Ова го тврдат безбедносните експерти со коишто разговаравме откако во последно време почнаа да се шират гласини дека партијата на Али Ахмети планира во септември да излезе на масовни улични протести, кои, како што дознаваме, во голема мера ќе наликуваат на „Шарената револуција“ и кои би можеле да бидат насилни.

Безбедњаците очекуваат да ни се случуваат инциденти кои ќе наликуваат на изолирани случаи, но од кои подоцна ќе произлезе дека се направени врз верска или врз национална основа.

Немајќи ја овојпат поддршката од меѓународниот фактор, експертите не ја исклучуваат можноста ДУИ да побара „услуга“ од криминалното подземје во земјава, односно во креирањето немири да вклучи луѓе кои се занимаваат со матни зделки, продажба на наркотици, па дури и убиства.

Од друга страна, министерот за внатрешни работи Панче Тошковски тврди дека полицијата ги држи цврсто конците во свои раце и дека нема да дозволи граѓаните да се почувствуваат небезбедно во сопствената земја.

Обиди ќе има, ама неуспешни

Универзитетскиот професор за безбедност Стефан Буџаковски во разговор за Плусинфо вели дека повеќе од очигледно е дека раководството на ДУИ наскоро ќе издаде наредба за дестабилизирање на безбедносната состојба во Македонија. Меѓутоа, како што посочува тој, намерата е прочитана и безбедносните структури во земјава веќе активно работат на превенцијата.

Ќе се обидат наесен да направат обиди за дестабилизација на државата, меѓутоа нивната меѓународна и регионална поддршка е многу, многу слаба. Помина времето на закани и уцени.

Стефан Буџаковски Универзитетски професор

– Свесни сме дека станува збор за политичка партија која е многу добро позната по тие работи. Партијата на Али Ахмети беше 20 години на власт и за сето тоа време активно го „цицаше“ државниот буџет. Па, имајќи ги предвид сите тие благодности што ги имаа интегративците во изминатите две децении, сега очигледно тешко им паѓа фактот дека се надвор од игра. Затоа, најверојатно ќе се обидат наесен да направат обиди за дестабилизација на државата, меѓутоа нивната меѓународна и регионална поддршка е многу, многу слаба. Помина времето на закани и уцени. Сепак, секогаш треба да се има предвид дека тие под своја контрола имаат поголема група приврзаници кои можат во секое време да направат инциденти кои ќе наликуваат на изолирани случаи, но подоцна ќе излезе дека тие се направени на верска или национална основа – објаснува Буџаковски.

Во секој случај, додава професорот, намерите на првите луѓе во ДУИ се прочитани и народот многу добро знае дека целта не им е да ги штитат интересите на Албанците во земјава, туку главната цел им е повторно да бидат блиску до државниот буџет и повторно да ги користат бенефитите на власта.

– Во изминатите години ДУИ користеше една тактика која не е експонирана во јавноста. Земајќи раководни позиции во различни министерства и во различни јавни претпријатија во текот на двецениското владеење, тие насекаде практично „насадија“ свои кадри кои и до ден-денеска ѝ се должни на партијата и во секој момент може да се очекува да возвратат за услугата. Затоа, власта мора во скоро време да изврши една поголема анализа на ваквите состојби ако сака институциите во државата да функционираат како што треба – објаснува Буџаковски.

Криминалното подземје на готовс

Имавме еден процес на „дуизација“, потоа почна процесот на криминализација на државата, а сега, третиот процес е дестабилизација, коментира поранешниот министер за внатрешни работи Павле Трајанов.

– Сигурен сум дека ќе има обиди за дестабилизиција на безбедносната состојба во Македонија, особено поради тоа што најавите доаѓаат од повеќе меѓународни фактори. Целта на ДУИ е да изврши дестабилизација на државата само за да се врати на власт. Тоа е нивната стратешка цел, бидејќи сфатија дека тешко можат да функционираат во опозиција, но исто така се плашат од одговорност на нивни кадри кои низ годините се длабоко навлезени во криминал и во корупција – вели Трајанов за Плусинфо.

Ќе го ангажираат криминалното подземје, односно ќе ги вклучат сите оние луѓе кои низ годините се занимавале со матни зделки, бизниси, тендери, па и со дрога, убиства, ликвидации. Само таква структура можат тие да ангажираат.

Павле Трајанов Поранешен министер за внатрешни работи

Тој смета дека ДУИ во моментов нема толкава моќ за да направи голем конфликт сличен на воениот конфликт во 2001 година, меѓутоа, како што објаснува, партијата на Али Ахмети ќе се обиде преку помали инциденти да изврши дестабилизација.

