Државните студентски домови „Стив Наумов“ и „Кузман Јосифовски – Питу“ во Скопје се првите два кои сегашната Влада целосно ќе ги реновира и пушти во употреба на стартот на новата академска година. Работите се одвиваат паралелно и ќе завршат во јули, но потоа ќе следи опремување на собите и сите други простории – информираше министерката за образование и наука Весна Јаневска при денешната посета на студентскиот дом во Автокоманда.

– Условите ќе бидат модерни, по високи европски стандарди за сместување, но и за енергетска ефикасност. Сигурна сум дека студентите ќе уживаат во престојот. Нема да има бркање глодари и инсекти, нема да има промаја, лепени прозорци и неисправни тоалети и бојлери. Дополнително за сето тоа да се одржува и трае, го менуваме и моделот на финансирање. Се разбира, чувањето на објектите и одржувањето на опремата зависи и од самите студенти – рече Јаневска.

Таа додаде дека се обезбедени пари за реконструктивни активности во другите 7 државни студентски домови, за што се заблагодари на Европската Унија, Германската развојна банка и Фондот за инвестиции на Западен Балкан. Станува збор за вкупен буџет од околу 50 милиони евра, од кои, над 10 милиони се неповратни грантови.

Јаневска посочи дека во период од две години проширен е опфатот на субвенционираниот студентски оброк, доделени се ваучери за ИТ уреди, обезбеден е континуитет на бесплатниот градски превоз во Скопје, дигитализирани се сите постапки за аплицирање за студентските права.

– Повторно ќе имаме 3.000 стипендии во новата академска година, а дури ќе понудиме и нова категорија – за прв пат за студенти со попреченост и ретки болести, со што ќе одговориме на барањата на нивните здруженија и политиките на стипендирање ќе стануат поинклузивни и во согласност со барањата на ЕУ – истакна Јаневска.

Фото: МОН

The post 📷 НЕМА ВЕЌЕ ДА ИМА ГЛОДАРИ, ИНСЕКТИ, НЕИСПРАВНИ ТОАЛЕТИ, БОЈЛЕРИ, ПРОЗОРИ… Домовите „Стив“ и „Кузман“ ќе светнат за следната академска година appeared first on plusinfo.mk.

Во рамките на одбележувањето на Денот на ослободувањето на Битола, вечерва во Кино Манаки премиерно беше прикажан долгометражниот документарен филм „Мојот вујко Стив Наумов“.

Филмот е посветен на животот и делото на народниот херој Стефан Наумов – Стив, учесник во НОБ, кој загина во 1942 година во борба со бугарската полиција. За неговиот придонес, Наумов е прогласен за народен херој на Југославија на 29 јуни 1945 година, а неговото име останува длабоко врежано во историјата на Македонија и на Битола.

Документарецот е во продукција на Македонско-турското здружение „Мустафа Кемал Ататурк“ – Битола, а снимен е на повеќе локации низ градот. Во филмот за животот и делото на херојот зборува неговиот внук од сестра, Стефан Бошков, претседател на Општинската организација на Сојузот на борци во Битола.ж

Авторите на филмот, Шенол Мемиш и Дејан Младеновиќ, изјавија дека нивната цел е преку вакви проекции да го поттикнат интересот кај битолчани да ја почувствуваат убавината и возбудата на киното како колективно искуство.

Ова е трет заеднички проект на авторите Младеновиќ и Мемиш, кои најавија дека до крајот на годината ќе бидат реализирани и неколку нови документарни филмови посветени на значајни личности и настани од македонската историја.

The post ПРЕМИЕРА НА „МОЈОТ ВУЈКО СТИВ НАУМОВ“ Документарецот беше прикажан во Кино Манаки по повод Денот на ослободувањето на Битола appeared first on plusinfo.mk.

Студентските домови „Кузман Јосифовски-Питу“ и „Стив Наумов“ во Скопје, кои се реконструираат од минатата година, се очекува да бидат повторно отворени за сместување студенти од вториот семестар на учебната 2025/2026 година.

– Ќе треба да се почека до вториот семестар затоа што „Кузман“ се очекува да се заврши некаде во ноември. За жал, реконструкцијата на „Стив“ почна со задоцнување, но ние таа состојба ја затекнавме и моравме да ја решаваме. Откако ја решивме, повторно имаше технички работи, градот, општината, дозволи, маркица…, и откако го решивме тоа, веднаш почнаа со работа. Но, очекувам и „Стив“ до крајот на годината да биде готов па во вториот семестар студентите веќе ќе можат да влезат во домовите – рече министерката за образование Весна Јаневска на прес-конференција одговарајќи на новинарско прашање.

