапката одбраната реагирала дека одреден сведок бил задолжен да зачува фотографии и видеа, но тие не биле дел од доказите на Обвинителството.

Ова е една од најсериозните теми за процесот. Во настан што се случил во полна дискотека, за време на концерт, во време кога речиси секој има телефон со камера, логично е да се очекува дека постојат повеќе визуелни материјали од различни агли. Таквите снимки можат да бидат од огромно значење. Тие можат да покажат кој кога влегол, што носел, каде се движел, кога започнал пожарот, како реагирале присутните, што правело обезбедувањето, каде биле излезите, како се создала гужвата и кои биле првите обиди за гаснење или евакуација.

Се бара доказна прецизност и јасна индивидуализација на одговорноста

Сведочењето на директорот на Институтот за судска медицина, Александар Станков, укажува дека смртниот исход кај жртвите не може да се сведе на еден единствен фактор. Според презентираните информации, кај најголем дел од жртвите главната причина за смрт била насилно задушување како последица на труење со јаглерод моноксид. Но истовремено, во судницата беше објаснето дека на смртниот исход влијаеле и други фактори: чад, жежок воздух, водороден цијанид, термички оштетувања на дишните патишта, пренатрупаност, паника, физички притисок и неможност за евакуација.

Ако се покаже дека дел од материјалите придонеле кон ширење токсични гасови, тогаш одговорноста не се задржува само на употребата на пиротехника. Таа мора да се гледа и преку начинот на кој објектот бил уреден, опремен, дозволен и контролиран.

Ако целта е вистинска правда, тогаш процесот мора да биде попрецизен и построг кон доказите. Прашањето не е дали трагедијата била системски пораз. Прашањето е дали Обвинителството може тој пораз да го претвори во докажлива кривична одговорност. Трагедијата во „Пулс“ е факт што никој не го оспорува. Бројот на загинати, бројот на повредени, страдањето на семејствата и тежината на последиците се надвор од секоја дебата. Но, токму затоа што станува збор за еден од најтешките судски предмети во поновата историја на Македонија, процесот не смее да се потпре на општи впечатоци, претпоставки или на широка распределба на вина. Напротив, мора да покаже доказна прецизност и јасна индивидуализација на одговорноста.

The post ПРОЦЕСОТ „ПУЛС“ ПРЕД НОВИ ПРЕДИЗВИЦИ Сведоците не ја потврдија теоријата на верижна одговорност, што покажа првото соочување со материјалните докази? appeared first on plusinfo.mk.

Поранешната обвинителка Вилма Рускоска, гостувајќи во „Ноќно студио“ на 4ТВ, упати сериозни забелешки за начинот на кој се води предметот „Пулс“, еден од најобемните случаи во последните години. Со 33 обвинети и стотици сведоци, според неа, постапката е поставена неефикасно и носи ризик да се одолговлекува со години.

Рускоска оцени дека најголем проблем е тоа што сите обвинети се опфатени со иста правна квалификација, што според неа е правно спорно и тешко одржливо.

– Правната квалификација за овој предмет е промашена. Катастрофа е сите обвинети да се теретат по иста основа. Особено е нелогично министер од 2012 година да одговара за тешки дела против општата сигурност за случај што се случил 12 или 13 години подоцна. Ако направил пропуст тогаш, требало да одговара во посебен предмет, а не да се товари овој процес – рече Рускоска.

Таа реагираше и на големиот број предложени сведоци, оценувајќи дека во македонското правосудство често се оди на квантитет наместо на квалитет на доказите.

– Нема поента 10 или 15 луѓе да ја кажуваат истата приказна во судница ако веќе го кажале тоа во истрага. Тоа само го троши времето на судот и на оштетените – рече Рускоска.

Рускоска откри и дека еден од родителите на загинатите ѝ го испратил обвинението за да даде свое мислење. Според неа, со ваква поставеност на случајот, правдата останува далечна.

– Се плашам дека родителите, кои веќе се во поодминати години, нема да дочекаат вистинска правда. Овој процес со толку сведоци ќе трае со години, а пресудата на крајот може да биде само нова болка за нив – предупреди Рускоска во „Ноќно студио“ на 4ТВ.

