Собраниската Комисија за политички систем и односи меѓу заедниците едногласно ги усвои извештаите за работата на Судскиот совет и за реализацијата на судскиот буџет во 2025 година и ги проследи во понатамошна собраниска процедура. Годинава, за првпат согласно новото законско решение, јавната расправа ја следеа и претставници на невладини организации од областа на правосудството и човековите права.

Претседателот на Комисијата, пратеникот Љупчо Пренџов, оцени дека вклучувањето на граѓанскиот сектор претставува дополнителен квалитет во работата на собраниското тело.

– За првпат, по новиот закон, имаме јавна расправа која ја следат невладини организации од областа на правосудството и човековите права, и тоа е нов квалитет во работата на Комисијата за политички систем и односи меѓу заедниците – нагласи Пренџов.

Двата извештаја пред пратениците ги презентираше претседателот на Судскиот совет, Александар Камбовски, кој се осврна на приходите и расходите во судството, но и на проблемите со човечките ресурси.

Податоците покажуваат значителен недостаток од судии и судски службеници. Од предвидените 639 судиски места, до крајот на 2025 година биле пополнети 418, односно околу 65 проценти. Тоа значи дека во судовите останале непополнети 221 судиско место.

Уште поизразен е кадровскиот недостаток во судската служба. Од систематизираните 4.751 работно место, пополнети биле само 1.803, односно 37,95 проценти. Според овие податоци, судовите работеле со 2.948 непополнети места за службеници.

Камбовски нагласи дека човечките ресурси се клучни за функционирањето, независноста и ефикасноста на судската власт, како и за довербата на граѓаните во правосудниот систем.

– Човечките капацитети се најважниот ресурс со кој располага секоја судска власт – истакна Камбовски, додавајќи дека обезбедувањето соодветни услови за работа на судиите е еден од приоритетите на Судскиот буџетски совет.

Пратеникот Антонијо Милошоски оцени дека извештајот објективно ја прикажува потребата од дополнителни финансиски средства и човечки ресурси во судството.

– Се надевам дека Судскиот совет, заедно со другите судови во државата, ќе успее во конструктивна соработка со надлежните власти да се избори за подобар буџет – рече Милошоски.

Тој предложи обезбедувањето поголеми буџетски и кадровски капацитети да биде заедничка цел на пратениците и судските институции, за потоа од судовите да може да се бараат подобри резултати и поголема ефикасност.

The post ЗЕЛЕНО СВЕТЛО ЗА ДВАТА ИЗВЕШТАИ ЗА СУДСТВОТО Судскиот совет предупреди за недостиг од кадар и на пари appeared first on plusinfo.mk.

Само 7 од предвидените 19 судиски места во Основниот суд Штип се пополнети, а недостигот од кадар веќе го отежнува формирањето кривични совети и решавањето граѓански предмети. За да се ублажи состојбата, Судскиот совет на денешната седница одлучи во Штип привремено да бидат испратени 4 судии од Велес и од Скопје.

Координаторката за работата на Основниот суд Штип, Тања Чачарова-Илиевска, информираше дека меѓу 7 судии се вбројува и претседателот на судот.

Таа посочи дека 2 од судиите се новоизбрани и засега не можат да одговорат на сите потреби на судот со проширена надлежност.

Недостигот од судиски кадар особено се чувствува при формирањето кривични совети, но и при постапувањето по граѓанските предмети, со оглед на нивниот прилив.

Судскиот совет затоа одлучи во Штип да бидат упатени судиите Ангел Трипчев и Дејан Перчинковски од Основниот суд Велес, како и Сенида Јашар и Ирена Јаниќ од Основниот кривичен суд Скопје.

Четворицата ќе бидат времено распоредени во Основниот суд Штип за период од 1 година, почнувајќи од 16 ноември 2026 година.

Според образложението на Судскиот совет, за нивното упатување е обезбедена согласност од претседателите на матичните судови, а проценката е дека со тоа нема да се наруши нивното функционирање.

Со новите 4 судии, бројот на судии што ќе работат во Штип привремено ќе се зголеми на 11, но и понатаму ќе биде помал од предвидените 19 судиски места.

На истата, 559. седница, Судскиот совет одлучуваше и за приговор на судијката Лорета Тодорова од Основниот суд Велес, која се спротивставила на нејзиното распоредување во кривичен совет за време на продолжениот празничен викенд, од 23 до 25 октомври.

