Полномошникот на семејството на Ивана, адвокатката Неда Чаловска Наумовска, побара од Судот при одмерувањето на казната за обвинетиот Стојанче Јовановски да ја има предвид и генералната превенција, односно воспитното влијание врз другите да не вршат вакви кривични дела. Таа предјави имотно-правно побарување за оштетените, мајката на Ивана, Љубица Стојановска и братот Александар Стојановски. Адвокатката потсети на изјавата на мајката Љубица дека ниедна сума нема да ја намали болката поради загубата, но ќе има правна сатисфакција.

– На крајот сме од еден мачен процес, секој присутен ќе потврди дека беше тешко да се гледа секое насилство кое го видовме и го слушнавме во доказите, а замислете сето ова да го доживувате секој ден, да легнувате и станувате во страв за себе и за своето дете. Кој би можел тоа да го издржи? Веројатно никој. Ивана не издржа, не гледаше спас од дејствијата на обвинетиот ни за себе ни за своето дете. Дејствијата на обвинетиот не се изолирани инциденти, туку каузално поврзани настани кои кулминирале на 2 март. Долгогодишното малтретирање, кое вклучува физичко, психичко и економско насилство кое траело 7 години ја довело Ивана во состојба на тешка психичка вознемиреност, безнадежност и целосна безизлезност. Присилното одземање на станот, заканите дека ќе биде избркана од домот и дека ќе ѝ биде одземено детето биле секојдневие што ја довело жртвата до состојба на постојан страв и апсолутна несигурност. Во таква состојба, а со очигледниот молк од институциите, последиците не се случајни, тие се предвидливи. Придонесот на обвинетиот не е индиректен, тој е директен причинител на состојбата која довела до последицата. Да, тој не ја турна Ивана физички, но ја донесе до работ и ѝ ја одзеде секоја причина да не скокне – рече Чаловска Наумовска во завршните зборови.

Таа објасни дека ваквите дела во одредени земји се квалификуваат и како убиство од небрежност, а не само како наведување на самоубиство, односно се квалификуваат како фемициди.

– Во врска со континуитетот на семејното насилство, Европскиот суд за човекови права во случај од Грузија, сличен на овој, каде жена се самоубива како резултат на долгогодишно семејно насилство, забележува дека семејното насилство ретко е изолиран инцидент. Тоа обично потекнува од родово базирана дискриминација и опфаќа кумулативна и поврзана психичка, физичка, сексуална, емоционална, вербална и финансиска злоупотреба на близок член на семејството или партнерка. Затоа функционирањето на сторителот единствено за еден ден, односно за еден инцидент, како што направила Грузија во конкретниот случај, а не и за сите претходни години на вршење семејно насилство, Судот во Стразбур заклучува дека не е во согласност со судската пракса и наоѓа повреда на член 2 од Европската конвенција за човекови права, односно правото на живот. Во конкретниот случај, освен индивидуалната казна, од примарно значење, при одмерувањето на казната сметаме дека Судот треба да ја има предвид и генералната превенција, односно воспитното влијание врз другите да не вршат вакви кривични дела – рече адвокатката Чаловска Наумовска.

The post „СУДОТ ДА ЈА ИМА ПРЕДВИД ВОСПИТНАТА УЛОГА НА КАЗНАТА ВРЗ ДРУГИТЕ ЛУЃЕ“ Семејството на Ивана побара отштета appeared first on plusinfo.mk.

Одбраната на обвинетиот Стојанче Јовановски денеска побара тој да биде ослободен од обвинението за наведување на самоубиство на неговата сопруга Ивана.

– За критичниот ден за делото Телесна повреда, нема материјален доказ во вид на лекарски извештај. Телесната повреда се докажува исклучиво со медицинска потврда. Јавното обвинителство се обидува да ја докаже со искази од сведоци и од вештачења. Вештаците не потврдија со сигурност дека повредите настанале на критичниот ден, рекоа дека повредите се како резултат на стисок и нагмечување. Доказите не се непосредни. Сведоците рекоа дека нешто слушнале, а не виделе. Тоа беа посредни сведочења, индиректнни, со прекажување. Одбраната тврди дека Обвинителството не ја докажа оваа точка од обвинението, затоа што не го докажа каузалитетот, не докажа како, кога, во кое време извршил телесна повреда. Наспроти тоа, обвинетиот јасно кажа кои се неговите дејствија, а кои се дејствијата на Мартин Саздов. Повредите на Ивана се од стисок на Мартин, а не од удар на Стојанче. Предлагам судот да изврши темелен увид во доказите – рече адвокатот на Јовановски, Давор Ангелевски во завршните зборови.

За делото Загрозување на сигурноста, одбраната на Стојанче смета дека е дискутабилно постхумно да се стави на товар ова дело и дека не може да се докаже дека постапката на Ивана е последица на однесувањето на Стојанче.

– Не може да му се стави на товар и делото Наведување и помагање во самоубиство. Законот и описите на битието на кривичното дело мора да се прецизно опишани и определени сите негови посебни обележја. Кривичното дело по член 128, став 4, Наведување на самоубиство, прецизно опишува кои дејствија треба да се застапени – тоа е сурово и нечовечко постапување, а жртвата мора да е во подреден однос и во зависна положба кон сторителот. Ова е неопходен услов за да го има ова дело, кое произлегува од објективната поставеност на односот, а во никој случај од однос кој е конструиран. Законодавецот е јасен, положбата на зависност е однос меѓу сторителот и определена категорија луѓе, кои поради природата на односите се такви – тоа е однос меѓу родител и дете или работодавач и вработен итн., а не е однос меѓу маж и жена, која е работоспособна и работи и не е под издршка. Мажот и жената според законот се еднакви. Апсурд би било да толкуваме дека во овој случај жртвата била зависна и подредена, а намерата на Обвинителството дека односот бил таков поради даден дар на стан не држи. Дарот е даден доброволно. И да бил земен на сила, а не е, тоа дејствие не е подреденост и зависност. Тоа зависи од други фактори и од својствата на жртвата, а никако не зависи од дејствијата на сторителот или дејствијата на жртвата. Одредбата е дека „се наоѓа во зависна положба“, а не вели дека „се нашле во таква состојба“ и тоа значи дека сторителот не е креатор на таа положба. Подреденоста е строго хиерархиски поставен однос меѓу наставник-ученик, старешина-војник, работодавец-вработен. Под однос на зависност, пак, се односот се родител-дете, хранител-храненик и сл., односно, тоа е лице кое не може само да се грижи за себе. И овој однос произлегува од состојбата на субјектите, а не од нивните дејствија. Ова е комплексно дело и не може да опстане во овој случај. Ако му се стави на товар на обвинетиот тоа е крајно неточно толкување на законот. Бараме Стојанче Јованов да биде ослободен од ова обвинение – рече Ангелевски.

Адвокатот Митко Солаков, бранител на Стојанче, во завршниот збор рече дека се сомнева дека судот ќе донесе правилна одлука под влијание на јавноста и на медиумите.