Во однос на можноста обвинителите да го користат членот 353 за злоупотреба на службената положба, таа потсети на измените во Кривичниот Законик и посочи дека дел од дејствијата што им се ставаат на товар на обвинетите би можеле да застарат, што би значело случајот да заврши без суштинска разврска.

The post ПРОМАШЕНА ПРАВНА КВАЛИФИКАЦИЈА И ПРЕМНОГУ СВЕДОЦИ НА СУДЕЊЕТО ЗА ТРАГЕДИЈАТА ВО КОЧАНИ Вилма Рускоска го критикува обвинението во предметот „Пулс“ appeared first on plusinfo.mk.

Во општинскиот даночен регистар на Кочани дискотеката „Пулс“ не фигурирала како правно лице, туку обврските за лиценца и фирмарина ги подмирувале правните субјекти „Класик ДМ“ и „ММММ“. Ова го истакна Дејан Рашков, раководител на општинскиот Сектор за финансиски прашања, на денешното рочиште за пожарот во кочанската дискотека.

Одговарајќи на прашања на Јавното обвинителство, Рашков појасни дека Општината нема ингеренции за издавање лиценци за ноќен клуб или кабаре, туку тоа го прави Министерството за економија, а уплатите се делат на половина меѓу централниот и локалниот буџет.

– Правното лице мора да добие решение за да ги уплати тие пари. Решението е од Министерство за економија, по тоа решение се врши уплата на уплатна сметка. Сметката е така направена од Министерство за финансии за 50 отсто да одат на сметка на Општина Кочани, 50 проценти во Буџетот – рече Рашков.

Тој посочи дека за конкретниот случај биле уплатени 246.000 денари, од кои половина легнале на сметката на Општината, но не можеше да прецизира дали износот бил за лиценца за кабаре или за дискотека. На прашањето дали имало уплати директно од дискотеката „Пулс“, сведокот беше дециден дека таков субјект не постоел во нивната евиденција.

– Кога се случи настанот имавме инспекција и ги проверувавме сите даночни обврзници и утврдивме дека како правно лице не постои – нагласи сведокот.

Во исказот Рашков рече и дека не знае колку дискотеки има во Кочани, ниту колку кабареа има во градот. Тој наведе и дека за „Класик ДМ“ дознал дури по трагичниот настан, кога, како што кажа, дознал и дека „ММММ“ е правен следбеник на „Класик ДМ“.

На ваквиот исказ реагираа родителите на загинатите во пожарот кои го следат судскиот процес, посочувајќи дека, според нив, сведокот секојдневно го посетувал кафулето „Класик“ во центарот на Кочани.

Во однос на прашањата за евентуални инспекциски надзори во објектот, Рашков, кој во периодот од јануари 2022 до декември 2023 година бил и секретар на Општина Кочани, истакна дека општинските инспектори дејствуваат независно и одговараат само пред градоначалникот, но не се под ингеренција на секретарот.

– Инспекциските служби делуваат самостојно и независно, сами може да донесуваат записници, потпишуваат и донесуваат решенија, тие имаат соодветни лиценци да го потпишат записникот, решението и целата документација во однос на Законот за инспекциски надзор. Според Законот, инспекторите и раководителите на инспекциските служби одговараат пред градоначалникот – рече Рашков и додаде дека не е запознаен дали во тој период бил извршен надзор врз објектот „Пулс“.

При вкрстеното испитување од страна на бранителката на првообвинетиот, Ивана Коцевска, Рашков потврди дека Општината ја утврдува висината на надоместокот и дека правните лица „Класик ДМ“ и „ММММ“ вршеле уплати по тој основ. Тој се согласи со констатацијата на одбраната дека сопственикот на објектот не е должен да ја извести Општината за организација на настан во кабаре или дискотека.

