Одложена е јавната расправа во Апелацискиот суд на која требаше да се разгледуваат жалбите за пресудените казни доживотен затвор за убиствата на Вања Ѓорчевска и на Панче Жежовски, извршени во ноември 2023 година, како и жалбата на Јавното обвинителство за ослободителната пресуда на таткото на Вања, Александар Ѓорчевски.

Судечкиот совет извести дека стигнал допис од болница дека осудениот Боре Видевски е на лекување, поради што судењето ќе се одложи. Нов термин е 11.5.2026 година во 9.30 часот.

Неправосилно осудените не беа спроведени од притвор.

Судиите го прашаа адвокатот на Видевски, Бојан Манев за неговата здравствена состојба. Бранителот рече дека тој е задржан на лекување поради неговите параметри на креатин, кои се 10 пати над нормалните, поради што има континуирана потреба од дијализа.

Потоа даде изјава пред судот, во која нагласи дека Видевски не добива соодветна нега во притворот во Шуто Оризари.

– Видевски не можеше денеска да присуствува затоа што неговата здравствена состојба е до толку влошена, што пред два дена изгубил свест во притворското одделение во истражниот затвор Скопје, поради тоа што тој живее со еден бубрег, кој му е пресаден. Не е лекуван континуирано во затворски услови, затоа што таму и нема услови да биде лекуван, оти има потреба од дијализа. Тој бил однесен на лекар во август 2025 година, па потоа дури на 17 март оваа година. Според параметрите, неговиот креатин, ако нормална вредност е од 50 до 100, неговата беше 600, а пред два дена му била 850. Во таква состојба тој се онесвестил во притворот, по што е однесен на Клиниката за нефрологија во Скопје и во моментов е на болничко лекување – рече Манев.

На новинарско прашање дали адвокатот ќе обезбеди согласност од Видевски да не мора да присустува, за да не се одлагаат натамошните рочишта, бранителот рече дека ќе се обиде да обезбеди согласност.

– Но, овде проблемот е системски, затоа што доколку тој има соодветен болнички медицински третман, ќе нема проблем да присуствува на рочиштата. Тој моментално е со мерка притвор. Но, притвор е и Шутка, но и болнички притвор и домашен притвор. Ако има соодветен болнички третман, тој ќе присуствува на рочиштата во Апелација. Не е проблем да се обезбеди согласноста – рече Манев.

На прашање дали со ова се обидуваат да издејствуваат куќен притвор за Видевски, Манев рече дека притворот е мерка за обезбедување присуство и дека таа мерка може да се издржува и во болница и во домашни услови. Додаде дека институциите можат да го контролираат секој вид притвор, а присуството на Видевски може да биде обезбедено.

– Не може да има соодветно лекување во затворскиот притвор, колку и да тврдат дека тој е континуирано лекуван, не е. Ако му дале по некој антибиотик или му зеле крв во притворот, тоа не е континуирано лекување – рече Манев.

За грабнувањето и за суровото убиство на 14-годишната Вања Ѓорчевска од Скопје, извршено со пиштол на 27 ноември 2023 година во месноста Бразда на Скопска Црна Гора и за убиството на 74-годишниот велешанец Панче Жежовски, Кривичниот суд во јуни 2025 година ги осуди на доживотен затвор Љупчо Палевски Палчо, како директен извршител и Велибор Манев, Боре Видевски и Влатко Кешишев како негови помагачи. Обвинителството го гонеше и таткото на Вања, Александар Ѓорчевски дека им помагал на грабнувачите со тоа што им оддал информации кога неговата ќерка ќе оди сама на училиште, но судијата Ивица Стефановски го ослободи од обвинението затоа што ЈО не го докажа тоа. Неправосилно осудените Палевски, Манев, Видевски и Кешишев добија ослободителни пресуди за делото грабнување на Жежовски, затоа што според Судот, Обвинителството не приложи јасни докази за тој дел од обвинението.

Обвинението го застапуваа Жаклина Крстевска Јосифовска и Ана Стојковиќ Диммитровска.

На судењето делото го признаа Манев и Кешишев, а првообвинетиот Палевски и Видевски го негираа.

Пиштолот со кој се извршени убиствата до денеска не е пронајден, а во процесот не беа точно расчистени ниту мотивите за убиството на детето, за кое Манев сведочеше дека ја грабнале по грешка, односно таргет им било друго лице.

The post ОДЛОЖЕНА ЈАВНАТА РАСПРАВА ВО АПЕЛАЦИЈА ПО ЖАЛБИТЕ НА УБИЈЦИТЕ НА ВАЊА ЃОРЧЕВСКА И НА ПАНЧЕ ЖЕЖОВСКИ Осудениот Боре Видевски е на болничко лекување appeared first on plusinfo.mk.

Судскиот совет денеска ја отфрли како неоснована претставката од неправосилно осудениот Љупчо Палевски Палчо, со која тој се жали дека судијата на Кривичниот суд Ивица Стефановски предолго време ја изготвувал пресудата против него. Со претставката Палевски изразил незадоволство и од целокупното постапување на судијата Стефановски во предметот.

Палевски на 25 јуни 2025 година беше осуден на доживотен затвор за убиството на 14-годишната Вања Ѓорчевска од Скопје и на 74-годишниот Панче Жежовски од Велес. Истата казна ја добија и неговите соучесници и сопартијци од Десна, Велибор Манев, Боре Видевски и Влатко Кешишев. Обвинетиот татко на Вања, Александар Ѓорчевски, пак, беше ослободен од обвинението дека помогнал во киднапирањето на неговата ќерка, затоа што против него Јавното обвинителство немаше докази.

Судијата Стефановски како одговор до Судскиот совет доставил писмено изјаснување во кое посочил дека станува збор за исклучително сложен предмет, со обемен доказен материјал, голем број сведоци и повеќе обвинети. Тој навел и дека во периодот на изготвување на пресудата имал здравствени проблеми поради кои бил отсутен од работа, како и дека постапувал и по други предмети.

По расправата, членовите на Судскиот совет едногласно ја отфрлија претставката. Пресудата била изготвена на 14 ноември и членовите на Совет ја отфрлија жалбата како неоснована бидејќи се работи за сложен предмет, а во периодот имаше и судска ферија, период кога судиите не постапуваат.

Пресудата на првостепениот суд веќе е пред Апелацискиот суд, по жалбите на адвокатите на обвинетите, на самиот Љупчо Палевски и на Јавното обвинителство, кое, пак, се жали на ослободителната пресуда за Александар Ѓорчевски. Се чека Апелација да ја закаже седницата на која ќе одлучува за пресудата.

Во жалбата до Апелација Палевски бара да биде ослободен од вина или предметот да се врати на повторно судење.

Вања Ѓорчевска и Панче Жежовски беа грабнати и убиени со пиштол во ноември 2023 година.