Таа додаде и дека деновиве ќе биде донесена одлука кои студентски домови ќе бидат следни за реконструкција во планот за етапно реновирање на сите студентски домови во земјава, со цел да станат енергетски ефикасни со подобрена одржливост, што ќе придонесе за почиста животна средина и ќе обезбеди финансиски заштеди.

Проектот се реализира со заем од 20 милиони евра од Германската развојна банка и грант од 4,8 милиони евра од Европската Унија преку Регионалната програма за енергетска ефикасност за Западен Балкан.

Реконструкциите на „Кузман“ и „Стив Наумов“ се прва од предвидените три фази од проектот за енергетски ефикасна рехабилитација на државните студентски домови. Во следните две фази ќе се реконструираат уште седум други студентски домови во Скопје, Прилеп, Битола, Штип и во Охрид. 

The post „КУЗМАН“ И „СТИВ“ ЌЕ ГИ ПРЕЧЕКААТ СТУДЕНТИТЕ ВО ВТОРИОТ СЕМЕСТАР Се прави план кои домови ќе бидат следни за реконструкција appeared first on plusinfo.mk.

„Кузман Јосифовски-Питу“ и „Стив Наумов“ се првите два студентски дома кои ќе се реновираат, а градежните работи на двата објекта ќе чинат 17 милони евра. За 18 месеци од почетокот на реконструкциите двата дома ќе станат современи, со подобрена одржливост и енергетски ефикасни, што ќе придонесе за почиста животна средина и за финансиски заштеди.

Проектот се реализира со заем од Германската развојна банка од 20 милиони евра и грант од речиси 5 милиони евра преку Програмата за регионална енергетска ефикасност за Западен Балкан на Европската Унија.

Овие два дома се дел од првата фаза од проектот за енергетски ефикасна рехабилитација на државните студентски домови во Македонија. Во следните две фази, во наредните четири години, се планира реконструкција на уште седум други студентски домови во Скопје, Прилеп, Битола, Штип и Охрид.

Сите ќе имаат енергетски ефикасни фасади, нова водоводна и електрична инсталација, еко-системи за греење, енергетски ефикасни лед-светилки, комплетна промена на санитаријата и квалитетни безбедносни стандарди.

Министерката за образование Весна Јаневска денеска истакна дека домовите ќе имаат фотоволтаични панели на покривите, што ќе придонесе за голема заштеда на енергија и за намалување на емисија на јаглероден диоксид.

– Секако, она што е најважно, е подобрувањето на студентскиот стандард, што ни е исклучително значајно затоа што студентскиот стандард е една од компонентите со која сметаме дека ќе ги задржиме младите луѓе во нашата земја, за тука да останат, тука да го градат својот живот и тука да творат и да придонесуваат за себе лично и за татковината – изјави Јаневска.

За останатите домови кои треба да се реновираат, таа рече дека уште се во преговори со Германската развојна банка, но и со други банки.

– Сакаме да овозможиме поволни кредити за да можеме сите тие девет да ги завршиме – рече Јаневска.

Раководителот на Секторот за соработка при Делегацијата на ЕУ Стефан Худолин на презентацијата истакна дека оваа инвестиција значително ќе придонесе за подобрување на квалитетот на студентскиот живот, ќе придонесе за одржливи услови и подобрување на еколошкото влијание.

– Кога ќе се потсетиме наназад на нашето студирање, студентското домување е важен дел од нашиот живот, има големо значење за нашиот потенцијал и развој – кога сме надвор од дома, а треба да се чувствуваме како дома – рече Худолин.

Раководителот на Германската развојна банка за Југоисточна Европа Клаус Милер ја посочи важноста на овој проект за заштита на животната средина.

– Овој проект има огромно влијание со оглед дека скоро половина од студентските домови ќе заштедат 400 тони на емисии. Покрај енергетската ефикасност, зборуваме и за поудобни студентски домови, што значи дека се работи за инвестиција со сеопфатен пристап – рече Милер.

The post ПО „КУЗМАН“ И „СТИВ НАУМОВ“ ЌЕ СЕ ОБНОВАТ УШТЕ 7 СТУДЕНТСКИ ДОМОВИ Модерни услови за македонските студенти appeared first on plusinfo.mk.

По своја иницијатива и темелно планирање на овој проект од страна на Аутомакедонија, основното училиште „Стив Наумов“ во Автокоманда доби нова енергетски ефикасна фасада. На веќе постоечки ѕид е додадена изолација која ја зголемува топлотната изолација со што се добива енергетска заштеда.