– Покрај овластениот обвинител, кој ги застапува оштетените, во овој случај имаме паралелни обвинители, а тоа е јавноста, која преку медиумите, порталите и Фејсбук, дава ставови и мислења кои пијат вода или не пијат вода. Јас сум убеден дека овој суд нема да е детерминиран од мислењето на јавноста, ќе биде резистентен и ќе донесе самостојна одлука. Сепак, судот е човечко битие, а сум убеден, колку и да не сака, е детерминиран од јавното мислење и имам едно основано сомнение дека истиот, од некое влијание би донел некоја одлкука која нема да биде својствена за оваа состојба. Кога една вештачка интелигенција ќе биде судија, таа би судела без емоции и ќе лоцира според законските одредби и би донела законита одлука. Евидентно е дека Стојанче бил насилен и тоа е факт. За точка 1 и 2 има докази. Јас не сакам да бидам будала пред овој суд и да истакнувам за невиноста на Стојанче за точка 1 и 2 од обвинението. Има материјални и вербални докази за неговата суровост кон жртвата. Но, не можеме само да го црниме Стојанче. Има една бела точка, тоа е љубовниот триаголник, кој во овој случај е лицето Мартин Саздов, сведокот, кој глумеше лудило пред овој суд, а мислам дека Обвинителството требаше паралелно и него да го обвини и кој имаше значителен придонес за точка 3 од обвинението. Глумењето дека бил пријател на жртвата е чиста фантазија, тој бил љубовник и како се замислува Стојанче да биде рамнодушен кон Мартин и кон жртвата? Јас ценам дека жртвата во критичниот ден и за критичниот настан била доведена во безизлезна состојба. А каде се наоѓа таа безизлезност? Точно во љубовниот тиаголник. Ако сведокот Мартин не бил во тој триаголник, жртвата не би се довела во таква безизлезна состојба и не би направила таков чекор. Убеден сум дека нема да ги примите моите наводи и ќе судите за сите 3 точки, но апелирам да ги примените и правото и правдата – рече адвокатот Солаков.

На крајот се изјасни и обвинетиот Стојанче Јовановски.

– Молам да се земат исказите на сведоците со претпазливост, бидејќи смислено, контрадикторно и тенденциозно ги кажуваат, при што за иста ситуација во која не биле присутни даваат различни искази. А јасно се изјаснија дека се во роднинска врска со Ивана, а се во лоши односи со мене. Мојата сопруга не беше подредена, имаше финансиско и станбено решение и не била присилена од мене во никаков аспект да направи ваква трагедија. Не сум ја поттикнувал, ниту сум ја охрабрувал, ниту сум можел да го предвидам исходот, бидејќи не сум бил свесен дека оваа трагедија некогаш може да се случи. Никогаш немаше да ги оставам сами во нашиот стан да не бев присилно изваден од станот од страна на Мартин Саздов. Сметам дека оваа трагедија не е предизвикана од моја страна. Немам пораки кон мојата сопруга Ивана со закани, ниту пораки каде вршам притисок кои би влијаеле на трагичниот исход. Моето дете е убиено, без никаква шанса да одлучува за сопствените постапки – рече Стојанче и заплака.

Тој повтори дека повредата на десната страна на долната регија од вилицата на Ивана е нанесена од Мартин Саздов.

– Јас реков дека во неговото возило, додека Ивана седеше позади него, тој замавна со неговата десна рака во нејзината десната страна од лицето. Исто така, вештите лица за другите повреди констатираа дека се постари од 2 до 3 дена. Во тој период, како што реков, биле нанесени од Мартин Саздов, кога ги прочитал пораките меѓу мене и Ивана, кои Ивана ми ги пишуваше и кои се уште во мојот телефон. Изјавувам дека на самиот критичен ден и пред училиштето Нова и пред кривичниот суд Ивана во неколку наврати ме оттргнуваше настрана од Мартин и ми кажуваше дека ѝ се заканувал со одземање на Катја, како што еднаш се обиде да го направи во „Песталоци“, како што посведочи и наставничката, дека непознато лице се обидело да ја земе мојата ќерка од училиште. Истиот ден Мартин ми ги покажуваше нивните видеоклипови со експлицитна содржина. Не сум се однесувал нечовечки и сурово кон мојата сопруга, со намера да ја доведам до овој трагичен исход. Сведоците во оваа постапка покрај заклетвата дека ќе ја говорат вистината, го сторија спротивното, со цел да ме оцрнат и да ме претстават за личност каква не сум. Во сведочењето Александар Стојановски, братот на мојата сопруга, јасно изјави дека Ивана имала станбено решение и дека нивните детски соби биле уредени за живот на мојата сопруга и мојата ќерка. Сѐ би дал да можам да ги вратам моето дете и мојата сопруга. Побарувањето од мајката и од братот без проблем ќе го исполнам, бидејќи материјалното ништо не ми значи – рече Стојанче.

Судијата Ивица Стефановски ќе ја изрече пресудата на 7 мај во 10.30 часот

The post „СЀ БИ ДАЛ ДА МОЖАМ ДА ГИ ВРАТАМ МОЕТО ДЕТЕ И МОЈАТА СОПРУГА“ Одбраната на Стојанче бара да биде ослободен од обвинението за наведување на самоубиство appeared first on plusinfo.mk.

Обвинетиот Стојанче Јовановски во продолжението на денешното рочиште рече дека по случката со дрогата, неговото возило било одземено и бидејќи сакал да купи друго возило почнал да работи дополнителна работа. Затоа поретко се гледал со Ивана, но кај неа забележал поинаков однос, вознемиреност и напнатост. Ја прашал, што ѝ е, а таа му рекла дека Мартин ѝ се заканувал дека никогаш нема да ја види Катја и дека мора да престане да живее со мене и да оди кај мајка ѝ.

– Ѝ одговорив да не се вознемирува, дека јас ќе го решам проблемот. Десетина дена пред критичниот ден, мојата сопруга ми го даде телефонот за да симнам апликација за нарачување храна. Видов дека има и апликација за следење, ја отворив и во неа имаше местоположба полициска станица Карпош. Се сетив дека таму ми е возилото, кое е запленето. Ја прашав зошто ставила џи-пи-ес во мојата кола, таа почна да плаче, падна на колена да ми се извинува, дека морала тоа да го направи под присила од Мартин. Ми објасни како ми ја подметнале дрогата во возилото. Мартин ја уценувал со видеоклиповите, ѝ рекол да ми стави џи-пи-ес во колата за да знае каде е во секој момент. Ивана му го дала мојот резервен клуч, со кој Мартин го отклучил возилото и ја ставил дрогата. Ја замолив сето ова што ми го кажува мене, да го каже и на Суд кога ќе ме повикаат. Сѐ уште има џи-пи-ес во моето возило, кое е во ПС Карпош. Таа се согласи и вети дека повеќе во животот нема да има никаков контакт со Мартин. Јас се надевав дека ќе го исполни ветувањето – рече Стојанче.

Пред критичниот ден, тој рече дека бил на дополнителната работа, се вратил дома изморен, а утрото го разбудила вибрација на телефонот, од порака која пристигнала на профилот на Ивана. Пораките биле скриншотови од нејзиниот Тик-ток, од разговор со Трајче хазел.

– Сѐ уште ги имам пораките. Веднаш ѝ заѕвонив на Ивана, но таа ми спушташе. Се упатив кон нејзиното работно место кое е во близина на нашата зграда. Кога стигнав, ја видов Ивана и колата на Мартин како заминува. Се сетив на видеата со нивните сексуални опдноси, ветувањето дека никогаш повеќе нема да биде со него, сфатив дека сѐ е лага и фарса. Од револт замавнав кон неа и ѝ реков да му се јави на Мартин да се врати. Го извадив мојот телефон и ѝ ги покажував пораките што Ивана ми ги пишуваше пред критичниот ден. Пишуваше дека не сака да се разведе од мене, дека не сака да го продадеме станот, дека сака со мене да живее, увидела дека згрешила и дека нема да се повтори. Сите овие разговори постојат во мојот уред. Таа ми рече дека не знам каков психопат е Мартин, дека секој ден ѝ ѕвони и оди кај неа на работа. Во тој момент Мартин дојде, го прашав што бараш ти воопшто со неа. Тој почна да ме смирува со зборовите „чекај, има многу работи што не ги знаеш, таа нѐ лаже и двајцата“. Јас дојдов зашто дознав дека разговара со еден полицаец Трајче и дека и со него имала сексуални односи. Кога ми рече, јас се изреволтирав уште повеќе и пак замавнав кон Ивана. Им реков дека не можам да ги гледам и дека треба да одам да се пријавам во Кривичниот суд. Мартин ми кажа дека има уште многу да ми кажува за Ивана, да одиме заедно кон Кривичен и ќе ми каже по пат – рече Стојанче.