Обвинителството не расчисти кој е мотивот за злосторствата, ниту го најде оружјето со кое се извршени свирепите убиства. Обвинителството освен што не го докажа учеството на татото на Вања, не докажа ниту дека четворицата соучесници го грабнале Панче Жежовски, па за тој дел од обвинението беа ослободени.

The post ПАЛЕВСКИ СЕ ЖАЛЕЛ ДЕКА СУДИЈАТА СТЕФАНОВСКИ ПРЕДОЛГО ЈА ПИШУВАЛ ПРЕСУДАТА ЗА УБИСТВАТА НА ВАЊА И НА ПАНЧЕ Судскиот совет ја одби претставката, судијата се оправда со здравствени проблеми appeared first on plusinfo.mk.

Предметот за свирепите убиства на Вања Ѓорчевска (14) од Скопје и на Панче Жежовски (74) од Велес во моментот е на разгледување во Вишото јавно обвинителство, откако пристигнаа жалбите на пресудите во Апелацискиот суд. Судија известител во Апелација за предметот е Ѓоко Ристов, кој минатата недела го испратил комплетниот предмет во Вишото јавно обвинителство Скопје на мислење. Осудените бараат пресудите да се укинат и предметот да се врати на повторно судење.

За двете убиства неправосилно се осудени на доживотен затвор Љупчо Палевски – Палчо, Велибор Манев, Боре Видевски и Влатко Кешишев. За грабнувањето на Вања се осудени на 10 години затвор, а за грабнувањето на Панче се ослободени од вина, затоа што, според пресудата на судијата Ивица Стефановски од Кривичниот суд, Јавното обвинителство за ова дело не обезбедило докази.

Обвинителството не обезбеди докази ниту за таткото на Вања, Александар Ѓорчев, кого го обвини за помагање во грабнувањето на неговата ќерка.

До Апелација по пресудата стигнаа 6 жалби. Обвинителството се жалеше на ослободителната пресуда за Александар Ѓорчевски, на што неговиот бранител Владимир Туфегџиќ напиша соодветен одговор.

• ТУФЕГЏИЌ ОЧЕКУВА АПЕЛАЦИЈА ДА ЈА ПОТВРДИ ОСЛОБОДИТЕЛНАТА ПРЕСУДА ЗА ТАТКОТО НА УБИЕНАТА ВАЊА Правдата не смее да биде жртва на сензационализам

Жалба напиша и првообвинетиот Палевски, која, како што вели неговиот бранител Јовица Страшевски, брои над 100 страници.

Останатите 4 жалби се од бранителите на четворицата осудени.

Адвокатот Страшевски вели дека и во пресудата има многу суштествени повреди во постапката, покрај повредите во текот на самата постапка, на кои реагираше одбрана при судењето.

– Најдовме дел од докази кои не се изведени во постапката, а се напишани во пресудата. Има докази кои се побиваат со исказ на обвинет, а исказ на обвинет не може да е доказ, бидејќи истиот може и да не ја зборува вистината, доказ се побива со поткрепен доказ. Побаравме јавна седница на Апелацискиот суд, на која ќе имаме и дополнение на жалбените наводи, бидејќи имавме краток рок од 15 дена за жалбата. Во жалбата побаравме пресудата да биде укината и предметот биде вратен на повторно судење или да се донесе ослободителна пресуда – вели Страшевски.

По мое мислење, додава тој, пресудата е само еден расказ без докази.

– Има многу голема разлика во времињата кои се користени како докази. Сè што имаме да дополниме покрај поднесените жалби ќе биде изнесено на јавната седница пред Апелацискиот суд – вели Страшевски.

При изрекувањето на првостепената пресуда судијата Стефановски рече дека на 27 ноември 2023 година, рано наутро, Видевски и Манев, по упатства на Палчо, ја грабнале Вања од влезот на нејзината зграда, со намера за неа да изнудат пари од член на семејството. Кога излегла од лифтот за да оди на училиште, ја фатиле за устата и за половината, ја совладале, Манев ја врзал за рацете и за нозете, а Видевски ѝ се заканил да не вика оти ќе пукаат. Потоа Манев ја изнел од зградата, каде ги чекал Влатко Кешишев, и ја ставил во гепекот „цитроенот“ на Панче Жежовски, кого го убиле 5 дена претходно, на 22 ноември во Велес. По насока на Палевски, кој ги чекал со возилото „рено кангу“ ја однеле преплашената Вања на местото Дупки кај селото Бразда, каде Палевски ја убил со куршум во главата. Останатите тројца ја закопале, по што отишле во седиштето на партијата Десна.

ДОЖИВОТЕН ЗАТВОР ЗА ПАЛЧО, МАНЕВ, КЕШИШЕВ И ЗА ВИДЕВСКИ Таткото на Вања е ослободен од обвинението

The post ПАЛЧО НАПИШАЛ ЖАЛБА НА 100 СТРАНИЦИ Адвокатите на осудените бараат ново судење за убиствата на Вања и на Панче appeared first on plusinfo.mk.

Обвинението против Александар Ѓорчевски е фијаско, тенденциозно, исконструирано и без докази, пишува неговиот бранител Владимир Туфегџиќ до Апелациониот суд во одговор на жалбата на Основното јавно обвинителство Скопје за ослободителната пресуда на Кривичниот суд, по обвинението дека Ѓорчевски поради користољубие помогнал во грабнувањето на неговата 14-годишна ќерка Вања Ѓорчевска.

Вчера навршија две години од грабнувањето и убистввото на девојчето, за што Судот на 25 јуни оваа година ги осуди на доживотен затвор Љупчо Палевски Палчо, Велибор Манев, Боре Видевски и Влатко Кешишев. Казна доживотен затвор добија и за убиството на велешанецот Панче Жежовски (74), извршено на 24 ноември 2023 година во околината на Велес, три дена пред убиството на Вања.

Но, за обвинението за грабнувањето на велешанецот четворицата осудени – беа ослободени, оти ЈО не го докажало тој дел од обвинението.

Туфегџиќ, кој бара да се одржи Јавна седница на жалбениот совет на Апелација, потенцира дека тенденциозноста на Обвинителството Ѓорчевски, меѓу другото, се гледа и во тоа што ЈО не поднесе жалба за ослободувањето на Палевски, Манев, Видевски и на Кешишев за делото Грабнување, туку се жалеле само за таткото.

„Во образложението на пресудата судот резимира дека доказите на Обвинителството се само посредни и не се со доволен доказен капацитет да го потврдат постоењето на кривичното дело и кривичната одговорност на обвинетиот, односно да наметне единствен разумен заклучок дека обвинетиот го сторил кривичното дело. Во оваа насока застапнкот на обвинението потврди дека не поседуваат доказ за директна комуникација помеѓу обвинетиот Александар Ѓорчевски и обвинетиот Љупчо Палевски, поточно конкретен доказ дека Ѓорчевски на Палевски му дал упатства за времето кога детето ќе излезе само од домот за да оди на училиште“, пишува Туфегџиќ во жалбата.