– Истражувајќи ги потребите на училиштата во нашата општина, дојдовме до идејата за обнова на фасадата во ООУ „Стив Наумов“. Во договор со општината во која се наоѓа нашиот објект – Автокоманда, заеднички го избравме основното училиште „Стив Наумов“. Примопредавањето на фасадата го усогласивме со почетокот на училишната година, а ќе го продолжиме со уште еден мурал кој ќе биде избран преку ликовен конкурс со цртежи од учениците – изјави Гордица Штерјева, заменик директор на Аутомакедонија.

– Како градоначалник на општина Гази Баба изразувам благодарност до компанијата Аутомакедонија за покажаната општествена одговорност преку донацијата на изградбата на енергетски – ефикасната фасада на општинското основно училиште „Стив Наумов“ во Автокоманда. Како локална самоуправа негуваме партнерски однос со компаниите кои функционираат на нашата територија. Наша обврска како локална самоуправа е да изнаоѓаме различни начини на финансирање со цел реализација на што повеќе проекти – изјави градоначалникот на Гази Баба Бобан Стефковски.

Со сите чекори за обнова на фасадата објектот добива минимално 20% зголемена енергетска ефикасност, што воедно ќе придонесе и за намалување на вкупните трошоци за енергија на училиштето.

Реновирањето на оваа фасада е само еден дел од активностите кои Аутомакедонија како општествено одговорна компанија ги спроведува во рамки на својата стратешка определба за поддршка на енергетската ефикасност и обновливите извори на енергија, велат од компанијата.

The post ОУ „СТИВ НАУМОВ“ ВО АВТОКОМАНДА ДОБИ НОВА ФАСАДА Донација од Аутомакедонија за енергетска ефикасност appeared first on plusinfo.mk.

Стив, или поточно Стефан, потекнувал од печалбарско семејство. Бил трето машко дете на Васил и на Јана Темелкова. По таткова линија потекнувал од селото Битуше. Стив завршил гимназија во Битола и Технички факултет во Белград. Таму веднаш стапил во работничкото движење, а кога се вратил дома станал секретар на Месниот комитет на Комунистичката партија на Југославија за Битола.

Во април 1942 година, Стив Наумов учествувал во формирањето на Битолскиот партизански одред „Пелистер“. На 6 мај 1942 година во Битола го убил бугарскиот областен полициски началник. Во јуни 1942 година станал член на Оперативниот штаб на Главниот штаб на партизанските одреди во Македонија.

Есента истата година, Стив Наумов заминал на партиска задача во Преспа каде, на 12 септември 1942 година, кај селото Болно, Ресенско, во борба против бугарската војска и полиција се самоубил, заедно со неговиот соборец, народниот херој Мите Богоевски. За неговата глава се барале 200 илјади лева, жив или мртов.

По Втората светска војна, на партизанските гробишта во Битола бил подигнат гроб на Стив Наумов, но тој останал празен. Во алејата на партизаните се наоѓа и гробот на неговиот брат Ѓорги Наумов (1914-1942), кој бил обесен во скопскиот затвор.

Една година по неговата смрт, Битолскиот баталјон, формиран на 11 ноември 1943 година во леринското село Винени, бил наречен по него. Во негова чест, денес три основни училишта го носат неговото име, во Битола, Скопје и Пласница. Во Битола има и спомен-куќа посветена на неговиот живот и дело.

На денешен ден се родил уште ден херој во НОВ, велешанецот Димче Зографски. Во младоста се вклучил во македонското национално движење. Поради својата револуционерна дејност бил осуден на пет години затвор.

За време на НОВ на Македонија работел во Акциониот комитет за создавање и ширење на народноослободителното движење, за што бил интерниран од бугарската фашистичка власт.

Умрел во Скопје, на 3 јуни 1985 година.

The post БУГАРСКИТЕ ФАШИСТИ ЗА НЕГОВАТА ГЛАВА БАРАЛЕ 200 ИЛЈАДИ ЛЕВА На денешен ден е роден Стив Наумов appeared first on plusinfo.mk.

Роден е во  Битола, на 27 октомври 1920 година. Неговото семејство води потекло од селото Битуша, Леринско, Егејски дел на Македонија. Завршил гимназија во Битола, а потоа студирал на Техничкиот факултет во Белград, каде што е примен за член на СКОЈ и на КПЈ.

