Пуштете го, ние ќе му пресудиме, гневно реагираа денеска родителите на загинатите млади лица во пожарот во дискотеката „Пулс“ во Кочни откако на почетокот на рочиштето адвокатката на првообвинетиот, сопственикот Дејан Јованов – Деко, повторно побара ефективниот притвор да му биде заменет со куќен, поради влошената здравствена состојба. Бранителката Ивана Коцевска реагираше до Судот зошто сè уште нема одлука по барањето, иако било поднесено на 20 април.

– Барам Судот да покаже малку човечност и хуманост. Кој било друг човек да беше обвинет во ваква здравствената состојба немаше да продолжи во притворски услови и молам одлуката да биде донесена без пристрасност и без влијание од јавноста – рече адвокатката на Јованов.

Таа до Судот достави извештај од преглед што на обвинетиот Јованов му бил извршен вчера

Присутните родители реагираа жестоко.

– Срамота. Пуштете го, ние ќе му пресудиме – повикаа тие.

Коцевска побара ваквите изјави да бидат внесени во записник и родителите да бидат отстранети од судницата. Судијката Диана Груевска-Илиевска рече дека засега ќе даде само предупредување.

Во врска со предлогот Јовановски да биде пуштен од притвор Обвинителство рече дека дополнително ќе се произнесе писмено, со оглед дека одбраната доставила дополнителна медицинска документација. На ова Коцевска возврати дека предлогот е поднесен пред 8 дена и дека Обвинителството досега имало доволно време да ја разгледа медицинската документација,

Судот праша дали Обвинителството може да се изјасни во моментот.

– Обвинителството не може да даде позитивно мислење – рече обвинителот Борче Јанев.

Укинување на актуелната мерка куќен притвор побара и одбраната на обвинетиот Беким Хаџиу, исто така, поради нарушено здравје.

– Предлагам укинување на мерката куќен притвор за Беким Хаџиу поради нарушено здравје. Има хронична хипертензија, или висок крвен притисок кој не се спушта под 180 со 110, а има закажано и хируршки зафат. Поради ова, Хаџиу има препорака за дневни пешачења надвор. Предлогот е испратен до Кривичниот совет кој го одби предлогот, затоа се обраќам до Судечкиот совет кој ги има сите извештаи. Бараме определување на поблаги мерки, бидејќи нема опасност од бегство – рече одбраната.

Одбраната на Тодор Јованов, братот на Дејан Јованов-Деко побара да се укине притворот за него, бидејќи тој во целост дал исказ за сите прашања кои биле од интерес на истрагата.

– Ние дадовме и гаранции во кои негови пријатели дадоа под хипотека куќи. Во врска со опасноста од бегство, тој нема од што да бега. Тој има фамилија тука. Го молам Судот куќниот притвор да биде определен во Скопје, каде што неговата сопруга има престојувалиште – рече одбраната.

Одбраната на поранешниот директор на Дирекцијата за заштита и спасување (ДЗС), Шабан Салиу, побара да му биде укината една од актуелните пет мерки за претпазливост.

Пожарот во дискотеката „Пулс“ во Кочани избувна на 16 март 2025 година за време на настап на групата ДНК и претставува една од најтешките трагедии во поновата историја на земјата. Судењето го води судијката Дијана Груевска-Илиевска, а обвинението го застапува тим од 15 јавни обвинители.

ОБДУКЦИЈАТА ПОКАЖАЛА ДЕКА 59 ЖРТВИ ЗАГИНАЛЕ ОД ТРУЕЊЕ СО ЈАГЛЕРОД МОНОКСИД Презентирани причините за смртта по пожарот во „Пулс“

The post „ПУШТЕТЕ ГО ДЕКО, ПА НИЕ ЌЕ МУ ПРЕСУДИМЕ“ Родителите на загинатите во Кочани гневни поради барањето да оди во куќен притвор appeared first on plusinfo.mk.

Новиот државен јавен обвинител Ненад Савески вели дека не планира да се меша во работата на јавните обвинители во конкретни предмети, туку дека секој обвинител тоа треба да го прави независно, без воопшто да чувствува притисок од него или од кој било друг претпоставен.

Тој потсетува дека во Обвинителството владее систем на хиерархија и субординација, но вели дека неговата намера е тоа да биде релативизирано до степен што секој јавен обвинител одлучува независно и самостојно, а одлуките произлегуваат од ефикасно спроведени истраги базирани на докази.

– Секако, и презентирање на доказите пред судот на соодветен професионален ефикасен начин, за секој присутен во судница, вклучително и спротивната странка, одбраната односно обвинетите, обвинетиот, да имаат пред себе видливост дека Јавното обвинителство располага со доволно докази и дека поднело основано обвинение – рече Савески во интервју за „360 степени“.