– Ќе го ангажираат криминалното подземје, односно ќе ги вклучат сите оние луѓе кои низ годините се занимавале со матни зделки, бизниси, тендери, па и со дрога, убиства, ликвидации. Само таква структура можат тие да ангажираат. А кога станува збор за организирање протести, никој не вели дека не треба да го искористат ова демократско право, но не смее да се случи тие протести да прераснат во улично насилство. Добро е што властите уште веднаш предупредија за можностите за дестабилизација. На тој начин, кога сѐ е транспарентно и јавно кажано, најдобро се превенира – објаснува Трајанов.

Бидете спокојни, полицијата си ја знае работата

Граѓаните не треба да бидат загрижени за безбедносната состојба во Македонија, бидејќи полицијата и останатите институции ќе одговорат соодветно во рамки на законските надлежности, смирува министерот за внатрешни работи Панче Тошковски.

– Точно е дека постојат информации коишто се во насока кон дестабилизирање на државата и сметам дека јавноста треба да биде запознаена со сите факти коишто се од јавен интерес, а ова е секако во интерес на јавноста. Едноставно кажано, факт е дека е тешко за некој којшто 20 години бил на власт да прифати да биде опозиција. Особено тешко е кога знае дека позади себе има огромни индиции коишто секојдневно пристигнуваат до институции во насока на сторен криминал, душмански насочен, насочен кон грабеж на државата и нормално дека ќе бидат вознемирени, нормално дека ќе гледаат да реагираат и сето тоа би било нормално доколку тоа го прават во рамки на едни демократски механизми, во делот на протести и така натаму, но не е нормално доколку нивната крајна цел е токму дестабилизација – рече Тошковски.

И премиерот Христијан Мицкоски деновиве изјави дека ДУИ ја загрозува интеретничката слика во државата и претставува закана по мирот и стабилноста на Македонија.

– Суштината на ваквите потези е да се одбрани капиталот стекнат во изминативе 20 години на власт, но не се исклучува и можноста некои групи да бидат несвесно изманипулирани и да го предизвикаат територијалниот интегритет и суверенитет – предупреди премиерот.

Претседателката на државата Гордана Сиљановска-Давкова, пак, сѐ уште не планира да го свика Советот за безбедност по најавите дека ДУИ оваа есен може да преземе чекори за дестабилизација на државата.

И АХМЕТИ ЌЕ ПРОБА ДА НАПРАВИ ШАРЕНА РЕВОЛУЦИЈА Нѐ очекува бурна и турбулентна есен

The post АХМЕТИ СЕ МИСЛИ КАДЕ ДА УДРИ Секој обид за дестабилизација на државата ќе биде експресно задушен, тврдат безбедњаците appeared first on plusinfo.mk.

„Тактиката на полицијата и на безбедносните служби треба постојано да се менува и да се прилагодува исто онака како што се менува содржината на заканите за евентуални терористички напади во земјава“.

Вака безбедносните експерти со коишто разговараше Плусинфо ги коментираат вчерашните заканувачки пораки што беа испратени до неколку основни училишта во Прилеп, а во кои, наместо вообичаените дојави за бомби кои веќе со месеци ни ги трауматизираат децата, напишано беше дека ќе има пукање од огнено оружје кон прозорците на училишните згради.

На ваквиот нов вид закани со пукотници, коментираат нашите соговорници, полицијата не смее да делува исто како со дојавите за поставени бомби во училиштата, бидејќи, како што велат, евентуалната брзоплета евакуација на учениците со која би се случило групирање на децата пред училиштата, може само дополнително да им ја олесни работата на терористите.

Поранешниот министер за внатрешни работи Павле Трајанов забележува дека целата оваа работа со заканувачките мејлови веќе добива драматични размери, па апелира до македонските безбедносни служби да ја подобрат соработката со странските безбедносни служби и да стават крај на драмата.

– Не знаеме со какво огнено оружје се закануваат, но во секој случај, најдобра мерка е да се изврши евакуација на безбеден начин и да се спречи групирање на децата во дворот на училиштата или во близина на училишните згради. Тактиката мора да се прилагодува според заканата. Во МВР има професионалци кои умеат да разработат одлична тактика. Јас мислам дека целата оваа работа околу заканите веќе добива драматични размери и службите мора деноноќно да работат и да ја подобруваат соработката со странските безбедносни служби. Нарушена е безбедноста на граѓаните, се создаваат трауми, децата се чувствуваат несигурни на училиште и на улица, а веќе редно време е да се стави крај на оваа будалаштина – вели Трајанов.

Тој смета дека подготовките на заканите се прави на домашен терен, а дека мејловите ги испраќаат странци.

– Ако мене ме прашувате, сметам дека подготовката на заканите се врши на домашен терен, а голема е веројатноста да е вклучен и странски фактор кој ги испраќа мејловите. Оти, ако подобро анализираме, тешко би им било на странците да ги дознаат училиштата и нивните електронски адреси без да имаат помош од тука – објаснува Трајанов.