The post ЛИЦЕНЦА И ФИРМАРИНА ЗА „ПУЛС“ СЕ ПЛАЌАЛЕ ПРЕКУ ФИРМИТЕ „КЛАСИК ДМ“ И „ММММ“ За дискотеката биле уплатени 246.000 денари appeared first on plusinfo.mk.

Со сослушување сведоци предложени од Јавното обвинителство денеска во судницата во „Идризово“ продолжува судскиот процес за пожарот во дискотеката „Пулс“ во Кочани.

На денешното рочиште беа повикани пет сведоци предложени од Јавното обвинителство, а обезбедени се четворица.

Јавниот обвинител најави дека на крајот од денешното рочиште ќе се произнесе пред Судот во однос на сведоците со кои не може да стапи во контакт за да бидат повикани со судска наредба.

Претходно, Судот го повика Обвинителството да се произнесе по барањето на Љупчо Папазов, за укинување на мерката притвор и по наоѓање на Судот определување мерки на претпазливост.

Јавниот обвинител, побара по предлогот да се произнесе на следната главна расправа, бидејќи во овој момент, како што рече „ги немаме сите информации“.

На претходното рочиште пред Судот сведочеше ПР на ДНК кој кажа дека прскалките биле од бендот, купувани легално од продавница во Кисела Вода, како и редовни гости од дискотеката, кои ги опишаа настаните во ноќта на 16 март, минатата година, кога во пожарот загинаа 63 лица, а над 200 беа повредени.

Процесот се одвива под засилени безбедносни мерки, во присуство на обвинетите, роднини на жртвите и јавноста. Постапка се води против повеќе од 30 физички и три правни лица за тешки дела против општата сигурност.

Судењето го води судијката Дијана Груевска-Илиевска, а Обвинителството го застапува тим од 15 јавни обвинители.

Пожарот во дискотеката во Кочани избувна за време на настап на групата ДНК и претставува една од најтешките трагедии во поновата историја на земјата. Со денешното рочиште продолжува доказната постапка со изведување сведоци на предлог на Обвинителството.

The post ЌЕ СЕ СОСЛУШУВААТ СВЕДОЦИ НА ОБВИНИТЕЛСТВОТО Продолжува судењето за трагедијата во дискотеката „Пулс“ appeared first on plusinfo.mk.

Во рамките на опсежната акција што се спроведува изминатиот период, а во која до сега се запленети над 40 тони марихуана од повеќе правни лица на територијата на државата, Јавното обвинителствож ја информира јавноста дека континуирано презема активности во соработка со Министерството за внатрешни работи и Комисијата за одобрување на одгледување на канабис за медицински цели, во рамките на Министерството за здравство.

„Постапувањето се одвива во континуирана координација со Основното јавно обвинителство за гонење на организиран криминал и корупција, како и со други јавни обвинителства со месна и стварна надлежност, кои постапуваат по предмети за кривични дела утврдени во Законот за контрола на опојни дроги. Во насока на целосно утврдување на фактите и околностите, предметниот обвинител од ОЈО ГОКК е во комуникација со Обвинителството за организиран криминал на Република Србија, со цел размена на информации од значење за постапката што ќе помогнат да се утврди евентуална поврзаност на двата случаи и потеклото на марихуаната. Воедно, јавниот обвинител од ОЈО ГОКК презема и други дејствија согласно своите законски надлежности, вклучително и сослушување лица во својство на сведоци, со цел прибирање докази и факти релевантни за постапката“, соопшти Јавното обвинителство.

Основното јавно обвинителство за гонење на организиран криминал и корупција, заедно со надлежните институции, продолжува со преземање на дејствија за целосно расчистување на случајот, за што јавноста ќе биде навремено информирана, се додава во соопштението.

The post ОБВИНИТЕЛСТВОТО ИСТРАЖУВА ДАЛИ ЗАПЛЕНЕТИОТ КАНАБИС ВО СРБИЈА Е ОД МАКЕДОНИЈА Се испрашуваат сведоци, се собираат докази за запленетите 40 тони марихуана appeared first on plusinfo.mk.