Тргнале кон судот, а кога Ивана слушнала дека Мартин има многу да му кажува за неа, таа се обидела да влезе на задното седиште.

– Мартин сакаше да ја спречи, ѝ рече „немој да мислиш дека ако си ти во колата дека нема да кажам сѐ“. Мартин ми кажа дека со Ивана биле во постојана комуникација, излегувале додека јас работев втора работа. Ивана ја заспивала Катја и оделе на паркингот спроти нашата зграда и дека имале сексуални односи. Јас револтиран ја прашав зошто ме лаже, таа негираше. Но Мартин го извади неговиот втор телефонски уред и ми покажа комуникација со Ивана на Ватсап, со видео снимки и слики од нив двајца. Го прашав зошто ми ја подметнале дрогата, а дека вистината порано или подоцна ќе се докаже. Ивана рече дека Мартин ѝ се заканувал, а Мартин ја праша „кој ти се заканувал?“, се сврте и со десната рака ја удри по лицето. Таа како да изгуби свест. Јас почнав да ѝ довикувам „Ивана, Ивана“. Мартин ми кажа дека тој ѝ го зел телефонот и ги прочитал нашите разговори во кои Ивана ми кажува дека не сака да се разведе од мене. И во тој момент Мартин се изнервирал и почнал да ја тепа. Таа наводно паднала во несвест – рече Стојанче.

Потоа, во автомобилот Мартин го повлекол телефонот од раката на Ивана и таа се разбудила. Кога стигнале пред Кривичниот суд Стојанче му рекол на Мартин да остане за да му раскаже сѐ. Кратко се задржал пред судот, а кога излегол, вели дека Ивана не им дозволувала да разговараат насамо.

– Мартин почна да кажува дека Ивана во исто време се гледала со тројца. Дека континуирано ме провоцираше да бидам агресивен, за да ѝ наштетам на Ивана. Мартин ми покажа видеоснимки од него и Ивана и јас замавнав кон неа. Не се сеќавам дали ја удрив. Ивана рече дека ќе пријави во полиција, Мартин ѝ рече да пријави и дека ќе биде тука и ќе каже што се случило. Дојдоа полицајци, направија записник, ние кажавме дека сами ќе си го решиме проблемот. Полицајците ѝ рекоа на Ивана да си замине. Јас и Мартин се качивме во кола, се упативме кон булеварот, но нѐ пресретна црна „сеат ибица“, која ни нареди да излеземе. Ни кажаа дека истата личност пак пријавила вознемирување. Тогаш Ивана се приближи, а Мартин ѝ кажа „кажи што имаш оти немам време, треба да одам“. Полицијата ја праша кого сака сега да пријави, бидејќи Мартин почна да се однесува агресивно. Ивана почна да негира и рече дека никого не сака да пријави. Полицајците заминаа. Јас и Мартин повторно се упативме со неговото возило, за да ме остави дома. Но, ми ѕвонеше телефонот, јас не се јавив, па му ѕвонеше на Мартин. Кога видов, му реков на Мартин да не ја качува Ивана во кола. Но, тој ми рече, ќе ја качам и ќе видиш што ќе ѝ направам. Ја почекавме, таа се качи и Мартин почна да раскажува дека не сум бил свесен со каква личност сум живеел. Ѝ рече дека му било доволно од нејзиното лажење и дека ќе одиме да ја земеме Катја и ќе ги однесам кај мајка ѝ – рече Стојанче.

Откако Ивана ја зела Катја од „Песталоци“, Стојанче ја зел Катја во раце.

– Мартин рече „види какво детенце имаш, нели ти е жал да го изгубиш, јас да сум на твое место подобро би се убил отколку ова да го направам“. Јас си играв со Катја и стигнавме пред нашата зграда. Ивана инсистираше да се качи сама со Катја во станот. Јас се спротиставив и се качивме сите заедно. Кога сакав да влезам во станот за да ги почекам додека се спремаат, ми се вратија мислите за тоа што ми го подметнаа во колата и им го кажав тоа. Мартин почна да негира и ме влечеше со сила да излезам од станот. Јас се спротиставував, но Катја се вознемири и затоа јас го напуштив станот. Се симнавме јас и Мартин. Ивана ми ѕвонеше, јас не ѝ се јавив, па му ѕвонеше на Мартин и му кажала дека ќе ми се јави мене на камера. Се јавив на камера и Ивана беше со Катја во раце. Катја беше во лила џемперче. Почнав да викам „Ивана, Ивана“, се упатив кон влезот на зградат и слушнав силен тресок. Се упативме двајцата кон пролазот меѓу зградата и кафулето и Мартин почна да вика „Ивана, Ивана, Ивана паднала“. Јас кога го слушнав тоа се вознемирив уште повеќе, излегов на улицата, се фрлив пред кола, колата ме удри по ногата. Ја отворив вратата и им реков да свртат десно за да ми помогнат. Потоа се јавив во брза помош, со намера дека ќе им помогнат, дека се живи. Потоа не се сеќавам, дојдоа полицајци, почнаа да ме смируваат, да ми велат „добри се, добри се“ – сведочеше Стојанче.

Тој додаде дека идејата да се земе Катја порано била на Мартин. На прашањето дали Ивана постојано била вработена, Стојанче одговори дека била вработена, но примањата ѝ се движеле од 25.000 до 35.000 денари и затоа тој работел допонителна работа за да можат нормално да функционираат.

– Зошто Ивана ти ја поклони својата половина од станот? – праша адвокатот.

– Затоа што мајка ѝ ѝ соопштила дека таа има каде да живее, а од станот каде живеела претходно нема право да бара дел. А бидејќи мојата мајка индиректно во станот вложи 20.000 евра и живеевме од парите што јас ги заработувам, Ивана ми кажа дека е најпаметно станот да гласи на мое име. Затоа тоа го направивме – рече Стојанче.

Јавната обвинителка немаше вкрстени прашања за Стојанче.

ОБВИНИТЕЛКАТА ВЕЛИ ДЕКА СТОЈАНЧЕ СЕ СТАВА ВО УЛОГА НА ЖРТВА Таа тврди дека нема докази дека Мартин ѝ се заканувал на Ивана

The post МАРТИН МУ РЕКОЛ НА СТОЈАНЧЕ ДЕКА ИВАНА ГИ ЛАЖЕЛА ДВАЈЦАТА Јовановски сведочеше за дрогата, за удирањето, за критичниот ден appeared first on plusinfo.mk.

Обвинителката Адела Бојчевиќ продолжи со изведување докази против Стојанче Јовановски, кому му се суди за 3 кривични дела извршени врз неговата сега покојна сопруга Ивана Јовановска, која се самоуби со фрлање од 6 кат од нејзиниот стан, при што во смрт ја понесе и нивната 6-годишна ќерка Катја.

Бојчевиќ рече дека во доказите има записници, поплаки, анализи на снимки, записник од полиција за сите настани во кои се инволвирани Ивана и Стојанче, повеќе пријави од граѓани, меѓу кои и пријава од 20.12.2025 година дека машко лице се обидело да убие женско лице. Меѓу доказите се и лекарски извештаи од ТОАРИЛУЦ и од Психијатрија, извештај од училиштето „Јохан Хајнрих Песталоци“, анализа од вештачење мобилни телефони, како и дигитален запис од увид, односно, фото-албум од увидот со 51 фотографија со вознемирувачка содржина од настанот од 2.3.2026 година. Беше изведен и извештај од прегледани видео-записи од кафе-барот „Сома“ пред зградата на улицата Теодосиј Гологанов, кој беше презентиран во судницата.