Тодорова навела дека работи во граѓанскиот оддел и дека со ваквото распоредување незаконски се менува годишниот распоред, без претходно мислење од судиите. Таа укажала и дека во истиот период е дежурна за предмети поврзани со семејно насилство.

Претседателката на Основниот суд Велес, Валентина Ѓорѓиевска, образложила дека станува збор за привремена организациска мерка, неопходна поради отсуство на судии кои вообичаено членуваат во кривичниот совет.

Во расправата, членот на Судскиот совет Ивица Николовски изразил несогласување, посочувајќи дека распоредувањето судија од граѓански во кривичен оддел отвора прашања за стручната подготвеност и за распределбата на обврските.

Сепак, Советот го одби приговорот како неоснован, прифаќајќи дека мерката е привремена и има цел да обезбеди непречено постапување по итните предмети.

На седницата беа разрешени и судии-поротници од основните судови во Кавадарци, Струмица и во Ресен, поради истекување на мандатите или исполнување на законските услови за престанок на функцијата.

Судскиот совет прифати и барање за надоместок на патни трошоци на судија на Врховниот суд за релацијата Штип – Скопје и обратно.

The post ВО ШТИП ФАЛАТ 12 СУДИИ, НА ПОМОШ ДОАЃААТ 4 ОД ДРУГИ ГРАДОВИ Само 7 од предвидените 19 места се пополнети appeared first on plusinfo.mk.

Судскиот совет денеска ги усвои извештаите на Комисијата за проверка на навременоста на пријавите и комплетноста на документацијата по објавените огласи за избор на претседател на Апелацискиот суд Скопје и Основниот суд Струга, при што констатираше дека тројцата пријавени кандидати ги исполнуваат условите за учество во понатамошната постапка.

За претседател на Апелацискиот суд Скопје се пријавиле судиите Зоран Герасимовски и Лидија Зимбовска, а за претседател на Основниот суд Струга единствен кандидат е Танче Петревски.

По разгледувањето на доставената документација, Судскиот совет утврди дека пријавите се навремени и комплетни, по што ги усвои извештаите на надлежната комисија и одлучи постапката за избор да продолжи во следната фаза.

На денешната седница Советот го усвои и извештајот од извршената работна посета на Основниот кривичен суд Скопје.

Претходно на денешната седница Судскиот совет избра претседатели на основните судови во Гостивар, Дебар и Свети Николе.

За претседател на Основниот суд Гостивар е избран досегашниот в.д. претседател Мирослав Петровски, кој беше еден од двајцата кандидати со уредна и комплетна документација. Во постапката учествувал и Елејса Алији, но на седницата беше посочено дека на 13 јуни 2026 година била усвоена одлука за исполнување услови за старосна пензија. Кандидатката Драгослава Веселиновска не ја комплетирала документацијата, бидејќи не доставила акциски план за спроведување на програмата за работа.

За претседател на Основниот суд Дебар е избран Оруч Абазовски. Во постапката учествувал и Мерсим Марку, но Судскиот совет констатира дека не ги исполнува условите за избор бидејќи двапати претходно бил избран за претседател на Основниот суд Дебар.

За претседател на Основниот суд Свети Николе е избрана Валентина Буровска, која била единствен кандидат во постапката.

Судскиот совет ги усвои тримесечните извештаи за работата на судовите во периодот април – јуни 2026 година при што судовите на ниво на државата беа оценети како неажурни.

На ниво на државата судовите во вториот квартал не успеале да го совладаат приливот на нови предмети и го зголемиле заостатокот за 2.127 предмети. Судовите го почнале вториот квартал со 147.288 нерешени предмети, примиле 121.909 нови, имале вкупно во работа 269.197 предмети, од кои решиле 119.782, а на крајот од периодот останале нерешени 149.415 предмети.

На ниво на највисоките судови како неажурни се оценети Управниот и Вишиот управен суд. Вишиот управен суд со само 6 судии од предвидени 13 го заврши кварталот со 2.767 нерешени предмети, а Управниот суд со 26 судии и пополнетост на судската служба од 39,05 проценти завршил со 5.528 нерешени предмети.

Врховниот суд, пак, е оценет како ажурен и покрај тоа што работи со 14 судии од предвидените 28.