Со сослушување на сведоци предложени од Обвинителството, денеска во Основниот кривичен суд Скопје, продолжи судењето против поранешниот директор на Клиниката за онкологија Нино Васев, кој заедно со уште двајца онколози е обвинет за несовесно лекување пациенти.

Пред Судот беа сослушани тројца оштетени сведоци, законски застапници на починати пациенти, кои зборуваа за лекувањето и конкретната терапија на Клиниката за онкологија.

Двајца денеска сослушани сведоци во случајот „Онкологија“ најавија отштетено побарување и се приклучија на кривичниот прогон, додека еден рече дека ниту бара отштета, ниту се се приклучува кон кривичниот прогон, нагласувајќи дека дури е благодарен на доктор Нино Васев.

Првиот сведок, чија сопруга била пациент на Нино Васев на Онкологија, одговарајќи на прашања од обвинителката Ана Гоговска Јакимовска, рече дека во 2013 била оперирана во приватна болница и девет години била добра, но повторно се појавил проблем за кој требало да се вршат испитувања во Турција или Словенија.

– Се одлучивме за болницата Коч, во Турција. Закажавме преглед, кажаа дека е во прогрес и дека треба што поскоро да почне со хемотерапија. Ни рекоа да чекаме шест месеци, и бевме во дилема. Се вратиме во Македонија со целата дијагноза и терапија што требаше да се прима. Дојдовме до врска до доктор Нино, не прими, рече дека може таа терапија и кај нас да ја давам, што не се турски. Рече дека може веднаш да се почне со терапија – изјави сведокот.

Сведокот рече дека на 21 ден ја носел да прими хемотерапија, како и неколку зрачења и витамински терапии.

– Првото зрачење требаше да биде четири дена, но по првото рекоа дека нема потреба. Не викнаа во канцеларија докторот Васев и Мери беше, рекоа во ред е не се плашете, таква е терапијата – појасни сведокот.

Но, како што рече сведокот, состојбата се влошувала и правеле и други консултации, дури биле повторно и во Турција, но немало ефект.

Другиот сведок, чија сопруга, исто така, била пациент на Онкологија, кај Нино Васев од 2007-8 година.

-Во 2005 година и беше констатиран рак на дојка. Иако беше свесна, не сакаше да прима терапии. Некоја година подоцна, јас инсистирав нешто да се преземе, меѓутоа не можеше да се најде, па се насочивме повеќе на храна и алтернативни методи. Користевме разни методи, но немаше некое посебно влошување поради што сметавме дека сме на вистински пат – изјави сведокот.

Тој рече дека барал доктор кај кого можел да се лекува, па го упатиле кај Нино Васев.

– До 2017 немаше никакви влошување дури и смалување. Мислевме дека готово, се заврши работата, меѓутоа есента 2017 ја скрши раката. За кратко време се зголеми многу туморот и требаше да се направи операција. Се оперираше во приватна болница, по што беше на хемотерапија и сите анализи покажаа дека нема веќе ништо, се е исчистено – рече сведокот.

Кон 2020 година, сведокот рече дека повторно почнала да чувствува рекации и по предлог на доктор Нино Васев, направиле снимање на глава, бидејќи почнал да и се менува говорот.

– На магнетна резонанца се покажа некое топче во главата. Во 2021 беше оперирана на тумор на главата. Операцијата не беше многу успешна и за кратко време се повтори. За цело време примаше терапија, но ништо не и помагаше. Имаше и зрачење и ништо, изјави сведокот.

Сведокот рече дека е многу благодарен на доктор Нино Васев, што со неговата терапија и помош, неговата сопруга успеала да дочека дипломирање на синот и дури да прошетаат низ Европа.

– Мое лично мислење е дека многу пократко ќе завршеше нејзиниот живот ако останеше да се лекува како претходно. Не се приклучувам на кривичен прогон, напротив – изјави сведокот.

Последниот сведок, чиј татко бил пациент кај Нино Васев на Клиниката за онкологија во 2021 година, кажа дека цело време бил со него и знае за терапијата што ја примал.