– Едното видео трае 5 минути, од 2.3.2026 година во 14.05 часот. Се забележува како на бетонската подлога пред кафе-барот од горе паѓаат две лица, при што едно лице паѓа директно на подлогата, а другото при падот се одбива и се приближува кон лево на бетонската подлога. Неколку секунди подоцна до двете тела се приближува машко лице, видно во паника, се фаќа за главата. Ќе се гледа и видео од внатрешоста на кафулето, каде седат гости, на кое наеднаш се слуша звук, трескот. Се забележува како гостите стануваат од масите, вознемирени се и гледаат кон надвор, кон плочникот, каде паднале двете лица. Потоа се забележува паника и се слушаат пискотници – ја опиша обвинителката снимката и го пушти видеото од внатрешноста на кафе-барот „Сома“, на кое присутните во судницата го видоа моментот кога едно лице треснув на земјата со силен звук, веднаш пред кафе-барот.

Обвинителката потоа изведе како доказ службена белешка од 2.3.2026 година од прегледан видео-запис од училиштето „Нова“, на улицата Прашка.

– Ова видео трае 20 минути, а на него се гледа улицата Прашка. Во реално време од 11.6 часот се забележува како возило БМВ заминува од Карпош кон Центар. По една минута се гледа како Стојанче доаѓа пеш и застанува со Ивана на тротоарот пред училиштето. По една минута Стојанче ја удира Ивана силно по лицето, Ивана се повлекува и се затресува. Продолжуваат да се расправаат, Ивана се држи за лицето и седнува на оградата. Во 11.09 минути Ивана станува, се држи со едната рака по лицето, продолжуваат да се расправаат. По 1 минута се гледа како доаѓа возило БВМ, во сопственост на Мартин Саздов. Тој излегува, па сите тројца стојат до возилото и разговараат. Потоа Стојанче повторно ја удира Ивана со десната рака со шлаканица од десната страна од лицето, а нејзината глава се трга на страна од силината на ударот. Мартин застанува меѓу нив и го тргнува на страна Стојанче. Го фаќа за рацете за да престане да ја удира. Стојанче е видно вознемирен и зборува, објаснува нешто. Продолжуваат да разговараат, Стојанче прави некакви гестикулации, а Мартин повторно застанува меѓу нив. Но, Стојанче повторно ја удира Ивана со десната рака, со шлаканица по десната страна на лицето. Мартин се обидува да го оттргне Стојанче. Продолжуваат да се расправаат. Стојанче е видно агресивен, мафта со главата и нешто држи во рацете, најверојатно телефон. Потоа се качуваат во возилото. Ивана се обидува да влезе во возилото, а Мартин се обидува да ја спречи. Но, Ивана му ја трга раката, го бутка и влегува во возилото на задното седишта. Потоа тој низ отворена врата нешто ѝ зборува. Стојанче седнува напред, на совозачкото седиште. Во 12.07 часот возилото тргнува кон улицата Лондонска, односно, во насока кон студентскиот дом „Гоце Делчев“ – рече обвинителката.

Таа изведе докази и од камерите на Сејф сити.

– Се презентира пдф фајл, каде се гледа движењето на БМВ-то на 2.3.2026 година – рече обвинителката и презентираше каде се движело возилото на сведокот Мартин Саздов на критичниот ден.

И СТОЈАНЧЕ ЈА ПРИЈАВИЛ ИВАНА ДЕКА ГО ТЕПА Презентирани аудио снимки со вознемирувачка содржина

ИВАНА ГО ПРИЈАВИЛА СТОЈАНЧЕ ДЕКА ЧУВА ДРОГА ВО СТАНОТ Соседите пријавувале семејно насилство и дете како плаче и вреска

The post ОБВИНИТЕЛСТВОТО ПРИКАЖА ВИДЕО НА КОЕ СЕ ГЛЕДА КАКО ИВАНА ПАЃА ПРЕД ЗГРАДАТА Фотографиите од увидот по трагедијата не беа прикажани во судницата appeared first on plusinfo.mk.

Во продолжението на денешното рочиште против Стојанче Јовановски обвинителката Адела Бојчевиќ презентираше 9 фајлови кои се однесуваат на пријави, а пријавители се обвинетиот Стојанче, покојната Ивана, мајката на Стојанче, мајката на Ивана, како и други граѓани кои пријавиле малтретирање и тепање. Обвинителката најави дека ќе ги презентира хронолошки.

– Првиот запис е од 29.6.2025 година во 21.20 часот, пријавител е Ивана Јовановска. Се слуша како Ивана, многу вознемирена, со викање се јавува на 192 и вели дека сака да го пријави нејзиниот сопруг кој ја тепа. По гласот се слуша дека е многу вознемирена. Објаснува дека се наоѓа во Чаир, не ја знае адресата каде е, а сопругот не ѝ ја кажува адресата. Бара да ја најдат по локацијата на телефонот. Операторот ја упатува по локација да се јави на 112. Во позадина се слуша друг женски глас кој вика, „Ивана“ – рече обвинителката и го пушти аудиозаписот.

Во следниот презентиран аудио запис од 29.8.2025 година во 13.53 часот, пријавител е Љубица Стојановска, мајката на Ивана.

– Се слуша Љубица Стојановска, мајката на Ивана, со трепет во гласот и вознемирена, се јавува во полиција и пријавува дека ќерка ѝ Ивана е во бракоразводна постапка и има мака. Кажува дека Ивана отишла во станот да земе некои работи и дека таму бил сопругот Стојанче. Пријавува галама и дека Стојанче ја тепа. Додава дека не му е прв пат да ја тепа Ивана. Ја дава адресата на станот, улица Теодосиј Голаганов, ама не се сеќава на бројот на зградата и вели 59. Објаснува дека е бела зграда на 6. кат. Му вели на операторот дека и на 19-20 јануари во 1 часот ноќе комшиите пријавиле малтретирање. Му вели на операторот дека не може да ја добие Ивана и е загрижена. За цело време пријавителката Љубица е многу вознемирена и плаче, тешко зборува и се издишува и неколку пати повторува дека не му е прв пат на Стојанче да ја тепа нејзината ќерка – рече обвинителката и ја пушти аудио снимката.

Следниот аудио запис што го презентираше обвинителката е од сведокот Ивана Белчева од 19.12.2025 година во 13.02 часот.

– Се јавува пријавителката на 192 видно вознемирена, со трепет во гласот. Вели дека е кај „Тинекс“ во паркот кај вовчето во Ѓорче Петров.Вели дека маж и жена кои не ги познава се тепаат пред детето. Пријавителката вели дека го зела детето во раце за да не гледа, ама тие го зеле и сакале да си одат. Вели дека таткото ја тепа мајката пред детето. Ги моли полицајците што побрзо да дојдат – рече обвинителката и го пушти аудио записот од пријавата.

Беше презентиран и фајл, во кој пријавител е мајката на Стојанче, Цветанка Јовановска, од 20.12.2025 година, 19.05 часот.

– Овде цело време се слуша Катја како гласно плаче. Пријавител е женско лице кое тешко дише, како да собира сила. Цветанка пријавува дека настанот се случува на Теодосиј Гологанов 96. Во позадина се слуша плачењето на Катја што е толку гласно што Цветанка не се слуша што зборува. Катја силно плаче и вели „ќе ја убие мама“. На прашање на операторот што има таму, Цветанка одговара обид за убиство. Катја го засилува плачот и викањето и со силен глас вика „татко ми ќе ја убие мајка ми“. Цветанка пријавува дека детето е многу потресено и го зела детето со себе. Додава дека и детето е тепано, удирано. Катја низ плач вели „и мене ме удри и мене ме удри“ – рече обвинителката и го пушти аудио записот, кој беше исклучително вознемирувачки.

