Во Собранието се доставени материјалите за избор на Сузана Јошевска-Анастасовска и Арлинда Кадри-Шахиновиќ за членови на Судскиот совет, како кандидати предложени од претседателката Гордана Сиљановска-Давкова, во рамки на реформите што ги носи новиот Закон за Судскиот совет.

Арлинда Кадри-Шахиновиќ е универзитетска професорка со долгогодишна академска кариера на Факултетот за правни и политички науки при ФОН и МИТ Универзитет, а во јавноста е позната и како поранешен член на Комисијата за помилување. Сузана Јошевска-Анастасовска е адвокатка со повеќегодишна пракса, особено во кривични предмети. Таа ја потврди информацијата за ТВ 24 и порача дека ѝ претставува сериозна одговорност.

Предлозите следат по усвојувањето на новиот Закон за Судскиот совет на 29 декември, кој носи измени за зголемување на транспарентноста и отчетноста, јавност во постапките, прецизирање на критериумите за избор на „истакнат правник“ и зајакнување на дисциплинската одговорност на членовите.

Судскиот совет брои 15 членови од кои осум ги избираат судиите, тројца Собранието, двајца ги предлага претседателот на државата, а двајца се членови по функција – претседателот на Врховниот суд и министерот за правда, без право на глас.

Се очекува предлозите на претседателката да влезат во собраниска процедура од понеделник.

The post ЈОШЕВСКА АНАСТАСОВСКА И КАДРИ ШАХИНОВИЌ ЗА НОВИ ЧЛЕНОВИ НА СУДСКИ СОВЕТ Сиљановска Давкова предлага адвокатка и универзитетска професорка appeared first on plusinfo.mk.

Премиерот Христијан Мицкоски во интервју за „360 Степени“  на МТВ, прашан за финансирањето на правосудството и извештајот на Советот на Европа, направи споредба на процентот којшто се издвојува од БДП за правосудството во Македонија со оној во Словенија, но и споредба на БДП по глава на жител во Македонија и во Словенија, а потоа ги спореди платите на судиите.

– Платата којашто ја добива почетник судија во Македонија, бруто некаде е околу 19.134 евра годишно, според извештајот на Советот на Европа. Додека во Словенија таа плата е малку поголема од 34.000 евра бруто. Истиот судија почетник. Притоа, за БДП во Македонија истиот извештај вели дека е некаде над 6.600 евра по глава на жител, додека за словенечкиот вели дека е некаде над 27.000 евра по глава на жител. Со други зборови, платата на судија почетник во Словенија е за отприлика за 85% поголема од платата на судија почетник во Македонија, во услови кога БДП е за 350% поголем од БДП во Македонија – објасни Мицкоски кој споредувајќи го БДП во Словенија и во ЕУ со БДП во Македонија посочи дека разликата со Словенија е три спрема еден, а во услови кога БДП во Македонија по глава на жител е 6.600 евра и во услови кога БДП по глава на жител во ЕУ е над 30.000 евра, тоа е пет спрема еден.

Во однос на прашањето дали треба да се дадат повеќе пари за правосудството, за судовите и јавните обвинителства поефикасно да работат и да испорачуваат поквалитетна правда, Мицкоски го потенцираше фактот дека ние како држава одвојуваме за правосудството повеќе пари од просекот и од медијаната на земјите опфатени со извештајот изготвен од Советот на Европа, односно земјите членки на Советот на Европа.

– Ние издвојуваме 0,39% од БДП според анализата на Советот. Според нашата е 0,44%. Европскиот просек е 0,30%. По БДП по глава на жител, издвојуваме три пати помалку од европскиот просек, во услови кога нашиот БДП е пет пати помал – потенцираше Мицкоски.

Премиерот Мицкоски се повика и на податок од Албанија, колку таму се издвојува поради честите споредби, а таму процентот е 0,2%, односно двојно помалку отколку во Македонија по глава на жител.

На прашање дали финансирањето на СЈО би било добар пример за финансирање на правосудството, Мицкоски рече:

– СЈО не може да биде добар модел за финансирање, зашто на крај заврши спакуван во куфер Луј Витон.

