НУ Стоби реагираше на, како што наведуваат, нападите од СДСМ, истакнувајќи дека културното наследство не треба да се користи за дневно-политички препукувања, особено по неодамнешната посета на министерот за култура Зоран Љутков.

Од институцијата велат дека нивната работа се темели на стручни стандарди и факти и дека соработките и проектите на локалитетот се резултат на долгогодишна работа на тимот, а не на политички политики.

1. Соработката на НУ Стоби со фондацијата Балканско наследство е воспоставена од 2010 г. и секоја година до денес, освен за време на пандемијата со Ковид19, беа реализирани успешни меѓународни школи за археологија и работилници за конзервација, како и други проекти, благодарение исклучиво на ТИМОТ НА НУ СТОБИ, и никако на „континуитет на политики воспоставени во време на СДСМ“ како што се вели во соопштението на комисијата што викендов излезе во јавноста.

2. Иницијативата за соработка со „J.M. Kaplan Fund“, дојде во февруари 2018 година преку д-р Џорџ Беван, долгогодишен соработник во меѓународните школи за археологија кои НУ Стоби ги реализираше со фондацијата Балканско наследство, со најава за интерес упатена прво лично до д-р Силвана Блажевска, а потоа и официјално до нашите партнери Балканско наследство. Генералниот план за конзервација на Стоби е сработен во соработка меѓу тимот на НУ Стоби, фондацијата Балканско наследство и домашни и странски експерти, а Основниот проект за конзервација на Теодосијанската палата од тимот на НУ Стоби, врз основа на фотограметриска документација креирана од д-р Џорџ Беван и неговиот тим во 2017 г.

„Во однос на т.н. „политики воспоставени во време на СДСМ“, нивниот придонес во рамки на стратешката работа на НУ Стоби е ограничен и маргинален, пред сè на ниво на редакциски интервенции, поточно три (поправени) реченици во предговорот на Генералниот план за конзервација од тогашното раководно лице на установата. Основ за припишување позначајни заслуги би постоел доколку од овие „политики…“ произлегоа конкретни и оперативни идеи што би нашле примена во стручната и проектната практика“, велат од НУ Стоби.

Во реакцијата се посочува дека дел од проектите за локалитетот биле иницирани уште пред повеќе години, додека одредени активности биле реализирани со ограничувања, што довело до нефункционални решенија кои сега дополнително се доработуваат.

„Со длабока почит до Комисијата за култура на СДСМ, тимот на НУ Стоби ве замолува да имате барем малку доблест и да не ја мешате институцијата во вашите обиди за дневно-политички препукувања“, наведуваат од НУ Стоби.

Оттаму додаваат дека институцијата продолжува со активности за подобрување на условите на локалитетот и нагласуваат дека приоритет останува заштитата и унапредувањето на културното наследство.

The post СТОБИ СО ОСТРА РЕАКЦИЈА ДО СДСМ Институцијата со факти ѝ одговори на опозицијата appeared first on plusinfo.mk.

Археолошкиот локалитет Стоби претставува едно од најзначајните културни богатства на Република Северна Македонија и важен столб на нашиот културен идентитет, изјави министерот за култура и туризам Зоран Љутков при денешната посета на локалитетот.

Тој нагласи дека државата континуирано ја поддржува Националната установа Стоби, обезбедувајќи значителни буџетски средства за заштита, конзервација и презентација на овој уникатен археолошки комплекс.

– Оваа година Министерството за култура и туризам учествува во финансирањето на Годишната програма на НУ Стоби со вкупно над 10 милиони денари, со што директно ги поддржуваме археолошките истражувања, конзерваторските работи и особено проектот за адаптација на Старата железничка станица во современ Центар за посетители, кој треба да биде отворен во септември – истакна министерот Љутков.

Стоби, како што посочи тој, не е само археолошки локалитет, туку е и стратешка точка за развој на транзитен туризам, особено поради неговата близина до автопатот Е-75 што го прави идеална дестинација за илјадници патници кои минуваат низ нашата земја.

