Претседателот на ГРОМ и поранешен градоначалник на Општина Карпош, Стевче Јакимовски, доброволно заминал на издржување на затворската казна во траење од шест и пол месеци, информираа од партијата.

Од ГРОМ наведуваат дека Јакимовски сам се пријавил за издржување на казната, која му беше изречена со правосилна судска пресуда.

Партијата во соопштението изразува незадоволство од пресудата, оценувајќи дека казната е донесена поради поставување две времени бараки во кои, како што наведуваат, Општина Карпош функционирала 13 години. Според нив, со користењето на тие објекти општината заштедила околу 1,5 милиони евра средства кои во спротивно би биле потрошени за закуп на деловен простор.

Во соопштението ГРОМ упатува критики и кон правосудниот систем, тврдејќи дека пресудата е неправедна и селективна. Од партијата посочуваат и дека не била земена предвид здравствената состојба на Јакимовски, наведувајќи дека тој е онколошки пациент и неодамна бил подложен на оперативен зафат.

Јакимовски ќе ја издржува затворската казна од шест и пол месеци согласно правосилната судска одлука.

The post СТЕВЧЕ ЈАКИМОВСКИ ДОБРОВОЛНО ВЛЕЗЕ ВО ЗАТВОР Екс-градоначалникот ќе ја издржува казната од шест и пол месеци appeared first on plusinfo.mk.

Поранешниот премиер Никола Груевски доби ослободителни пресуди во предметите „Талир 1“ и  „Талир 2“, со што по речиси една деценија се затвораат едни од најекспонираните случаи поврзани со финансирањето на ВМРО-ДПМНЕ. Претходно падна и предметот „Талир 1“, во кој Груевски беше обвинет за незаконско финансирање на партијата. И во тој случај Основниот кривичен суд донесе ослободителна пресуда.

Судот оцени дека обвинителството не успеало да ги докаже обвиненијата надвор од разумно сомневање, а беше одбиено и барањето за конфискација на партиското седиште.

Во „Талир 2“, Основниот кривичен суд Скопје го ослободи Груевски од обвинението за злоупотреба на службената положба поврзана со изградбата на седиштето на ВМРО-ДПМНЕ. Партијата воопшто не беше обвинета во оваа постапка, а се бараше конфискација на нејзиниот имот.

Судот образложи дека по измените на Кривичниот законик од 2023 година, обвинението било изменето. Според судот, обвинителството не успеало да докаже дека делото било сторено со „пречекорување на овластувањата“ и „неизвршување на службената должност“, како што бара новата законска формулација.

„Законот за изменување и дополнување на КЗ, објавен во Сл.в.бр.188/23, беше извршена промена во инкриминираните дејствија, кои го содржат битието на предметното кривично дело – Злоупотреба на службената положба и овластување, според кој, “искористувањето” како дејствие на извршување беше декриминализирано, а како последица на тоа беше извршена и измена на обвинението, па така “искористувањето” беше заменето со “пречекорување на овластувањата и неизвршување на службената должност” како дејствија  на сторување на делото, а покрај тоа беше вметната и “намерата” како посебен субјективен елемент на делото. И покрај ваквите наизглед минорни измени, кои се состојат во само 2 елементи на битието на делото, сепак истите од правно-релевантен аспект суштински го менуваат обвинението. Меѓутоа, обвинението сепак остана да се заснова на истите докази, од кои беа утврдувани фактите како и при претходно поставената изрека на обвинението, а останаа и истите заклучоци и истата теорија на обвинението, сублимирани на ист начин и во завршните зборови на застапникот на обвинението“, соопшти Основниот кривичен суд Скопје.

Судијката Даниела Алексовска при објавата на пресудата посочи дека во случајот морале да се земат предвид измените на Кривичниот законик од 2023 година, поради кои претходно беше укината првостепената пресуда.

– Иако беа направени измени на обвинението промени во доказите и фактите изнесени пред судот немаше. Судот цени дека обвинителството не докажа надвор од разумно сомневање дека обвинетиот Никола Груевски сторил пречекорување на службената должност – изјави Алексовска.

Во оваа ситуација Судот, посочи таа, во целост го прифатил ставот на Апелацискиот суд, а тоа е дека измените на КЗ се во директна корист на обвинетиот.