Стефан Буџаковски, професор од областа на безбедносните науки и кривичното право, пак, вели дека сите ние треба полека да почнеме да учиме како да ги игнорираме заканите.

– Треба да се посвети поголемо внимание на превентивните механизми во однос на заштита на училиштата, а тука можат да се вклучат повеќе општествени субјекти, не само полицијата. Ни станува јасно дека овој вид хибридна војна, без разлика од кој центар е управувана, веќе го постигна ефектот, но не треба да се продлабочи. Ефектите се негативни, а целта е само заплашување, без да има некои конкретни активности. Затоа, потребно е да научиме да игнорираме. Како што се навикнавме да живееме во пандемија, така ќе се навикнеме да живееме и во хибридна војна, која, за среќа, засега е безопасна – објаснува Буџаковски.

Во однос на новиот вид закани со пукотници од огнено оружје, професорот се согласува дека е време полицијата да ја смени тактиката.

– Ако некој ви се заканува дека ќе пука со оружје, а вие во тој момент правите евакуација на училиштето, тогаш постои опасност да му ги изнесете учениците „на тацна“. Значи, потребни се подлабоки анализи. Не велам дека училиштето не треба да се испразни ако постои некаква закана, но начинот на евакуација мора да биде професионално изведен и треба добро да се знае како треба да се постапува во случај на опасност. Ако сме сериозна држава, тогаш треба сериозно да му пристапиме на проблемот, но тоа никако не смееме да го правиме врз грбот на децата – вели Буџаковски.

Во електронското поштенско сандаче на прилепското основно училиште „Блаже Конески“, а најверојатно и во останатите три училишта во истиот град, вчера за првпат пристигнале вознемирувачки пораки, а заканувачот се заканил дека ќе пука со огнено оружје кон прозорците на училиштата.

„Денеска нема да поставиме бомба, туку ќе пукаме кон училишните прозорци“ – стоело во дописот испратен до училиштето ООУ „Блаже Конески“ од Прилеп, дознава Плусинфо.

Голем број дојави за бомби имаше и утринава, а освен закани за поставен експлозив во 11 скопски училишта, трговски центри, хотели, музеи, судови, имаше дојава и за поставена бомба во домот на претседателот Стево Пендаровски. За среќа, по неколкучасовна темелна проверка на објектите, МВР соопшти дека дојавите се лажни.

„ЖРТВИ МОРА ДА ПАДНАТ, ВЛАСТА НА СДСМ ДА СЕ ТРГНЕ“ Што пишува во заканувачките мејлови за бомби пратени утринава?

ДОЈАВА ЗА БОМБА ВО ДОМОТ НА ПРЕТСЕДАТЕЛОТ ПЕНДАРОВСКИ Хотели, музеи, трговски центри – наредена е евакуација!

The post „БОМБАШИТЕ“ СЕ ЗАКАНУВААТ СО ПУШКИ, ПОЛИЦИЈАТА ЈА МЕНУВА ТАКТИКАТА Евакуацијата на училиштата е нож со две острици – потребна е професионалност appeared first on plusinfo.mk.

На шпанските разузнавачи им беа потребни цели два дена за да им влезат во траг на заканувачите и да откријат од каде се испратени бомба-писмата коишто минатата недела беа оставени во поштенските сандачиња на неколку амбасади во земјата, а едно такво писмо пристигна и во домот на шпанскиот премиер Педро Санчез.

Македонската полиција, пак, освен едно погрешно уапсено момче, потроши скоро два месеца само за да сфати дека заканувачите со бомби во скопските средни училишта ги испраќаат заканувачките мејлови само во среда, четврток и во петок, односно само тогаш кога одредена група ученици имала одредени часови на училиште.

И токму во моментот кога министерот за внатрешни работи Оливер Спасовски организираше прес-конференција за да се пофали и да го пласира „спектакуларното“ сознание во јавноста, се случи нов проблем: се појавија нови закани за бомби и во училишта од другите градови, но овојпат и во основни училишта.

„Што е многу, многу е“. Вака безбедносните експерти со коишто разговараше Плусинфо ја коментираат новонастанатата ситуација и велат дека дојдено е време кога треба навистина сериозно да му се пристапи на проблемот.

Ако не се реагира брзо и ако не се постигнат резултати во следните неколку дена, велат тие, тогаш не би требало да нѐ чуди ако заканувачите почнат да го менуваат курсот, па од основните и средните училишта да се префрлат на факултетите, трговските центри, концертните сали…

Поранешниот министер за внатрешни работи Павле Трајанов објаснува дека Македонија не може сама да го реши проблемот со дојавите за бомби и принудена е да бара помош од странските разузнавачки служби, но кога веќе гледаме дека операцијата долго трае и дека на странците очигледно не им е приоритет да ни помогнат, тогаш, посочува тој, треба да одиме чекор погоре и да ги активираме останатите институции.