Мицкоски нагласи дека за состојбите во правосудството не е до парите, туку до свеста и истакна дека судиите се соодветно платени за да испорачаат многу повеќе од тоа што сега го испорачуваат. Тој ја спореди премиерската плата со платата на претседател на Основен суд, којашто е поголема за 25% од премиерската плата.

Премиерот повторно посочи дека во правосудството има многу чесни обвинители и судии, за разлика од малкумината кои влегуваат во јавни преписки со него. Притоа го повтори предлогот, да се достави список со информација до Владата за тоа што им е неопходно, за нови вработувања асистенти и истражители, Судскиот Совет и Советот на јавни обвинители да го одобри тој список, а Владата ќе го прифати како зголемување.

– Прифаќам, самите да си сработат список, да им одобри Судски Совет или Совет на Јавни обвинители, како што бараат за тоа што сакаат да го вработат и што им е неопходно, и тоа ќе го прифатиме како зголемување. Нека направат список колку им требаат истражители, колку асистенти, нека направат систематизација, нека унапредат како што мислат, нека им го одобри Судскиот и обвинителскиот совет, и нека нѐ информираат дека во Буџетот за оваа цел ни се потребни толку пари, и ќе ги одобриме. Јас сум одговорен кон парите на граѓаните што се трошат, како се трошат. Јавно порачувам, направете список, кажете колкави се фискалните импликации, со ребалансот ќе бидат дополнети тие пари. И тоа е јавно кажано неколку пати. Бидејќи сега имаат предвидени за цела година средства во Буџетот за плати за вработените во судството, во првите четири-пет месеци ќе се потроши дел од тие пари, и за нововработените ќе биде малку поголем тој дел, а таа разлика со ребалансот ќе им биде вратена за целата година – посочи премиерот.

The post ДВОЈНО ПОВЕЌЕ СЕ ВЛОЖУВА ВО ОБВИНИТЕЛСТВОТО ВО СПОРЕДБА СО ЕВРОПСКИОТ ПРОСЕК Истурањето пари во СЈО заврши со куферот „Луј Витон“ appeared first on plusinfo.mk.

Министерот за правда Игор Филков во Собранието се пофали дека неговото министерство во последните 18 месеци изготвило повеќе од 20 закони и дека уште неколку се при крај. Според него, никогаш досега во историјата на ресорот немало толку интензивно законско производство за толку кратко време.

Филков имаше и директна порака до пратеничката Јована Тренчевска од СДСМ, која го праша зошто реформата во судството стои и кој ќе понесе одговорност за застојот. Тој ѝ возврати дека токму владата во која била и таа ги донела „штетните измени“ на Кривичниот законик, додавајќи дека новиот КЗ ќе биде донесен и дека очекува нејзина поддршка за сите други реформи.

Министерот нагласи дека сите закони биле изработени транспарентно, со јавни дебати и без „дубајски висококатници и халкидикски јахти“. Три од клучните законски решенија, за Судскиот совет, Советот на јавни обвинители и за Јавното обвинителство, веќе добиле позитивни оценки од Венецијанската комисија.

– Во Министерството за правда веќе нема закони за нечии фамилии или поединци. Сè се работи исклучиво во интерес на граѓаните – порача Филков.

Тој се осврна и на Законот за парнична постапка, кој, како што рече, морал да се доработува бидејќи „ако беше добар, ќе го донесевте“. Законското решение повторно е пуштено во владина процедура.

За АКМИС-системот, Филков призна дека постојат неколку дилеми кои треба да се расчистат, но напомена дека системот е воведен за правична и автоматска распределба на предметите. Министерството, како што откри, спровело две контроли во последната година и половина, нешто што, според него, не се случувало со години.

Филков презентираше и бројки за судиите: во последните пет години во пензија заминале 154 судии. Тој ја прозва опозицијата дека токму овие кадри се пензионирани во периодот додека тие биле на власт. Во истиот период во пензија отишле и 53 јавни обвинители.

Одговорот на министерот не ја задоволи пратеничката Тренчевска, која оцени дека наместо одговори добила изговори и предупреди дека земјата има „најлош извештај досега“. Таа побара забрзано носење на законите, потсетувајќи дека 12 важни реформи се уште го чекаат парламентот.