– Во оваа прилика, судот ќе истакне дека со секоја пресуда се испраќа одредена порака до поблиската и пошироката јавност. Во конкретниот случај, пораката е следна: ​Ваквата ослободителна пресуда е исклучиво резултат на донесување на Законот за изменување и дополнување на Кривичниот законик во 2023 година, а како директна последица на која што беше и укинувањето на првостепената пресуда во овој предмет, како што тоа го констатира Апелациониот суд Скопје во второстепената одлука во овој предмет. ​Судот ќе истакне дека, и покрај тоа што оваа пресуда е сосема различна од претходно донесената во конкретниот предмет, сепак, анализата и оценката на доказите, утврдените факти и заклучоците изведени од страна на судот останаа непроменети. Така што, при постоење на истите докази, врз основа на кои судот претходно утврди дека е сторено предметното кривично дело со ‘искористување на службената положба и овластување’, цени дека при постоење на истите тие докази, не се докажа надвор од разумно сомневање дека делото е сторено со друг вид на дејствија, односно со ‘пречекорување на овластувањата’ и со ‘неизвршување на службената должност’.

Таа додаде:

– ​И како последно, но од најбитно значење за пошироката јавност е дека судот останува конзистентен во одлучувањето, во анализата и оценката на доказите, како и фактите кои произлегуваат од истите, на кои исклучиво ги темели своите одлуки, бидејќи само на тој начин може да се гарантира правото на правна сигурност на граѓаните во чие име судот ги носи своите пресуди.

На објавата во судницата во Основниот кривичен суд Скопје присутни беа адвокатите по службена должност на екс премиерот Никола Груевски, Петар Тимовски и на ВМРО-ДПМНЕ, Кристина Маневска, како и претставникот на партијата, адвокатката Љубица Николовска.

Трошоците за судската постапка паѓаат на Буџетот на државата, а Судот го одби и предлогот на Обвинителството за конфискација на седиштето на ВМРО-ДПМНЕ.

Пресудата е неправосилна и странките имаат право на жалба пред повисоките судови.

Во април годинава, предметот „Талир 2“ го презема обвинителот Кристијан Смилевски од ОЈО Скопје, откако обвинителката Ленче Ристовска си поднесе оставка.

Апелациониот суд Скопје во јануари 2024 година поради измените на Кривичниот законик во делот на кривичното дело од член 353 од КЗ, ја укина првостепената пресуда за случајот „Талир 2“ и предметот го врати на повторно судење пред првостепениот суд. Застареност настапи за делото „злоупотреба на службената положба“ на поранешниот генерален секретар на Владата Кирил Божиновски, а гонењето продолжи за експремиерот Никола Груевски и партијата ВМРО-ДПМНЕ.

The post ПАДНА МОНТИРАНИОТ ПОЛИТИЧКИ СЛУЧАЈ ПРОТИВ ВМРО-ДПМНЕ Ослободителна пресуда за „Талир“ appeared first on plusinfo.mk.

Тројца членови на криминалната група Беланоца денеска се осудени на високи затворски казни за неколку кривични дела, јави Телма. Еден од нив доби 20 години затвор, а друг 11 години за злосторничко здружување поврзано со убиството на Орхан Бајрами Оки, лидер на спротиставената нарко банда Дуќанџик/Грчец, како и убиството на Пластичарска кога загина 29-годишниот Амар Исмани, млад пејач и блогер.

Третиот обвинет е осуден на 4 години за кривичното дело изнуда. Сè уште во тек е судењето за лидерот на Беланоца, Фатљум Ајети Тоти, како и други членови на неговата банда кои се гонат за најмалку 8 убиства, злосторничко здружување, изнуди, закани, палење објекти и автомобили. Се смета дека Тоти е наводениот лидер на Беланоца.

Орхан Бајрами беше ликвидиран во јули 2023 година во Ханиоти, Грција, додека бил на одмор. Според истрагата, напаѓачите пристигнале со возило, се доближиле до апартманот во кој престојувал и испукале повеќе куршуми низ прозорецот. Ден пред убиството, на профил на „ТикТок“, кој подоцна бил избришан, била објавена порака дека Бајрами е следната жртва, а по ликвидацијата било објавено и дека „работата е завршена“. Истиот профил претходно најавувал и други ликвидации.

