Не можеме да ви гарантираме брзина во судењето, но ќе направиме сѐ, за процесот да се одвива непречено. Не знаеме колку ќе трае, може 5 месеци или 5 години, рече судијката Диана Груевска Илиевска на почетокот на судењето за пожарот во дискотеката „Пулс“ во Кочани, во кој загинаа 63 лица.

– Барам дисциплина од сите странки. Сите ќе имаат можност да ја изнесат својата верзија на случајот и својата одбрана. Ќе дојдеме до правдата – рече судијката.

Втор судија во судечкиот совет е Ахмет Идризи. Има и резервен поротник, со цел процесот да се одвива непречено. Откако ги прочита имињата на присутните 34 обвинети и на нивните адвокати, судијката донесе решение кон предметот „Кочани“ да се спои и обвинението против сопственикот на агенцијата за обезбедување „Рубикон“, Александар Нацев.

– Се спојуваат постапките поради економичност на постапката. Против ова решение не е дозволена жалба. Како што знаете, дополнително имаше обвинителен акт за Александар Нацев, кој е оценет. Се работи за истите дејствија и предметот ќе се спои, постапката ќе тече заедно – рече судијката.

На судењето се присутни повеќе од 50 родители на загинатите во пожарот и 30-ина домашни медиуми. Акредитирани се и странски медиуми како БМТ, ТРТ, Франспрес, Ројтерс, Асошиејтед прес, Андалузија и други.

Поранешниот градоначалник на Кочани, Николче Илиев, ќе го бранат 5 адвокати од обвинението за Тешки дела против безбедноста за пожарот во Кочани.

The post СУДОТ НЕ ГАРАНТИРА БРЗИНА, ТУКУ НЕПРЕЧЕНО СУДЕЊЕ ЗА ПОЖАРОТ ВО „ПУЛС“ Правдата можеби ќе дојде за 5 месеци, можеби за 5 години, порача судијката Диана Груевска Илиевска appeared first on plusinfo.mk.

Во преполната судница во КПУ Идризово, под засилени безбедносни мерки денеска започна судењето за пожарот во дискотеката „Пулс“ во Кочани. Покрај обвинетите, присутни се и роднини на 63 жртви кои го загубија животот во несреќата што се случи на 16 март, претставници на обвинителството, на одбраната, новинари.

Осум месеци по несреќата, на обвинителна клупа седнаа 38 обвинети од кои 35 физички и три правни лица. Меѓу нив има сопственици на локали, управители, инспектори, поранешни градоначалници, членови на обезбедување и државни службеници.

МИА врши пренос во живо од судењето.

The post ВО ЖИВО ОД СУДЕЊЕТО ЗА ПОЖАРОТ ВО „ПУЛС“ Осум месеци по несреќата почна судскиот процес appeared first on plusinfo.mk.

Основниот кривичен суд ќе преземе сè што е неопходно за да се обезбеди што е можно побрзо и поефикасно судење за пожарот во дискотеката „Пулс“ во Кочани, информираше денеска в.д. претседателката на Основниот кривичен суд Даниела Димовска на брифинг за медиумите за техничките предизвици и организациската поставеност за текот на судењето. На брифингот присуствуваа и државниот јавен обвинител Љупчо Коцевски и претседателот на Адвокатската комора Љубомир Михајловски, кои, исто така, се обврзаа дека обвинителите и адвокатите ќе сторат сè што е во интерес постапката да се одвива непречено и без застој.

Судењето за големата трагедија што се случи на 16 март, во која загинаа 63 претежно млади луѓе, од кои 6 малолетници, а беа повредени 211, од кои 157 потешко, ќе почне во среда, на 19 ноември. Процесот ќе го суди судијката Диана Груевска Илиевска .

Судењето ќе се одржува во големата дигитализирана судница која е во рамките на затворот „Идризово“.

Според обемот, бројот на обвинетите, бројот на оштетените, кои се над 200, големината на трагедијата, интересот на јавноста, судењето за предметот „Кочани“ ќе биде едно од најголемите досега.

Претседателката на Судот Димовска нагласи дека ќе се одржуваат по две рочишта неделно. Таа апелираше да нема одложувања и најави дека строго ќе ги контролираат лекарските оправдувања и другата медицинска документација, со која учесниците во процесот ќе бараат одложување од здравствени причини. Рече дека внимавале на возраста на поротниците во судечкиот совет, затоа што ним мандатот им престанува на возраст од 60 години. Додаде дека за предметот имаат назначен резервен поротник, како и резервен записничар, за да нема застој на судењето. Димовска апелираше до бранителите, барањата во текот на процесот да ги упатуваат до кривичниот совет, надвор од главната расправа, а не до судечкиот совет, исто така, со цел да нема застој.