Обвинетиот Стојанче Јовановски по ова стана од местото во судницата и дофрли нешто, а судијата го опомена да не дофрла.

Обвинителката продолжи со изведување аудио запис во кој пријавител е обвинетиот Јовановски. Записот е од 10.2.2026 година, 17.03 часот.

– Се слуша како Стојанче ја пријавува Ивана за семејно насилство. Пријавува дека неговата жена го малтерира и не го пушта од дома. Пријавува дека Ивана му се заканува дека ќе го тепа и дека самата ќе се претепа. Вели дека настанот се случува во станот каде живеат. Му кажува на операторот дека Ивана и претходно го удирала неколку пати, ама досега не ја пријавувал. Додава дека е во тек постапка за развод и дека сè уште живеат заедно – вели обвинителката.

Следниот прикажан ауди фајл беше од критичниот ден, наутро, на 2.3.2026 година. Пријавител е Ивана Јовановска.

– Се слуша само како Ивана и Стојанче се расправаат на висок тон. Стојанче вели „Кажи ја вистината“. Во еден дел е неразбирливо, па Ивана му вели дека ја кажува вистината – рече обвинителката.

И во следниот презентиран запис пријавителка е сега покојната Ивана Јовановска. Пријавата е од 2.3.2026 година, 11.25 часот.

– Се слуша расправија, викање меѓу Ивана и Стојанче. Ивана за цело време му вика, „не те местам“. Го прашува „зошто ми се закануваше сега бе“? Стојанче ѝ вели „сакаш ли да те однесам во станица да пријавиш“. Ивана пак го прашува „зошто ми се закануваш, ништо ти немам направено, не сум рекла, не сум рекла“. Стојанче почнува да вика „нема шанси, лажеш“ и се слуша како ја удира Ивана. Таа почнува да вика „престани да ме удираш, престани да ме удираш“. Стојанче уште погласно вика „не лажи“. Ивана за цело време се брани „дали јас те имам наместено, дали ти реков дека Мартин те има наместено, немам кажано такво нешто. Сѐ што имаш направено си имаш направено сам“. Цело време таа го повторува ова. Ивана му вели „сакаш ли да одиме во Пролеќе, а ако сакаш да одиме кај Трајче“. Стојанче со висок тон ја прашува „што сакаш?“. Таа му вели „сакам да живеам со тебе“. Му вели „не ме мавај, не ме мавај“. Стојанче прашува „дали ти се закануваше?“. Ивана одговори „да, ми се закануваше дека ќе ми го уништиш животот“. Стојанче вели „ќе ти го уништам животот“. Ѝ вика на Ивана, „ниту Катја ќе ја видиш, ништо нема да видиш. Ако сакаш пријави ме, кај сакаш иди. Ќе лежам во затвор, ќе излезам“. Потоа ѝ вели „подобро убиј ме“. И пак го повторува истото. Потоа ѝ вели „друго немаш избор, памти ми го ова“ – рече обвинителката, по што го пушти исклучително вознемирувачкото аудио, снимено неколку часа пред самоубиството на Ивана.

На аудиото Ивана силно и вознемирено се дере на сиот глас, гласно се дере и Стојанче и се слуша како ја удира Ивана.
На ова аудио, во траење од околу 2 ипол минути, се слуша и операторот кој неколку пати повтори „Ало, полиција“, ама никој не му се обрати.

Во еден момент додека се презентираше снимката обвинетиот Стојанче рече во судницата „Мартин е ова“, по што судијата го опомена дека ќе го отстрани од судницата.

Одбраната реагираше дека на снимката се слушаат тројца. Обвинителката додаде дека на крајот од снимката се слуша како Стојанче вели „ќе ве тепам и тебе и него“.

Обвинителката потоа презентираше уште една пријава од Ивана Јовановска од критичниот ден во 12 часот.

– Ивана се јавува на 192 и кажува дека сака да пријави семејно насилство. Таа е вознемирена и е на раб да заплаче. Кажува дека се наоѓа пред судот и дека пред малку разговарала со полициски службеници на кои им рекла дека не сака да пријави, ама сега сака да пријави. Рече дека сопругот Стојанче е со неа. Додава дека е на паркинг кај Судска палата и ако може полицијата побрзо да дојде – рече обвинителката.

Последниот прикажан фајл во судницата е од критичниот ден кога Стојанче бара да се викне брза помош.

– Пријавител е Стојанче Јовановски, на 2.3.2026 година во 14.04 часот. Стојанче, многу вознемирен, низ викање бара да се прати брза помош на Теодосиј Гологанов 96, каде, како што вели, жена со мало дете се фрли од балкон. „Ве молам, мало дете“, повторува – рече обвинителката и го пушти записот на кој се слуша како Стојанче вика брза помош и многу силно вреска.

ИВАНА ГО ПРИЈАВИЛА СТОЈАНЧЕ ДЕКА ЧУВА ДРОГА ВО СТАНОТ Соседите пријавувале семејно насилство и дете како плаче и вреска

The post И СТОЈАНЧЕ ЈА ПРИЈАВИЛ ИВАНА ДЕКА ГО ТЕПА Презентирани аудио снимки со вознемирувачка содржина appeared first on plusinfo.mk.

Поради изнесување вознемирувачка содржина во доказите обвинителката Адела Бојчевиќ побара внимателен и одговорен пристап во известувањето на јавноста, за да не дојде до дополнителна виктимизација на жртвите во процесот против Стојанче Јовановски, чија сопруга Ивана Јовановска се фрли од 6. кат во скопската населба Тафталиџе на 2 март 2026 година, понесувајќи ја во смрт и нивната 6-годишна ќерка Катја.

На денешното рочиште во Кривичниот суд се изведуваат материјални докази против Јовановски од страна на Јавното обвинителество. На Јовановски му се суди за 3 кривични дела: Телесна повреда, Загрозување на сигурноста и за Наведување на самоубиство и помагање на самоубиство. Според обвинението, Стојанче со тепање и малтретирање, со сурово и нечовечко постапување, создал чувство на страв и безнадежноост кај Ивана, која без да ги контролора своите постаплки, скокнала од станот со малолетното дете.

Обвинителката како докази изведе известувања од МВР, оддел за крвни деликти, записникот од увидот на местото на трагедијата, изготвен на 3.3.2026 година, како и презентација на аудио записи од ЦУК. Таа најави презентација на аудио записи од 2024, 2025 и од 2026 година.

– Во цедето од 2024 има фотографија од пријава во системот, во која се гледа пријавител на настан, Цветанка Јовановска, мајката на Стојанче, пријавата е од 30.6.2024 година. Вториот фајл е аудио, се јавува сосетка која пријавува вознемирување што доаѓа од станот до неа на улицата Митрополит Гологанов 96. Кажува дека има бучава, галама, дека мало дете плаче и вреска. Дали се тепаат, таа не знае и сака да остане анонимна – рече обвинителката и го пушти аудио записот пред Судот.

Обвинителката Бојчевиќ потоа презентираше докази од 2025 година.

– Во овој фолдер е фотографија од пријава во систем од анонимен пријавител на 21.1.2025 година во 1 часот и 8 минути. Вториот фајл е запис од таа пријава, од машко лице кое бара да остане анонимен, се јавува од Теодосиј Гологанов 96 и вели дека во соседниот стан комшиите се дереле, а жената дошла кај нив и кажала дека сопругот ја тепа и дека таа сега е кај нив дома – рече обвинителката.

Потоа таа презентираше два аудио записа од 15.10. 2025 година. Во едниот Ивана бара помош на 112 за да влезе во станот, а во другиот Ивана го пријавува Стојанче дека тој во станот чува дрога.

