Сведокот Драган Ананиев, вработен во Општина Кочани, на денешното рочиште за пожарот во дискотеката „Пулс“ изјави дека работел и како главен општински секретар, но дека намал законска надлежност за контрола на инспекциските служби.

Сведокот појасни дека од 2023 година е назначен за главен инспектор во Општината и било формирано посебно одделение за инспекциски служби, и тоа сообраќајна, комунална, градежна и за животна средина.

Прашан дали како општински секретар вршел контрола на инспекциските служби, сведокот рече „не“.

– Немам законска надлежност за контрола на инспекциските служби – рече Ананиев.

На прашањето да појасни кој е надлежен за контрола на инспекциски служби кога нема раководител, сведокот рече дека во согласност со Законот за инспекцискиот надзор, кога нема раководител на одделение за инспекциски надзор, тоа функционира така што контрола врши тој што е избран.

Ананиев рече дека инспекторите носат годишен план за редовни и за вонредни контроли, кои подлежат на контрола на државниот инспекторат, а се доставуваат и до Советот на Општината и до градоначалникот.

– Годишните извештаи ги изработуваат инспекторите, а ги потпишува градоначалникот – рече сведокот.

Тој одговараше и на директни прашања од обвинетиот Огњен Георгиев, поранешен општински градежен инспектор во Општина Кочани.

Прашан дали при основање нов правен субјект или поддружница е потребно до Општината да се достави документација, сведокот рече „не“.

– Нема таква документација што се прима во Општината. За угостителската дејност, Општина Кочани има многу мала дадена надлежност. Се води регистар на физички лица, со правни лица немам надлежност. Со приватните, само за јавна прометна површина, друга документација, не – рече Ананиев.

Прашан дали кога некое службено лице ќе утврди нерегуларност надвор од својата надлежност, се доставува до надлежните инспекциски служби, сведокот рече дека секое пристигнато барање или известување се препраќа.

– Тој не може да постапи, но го препраќаат до надлежната институција – рече сведокот.

Во донесување на ДУП, сведокот рече дека градежните инспектори немаат надлежност да учествуваат ниту, пак, градоначалникот, кој не е ни стручен за тоа.

Прашан дали контролата на угостителската дејност е во надлежност на градежен инспектор или на градоначалникот, сведокот рече дека не е, тоа е надлежност на друг.

Претходно, на денешното рочиште беше сослушан и сведокот Александар Јосифов, кој од 2017 до 2021 година бил главен секретар во Општина Кочани, во мандатот на градоначалникот Николчо Илиев.

Јосифов рече дека во тие години во Општина Кочани функционирале три инспекциски служби – комунална, животна средина, градежен инспекторат и подоцна се вработил и сообраќаен инспектор, но немало раководител на инспекциските служби.

Директна одговорност со инспекциските служби сведокот Јосифов рече дека немале, но им биле поддршка, на пример, ако имаат потреба за користење возило или слично.

Пожарот во дискотеката „Пулс“ во Кочани избувна на 16 март 2025 година за време на настап на групата ДНК. Загинаа 63 лица, а над 200 беа повредени.

Судењето се наоѓа во доказната постапка со сослушување сведоци на предлог на Обвинителството, кое го застапува тим од 15 јавни обвинители.

The post НЕ СЕ ДОСТАВУВА ДОКУМЕНТАЦИЈА ВО ОПШТИНАТА КОГА СЕ ОСНОВА ПРАВЕН СУБЈЕКТ ИЛИ ПОДРУЖНИЦА Сведочеше секретарот на Општина Кочани appeared first on plusinfo.mk.

Со искази на петмина сведоци предложени од Јавното обвинителство, денеска во судницата на Кривичниот суд во Идризово ќе продолжи судењето на обвинетите за пожарот во дискотеката „Пулс“ во Кочани, во кој загинаа 63 луѓе, а над 220 беа повредени. За катастрофата што се случи на 16 март 2025 година им се суди на 35 физички и на 3 правни лица, за делото Тешки дела против општата сигурност.

Претходното рочиште на 19 февруари беше одложено, затоа што четвртообвинетиот Гроздан Милковски беше на болничко лекување во Општата болница во Кочани. На Милковски, кој е сопственик на објектот во кој се наоѓаше дискотеката „Пулс“, а му го издавал на првообвинетиот Дејан Јованов Деко, му се слоши на рочиштето на 5 февруари, поради што судењето беше прекинато.

Тоа беше второ одложување на рочиште откако судењето почна на 19 ноември 2025 година, а првото беше на 14 јануари оваа година, откако еден од обвинетите остана без бранител, поради тоа што неговата адвокатка беше избрана за член на Судскиот совет.

Кривичниот суд на 18 февруари информираше дека претседателот на судечкиот совет, судијката Диана Груевска Илиевска телефонски разговарала со докторите кои го лекуваат обвинетиот Милковски и тие изразиле уверување дека неговата здравствена состојба ќе се подобри и ќе може да продолжи да ја следи главната расправа.

На рочиштето на 5 февруари сведочеа двајца пожарникари и девојка која кобната вечер била на концертот на групата ДНК во „Пулс“. Пожарникарите раскажаа дека кога пристигнале по дојавата за пожарот веднаш почнале да ги извлекуваат младите луѓе кои во стампедото што настанало од паника останале заглавени на скалите, на влезната врата, во ходникот, во билетарницата, како и во тоалетите. Дел од настраданите ги извлекле живи, а дел биле мртви. Дојавата за пожарот ја примиле во 2.25 часот, а го изгаснале околу 4 часот.