Обвинителот Коцевски рече дека нема да дозволат ниту едно рочиште да биде одложено по вина на обвинителството и дека обвинението ќе го застапуваат 15 обвинители. Објасни дека сите обвинители ќе бидат присутни на првото рочиште, а потоа ќе доаѓаат по потреба, како што налага динамиката на процесот. Обвинителите, објасни Коцевски истрагата ја водеа по сектори, на пример, локална самоуправа, заштита од пожари итн., па на судењето ќе доаѓаат соодветно на тоа кој дел од доказите ќе се изведуваат.

Претседателот на Адвокатската комора Михајловски рече дека ги цени напорите на судот да го организира судењето и смета и дека на адвокатите ќе им се овозможат услови за работа. Тој нагласи дека во процесот ќе има многу адвокати, затоа што тие се јавуваат и како бранители на обвинетите и како полномошници на оштетените. Нагласи дека сите разговарале во Адвокатската комора и зазеле став дека мора да се однесуваат така да не се успорува судењето, како и да не се крши Законот за кривичната постапка.

Знаеме дека во судница ќе има правна борба, рече Михајловски, но во судечкиот совет се искусни судии и ако странките ги почитуваат правилата, ќе имаме квалитетно судење. Додаде и дека медиумите имаат одговорност да пренесуваат точно што се случува во судницата, со оглед на огромната заинтересираност на јавноста. Михајловски потенцираше дека одговорност на Судот е да ја обезбеди безбедноста во судницата, но, како што додаде, не очекуваат физички напади. Очекуваме ред и дисциплина, потенцираше тој.

За пожарот се обвинети 34 физички лица и 3 правни лица. Обвинението, поднесено во јуни, сите ги товари за истото кривично дело Тешки дела против општата сигурност од член 292 став 2, во врска со член 288 став 3 од Кривичниот законик. Меѓу нив се тројца поранешни градоначалници на Кочани, четворица директори на Дирекцијата за заштита и спасување, пет државни службеници, меѓу кои генерален секретар и двајца поранешни министри за економија, тројца овластени градежни инспектори во Кочани, припадници на обезбедувањето … Првообвинети, во својство на одговорни лица, се сопственикот и управителите на правното лице „Класик ДМ“, чија подружница е „Кабаре Пулс“, каде што се случи пожарот.

Катастрофалниот пожарот во дискотеката „Пулс“ настана од пиротехника, за време на концертот на популарниот бенд ДНК, чии членови загинаа.

ДВАЈЦА ПОРАНЕШНИ МИНИСТРИ ЗА ЕКОНОМИЈА КУРТУЛИЈА ОД ОДГОВОРНОСТ ЗА ТРАГЕДИЈАТА ВО „ПУЛС“ Секој од 34 обвинети можел да го спречи пожарот, заедно ќе одговараат за смртта на 62 млади луѓе

The post СУДЕЊЕТО ЗА КОЧАНСКАТА ТРАГЕДИЈА ЌЕ БИДЕ ЕКСПРЕСНО? Сите актери се обврзаа да нема застој во процесот appeared first on plusinfo.mk.

Со воведни зборови на Обвинителството денеска во судницата на затворот Идризово се одржа судското рочиште против деветмината водачи и членови на криминалната група Беланоца-Барон, обвинети за 8 убиства, изнуди и загрозување на општата сигурност во периодот од 2020 до 2024 година.

Јавната обвинителка рече дека обвинетите во рамки на злосторничко здружение извршиле најмалку 8 убиства, дел од нив двојни, како и сериозни инциденти со кои била нарушена општата безбедност. Дел од доказите, појасни, се прислушувани и пресретнати комуникации, содржини екстрахирани од видео надзори, мобилни телефони, дигитални уреди, како и физички докази – оружја, возила, траги од крв, искази на сведоци итн.

Во воведните зборови на Обвинителството беше истакнато дека членовите на криминалната група од една страна се декларирале како големи верници и муслимани, а од друга страна учествувале во ликвидации на лица за паричен надомест, трговија со дрога, рекет, изнуда, давање под камата и во проституција.

– Еден од обвинетите дури кажува дека има голема желба да изврши самоубиствен напад влегувајќи во група на луѓе, како и дека својот син го учи на тие постулати. Има луѓе за кои животот значи сума на пари кои плаќаат преголема цена доколку убиството се изврши на најсуров начин, со испукување на цел арсенал автоматско оружје во лицето на противникот за цел негово уништување, а воедно и понижување и испраќање јасна порака. Има луѓе кои немаат јасна кауза и лојалност спрема никој и денес убиваат заедно, а друг ден кројат планови за да се убиваат меѓусебно. Има луѓе кои имаат на платен список убијци, изнудувачи, потпалувачи кои се испраќаат во мисија дури и за еден погрешно кажан збор – истакна обвинителката.