Трајанов во разговор за Плусинфо вели дека сега e повеќе од потребно на сцената да настапи премиерот на државата, кој заедно со министерот за надворешни работи официјално ќе побара помош од другите држави.

– Мора да го кренеме нивото, оти, очигледно, вака ништо не правиме. Премногу долго трае целата операција со дојавите за бомби, па се создава слика дека странските разузнавачки служби не се премногу заинтересирани да ни помогнат. Комуникацијата мора да биде на највисоко ниво, бидејќи се работи за безбедносен, но и за политички проблем. Треба да се ангажираат сите служби на чело со Агенцијата за национална безбедност (АНБ), која има склучено соработка со најмоќните странски безбедносни служби како што се германската, француската, израелската, па дури и со ЦИА. Клучна е соработката со странските развиени разузнавачки служби. Врз основа на сите информации што ги добивам е дека станува збор за внатрешен непријател. Овде се подготвува целата операција и не случајно се избрани училиштата. Јас можам да кажам дека дури 85% е шансата заканувачот или заканувачите да бидат наши сограѓани, оти се гледа дека иницијативата и логистиката е домашна, а заканата може да испратена од било кој крај на светот. Траги не се оставаат, а дури и да се појави некаква трага, проблемот е што македонските служби не би можеле да ја откријат. Ние како држава немаме информатичка моќ за да ги следиме тие траги, па приморани сме да побараме експертска разузнавачка помош од странство. Затоа, ние треба да го сториме тоа што најдобро го знаеме – да собереме доволно информации за лицата коишто ја подготвуваат операцијата во Македонија. Штом насетиме кој и каде ги подготвува заканите, верувајте дека проблемот ќе биде решен за многу брзо време – објаснува Трајанов.

На прашањето дали е сега време министерот за внатрешни работи Оливер Спасовски да си поднесе оставка поради тоа што веќе повеќе од еден месец траат заканите со бомби, а полицијата не е ни блиску до решавање на проблемот, Трајанов вели дека не треба целата одговорност да му се припишува на министерот.

– И опозицијата и власта треба да бидеме крајно претпазливи во една ваква деликатна ситуација. Јас сум еден од најголемите критичари, ама во овој момент мора сите политички партии да бидат крајно претпазливи. Не е сега прашањето дали Спасовски треба да си поднесе оставка или не. Впрочем, целата одговорност не е негова. Тука е Агенцијата за национална безбедност која мора вредно да работи и да си ги постави приоритетите – рече Трајанов.

Стефан Буџаковски, професор од областа на безбедносните науки и кривичното право е убеден дека зад хибридните закани со дојави за бомби стои една или повеќе политички партии од земјава.

– Состојбата со заканите со бомби е доказ дека безбедносниот систем на Македонија е нефункционален и можам да кажам дека тие деструктивни елементи на дестабилизација се однесуваат токму на интересите на поединци. Сметам дека актуелната состојба со заканите со бомби е резултат на хибридните мерки коишто ги преземаат одредени политички партии за да постигнат одредени политички цели. И нема ништо друго, сѐ е кристално јасно. Оти, ако се работеше за нешто друго, досега ќе беа откриени заканувачите. Ние имаме меѓународна соработка со службите од Европа и од светот, па навистина е чудно никој да не открие кој стои зад заканувачките мејлови. Токму ваквиот сомнеж отвора друго прашање: која од политичките партии во Македонија е одговорна за заканите со бомби? Станува збор за класична политичка игра, односно за политички натпревар во кој нема правила и во кој се вклучени недозволени средства, а чија цена ќе ја платат граѓаните – вели Буџаковски.

Тој се обиде да направи споредба на состојбата со заканите во Македонија со оние во Шпанија, но како што вели, разликата е огромна.

– Прво, сите функционери во Шпанија не се поставени на предлог на политички партии, туку се поставени по принципот на способност и професионалност. Тие си ја бркаат работата и не дозволуваат народот да биде загрозен. Ако се појават закани, а одговорните не можат да ги фатат заканувачите, тогаш тие веднаш си поднесуваат оставка поради неспособноста да се снајдат со предизвикот. Ете, тоа е разликата помеѓу Македонија и Шпанија. Заканите со бомби кај нас траат веќе подолго од еден месец, а Шпанците за само два дена успеаја да откријат кој е испраќачот на бомба-писмата. Затоа, на нашиот министер за внатрешни работи му преостануваат само две работи: или да го реши случајот или да си поднесе оставка – објаснува Буџаковски.

Злате Димовски, професор на Факултетот за безбедност, не ја исклучува можноста идните закани со бомби да ги заобиколат училиштата и да се сконцентрираат на плоштадите, хотелите и на трговските центри.