– Кога почна со терапијата во октомври, почна со хемотерапија и имунотерапија. Тоа траеше до декември, потоа во јануари отиде на зрачење, по што продолжи да прима терапија до јуни-јули 2022 година. Како што минуваа месеците, тој беше се послаб и послаб. Освен кога имаше зрачење на мозокот и примање на инфузија за мозокот имаше подобрување, можеше да движи и збори. Без таа терапија манитол немаше ориентација, беше поспан и му се вртеше – изјави сведокот.

Случајот се наоѓа во доказна постапка и го води судијката Снежана Марковска.

Следното рочиште е на 9 февруари, за кога, како што е најавено, ќе треба да се почне со сослушување на вешти лица од Словенија, кои ги работеле медицинските вештачења за Обвинителството. За сослушување на вештите лица од Словенија се закажани повеќе рочишта во февруари.

Согласно најавената динамика, кон крајот на март, ќе треба да се почне со сослушување на вешти лице од Србија, кое, исто така, работеле медицински вештачења на Обвинителството.

Поранешниот директор на Клиниката за онкологија Нино Васев, заедно со уште двајца онколози Симонида Црвенкова и Драган Јакимовски, вработени на Клиниката за радиотерапија и онкологија Скопје, се обвинети за несовесно лекување пациенти. Постапката започна против уште еден онколог, второобвинетата Мери Пешевска, која призна вина пред Судот, по што Судот ја осуди на две години условна казна затвор.

Обвинението ги товари лекарите за продолжени „тешки дела против здравјето на луѓето“ и „несовесно лекување“, при што кај 29 пациенти биле применети неподобни терапии, со отстапувања во дозирањето и без соодветна проценка на здравствената состојба.

Покрај ова, против Васев и поранешниот економски директор на Клиниката е поднесено уште едно обвинение за злоупотреба на службена положба и проневера, со штета од над 2,2 милијарди денари на државниот буџет.

The post СОСЛУШАНИ СВЕДОЦИ ЗА СЛУЧАЈОТ „ОНКОЛОГИЈА“ Судењето продолжува со искази на роднини на пациенти appeared first on plusinfo.mk.

42-годишен маж од Битола е осомничен за обид за убиство, откако вчера на „Новиот пазар“ во градот се обидел да лиши од живот продавач, при што го нападнал со кујнски нож од зад грб, додека оштетениот редел роба на тезгата.

Како што соопшти Основното јавно обвинителство Битола, напаѓачот му задал две убодни рани во пределот на грбот и слабината, пред да биде совладан од двајца очевидци. По кратката пресметка, осомничениот се дал во бегство, но подоцна бил идентификуван и приведен.

„Станува збор за кривично дело Убиство во обид, по член 123 став 1 во врска со член 19 од Кривичниот законик. Обвинителството веднаш отвори истражна постапка, а поради опасност од бегство, влијание врз сведоци и довршување на делото, предложивме на осомничениот да му се определи мерка притвор“, изјавија од Основното јавно обвинителство Битола.

Осомничениот ќе биде изведен пред судија на претходна постапка кој ќе одлучува по предлогот на Обвинителството. Според информации, оштетениот е надвор од животна опасност, а случајот предизвика вознемиреност меѓу пазарџиите и посетителите на Новиот пазар.

СВР Битола поднесе кривична пријава против К.С. за сторено кривично дело „обид за убиство” по член 123 став 1 во врска со член 19 од Кривичниот законик, а судија на претходна постапка му одреди мерка притвор во траење од 30 дена.

The post СО КУЈНСКИ НОЖ ГО ПРОБОДЕЛ ВО ГРБ И ВО СЛАБИНА Обид за убиство на битолски пазар среде бел ден appeared first on plusinfo.mk.

Истрагата која се води за трагичниот настан во Кочани, треба да заврши за десетина денови, рече јавниот обвинител Љупчо Коцевски во одговор на новинарско прашање на денешната прес-конференција во Јавното обвинителство.

По завршување на истражните дејства, одбраната ќе има можност за увид во доказите, а обвинителниот акт се чека да биде готов во средината на јуни.