– Се слуша како се јавува Ивана Јовановска и го прашува операторот каде треба да се обрати кога некој ѝ го има заклучено станот и не ја пушта да влезе. Прашува каде да се обрати да ѝ го отворат станот во кој живее. Операторот ѝ вели да се обрати во Куќниот совет, а ако не добие помош, ќе викнат пожарникари. Ивана вели дека Куќниот совет нема клучеви и бара да ја поврзат со полиција. Операторот пак ѝ вели да се јави во Куќниот совет, а потоа ќе викнат пожарникари да ја скршат вратата. „Значи пожарникарите ќе ја скршат вратата“, прашува Ивана и додава дека нема проблем со тоа – рече обвинителката.

Бојчевиќ презентираше и аудио запис за пријава за дрога.

– Во овој фајл Ивана на 112, го пријавува Стојанче дека чува дрога, а тој во тој момент е заклучен во станот и не ја пушта да влезе. Вели во мојот стан сопругот чува дрога. Оператотот бара податоци за пријавителот, а таа бара да ја поврзат со полиција. Таа потоа се обраќа до Стојанче, кој е внатре во станот „Ќе отвориш или да те пријавам“, по што се исклучува – рече обвинителката.

Процесот го води судијата Ивица Стефановски.

The post ИВАНА ГО ПРИЈАВИЛА СТОЈАНЧЕ ДЕКА ЧУВА ДРОГА ВО СТАНОТ Соседите пријавувале семејно насилство и дете како плаче и вреска appeared first on plusinfo.mk.

Александар Стојановски, брат на покојната Ивана Јовановска, денеска сведочеше за оставинската постапка, за делбата на имотот и за односот со обвинетиот Стојанче Јовановски. Тој рече дека не е убеден дека сестра му доброволно се враќала кај Стојанче, туку дека била уцената. Исто така, рече дека некои нејзини чекори биле чудни и неразбирливи за нејзиното пошироко семејство.

На прашање на обвинителката Адела Бојчевиќ тој го опиша односот меѓу покојната Ивана и обвинетиот Стојанче и рече дека во почетокот имал сознанија дека сѐ е во ред освен „мали кавги и недоразбирања што се нормални во брак“.

– Пред да се земат, имавме заеднички пријатели и познаници. Откако стапија во брак, тие заеднички пријатели постепено се губеа, веќе не се дружеа со мојата сестра. Сестра ми беше порано многу социјална, се дружеше. Заедно со мене почна да волонтора во Црвен крст, беше дружељубива. На крајот на 2024, почетокот на 2025 година забележав промена во нејзиното однесување, особено во нејзините пораки на социјалните медиуми. Во тој период ми кажа дека има мали проблеми што ги решава и дека сѐ ќе биде како што треба. Од почетокот на 2025 до август, престана да ми испраќа фотографии од Катја. На целото семејство ни стана сомнително дека нешто се случува. По настанот на автопатот во Штип, Ивана и Катја дојдоа да живеат во станот на мајка ми и тогаш Ивана почна да ни раскажува. Ми се довери дека има сериозни проблеми и ѝ треба помош да ги реши. Татко ми ангажираше адвокат за да почне бракоразводна постапка. Ивана ми се довери за станот. Рече дека се сомнева дека обвинетиот има направено фалсификат и дека без нејзина согласност го префрлил станот на свое име. Ивана не била на нотар. Ова го знаеше и адвокатот што го ангажираше нашиот татко. Таа рече дека има доказ и дека ќе му го даде на адвокатот, ама тоа не се случи. Рече дека има и дополнителни докази за некои активности на обвинетиот во нејзиниот телефон и дека се плаши. Ѝ реков да ги извади од телефонот, да ги стави на УСБ и да ни ги даде на мене и на адвокатот, оти од тој момент сериозно се загриживме за неа – сведочеше братот на Ивана.

– Дали забележавте дека Ивана се плаши од сопругот? – праша обвинителката.

– Да, во неколку наврати. Еднаш кога Стојанче сакаше да ја види Катја. Ивана не му забрануваше, ама јас ја видов како стои на тераса и се тресе од страв дека нешто може да се случи. Од моментот кога дојде кај нас, но и во јануари, кога се врати во нејзиниот стан, таа ја исклучи апликацијата Фејсбук, и повеќе не ја користеше. Најмногу комуницираше со нас физички, ни кажа на мене и на мајка ми дека телефонот ѝ е контролиран, дека Стојанче често ѝ го проверува, за да види со кого комуницира. Комуницираме само кога Ивана отиде во болница во јануари. Ивана ни покажа пораки во кои Стојанче ѝ се заканува за некои 5.000-6.000 денари кои му фалеле. Беше решена да го пријави во полиција за закани. По неколку дена Стојанче беше фатен со дрога. Тогаш Ивана, на наше чудење, реши да се врати со Катја кај него дома. Тоа не можевме да го разбереме – рече братот на Ивана.

Тој рече дека во неколку наврати ѝ помагал на Ивана со позајмици, но дека стравувал дека парите ќе се искористат за адвокат за Стојанче во случајот со дрогата. Тој додаде и дека кога било во болница Ивана, вршеле притисок да ѝ се направи да се направи колоноскопија за да се види дали повредата е од удар, бидејќи се сомневале дека болката во стомак е од тепање.

Тој рече дека Ивана му рекла дека Стојанче имал пиштол и дека ѝ се заканувал со Катја и со станот.

Во периодот кога починал татко им, Александар рече дека Мартин Саздов им помогнал околу погребот и бил со нив.

– Како брат почувствував потреба да го довршам тоа што го почна татко ми и се активираше барањето за развод, а Катја и Ивана да останат кај мајка ми во станот. Ивана ни кажа дека Стојанче ѝ се закнувал дека ќе ѝ го земе станот. Ѝ побарал 30.000 евра да го исплати и да си оди. Сестра ми побара да ѝ помогнам. Се согласив, ѝ реков дека тоа треба полека да го решиме, ама мора да бидеме сигурни дека нема да биде измамена, парите да ѝ се земат и ништо друго да не се случи – рече Александар.

Тој рече дека пробувале да ја разубедат Ивана во врска со станот, дека таа размислувала да ги доуреди собите за да живеат со Катја кај мајка ѝ и дека и Катја била расположена за тоа.

– Кога Стојанче почна почесто да ја гледа Катја, таа почна да се затвора, да не ни се доверува, на моменти ни велеше „вие многу сакате се да знаете“. Почна да ѝ зборува на Ивана „зошто ти не сакаш да се смириш со мојот татко?.“ Почнавме да се сомневаме дека тоа е резултат на влијание од Стојанче – додаде тој.

Во врска со оставинската постапка за имотот на нивниот татко, сите четворица наследници усно се согласиле целиот имот да се префрли на мајката. На неколку закажани средби кај адвокат и кај нотар Ивана не дошла. Таа рекла дека се консултирала со адвокати и дека нема да има никаков проблем ако не се разведе во моментот, дека Стојанче нема никаква шанса да земе од тој имот. Потоа продолжиле со оставинската постапка и планот за делба на четири дела.

На закажаниот термин на нотар Ивана повторно не се појавила.

– Не ми креваше на телефон, почнавме да си пишуваме пораки. Се случуваше нешто чудно, оти тоа не беше начинот на комуникација на Ивана. Ѝ реков дека треба да завршме, да не се оддолжува процесот, а во порака добив одговор дека таа преку суд ќе среди сите еднакво да ги добиеме деловите, дека не може вака и дека ќе се слушнеме преку адвокати. Дека Ивана треба да ја земе колата од татко ми. Така сфатив дека тоа го пишува некој друг, затоа што сестра ми веќе знаеше дека ќе го поделиме имотот на 4 дела, а колата ќе ја земе мајка ни, а пораките беа како некој прв пат да слуша за тоа. Ова ми дојде многу сомнително – рече Алексаднар.

Дента кога требало да одат на нотар, Ивана не дошла, но Стојанче му се јавил на Александар и му се заканувал дека ќе го запали имотот на мајка им.