– Со отворањето на новиот Центар за посетители и подобрувањето на услугите за туристите, ние сакаме да го претвориме Стоби во место каде што патниците ќе сакаат да запрат, да го запознаат нашето богато наследство и да го доживеат вистинскиот дух на античкиот свет – истакна Љутков.

Министерот истакна дека потенцијалот на Стоби е препознаен и од меѓународни организации и фондации од САД, Италија и Бугарија. Донациите пристигнуваат од Џ. М. Каплан фонд, како и од Американскиот институт за римска култура во соработка со фондацијата Балканско наследство и НУ Стоби покажуваат дека станува збор за локалитет од меѓународно значење, чија вредност ги надминува границите на нашата држава.

The post СТАРАТА ЖЕЛЕЗНИЧКА ВО СТОБИ ЌЕ СТАНЕ ЦЕНТАР ЗА ПОСЕТИТЕЛИ ВО СЕПТЕМВРИ Локалитетот „плаче“ за транзитен туризам appeared first on plusinfo.mk.

Иако е еден од најзначајните археолошки локалитети во регионот, Стоби и натаму е многу попосетен од странски отколку од домашни туристи. Токму поради тоа, Националната установа „Стоби“ ја започна новата кампања со провокативното прашање: „Дали ќе нè посетиш годинава?“.

Податоците за посетеност во изминатата година покажуваат јасна нерамнотежа – археолошкиот локалитет го посетиле речиси 12.000 странски туристи, додека бројот на домашни посетители изнесувал само 1.703. Вкупно биле регистрирани 18.667 посети, што е на ниво од претходните години.

Значаен дел од посетителите се деца – вкупно 4.970, при што кај домашната публика најбројни се учениците од основно и средно образование. Од НУ „Стоби“ велат дека овие бројки се охрабрувачки, но и дека сакаат многу повеќе граѓани од Македонија лично да ја почувствуваат историјата што ја нуди локалитетот.

– Повеќето податоци од статистиката нè радуваат, но бројот на домашни посетители нè изненади. Сакаме Стоби да биде место каде секој ќе доживее нешто посебно и затоа ги очекуваме мислењата и сугестиите од посетителите за тоа како искуството може да биде уште поинтересно – велат од установата.

Стоби е и пионер во регионот, прв археолошки локалитет на Балканот што нуди искуство со виртуелна реалност и дигитален аудиоводич, со што посетата добива современа и интерактивна димензија.

Најголем број посетители локалитетот имал во 2018 година, кога Стоби го посетиле околу 22.000 луѓе. Со новата кампања, од установата се надеваат дека оваа бројка повторно ќе се доближи, но со значително поголемо учество на домашната публика.

 

View this post on Instagram

 

A post shared by Archaeological site Stobi (@stobi_official)

The post СТРАНЦИТЕ ВООДУШЕВЕНИ, НАШИТЕ ГИ НЕМА „Дали ќе нè посетиш?“, новата кампања на Стоби за привлекување домашни туристи appeared first on plusinfo.mk.

Мотоциклист од Градско во петокот, 15 август, загинал во тешка сообраќајна несреќа кај Стоби на регионалниот пат Велес–Градско, јави Министерството за внатрешни работи..

Кон 15:48 часот во петокот, мотоцикл со велешки регистарски ознаки, управуван од 52-годишниот Д.Н., удрил во „фолксваген поло“  на 37-годишниот Ј.К. од Градско.

„Полото“ било паркирано покрај патот од 37-годишниот Ј.К. од Градско, се вели во полицискиот билтен.

„Лекар од Итната медицинска помош констатира смрт на лице место, а по наредба на јавен обвинител телото на починатиот е предадено на обдукција“, соопшти МВР.

The post УДРИЛ ВО ПАРКИРАНО „ПОЛО“ НА АВТОПАТОТ КАЈ СТОБИ Загина мотоциклист од Велес appeared first on plusinfo.mk.

Во археолошкиот локалитет Стоби денеска, на денот спроти неделата што православниот свет ја посветува на светите отци од Првиот вселенски собор, Архиепископот охридски и македонски г.г. Стефан отслужи архиерејска божествена литургија, во сослужение со митрополитите Преспанско-пелагониски г. Петар, Повардарски г. Агатангел, Тетовско-гостиварски г. Јосиф и Кумановско-осоговски г. Григориј.