– Засега толку можеме. И вчера и во моментов се распрашуваат сведоци, осомничени, се прибираат докази. Досега се распрашани голем број сведоци, можеби повеќе од тристе. Се надевам дека јавните обвинителите ќе ја завршат постапката предвидена со динамиката – рече Коцевски.

Тој повтори дека се работи на собирање и на нови докази и посочи дека ако јавните обвинители откријат нови моменти, истрагата ќе биде проширена.

Во истрагата за пожарот во дискотеката „Пулс“ во Кочани, кој се случи на 16 март 2025 година, а во кој загинаа 62 лица, досега се осомничени 68 физички и три правни лица.

Пожарот беше предизвикан од искри од пиротехнички ефекти за време на концерт на групата ДНК. Дискотеката работела без валидна лиценца и прекршувала бројни безбедносни стандарди, вклучувајќи немање противпожарни системи и доволно излези за евакуација.

The post ПОВЕЌЕ ОД 300 СВЕДОЦИ РАСПРАШАНИ ЗА ПОЖАРОТ ВО КОЧАНИ Обвинението се очекува до средината на јуни appeared first on plusinfo.mk.

Со сведоци на одбраната на првообвинетиот Љупчо Палевски Палчо денеска во Кривичниот суд во Скопје ќе продолжи судењето на обвинетите за грабнувањата и за убиствата на 74-годишниот Панче Жежовски од Велес и на 14-годишната Вања Ѓорчевска од Скопје. За тешките злосторства извршени на 22 и на 27 ноември 2023 година, покрај Палевски се обвинети и Велибор Манев, Боре Видевки и Влатко Кешишев, а Александар Ѓорчевски е обвинет за помагање во извршувањето на грабнувањето на неговата ќерка Вања.

Одбраната на  Палевски, адвокатите Марјан Витановски и Јовица Страшевски, за сведоци предложи двајца полицајци од СВР Велес, на кои судијата Ивица Стефановски им испрати покани за денешното рочиште. Тоа се полицајците Мартин Панчевски и Стојан Кујунџиевски.

Неизвесно е како ќе продолжи рочиштето доколку не дојдат полицајците Панчевски и Кујунџиевски – дали ќе се испитуваат обвинетите или ќе се изведуваат материјалните докази што ги предлага обвинетиот Палевски. Судијата Стефановски најави можност доколку не дојдат сведоците, одбраната на Манев да биде подготвена за испитување на второобвинетиот Велибор Манев.

Во врска со материјалните докази кои ги предлага првообвинетиот Палевски, судијата ги задолжи неговите адвокати да состават листа.

– Со оглед дека Палевски даде повеќе поднесоци за изведување на докази, како и барање на обезбедување на докази, ја задолжувам одбраната да состави листа каде секој доказ поединечно ќе биде нумериран, за да може Судот да се изјасни. Направете селекција, затоа што многу поднесоци се во прашање – ги задолжи судијата адвокатите на Палевски на последното рочиште.

БИВШ РАЗУЗНАВАЧ, ЧЛЕН НА ДЕСНА, СВЕДОЧЕШЕ ДЕКА ПАЛЕВСКИ БИЛ СТРУЧЊАК ЗА ЕЛЕКТРОНСКА КОМУНИКАЦИЈА Петковски тајно снимал полицајци кои наводно му кажале дека Боре бил тепан во станица

Доколку денеска почнат исказите на обвинетите, судењето за двете убиства ќе влезе во завршната, „најжешка“ фаза. Прв од обвинетите ќе сведочи Манев, потоа Видевски, Кешишев, Ѓорчевски и последен Палевски. На првото рочиште сите обвинети се изјаснија за невини, а во истражната постапка Манев, Видевски и Кешишев го признаа делото. Во текот на судењето, пак, Кешишев  призна што сторил со зборовите „тоа се дела за кои одговарам“ во писмото со кое го негираше своето претходно писмо, за кое рече дека го напишал по налог на Палчо.

