Амбулантите низ Скопје овие денови се преполни со пациенти кои имаат исти симптоми – повраќање, температура, интензивна дијареа и силни болки во стомакот.

Станува збор за несекојдневен и доста упорен стомачен вирус, кој, според лекарите, брзо се пренесува од човек на човек, особено меѓу децата.

За разлика од претходните стомачни вируси на кои сме навикнати, овој трае и до 4-5 дена и значително го исцрпува организмот.

Матичен лекар од Ѓорче Петров во неформален разговор за Плусинфо вели дека секојдневно прима пациенти со слична клиничка слика.

– Ми доаѓаат пациенти, скоро дехидрирани, кои сами на своја рака консумирале лекови кои се наменети за спречување дијареа при бактерија во цревната флора. А всушност овде станува збор за вирусна инфекција и единственото решение е да се пијат пробиотици, електролити и големи количини вода. Изненадува тоа што вирусот трае подолго време од вообичаеното и обично го измачува пациентот најмалку 4-5 дена – објаснува лекарот.

Од амбулантите предупредуваат дека најважна е редовната хидратација и внес на пробиотици, со што се одржува рамнотежата во цревата и се намалуваат последиците од долготрајната дијареа.

Меѓу заболените е и скопјанецот Марио Богдановски, кој веќе трет ден се бори со вирусот.

– Започна со лесна мачнина и мислев дека причината е нешто што сум го изел. Вечерта добив висока температура и од тогаш почна вистинската мака – дијареата е толку честа што едвај стигнувам до тоалет. Искрено, многу исцрпува, чувството е како да немаш сила ни да станеш од кревет – вели Богдановски, кој додава дека истовремено заболела и неговата сопруга, а од вчера и неговиот 2-годишен син покажал први симптоми.

Иако вирусот се шири брзо, лекарите апелираат на смиреност и дисциплина, почесто миење раце, избегнување блиски контакти ако некој во семејството е заразен и задолжително внесување течности за да не дојде до дехидрација.

The post НЕСЕКОЈДНЕВЕН СТОМАЧЕН ВИРУС ГИ ПОЛНИ АМБУЛАНТИТЕ Симптомите траат и до 5 дена, внимавајте на хигиената и пијте течности! appeared first on plusinfo.mk.

Иако има зголемување на бројот на  пациенти – деца и возрасни со стомачен вирус во Велес, сепак лекарите од матичните амбуланти за МИА, информираат дека ситуацијата не е алармантна.

Тие посочуваат дека  ова заболување е во текот на целата година, а најчесто се појавува кај помладата популација, во текот на целата година, а особено во пролет и лето, но овојпат има и голем број на возрасни пациенти со стомачен вирус.

Кај пациентите се појавува треска, покачена температура, симптоми на настинка, гадење, повраќање, дијареа.

Лекарите посочуваат дека  во многу ретки случаи, стомачните вируси може да предизвикаат и компликации, особено кај лицата со намален имунитет.

Лекарите посебен акцент ставаат на превенцијата. Тие потсетуваат дека  во таа насока, а за да се заштити здравјето, многу е важно редовното миење на рацете со вода и миење под млаз вода на овошјето и зеленчукот пред употреба.

Воедно на лицата со симптоми на стомачен вирус им порачуваат да се јават на преглед кај матичниот лекар за да им препише соодветна терапија и диететска храна.

The post СТОМАЧЕН ВИРУС ГИ САРДИСА ВЕЛЕШАНИ Амбулантите се полни со пациенти appeared first on plusinfo.mk.

Повраќање, дијареја, стомачни грчеви, висока температура и треска – ова се симптомите на стомачниот вирус што периодов масовно ги погодува граѓаните. Вирусот предизвикува нагло влошување на состојбата кај пациентите, оставајќи ги физички исцрпени и приковани за кревет неколку дена.

Весна од Скопје за Плусинфо го опиша своето искуство како „најлошото што ѝ се случило досега“ со ваков вирус.