Во процесот се обвинети сопственикот на дискотеката, управителите, членовите на обезбедувањето, поранешни градоначалници на Кочани, градежни и пазарни инспектори, поранешни директори на Дирекцијата за заштота и спасување, поранешни министри за економија, службеници во Министерството за економија, за дејствија што ги преземале или не ги преземале во периодот од 2012 година до денот на пожарот, а поради што настанала катастрофата.

The post ЌЕ СВЕДОЧАТ ПЕТМИНА СВЕДОЦИ Продолжува судењето за пожарот во дискотеката „Пулс“ во Кочани appeared first on plusinfo.mk.

Кристијан Панов, брат на загинатиот Андреј Панов, кој бил повикан на испомош во дискотеката „Пулс“, кобната вечер се спасил зашто излегол надвор на цигара пред да избувне пожарот.

Во неговото денешно сведочење тој рече дека бил невработен но дека работел во дискотеката „Пулс“ на испомош како келнер. Не одел секоја вечер, туку по потреба. Добивал по 1.500 денари дневница, на почетокот на вечерта. На шанкот ги плаќале пијалоците кога ги нарачувале од тие 1.500 денари што им биле како каса, а после ги наплаќале пијалоците од гостите.

Неговиот брат Андреј бил шанкер во „Пулс“, тој земал по 2.000 денари дневница. Не бил пријавени како вработени.

Кристијан рече дека во дискотеката настапувале различни бендови, диџеи, и не само од Македонија.

На прашањето од обвинителот дали и претходно била користена пиротехника, тој рече:

– Да. Пред 16 март имаше диџеј од Грција, имаше танчерки, немаше прскалки, туку вртеа со факели со оган. Ги вртеа во воздух и танцуваа со нив.

Панов рече дека во „Пулс“ имало само еден влез и излез, но не беше сигурен дали тој бил означен со светлосен сигнал. Тој потврди дека за време на настаните во дискотеката имало обезбедување и дека имало многу гости.

– Имаше постојано обезбедување. Тие беа од Кочани. Лазар Захариев, Столе и Ивица. Стоеја надвор на вратата, прегледуваа билети, ставаа печат на раката на тие со билет и влегувате во диското. Имаше и малолетнии на тие настани. Имаше полиција во униформа, но не толку често и не беа присутни цело време – рече тој и додаде дека доаѓале и полицајци без униформа.

Тој не знае кој ги организирал настаните, но рече дека резервација на маса се правела преку менаџерот Борис Финдачки, ама можело и преку сопственикот Деко или преку неговиот син Михаил.

Сведокот Кристијан рече дека не видел противпожани апарати. За братот на Деко, Тодор Јованов, рече дека продавал билети и на малолетни.

На 16 март, во „Пулс“ работел брат му на Кристијан на шанкот, а тој дошол околу 2.20 часот. Се приклучил во друштвото на неговиот пријател Мартин Илијев кој славел роденден.

– По некое време излегов да испушам цигара. Во тој момент влегуваа полицајци, една полицајка. Кристина, не ѝ го знам презимето, ме праша каде сум тргнал. Во тој момент се запали диското. Јас излегов надвор, ја запалив цигарата и немаше никој да излезе едно 40 секунди и одеднаш сите трчаа и излегуваа колку што можат. Наеднаш настана стампедо и кој колку можеше даваше помош. Стампедото беше еден врз друг, беше тешко да се извлечат луѓе. Стампедото беше надвор на скалите, паѓаа еден врз друг. Дел се заглавија на самиот влез, меѓу првата и втората врата во диското – сведочеше Кристијан.

Тој рече дека концертот на ДНК бил во тек. На прашањето дали некој од групата дал коментар, Кристијан рече:

– Да, Андреј или Панчо рече на микрофонот „Излегувајте, ќе се вратиме“.

– Се обидовте ли да влезете? – праша обвинителот.

– Да, влегов. Беше претешко да бидеш внатре повеќе од 10 секунди. Го барав брат ми. Влегов после 20 минути, кога стампедото беше расчистено. Претходно не беше можно да се влезе, пред да се расчисти. Потоа можеше да се влезе. Сите беа во паника и во шок, сите се бореа да излезат, настана екстремно голема паника, што всушност и го предизвика стампедото – рече Кристијан.

– Како се расчисти стампедото? – праша обвинителот.

– Имаше луѓе што помогнаа, луѓе што беа надвор во тој момент. Имаше многу луѓе пред диското и помогнаа да се расчисти, оти имаше паднати луѓе. Јас исто, помогнав колку што можев. Побарав светло од пожарникар, да светнам внатре, ништо не се гледаше, имаше многу тела на земјата. Тој немаше, јас светев со мојот телефон и го барав брат ми. Додека го барав, нешто одзгора падна врз мене, се распрсна во пламен, па излегов. Кога се вратив по втор пат, го најдов на самиот праг пред диското. Внатре имаше многу тела, ниеден немаше свест, веќе беше доцна за нив. Јас ги тргав телата барајќи го брат ми и се трудев да помогнам колку можеме повеќе од нив да извлечеме надвор.

– Како го извлековте вашиот брат? – праша обвинителот.

– Тој беше на прагот, некој веќе го извлекол, само што го видов, не бев сигурен првин дали е тој, го познав по тетоважите. Го повикав братучед ми Иле Гаврилов да ми помогне. Го кренавме телото и влеговме во амбулантата. Имаше премногу гужва таму. Во амбулантата му дадоа адреналин и го префрлија во друга соба. Јас прашував дали е жив и никој не ми даде одговор. Останавме само јас и тој, јас се обидував да го реанимирам. Имаше лекари. Една сестра ми кажа дека сите тие што се во соба број 2 не дишат – рече Кристијан.