„Годинава се навршуваат 1.700 години од Првиот вселенски собор, одржан во Никеја, во 325 година, а на кого присуствувале и тројца македонски епископи: Александар, епископ на Солун, Будиј, епископ на Стоби и Дакиј, епископ на Скупи. По тој повод денес, 31.5.2025 година, денот спроти Неделата којашто сеправославниот свет ја посветува на светите отци од Првиот вселенски собор, во археолошкиот локалитет Стоби се отслужи Архиерејска божествена литургија“, соопшти МПЦ-ОА.

На литургијата присуствуваа верници од целата земја, а меѓу нив и министерот за култура Зоран Љутков, директорката на Комисијата за односи со верските заедници и религиозни групи Оливера Трајковска, поранешниот претседател Ѓорге Иванов и претставници на локалната самоуправа.

Присуството на македонски епископи на овој Собор, нагласуваат од МПЦО-ОА, е историски показател за длабоките корени на христијанството во Македонија, односно за тоа дека во тој период на нашиве простори веќе постоел организиран христијански живот со добро раководена Црква и црковна заедница.

The post ДЛАБОКИ СЕ КОРЕНИТЕ НА ХРИСТИЈАНСТВОТО ВО МАКЕДОНИЈА Одбележани 1.700 години од Првиот вселенски собор appeared first on plusinfo.mk.

Портпаролот на СВР Велес, Ристе Самарџиев појасни дека во 17 часот и 55 минути на автопатот Неготино-Велес после мостот „Стоби“, моторцикл управуван од Д.И. (2002) се излизгал и паднал на коловозот. Д.И. е пренесен во МЦ – Велес.

The post МОТОЦИКЛИСТ СЕ ИЗЛИЗГАЛ КАЈ МОСТОТ „СТОБИ“ Екипите на брзата помош заминале на местото на несреќата appeared first on plusinfo.mk.

Повеќе за ова на порталот „Арт кујна“.

The post НЕ ЈАДЕТЕ, ВКУСЕТЕ! Пуслици со песто и горгонзола, такоси со свинско и карамелизиран кромид и 1,2,3,4,5,6 вина appeared first on plusinfo.mk.

Денеска во Театарот на археолошкиот локалитет Стоби беше промовирана новата мобилна апликација за презентација на содржини на овој некогашен римски град.

Апликацијата е продукт на двогодишен проект (Immersive Storytelling Driven Cooperation for Cultural Heritage Dissemination in the Western Balkans), кој е плод на соработка помеѓу седум институции од пет балкански земји: Национална установа за управување со археолошкиот локалитет Стоби – Градско (Северна Македонија), Центар за социјални иновации Блинк 42-21 (Скопје, Северна Македонија), Универзитет Аристотел (Солун, Грција), Фондацијата Балканско наследство (Софија, Бугарија), Археолошки институт за археологија (Белград, Србија), Градски музеј Љубљана (Љубљана, Словенија) и Nexto (Словенија). Проектот е финансиран од Европската комисија.

– Кога прв пат дојдовме тука и кога разговаравме за можноста на кој начин може да се користи технологијата во презентацијата на културното наследство, искрено не знаев ништо за Стоби. Не знаев дека тука се организирале гладијаторски борби и борби со животни, не го знаев капацитетот на театарот, дека библиотеката е една од најголемите и најубавите во тоа време… На ваквите локалитети често сме импресионирани од градбите, но не ги знаеме приказните на луѓето кои живееле во нив. Апликацијата „Immersium“ ја има токму таа примена, да ја раскаже приказната и да ги води посетителите низ некои интерактиви случувања во локалитетот. Мене ми е исклучиво драго што после две години работа оваа апликација конечно стартува – рече Милан Танчески од Блинк 42-21.