– Пред да си легнам сè беше нормално, не чувствував ништо необично. Но, некаде околу 5 часот наутро се разбудив од сон со страшни болки во стомакот – вели Весна.

Веднаш по болките, започнале и другите симптоми, нагони за повраќање и дијареа, кои се влошувале со секој изминат час.

– Не можев од кревет да станам. Немав сила ни до тоалет да одам. Морав да барам помош, моите ми донесоа леген до креветот – додава таа.

Како што раскажува Весна, состојбата бргу ескалирала, покрај мачнината и болките, почнала да чувствува и треска и температура.

– Уста не можев да отворам, сè што ќе каснев го повраќав. Дури и чај кога ќе се напиев, не можев да го задржам. Морав да земам апчиња против дијареа, пробиотици – вели таа.

Со оглед на ослабеноста, Весна повикала и медицинска екипа која ѝ ставила инфузија дома, обидувајќи се барем малку да ја стабилизира состојбата.

– Досега вакви симптоми не сум имала, дури ни кога сум имала друг вирус. Навистина беше страшно. Веќе трет ден ме држи, болките малку попуштија и дијареата и повраќањето се намалија, ама чувството е речиси исто – раскажа Весна.

Слично искуство пренесе и родител на 2-годишно дете кое развило симптоми на висока температура, повраќање и на пролив.

– Температурата му се качи на 39,8 степени, не јадеше ништо, само повраќаше. Две ноќи не спиевме, го ладевме и му дававме сируп за температура – вели таткото.

Секое е лето, па и ова, зголемен број случаи

Стомачниот вирус (вирусен гастроентеритис) е инфекција предизвикана од различни ентеровируси, која почесто се јавува кај помладите лица. Иако може да се појави во текот на целата година, најголема зачестеност има во пролетните и во летните месеци.

Општите лекари потврдуваат дека ситуацијата е слична на претходните години.

– Како секоја година, и оваа година имаме зголемен број пациенти со симптоми на стомачен вирус. Карактеристична клиничка слика е епигастрична болка, грчеви на абдомен, гадење, повраќање, дијареа, треска, зголемена телесна температура и болки по телото – вели за Плусинфо доктор Ахмед Нуредини од ПЗУ Хумана, амбуланта по општа медицина.

Според него, посебно загрижувачки се случаите кај ризичните категории: деца, постари лица, хронично болни и лица со ослабен имунитет.

– Кај овие пациенти може да се јави потешка клиничка слика. Препорачуваме да се побара лекарска помош кога симптомите траат повеќе од 2–3 дена без подобрување, при дехидратација, висока температура или при присуство на крв во изметот – додава д-р Нуредини.

Како што објаснува, заразата најчесто настанува преку контакт со други заразени лица или преку лоша хигиена, особено во летниот период.

– Од нашето искуство, пациентите најчесто се заразуваат преку контакт со заразени (во домови, базени) и преку храна. Кај децата голем проблем се и лошите хигиенски навики – вели тој.

Летото создава идеални услови за развој и за ширење на стомачни вируси:

– Повисоки температури – топлината ја забрзува контаминацијата на храната и на водата;

– Консумација на ризична храна – сладоледи, свежи овошја, улична храна, месо на скара, недоволно добро чувани млечни производи;

– Вршење нужда во јавни тоалети и присуствување во објекти со непозната хигиена;

– Капење во загадени води (базени и езера), вирусите може да се пренесат преку вода што не е добро третирана.

Разлики меѓу стомачен вирус и труење со храна

Иако симптомите може да бидат речиси идентични – дијареја, повраќање, болки во стомакот, слабост – сепак стомачниот вирус и труењето со храна не се исто.

Разликувањето честопати не е едноставно, особено во првите часови од појавата на симптомите, кога пациентите чувствуваат драматично влошување на состојбата без јасен извор.

Сепак, според лекарите, најголемата разлика е во моментот на појава на симптомите и во нивната тежина.