Во врска со случајот со Кочани и јавните дилеми за пристапот на обвинителството во големиот предмет, каде што беше одлучено сите обвинети да се гонат за едно кривично дело и иста последица, дури и оние кои биле на функции пред 13 години, како и за прашањето зошто ако во големиот предмет е избран таков пристап, во другите кои се однесуваат на полицијата, теоријата на случај е различна, Савески вели дека тој нема конкретен увид што е наведено во обвинението и дека во најскоро време ќе се види со предметните обвинители.

– Ќе имам средба со јавните обвинители коишто постапуваат во конкретниот предмет да се запознаам со состојбите. Имајќи предвид дека предметот е во доказна постапка, рана доказна постапка, можеби е добро да дојде фаза од постапката којашто е позрела за да може соодветно да се согледаат состојбите во предметот и да дадам свој став – изјави Савески.

На прашање дали обвинителството може да го преквалификува делото, Савески рече оти јавниот обвинител е тој што може да ја менува правната квалификација до завршувањето на постапката и оти во секој момент може да интервенира во обвинението и да направи измени или правна преквалификација која би била резултат на нешто што се случило во судницата, а произлегло во текот на доказната постапка.

На прашање дали ги слушнал дилемите во јавноста за предметот, Савески одговори:

– Да, секако, како и секој граѓанин, не може да не ги следиме состојбите околу овој предмет. Јас и претходно спомнав, во нашата професија важи правилото – емоциите настрана, меѓутоа мислам дека ова е единствениот предмет каде што тоа не може така апсолутно да се примени, затоа што сите сме, на крајот на краиштата, луѓе, родители – рече државниот обвинител.

The post САВЕСКИ ЌЕ СЕ СРЕТНЕ СО ОБВИНИТЕЛИТЕ ОД ПРЕДМЕТОТ „КОЧАНИ“ Ќе го каже ставот за обвинението кога судењето ќе дојде во позрела фаза appeared first on plusinfo.mk.

Бранителката Ивана Коцевска, која го брани првообвинетиот за пожарот во Кочани, Дејан Јованов Деко, во својот воведен збор го нападна обвинителниот акт како контроверзен и неоснован, кој според неа, ќе донесе години судење, а нема да донесе правда.

Според неа, институциите со своето непостапување се одговорни за пожарот во „Пулс“ во Кочани, во кој загинаа 63 лица, а Јованов не е виновен затоа што немал свест, ниту можел да биде свесен дека постојат безбедносни пропусти, затоа што ниедна институција тоа не му го посочила во 13-годишното работење.

За самиот пожар, Коцевска посочи дека пиротехниката ја внеле членовите на бендот ДНК, а Деко не знаел дека групата ќе користи огномет. Таа додаде дека има докази дека во претходните настани кога во „Пулс“ се палеле огномети, Деко за тоа бил информиран и секогаш во клубот имало присутно лице за безбедна употреба на пиротехника.

– Ќе докажеме дека во дејствијата на Јованов не се исполнети елементите на кривичните дела што му се ставаат на товар. Одбраната беше ставена во неповолна положба со спојување на обвиненијата и со новото обвинение, без да ни достави докази. Јавното обвинителство сака да нѐ доведе во неповолна положба и на тој начин да стигне до правда – рече Коцевска.

Не браниме злосторство, додаде таа, туку и ние сме овде да побараме правда, но никој не треба предвреме да биде осуден.

– Дејан Јованов кривично се гони дека во соучесништво со други одговорни лица, од 2012 до 16.03.2025 година вршел незаконита угостителска дејност и договорил незаконска употреба на пиротехника. Обвинителството од нејасни причини, го терети Дејан за две посебни кривични дела, а не за едно, за да долови наводна посериозна репресивност. Кај него не постоела умисла и интелектуална свест, бидејќи инспекциската служба никогаш не му предочила никаков законски пропуст во врска со непреземени мерки за заштита. Со тоа може да се подвлече дека постои стварна заблуда од небрежност, а сторителот бил во заблуда за настапување на штетна последица, што во таков случај значи дека кривично не е одговорен. А во случајот, многу лесно ќе дојдеме до заклучок бидејќи постоела заблуда и за ова кривично дело може да одговара од небрежност, но не и за евентуална умисла. Јасно ми е дека при ваков настан првиот кон кого ќе го впериме прстот е токму газдата на локалот, но одговорот лежи во причината – рече Коцевска.

Одбраната има дадено приговор за две вештачења, кои не ги извршиле овластени вештаци запишани во регистар, а приговорот сега го проширува затоа што вештачењата не се поткрепени со наредби за вештачење, кои Јавното обвинителство е должно да ги достави.