Во апелациското подрачје Битола ажурни се Апелацискиот суд Битола и Основниот суд Охрид, а основните судови во Битола, Крушево, Прилеп, Ресен и во Струга се оценети како неажурни.

Апелација Битола работи со само 9 судии од предвидени 25 според систематизацијата и пополнетост на судската служба од 35,19 проценти, но сепак ја задржал ажурноста, за што, според образложението, помогнало привременото упатување судии од Гостивар.

Основниот суд Битола е со преполовен судиски кадар, со 12 од предвидени 25 судии, и завршил со 7.468 нерешени предмети. Во Крушево работи само еден судија и еден привремено упатен судија, а судот кварталот го завршил со 530 нерешени предмети.

Основниот суд Охрид, иако работи со 7 од предвидени 18 судии и двајца делегирани судии, е оценет како ажурен. Од друга страна, Основниот суд Прилеп, со 8 судии и тројца делегирани судии, останал со 9.149 нерешени предмети, а Основниот суд Струга со само 4 судии и тројца делегирани завршил со заостаток од 9.115 предмети.

Во апелациското подрачје Штип како ажурни се оценети основните судови во Виница, Делчево, Свети Николе и Струмица, а неажурни се Берово, Кочани, Радовиш и Штип. Неажурен е и самиот Апелациски суд Штип, кој работи со 10 судии од предвидени 16 и го завршил кварталот со 2.106 нерешени предмети.

Особено лоша состојба беше посочена за Основниот суд Берово за кој на седницата беше наведено дека практично не функционира поради недостиг на судии и друг стручен кадар.

Основниот суд Кочани го завршил кварталот со 3.179 нерешени предмети, а Радовиш со значителен недостиг на кадар и пополнетост на службата од 31,82 процент.

Во гостиварското апелациско подрачје ажурен е само Основниот суд Гостивар, а основните судови во Дебар, Кичево и Тетово, како и Апелацискиот суд Гостивар, се оценети како неажурни.

Апелацискиот суд Гостивар работи со 10 судии од систематизирани 16 и кварталот го завршил со 850 нерешени предмети.

Основниот суд Гостивар е еден од ретките што успеал да го совлада приливот на предмети. Од вкупно 12.523 предмети во работа, решил 6.394 и го намалил заостатокот на 6.129 предмети.

Основниот суд Тетово имал најголем обем на работа во ова подрачје, со над 21.000 предмети во работа, но и покрај тоа, останал со 8.346 нерешени предмети.

Во најголемото апелациско подрачје, Скопје, ажурни се Апелацискиот суд Скопје, Основниот кривичен суд Скопје, како и основните судови во Велес и Кратово.

Апелацискиот суд Скопје, и покрај тоа што има пополнетост на судската служба од само 21 процент, е оценет како ажурен и кварталот го завршил со 7.488 нерешени предмети.

Неажурен е Основниот граѓански суд Скопје, кој има најголем заостаток во државата од 24.298 нерешени предмети. Судот работи со 56 судии од предвидени 77.

Основниот кривичен суд Скопје е оценет како ажурен и во вториот квартал решил 22.962 предмети од вкупно 43.572 во работа.

Како неажурни се оценети и основните судови во Гевгелија, Кавадарци, Крива Паланка, Куманово и во Неготино, а ажурни остануваат Велес и Кратово.

Од дискусијата на седницата произлезе дека речиси сите судови се соочуваат со недостиг од судии и особено со недоволен број судски службеници поради што Судскиот совет оцени дека кадровската екипираност останува еден од најголемите предизвици за подобрување на ефикасноста на судскиот систем.

The post СУДИИТЕ ЗИМБОВСКА И ГЕРАСИМОВСКИ ВО ТРКА ЗА ПРЕТСЕДАТЕЛ НА АПЕЛАЦИЈА СКОПЈЕ Македонските судови се главно неажурни, во судот во Берово нема судии appeared first on plusinfo.mk.

Судскиот совет на денешната седница расправаше за состојбите во Основниот суд Куманово, откако вчера Синдикатот на УПОЗ јавно реагираше на навреди и несоодветен однос кон вработените од страна на претседателката на судот.

Член на Судскиот совет Ивица Николовски, кој е координатор за Основниот суд Куманово, истакна дека Советот подолг период ги следи случувањата во судот и дека прашањето не е ново за институцијата.