Во мај 2024 година, во вооружен напад на улицата „Пластичарска“ во Скопје беше застрелан Амар Исмани, кој подоцна им подлегна на повредите во Клиничкиот центар „Мајка Тереза“.

Претходно, во Драч беа успени тројца членови на Беланоца, во акција на македонската полиција и Интерпол. Уапсениот Џавит Муса со години бил во бегство и се бараше за повеќе тешки кривични дела, меѓу кои и убиството на офицерот на АРМ Агим Муареми во Батинци.

Сенафи Нуредини, кој исто така беше уапсен во Драч се поврзува со напад во Студеничани во 2021 година, кога, според сомневањата, избодел младо момче. Истражителите го поврзуваат и со убиството на Камбер Идризи во Бутел во 2021 година, припадник на ривалска криминална група.

The post ПАДНАА ПРВИТЕ ПРЕСУДИ ЗА ЧЛЕНОВИТЕ НА „БЕЛАНОЦА“ Во тек е судењето за лидерот на групата, Ајети Тоти appeared first on plusinfo.mk.

Необична и чувствителна пресуда ја потресе Српската православна црква. Окружниот суд во Љубљана го прогласи патријархот Порфирије за виновен за злоупотреба на работното место и му изрече условна казна од четири месеци затвор со една година пробен период. Покрај тоа, судот изрекол и условна парична казна од 10.000 евра.

Пресудата е резултат на спор што трае повеќе од една деценија меѓу поранешниот љубљански свештеник Жељко Лубарда и раководството на СПЦ.

Случајот почнал со пријава за финансиски злоупотреби

Според Лубарда, проблемите започнале кога како свештеник и законски претставник на Црковната општина Љубљана поднел кривична пријава против старешината на храмот Перан Бошковиќ поради сомнение за финансиски злоупотреби.

Лубарда тврди дека потоа бил изложен на притисоци да ја повлече пријавата и да ја смени изјавата во корист на Бошковиќ. Тој одбил, а подоцна Бошковиќ бил осуден за проневера на црковни средства.

Според неговите наводи, токму тогаш започнал неговиот конфликт со црковниот врв.

Преместување, суспензија и одземање на чинот

Документацијата на која се повикува Nova.rs покажува дека тогашниот митрополит загрепско-љубљански Порфирије донел одлука Лубарда да биде преместен од Словенија во парохија во Копривница.

Лубарда одбил да ја прифати одлуката, наведувајќи дека тоа би значело преселување на неговото семејство во друга држава и дека таквиот потег не бил во согласност со неговиот работен статус во Словенија.

По одбивањето, му било забрането да извршува свештенички должности, а против него била поведена црковна постапка за непослушност.

Црковниот суд го прогласил за виновен и му ја изрекол најтешката црковна санкција – лишување од свештеничкиот чин.

Судот утврдил психолошко насилство и дискриминација

Лубарда паралелно покренал постапка пред словенечките судови.

Во конечната пресуда на Судот за трудови и социјални спорови било утврдено дека бил жртва на злоупотреба на работното место, психолошко насилство, понижување и дискриминација.

Токму овие наоди подоцна станале основа за кривичната постапка против Порфирије и Црковната општина Љубљана, која заврши со осудителна пресуда.

СПЦ ја отфрла пресудата

Српската православна црква соопшти дека станува збор за „бесмислени тужби“ на поранешен свештеник кој бил отпуштен од црковната служба.

Од Синодот тврдат дека назначувањето и преместувањето на свештеници е исклучиво канонско право на надлежниот епископ.

Воедно наведуваат дека ниту патријархот Порфирије ниту неговите претставници не биле соодветно известени за постапката и дека целиот процес бил спроведен со сериозни процедурални недостатоци.

СПЦ оценува дека случајот има политичка заднина и е насочен против Црквата и нејзиниот поглавар.

The post ПАТРИЈАРХОТ ПОРФИРИЈЕ УСЛОВНО ОСУДЕН ВО СЛОВЕНИЈА Обвинението за мобинг врз свештеник ја вознемири СПЦ appeared first on plusinfo.mk.

Поранешната европратеничка на Нова демократија Ана Мисел Асимакопулу и уште три лица, меѓу кои и поранешниот генерален секретар во Министерство за внатрешни работи на Грција се осудени на осум до 20 месеци условна затворска казна за случајот со неовластено користење мејлови на Грци кои живеат во странство, јави дописничката на МИА од Атина.