Тој рече дека го видел Лазар од обезбедувањето како пружа помош на повеќе луѓе, но други не видел. Не се сеќава дали го видел Тодор Јованов или брат му, но дека го извлекле од стампедото.

– Дали видовте некој од нив двајца да употребува ПП апарат? – праша обвинителот.

– Деко. Тоа беше моментот кога тргнав на цигара, а полицајката ме држеше таму, го видов Деко како трча со апаратот. Не ми беше јасно отпрвин што се случува. Кога го видов пожарот се оттргнав кон надвор, а во тој момент Панчо или Андреј од ДНК рекоа „Излезете надвор“. Јас во тој момент стоев кај каубојската врата, тоа беше почетокот на пожарот – сведочеше Кристијан.

Потоа сведокот одговараше на прашања од Ивана Коцевска, бранителка на Деко и на Михаил Јованов.

– Рековте дека повремено сте работеле како келнер во „Пулс“. На прашањето на јавниот обвинител рековте дека не сте виделе внатре ПП апарати. За критичната вечер рековте дека сте виделе како Деко употребувал ПП апарат. Сепак, имало ПП апарати и вие сте знаеле за тоа? – праша таа.

– Не, не сум знаел за тоа, немав видено ПП апарат. Прв пат видов ПП апарат таа вечер – рече тој.

На прашање на бранителот на Тодор Јованов, Александар Новаковски, дали за таа вечер знае дали Тодор продавал билети на малолетници, сведокот одговори:

– Лично не сум видел. Отидов доцна, кога веќе сите беа влезени. Но, внатре имаше многу малолетници таа вечер. Најверојатно имало и влезени без карта.

Бранителот на Јане Јанчевски праша:

– Рековте дека за периодот кога сте биле ангажиран често сте сретнувале посетители малолетници и полициски службеници. Дали тие знаеле дека во диското има малолетници?

– Да, а имаше полициски службеници што не беа во униформа. Знаеја дека има малолетници – рече сведокот Кристијан.

Адвокат на Лазар Захариев праша:

– Ќе се согласите ли со мене дека Захариев најмногу има спасено, со крајни маки го правел тоа и дека не се тргнал од таму ниту една секунда?

– Не знам дали спасил најмногу, но го видов дека помага. Тоа е човечки инстинкт и одговорност, а пожарот е од човечка неодговорност – рече Кристијан.

Тој потврди дека било крајно тешко да се извлекуваат луѓето и дека благодарение на Лазар многу луѓе се живи.

The post КОГА НАСТАПУВАЛ ДИЏЕЈ ОД ГРЦИЈА СЕ ВРТЕЛЕ ФАКЕЛИ ВО „ПУЛС“ Стампедото се расчистило за 20 минути, сведокот Кристијан го видел газда Деко како трча со ПП апарат appeared first on plusinfo.mk.

Со завршни зборови на одбраната на сопственикот на агенцијата за обезбедување „Рубикон“ Александар Нацев денеска во судницата на Кривичниот суд во Идризово ќе продолжи судењето за катастрофалниот пожар во дискотеката „Пулс“ во Кочани, што се случи на 16 март 2025 година, во кој загинаа 63 луѓе, меѓу кои 6 малолетни, а над 210 беа повредени, од кои 156 потешко.

Нацев е последниот обвинет, од вкупно обвинети 35 физички лица. Обвинителниот акт против него со одлука на судот на првото рочиште беше споен со обвинението против останатите 34 физички и трите правни лица, „МММ Кафе“ ДООЕЛ, „Венци проект“ и „Рубикон секјурити солушнс“.

На денешното судење ќе бидат дадени последните воведни зборови, за Нацев и за две правни лица. Потоа ќе почне сослушувањето на сведоците.

Прва ќе сведочи Марија Петрушевска, мајка на загинатиот Андреј, потоа Габриела Наунова и Александар Наунов, родители на загинатата Надица Наунова, како и Ирена Минева. Обвинителот Борче Јанев предложи за денешното рочиште да се повика и сведокот Дејан Николов.

Се очекува на судењето да сведочат 35 сведоци, предложени од Јавното обвинителство, плус сведоците на одбраната.

За пожарот, што избувна од пиротехниката за време на концерт на групата ДНК, им се суди на сопственикот и на менаџерите на дискотеката, членови на обезбедувањето, проектанти, на градежни и пазарни инспектори. На обвинителна клупа се и тројца поранешни градоначалници на Кочани, четворица поранешни директори и еден инспектор од Дирекцијата за заштита и спасување, како и двајца поранешни министри за економија и петмина службеници од Министерството за економија. Обвинението, што го застапуваат 15 обвинители, сите ги товари за Тешки дела против општата сигурност, односно дека во периодот од 2012 до денот на пожарот пропуштале да спроведат задолжителни мерки, надзори и контроли и на тој начин дошло до катастрофалните последици.

Судскиот процес го води судијката Диана Груевска Илиевска, а судењето се одвива под засилено полициско обезбедување.

The post ЌЕ СВЕДОЧАТ РОДИТЕЛИ НА ЗАГИНАТИТЕ ВО „ПУЛС“ Продолжува судењето за пожарот во Кочани appeared first on plusinfo.mk.

Одбраната е свесна дека сме во можеби најтешкиот предмет во историјата на македонското правосудтсТво и посакувам никој, со функциите кои ги обавувавме, да не се најде во оваа позиција, рече адвокатот Петре Шилегов во воведниот збор на одбраната на Шофкет Хазари, поранешен вработен во Министерсвото за економија, кој е 26-ти обвинет од вкупно 35 обвинети физички лица за пожарот во дискотеката „Пулс“ во Кочани на 16 март 2025 година, во кој загинаа 63 луѓе, а над 210 беа повредени.