– Клиничката слика е слична, но разликата е во времето на појава и во интензитетот. Кај труење со храна симптомите се појавуваат 1–3 часа по оброкот, а кај вирусот по 48–72 часа од контакт со заразен извор. Ризикот за дехидратација е поголем кај труењето бидејќи повраќањето и дијареата се поинтензивни – објаснува д-р Нуредини.

Разликувањето честопати зависи од времето кога симптомите почнуваат, дали се јавуваат кај повеќе лица истовремено и дали имало заеднички извор на храна. Дијагнозата најчесто се поставува врз основа на добра анамнеза и на клиничка проценка.

The post КРУЖИ СТОМАЧЕН ВИРУС СО СИЛНИ СИМПТОМИ Внимавајте на хигиената и внесувајте доволно течности! appeared first on plusinfo.mk.

Периодов низ Македонија е активен стомачен вирус којшто ги мачи граѓаните со нагли симптоми – од покачена температура до дијареа, повраќање, мачнина и грчеви. Иако симптомите кај дел од пациентите се повлекуваат за еден до два дена, кај некои се враќаат, особено ако не се внимава на исхраната.

– Нагло ми се качи температура на 38.5, а потоа следуваше дијареа и лошење. Едвај станував од кревет, но по 2-3 дена, одеднаш ми се подобрија симптомите, дури нагло ми стана подобро – вели 39-годишниот Славко за Плусинфо.

Родителите, пак, се особено загрижени кога симптомите се појавуваат кај најмладите.

– Моето дете има константно лошење, не сака да стави ништо во уста и постојано повраќа. Едвај успеваме да му ги дадеме лековите, но и тие ги повраќа – вели Александра, мајка на 2-годишно дете.

Минатата недела вриело од пациенти со стомачен вирус

Лекарката Сања Петровска од приватната здравствена установа „Сан Медикал“ вели дека диетата е многу важна за побрзо закрепнување од вирусот.

– Повеќето пациенти пијат медицински јаглен и пробиотик, па се случува сликата да се подобри за ден-два, но кај некои пациенти може да се вратат симптомите бидејќи не се придржуваат кон диетата која им ја препорачуваме. Диетата најчесто вклучува јадење храна како варен ориз, компири и слична храна која е соодветна за вознемирениот гастроинтестинален тракт. Некои пациенти имаат грчеви и гасови, кај некои вирусот се манифестира со дијареа и лошење. Најчесто им препишуваме прашоци „Смекта“, а и пробиотици, што ги отстрануваат симптомите на дијареа. Вирусот најчесто поминува за 4-5 дена – вели д-р Петровска за Плусинфо.

Петровска тврди дека минатата недела имала голем број пациенти со стомачен вирус во нејзината клиника, но дека овој бран полека стивнува, а оваа недела има помалку пациенти.

Што се стомачни вируси и како да се справите со нив?

Стомачните вируси (вирусни гастроентерити) се инфекции на дигестивниот тракт, предизвикани од вируси како ротавирус, норовирус или аденовирус. Најчесто се шират преку загадена храна, вода или преку контакт со заразено лице.

Симптомите вклучуваат:

• Мачнина и повраќање;
• Дијареа;
• Грчеви и болки во стомакот;
• Треска и малаксаност.

Кај повеќето здрави лица, вирусот се повлекува за неколку дена. Најважно е да се спречи дехидрација со внесување течности (вода, чај, супи, електролитни раствори) и да се следи лесна диета – варен ориз, компири, банани, бисквити..

Се препорачува избегнување млечни производи, масна и пржена храна, газирани пијалаци и сокови. Ако симптомите траат повеќе од 5 дена, се влошуваат или се појави крв во столицата, неопходна е консултација со лекар.

Стомачните вируси се непријатни, но со правилен третман и со малку трпение, најчесто бргу минуваат.

The post ВИРУСОТ ПОВТОРНО ЌЕ ВЕ НАПАДНЕ АКО НЕ ВНИМАВАТЕ НА ИСХРАНАТА Лекари советуваат како да се справите со тегобите appeared first on plusinfo.mk.