Велешанецот Велибор Манев е тој што ги однел полицајците до местото каде го закопале телото на Панче Жежовски. Штипјанецот Влатко Кешишев ги однел полицајците до местото каде е закопано телото на Вања.

• ПАЛЕВСКИ Е СНИМЕН ВО ДВОРОТ НА МАНЕВ ВЕЧЕРТА ПРЕД УБИСТВОТО НА ПАНЧЕ ЖЕЖОВСКИ Палчо и Боре имале слушалки во ушите и микрофони на облеката

Јавноста со нетрпение ги очекува испитувањата на обвинетите за убистата во надеж дека ќе се дознае повеќе за мотивите на грозоморните убиства. Јавноста не е уверена во мотивот кој е изнесен во обвинението дека убиствата се извршени од користољубие – Панче е убиен за да му се одземе возилото, а Вања е грабната со цел за неа да биде баран откуп од семејството. Ова особено што убијците не побарале откуп за Вања и не ја однеле на место каде што ќе ја чуваат до откупот, туку среде ливада со ископана дупка и ја убиле околу час и половина по грабнувањето. Јавноста не е уверена и дека таткото Александар има врска со грабнувањето на неговата ќерка.

• ПО ПРВИОТ ОБИД ЗА КИДНАПИРАЊЕ НА ВАЊА, МАНЕВ ИЗВАДИЛ 2 ЛОПАТИ ОД „РЕНОТО“ Боре Видевски пробувал црни ракавици пред да тргнат за Скопје

Од сведочењата на обвинетите јавноста очекува да дознае детаљи кој ги предложил злосторствата, како ги планирале, што им била намерата, како се грабнати Панче и Вања, зошто е убиени, од кого планирале да бараат откуп за Вања, какви им биле намерите откако евентуално ќе го добијат откупот итн.

На минатото рочите сведочеше член на партијата Десна, чиј претседател беше Палевски, кој се обиде да му даде алиби на Палевски за утрото кога е убиена 14-годишната Ѓорчевска. Тврдеше дека од 8.20 до 9 часот комуницирал со Палчо, но немаше доказ за комуникацијата, која, според него, се одвивала на таен канал на мрежата Телеграм и се самоизбришала по 30 минути.

На предминатото рочиште обвинителките презентираа снимки од надзорните камери од куќата на Манев, на кои се гледаат четворицата обвинети како се собираат кај Манев вечерта пред убиството на Панче, пред неуспешниот обид за грабнување на Вања на 24 ноември 2023 година, како и вечерта пред убиството на Вања. На снимките, за кои Судот рече дека утврдил дека се гледаат лицата на обвинетите, се гледаат четворицата како пробуваат ракавици, носат слушалки и микрофони, како и радиостаници. На една снимка по неуспепниот обид за грабнување на Вања, се гледа Манев како вади лопати од рено кангу и како од гепекот вади вреќа за пиење, ја дипли и ја враќа.

The post ЌЕ СВЕДОЧИ ЛИ ДЕНЕСКА ВТОРООБВИНЕТИОТ ВЕЛИБОР МАНЕВ? Судењето за убиствата на Вања и на Панче влегува во финишот appeared first on plusinfo.mk.

Maж од виничкото село Јакимово со две возила блокирал сопружници кои требало да сведочат против него на судско рочиште, информираше МВР. Полицијата во Виница на 28.01.2025 година го уапсила 32-годишниот П.Т. поради сомнение дека влијаел врз сведоците.

„Околу 08.30 часот во селото, тој со две возила го блокирал возилото на сопружниците П.Т. и М.Л. од с.Јакимово и на тој начин ги оневозможил да присуствуваат на судско рочиште во кое требало да сведочат против него. Според пријавеното, притоа тој им упатувал и закани да не се појавуваат на суд“, се вели во полицискиот билтен.

По целосно документирање на случајот, против него ќе биде поднесена соодветна пријава.

The post ГИ БЛОКИРАЛ СО 2 ВОЗИЛА ЗА ДА НЕ СВЕДОЧАТ ПРОТИВ НЕГО Уапсено лице од виничко Јакимово appeared first on plusinfo.mk.