Случајот е од почетокот на март 2024 година, кога тогашната европратеничката на Нова демократија во пресрет на европските избори испратила мејлови со предизборен материјал до голем број грчки граѓани кои живеат во странство без притоа да постои нивна согласност, а нивните електронски адреси биле споделени од Министерството за внатрешни работи, откако се пријавиле на платформата за поштенско гласање на евроизборите.

Во судскиот процес против Асимакопулу и уште три лица денеска беше соопштена пресудата според која сите обвинети се прогласени за виновни.

Поранешната европратеничка, која по скандалот соопшти дека нема да се кандидира на евроизборите во јуни 2024 година, е осудена на 20 месеци условна затворска казна, а поранешниот генералниот секретар во Министерство за внатрешни работи на Грција доби 18 месеци.

Останатите двајца обвинети, кои се поранешни високи членови на владејачката Нова демократија се осудени на 8 и 12 месеци условна затворска казна.

The post ПОРАНЕШНА ГРЧКА ЕВРОПРАТЕНИЧКА ОСУДЕНА ЗА ЗЛОУПОТРЕБА НА МЕИЛ АДРЕСИ Доби 20 месеци условна казна appeared first on plusinfo.mk.

Норвешка со големо внимание ја очекува пресудата за Мариус Борг Хоиби, синот на крунската принцеза Мете-Марит, кој се соочува со 40 обвиненија, меѓу кои и четири за силување.

Обвинителството бара седум години и седум месеци затвор, додека одбраната смета дека евентуалната казна не треба да надмине година и пол.

Четири обвиненија за силување

Хоиби ги негира најтешките обвиненија, но признал дел од делата поврзани со дрога, сообраќајни прекршоци и кршење на судски мерки.

Според обвинителството, четирите силувања се случиле додека жените спиеле или биле во состојба што не им овозможувала да дадат согласност.

Жените кои сведочеа во процесот останаа анонимни, а судот забрани нивно фотографирање и јавно идентификување.

Семејна драма зад судските врати

Случајот доаѓа во исклучително тежок период за норвешкото кралско семејство.

Мајката на Хоиби, крунската принцеза Мете-Марит, неодамна беше ставена на листа за трансплантација на бели дробови поради сериозно влошување на нејзината здравствена состојба.

И покрај болеста, таа и престолонаследникот Хакон го посетиле својот син во притвор, каде што се наоѓа од почетокот на февруари.

Кралското семејство под силен притисок

Иако Мариус Борг Хоиби формално не е член на кралското семејство, неговиот случај предизвика силни потреси во норвешката монархија.

Дополнителен товар за угледот на дворот претставуваат и контроверзиите околу пријателството на Мете-Марит со осудениот сексуален престапник Џефри Епштајн, тема која повторно се отвори во текот на судскиот процес.

Поради кризата, норвешкото кралско семејство веќе ги откажа дел од планираните јавни настани, вклучувајќи ја и прославата на 25-годишнината од бракот на престолонаследничката двојка.

Пресуда што може да ја потресе монархијата

Експертите во Норвешка предупредуваат дека случајот одамна ја надминал рамката на обично судење и прераснал во сериозна институционална криза.

Доколку Хоиби биде осуден на долга затворска казна, тоа дополнително би го зголемило притисокот врз кралското семејство, кое веќе со месеци се обидува да ја врати довербата во јавноста.

The post СИНОТ НА НОРВЕШКАТА ПРИНЦЕЗА В ПОНЕДЕЛНИК ЌЕ ЈА ЧУЕ ПРЕСУДАТА Обвинет е за четири силувања appeared first on plusinfo.mk.

Општина Кратово во март оваа година добила правосилна пресуда против двете лица кои ги узурпираат влезот и брвнарата на локалитетот Куклица и нелегално наплаќаат за влез, но се чека исходот од обжалувањето на тужбата во предметот. Општината се огласи со соопштение откако денеска на социјалните мрежи граѓани револтирано реагираа за овој проблем кој се провлекува подолго време.

Општината извести дека во моментот е спречена да постапува по Законот за прогласувањена на локалитетот за споменик на природата.