– Ако законите се добри, ќе ги поддржиме. Но мора да ги видиме. Во изминатите една година и седум месеци ништо не направивте – изјави таа од собраниската говорница.

The post 20 ЗАКОНИ ЗА 18 МЕСЕЦИ Филков со бројки удри по СДСМ, Тренчевска со остра реплика appeared first on plusinfo.mk.

Премиерот Христијан Мицкоски засега не планира реконструкција во Владата, туку само пополнување на испразнетите места на министрите. Неговиот фокус во следниот период ќе биде партискиот конгрес закажан за 6 декември во Кавадарци и промените во судско-обвинителската област.

– А зошто да добие? Тоа не значи дека ќе има ресор повеќе. Тоа си е одлука на нашиот коалиционен партнер. Јас имам високо мислење за Беким Сали, но тоа не значи дека ќе има место повеќе во владиниот кабинет – рече Мицкоски на прашање дали кадар од Коалицијата Вреди и натаму ќе го води Министерството за животна средина откако првиот вицепремиер и министер за животна средина Изет Меџити стана градоначалник на Чаир, а Беким Сали веќе е спомнат како ново име за прв вицепремиер. Прашањето беше дали со назначување на друго име од Вреди за министер за животна средина, оваа коалиција ќе добие уште еден министер во Владата, зашто Меџити вршеше две функции.

Мицкоски очекува да добие имиња за испразнетите места во владата и да види дали тие имиња ги исполнуваат неговите очекувања.

– Ние сега сме фокусирани на редовниот конгрес. Тоа ќе опфати и формирање на партиска структура, извршен комитет и други структури. Во меѓувреме ќе размислуваме за одредени кадровски поместувања во Владата доколку има потреба за сето тоа. Подготвен сум да разговарам со сите чинители и да ги слушнам. Мандатар сум јас. Нормално е дека последниот збор ќе го имам јас. Реконструкција на влада не се прави само за да се реконструира Владата. Пред кој било потег да се повлече треба да се размисли дали тоа ново кадровско решение ќе биде подобро од сегашното и дали новото решение ќе понуди подобра програма. Реконструкцијата нема да значи ништо ако донесеме некој што нема што да понуди – рече Мицкоски одговарајќи на новинарски прашања.

Според него, евентуалната реконструкцијата во Владата е процес кој што ќе трае.

На прашањето да го коментира извештојот од ЕУ, тој иронично рече:

– Да ги направиме уставните измени најдобри ќе бидеме. И потоа да добиеме ново вето и повторно нови проблеми. Тогаш сигурно ќе добиеме петка и ќе бидеме шампиони.

Мицкоски додаде дека е исклучително задоволен од тоа што е напишано во извештајот, бидејќи, како што рече, нема назадување, туку има стагнација во некои области.

– Тоа е владеењето на правото, борбата против криминалот и корупцијата и затоа нон-стоп зборувам дека се потребни промени во Судскиот совет во Обвинителството и тн. Сега по изборите многу посериозно ќе се занимаваме со таа тема – најави премиерот.

Тој го оцени генерално како добар извештајот, но не се согласува дека некои земји се пред нас.

– На пример, ние сме многу пред Албанија иако некои од еврокомесарите даваат изјави какви што даваат. Дури во 8 области сме понапред. Објективна оценка е дека Црна Гора е прва, па ние и Србија, потоа доаѓаат Албанија, Босна и Херцеговина… Но треба да работиме и ќе работиме. Јас сум фокусиран на реформите, оваа влада е реформска и така ќе продолжи – рече тој.

Мицкоски не сакаше да коментира дали бара оставка од лидерот на СДСМ Венко Филипче по поразот на локалните избори.

– Тоа е нивна внатрешна работа. Јас како претседател на ВМРО-ДПМНЕ имав многу надворешни замешателства и кога бевме во опозиција, и периодот после оние локални избори во 2021 година. Јас се водам по една стара максима, која што вели, „Не му прави на човека тоа што не сакаш тебе да ти прават“. Ние апсолутно стоиме надвор од тие процеси, не нѐ интересираат, тоа си е внатрешна работа на политичките партии. Дали во ДУИ ќе има одредени кадровски освежувања и поместувања, дали во СДСМ, тоа си е нивна работа – додаде тој.