Не постои суд во целиот свет, не постои пресуда која може да ги отстрани последиците од овој настан и затоа сите заедно, а Судот најмногу, сме исправени пред предизвикот да се донесе правно одржлива пресуда, која колку толку, ако воопшто може да даде сатисфакција на оштетените во оваа постапка, рече Шилегов. Но, Судот, додаде тој, мора да донесе пресуда која не смее да нанесе неправда на ниту еден од обвинетите.

– Долго размислував дали да ги читам кривичните дела од обвинението, со целосна почит кон Јавното обвинителство, и за жал, ќе морам, бидејќи правно поаналфабетски памфлет немам видено. Ова не заслужува да се нарече обвинителен акт. На Хазари му се става на товар дека бил свесен дека може да настапи штетна последица и се согласил со нејзиното настанување, и тоа, за кривично дело опишано во член 288 од Кривичниот законик, квалификувано во член 292. Обвинетиот во периодот од 2012 до 2025 година се согласил дека на 16 март ќе има пожар во ноќниот клуб во Кочани – рече Шилегов.

Тој го цитираше делото што се става на товар на Хазари, член 288, кој вели: тој што со пожар, поплава, експлозија, отров или отровен гас, јонизирачко зрачење, моторна сила, електрична или друга енергија или со друго општоопасно дејствие или средство ќе предизвика значителна опасност за животот или телото на луѓето или за имот од големи размери…

– Тоа е делото што според Јавното обвинителство го сторил обвинетиот Хазари, а со кои средства? Со лиценци за угостителска дејност. За првата лиценца од 2013 година предметот бил изработен и контролиран од вработени во Министерството за економија, а Хазари дал согласност. Лиценците од 2014, 2017 и од 2018 година се изработени и контролирани од вработени од министерствито, а од Хазари биле проверени. Се обидов во описот на кривичното дело да ги најдам зборовите проверена и согласност, но не постојат. Па, нејасно е како може проверка на правен акт-лиценца или давање согласност на правен акт, во временски интервал од 2013 до 2019 во четири различни наврати, да предизвика пожар на 16 март 2025 во дискотека во Кочани? Хазари работел од 2005 до 2020 во министерството, во моментов е пензионер. Дел од работата на вработените, вклучително и на тогашниот државен советник Хазари била да постапуваат по барања доставени од страна на заинтересирани лица, во конкретниов случај, барање за издавање лиценца – рече Шилегов.

Тој посочи дека одбраната ќе докаже дека согласно член 6 од Законот за угостителска дејност за лиценца се поднесуваат 5 документи: самото барање, доказ за платена такса, тековна состојба на барателот, изјава од барателот кој ја има одговорноста дека ги исполнува минималните технички услови неопходни за лиценцата и согласнот од МВР за безбедно паркирање.

– И што е работата на Хазари во таквиот случај? Да провери дали целокупната документација предвидена во законот е поднесена со барањето и дали е во предметот или не е. Ако е во предметот, должен е да потпише дека проверил. Тоа се оние 3-4 потписи на секој документ што го издава државната управа, каде пишува кој го изработил, кој го прегледал и кој го одобрил. Кога добивате предмет кој е комплетен како акт, како барање, вие сте должни тој предмет да го проследите на понатамошна административна постапка. Оттука нејасно е како Хазари предизвикал пожар. Пожарот е непосредно, моментално дело, нешто што настанува во момет и сите можевме да видиме кој е тој момент што го предизвика пожарот. Дел од тие лица се починати и не сакам на тој момент да се враќам, но тоа е тој момент. Не може потпис за кој сте должни да го дадете да е предизвикувач на пожарот – рече бранителот Шилегов.

Второто дело што се става на товар, е соизвршителство, додаде Шилегов, предвидено во член 22 од КЗ и го прочита: Соизвршителство значи ако две или повеќе лица, со учество во дејствие на извршување или друг особен придонес кон извршувањето на делото, заеднички сторат кривично дело, секој од нив ќе се казни со пропишаната казна. Според правната теорија, додаде Шилегов, во соизвршителството учествуваат две или повеќе лица и секој од нив е извршител на кривичното дело.

– За да постои соизвршителство во конкретната ситуација, потребно е да бидат исполнети два услова. Еден од објективна и еден од субјективна природа. Објективниот услов подразбира дека овие 35 обвинети лица заеднички учествувале во извршувањето на кривичното дело. Од субјективна природа соизвршителството подразбира дека кај овие лица постои свест за заедничка соработка во насока на извршување на кривичното дело. Одбраната ќе докаже дека ова е сериозна ступидност, глупост. Во памфлетот наречен обвинителен акт нема докази дека Шофкет Хазари поднел, внел, помогнал, запалил материјали или презел опасни дејствија за да воопшто биде соизвршител. Глупоста на обвинителниот акт е толкава што става на товар дека овие 35 обвинети се познаваат, се договориле и свесно извршиле палење на дискотеката – тоа е соизвршителството. Колку што знам, Хазари прв пат во животот оди во Кочани дента кога е уапсен. Како тоа ја запалил дискотеката? Како тоа помогнал некој да ја запали? – рече Шилегов.

Врвот на глупоста, потенцира Шилегов, е она што Јавното обвинителство го нарекува теорија на каузалитет или причинско-последични врски.