Одбраната, додава бранителот, со предложените вербални и материјални докази докажа дека обвинението е во целост неосновано, неаргументирано, паушално и засновано на претпоставки кои не наоѓаат поткрепа во доказите.

„Неподнесувањето жалба за пресудата за грабнувањето на Жежовски е кулминација на недозволена пристрасност, личен анимузитет и нетрпеливост на застапникот на обвинението кон обвинетиот Александар Ѓорчевски, присутна со нескриена жестина во текот на целата кривична постапка, за кое нешто е доволно жалбениот совет да ги прегледа снимките од судењата. Особено од распитот на обвинетиот, кој по својата суштина не беше распит заради дискредитација на обвинет врз основа на докази, туку распит заради понижување на јавна сцена, пред јавноста, семејството и малолетната ќерка Миња и уривање на секое човеково достоинство и личност на обвинетиот. Тоа е уште еден доказ дека поднесеното обвинение е целосно фијаско, бидејќи клучната теза и теорија на случај застапникот на обвинението не успеа да ја докаже, а тоа е мотивот-користољубие. Не изведе докази од кои може да се извлече логичен заклучок дека таткото Александар со умисла им помогнал на обвинетите за да извршат грабнување на детето Вања, а со намера некој друг-член на нејзиното потесното семејство да присилат да даде парични сретства за откуп“, пишува Туфегџиќ.

Тој додава и дека во прецизираниот обвинителен акт во делот на детето Вања, на обвинетите не им става се на товар убиство од користољубие, туку квалифицирано убиство на малолетно лице, па е нејасна теоријата на докажувањето на користољубието како основен мотив.

Туфегџиќ посочува и дека во завршните зборови самите обвинителки потврдија дека немаат докази со кои се докажува комуникацијата и поврзаноста помеѓу таткото Александар и Љупчо Палевски.

„Кривичниот суд донесе правична и законита одлука. Обвинителството не успеа да докаже ниту мотив, ниту умисла, ниту било каква комуникација меѓу Александар и групата што го изврши злосторството. Сè што понудија беа претпоставки, лични перцепции и погрешни толкувања на паниката и однесувањето на татко што го бара своето исчезнато дете“, вели Туфегџиќ, повикувајќи се на наводите од поднесениот одговор на жалбата.

Тој потенцира дека и сведоците од МВР изјавија дека немале ниту еден доказ што го поврзува Александар со делото. Признаа дека нивните заклучоци биле субјективни, а не базирани на факти, посочува адвокатот.

Адвокатот истакнува дека доказите во постапката, наместо вина, ја потврдуваат улогата на Александар како оштетен и избезумен родител, кој си го бара исчезнатото дете.

„Тој е жртва во целиот трагичен настан. И тој, и мајката, и нивното семејство. Обвинението неправедно го претвори неговиот очај во сомнеж“, вели тој. објави Скопје1.мк

Адвокатот завршува со став дека јавната седница е неопходна, за јавноста да ја чуе вистината без шпекулации и погрешни интерпретации.

„Граѓаните заслужуваат да видат дека правдата не смее да биде жртва на сензационализам. Александар е невин човек. Очекувам Апелација да го потврди тоа.“

The post ТУФЕГЏИЌ ОЧЕКУВА АПЕЛАЦИЈА ДА ЈА ПОТВРДИ ОСЛОБОДИТЕЛНАТА ПРЕСУДА ЗА ТАТКОТО НА УБИЕНАТА ВАЊА Правдата не смее да биде жртва на сензационализам appeared first on plusinfo.mk.

Републичкиот јавен обвинител Љупчо Коцевски нема да ги викне на рапорт обвинителките Жаклина Крстевска Јосифовска и Ана Стојковиќ Димитровска, ниту шефот на скопското обвинителство Гаврил Бубевски за начинот на кој го водеа предметот со убиствата на Вања Ѓорчевска и на Панче Жежовски, во делот со обвинението против таткото Александар Ѓорчевски, кого тие без докази го обвинија дека помагал во грабнувањето на неговата ќерка и година и пол го држеа во притвор, а Кривичниот суд му пресуди дека не е виновен и го ослободи. Обвинителството смета дека постапката е водена правилно!

ЈО е упорно дека не му биле прекршени правата на Александар!

Плусинфо постави повеќе прашања за начинот на кој обвинителките ја водеа истрагата и докажувањето на вината пред Судот, како и дали ЈО планира да ја прошири истрагата, со оглед дека останаа повеќе неодговорени прашања и покрај четирите пресуди доживотен затвор за Љупчо Палевски Палчо, Велибор Манев, Боре Видевски и за Влатко Кешишев.

Од Обвинителството не сметаат дека ги прекршиле правата на ослободениот татко Александар Ѓорчевски, кој пред судот сведочеше дека му е извршена брутална тортура од полицијата и тврдат дека доказите се прибавени на законски начин.

– Јавното обвинителство од самиот почеток до крај постапува исклучиво во рамките на своите законски надлежности и со максимално почитување на правата на сите страни во постапката и на исклучително високиот јавен интерес за овој предмет. Потврда за тоа се осудителните пресуди за четири лица, кои врз основа на поднесеното обвинение и доказите прибрани со наредби на Обвинителството, Судот ги огласи за директно виновни за најтешкото кривично дело во македонското законодавство и им изрече казна доживотен затвор – одговорија од ЈО за Плусинфо.

Во текот на целата постапка, додава Обвинителството, ниту обвинетите, ниту нивните бранители не побараа извојување на доказни материјали, вклучително и на исказите дадени пред јавен обвинител, врз основа на некаква повреда на членот 12 од Законот за кривична постапка (ЗКП), односно во однос на законитоста на кој било од прибраните докази.

Признание изнудено со тортура не важи на суд!

Според член 12, кој се однесува на законитоста на доказите, забрането е да се изнудува од обвинетиот или од друго лице кое учествува во постапката признание или некаква друга изјава, а доказите што се прибавени на незаконит начин или со кршење на слободите и правата не можат да се користат и врз нив не може да се заснова судската одлука.

Бранителот на Александар, Владимир Туфегџиќ, во повеќе наврати и за време на судењето и во изјави пред медиумите рече дека врз неговиот клиент е вршена силна тортура и дека доставил докази за тоа. Но, обвинителките упорно тврдеа дека тортура немала, како врз Александар, така и врз останатите кои сведочеа дека се тепани – Манев, Видевски и Кешишев.