Периодов многумина се заболени од сезонски стомачен вирус што ги спречува да ги извршат своите работни обврски, а некои мораат да ги одложат и своите планови за летување или, уште полошо, да го минат летниот одмор во кревет, бидејќи овие вируси предизвикуваат абдоминални болки и грчеви, дијареја и повраќање.

– Пред неколку дена бев на свадба, а речиси секој трет од поканетите не присуствуваше поради стомачен вирус. Некако не ми се ни јадеше кога го видов тоа, не знам ни како да се заштитам од стомачни вируси, на што да внимавам, а на што не – раскажува Лео од Скопје.

Плусинфо разговараше со матичен лекар од Скопје, кој тврди дека зависно од сезонските услови, од имунитетот на заболените, од родот и од сојот на вирусот, како и од други фактори, стомачните вируси можат да предизвикаат симптоми со различен интензитет. Но, според лекарот, стомачните вируси не се опасни, иако се непријатни.

– Имаме пациенти заболени од вирусен гастроентеритис, а имавме и такви кои се разболени од друг сезонски вирус во комбинација со стомачен вирус, со што, симптомите се понагласени и пациентите имаат повеќе потешкотии поради комбинацијата. Но, и стомачните вируси се разликуваат по интензитет и по симптоми во зависност од вирусот. Вообичаени стомачни вируси се норовирусите, ротавирусите и аденовирусите. Некои од нив може да предизвикаат блага непријатност со дијареа, додека, пак, други може да доведат до сериозно повраќање, стомачни грчеви, па дури и до треска. Фактори како целокупното здравје, возраста и силата на имунолошкиот систем, исто така, можат да влијаат на сериозноста на симптомите – објаснува лекарот.

Иако честопати вирусниот гастроентеритис се перципира како зимска болест, стомачните вируси може да се појават во текот на целата година, па и преку летото.

– Зголемениот број на заболени периодов се должи на тоа што има повеќе активности и собири на отворено кои го зголемуваат и контактот меѓу луѓето, луѓето немаат блиски контакти само во зимата. Потопло време, повеќе јадење на отворено и потенцијално помалку строги практики за безбедност на храната. Рекреативните активности во вода, како пливање во езера или во базени, може да ја зголемат изложеноста на контаминирана вода – додава лекарот притоа нагласувајќи дека понекогаш станува збор за труење од храна и од контаминирана вода поради жештините, кое предизвикува симптоми што се преклопуваат со тие на вируснуит гастроентеритис, но се посериозни, а таквите труења се поопасни.

Како да го избегнете разболувањето од стомачен вирус?

Спречувањето на инфекција со стомачен вирус вклучува соодветни хигиенски практики:

1. Често миење раце: Ова е од клучно значење, особено по користење на бања, по менување пелени и пред подготовка на храна.
2. Правилно ракување со храната: Проверувајте дали храната е темелно зготвена и складирана на соодветни температури.
3. Безбедна консумација на вода: Пијте само прочистена и флаширана вода која не била во контакт со заболено лице.
4.  Избегнување контакт со заболени: Носете маска доколку контактот не може да се избегне.

Кои се препораките за терапија?

Повеќето случаи на стомачен вирус поминуваат без сериозни последици во рок од неколку дена. Главниот фокус е во спречувањето дехидрација.

1. Хидратација: Пијте бистри течности како вода, чаеви без кофеин или спортски пијалоци за да ги замените изгубените течности.
2. Одмор: Дозволете му на вашето тело да се опорави.
3. Лекови без рецепт: Лековите против гадење (антиеметици) можат да помогнат во ублажување на симптомите.
4. Диета: Започнете со лесна храна без мрснотии како тост или солени бисквити додека вашиот стомак се смирува. Исто така, јадете храна која содржи електролити за да ги надополните загубите поради дијарејата и повраќањето.

Ако симптомите се влошат, дехидрацијата станува сериозна или има знаци на крвава дијареа, неопходно е да се побара лекарска помош.