– Многу широко презентирано како теорија, неточна, бидејќи лиценцата е правен акт кој се издава на година дена. Со издавање на секоја лиценца прекинува важноста на претходната. Не може лиценците издадени во 2013, 2014, 2017 и во 2018 година, каде се наоѓа потписот на Хазари, да имаат правна важност за работа на дискотеката. Годишни се. Ако имате прекини, не може да имате континуитет, по дефиниција. Затоа што прекинува да важи. Ако го прифатиме широкото толкување на ЈО, тогаш сериозно недоставуваат многу лица во оваа судница. Кој е тој што одлучува каде почнува, а каде завршува каузалитетот? Зошто имаме обвинети поранешни, а не актуелни министри? Зошто имаме пораешни, а не актуелни директори? Зошто не се тука сите вработени во Министерството за економија кои во изминатите години издавале лиценци? Многу едноставно – не се вклопуваат во конструкцијата – рече Шилегов.

Тој го обвини и самото Јавно обвинителство дека не дејствувало во минатото во врска со дискотеката.

– Обвинителството е независен државен орган кој ги гони сторителите на кривични и други со закон казниви дела. Но, обвинителе, ако постоел тој јавашлук, како што тврдите, што правевте вие овие 13 години? Што правевте? Ако ја прифатиме ваквата теорија, тогаш обвинителот требаше да го слуша, а не да го чита обвинението. Има и друг начин да се фатат виновниците, и тоа за други дела, не за овие. ЈО можело да врши кривичен прогон врз Хазари за злоупотреба, за несовесно работење, бидејќи тие дела би одговарале, ама ако се застарени, што да се прави – рече Шилегов.

Немам зборови со кои можам да ја опишам оваа трагедија, нема суд што може да донесе пресуда којашто не може да ги утеши душите на овие луѓе, додаде тој, на што родителите на загинатите почнаа да му дофрлаат.

– Многу нè жалиш, не ставај сол на рана, од такви како тебе се предизвика ова, не си во парламент – довикуваа родителите, а судијката ги опомена да молчат.

Најголемата трагедија во Македонија не може да се покрие со неправда, со пресуда за невини лица, додаде Шилегов.

-ЈО треба да го повлече предметот и квалитетно да го сработи, па потоа, на правна основа, да постапи. Ако се залагаме сите системот да профункционира, ова е вистинска можност. Судот треба да донесе одлука која е во согласност со системот, а не со желбите и конструкциите, барањето на јавноста и толкувањето на правото од неуката јавност – рече адвокатот Петре Шилегов, бранител на обвинетиот Шофкет Хазари на денешното рочиште во судницата на Кривичниот суд во Идризово.

The post ХАЗАРИ БИЛ ДОЛЖЕН ДА ЈА ПОТПИШЕ ЛИЦЕНЦАТА, КАКО ТОЈ ГО ЗАПАЛИЛ „ПУЛС“? За Шилегов врв на глупоста е теоријата на каузалитет на Обвинителството appeared first on plusinfo.mk.

На третото рочиште во кое одбраната дава воведни зборови, денеска пред Кривичниот суд први ќе се обратат бранителите на четворицата обвинети поранешни директори на Дирекцијата за заштита и спасување и главниот инспектор во ДЗС, кои, заедно со останатите 30 обвинети физички лица се товарат за Тешки дела против општата сигурност, за пожарот во дискотеката „Пулс“ во Кочани на 16 март, во кој загинаа 63 лица, а над 210 беа повредени.

Поранешните директори Шабан Салиу, Аднан Џафероски, Беким Максути и Џеват Селами и инспекторот Љупчо Грнчиштанов се обвинети дека од 2012 година не распоредиле инспектор за заштита и спасување во Кочани и никогаш не спровеле инспекциски надзор во дискотеката, за да проверат дали се исполнети задолжителните услови за противпожарна заштита. На листата со 35 обвинети за трагедијата, тие се 18, 19, 20, 21 и 22 обвинет.

По нив, списокот на обвинети ги опфаќа поранешните министри за економија Ваљон Сараќини и Крешник Бектеши и на денешното рочиште се очекува воведниот збор и на нивната одбрана. Тие се товарат дека ги издале лиценците за работа на дискотеката „Пулс“ без да ја проверат документацијата. Од Министерството за економија се обвинети и петмина службеници – Џеваир Камбери, Шефкет Хазари, Зоран Николовски, Беким Хаџиу и Арлинда Касапи, при што Камбери е обвинет и за примање поткуп, во два наврати, за да се издаде лиценцата за „Пулс“.

На денешното рочиште во големата судница во Идризово, не се очекува да завршат воведните зборови на сите обвинети. Најверојатно за утре ќе остане да се слушне излагањето на бранителите на обвинетите пазарни инспектори Миле Ампов, Блашка Евтимова, Весна Кузмановска и Емил Митев, на поранешната државна секретарка во Министерството за економија Размена Чекиќ Дуровиќ и на сопственикот на Агенцијата за обезбедување „Рубикон“, Александар Нацев.

На минатото рочиште одбраната на обвинетите градежни инспектори истакна дека причина за пожарот во дискотеката е употребата на пиротехниката, а не е пропуст во градежната конструкција на објектот, кој ниту се урна, ниту му се оштети статиката. Адвокатите посочија дека градежните инспектори не се надлежни за ентериерот, туку само за промени во габаритот и во градежната конструкција, а во „Пулс“ немало изградба, туку внатрешно преуредување, како и дека без писмен налог градежен инспектор не може да изврши вонреден надзор и не смее да влезе во приватен објект, оти кривично ќе одговара.

Одбраната на поранешниот градоначалник на Кочани Ратко Димитров истакна дека тој не само што немал намера или умисла за делото што му се става на товар, туку бил единствениот кој реагирал и поднел барање до надлежните да не се издаде дозвола за работа на „Пулс“ и тоа уште пред објектот да почне со работа. Димитров праша каква правда може да се добие, ако се обвинуваат луѓе што не се виновни и истакна дека нема правда со заменски обвинети и не може некој невин да го носи товарот наместо вистинскиот одговорен.