Тој посочи дека веќе се формирани две комисии кои работат на утврдување на фактичката состојба, а во меѓувреме до Советот пристигнуваат и дополнителни информации и дописи од засегнатите страни.

– Во насока на испитување на случувањата во Куманово и изнаоѓање решение што ќе доведе до позитивен исход за сите, закажана е средба по барање на претседателот на Судскиот совет и претседателот на Основниот суд Куманово. Извештаите се при крај и очекувам во една од наредните седници да бидат ставени на дневен ред – информираше Николовски.

Тој додаде дека во извештаите ќе бидат опфатени наодите од посетите на судот, како и информациите добиени од сите инволвирани страни, по што Советот ќе донесе заклучоци за понатамошно постапување.

По повод реакциите на УПОЗ, членот на Советот Сузана Јошевска-Анастасовска информираше дека претставката на која се повикуваше синдикатот веќе е предмет на постапување.

Според неа, претставката не била доставена со оригинални потписи, но наместо да биде отфрлена поради формални недостатоци, Советот решил да преземе дополнителни активности поради јавниот интерес и потребата од целосно согледување на состојбите во Куманово.

– По претставката не само што се постапува, туку е постапено во најкратки можни рокови и на најсовесен начин. Намерата беше да се излезе во пресрет на вработените и да се испитаат нивните наводи, но за тоа е неопходно да бидат исполнети и законските услови за постапување – појасни Јошевска-Анастасовска.

Вработени кумановскиот суд поднесоа претставка до Судскиот совет со која бараат разрешување на претседателката на судот Снежана Манев, поради тоа што со години биле изложени на навреди, притисоци и недолично однесување од нејзина страна. Синдикатот на УПОЗ вчера побара Судскиот совет итно да постапи по оваа претставка. Претседателот на овој синдикат, Трпе Деаноски рече дека од вкупно 90 вработени во судската администрација, 75 ја потпишале претставката против претседателката.

Претседателката Манев ги отфрли наводите протв неа како неточни и паушални и посочи дека не е наведен ниту еден конкретен случај, кога и кон кого бил извршен притисок. Според неа, протестот е организиран од судскиот администратор, претседателот на синдикатот, еден службеник и неколкумина вработени, а повод е дисциплинската постапка против судскиот администратор поради несовесно, ненавремено или небрежно вршење на работните задачи. Манев речеи дека поради намалувањето на бројот на вработени во судот се врши реорганизација и поголемо ангажирање на постојниот кадар, а дел од вработените, поддржани од судскиот администратор одбивале да ги извршуваат дадените задачи.

БУНТ ПРОТИВ ПРЕТСЕДАТЕЛКАТА НА КУМАНОВСКИОТ СУД Вработените се жалат на мобинг, Синдикатот се заканува со протест и штрајк

The post СУДСКИОТ СОВЕТ ЈА ИСТРАЖУВА СОСТОЈБАТА ВО КУМАНОВСКИОТ СУД ПО ПОПЛАКИТЕ ПРОТИВ ПРЕТСЕДАТЕЛКАТА Извештаите се во завршна фаза appeared first on plusinfo.mk.

Вработени во Основниот суд во Куманово поднесоа претставка до Судскиот совет со која бараат разрешување на претседателката на судот Снежана Манев, поради тоа што со години биле изложени на навреди, притисоци и недолично однесување од нејзина страна.

Синдикатот на УПОЗ бара Судскиот совет итно да постапи по оваа претставка, а институциите да ги испитаат сите наводи и да ги заштитат вработените во Основниот суд во Куманово.

Претседателот на УПОЗ, Трпе Деаноски, денеска на прес конференција рече дека од вкупно 90 вработени во судската администрација на кумановскиот суд, 75 ја потпишале претставката против претседателката. Дел од вработените за време на паузата излегле пред судот за да го изразат незадоволството од условите и атмосферата во која работат.

Деаноски рече дека до Судскиот совет и до Министерството за правда повеќепати биле доставувани претставки, но оти досега немало соодветна реакција. Тој рече дека при посетата на двајца претставници на Судскиот совет, наместо да се разгледуваат наводите од претставките, вработените поединечно биле повикувани да потврдат дали потписите на документот се нивни.