– За секој од обвинетите во предметот Обвинителството презентираше докази пред судот, обезбедени во законита постапка, и тоа вербални искази снимени согласно од одредбите од ЗКП, во кои во ниту еден момент никој од обвинетите не изнесе наводи за тортура во полициската постапка, како и соодветни материјални докази за поткрепа на наводите од обвинението. Напомнуваме дека подоцна, во текот на судската постапка, обвинетите имаат право да го менуваат исказот, па дури и да изнесуваат невистини во своја одбрана, поради што Законот предвидел можност за визуелно и тонско снимање на нивните искази пред јавниот обвинител. Бидејќи истите беа дадени без присила, со признание од двајца за детали околу начинот на извршување на делото, Јавното обвинителство има обврска да ги земе како релевантен доказ, во корелација со другите факти, особено имајќи предвид дека тие во целост беа на иста линија со другиот доказен материјал – објаснува ЈО.

Останувале посветени, ама и досегашните индиции ги игнорираа

На прашањето на Плусинфо дали Јавното обвинителство ќе ја прошири истрагата или ќе отвори нова, за да одговори на прашањата дали осудените убијци имале логистика во институциите, дали мотивот е тероризам, дали има и други членови на „групата за грабнување и за убивање луѓе“, како што се покажа и со петтото лице, Зоран Давитков, кој беше посочен дека ги скрил или ги уништил пиштолот и радиостаниците што се користени за злосторствата, ЈО штуро одговори дека остануваат посветени.

– Јавното обвинителство останува посветено на натамошно истражување на овој настан, сè додека има какви било индиции за можна инволвираност на други лица – одговорија од Јавното обвинителство.

Оливер Спасовски ја доведе јавноста во заблуда

Владимир Туфегџиќ, бранителот на ослободениот Ѓорчевски вели дека не е изненаден од ставот на Обвинителството и дека очекува притисок од Обвинителството во жалбената постапка по секоја цена таткото на детето да биде осуден.

– Имено, во конкретниот случај токму од прес конференцијата на министерот Оливер Спасовски јавноста беше информирана дека истражните органи имаат цврсти докази и телефонска комуникација помеѓу таткото на детето и Љупчо Палевски и сите ние поверувавме во тоа. Не е дозволено да се доведува во заблуда јавноста со некакви теории за логични заклучоци, бидејќи самиот јавен обвинител во завршните зборови потврди дека докази за таква комуникација не постојат и поради тоа Судот го ослободи Александар. Обвинителството не успеа да го докаже ниту кривичното дело грабнување на Панче Жежовски и затоа сите четворица обвинети се ослободени за ова кривично дело, иако признаа вина во овој дел – вели Туфегџиќ.

Доказите на обвинителството му ги дадоа Велибор Манев и Влатко Кешишев, додава тој, буквално водејќи ги за рака обвинителите од доказ до доказ.

– Тие ги открија местата и телата на жртвите со целосен опис на дејствијата на секој поединечно, а факт е дека се докажа дека токму овие обвинети не укажаа на постоење на доказ за комуникацијата на таткото, едноставно затоа што такво нешто не постои. За каков логичен заклучок говори обвинителот кога нема ниту еден доказ за комуникација на таткото со обвинетите ниту на 24 ноември ниту на 27 ноември 2023 година, ниту има доказ за постоење комуникација во период од најмалку еден месец наназад, бидејќи за вакви кривични дела претпоставка е постоење на претходен договор и траен однос на извршителите и соизвршителите – вели Туфегџиќ.

Дали Стојковиќ Димитровска вака бранеше од тортура и додека работеше во Хелсиншки комитет?

Обвинителството, додаде тој, не најде за сходно да ѝ укаже на јавноста дека неоснованото барање за продолжување притвор по донесена ослободителна пресуда било ненамерен превид, напротив, тие се убедени дека така е исправно.

– Во врска со тортурата врз Александар има извештај од Хелсиншкиот комитет за човековите права со дозвола на судија на претходна постапка, кој е доставен до Обвинителството. Јавниот обвинител Ана Стојковиќ Димитровска пред да стане јавен обвинител беше правник токму во истиот Хелсиншки комитет, па затоа користам прилика јавно да ја прашам, дали вака ги застапуваше граѓаните кога бараа заштита на човековите права и поради тортура додека беше правник во комитетот? Конечно, чекаме одговор и резултати од оваа истрага која мора да продолжи со други луѓе, на суштинските прашања, за мотивот, списоците за ликвидација и дали сме сигурни дека немало и други обиди за грабнување на други луѓе во минатото – вели бранителот Владимир Туфегџиќ за Плусинфо.

Овие прашања заслужуваат одговор

Освен за проширување на истрагата и за одговорноста на обвинителките, Плусинфо постави и други прашања до Јавното обвинителство, но оттаму не дадоа одговор.

Прашавме: Како ќе влијае врз предметот новата истрага за осомничениот Зоран Давитков? Дали републичкиот обвинител Љупчо Коцевски смета дека обвинителките Жаклина Крстевска Јосифовска и Ана Стојковиќ Димитровска правилно ја водеа истрагата, особено што во услови на непронајден пиштол со кој се убиени жртвите, тие не придадоа значење на сведочењето на Манев дадено во судницата во март дека постои петто лице, нивен соработник, а откако Манев во својот завршен збор го посочи кријачот на пиштолот со име и презиме, практично го принуди ЈО да го приведе на распит Зоран Давитков? Зошто обвинителот Коцевски не реагираше порано на непостапувањето на двете обвинителки? Дали Јавното обвинителство не реагираше на исказите на четворица од обвинетите дека им е вршена тортура, со цел да им се изнуди признание, затоа што е можно дека признанијата навистина се изнудени со тортура, а таквите признанија не важат на суд?

Плусинфо праша и дали ЈО ќе истражи зошто двете обвинителки досега не постапиле по известувањето од 18.1.2024 година испратено од бранителот Владимир Туфегџиќ за доставување медицинска документација за констатирани повреди од вршење тортура врз сега ослободениот Александар Ѓорчевски? Зошто обвинителките до денешен ден не го проследиле тоа известување до надлежното ЈО за гонење организиран криминал и корупција, во одделението кое постапува за сторени кривични дела од страна на полицијата? Прашавме и дали двете обвинителки ќе бидат повикани во републичкото обвинителство да го објаснат начинот на водењето на постапката, темелите на обвинението, градењето на теоријата на случај и докажувањето, особено што имаат ослободителна пресуда за Ѓорчевски, но и за делото квалификувано како грабнување од користољубие во случајот со киднапирањето на Панче Жежовски?

Јавноста има право да знае како работи Обвинителството, особено во случаи со вакви тешки обвиненија, како кон таткото на убиеното дете, кое не го докажаа на суд

The post КОЦЕВСКИ НЕМА ДА ГИ ВИКНЕ НА РАПОРТ ОБВИНИТЕЛКИТЕ ШТО ОБВИНИЈА НЕВИН ТАТКО Ќе одговара ли некогаш обвинител кој гони без докази? appeared first on plusinfo.mk.

По денешната пресуда доживотен затвор за четворицата убијци на Вања Ѓорчевска (14) и на Панче Жежовски (74) нивните бранители најавија жалби пред Апелацискиот суд.