Во првата година (2021) од реализацијата на проектот биле организирани три работни конференции во Скопје, Солун и во Љубљана, каде што биле презентирани капацитетите на три римски локалитети (Емона, Словенија; Виминациум, Србија и Стоби, Северна Македонија). На овие работни конференции учествувале и експерти од полето на дигиталната презентација на културното наследство, кои презентирале современи начини на приближување на културното наследство до пошироката публика, со главен фокус на задржување на вниманието на помладата популација. Како продукт првично бил изработен модел според чии параметри можат да се изработуваат нови решенија за презентација на културното наследство на различни локалитети. Исто така, од овие работилници произлегло и решението за презентација кое потоа прераснало во мобилната апликација, наречена Immersium, која дозволува константна изработка на нови содржини за посетителите на археолошките локалитети.

Во втората година (2022) на трите археолошки локалитети биле организирани работилници со професионалци и со студенти од балканските земји и од Европа (на работилницата во Стоби присуствувале учесници од Грција, Србија, Црна Гора, Бугарија, Албанија и од Норвешка), кои имале за цел прво да се запознаат со содржините на самите локалитети, а потоа и тестирање на веќе изработената апликација и нејзино подобрување и унапредување.

Исто така, на овие работилници учествувале експерти со искуство во полето на дигиталната презентација на културното наследство од Грција (Tetragon) и од Словенија (Art Rebel 9).

Проект менаџерот Димитар Николовски накратко објасни дека апликацијата „Immersium“ е интерактивна дигитална алатка која овозможува уникатно културолошкo искуство низ истражување, едукација и забава на археолошкиот локалитет.

– Апликацијата ве става во улога на посетител на градот, каде што преку запознавање со активностите кои се случуваат во градбите кои се опфатени во водичот, односно во седум различни градби. Значи, поминувате покрај порта Хераклеа, покрај полукружниот плоштад, театарот, казиното, Теодосијанската палата и Виасакра, како и враќањето назад, кое ќе ве однесе пак на почетокот – објасни Николовски за време на денешната промоција на апликацијата во Стоби.

За време на активностите кои се содржани во играта, посетителот може да се запознае со тоа што се случувало во овој локалитет.

– После 2 години макотрпна работа, навистина го дадовме нашиот максимум оваа апликација денес да изгледа вака. Апликацијата ве става во улога на посетител на градот, ќе имате можност преку интерактивен водич (кратки игри, квизови, реконструкции) на вашиот мобилен телефон да искусите дел од секојдневието на стобјани од крајот на 4 век од н.е. (поточно во 388 година од н.е.). Присуството на императорот Теодосиј во апликацијата е поради тоа што неговото доаѓање во Стоби е единствена досега потврдена посета на римски император на овој локалитет во тоа време – рече Николовски, кој е археолог документатор во НУ Стоби.

Николовски објасни дека во текот на активностите кои се содржани во апликацијата, посетителот ќе може да се запознае со тоа што се случува на секое од седумте места на локалитетот. Посетителот ќе има можност да искуси дека во полукружниот плоштад всушност имало пазар, каде што се продавале продукти. Ќе се сретне со трговец кој ќе му постави неколку прашања, потоа ќе продолжи со квиз и на секоја следна градба ќе му се појави лик кој е поврзан со неа и ќе му објасни за нејзината функција. Исто така, ликот ќе му постави загатка со која сака да го наведе посетителот да открие кој всушност се обидува да го отруе императорот Теодосиј.

Искуството или можноста за дознавање на овие работи не трае повеќе од 45 минути, а до крајот на годината се планира верзија на апликацијата за деца до 13 години. Актуелната апликација е за лица над 13 години.

Апликацијата е бесплатна и достапна за сите телефони кои користат ИОС или Андроид оперативен систем и ќе може да ја користи секој посетител на локалитетот. Од 22 до 25 ноември влезот во локалитетот Стоби е слободен за сите заинтересирани и активностите ќе се одвиваат од 8 до 15 часот.

The post КОЈ ГО ОТРУ ИМПЕРАТОРОТ ТЕОДОСИЈ? Истражете го Стоби преку апликацијата „Immersium“ appeared first on plusinfo.mk.