Деаноски изнесе сериозни обвинувања за однесувањето на претседателката, наведувајќи дека вработените биле навредувани и по лична, верска и национална основа. Тој цитираше низа навреди и закани кои, според него, биле упатувани кон вработените, меѓу кои и: „говеда“, „џукели“, „глупи сте“, како и закани дека ќе бидат ставени „под нозе“ или дека „ќе бидат запалени“.

Според Деаноски, дел од овие навреди биле упатувани и пред странки и граѓани. Тој се повика и на извештај на Судскиот совет од 2023 година, за кој рече дека констатирал нарушени меѓучовечки односи во Основниот суд во Куманово.

Од УПОЗ најавија дека доколку во рок од осум дена не биде преземено нешто конкретно, ќе организираат протести, а не ја исклучуваат можноста за штрајк.

Претседателката на Основниот суд во Куманово, Снежана Манев, ги отфрла обвинувањата. Таа денеска не била на работа, а новинарите ги примил нејзиниот заменик Неџат Мемети, кој доставил нејзиното писмено соопштение до медиумите. Во него Манев тврди дека наводите за незаконско и недолично однесување кон вработените се „потполно неточни и невистинити“.

„Наводите за вршење притисок од моја страна кон вработените се неточни, невистинити, паушални и апстрактни, бидејќи во истите дури не е наведен ниту еден конкретен случај, кога и кон кого бил извршен наводниот притисок“, наведува Манев.

Според претседателката, протестот бил организиран од судскиот администратор, претседателот на синдикатот, еден службеник и неколкумина вработени. Како повод за протестот таа ја посочува дисциплинската постапка против судскиот администратор поради, како што наведува, несовесно, ненавремено или небрежно вршење на работните задачи.

Манев истакнува дека поради намалувањето на бројот на вработени во судот се врши реорганизација и поголемо ангажирање на постојниот кадар. Таа тврди дека дел од вработените, поддржани од судскиот администратор, одбивале да ги извршуваат дадените задачи. Во соопштението се наведуваат и забелешки во врска со користењето на годишни одмори, продолжени боледувања и неоправдани отсуства, за кои, според Манев, имало поплаки од странки.

„Јас раководам со судот во целина и имам обврска истиот да функционира пред сè за добро и во корист на граѓаните. Сите вработени во судот мора да бидат целосно посветени и максимално ангажирани при извршување на своите работни задачи. Јас како судија и претседател на судот не прифаќам ништо помалку, ниту правам компромиси“, пишува во соопштението на Манев.

The post БУНТ ПРОТИВ ПРЕТСЕДАТЕЛКАТА НА КУМАНОВСКИОТ СУД Вработените се жалат на мобинг, Синдикатот се заканува со протест и штрајк appeared first on plusinfo.mk.

Судскиот совет на денешната седница го избра судијата Зоран Герасимовски за вршител на должноста претседател на Апелациониот суд Скопје, откако досегашната претседателка Мери Дика вчера беше избрана за судија на Уставниот суд.

За в.д. претседател на Апелациониот суд Скопје беа предложени Тања Милева и Зоран Герасимовски, а Советот одлучи функцијата привремено да ја извршува Герасимовски. Истовремено, беше донесена одлука за распишување оглас за избор на претседател на Апелациониот суд Скопје.

Судскиот совет донесе и одлука за мирување на судиската функција на Мери Дика по нејзиниот избор за член на Уставниот суд.

На седницата беше разгледано и барањето на судијата на Основниот суд Охрид, Вулнет Винца, за продолжување на вршењето на судиската функција и по исполнувањето на условите за старосна пензија. Советот го отфрли барањето поради пропуштање на рокот за доставување на потребната изјава.

Воедно, Судскиот совет констатираше дека Винца ги исполнил условите за старосна пензија. Со оглед дека ја извршувал и функцијата претседател на Основниот суд Струга, беше неопходно да се избере вршител на должноста претседател на судот.

За в.д. претседател на Основниот суд Струга беа предложени Танче Петрески, Ндерим Полиси и Соња Ѓонческа, а Советот го избра Ндерим Полиси. Донесена беше и одлука за објавување оглас за избор на претседател на Основниот суд Струга.

Судскиот совет на денешната седница констатираше и дека Татјана Сусулевска, судија на Апелациониот суд Битола, ги исполнува условите за старосна пензија.