Јовица Страшевски, адвокат на Љупчо Палевски Палчо не сакше да ја коментира пресудата.

– Наше видување е дека како што почна, така заврши овој циркус. Обвинителството беше без ниту еден доказ, а Судот врз основа на напишаното во обвинителниот акт донесе пресуда. Немаше ниту разумен сомнеж. Јавното обвинителство беше конфузно. Во завршниот збор, целиот акцент го стави на таткото на детето, кој денеска, според мене, доби заслужена ослободителна пресуда. Јавното обвинителство немаше докази против него, исто како и за мојот клиент – рече Страшевски.

Тој додаде дека ќе почека да ја види пресудата и образложението и тоа како судот ги изнел изнесените докази.

– Од она што го слушнавме мислам дека во судот не е ценет ниту еден доказ на одбраната, иако имаше доста. Судот нема направено оценка ниту на сите докази посебно, ниту на сите заедно како целина. Пресудата за Љупчо Палевски не е издржана – изјави Страшевски.

И Бојан Манев, адвокат на Боре Видевски најави жалба.

– Во објавата на пресудата слушнавме два непобитни факти. Судот ги ослободи обвинетите од одговорноста за грабнувањето на Панче Жежовски, па јас би прашал, како го убија, а не го грабнаа? Второ, судот во својата објава вели дека Панче е убиен во периодот околу 10 до 10.30 часот, а цела Македонија виде снимка дека во 12.30 човекот е жив, на бензиската станица Лукоил во Велес. Конфузното обвинение беше само препишано во пресудата. За доказите, знам дека не постои ниту еден доказ на кој се темели обвинението – рече Манев.

Игор Ефремов, адвокат на Влатко Кешишев рече дека судот не ги зел целосно во предвид олеснителните околности.

– Судот не го зел в предвид особено фактот дека ако не беше Кешишев немаше да бидат пронајдени ниту телата, ниту ќе се откриеше наинот на извршување на грабнувањата. Особено сметам дека судот не поклони доволно верба на исказот на Кешишв во делот дека дејствувал по страв и наредби на Палевски. Кога ќе го добиеме образложението на пресудата, ќе поднесеме жалба – рече адвокатот Ефремов.

The post АДВОКАТИТЕ НА ОСУДЕНИТЕ УБИЈЦИ ЌЕ СЕ ЖАЛАТ ПРЕД АПЕЛАЦИЈА За Страшевски судењето е циркус, Манев не видел ниеден доказ, а Ефремов бара олеснителни околности за Кешишев appeared first on plusinfo.mk.

Денеска нема простор за победничка еуфорија, Кривичниот суд донесе законита одлука, меѓутоа оваа одлука по своја суштина е празна затоа што не ги добивме одговорите на три клучни прашања – зошто е киднапирано и зошто е убиено ова дете и зошто по секоја цена се инсистираше Александар да биде дел од оваа постапка, иако од првиот момент се знаеше дека за него нема ниту еден доказ, изјави адвокатот Владимир Туфегџиќ по денешната ослободителна пресуда за Александар Ѓорчевски, татко на убиената Вања Ѓорчевска, кој беше обвинет за помагање на нејзиното грабнување.

Нејзините убијци добија казна доживотен затвор.

– Институциите кои ја раководеле оваа истрага се должни да дадат одговори на овие прашања. Особено на прашањето дали со инволвирањето на Александар во оваа постапка свесно е направен дефокус од она што требало да биде предмет на истрага, а тоа е она што го кажа обвинетиот Велибор Манев уште од почетокот, од 6.12.2023 година, дека од 2022 година се кроеле планови и списоци за киднапирање и за убивање луѓе. Со цел да го остварат тој план, во 2022 година овие лица копале дупки по Македонија. Мислам дека сега е ред и Јавното обвинителство, началникот за сериозен и организиран криминал Дејан Димовски и Музафер Каришиќ и сите овие луѓе кои учествувале во истрагата против Александар, вклучително и службата за државна безбедност, да дадат одговор каде биле, што правеле и како овие лица не се детектирани навреме. Да одговорат и дали овие лица имаат своја логистика некаде во некои институции. Тоа се прашања на кои одговор заслужува да добие пред сè јавноста и ние како општество и како држава, за да бидеме сигурни дека утре ова нема да му се случи на некој друг родител, кој недај боже, ќе му исчезне дете и ќе отиде во полициска станица да пријави и ќе заврши во притвор – изјави Туфегџиќ.

Тој рече дека ќе се консултира со неговиот клиент Александар Ѓорчевски за тоа дали ќе поднесат кривични пријави против јавните обвинителки.

– Тој нема расположение за кривично гонење. По тоа прашање ќе го кажам следново. Јавниот обвинител денеска беше токму онаков каков што беше уште откако почна постапката, потполно конфузен. Денеска побара продолжување на куќниот притвор за Александар, во правна ситуација кога законот тоа изрично го забранува и каде што при носење на ослободителна одлука задолжително и по автоматизам се укинува притвор. Ја видовте конфузијата на двете јавни обвинителки – рече Туфегџиќ.

Во судницата, по ослободителната пресуда за Александар Ѓорчевски обвинителката Жаклина Крстевска Јосифовска побара Кривичниот суд да му ја продолжи мерката куќен притвор до правосилноста на одлуката, согласно закон, а по неа стана втората застапничка на обвинението, Ана Стојковиќ Димитровска и се изјасни дека бараат мерката куќен притвор да се укине, согласно ослободителната пресуда. Бранителот Туфегџиќ се изјасни дека е затечен од различните барања на обвинителките. Судијата Ивица Стефановски рече дека Александар е ослободен од куќниот притвор, а одлуката стапува на сила веднаш.

Во изјавата пред медиумите бранителот Туфегџиќ зборуваше и за тортурата која му е вршена на Александар, со цел да му се изнуди признание.

– Во таа насока, овој јавен обвинител од мене има добиено известување за тортура од 18.1.2024 година, а судијата на претходна постапка има добиено барање за доставување медицинска документација за констатирани повреди од вршење тортура врз Александар од 16.2.2024 година. По ниедно од тие барања не е постапено. Ниту јавниот обвинител кој денеска беше присутен го проследил тоа известување до надлежното ЈО за гонење организиран криминал и корупција кое постапува за сторени кривични дела од страна на полицијата. Се надевам и верувам, и покрај тоа што ЈО самото по своја вина се најде во непријатна ситуација, затоа што поклонија верба, не на докази, туку на лични и субјективни мислења од инспекторите Дејан Димовски и Музафер Каришиќ, дека ЈО има професионален капацитет да ја продолжи истрагата. Тоа го заслужува овој настан како целина. Републичкиот јавен обвинител треба веднаш да преземе мерки и активности да се продолжи истрагата – рече Туфегџиќ.