– Дали ја прекинавте постапката за оставина? – праша обвинителката.

– Да. Сфативме дека ако продолжиме мојата сестра ќе биде во голем ризик со нејзиниот дел што ќе ѝ припадне, да располага некој друг. Вратата на станот на мајка ни во секој момент беше отворена за сите деца да се вратат дома ако имаат проблем – рече Александар.

Адвокатот на обвинетиот Јовановски го праша Александар дали Ивана доброволно се враќала кај Стојанче?

– Не. Покрај сите овие работи и уцени и закани и стравот за Катја, особено кога беше во болница и постојано ја бараше Катја, јас не сум убеден дека сестра ми доброволно се враќала кај Стојанче – рече Александар.

Тој одговори дека заканите на Стојанче дека ќе го запали имотот не биле пријавени во полиција.

– Не се пријавени. По приведувањето на Стојанче за дрога Ивана едвај чекаше тој процес да заврши, оти поради количината на дрога сметаше дека казната затвор ќе биде долга, па таа ќе биде послободна. Ние не сакавме дополнително да оптоваруваме, па затоа тие закани не се пријавени – објасни тој.

По ова сведочење јавната обвинителка го повлече предлогот да сведочи мајката на Стојанче, Цветанка Јовановска, оти смета дека веќе се расветлени потребните факти, па нејзиното сведочење нема дополнително да придонесе за доказната постапка.

На следното рочиште ќе се изведуваат материјални докази.

The post БРАТОТ НА ИВАНА Е УБЕДЕН ДЕКА ТАА СЕ ВРАЌАЛА КАЈ СТОЈАНЧЕ ПОРАДИ ЗАКАНИ И УЦЕНИ Оставинската постапка била прекината поради ризик Стојанче да располага со делот на Ивана appeared first on plusinfo.mk.

Сосетка на Ивана и на Стојанче сведочеше денеска дека подолг период во зградата се слушале викање, тропање, удирање со столици, гласови на Катја.

– Една ноќ кон 2 часот слушнавме „тато ќе ја убиеш мама“. Малата Катја викаше, се слушаше. Излегов надвор ама во ходникот не се слушаше ништо. Мислам дека и некои од другите комшии тогаш излегоа во ходниците. Јас лично два пати имам повикано полиција од ПС Карпош. Се качувавме заедно по катовите да откриеме од каде се викањето и тепањето. Првиот инспектор беше коректен, запиша дека не најдовме ништо, оти од ходник ништо не се слушаше. Викањето се слушаше вертикално, во становите. Вториот полицаец кога дојде беше многу дрзок и нервозен, лупаше по становите, прашуваше на кој кат е, му реков не знам. Знам дека е над мене. Тропна на неколку стана, по што мене ми се закани дека ќе добијам кривична за лажно пријавување – сведочеше сосетката Тања.

Таа вели дека пред околу две години за првпат го слушнала тепањето.

– Им се извинив на комшиите за тропањето по врати од страна на полицаецот. Една сосетка рече дека Катја излегувала сама и тропала по вратите и барала помош за мајка ѝ. Еднаш дошла мајка ѝ на Ивана да ја земе Катја, девојчето било босо, па ѝ дала патики – додаде сведокот Тања.

The post СОСЕТКА СВЕДОЧЕШЕ ДЕКА ПОДОЛГО ВРЕМЕ СЕ СЛУШАЛО ВИКАЊЕ ОД СТАНОТ НА ЈОВАНОВСКИ Полицаец ѝ се заканил со кривична за лажно пријавување appeared first on plusinfo.mk.

Наставничката на Катја Јовановска сведочеше денеска во судот. Таа рече дека на првата родителска средба не биле присутни родителите на Катја, Ивана и Стојанче, туку мајката на Ивана. Мајката на Ивана со плачење ѝ рекла дека Ивана не е состојба да дојде поради семејно насилство што го трпи дома. Наставничката го известила училишниот психолог за тоа.

– Психологот ми даде насоки да ја следам ученичката. По некој ден, девојчињата си играа и забележав дека Катја падна на подот. Ги прашав дали играат некоја игра или прават драматизација на некоја приказна. Катја рече дека татко ѝ кога ја удирал мајка ѝ, таа така паѓа. Веднаш го известив психологот и таа разговараше со Катја. Катја ѝ рекла дека нејзините родители се разведени и дека таа е со мајката. Психологот ја повика на разговор Ивана и ја упатила Ивана каде да се обрати во случај на семејно насилство. Понатаму се изгледаше дека е во ред. На почетокот кога ја учевме темата „кој сум јас, кое е моето семејство“, Катја ја црташе само мајката. Кога ја прашав зошто, рече „јас сум со мама“. Катја се однесуваше како и сите други деца. Не покажуваше потиштеност, не покажуваше вознемиреност или затвореност. Беше отворена со сите ученици, изгледаше среќно, другаруваше со сите и не помисливме дека нешто се случува во семејството. Нејзините цртежи секогаш беа ведри, со убави бои, лицата на луѓето и сонцето ги црташе насмеани. Така беше сѐ до пред Нова година. На крајот на октомври во училница влезе татко ѝ на Катја, јас реков дека не е дозволено родители да влегуваат и училница. Тој се претстави, Катја кога го виде се израдува. Учениците сите му пријдоа и му дадоа комплименти дека е многу дотеран. По неколку минути влезе и Ивана и заедно заминаа – сведочеше наставничката.

Таа рече дека Катја од училиште најчесто да ја носела мајка ѝ или баба ѝ, а татко ѝ ниту еднаш. Најчесто ја земала Ивана, а еднаш вујкото на Катја.

На прашањето дали Стојанче доаѓал на училиште, таа одговори:

– Дојде уште еднаш, нервзоен, бараше број од родител на еден ученик за кој рече дека ја задевал Катја. Мојот совет беше дека тие се деца и дека ние имаме механизми да ги решиме проблемите меѓу децата, дека тоа се нормални, секојдневни…

– Дали бевте на работа на критичниот ден, 2 март? – праша обвинителката.

– Тој ден ја донесе бабата, влезе и ни го предаде ранцот. На пауза забележав дека Катја не го носи дуксерот од униформата, ја прашав, рече дека не знае, мајка ѝ веројатно го испрала. Беше облечена во блуза и во елек кои беа нови и на кои стоеја етикетите. Рече вчера бевме во шопинг со мама, беше многу среќна. Во 12 часот направивме примопредавање со колешката, јас си заминав. Колешката ми се јави вечерта околу 20 часот, вознемирена, затоа што една од родителите ѝ се јавила и ѝ рекла дека Катја и мајката се мртви. Ми рече дека Ивана ѝ се јавила околу 11.30 и ѝ рекла дека тој ден Катја од училиште ќе ја земе нејзината мајка. Но околу 13.30 Ивана била во училиштето, учениците биле надвор на физичко. По часот Ивана ја зела Катја. Сакам да додадам, секогаш кога мајка ѝ ќе ја земеше Катја, таа беше многу среќна. И тој ден двете биле среќни, се гушкале и се бацувале – рече наставничката на Катја.

The post НАСТАВНИЧКАТА ДОБИЛА НАСОКИ ОД ПСИХОЛОГОТ ДА ЈА СЛЕДИ КАТЈА На критичниот ден бабата требало да ја земе од школо, но дошла Ивана appeared first on plusinfo.mk.

Сведокот Мартин Саздов денеска одговараше на прашања од судијата и од одбраната и рече дека Ивана од страв ги повлекувала пријавите за семејно насилство. Тој рече дека не му се живее после оваа трагедија.

На прашање од адвокатот на Стојанче Јовановски дали некогаш Саздов пријавил во полиција, бидејќи Ивана била тепана пред него, сведокот рече:

– Јас отидов во Полициската станица Пролет, а тие ме избркаа, ми рекоа „кој си ти да пријавуваш“. Ме избркаа од станица и не знаев понатаму што да правам.