На крајот од седницата беа формирани комисии за увид и оценка во постапките за избор на претседател на Апелациониот суд Скопје и на Основниот суд Струга.

The post ЗОРАН ГЕРАСИМОВСКИ ИЗБРАН ЗА В.Д. ПРЕТСЕДАТЕЛ НА АПЕЛАЦИЈА Ндерим Полиси ќе биде в.д. претседател на Основниот суд Струга appeared first on plusinfo.mk.

Министерот за правда  Игор Филков денеска во Владата на брифинг со амбасадорите на ЕУ ги презентираше резултатите од спроведувањето на Реформската агенда во областа на владеењето на правото, реализираните законски реформи и следните чекори во исполнувањето на европските обврски на државата.

Во обраќањето, министерот Филков истакна дека Министерството за правда во изминатиот период реализирало најобемен законодавен реформски циклус, со силна динамика, професионален пристап и целосна посветеност на европската агенда.

– За помалку од две години подготвивме околу триесет законски решенија, од кои тринаесет се директно поврзани со Реформската агенда. Овој законодавен циклус претставува најобемен реформски процес реализиран од Министерството за правда во толку краток временски период и е јасен доказ за институционалниот капацитет, одговорноста и решителноста со кои се спроведуваат реформите – истакна министерот.

Тој нагласи дека реформите се реализираат во тесна координација со Владата, Европската комисија, експертската јавност и меѓународните партнери, со единствена цел – создавање функционален, ефикасен и европски правосуден систем.

Во рамките на четвртото барање за ослободување средства од Реформската агенда, во областа „Владеење на правото” се следат 17 реформски чекори, при што седум од нив се поврзани со донесување на 13 законски решенија што се во надлежност на Министерството за правда.

Министерот информираше дека сите законски решенија се подготвени, четири веќе се донесени од Собранието, а останатите се наоѓаат во различни фази од законодавната постапка. Според тековната динамика, ќе биде пријавена реализација на осум реформски чекори, додека за уште два продолжуваат активностите за обезбедување поширока политичка поддршка, пред сè за Законот за јавното обвинителство и Изборниот законик.

„Пред амбасадорите беа презентирани и најзначајните реализирани резултати, меѓу кои донесувањето на новиот Закон за Судскиот совет, целосно усогласен со препораките на Оценската мисија на Европската Унија и Венецијанската комисија, како и новите Закони за судска служба и за јавнообвинителска служба, со кои се гарантираат правата на вработените, се унапредува системот на вработување и се воспоставува правично вреднување на трудот“, се вели во соопштението на Министерството за правда за брифингот.

Министерот Филков посочи дека се пополнети сите работни места во Агенцијата за управување со одземен имот, избрани се двајца нови членови на Судскиот совет согласно новиот закон, додека постапката за избор на третиот член е во завршна фаза. Дополнително, преку платформата на Европската комисија се евидентира континуирано зголемување на бројот на истраги, обвиненија, пресуди, конфискации и случаи на управување со одземен имот во предметите од областа на корупцијата, организираниот криминал и перењето пари.

Во завршна фаза се и новиот Закон за јавното обвинителство, Законот за судски буџет, новиот Закон за кривичната постапка и новиот Кривичен законик, со кои ќе се комплетира најобемниот реформски пакет во правосудството во последните години и ќе се воспостави современа правна рамка усогласена со европските стандарди.

– Реформите се инвестиција во иднината на државата. Со нив градиме посилни институции, поефикасно правосудство, повисока доверба кај граѓаните и побрза европска интеграција. Таму каде што е потребен политички консензус, очекувам одговорност и државнички пристап од сите политички чинители, затоа што европските реформи се обврска кон државата и кон идните генерации – порача министерот за правда Игор Филков.

The post НАЈОБЕМНИОТ РЕФОРМСКИ ЦИКЛУС ВО СУДСТВОТО Е РЕАЛНОСТ Министерот Филков ги презентираше реформите пред амбасадорите appeared first on plusinfo.mk.

Собранието денеска треба да ја продолжи 104. седница на која на дневен ред се останати неколку точки. Пратениците треба да гласаат за Предлог за избор на член на Судскиот совет на Република Северна Македонија што го избира Собранието. Комисијата за прашања на изборите и именувањата на пленумот му предлага изборот да биде извршен помеѓу Артим Ислами, дипломиран правник со положен правосуден испит од Струга и Феузи Џафери, дипломиран правник со положен правосуден испит од село Чајле, Гостивар.