И адвокатите на обвинетите поранешни градоначалници на Кочани, Николчо Илијев и Љупчо Папазов потенцираа дека локалната власт нема никакви ингеренции во врска со дискотеката „Пулс“, која е целосно во надлежност на државната власт и на државните инспекторати, а постапката против ексградоначалниците се води врз основа на нецелосна истрага и без обезбедени факти кои директно ги поврзуваат со катастрофата.

На минатото рочиште на 4 декември одбраната на членовите на обезбедувањето оцени дека обвинението против обезбедувачите е неосновано, без конкретни докази и изградено врз хаотични претпоставки. Адвокатите нагласија дека дел од обвинетите имале ограничени задачи и не можеле да спречат внес на пиротехника, а како клучни причини за трагедијата ги посочија институционалните пропусти и недостигот на надзор.

На рочиштето на 2 декември сите обвинети за трагичниот пожар се изјаснија дека не се чувствуваат виновни за обвинението што им се става на товар.

The post ЌЕ ЗБОРУВА ОДБРАНАТА НА ПОРАНЕШНИТЕ ДИРЕКТОРИ НА ДЗС И МИНИСТРИ ЗА ЕКОНОМИЈА Продолжува судењето за пожарот во Кочани appeared first on plusinfo.mk.

Одбраната на дел од обвинетите за пожарот во Кочани, пред почетокот на денешното рочиште, реагираше до Судот дека го нема добиено изменетото обвинение, а треба да даде воведни зборови.

– Ниту еден од обвинетите, односно најголемиот дел воопшто го немаат добиено интегрираниот текст на обвинението, а ќе се очекува да се дадат воведни зборови. Затоа предлагам судот да го расчисти ова прашање, па потоа да одлучиме во зависност од одлуката на Судот како ќе продолжиме – изјави еден од адвокатите од одбраната.

Одбраната на дел од обвинетите реагираше до Судот и дека доказната документација е целосно несредена и хаотична и побара да им бидат доставени сите докази.

Судијката Диана Груевска Илиевска рече дека Судот смета дека е нормална соработката меѓу обвинетите и бранителите и дека сите го имаат добиено интегрираното обвинение, посочувајќи дека на минатото рочиште Судот побарал електронски адреси на сите кои сакаат да им биде пратено.

– Ние сметаме дека преку бранителите сите треба да го имаат, меѓутоа ако немаат ќе се потрудиме преку судот да име се достави – рече судијката. Судот ги прифаќа приговорите на дел од бранителите дека обвинението интегрирано со листата на докази не е доставена до обвинетите, а со оглед да бранителите не прифаќаат доставата да се изврши преку нив, Судот во текот на денешниот и утрешниот ден до сите обвинети ќе изврши достава – изјави судијката.

За да нема одолговлекување на постапката, Судот донесе одлука денеска главната расправа да продолжи со изјаснување по однос на отштетни побарувања.

Во судницата во Идризово денеска продолжува судењето за пожарот во дискотеката „Пулс“ во Кочани, во кој загинаа 63 лица, меѓу кои и малолетници, а повеќе од 200 беа повредени. Судењето треба да продолжи со произнесување на вина и воведни зборови на одбраната, откако на изминатото рочиште обвинителството во воведниот говор порача дека се бара одговорност по име и презиме за тоа кој дозволил, кој молчел и кој не ја спречил трагедијата во ноќниот клуб.

The post ОДБРАНАТА СЕ ЖАЛИ ДЕКА НЕ СИТЕ ОБВИНЕТИ ГО ДОБИЛЕ ИНТЕГРИРАНОТО ОБВИНЕНИЕ Бранителите обвинија дека доказната документација е хаотична appeared first on plusinfo.mk.

Повеќе бранители на обвинетите во процесот „Кочани“ денеска побараа одложување на главната расправа, затоа што Судот на почетокот на рочиштето со одлука ги спои обвинението против 34 лица, поднесено на 13 јуни 2025 година и обвинението против Александар Нацев, сопственик на агенцијата за обезбедување „Рубикон“, поднесено на 4 септември 2025 година.

По спојувањето на двете обвиненија, јавните обвинители истакнаа дека доставуваат интегриран обвинителен акт, со листа на прочистени докази. На ова реагираа повеќе бранители, затоа што, како што истакнаа, не се запознаени со содржината на интегрираното обвинение и со тоа кои докази се редуцирани од веќе утврдената листа на докази.

Одбраната го побара на увид интегрираното обвинение

Бранителот на Александар Нацев прв побара одложување на главната расправа, со цел неговиот клиент да се запознае со новото обвинение и со доказите.

– Согласно член 393 од Законот за кривична постапка, а во насока на евентуално дополнување на веќе доставената листа на докази, барам одлагање на денешната расправа, за да се изврши увид во интегрираното обвинение – рече тој.

Адвокатот Еленко Миланов реагираше дека Јавното обвинителство некоректно го става Судот во незавидна ситуација.

– Судот донесе решение за спојување на постапката по две посебно донесени и одобрени обвиненија. Со доставувањето на овој единствен интегриран обвинителен акт, во суштина престануваат да постојат поднесените обвинителни акти. Од друга страна и обвинителниот акт од септември 2025 година е испитан и постои оценка и решение за неговото потврдување, со што е потврдена и листата на докази на ЈО. Согласнно ЗКП, за да се редуцира или да се повлече доказ на која било страна, кој веќе е прифатен, а доказите на ЈО се прифатени со стапување на сила на обвинителниот акт, мора во најмала рака тој прецизиран и интегриран акт, со интегрирана листа на докази, доколку постои спецификација на конкретно повлечени докази, да ѝ се достави на одбраната. Одбраната треба да се произнесе за тие докази, за да може да се продолжи со чисти и расчистени листи на докази. Продолжувањето на расправата без доставување на интегрираниот обвинителен акт е спротивен на ЗКП – истакна Миланов.