• УБИВАЛЕ ЗА 10.000 ДО 250.000 ЕВРА, УБИЛЕ 8 ЛУЃЕ, ПАЛЕЛЕ ОБЈЕКТИ И ВОЗИЛА НА ПОЛИЦАЈЦИ Полицијата и војската ја разбија мафијашката група „Беланоца – Барон“

Претходно од страна на адвокатот Еленко Миланов, бранител на првообвинетиот Фатљум Ајети, беше оспорена законитоста на прибавените докази на Обвинителството. Тој рече дека во „поднесениот обвинителен акт и листата докази на Обвинителството не е наведена ниту една наредба за посебна истражна мерка, ниту пак е доставена каква било наредба за примена на посебна истражна мерка која би значела тајно следење и снимање на лица и предмети надвор од домот или деловен простор означен како приватен“.

На ова обвинителката посочи дека „затворската ќелија недвосмислено претставува затворен и физички ограничен простор со ѕидови и врати каде што се одвива приватна комуникација“. Обвинителката рече дека затворската ќелија е место каде што лицата разговараат без присутство на трети лица и каде обвинетиот Фатљум Ајети треба да помине 11 години од својот живот, посочувајќи дека голем животен дел таму треба да поминат и обвинетите Зулќуфли Нуредини и Гани Марку.

– Посебната истражна мерка следење во затворен простор е законска и оправдана како единствен начин на прибирање кривични докази, пропорцијално соодветно на тежината на обвинувањата и одобрена од надлежен судија на претходна постапка. Доказите прибрани преку оваа мерка се законски и допустливи, имајќи го во предвид јавниот интерес за откривање на вистината во овој случај, кој е од исклучително значење за безбедноста на граѓаните – посочи обвинителката.

Обвинети се Фатљум Ајети познат како Тоте, Акиф Равмановски познат и како Јусуф Акифи–Барон, Зулќуфли Нуредини, Акиф Мемиши, Абдула Садики, Шенаси Маслани, Мирвет Маслани, Гани Марку и Решад Исман. Дел од нив беа спроведени од притвор, а дел од затворот „Идризово“ кадешто издржуваат затворски казни од други предмети.

УБИЛЕ 8 ЛУЃЕ, ВО НИВ ИСПУКАЛЕ СТОТИЦИ КУРШУМИ Почна и се одложи судењето за деветмината обвинети од бандата Беланоца-Барон

The post ОБВИНЕТ ВО „БЕЛАНОЦА-БАРОН“ ЗБОРУВАЛ ЗА САМОУБИСТВЕН НАПАД Почна судењето за опасната група која уби најмалу 8 луѓе appeared first on plusinfo.mk.

Основниот кривичен суд Скопје соопшти дека главната расправа за предметот „Адитив“ закажана за утре се отповикува.

Причината за одложувањето е одобрувањето на обвинителниот акт против Б.Н., како продолжение на истрагата, како и предлогот за спојување на обвиненијата.

„Со оглед да обвинителниот акт со КОК ООА 47/25, кој претставува продолжение на истрагата за конкретниот предмет, беше одобрен и доставен до судечкиот совет во текот на денешниот ден, а со кој предлог Обвинителството воедно има доставено и предлог за спојување на двете постапки, заради економичност и ефикасност, а како и не би се направиле непотребни трошоци за спровод на дел од обвинетите, потребно е време советот да се запознае со списите од предметот и да одлучи по предлогот за спојување, како и одбраната да се произнесе“, соопштени Судот.

Судењето ќе продолжи на следниот утврден термин, на 2 септември 2025 година, во 10 часот, во судницата во рамки на затворот „Идризово“.

Предметот „Адитив“ е поврзан со злоупотреби во државната компанија ЕСМ и фиктивни тендери за набавка на адитиви за термоцентралите, вредни повеќе милиони евра.

Истрагата опфаќа над 30 лица, меѓу кои и поранешни директори и функционери, а обвиненијата вклучуваат злосторничко здружување, злоупотреба на службена положба, перење пари и оддавање службена тајна.

The post ОДЛОЖЕНО Е СУДЕЊЕТО ЗА ПРЕДМЕТОТ „АДИТИВ“ На судечкиот совет му треба време да се запознае со новото обвинение appeared first on plusinfo.mk.