Во Белград повеќе пати е апсен, а по враќањето во Битола е избран за секретар на Местниот комитет на КПЈ. Од таа позиција развил жива активност за формирање на партиски ќелии и привлекување нови членови, а таа неговата активност особено имала резултати во битолското претпријатие за преработка на тутун познато како „Монопол“.

По Априлската војна во 1941 година, работи на прибирање на оружје, муниција и друг воен материјал и на организирање на оруженото востание против бугарскиот окупатор. Се спротивставил на решението на Методија Шаторов-Шарло за поврзување на македонската партиска организација со БКП и непреземање на вооружени акции.

Сосема рано од периодот на окупацијата, во јули 1941 година, преминал во илегалност. Ја осмислил и ја организирал т.н. Илинденска демонстрација во Битола на 2 август 1941 година. Го организирал и раководел со формирањето на Битолскиот партизански одред „Пелистер“ во април 1942 година. На 6 мај 1942 година во Битола го убил бугарскиот полициски началник Александар Ќурчиев. Во јуни 1942 година станал член и политички комесар на Оперативниот штаб на Народноослободителните и партизански одреди на Македонија.

Непосредно учествувал во формирањето на Битолско-преспанскиот партизански одред „Даме Груев“ на 6 јули 1942 година, над ресенското село Златари. Раководел и учествувал во нападот на овој одред на полициската станица во село Кажани, Битолско, на 18-19 август 1942 година.

Загинал кај селото Болно, Ресенско, во борба со бугарската полиција, заедно со народниот херој Мите Богоевски. Бугарската полиција овие македонски патриоти првин ги погребала во два гроба, потоа ги откопала и ги пренела кај селската црква, а од тука, тајно, ги однела кај селото Ѓавато и ги запалила со бензин.

Стив Наумов е прогласен е за народен херој на Југославија на 29 јуни 1945 година.

Димитар (Мите) Богоевски е истакнат припадник на македонското националноослободително и комунистичко движење и учесник во Антифашистичката војна во Вардарскиот дел на Македонија.

Роден е во селото Болно, Ресенско, на 31 октомври 1919 година. Основно училиште завршил во родното село, гимназија во Ресен во 1935 година, а учел и во Трговската академија во Битола во периодот од 1935 до 1937 година. Поет, кој уште во училишните денови во Ресен ги напишал првите песни на македонски јазик.

Во Трговската академија во Битола во 1937 година станал член на југословенската младинска комунистичка организација СКОЈ. Истовремено е член на управата на Литературната дружина „Иван Гундулиќ“. Како студент на Високата комерцијална школа на Белградскиот универзитет, станал и член на Комунистичката партија на Југославија (КПЈ) во 1939 година. Поради недостиг на материјални средства е принуден да се врати во родното село во 1940 година и таму е член на Месниот комитет на КПЈ за Ресен.

Уапсен е од српската полиција во Битола на 16 септември 1940 година и спроведен во затворот Главњача.

По бугарската фашистичка окупација, извесно време работи во Општината во селото Јанковец, а е еден од главните организаторите на антиокупаторската и антифашистичка борба во Преспанско.

Од 1941 година е секретар на Околискиот комитет на КПЈ за Преспа и дејствува како илегалец. Учествува во формирањето на Партизанскиот одред „Даме Груев“.

Загинал во борба со бугарската полиција, заедно со народниот херој Стеван Наумов – Стив.

Прогласен е за народен херој на Југославија на 2 август 1949 година.

Подготвил: д-р Александар Литовски, историчар
Извор: apla.mk

The post УБИЕНИ, ПОГРЕБАНИ, ПА ОТКОПАНИ И ЗАПАЛЕНИ СО БЕНЗИН Ѕверски масакрирани двајцата народни херои Стив и Мите appeared first on plusinfo.mk.

Чепреганов појаснува дека клубот во Битола е чиста провокација и направен е за да биде запален.

– Ламбе го стори тоа што потсвесно го мисли народот. За тоа е виновна државата, која дозволи отварање на културен центар именуван по фашист. Кривично требаше да бидат гонети луѓето што го отворија клубот, но тука институциите самите се прогласија за ненадлежни – додава Чепреганов.

Историчарот смета дека не е до крај точна споредбата на постапката на Алабаковски со делото на гемиџиите, познати и како солунски атентатори. Гемиџиите, вели тој, се заколнале на смрт.