– Заканите најпрво пристигнуваа во средните училишта, подоцна и во основните, а не треба да нѐ чуди ако следната цел на заканувачите им се градинките. Не е воопшто лесно да се идентификуваат заканувачите, бидејќи сајбер-просторот нуди безброј можности за сокривање на идентитетот. Мора да се изнајде модалитет како постепено да почнеме да стануваме имуни на ваквите појави, а тоа ќе биде на добробит и на институциите кои ќе имаат можност да ги следат процесите. Од тоа што официјално го добиваме како податок е дека нашите служби веќе имаат нешто дознаено и дека наводно има осомничени заканувачи. Меѓутоа, наскоро ќе треба да се преземат низа чекори од наша страна за да ги заштитиме институциите, особено училиштата, а јас лично не верувам дека тоа ќе кулминира со затишје, туку напротив, заканувачите ќе се свртат кон другите институции, кон хотели, трговски центри и плоштади. Ова сега е насочено кон вградување страв кај учениците за тие да ja сфатат за опасноста од хибридниот тероризам, а кај родителите уште повеќе да се зацврсти неверувањето во капацитетот на системот, кое, всушност, е целта на терористичките организации – објаснува Димовски.

Во поглед на предлогот на министерот Спасовски да се постават полицајци пред училиштата кои ќе ги контролираат влезовите и излезите, Димовски вели дека може да биде контрапродуктивно и застрашувачки за самите деца.

– Со кое право ќе ги проверуваат ранците и чантите на луѓето кои влегуваат во училиштата? Треба да има наредба за претрес. А што ако бомбата не е во ранецот, туку е скриена во долната облека? Како ќе ги претресуваат? Јас не велам дека предлогот е лош, но мора да ги согледаме сите аспекти. Дали тие деца нема дополнително да ги истрауматизираме ако тоа го примениме? Кај нив ќе се вгради страв и нема да сакаат да одат на училиште – вели Димовски.

Во меѓувреме, министерот Спасовски не престанува да се жали дека воопшто не им било лесно на полицајците да откријат кој стои зад заканувачките мејлови.

– Полицијата има проблеми, дојавите за бомби во средните и во основните училишта доаѓаат од странски IP адреси, па затоа не е лесно да се открие кој е виновникот. Полициските службеници не можат лесно да ги добијат податоците, па мораат да комуницираат со странски полициски служби, кои, пак, не даваат лесно информации. Станува збор за ВПН конекции и за тоа ќе треба меѓународна правна помош да се добијат тие информации и податоци – рече Спасовски во петокот.

Министерот вели среќна околност е тоа што дојавите се лажни, но и дека имале осомничени.

– Најавувам дека ќе има реализација, има осомничени, ако нема осомничени тогаш бадијала е реализацијата – порача Спасовски.

Дојави со бомби се регистрирани и утринава во 5 кавадаречки основни и средни училишта.

The post ЗАКАНИТЕ ДОАЃААТ ОД „ВНАТРЕШЕН НЕПРИЈАТЕЛ“? Нашите бомби тешко ќе дојдат на ред кај странските разузнавачки експерти appeared first on plusinfo.mk.

За програмерскиот и технички ум на Илон Маск, искрено загрижен за опасноста од нуклеарен армагедон, и за оваа војна, како и за бројни други проблеми на кои наишол, може да се најде решение, ако се сака и ако се употребат разумот и интелигенцијата. Но, кој вели дека тие што одлучуваат за прашања на војната и мирот – политичарите, бараат решенија, дури и кога се можни?

Зеленски и од Илон Маск направи „руски навивач“

Реакциите беа повеќе од жестоки и неповолни. Украинците, на кои досега многу им помагаше, и со конкретна технолошка поддршка, веднаш го „отпишаа“. Украинскиот претседател Володимир Зеленски објави „анкетно“ прашање, „Кој Илон Маск повеќе ви се допаѓа? И понуди два одговора – оној што ја поддржува Украина или оној што ја поддржува Русија?“.

За Зеленски, очигледно, Маск веќе „навива за Русија“, иако потроши повеќе од 80 милиони долари за на Украина да ѝ овозможи сигурна интернет комуникација преку неговите микро-сателити „Стар линк“, помош која за Украинците е од непроценливо значење во војната со посилниот руски агресор.

За Русите, пак, Маск одамна е непријател и „украински агент“, но ете почнал да се освестува. За тоа тој доби иронични „честитки“ од верниот соработник на Путин, Дмитриј Медведев:

„Честитки за Маск! Неговиот следен твит веројатно ќе биде нешто за Украина како вештачки создадена земја“.

Медведев алудира на оценката на Маск дека тоа што Крим денеска е дел од Украина било „грешка на (Никита) Хрушчов“, претседателот на СССР, кој во 1954 година административно го префрлил Крим од Република Русија на Република Украина. Медведев ова го толкува како напредок на Маск и цинично прогнозира следен негов чекор на напредување да биде да ја прифати и актуелната руска доктрина за „Украина како измислена нација“. Подло, нема што!