„Пресудата е обжалена и во моментов се наоѓа на второстепена судска инстанца. По нејзината правосилност, Општина Кратово очекува нејзино брзо и ефикасно спроведување преку овластен извршител и со поддршка на надлежните државни органи, вклучително и Министерството за внатрешни работи“, велат од Општина Кратово.

Пресудата од 12 март предвидува осомничените Стојна Димитровска Боотх и нејзинит татко Милош Димитровски заедно со здружението „Извор“-Кратово во рок од 15 дена од правосилноста да му го предадат на Музејот на град Кратово објектот како и дрвената куќичка брвнара и да го ослободат просторот од сите предмети и ствари.

Општината вели дека лицата Стојна и нејзиниот татко бесправно го присвоиле просторот за неовластено да наплатуваат влезници.

„Дополнително, истите лица вршат сериозно загрозување на сигурноста и безбедноста на посетителите преку заплашување, лажно претставување, насилничко однесување и заплашување со кучиња“.

• НИ КРИВИЧНА ПРИЈАВА НЕ ГИ СПРЕЧУВА ДА НАПЛАЌААТ НА ДИВО ВЛЕЗ ВО КУКЛИЦА Граѓани бараат итна реакција од надлежните

На социјалните мрежи денеска беше споделена кривична пријава од 24 јуни 2025 година кога Општината ги тужела Стојна и Милош. Но, Општината во соопштение открива дека не било првпат да пријави лицата. Општината ги пријавила лицата за узурпација на недвижности, пријави кои уште се во постапка пред надлежното обвинителство.

Покрај овие кривични пријави, општината вели дека испратила голем број пријави и писмени поднесоци до надлежни институции, меѓу кои Државниот пазарен инспекторат и Управата за јавни приходи. Во овие институции, според општината, огромен број претставки испратиле и оштетени граѓани.

„Меѓутоа за жал до овој момент, немаме добиено позитивни информации за превземени конкретни активности туку одредени паушални констатации“, велат од општина Кратово.

Општината порачува дека останува посветена на заштита на јавниот интерес, законитото управување со природното наследство и безбедноста на граѓаните и посетителите во рамките на своите надлежности но секако очекува поголема вклученост и ажурност и од други овластени институции.

НИ КРИВИЧНА ПРИЈАВА НЕ ГИ СПРЕЧУВА ДА НАПЛАЌААТ НА ДИВО ВЛЕЗ ВО КУКЛИЦА Граѓани бараат итна реакција од надлежните

The post OПШТИНАТА УШТЕ ВО МАРТ ГИ ДОБИЛА НА СУД „ГОСПОДАРИТЕ“ НА КУКЛИЦА Стојна и Милош ја обжалиле пресудата, се чека исход appeared first on plusinfo.mk.

Одлуката на Граѓанскиот суд донесена во февруари годинава, со која се потврдува дека Живко Митрески во 2017 година е нелегитимно сменет од функцијата претседател на Сојузот на синдикати на Македонија, актуелното раководство на ССМ ја гледа како обид да бидат институционално замолчени.

Претседателот на ССМ Слободан Трендафилов денеска на прес-конференција посочи дека оваа пресуда е втора иако Апелациониот суд минатата година ја укинал првичната пресуда со цел да се утврди дали има правен основ за водење на постапка против починато лице.

– Сметаме дека жалбата којашто е поднесена во текот на вчерашниот ден повторно ќе биде прифатена од страна на Апелациониот суд кој уште еднаш ќе утврди дека Основниот суд не постапил по неговите напаствија. Тоа што е клучно е дека согласно меѓународните конвенции на МОТ, синдикатите имаат целосна слобода да ги креираат статутите, актите и документи и да вршат избор на луѓето кои ќе бидат нивни претставници – истакна Трендафилов.

Трендафилов посочи дека од 2017 година одржани се конгреси и во 2020 и 2023 година и дека доколку сакал Митрески можел да се кандидира.

– За жал, не го сторил тоа. Ако некој смета дека во Македонија може да се поставуваат членови односно претседатели по желба на неколкумина. Жалосно е што сега се обидуваат и по институционален пат да го замолчат ССМ затоа што протестираме и бараме зголемување на платите – рече Трендафилов.