– Гемиџиите имале идеја да ја завршат работата и да умрат. Гемија е вид на брод, па оттука асоцијацијата дека тие се качиле на брод, којшто патувал во еден правец. Но, земајќи го во предвид историскиот контекст, постапката на Алабаковски може да се спореди со преземената акција од страна на Стив Наумов, народниот херој од Битола. Тука имаме едно повторување на историјата, бидејќи Наумов во 1942 година на сред улица го убива бугарскиот полициски началник. За атентатот информарал „Њујорк тајмс“, тоа било голема вест, бидејќи во окупираната Европа, некој се осмелил да удри по фашизмот. Алабаковски во 2022 година тргна по стапките на Наумов и се бори со фашизмот во својата Битола – заклучи Чепреганов.

Попладнево пред полициската станица во Битола, во организација на Левица ќе се оджи протест против притворањето на Алабаковски, на кого судот му одреди притвор во трање од 8 дена.

The post ДАЛИ Е ЛАМБЕ МОДЕРЕН ГЕМИЏИЈА? Пејачот тргна по херојските стапки на Стив Наумов appeared first on plusinfo.mk.

Студентите од овој дом, во група на социјалната мрежа „Фејсбук“ се пожалиле дека им се украдени облека и лични предмети, а истовремено побараа одговорност и поголема безбедност, пренесе „Радио МОФ“.

„Некој се дрзнал да краде банални работи, а што правиме кога би оставиле некои вредни работи (лаптоп и слично), напиша студентката С.М. од Битола во отворената група на Фејсбук.

Таа вели дека заедно со нејзината цимерка имале штета од околу 15.000 денари.

Претседателот на станарите од „Стив Наумов“, Кирил Манасиев, е запознаен со ситуацијата. Тој заедно со директорот на Државниот студентски центар – ДСД, Дарио Николовски, како и дел од ограбените студенти, денеска онлајн се состанаа.

– Со студентите разговаравме и се договоривме да ми пратат на мејл допис на кого, што му фали од собите и во која вредност. Исклучиво се работи за украдена облека и средства за хигиена. Сакам да имам евиденција сè додека трае постапката за утврдување на сторителите. Целта ми е решавање на ситуацијата и ниту еден да не биде оштетен. Сакам да се врати довербата на студентите во институциите – изјави директорот Николовски.

Тој најави дека Студентскиот центар ќе вложи во подигање на безбедноста и надзорот во домовите.

– Лани поставивме видео надзор во домот „Кузман“, а годинава планиравме истото тоа да го сториме и во домот „Стив“ и останатите домови со дополнително надворешно обезбедување во ноќните часови. Но, по пандемијата со коронавирусот поради што студентите во март заминаа дома, работите ги одложивме, но на половина година сме сега, планираме да ги реализираме до крајот на годинава – рече Николовски.

Од Министерството за внатрешни работи (МВР) ги потврдија ваквите случаи и велат дека работат на нивно расчистување.

Според електронскиот билтен на СВР Скопје, од почетокот на 2020, заклучно до 1 јули, се регистрирани вкупно 7 кражби во студентските домови: „Стив Наумов“ (5), „Гоце Делчев“ (1) и „Пелагонија“ (1). Во 2019, пак, полицијата севкупно регистрирала 8 кражби, 1 разбојништво и 1 тешка кражба во обид.

Според Борјан Ефтимов, студентскиот лидер од Универзитетот „Св. Кирил и Методиј“, решението е едноставно – повеќе обезбедување и видео надзор на студентските домови. Тој смета дека ова се последици на долгогодишно занемарување на студентите и образованието од приоритетите на власта, па така и сега во оваа ситуација. Ефтимов не е изненаден што студентите се оштетени.

Тој вели дека државата во иднина мора да инвестира во студентите, образованието и во студентските домови за како што посочи, да не се случуваат вакви настани, но и да имаат услови за живеење, а не преживување и борба за егзистенција.

– Мораме да имаме нов Закон за младински стандард на местото на досегашниот Закон за студентски стандард со кој ќе се овозможи формално правно државата да издвојува повеќе средства за студентските домови бидејќи моментално средствата кои ги издвојува државата, според Законот, не може да бидат поголеми од средствата кои ги плаќа студентот, па така државата издвојува сума еквивалента на сумата која ја плаќа еден студент во студентски дом. Со носење на нов закон и бришење на ова ограничување, ќе има основа за вршење н притисоци за државата да издвојува повеќе финансии за студентските домови, за потоа тие да се реновираат и да се опремат соодветно – вели тој.

Денеска беше последниот рок за студентите да си ги соберат своите лични работи од собите во домовите каде биле сместени.

The post Студентите во домот „Стив Наумов“ останаа без својата облека appeared first on plusinfo.mk.