Сепак, официјалната реакција на Кремљ, што ја соопшти портпаролот Димитриј Пасков беше афирмативна – тој рече дека предлог на Илон Маск е „позитивен чекор“.

Но, Илон Маск не е сам во желбата војната во Украина да заврши на „зелена маса“ и тоа колку што е можно побргу, пред да се случи уште поголема светска трагедија. Тоа го покажаа милиони негови следбеници на социјалните мрежи, а неговите размислувања ги споделуваат и многу мислечки луѓе во светот. Без разлика на разликите, нив ги поврзува една заедничка желба – да се најде мировно решение за војната, која ја исцрпува светската економија и ги загрозува животите на милиони луѓе.

Пивоваров: Русија не смее да го бара Крим

Наши аналитичари, експерти за меѓународна политика и дипломатија со кои разговараме, наоѓаат добри и лоши страни во предлозите на Маск и имаат свои видувања на дел од нив.

Според Владимир Пивоваров, нема сомнение дека и овој конфликт, како и сите други, мора да заврши со мировен договор. Според него, најдобро е до таков договор да дојдат Киев и Москва, но меѓународните фактори ќе мора да бидат гарант на таков договор. Сепак, тој не смее да го поткопува меѓународниот правен поредок.

– Признавање на анексии на украински територии од страна на Русија би го нарушила целиот светски поредок. Во таква ситуација, некоја голема сила, која има мал сосед, како што сме и ние, ќе може да каже – тоа е наша територија. И да ја заземе, анектира. Сите меѓународни организации тогаш би требало да згаснат – вели Пивоваров, кој десет години бил професор по дипломатско-конзуларно право.

Според него, не може да се прифати лесно позицијата на Русија дека Крим е руски, зашто оттогаш поминало многу време и Русија можела многу одамна да го спори тоа.

– Преседанот е направен и со Косово, но како што гледате, и неговиот статус е проблематичен, дел земји ја признаваат, дел не ја признаваат независноста на Косово – смета Пивоваров.

Според него, добро решение е за Украина да биде воено неутрална, но прашање е дали таквиот статус им конвенира на големите сили. Нормално е и демократски секоја суверена држава сама да одлучува кон кој пакт ќе се приклучи.

Буџаковски: Анексијата е завршена работа

За Стефан Буџаковски, универзитетски професор од областа на правото и безбедноста, анексијата на четирите украински области и на Крим е „завршена работа“, тие остануваат во Русија, без разлика што ќе имаат неодреден статус на непризнаени и полупризнаени, слично на Косово.

– Во реализацијата на секој мировен план мора да бидат вклопени интересите на глобалните големи сили. Доколку тие не се внесени како цели во решавањето на конфликтот, тука не очекувајте никакво решение – вели тој.

Според Буџаковски, светот мора да се сврти кон балансирање на целокупната состојба, а не наметнување на одреден интерес, било да е од членките на НАТО или од страна на Русија.

– Мора да се тргне од тоа дека Русија во никој случај нема да се согласи НАТО да ѝ дојде до граница и дека Украина, во сите варијанти, мора да остане неутрална држава, тампон зона помеѓу НАТО и Русија – вели Буџаковски.

Ова што доаѓа сега како информација за напредок на украинските сили, всушност е повлекување на нови граници. Тој не очекува офанзивата на Украина да продолжи, таа е исцрпена држава, ресурсно и човечки, па не треба да се очекуваат големи промени на воен план.

– Работите треба да се свртат кон тоа дали ова ѝ е доволно на Русија. А да знаете дека Русија ќе инсистира на неутрален статус на Украина. Ако меѓународниот фактор успее да најде компромис меѓу позициите на двете страни, можно е мировно решение. А од она што засега може меѓу редови да се прочита, тоа би одело во правец на насока на она што го реков, Украина со неутрален статус на тампон зона, а Крим и останатите анектирани држави остануваат во Русија – прогнозира Буџаковски.

Димовски: Конфликтот ќе потрае уште некое време

За разлика од него, Злате Димовски, исто така универзитетски професор, може да се очекува конфликтот и воените дејствија да потраат уште некое време, а јасно е дека сите посакуваме што поскоро да почне преговарачки процес. Тој исто така смета дека Украина мора да биде неутрална и не верува во враќање на анектираните територии.

– Она што го посакуваме е конфликтот да заврши што поскоро, да нема човечки жртви и материјални жртви и уште поголеми последици врз светската, европската па и нашата економија. Сметам дека конфликтот ќе потрае уште некое време, но очекувам порано или подоцна да се седне на преговарачка маса и да се разговара. Очекувам сите овие територии кои сега Русија, да не кажам ги анектира, тоа е тежок збор, туку веќе и со референдум ги потврди како своја територија, да останат во нивни посед, или евентуално ќе добијат некој статус кој допрва ќе треба да се решава, но дека Русија ќе откаже од тие територии, јас не верувам. Тоа ќе биде и условот кој Русија ќе го поставува во постигнување на било каков договор – вели Димовски.