На денешната прес-конференција, Трендафилов информираше дека согласно одлуките донесени на највисоките тела на синдикатот, годинава Меѓународниот ден на трудот ќе биде одбележан со протест под мотото „Се бориме за зголемување на платите, а не се молиме“. Протестот ќе почне во 11 часот пред Работничкиот дом, а со него повторно ќе се бара зголемување на минималната плата и на сите останати плати.

The post „ГО ВРАЌААТ ЖИВКО МИТРЕСКИ ЗА ДА НЀ ЗАМОЛКНАТ“ Синдикатот ја обжалил пресудата во корист на поранешниот претседател на ССМ appeared first on plusinfo.mk.

Основниот суд во Свети Николе изрече едногодишна затворска казна за 21-годишен маж од селото Сарамзалино, кој брутално ја претепал својата бремена партнерка и ја држел заклучена во соба со часови.

Според судската пресуда, насилството се случило во семејниот дом во градот, кога напаѓачот ѝ го одзел телефонот и клучевите од автомобилот и ја затворил во просторија каде ја држел околу 15 часа. Во текот на нападот ѝ нанел повеќе телесни повреди. Кога жената се онесвестила, тој ја разбудил со студена вода и продолжил со физичкото малтретирање.

Судот го прогласил за виновен за телесна повреда и противправно лишување од слобода, по што му била изречена единствена казна затвор во траење од една година.

Од Основен суд Свети Николе информираат дека пресудата засега не е правосилна, а обвинетиот останува во притвор до нејзиното конечнo потврдување, но не подолго од 60 дена.

The post ЈА БУДЕЛ СО ВОДА ЗА ДА ПРОДОЛЖИ БРУТАЛНО ДА ЈА ТЕПА Една година затвор за насилникот кој нападна бремена девојка appeared first on plusinfo.mk.

Потеклото на рецептот на познатите Моцарт топчиња предизвика конфликт меѓу две слаткарници во Австрија. Конфликтот дојде и до судот кој пресуди дека една од слаткарниците не смее да го присвојува рецептот.

На почетокот на минатата недела, покраинскиот суд во Салцбург ја прифати тужбата поднесена од слаткарницата „Фурст“ против конкурентот „Холцермаер“, кој се рекламира како наследник на оригиналниот рецепт за Моцарт топчиња. Но, со тоа се разгоре расправата меѓу двете слаткарници околу тоа кој прв ги направил топлињата.

Слаткарницата „Холцермаер“ се повикува на статија од историчарот Герхард Амерер од минатото лето, во која се тврди дека оригиналниот рецепт за познатиот десерт е создаден во 1880 година од слаткарот Р. Бауман, предок на сегашниот сопственик на Слаткарницата „Холцермаер“.

Во исто време, слаткарницата „Фурст“ тврди дека го има оригиналниот рецепт за Моцарт топчиња, кој тврдат дека е измислен од основачот на компанијата Пол Фурст во 1890 година.

Судот сега пресуди дека, со оглед на тоа што не постои оригинален рецепт, „Холцермаер“ не може да го спомене „рецептот“ во своето рекламирање. После тоа, рекламниот слоган беше променет во „според традицијата од 1880 година“.

Проблемот за „Холцермаер“ е што нивните „топчиња“ не се произведуваат во Салцбург, туку во фабриката „Линдт и Спронгли“ во Глогниц, Долна Австрија.

-Јас не сум човек што се расправа. Но, сè додека рачната работа на занаетчиите се става на исто ниво како индустриски производ и сè додека се кажуваат лаги, ние нема да седиме со скрстени раце – вели Мартин Фирст, сопственик на слаткарницата „Фурст“, која рачно ги прави топчињата.

„Холцермаер“ сега излегува во јавноста со нова теорија: Моцартовите топчиња првпат ги направила Луиз Карут, која била вработена кај слаткарот Бауман.

Сега сите чекаат објавување на новото истражување на историчарот Амерер за потеклото на познатиот десерт, кое треба да биде претставено на јавноста во април.

The post МОЦАРТ ТОПЧИЊАТА ПРИЧИНА ЗА КОНФЛИКТ МЕЃУ ДВЕ АВСТРИСКИ СЛАТКАРНИЦИ И двете тврдат дека го поседуваат оригиналниот рецепт appeared first on plusinfo.mk.