Еднонеделната програма вклучуваше предавања, работилници, практични искуства од регионот, културни посети и хакатон за развој на имерзивни културни искуства. Претставници од културниот и креативниот сектор од Македонија, Словенија и Грција преку своите презентации ги воведуваа учесниците во примената на новите технологии, како виртуелна и аугментирана реалност, гемификација и интерактивни содржини во развојот на нови имерзивни културни доживувања на археолошките и културните локалитети.

Учесниците воедно имаа можност и да се запознаат со локалитетот „Стоби“ преку предавања на археолозите и преку користење на двете дигитални алатки кои се веќе достапни за посетителите: првата VR апликација „Гладијаторите се враќаат во Стоби“ и новиот „Аудио и QR водич“.

Во рамки на школата учесниците и вработените на „Стоби“ беа и првите корисници кои ја тестираа новата мобилна апликација Immersium, која претставува дигитална алатка за самостојно истражување и забава на посетителите. Мобилната апликација користи игри, интерактивен наратив, аугментирана реалност и мултимедијални содржини и ги води посетителите низ незаборавно културно доживување. Апликацијата од оваа есен ќе биде достапна за три археолошки локалитети: „Стоби“ (Македонија), „Емона“ (Словенија) и „Виминациум“ (Србија).

– Имајќи предвид дека живееме во ера на дигитализација, на виртуелна и аугментирана реалност, гемификација, како и останатите сектори, вклучително и културниот сектор треба  да се прилагодува на промените. Само со користење на новите технологии, може археолошките локалитети и културното наследство да го доближиме до младите, локалитетите да понудат повеќе содржини и поинаку да го доживееме целокупното културно наследство – истакнаа Зорица Велковска и Милан Танчески, коосновачи на Центарот на социјални иновации БЛИНК  42-21 за важноста од воведувањето на новите технологии во истражувањето и промоцијата на  културното наследство.

Програмата „IMMERSIUM Heritage Field Schools“ се организира во рамки на проектот „Соработка за имерзивно раскажување за десиминација и промоција на културното наследство на Западен Балкан”, поддржан од Европската унија преку програмата „Креативна Европа“.

БЛИНК 42-21 како водечка организација, во соработка со Балканската Фондација за Наследство (Balkan Heritage Foundation) ги организира овие теренски школи на уште два археолошки локалитети во регионот и тоа во „Емона“, Словенија (од 20 до 26 септември) и „Виминациум“, Србија (од 27 септември до 3 октомври).

Повеќе информации за проектот можете да добиете преку посета на официјалната Facebook страница и Instagram профил – @immersium.eu .

The post ДИГИТАЛИЗАЦИЈА НА КУЛТУРНИТЕ ВРЕДНОСТИ Млади од Европа на првата теренска школа во „Стоби“ appeared first on plusinfo.mk.

Археологот од Националната установа Стоби, м-р Гоце Павловски, предупредува дека под седиштата има радијални ѕидови, чијашто статика во изминатите 2000 години е разнишана.

– Не дај боже, дури и при помал земјотрес додека се одржува некаква претстава во Стоби, седиштата може да пропаднат внатре и може да има и жртви. И не мора да биде земјотрес. Седиштата едноставно може да пропаднат под тежината на публиката. Затоа не е безбедно да има претстави во театарот- опоменува м-р Павловски.

И Фестивалот на античка драма, кој лани изостана поради пандемијата, ова лето ќе се одржува на други локации во Стоби.

Директорот на Велешкиот театар, Сашо Димоски, вели дека Фестивалот на античка драма ќе се одржи во август, на неколку други локации во археолошкиот локалитет Стоби. Тој не откри повеќе детали за Фестивалот, само посочи дека тој ќе биде меѓународен

Археологот Павловски вели дека Министерството за култура треба да издвои 2 милиони евра, со цел античкот театар да се конзервира и да се заштити, а дури потоа може да се размислува за негова ревитализација.

Истражувањата во театарот во Стоби се почнати во 2009 година, а првите конзервации датираат од 2013 година.

Фотографија: МИА

The post Фестивалот на античка драма се сели од Античкиот театар на безбедни локации во Стоби – да не ни се случи „античка“ трагедија со жртви! appeared first on plusinfo.mk.