Според професорот Димовски многу е битно Украина, барем сега за сега, да не влезе во НАТО, затоа што ако биде примена во НАТО, според членот 5,  целата Алијанса, сите држави членки ќе треба да се вклучат во конфликтот.

– Тоа би било она непосакувано сценарио на Трета светска војна. Мислам дека НАТО и Европските земји се свесни за тоа и не дозволуваат барем сега за сега, брз приема на Украина во НАТО – вели професор Димовски.

Тоа што дополнително ги компликува работите, е што во Украина има и други територии за кои Русија тврди дека се нејзини, каде што има мнозинство Руси, тоа може да значи дополнителен конфликт, вели Димовски, но мислам дека тоа ќе биде искористено за некакво урамнотежување, порамнување во преговорите, нешто слично како што беше решението за Косово.

– Во првиот момент тука ќе бидат и мировни сили, кои можат да останат и подолг временски период, додека не се добие целосно решение, или конфиктот да се подзаборави и да се наметне сфаќање дека не е толку важно каде живееш, туку како живееш. Оваа криза покажа колку сме економски зависни, колку зависиме од туѓи ресурси, и ние, па и Европа. Така што, ќе се чека еден подолг период, ќе има некакви мировни сили, ќе има некаков надзор од нечија страна. Претпоставувам, Русија нема да прифати сили од НАТО, туку можеби од ОБСЕ или ќе се формираат мировни сили од Обединети нации, од некои држави која Русија ќе ги прифати и подолго време тоа ќе се развие во еден систем на прифаќање на овие територии како дел од Русија. Украина, од друга страна, ќе мора да прифати, или да сфати, дека ѝ е подобро да живее во мир, отколку во конфликт, па и по цена на губење одреден дел од територијата, нешто што ѝ се случи и на Србија. Србија никогаш не го даваше, па и сега не го дава Косово, меѓутоа факт е дека тоа сега е посебна држава и во тој контекст, така некако се решаваат работите на светско ниво. Сметам дека во таа насока ќе се движат работите и со овој конфликт во Украина – вели Димовски.

Ризвановиќ: Фер гласање би довело до спротивен резултат на референдумите

Новинарот во ТВ 24 Сеад Ризвановиќ, кој ја следи проблематиката на војната во Украина, смета дека предлозите на Илон Маск се во правец на завршување на војната, а тоа е добро.

– Решението за украинската криза е поставено уште на почетокот на конфликтот од францускиот претседател Макрон, а сега повторно актуелизирано од Илон Маск. Решението е Украина да се одбрани т.е. да победи, а рускиот претседател Путин да не биде поразен. Решението мора да биде во таква насока, бидејќи алтернативите се многу опасни – вели Ризвановиќ.

Според него, во слична насока е и предлогот на Маск, и неговата суштина е да се најде средно решение од кое двете страни би биле подеднакво незадоволни.

– Повторени референдуми во Донбас, под покровителство на ОН, се такво решение, неприфатливо за Русија, која процесот го смета за завршен, но и за Украина која го смета за ништовен. Повторените референдуми на таков начин би добиле меѓународен кредибилитет, а со оглед на расположението на населението кое живее во тие области и повеќе од извесно е дека фер гласање би довело до спротивен резултат во минимум две области (Херсон и Запорожје). Иако во моментов Украина победува, Русија има капацитет во најмала рака да го пролонгира конфликтот и трајно да задржи одредени области, така да Украина би добила максимум од ситуацијата, Путин не би се сметал за поразен, Русија би добила безбедбносни гаранции со неширење на НАТО во Украина а Москва би добила и трајно решение за снабдувањето со вода за Крим.

АДАМЧЕВСКИ: РУСИЈА ЌЕ ЈА ПРИФАТИ УКРАИНА ВО НАТО, НО НЕМА ДА СЕ ОТКАЖЕ ОД КРИМ

Мирче Адамчевски, долгогодишен дописник од Москва и одличен познавач на руско-украинските односи, вели дека е предрасуда дека Русија нема да прифати Украина да биде во НАТО.

– Сметам дека анексијата на украинските територии е главен приоритет на Русија. Русија веќе го има НАТО на своите граници, преку балтичките земји, а еве и Финска и Шведска ќе станат земји на НАТО, така што тоа е само тактички пристап на Русија во преговорите. Она од што нема да отстапи Русија е анексијата на Крим и на четирите региони каде сега имаше референдуми – смета Адамчевски.

Според него, нереално е да се очекува Русија да прифати повторување на референдумите со било какви набљудувачи.