Доживотна казна затвор им беше изречена на обвинетите Љупчо Палевски, Велибор Манев, Боре Видевски и Влатко Кешишев за убиството на Вања Ѓорчевска и на Панче Жежовски извршени на 27 ноември и на 22 ноември 2023 година. Судот одлучи мерката притвор спрема обвинетите осудени за доживотен затвор да се продолжи до правосилноста на пресудата.

Во обвинението за двојното убиство стои дека обвинетите заедно испланирале грабнување на 14-годишната Вања со цел да присилат член на нејзиното потесно семејство да даде пари за откуп. Грабнувањето на оштетениот Панче Жежовски во Велес, пак, според обвинението, било со намера да го присилат да им го даде неговото возило „цитроен“ за да го користат за грабнување на детето во Скопје. Но, судот пресуди дека ЈО не го докажало делото грабнување поради користољубие во случајот со Панче Жежовски, туку само во случајот со киднапирањето на 14-годишната Вања Ѓорчевска.

The post ОБВИНИТЕЛСТВОТО ДА ИСТРАЖИ ДАЛИ ПАЛЧО И ОСТАНАТИТЕ ИМАЛЕ ЛОГИСТИКА ВО ИНСТИТУЦИИТЕ Туфегџиќ повтори дека не е одговорено клучното прашање – зошто е убиена Вања appeared first on plusinfo.mk.

Судијата Ивица Стефановски денеска во Кривичниот суд ќе ја изрече пресудата за едно од најтешките злосторства во Македонија – за грабнувањата и за ладнокрвната ликвидација на велешанецот Панче Жежовски (74) и на девојчето Вања Ѓорчевска (14) од Скопје, извршени на 22 ноември и на 27 ноември 2023 година. За свирепите злосторства им се суди на првообвинетиот Љупчо Палевски Палчо од Скопје и на неговите сопартијци Велибор Манев и Боре Видевски од Велес и на Влатко Кешишев од Штип. Петтообвинет во предметот е Александар Ѓорчевски, кому му се суди за помагање во грабнувањето на неговата ќерка Вања.

Во завршните зборови застапничките на обвинението, обвинителките Жаклина Крстевска Јосифовска и Ана Стојковиќ Димитровска побараа судот да им пресуди доживотен затвор на четворицата обвинети за убиствата, а на таткото да му пресуди соодветна затворска казна.

Бранителите на обвинетите побараа ослободителни пресуди за своите клиенти.

Измешани емоции на тага, болка, ужас, лутина…

По речиси 40 рочишта, судењето кое траеше 10 месеци стигна до крајот. Процесот беше исклучително тежок, на моменти многу емотивен, особено кога се изнесуваа деталите од злосторството врз детето Вања. Нејзините последни часови од животот беа детално опишувани и од обвинителките и од убијците.

Вања Ѓорчевска, девојче кое било плашливо и мирно, и кое растело под будното око на родителите Зорица и Александар, сурово е оттргната од семејството, а потоа и од овој свет. На убијците ништо не им значеле нејзината младост, нејзините солзи и молбата да ја остават да живее. Според признанието на Манев и на Кешишев, Палчо ладнокрвно ја убил со пиштол. Истрелал куршум во нејзината глава, додека таа клечела на колена, со врзани раце и нозе, беспомошна, без можност да се одбрани – во состојба на избезуменост, паника и огромен страв. Била свесна дека ќе умре, дека младоста ќе ѝ ја однесат четворицата бездушни мажи кои никогаш претходно не ги видела во животот.

Утрото, како што раскажа мајка ѝ Зорица во писмено обраќање до судот, Вања со песна тргнала на училиште, но пред лифтот ја чекале грабнувачите Манев и Видевски. Наместо во училишната клупа, завршила врзана, со залепена уста и стрпана во вреќа за спиење, па во гепекот на „цитроенот“ на убиениот Панче Жежовски. Само таа знае што ѝ минувало во мислите додека киднаперите ја возеле кон Скопска Црна Гора, во атарот на селото Бразда. Кога убиецот Палчо ја прашал кои ѝ се мајка и татко, тоа можеби за миг ѝ дало надеж дека ќе живее, но тој немал милост.

Неговите потчинети слуги, Манев, Видевски и Кешишев не сториле ништо за да го спречат. Палевски 5 дена претходно ладнокрвно го убил Жежовски, а тројцата, иако знаеле дека може да убие пак, не презеле ништо против него. Наводно, само го замолиле да не ја убива. Да сакале, можеле да го совладаат и да го спасат детскиот живот. Но, во злосторството тргнале за да земат пари и не планирале да го лутат опасниот „шеф“.

„Одземање живот на дете не се толерира“

Токму овие околности се причина што Обвинителството бара доживотен затвор за сите четворица.

– Сите докази со логична анализа потврдуваат дека обвинетите ги сториле делата. Долго и темелно се подготвувале. Примарната цел е Вања, сржта се парите, а Панче е средство за остварување на целта. Во нивната умисла е да земат пари. Тие притоа биле согласни со сите последици. Не случајно е одбран Панче, мислеле дека додека сфатат дека го нема, тие ќе ги скријат трагите. Им требал неговиот „цитроен“ со голем гепек. Намерно, целно и умислено го сториле злосторство. Дрскоста е дополнителна што го сториле среде бел ден. Што сакале да постигнат, супериорност? По злосторот ги скриле сите траги, го уништиле и пиштолот. Делата се сторени со умисла, со намера. Жртвите се грабнати на ист начин – загрозени, врзани, во страв. Овие стресови се катастрофална траума од висок интензитет, двете жртви претрпеле тешко страдање. Можеме да претпоставиме колкаво било страдањето на детето со четворица непознати. Кои ја носат некаде и ја убиваат. Самиот факт дека таа е дете од 14 години е доволно за доживотен затвор – рече обвинителката Стојковиќ Димитровска во завршниот збор.

Таа додаде и дека не е нужно да се утврди мотивот, за да се докаже нечија вина.

– Казната според Кривичниот законик е од 10 години до доживотен затвор. Нема олеснителни околности за обвинетите. Сите се во зрела возраст, сите се родители, сакале да се и политички фактор. За сите четворица ЈО бара доживотен затвор. Одземање живот на дете не се толерира – рече обвинителката.

ЈО како докази ги има признанијата на Кешишев и на Манев, телата на убиените, ДНК од Манев на лентата со која била залепена устата на Вања, ДНК од Манев, Кешишев и Видевски во второто возило што е користено – „рено кангу“, бегството на Палевски, видеоснимки од полициски и приватни камери на кои се гледа движењето на „реното“ и на „цитроенот“ пред и по убиствата, како и снимки од пред куќата на Манев во Велес на кое се гледаат обвинетите како се подготвуваат за злосторствата користејќи реквизити за грабнување – радиостаници, туби за бензин, лопати, алат за копање итн.

Бранителите ги бранеа, но некои злосторства се неодбранливи

Адвокатите на обвинетите бараа ослободителни пресуди од судот од обвиненијата за убиствата.