The post ЗАСЕГА НЕМА РЕКОНСТРУКЦИЈА НА ВЛАДАТА, А ВРЕДИ НЕМА ДА ДОБИЕ МИНИСТЕР ПЛУС Мицкоски ќе се фокусира на реформите во судството и во обвинителството, како и на партискиот конгрес appeared first on plusinfo.mk.

Македонија постигна значителниот напредок во спроведувањето на реформите предвидени со Реформската агенда, за што доказ е и исплатата на две транши на средства во рамки на Планот за раст на Западен Балкан, се наведува во Извештајот за напредокот на земјава на европскиот пат, што Европската комисија официјално ќе го објави утре.

– (Македонските) власти продолжија да работат на имплементација на патоказите за владеење на правото, на реформата на јавната администрација и на функционирањето на демократските институции, како и на Акцискиот план за заштита на малцинствата – се вели во извештајот.

Сепак, во него се забележува дека земјата треба да ги интензивира напорите за почитување на владеењето на правото, особено заштитата на независноста и интегритетот на судството и да ја засили борбата против корупцијата, при што се оценува дека е постигнат „ограничен напредок“ во областа на судските реформи.

Како позитивен развој на настаните во извештајот се наведува формирањето на Советот за соработка меѓу Владата и граѓанското општество и се оценува дека земјата постигнала одреден напредок во однос на плурализмот и слободата на медиумите и на слободата на изразување.

Европската комисија во документот посочува и дека земјата е целосно усогласена со надворешната и безбедносната политика на ЕУ, како и дека една од државите што се приклучи на Конвенцијата за заеднички транзит, чија цел е забрзување на движењето на стоките преку границите.

Во извештајот се повторува и претходно изнесениот став за потребата од спроведување „со добра волја од сите страни“ на склучените билатерални договори, вклучувајќи го и Преспанскиот договор со Грција и Договорот за пријателство, добрососедство и соработка со Бугарија.

Исто така, се нотира и дека се уште не се усвоени уставните амандмани насочени кон вклучување во Уставот на граѓани кои не претставуваат мнозинство, како што се Бугарите, за што земјата презела обврска.

The post МАКЕДОНИЈА ЗНАЧИТЕЛНО НАПРЕДУВА ВО РЕФОРМСКАТА АГЕНДА Според Извештајот на ЕК, има „ограничен напредок“ во судските реформи appeared first on plusinfo.mk.

Претседателот на СДСМ, Венко Филипче, на граѓанската трибина под мотото „Се бориме за нашиот дом“ во Кавадарци, жестоко го нападна премиерот Христијан Мицкоски, обвинувајќи го дека не спровел никакви реформи во судството и дека дозволил целосна партизација на институциите.

– Зошто не направи ништо? Зошто не ги реформираше судството и обвинителството? Зошто се плашиш, Мицкоски? Дали затоа што знаеш дека ако судството стане навистина независно, половина твоја влада ќе мора да одговара пред закон? – праша Филипче пред присутните.

Тој нагласи дека премиерот не сака независно судство, туку „свое судство“, со обвинители избрани по список „од тефтерчињата во Белата палата“.

– Ако навистина сакаш правда, биди маж и кажи дека секој ќе одговара и од СДСМ, и од ВМРО-ДПМНЕ, и од сите партии. Направи реформи и ќе имаш наша поддршка – изјави Филипче.

На трибината, лидерот на СДСМ зборуваше и за состојбата во земјоделството, посочувајќи дека „тиквешијата страда под оваа власт“.

– Не е патриот оној што дозволува 11.000 семејства што живеат од лозарството да бидат понижени – порача тој, додавајќи дека Владата се грижи само за „фаворизирани фирми и блиски луѓе“, додека малите земјоделци се заборавени.

Филипче ја обвини власта и за „економски хаос“, стотици компании, според него, не добиле поврат на ДДВ, платите стагнираат, а цените растат.

– Додека економијата пропаѓа, Владата воведува нов данок на евтини интернет-пратки. Во држава со 40% сива економија, ова е уште еден удар врз народот – изјави тој.