The post СТОМАЧЕН ВИРУС НА СВАДБА МОЖЕ ДА БИДЕ И ЖИВОТНА ОПОМЕНА Најважни се хигиената, водата и диетата appeared first on plusinfo.mk.

– Доилка сум, мајка на едномесечно бебе. Воопшто не сум излезена надвор и не дозволуваме други луѓе да влегуваат кај нас дома сè додека бебето не наполни 40 дена. Но, пред некој ден јас неочекувано почнав да повраќам, имав силни болки во стомакот, дијареја и температура од 39 степени. Појдов на лекар и ми кажаа дека станува збор за стомачен вирус. На лекарката ѝ кажав дека немам контакт со луѓе и дека не излегувам надвор, а таа ми објасни дека вирусот може да се закачи и од самиот воздух што го дишеме, без разлика каде се наоѓаме. Исто така, ми кажа дека не сум првата што се жали од истите симптоми и дека вирусот се шири сè побрзо и побрзо – вели Симона од Скопје.

Таа добила препорака од докторката да се изолира, да пие течности, да јаде лесна храна, да зема пробиотици, спазмолитици по потреба, антипиретици, а во краен случај ако има потреба да прими и инфузиска терапија.

Плусинфо разговараше и со д-р Лидија Чолакова Дервишова, претседателка на Здружението на приватни лекари, која ни ги посочи проблемите со кои се соочуваат пациентите кои бараат помош во амбулантите.

– Во ова време секоја година малку е зголемен бројот на пациенти со стомачни болки. Најчесто поради високите температури се пијат многу ладни напитоци кои прават дисбаланс во цревната функција. Се бањаат малите деца во куќни базенчиња и по цел ден се во вода, а притоа костимите не се пресоблекуваат и настануваат настинки на цревата – вели д-р Чолакова Дервишова.

Таа на своите пациенти им препорачува во овој период од годината особено да внимаваат на внесот на храна, да се избегнуваат мајонезот и други производи кои се брзо расипливи и може да предизвикаат салмонела.

– Многу често имаме и патнички проливи предизвикани од ешерихија коли, значи потребна е голема хигиена на рацете. Летото е прекрасно но мора да се внимава на здравјето постојано – додава Чолакова Дервишова.

Министерството за здравство често во јавноста излегува со препораки за заштита и превенција од стомачен вирус.

– За заштита и превенција од ова заболување се препорачува избегнување контакт со заболен, одржување лична хигиена, редовно миење раце, темелно миење на овошјето и зеленчукот пред консумирање, чистење и дезинфекција на површини, а особено на детските играчки – се вели во последната објава на Министерството за здравство поврзана со стомачните вируси.

Што е стомачен вирус?

Стомачен вирус е заболување предизвикано од различни типови ентеровируси. Ова заболување најчесто се појавува кај помладата популација, во текот на целата година, а особено на почетокот на пролетта и летото.

Најголем дел од заразените (над 90 проценти) не развиваат никакви симптоми, а кај останатите може да се појави покачена температура, симптоми на настинка, симптоми на гадење, повраќање, дијареја. Во многу ретки случаи стомачните вируси може да предизвикаат и компликации, особено кај лицата со намален имунитет, како што се мозочни и срцеви заболувања, воспаление на бели дробови…

Стомачниот вирус најчесто се шири при контакт со заболено лице или индиректно преку загадена вода, храна, предмети (детски играчки, прибор за јадење …).

Лекувањето на стомачниот вирус кај полесните случаи опфаќа симптоматска терапија и консумирање повеќе течности и витамини за да се спречи дехидрирање, додека кај поизразената клиничка слика потребна е дополнителна терапија по препорака на лекар.

The post СТОМАЧЕН ВИРУС ГИ НАПОЛНИ АМБУЛАНТИТЕ Лекарите апелираат да миеме раце и да внимаваме што јадеме и што пиеме appeared first on plusinfo.mk.