Горан Бошевски и Игор Ефремов, адвокати на Манев и на Кешишев побараа да им биде пресудено само за грабнувањата, а не и за убиствата. Тие аргументираа дека Манев и Кешишев не знаеле дека ќе бидат извршени убиства, односно, дека се договарале со Палевски и со Видевски да се извршат само грабнувања и да се бара откуп од семејствата на грабнатите. Токму Манев и Кешишев во детали раскажаа пред судот на кој начин се извршени злосторствата. Тие претходно, во истрагата, ги однесоа полициските инспектори до местата Кула во Велешко и Дупки во Скопско, каде ги закопале телата на Панче и на Вања по злосторствата.

Бојан Манев адвокат на Видевски побара целосно ослободителна пресуда. Видевски пред судот ги негираше делата, а Манев го бранеше својот клиент со тезата дека обвинението е конструкција.

И Јовица Страшевки, адвокат на првообвинетиот Палевски побара ослободителна пресуда. Според него, Обвинителството не успеало да го докаже обвинението. Тој истакна дека нема никакви директни докази дека Палчо ги организирал киднапирањата и дека пукал во жртвите. Тој најави жалба на пресудата, за која рече дека очекува да падне на Апелација од повеќе причини, меѓу кои и поради прекршување на Законот за кривичната постапка.

Самиот Палчо, пак, тврдеше дека обвинението е политичка конструкција против него и дека ЈО извршува наредби, за да го сместат зад решетки. Во својот завршен збор рече дека останатите тројца се извршители, а тој е невин.

– Манев е организаторот, Видевски е пукачот, а Кешишев е стражарот – обвини Палевски.

Обвинителството немаше докази за вината на Александар

Посебна приказна во овој предмет е таткото на Вања, Александар Ѓорчевски. Тој е обвинет дека му одал информации на Палевски кога Вања ќе оди сама на училиште. Односно, откако грабнувачите не успеале да ја грабнат во првиот обид, во петокот на 24 ноември 2023 година, за време на викендот Палчо добил информација од Александар дека Вања, по исклучок, и во понеделник ќе оди сама на училиште.

Но, токму тој клучен момент – дека Александар комуницирал со Палчо, Обвинителството не го докажа. Напротив, обвинителките отворено рекоа пред судот дека немаат доказ за таква комуникација, но додадоа и дека Палевски најверојатно тој разговор го избришал. Но, не рекоа дека Александар нешто бришел во своите комуникации. А не поврзаа ниту дека нивните телефони се форензички вештачени, па дури и да биле бришени таквите комуникации, ќе се нашла трага од нив.

Згора на тоа, четворицата ликвидатори на Вања пред судот изјавија дека не го познаваат Александар. Манев, Видевски и Кешишев сведочеа дека го посочиле Александар во полициска станица под силна тортура од страна на полициските инспектори. Рекоа дека многу биле тепани, токму со цел да кажат дека Александар му одал информации на Палевски. За да го спречат силниот ќотек, тројцата кажале дека и Александар е вмешан.

Како „доказ“ против Александар обвинителките го користеа неговото далечно минато – успехот на училиште и пороците од младоста. Главен аргумент им беше дека Александар им бил сомнителен на полицајците, па ги донесоа инспекторите Музафер Каришиќ и Дејан Димовски да сведочат дека таткото се однесувал чудно и велел дека Вања е киднапирана.

Бранителот Владимир Туфегџиќ рече дека Александар не се однесувал чудно, туку логично, односно правел сè за да го најде своето дете – вршел сопствена истрага и со прегледување на снимките од околните камери, со пријателот Гоце Трајковски практично го решил случајот пред полицијата. Туфегџиќ рече дека очекува ослободителна пресуда за Ѓорчевски, но и дека очекува истрага за кривичното дело тортура врз неговиот клиент.

Последниот збор на судијата нема да е последен збор и во случајот

Последниот збор во првостепената судска постапка денеска го има судијата Ивица Стефановски, кој ќе ја изрече долгоочекувана пресуда за тешките убиства.

Но, и покрај крајот на оваа фаза од кривичната постапка, во јавноста гори впечатокот дека во овој случај не е кажана целата вистина. Судењето откри многу пропусти во работата на полицијата и слабости на Јавното обвинителство. Освен што не е докажан мотивот „користољубие“, затоа што никој не барал пари за детето, а убијците немале испланирано место каде да ја чуваат додека чекаат пари, полицијата и обвинителството не се потрудија ниту да го најдат пиштолот со кој е пукано во Панче и во Вања, како и да откријат дали имало и други соучесници во ова злосторство и дали извршиле и други злосторства.

Во судот не се покажаа видеоснимките од бензинската пумпа на Лукоил во Велес, која јавноста претходно ја виде, на која се гледа убиениот Жежовски, наводно на денот на неговото грабнување, а која беше спомената во исказите на полициските инспектори и на други сведоци.

Крстевска Јосифовска и Стојковиќ Димитровска тврдеа дека имаат доволно докази дека тие се сторители и без да го најдат оружјето. Но, не го бараа ниту кога второобвинетиот Манев во исказот пред судот во март годинава откри дека оружјето го дал на уништување на семеен човек од партијата, чие име нема да го каже во тој момент. Манев практично ги присили да го бараат кријачот на пиштолот кога во завршниот збор го откри неговото име – Зоран Давитков, техничар во Народната банка, па се поставува прашањето што ако Манев не го споменеше името. Против Давитков сега ЈО води посебна постапка за помагање при грабнувањата и убиствата.

The post ЌЕ ГИ ИСПРАТИ ЛИ СУДОТ ДОЖИВОТНО ЗАД РЕШЕТКИ УБИЈЦИТЕ НА ВАЊА И НА ПАНЧЕ? Пресуда за Палевски, Манев, Видевски и Кешишев, како и за таткото Ѓорчевски appeared first on plusinfo.mk.

Адвокатот Јовица Страшевски, кој е бранител на Љупчо Палевски Палчо, првообвинет за свирепите убиства на Вања Ѓорчевска и на Панче Жежовски, по завршувањето на главната расправа изјави дека очекува Кривичниот суд да го ослободи неговиот клиент затоа што против него нема докази.

– Постапката како што тргна, така и заврши, на лош и нечесен начин, со многу слабости во целата процедура и со слабости на Обвинителството. Видовте дека ниеден доказ не се изведе против Палевски, никаде нема негова ДНК или друга трага дека тој е сторител на делата. Па затоа, ние одбраната ја сведовме на тоа дека судот треба да донесе ослободителна пресуда поради немање докази – рече Страшевски.

Во врска со тоа дека второобвинетиот Велибор Манев во својот завршен збор го откри идентитетот на човекот кој по убиствата ги скрил или ги уништил пиштолот и моторолите што се користени при злосторствата, извесен Зоран Давитков, техничар во Народната банка, кој сега е уапсен, Страшевски рече дека и тој самиот уште пред неколку месеци како бранител на Палевски побарал да се испита Велибор во врска со тоа лице.