Од Кавадарци беа најавени неколку клучни проекти, агро берза за пласман и реални цени без уцени, како и бизнис старт-ап центар за младите претприемачи.

Носителот на листата за советници, Вуко Мелов, изјави дека СДСМ се залага за „почист и позелен град“, со пониски комунални трошоци, бесплатни градинки за деца од семејства со ниски приходи и ослободување од комуналии за млади семејства.

– Кавадарци мора да стане град што се развива со план, визија и љубов – рече Мелов.

Кандидатот за градоначалник Виктор Велевски додаде дека нивната борба е за правда, еднаквост и слобода.

– Нашата борба е рамо до рамо со работникот, земјоделецот, обесправените и социјално угнетените. Ќе се залагаме за зелен прстен околу градот, гасификација и пречистителна станица – најави тој.

На крајот на трибината, присутните со едноминутно молчење му оддадоа почит на поранешниот градоначалник и пратеник Панчо Минов, кавадарчанец кој оставил значаен белег во локалната заедница.

The post „СЕ ПЛАШИШ ЗАШТО ЗНАЕШ ДЕКА ЌЕ ТИ ОДГОВАРА ПОЛОВИНА ВЛАДА“ Филипче го нападна Мицкоски од Кавадарци appeared first on plusinfo.mk.

„За доброто на единството на народот на Израел, поради одговорноста, ве повикувам веднаш да го прекинете законодавниот процес“, напиша Херцог на Твитер.

Израелскиот премиер Бенјамин Нетанјаху вчера го разреши својот министер за одбрана, еден ден откако повика на едномесечна пауза во процесот на контроверзната судска реформа што владата сака да ја спроведе.

„Премиерот Бенјамин Нетанјаху одлучи да го разреши министерот за одбрана Јоав Галант“ се наведува во кусото соопштение од кабинетот на израелскиот премиер.

Галант, кој е член на истата десничарска партија Ликуд како Нетанјаху, во говор во саботата вечер рече дека континуираната јавна поделеност околу ова прашање ќе биде „вистинска закана за безбедноста на Израел“.

Протести се одржуваат секоја недела откако владата на Бенјамин Нетанјаху, една од најдесните во историјата на Израел, во јануари предложи план за реформи кој ја подели земјата.

Реформата, која поттикна загриженост дома и во странство, треба да го зголеми влијанието на пратениците врз судовите. Нејзините критичари истакнуваат дека тоа ги загрозува демократските принципи на израелската држава.

Нетанјаху и неговите сојузници, екстремно десничарските и ултраортодоксните партии, велат дека планираната реформа е неопходна за да се врати рамнотежата на силите меѓу пратениците и Врховниот суд, кој го сметаат за политизиран.

The post ВО ПРИЛОГ НА ЕДИНСТВОТО ДА СЕ ЗАПРЕ СУДСКАТА РЕФОРМА Израелскиот претседател застана на страната на народот appeared first on plusinfo.mk.

На протестите во Тел Авив против реформите, поради кои беше запрен сообраќајот на неколку патишта, полицијата употреби водени топови и шок-бомби.

Полицајци се обидоа да ја растераат толпата. Полицијата во соопштението наведе дека уапсила 39 лица поради нарушување на јавниот ред и мир.

-Единаесет повредени демонстранти се примени во болницата „Ичилов“ во Тел Авив – изјави портпаролот на таа институција.

– Тука сум за демократија, човекови права и правда – рече Јохан Канал, 39-годишен демонстрант.

– Правото на протест не е право да се блокира земјата – одговори премиерот Бенјамин Нетанјаху синоќа на прес-конференција во Ерусалим.

Демонстрантите, рече тој, ја преминале „црвената линија“.

– Суверена земја не може да толерира анархија – додаде Нетанјаху.

Тој претходно вчера им дал поддршка на полицајците.

Новите протести се случуваат во време кога израелскиот Парламент (Кнесет) на пленарна седница истиот ден го одобри во прво читање новиот закон како дел од судските реформи објавени на почетокот на јануари од Владата што Бенјамин Нетанјаху ја формираше во декември. со екстремно десничарски и еврејски ултраортодоксни партии.