На ова обвинителот Борче Јанев истакна дека во доставениот интегрален текст и листата на докази, ништо не е променето суштински во дејствијата на обвинетите, ниту се работи за доставување нова листа на докази која е непозната за одбраната.

– Сметаме дека е легитимно правото на одбраната да ја има единствената листа на докази. Токму затоа сите ќе го добијат записникот од денешната работа, во кој е и интегралниот текст на обвинението и исчистената листа на докази. И Обвинителството денеска доби листа на докази од дел од одбраната, ако сме веќе кај принципот на еднаквост на оружјето – рече обвинителот.

Адвокатот Петре Шилегов рече дека барањето за одложување не е поради бранителите.

– Ова барање настана поради Јавното обвинителство, кое нѐ доведува до либерално толкување на Законот за кривична постапка. Кај што либерално толкуваме што е предизвикување опасност, сега треба да прифатиме и релативизирање на законските права и обврски и на ЈО и на одбраната и на оштетените. Како што истакна колегата Наков, спојувањето е легитимно право на Судот, но, поднесување пречистен текст на обвинителен акт не е ништо друго освен нов обвинителен акт. Во овој момент не ја знаеме содржината на пречистениот текст, па ако одиме во толкување – дали постапката треба да ја вратиме во оценка на овој нов акт? Тоа никој не го сака, најмалку одбраната. Имаме редуцирани докази, кои по правосилните обвинителни акти се дел од доказната постапка што треба да се изведе пред овој суд. Ние не го знаеме степенот и обемот на редукцијата. Согласност за тоа треба да даде другата страна, а не знаеме колакво е нивото на редукција, за да ја дадеме или да не ја дадеме таа согласност. Некои од сведоците, можеби и одбраната ќе сака да ги сослуша и да ги предложи. Нам судот официјално треба да ни ја достави новата редуцирана листа на докази, за да се произнесеме. Се приклучувам кон барањето, не за да се спречи постапката, туку за да ја запазиме законитоста. Ако немаме законита постапка, не може да имаме ниту законита одлука – рече Шилегов.

И други бранители истакнаа дека сега Јавното обвинителство практично доставува нов обвинителен акт, а тие не го знаат ни неговиот деловоден број. Истакнаа дека не знаат кои сведоци се редуцирани од предложените 282 сведока.

Адвокатката Софија Лаличиќ истакна дека има пропусти во доказите, односно дека дел од доказите се разговори меѓу вработени во Министерството на економија водени на албански јазик, а во списите нема превод. Таа истакна дека поради тоа тие не се запознаени со содржината на тој доказ.

Бранителката Сузана Атанасовска Јошевска пред Судот истакна дека на 14 октомври приговарала за неуредноста на доказниот материјал, доставен од Обвинителството.

– Во листата на докази, доказите се групирани и нумерирани, а истото не соодветствува со она што ни беше доставено како електронски докази на УСБ. Кога, согласно со денешната одлука за спојување, ќе ни се доставува и ревидираната и интегрирана листа на докази, предлагам да се задолжи ЈО да ни ги достави доказите во иста форма и во хартиена верзија, за да знаеме за кој доказ конкретно се работи – рече таа.

Судот го одби барањето за одложување на рочиштето 

Судечкиот совет се повлече за да одлучи по барањата за одложување на судењето. По советувањето, Судечкиот совет донесе решение дека го прифаќа предлогот на Јавното обвинителство за изведување интегриран текст на обвинителниот акт и листата на докази, согласно решението на судот за спојување на постапката со цел поефикасно и поекономично водење на постапката како една постапка.

Судот смета дека со тоа нема да биде повредено ниедно право на ниедна странка во постапката од причини што Обвинителството најави дека пред да почне со својот воведен говор ќе го истакне интегрираниот текст и листата на докази која судот дословно ќе ја забележи во записникот кој потоа ќе биде доставен до сите странки во постапката.

Доколку странките имаат приговори на така поставените докази, можат откако ќе ја видат оваа листа на докази на ЈО, да ја прошират и да ја изменат својата листа на докази и на судот да му ја достават на следната расправа по давање на своите воведни говори.

Ваквата одлука на Судот е поради тоа што, како што велат, во интегрираниот текст нема измени на ниедно дејствие, на ниеден обвинет и нема промена на квалификацијата за ниеден обвинет, ниту има нови докази кои претходно не се составени и со кои одбраната не е запознаена.

Советот го задолжи Обвинителството да изврши превод од албански на македонски јазик за дел од доказите и да се достави во доволен број примероци за сите странки.

Судот донесе решение денешната расправа да се одржи.

The post ПОВЕЌЕТО БРАНИТЕЛИ ПОБАРАА ДА СЕ ОДЛОЖИ СУДЕЊЕТО ЗА „КОЧАНИ“ Судот не дозволи рочиштето да се одложи поради спојување на обвиненијата appeared first on plusinfo.mk.