– Јас и тогаш инсистирав тоа лице да биде откриено, а за жал, дури во завршен збор беше откриено неговото име. Јас тоа лице не го познавам, но на Велибор Манев не му верувам ништо од тоа што го зборува. Можно е ова да е уште една негова приказна, со цел да заглави уште некој во целиот процес. Го прашав Палевски во судницата откако Манев му го откри името, а Палевски ми кажа дека такво лице не постои – изјави Страшевски.

Манев кога сведочеше во март, рече дека по злосторствата Палевски му се јавил од турска граница и му наредил да го предаде, како што рече „пакетот“ на извесно лице, за тој да се погрижи за него. Манев во сведочењето рече дека нема да го открие идентитетот на тоа лице, затоа што е семеен човек и не сака да му наштети. По ова сведочење на Манев, кое упатуваше на тоа каде е пиштолот, Обвинителството не презеде ништо. Обвинителството до денес не го пронајде оружјето со кое се извршени убиствата на Вања и на Панче. На новинарско прашање од Плусинфо зошто не го повикаат Манев да им го открие идентитетот на семејниот човек што крие оружје, обвинителката Ана Стојковиќ Димитровска одговори дека тие и без пиштолот имаат доволно докази и дека не било сериозно да придаваат значење на искази на обвинет во судница!

The post ВЕЛИБОР МОЖЕБИ ИЗМИСЛИ УШТЕ ЕДНА ПРИКАЗНА СО ИМЕТО НА КРИЈАЧОТ НА ПИШТОЛОТ Страшевски не му верува на Манев, бара слобода за Палчо appeared first on plusinfo.mk.

Велибор Манев, второобвинет за две грабнувања и двете свирепи убиства на Панче Жежовски (74) и на Вања Ѓорчевска (14) денеска пред Кривичниот суд ќе го даде својот завршен збор. По него пред судот ќе се обратат и третообвинетиот Боре Видевски и четвртообвинетиот за тешките злосторства, Влатко Кешишев. Свој завршен збор ќе даде и таткото на убиената Вања, Александар Ѓорчевски, кој е петообвинет во овој кривичен процес, за помагање во грабнувањето на неговата ќерка.

По нив, следуваат завршните зборови на Јовица Страшевски, бранител на првообвинетиот Љупчо Палевски Палчо, кој пак, ќе се обрати последен. Доколку сите овие обраќања завршат денеска, на следното рочиште ќе биде изречена пресудата за тешките злосторства.

Јавните обвинителки во своите завршни зборови побараа најстроги казни, доживотен затвор за четворицата обвинети за грабнувањата и за убиствата, а за таткото Александар соодветна затворска казна.

На претходното рочиште бранителите на Манев, Видевски и на Кешишев побараа Кривичниот суд да ги ослободи од обвинението за убиствата. Нивните аргументи се дека ниеден од тројцата не може да биде прогласен за соучесништво во убиство, затоа претходно не постоел договор меѓу членовите на групата дека ќе извршат убиства. Адвокатите Горан Бошевски и Игор Ефремов, кои ги застапуваат Манев и Кешишев, побараа судот да ги казни нивните клиенти само за делата грабнување. Ефремов отиде и чекор подалеку, со барање Кешишев да биде осуден само за едно грабнување, на детето Вања Ѓорчевска, во кое свесно учествувал, иако не знаел кој треба да биде грабнат, а да биде ослободен за грабнувањето на Панче Жежовски. Во своите искази Манев и Кешишев опишаа како се случиле грабнувањата и убиствата и истакнаа дека тие планирале само да грабнуваат лица и за нив да бараат откуп, но нивниот шеф Љупчо Палевски Палчо ладнокрвно ги убил Панче и Вања, а потоа им се заканувал на останатите да молчат и да го слушаат.

– Ако соизвршителот е лице кое со своите дејствија дало придонес за сторување на кривично дело, односно лице без чии дејствија не би можело да се стори кривичното дело, тогаш се наметнува прашањето кои се дејствијата на обвинетиот Кешишев без кои немало да се изврши грабнување или убиство на оштетениот Жежовски – рече адвокатот Ефремов.

Тој го бранеше Кешишев дека дејствувал од улога на потчинетост и страв од Палевски.

Бранителот на Видевски, Бојан Манев, пак, во завршниот збор ја бранеше тезата дека целото обвинение е конструкција. Неговиот клиент Видевски во исказот негираше дека учествувал во киднапирањата и убиствата. За денот на убиството на Панче, 22 ноември 2023 година рече дека бил на работа, а на денот на убиството на Вања бил во партијата Десна, каде имале активности за поддршка на МПЦ-ОА.

– Правецот по којшто е водена истрагата за овие кривично правни настани е целосно погрешен. Погрешна е и намерата да се осудат овие луѓе уште на самиот старт, со примена на мерки што не се карактеристични за овој политички систем и кои во никој случај не можат да ја утврдат вистината за случувањето на овие кривично правни настани, а со цел да се покрие аматерското работење, непрофесионалноста, неквалитетот на истрагата и незнаењето да се соочат со еден вака голем предмет, како и брзањето да се дојде до финале – рече адвокатот Манев.

Сите тројца адвокати во завршните зборови истакнаа и дека нивните клиенти биле тепани во полициска станица со цел да им се изнуди признание за делата, но и за да го посочат таткото на Вања, Александар, како соучесник, кој му одал информации на Палчо кога неговата постара ќерка ќе оди сама на училиште, за да биде грабната.

Бранителот на таткото, Владимир Туфегџиќ, во завршниот збор истакна дека Обвинителството не изнело ниту еден доказ дека Александар е виновен за помагање во грабнувањето и побара ослободителна пресуда, како единствена праведна судска одлука во случај каде „не постои ниту мотив, ниту дејствие, ниту доказ за вина“. Туфегџиќ апелираше судот да не го легитимира концептот на „вина по претпоставка“, бидејќи тоа не е право, туку неправда.

– Одбраната не само што успеа да побие сите конструкции на Обвинителството, туку и со докази, сведоштва и логичка аргументација ја потврди вистината дека Александар Ѓорчевски не е соучесник, туку е жртва. Татко што во критичниот период се однесувал како што би се однесувал секој друг родител во слична страшна ситуација – со паника, болка, очај, но и со целосна посветеност во обидот да го најде своето дете – рече Туфегџиќ.

The post ЗАВРШЕН ЗБОР НА ОБВИНЕТИТЕ МАНЕВ, ВИДЕВСКИ, КЕШИШЕВ И ЃОРЧЕВСКИ Финишира судењето за убиствата на Вања и на Панче, ќе се обрати и првообвинетиот Палчо appeared first on plusinfo.mk.