– Како последица на непотребното усложнување на обвинението и на доказите ќе имаме тешка задача за правилно утврдување на фактичката состојба, која за жал, Обвинителството одлучи да ја цени 13 години наназад. Одбраната ќе ги разјасни сите нејасно опишани дејствија, затоа што во конфузното обвинение не е јасно кој за што е обвинет, што презел, а што не презел. Не велам дека не постои одговорност. Одговорност мора да има, но не со овој обвинителен акт. Не може тешката последица да придонесе некој однапред да биде осуден. Ние бранителите овде не сме да браниме злосторство, овде сме за правда. Кривичната постапка е јасно утврдена, а Кривичниот закон е јасен и повикува на одговорност за сторени дела за кои постојат докази со кои ќе се утврди вина надвор од секое сомневање – рече таа.

Јавното обвинителство го товари Јованов за соучесништво со други лица, дека за целиот временски период од 2012 до 2025 незаконито вршел угостителска дејност и не презел мерки за заштита.

– За да може да постои одговорност за двете кривични дела, на страна на обвинетиот треба да постои умисла, која има две компоненти – интелектуална свест, треба да е свесен дека со своето постапување или непостапување исполнува елементи на некое кривично дело, а втората компоненета е волевата, односно, тој се согласува со можната последица. Целосно ќе го оспириме делото за умисла околу пиротехниката, затоа што пиротехниката никогаш не ја договарал Јованов со ДНК. За пропустот во мерките на заштита ќе користиме дека немал интелектуална свест дека не презел мерки за заштита. Одбраната ќе докаже дека ова е директна последица на нестручното работење на надлежните инспекции и служби, кои никогаш не му предочиле никаков законски пропуст. Стварна заблуда поради небрежност, не бил свесен за можноста за штетна последица, иако бил должен. Одговорен е за небрежност, а тоа е предвидено и во делото Тешки дела против општата сигурност. Лесно ќе дојдеме до заклучок дека кај Јованов постоела отстранлива заблуда и дека може да одговара само за небрежност, но не и за умисла – рече таа.

Коцевска додаде дека има едно важно прашање, а тоа е која е причината за пожарот во „Пулс“.

– Тоа е незаконитата употреба на пиротехника, која била незаконито прибавена, непријавена во МВР, без дозвола за набавка и за употреба, а истата пиротехника не била пријавена и кај угостителот Јованов. Свесни сме дека оваа група користи пиротехника, но не знаевме дека своеволно ја носела и ја користела. За тоа имаме доказ од полициска станица, дека и претходно не пријавувале пиротехника. Сите ги сакаме ДНК, беа хуманитарци, но тоа, за жал, не го побива фактот дека нивната употреба на пиротехника не била законска и било прашање на време кога ќе се случи трагедија. Тоа се случи во локалот на Дејан, каде ниедна институција не му рекла дека не презел мерки согласно закон. Дејан не договорил и не му било кажано дека ќе се користи пиротехника. Секогаш кога претходно биле пријавувани пиротехники, Дејан ангажирал пиротехничар, кој проверувал дали пиротехниката е соодветна и безбедна за тој простор. Да, и претходно била користена пиротехника, но за тоа Дејан секогаш ангажирал стручно лице, за што имаме сведоци. По доказите ќе дојдеме до еден факт, дека кај Јованов нема казнена одговорност за Тешки дела протв општата сигурност – нагласи Коцевска.

За третообвинетиот Михаил Јованов, син на Деко, чиј бранител, исто така, е Коцевска, таа рече дека Обвинителството за него нема ниеден доказ и нема прецизирано ниедно дејствие дека сторил кривично дело.

– Немаше презумпција на невиност за Михаил, тоа резултираше со тешки психолошки последици. Тој се здоби со изгореници на кожата со трет степен, со повреди на дишните патишта. Ја загуби девојката, која загина во пожарот, со која беше во врска 10 години, како и најдобриот пријател и други познаници. Континуирано работеше со психолози за да ги отстрани самоубиствените мисли. Осуден е од јавноста. Не постои доказ дека учествувал во работењето на обвинетото правно лице и неговата подружница. Никогаш не фигурирал како сопственик или управител и не бил овластен да презема дејствија. Ќе докажеме дека од 2017 до 2021 бил редовен студент, а од 2021 до 2025 имал своја фирма за дистрибуција. А зошто Обвинителството не успело да прецизира барем едно дејствие на овој обвинет? Затоа што Михаил нема дејствија – рече Коцевска.

The post ГАЗДА ДЕКО МОЖЕ ДА ОДГОВАРА САМО ЗА НЕБРЕЖНОСТ, НЕ ЗНАЕЛ ДЕКА ДНК ДОНЕЛА ПИРОТЕХНИКА За синот на Јованов не е наведно никакво дејство во обвинението, а е третообвинет appeared first on plusinfo.mk.