Вториот стожер на Стратегијата Македонија 2030 е економската конкурентност и нов модел на раст, рече денеска Валентин Манасиевски од ВМРО-ДПМНЕ.

Стратегијата „Ново поглавје – Македонија 2030“ поставува јасна цел за создавање модерна и просперитетна држава што се потпира на работа, знаење и стабилни институции, рече Манасиевски. Нашата економија, додаде, мора да премине кон систем што создава вредност, а не зависност.

– Вториот стожер што денеска го претставуваме е економска конкурентност и нов модел на раст. Нашиот фокус е структурната трансформација, односно, од економија базирана на ниски плати во минатото, да се стремиме кон економија базирана на знаење, иновации и висококвалификуван кадар. Имаме конкретни чекори и план како да стигнеме до оваа реализација. Развој на индустрии со висока додадена вредност, како модерна технологија, ИКТ, биотехнологија, фармација и инженеринги тие да бидат нашите двигатели на новата економија – рече Манасиевски.

Следен чекор е дигитализација и автоматизација во бизнис-секторот, додаде тој.

– Само модерни компании можат да влезат во европските производствени и технолошки синџири. Планираме голема поддршка за домашните претпријатија. Домашниот бизнис е мотор на економијата. Затоа, обезбедуваме подобри услови за инвестиции, пристап до капитал и намалени административни бариери. Стабилен и предвидлив даночен систем. Ниту една компанија не би инвестирала во држава која ги менува правилата според дневна политика, затоа стабилноста е суштинска – истакна Манасиевски.

Последен чекор во овој стожер, додаде тој, но и многу важен, е зелена транзиција и енергетска независност. Се работи на зголемени инвестиции во обновливи извори, модернизација на енергетските мрежи и развој на зелени технологии.

– Овој економски стожер ја поставува Македонија на траекторија на реален раст. Нашата цел е систем што создава можности, задржува талент и ја прави државата конкурентна во Европа. За да можат младите да останат да работат тука, да творат и да живеат дома, во Македонија – рече Манасоевски.

The post ОД ЕКОНОМИЈА БАЗИРАНА НА НИСКИ ПЛАТИ, КОН ЕКОНОМИЈА БАЗИРАНА НА ЗНАЕЊЕ И ИНОВАЦИИ Економската конкурентност е вториот стожер на Стратегијата Македонија 2030 appeared first on plusinfo.mk.

ВМРО-ДПМНЕ како државотворна и одговорна партија, носител на државноста низ изминатите години, уште еднаш ја потврди својата посветеност за развој на Македонија – на последниот партиски конгрес, покрај политичките и партиските одлуки, донесе и важен државнички документ, „Ново поглавје – Стратегија Македонија 2030“, кој претставува визија за модерна, стабилна и европски ориентирана Македонија, соопшти партијата.

„Оваа Стратегија на долг рок поставува јасен правец и систем на управување, што ќе ја замени импровизацијата со институционална зрелост, со крајна цел, држава што создава економска моќ, стабилност и самодоверба. Првиот стожер на стратегијата Македонија 2030 е државната безбедност, која во време на сериозни геополитички промени, сајбер-напади и хибридни закани станува основа за секоја друга државна политика. Со овој стожер, Македонија го отвора новото поглавје на државноста што ја градиме заедно, чија стратегија за државната безбедност и стабилност се темели на четири приоритети“, соопшти ВМРО-ДПМНЕ.

Првиот приоритет, се додава, е модерна Армија со реални НАТО стандарди, со технолошко унапредување, современи системи на командување и развој на сајбер-одбранбени единици – Армија што навистина го штити државниот интерес.

„Сајбер просторот е новото боиште на современиот свет, затоа сајбер-безбедноста е вториот приоритет на овој прв стожер од Стратегијата. За поголема сајбер-безбедност на Македонија е потребен национален центар за дигитална отпорност, јасни протоколи и стандарди што ќе ги штитат институциите, банките и критичната инфраструктура“, се вели во соопштението.

Одбрана од хибридни закани и дезинформации е третиот приоритет, се додава во соопштението.

„За тоа создаваме државен механизам за анализа, брза реакција и заштита на демократските процеси, без нарушување на слободата на говор, но со заштита на вистината. Четвртиот приоритет е модерен систем за управување со кризи, кој опфаќа централен команден столб, автоматизирани процедури и регионална координација за брза, професионална и предвидлива реакција. Само модерна држава која е отпорна и институционално заштитена може да обезбеди развој и стабилност. Затоа безбедноста е темелот на државата и само стабилна и заштитена Македонија може да биде економски силна, институционално зрела и политички самоуверена“, соопшти ВМРО-ДПМНЕ.

The post ЧЕТИРИ ПРИОРИТЕТИ ЗА ДРЖАВНАТА БЕЗБЕДНОСТ Стратегијата Македонија 2030 ќе ја замени импровизацијата со институционална зрелост appeared first on plusinfo.mk.

Владејачката партија ВМРО-ДПМНЕ го промовира „Ново поглавје – Стратегија Македонија 2030“, документ кој според партијата треба да отвори деценија на стабилност, економски развој и модернизација на државата. Стратегијата, усвоена на 18-иот конгрес, содржи шест стожери преку кои партијата најавува дека Македонија до 2030 ќе стане „стабилна, силна и институционално зрела држава“.

Од партијата велат дека новиот документ ја поставува рамката за долгорочно управување и напуштање на „импровизациите“ во политичкиот систем.

„Ова е стратегија што ја гледа Македонија во иднината, а не од денес до утре. Со неа градиме држава која не реагира во криза – туку планира и води“, соопштија од ВМРО-ДПМНЕ.

Партијата најавува силен фокус на државната безбедност. Според документот, Македонија ќе треба да изгради модерна армија, национален систем за сајбер-заштита и подготвеност за справување со хибридни закани.

„Безбедноста е темел на секоја стабилна држава. Македонија мора да биде заштитена и од физички закани, и од дигитални“, велат од партијата.

Втор стожер е економската конкурентност, префрлање од модел на евтина работна сила кон економија заснована на технологија, иновации и знаење. Стратегијата предвидува поддршка за домашните компании, стабилен даночен систем и зелена енергетска транзиција.

Правната држава е третата точка: независно судство, департизирана администрација и системска борба против корупцијата, особено преку дигитализација.

„Корупцијата ја кочи државата. Ќе се бориме со систем, не со изолирани акции“, велат од ВМРО-ДПМНЕ.

Документот воведува и демографски политики, поддршка за младите, станбени програми, поврат на дијаспората и подобра грижа за постарите лица.

Во делот за надворешна политика, стратегијата поставува рамка на „партнерства со јасни црвени линии“.

„Нашата позиција е јасна: да за Европа, но без условувања кои задираат во идентитетот“, нагласуваат од партијата.

Шестиот стожер – образование, култура и идентитет, предвидува инвестиции во модерни наставни програми, дигитални кампуси, поддршка за науката и заштита на македонскиот јазик и културно наследство.

Стратегијата, според партијата, е „нова страница во развојот на државата“.

„Македонија знае, може и мора многу повеќе. Ова е државничка визија за силна и европска Македонија“, порачуваат од ВМРО-ДПМНЕ.

The post БЕЗБЕДНОСТ, ЕКОНОМИЈА И ЕВРОПА БЕЗ УСЛОВУВАЊА Власта со амбициозен план до 2030 година appeared first on plusinfo.mk.