The post НЕ ТОЛЕРИРАМЕ АНАРХИЈА Нетанјаху за насилното задушување на протестот против судските реформи во Израел appeared first on plusinfo.mk.

– Според објавените информации се работи пред сѐ за предметите: „Монструм“, „Диво Насеље“ и „Алмир Алиу“, кои заради последиците кои ги предизвикаа како и меѓуетничкиот предзнак влијаеа особено поларизирачки врз општеството. Ваквата практика, со политички договори, помеѓу претставници на политички партии да се договора „меѓународна истрага“ на правосилно завршени судски предмети, притоа заобиколувајќи ги воспоставените механизами во рамки на правосудниот систем, ја доведува во прашање искреноста на Владата во почитување на принципот на поделба на власта и гарантирање на независноста на судската власт – се вели во соопштението од Блупринт групата.

Независноста на судството, стои во реакцијата на Блупринт групата, уставно е гарантирано начелото кое предвидува обврска за сите останати гранки на власт да се воздржат од дејствија со кои ја загрозуваат, како и да создадат услови за нејзино почитување.

– Не треба да постои било какво несоодветно или неоправдано мешање во судењето кое што меѓу другото предвидува дека судските одлуки можат да се менуваат единствено од страна на судовите во постапка предвидена со закон. Домашниот правен систем предвидува механизми за „отворање“ на правосилно завршени постапки. Законот за кривичната постапка ги уредува условите, постапката и надлежниот суд пред кои одреден правосилно завршен судски предмет може да се повтори. Дополнително, доколку постојат индиции дека судиите кои постапувале нестручно и несовесно ја вршеле  судиската функција или пак сториле дисциплинска повреда постои постапка за утврдување одговорност пред Судскиот совет на РСМ. Аналогно, постои и постапка за утврдување на дисциплинска одговорност за јавните обвинители – се вели во реакцијата од Блупринт групата.

Блупринт групата, исто така, посочува дека меѓународната заедница која е присутна преку своите организации во нашата земја континуирано врши мониторинг на работата на судството и обвинителството, како и на судските предмети, а за што постојат и извештаи од следењето на прогресот во реформите во правосудството, како на пример, годишниот извештај на ЕУ за напредокот, извештаите на Прибе, на ГРЕКО, при што потсетуваме дека и во случаите кога наодите од споменатите извештаи се негативни, тие не се основ за повторување на судски процеси, туку за тоа постојат законски механизми за повторување на судските постапки.

– Заобиколувањето на домашните и меѓународните судови и воспоставените правни механизми и нивната замена со ад хок политички решенија за „меѓународни истраги“ влијае негативно на довербата на граѓаните во правосудството, како и ги доведува во прашање спроведените реформи во правосудството во последните неколку години. Во исто време, оваа вонинституционална практика создава чуство на правна несигурност, но дава и лажна надеж дека постои „друга“ инстанца која е над судовите во Република Северна Македонија, а со што сериозно се нарушува почитувањето на темелните вредности на Уставот, поделбата на власта и владеењето на правото – се вели во реакцијата на Блупринт групата.

Блупринт групата, ги повикува и охрабруваме претставниците на правосудните институции, особено Судскиот совет, Врховниот суд, Советот на јавни обвинители како и Јавниот обвинител на РСМ да преземат соодветни дејствија согласно со закон за да ја заштитат независноста и интегритетот на правосудниот систем и укажуваат дека осудените лица како и оштетените имаат право да поднесат жалба до Европскиот суд за човекови права доколку сметаат дека со постапувањето на домашните правосудни институции им е повредено одредено право заштитено со Европската конвенција за заштита на човековите права.

Блупринт група за реформи во правосудството е составена од Македонско здружение на млади правници (МЗМП), Институт за европска политика (ЕПИ), Институт за човекови права (ИЧП), Коалиција „Сите за правично судење“ (КСПС), Хелсиншки комитет за човекови права,  Центар за правни истражувања и анализи (ЦПИА) и Фондација Отворено општество – Македонија (ФООМ).

The post РЕФОРМАТОРИТЕ НА СУДСТВОТО ГО ИСКАРАА ЗАЕВ Не може да се ветуваат „меѓународни истраги“ со заобиколување на домашното правосудство appeared first on plusinfo.mk.