На дневен ред се и Предлог на закон за соодветна и правична застапеност – Прво читање на предлог на Владата, како и Предлог на закон за соодветна и правична застапеност – Прво читање, предложен од пратениците Зијадин Села, Илире Даути и Елми Азири од Албанската Лига.

Пратениците треба да се изјаснат и за Предлог на закон за изменување на Законот за судовите, по скратена постапка, и за Предлог на кодекс за етичко однесување на пратениците во Собранието.

The post СОБРАНИЕТО ИЗБИРА ЧЛЕН НА СУДСКИОТ СОВЕТ Се бира меѓу Артин Ислами и Феузи Џафери appeared first on plusinfo.mk.

The post СВЕЖ ВОЗДУХ ВЛЕЗЕ ВО СУДСКИОТ СОВЕТ Сиљановска Давкова верува во работата на двете нови членки appeared first on plusinfo.mk.

Мала е заинтересираноста на судиите за клучната позиција во најголемиот суд во Македонија – само двајца кандидати се во трката за претседател на Кривичниот суд Скопје, судиите Ивица Стефановски и Даниела Димовска, актуелна вршителка на должноста.

Во досегашната постапка за избор, двајцата имаат речиси идентичен број на бодови. Димовска има 200, а Стефановски 199.

Тричлена комисија од Судскиот совет денеска спроведе интервју со кандидатите. Меѓу другото, одговараа на прашања како ќе ги заштитат судиите доколку пријават политички притисоци.

Стефановски и Димовска ги претставија своите програми, а претседателот на комисијата Ивица Николовски соопшти дека сумираните оценки ќе ги достават пред Судскиот совет, по што ќе следи јавно гласање за избор.

Актуелната в.д. претседателка Димовска, тврди дека за 40 проценти ќе го скрати времето на судските процеси, а сака да имплементира и електронска достава до адвокатите, за да нема доцнење или одложување на рочиштата. Најавува поголема транспарентност и отвореност на Судот кон новинарите и кон јавноста.

– Јас сум на оваа позиција 10 месеци и сметам дека треба да се постават индикатори што ќе мерат резултати. Горда сум на моите колеги – предметите за семејно насилство ги завршуваме во просек за 4 месеци… Судиите, особено во Кривичниот суд, работат вредно. Во 8 часот сите се на работа, со огромен број предмети. Но, за жал, ние сме многу видливи само кога има негативни вести. Само еден коруптивен случај ја руши довербата во сите нас. Нам ни е преку глава од тие 2 проценти – рече Димовска.

Судијата Стефановски, познат во јавноста по предметите за убиствата на Вања Ѓорчевска и Панче Жежовски и за насилилникот од Карпош, Стојанче Јовановски, рече дека ќе се залага за поголема ажурност, скратување на траењето на постапките, транспаретноста и за меѓучовечките односи. Голем проблем за Стефановски е тоа што има нерамномерно распределување на предметите.

– Сметам дека треба да им се даде приоритет на старите предмети и да се намали времето меѓу рочиштата. Тука има простор за поенергичен и за посериозен пристап кон ажурноста. Системот АКМИС е стар повеќе од 20 години и не препознава сложен или едноставен предмет. Затоа распределбата не овозможува еднаков товар кај судиите и некои се преоптоварени – рече Стефановски.

Од Судскиот совет велат дека ова е одлична можност да се запознаат кандидатите за претседател. В врска со малата заинтересираност на конкурсот велат дека не секој добар судија може да биде и добар менаџер.

– Целта е преку изброт на овој претседател да дојде до подобра организација и да се остави зборот „долгата правда не е правда“ – рече претседателот на комисијата Николовски.

Членовите на Судскиот совет ќе направат рангирање, по што кандидатите ќе имаат право и на приговори до Управниот суд. Доколку нема забелешки, ќе гласаат Димовска или Стефановски да биде нов претседател на Кривичниот суд.

Огласот за претседател на Кривичен беше објавен пред 10 месеци.

The post МРТВА ТРКА ЗА ПРЕТСЕДАТЕЛ НА КРИВИЧНИОТ СУД Кандидатите Стефановски и Димовска најавуваат побрзи судски процеси appeared first on plusinfo.mk.