Тој рече дека иако бил сведок на тепањето пред судот, кога дошла полиција не пријавил, зашто рече дека Ивана сакала мирно да се реши работата.

– На критичниот ден, дали вие влијаевте на Стојанче да се симне пред зградата? – го праша адвокатот на Стојанче.

– Да. Се плашев да не ја тепа – рече сведокот.

После тоа во судницата се соочија поранешните пријатели Стојанче и Мартин. Стојанче го праша:

– Дали со Ивана постојано правевте план како да се ослободите од мене?

– Да – потврди сведокот Саздов.

– Дали со Ивана ми ја наместивте дрогата?

Сведокот негираше.

– Дали ја присилувавте мојата сопруга Ивана да се дрогира и да биде протов мене?

– Јас не сум ја присилувал Ивана да се дрогира. Ивана ми велеше дека Стојанче ја присилувал да се дрогира, додека ја тепал. Јас се лутев, ѝ велев зошто зема кога е родотел. Велеше „Морав, за да си го вратам дарот“ – рече Мартин.

– Дали ја присилувавте мојата сопруга да имате интимни односи и да се снимате? – праша Стојанче.

– Никогаш не сум ја присилувал на такво нешто. Никогаш не сум ѝ зборувал да се дрогира – рече Мартин.

– Дали знаеш дека мојот телефон беше спарен со телефонот на мојата сопруга и го знам секој ваш муабет и план против мене, да се ослободите од мене?

– Јас би сакал да ги приложи тие докази, дека сме планирале такво нешто – рече сведокот.

Стојанче го праша зошто го нападнал со пушка калашников кога го удрил со возилото и зошто не го пријавил во станица кога му ја  удрил колата.

Мартин одговори дека му било жал, дека Стојанче имал доволно пороблеми и негираше какво било нешто со калашников. Рече дека неговото возило го тргнал другар со кого се договориле да кажат дека некој друг го удрил.

Стојанче го праша Мартин зошто пратил полицаец да му се заканува и да го тепа, а Мартин негираше дека познава таков човек.

– Како завршија видеата меѓу Мартин и Ивана во мојот телефон, рековте дека со такви видеа сум ја уценувал? – праша Стојанче.

– Ивана ми рече „те молам прати ми ги видеата, многу ми е важно“, а потоа дознав дека Стојанче ја тепал за да го напише тоа. Јас никогаш не сум ѝ се заканувал на Ивана. Откако ѝ ги пратив видеата, Ивана ми кажа дека Стојанче ѝ се заканувал дека ќе ги покаже видеата на сите и ќе ја прикаже како неморална жена – рече Мартин.

На прашање од обвинителката праша дали некогаш видел како Стојанче ја тепа Катја, Мартин негираше, но додаде дека слушнал како ја навредува Катја.

На прашање од судијата Ивица Стефановски, Мартин рече дека не знае колкави ѝ биле месечните примања на Ивана, но дека се жалела дека Стојанче ѝ ги зема парите, дека нема пари за да ѝ купи на Катја јадење, дека Стојанче го земал тоа што го купувала за Катја да јаде. Мартин рече дека Ивана немала пари за да живее под кирија. Рекла дека ќе бара уште една работа.

На прашањето дали сама се грижела за Катја, Мартин рече:

– Не помагаше Стојанче, Ивана сама се грижеше. Јас им купив јакни на Катја и на Ивана додека беа кај мајка ѝ на Ивана, оти немаа во тој период јакни, а не можеше да отиде до станот да си земе. Сама се грижеше за детето, а еднаш ми рече дека никој не ги чувал нив двете како јас. Го имам тој разговор. Стојанче не даваше пари за Катја. Единствено нешто што ѝ купил беше ташничка за ликовно. Еднаш Катја му изела нешто на Стојанче, а тој почнал да вика зошто му го изела.

Тој рече дека Ивана под присила му го препишала нејзиниот дел на Стојанче. Ивана кажувала дека тој направил фалсификат документ со нејзин потпис. Ивана била загрижена дека ќе остане на улица.

– Дали Ивана немаше каде да живее? – праша судијата.

– Очигледно не. Ѝ велев оди кај мајка ти, не сакаше. Не сакаше ниту под кирија. Дури и мајка ми ја викна да дојде да живее кај нас – рече Мартин.

– Во какви односи беше Ивана со нејзионите родители? – праша судијата.

– Прво беа во добри дноси, ама неколку дена пред настанот, не зборуваше со мајка ѝ и со брат ѝ оти ѝ кажале да се потпише дека се откажува од оставинската на татко ѝ, поради ситуацијата со Стојанче – рече Мартин и потврди дека Стојанче на Ивана често и се заканувал дека ќе ѝ ја земе Катја.

– Дали ова значи дека Ивана немала услови за живот во смисла на сместување и храна и облека за неа и за детето? – праша судијата.

– Да. Дури и мајка ѝ и мајка му на Стојанче им носеа скришно јадење на неа и на Катја. Слушнав дека кога мајка ѝ на Ивана им однела јадење за нејзе и за Катја, Стојанче јадењето го фрлил во канта. Затоа скришно им носеле храна – рече Мартин.

Тој рече дека Стојанче ѝ се заканувал на Ивана со видеата при тужбата за развод.Дека псоледен пат, на критичниот ден, Стојанче ја удрил Ивана зад судот, пред да дојдат полицајците.

– Имаше од претходно модрици, покриени со пудра, по лицето, вратот, нозете. Ми рече дека тоа ѝ е од што ја туирнал по скали во болницата, а и од дома што ја тепал. А тоа што беше на дигестивна ѝ било од тоа што Стојанче ја газел на стомакот. Дента имаше црвенило. Јас барав Ивана да се врати во болница, ама таа не сакаше. И докторот ми кажа дека Ивана лежела во болница од повреда од удари – рече Мартин.

– Зошто Ивана се враќаше кај Стојанче? – праша судијата.

– Зашто сакаше да си го врати делот од станот. Ми велеше „Мартин, мора да бидам добра кон него, за да ми го врати делот, немам друг избор“ – заврши сведокот Мартин.

Потоа сведочеше Ивана Белчева од Скопје, која била сведок на тепањето што се случило на 19 декември во Ѓорче Петров.

– Стојанче ѝ удри шлаканица на Ивана. Јас и една жена застанавме меѓу нив, а јас ја зедов Катја во прегратка. Почнав да ја смирувам за да ѝ го намалам тресењето, бидејќи детето беше премногу вознемирено. Во таа кавга присуствуваше уште една жена. Катја не знаеше која е таа. Ивана почна да ја навредува жената и кавгата се вжешти. Стојанче пак ја нападна Ивана со повеќе удари по главата и по телото. Во тој момент викнав полиција, рекоа ќе дојдат. Му реков на Стојанче дека прави кривично дело, дека не смее да ја тепа сопругата. Тој ја зеде Катја, не ми одговори ништо, ме гледаше заледено. Сфати дека викнав полиција и си замина со Катја. Останаа Ивана и другата жена. Застанав со Ивана и ѝ објаснив дека ги знам постапките за пријавување семејно насилство и ќе останам со неа за да го пријави случајот. Но Ивана не беше заинтересирана за тоа што јас ѝ зборував, повеќе сакаше да зборува со другата жена. Јас ја почекав полицијата. Кога дојдоа ја замолив Ивана да го пријави Стојанче, но таа и жената си заминаа. Дадов изјава пред полицијата, тие направија записник – рече Белчева.

The post СТОЈАНЧЕ ЈА ПРИСИЛУВАЛ ИВАНА ДА СЕ ДРОГИРА Јовановски тврди дека Мартин и Ивана правеле план како да се ослободат од него appeared first on plusinfo.mk.