Обвинети се затоа што во периодот од 2012 до 16.3.2025 година во Кочани, Виница, Штип и во Скопје, како службени и одговорни лица, воопшто не постапиле според прописите и техничките правила за заштита и со тоа предизвикале опасност за животот на луѓето. Првообвинетите со употреба на експлозивни материи – пиротехника во затворен простор предизвикале пожар во „Клуб Пулс“ во Кочани, на место каде што биле собрани поголем број луѓе, при настап на музичката група ДНК, во целосно небезбедни и опасни услови, а поради пропустите на службените и одговорните лица, кои придонеле објектот со дозвола за лесна индустрија да функционира како угостителски …

Ова е воведот и суштината на обвинението против 34 физички и 3 правни лица кои се обвинети за Тешки дела против општата сигурност за катастрофалниот пожар во дискотеката „Пулс“ во Кочани на 16 март 2025 година, во кој загинаа 63 млади луѓе, од кои 6 малолетни, а 210 лица беа повредени, од кои 156 потешко.

На обвинителната клупа во скопскиот Кривичен суд ќе седнат сопственикот на дискотеката, проектанти, инспектори, поранешни градоначалници на Кочани, поранешни министри и други. На сите им се заканува казна затвор од 3 до 20 години, затоа што пропуштале да спроведат надзори и контроли и на тој начин дошло до катастрофалните последици.

Ќе суди Диана Груевска Илиевска, а обвинението ќе го застапуваат 15 обвинители. Судењето ќе се одвива во новата дигитализирана судница во рамките на затворот Идризово, која има капацитет за вакви судења со голем број обвинети, оштетени и заинтересирана јавност.

• СУДЕЊЕТО ЗА КОЧАНСКАТА ТРАГЕДИЈА ЌЕ БИДЕ ЕКСПРЕСНО? Сите актери се обврзаа да нема застој во процесот

Првообвинет за пожарот е сопственикот на кабарето Дејан Јованов – Деко, кој со неговиот син Михајло Јованов и двајца членови на ДНК, кои загинаа во пожарот, ги внеле пиротехничките средства.

Обвинет е и братот на Деко, кој продал влезници над капацитетот на објектот, како и Горазд Милковски, сопственик на објектот во кој работела дискотеката.

Обвинителството ја товари и Милка Едровска, сопственичка на проектантската фирма „Венци проект“, затоа што во 2012, иако знаела дека на таа локација не може да има дискотека и дека објектот не ги исполнува условите, изготвила основен проект.

Обвинети се четворица службеници од Државниот пазарен инспекторат и локалните градежни инспектори затоа што не го затвориле дивиот објект.

Тројцата поранешни градоначалници на Кочани, Ратко Димитриевски, Николчо Илијев и Љупчо Папазов се товарат дека знаеле дека според деталниот урбанистички план на таа локација не може има кабаре, не им наредиле на градежните инспектори да направат надзор, а знаеле дека дискотеката работи затоа што на општинската сметка легнувале по 2.000 евра од дискотеката.

Агенцијата која ја обезбедувала дискотеката, „Рубикон“, не направила безбедносна проценка и затоа се обвинети директорот Јане Јанчевски и четворица обезбедувачи, кои дозволиле влез на малолетници и не спречиле да биде внесена пиротехника.

Обвинението ги опфаќа и поранешните директори на Дирекцијата за заштита и спасување Шабан Салиу, Аднан Џаферовски, Беким Максути, Џеват Селами, како и еден инспектор во оваа институција, Љупчо Грнчиштанов. Обвинети се и службениците од Министерството за економија, каде што се давало поткуп за кабарето да добие лиценца, Џеваир Камбери, Размена Чекиќ-Дуровиќ. Обвинението товари и двајца поранешни министри за економија – Крешник Бектеши и Валон Сарачини затоа што не иницирале вонреден надзор.

Во дискотеката 13 години се случувале системски пропусти, непостапувања и корупција. Пропустите што доведоа до ужасна смрт на 63 млади луѓе и тешки повреди и инвалидитет на десетици луца, детално се опишани на 166 страници од обвинителниот акт. Обвинителството за сите пропусти и за пожарот има обемен доказен материјал, со над 1.440 докази и 283 сведоци.

Во обвинението е опишано дека два и пол часа пред да избие пожарот, вокалистот Владимир Блажев – Панчо и Мартин Атанасовски-Буцо, поставиле три т.н. „пиротехнички фонтани“ кои се активираат истовремено.

„Околу 02.32 часот, како дел од претходно утврдени визуелно сценски ефекти кои започнувале при изведба на песната ’Што сака нека биде‘, сега покојниот Мартин Атанасовски-Буцо со далечински управувач ги активирал пиротехничките фонтани“, пишува во обвинението.

Во дискотеката имало 672 лица. Пожарот се проширил стихијно, со многу чад и висока температура и настанало масовно, неконтролирано бегање во паника. Присутните практично немале од каде да се евакуираат, затоа што немало други излези, а влезната врата не била доволно широка.

Во паниката и турканицата 50 млади луѓе умреле од труење со јаглероден моноксид, 6 лица се задушиле поради притисок на градниот кош, а дел од загинатите настрадале од термички оштетувања на горните дишни патишта.

Голем дел од оние што успеаја да се спасат, добија изгореници од втор и трет степен, нагмечувања, скршени ребра, оштетен вид, закиселување на крвта и други повреди.

ДВАЈЦА ПОРАНЕШНИ МИНИСТРИ ЗА ЕКОНОМИЈА КУРТУЛИЈА ОД ОДГОВОРНОСТ ЗА ТРАГЕДИЈАТА ВО „ПУЛС“ Секој од 34 обвинети можел да го спречи пожарот, заедно ќе одговараат за смртта на 62 млади луѓе

The post СУДЕЊЕ ЗА ПОЖАРОТ ШТО УБИ 63 МЛАДИ ЛУЃЕ Почнува судскиот процес за трагедијата во дискотеката „Пулс“ во Кочани appeared first on plusinfo.mk.