– Таа се повикува на искуството на Косово и на пресуди на Меѓународниот суд на човекови права. Според неа, референдумите се легитимни, а нема да дозволи нови, во никој случај, затоа што така би признала дека тие референдуми се неважечки. Дури и да знае, што е реално, дека резултатот не би се разликувал ако тие се повторат под меѓународен надзор – вели Адамчевски.

Според него, направени се многу грешки во решавањето на конфликтот, а договорите од Минск требало да се поддржат и да се спроведат, зашто обезбедувале солидни решенија, автономија за регионите со руско мнозинско население. Според него, со договорите од Минск требало да се опфатат и други региони со мнозинско руско население, кои требало да добијат културна и локална автономија, делумно и финансиска, и на тој начин формално да останат во Украина, со силни врски со Русија, но војната би се избегнала.

– Најголема загриженост треба да претставува можното дестабилизирање на состојбата во приморскиот град Одеса, каде населението е прилично проруски настроено – предупредува Адамчевски.

Според Адамчевски, во моментов Русија е заинтересирана за продолжување на преговорите, но Украина тоа го одбива под влијание на западните сили, пред се на САД и на Велика Британијa.

ПОФЕР ПРЕДЛОГ ВО ОВАА БЕЗИЗЛЕЗНА СИТУАЦИЈА – ЗДРАВЈЕ!

 

• Светот оди во неповрат и веќе тие процеси се иреверзибилни, за жал. Таа е реалноста и тоа не е нешто што е тешко да се увиди и заклучи. Прашање е само дали ќе заврши со нуклеарна војна, или со комплетно урушување на системите и хиперинфлација, недостиг на храна, греење и струја.
• Околу ситуацијата во Украина мислам дека не се остави простор за компромис. Сите мостови за некаква соработка и ретерирање се срушија и војната стана ултимативна. Предлогот на Маск е конкретен и квалитетен, а според мене, со него губат и двете страни и така треба да биде.
• Русија ќе остане само со Крим, ако референдумите под меѓународно покровителство и мониторинг во четирите области пропаднат, што е реално да се очекува ако навистина, како што вели Зеленски, Русите не се добредојдени никаде во Украина. Ако пак не е баш така, тогаш некој не бил искрен до крај.
• Инаку, Крим е природно руска територија и отсекогаш бил, се додека Хрушчов не го подарил на Украина. Таму отсекогаш доминантно население било руското. За овие други четири области кои Русија насилно ги анектираше, предлогот на Маск е одлична шанса да се провери какво е расположението на населението.
• Пофер предлог во оваа лоша и безизлезна ситуација – здравје. Ако се сака да се заврши ова лудило, не смее Русија целосно да се порази, мора да ѝ се отвори некаква задна врата, која ќе ѝ овозможи некаква, макар и Пирова победа, за пред домашната јавност, бидејќи нејзиниот комплетен пораз ќе значи и нуклеарна катастрофа. А тоа не е нешто што го сакаме.

The post ВО ПОТРАГА ПО МИР ВО УКРАИНА И ПО РАМНОТЕЖА МЕЃУ ЗАПАДОТ И РУСИЈА Што велат нашите аналитичари за предлозите на Илон Маск? appeared first on plusinfo.mk.

Од една страна, илјадници македонски граѓани секојдневно редовно излегуваат на протест пред Владата и пред Собранието со намера да спречат прифаќање на понижувачкиот француски предлог.

Од друга страна, пак, вооружена група од триесетина возрасни мажи вчера спонтано се појави на плоштадот „Скендербег“ и почна директна пресметка со луѓето што протестираат.

Безбедносните експерти имаат поделени мислења. Едни велат дека македонскиот народ треба да биде подготвен на секакви сценарија кои ќе имаат за цел да го оттргнат вниманието од францускиот предлог, но и да ги задушат протестите против францускиот предлог. Други ја смируваат топката и велат дека кулминацијата на инцидентите веќе е постигната и дека не постои клима за избувнување меѓуетнички конфликт.

Кулминацијата е достигната

Пензионираниот армиски полковник и актуелен претседател на Балканскиот форум за безбедност, д-р Благоја Марковски, смета дека кулминацијата на инцидентите била постигната синоќа и дека нѐ очекува прилично мирен период.

Кулминацијата на овие инциденти е веќе достигната со вчерашните настани, па во следните денови работите ќе течат многу поинаку

Благоја Марковски Претседател на Балканскиот форум за безбедност

– Не мислам дека сме во предворјето на меѓуетнички конфликт. Сето ова што ни се случува деновиве се изолирани инциденти поттикнати од определени идеолошки позиции, но сепак контролирани со цел да не се создаде меѓуетнички конфликт. Во контекст на сите настани во Македонија, едноставно, во овие услови не може да се зборува за создавање услови на меѓуетнички конфликт, затоа што имаме добро научени лекции од блиското минато и во тие научени лекции преовладува основата дека сите губиме во еден таков конфликт, а добиваат само определени политички групации. Тие лекции со сигурност ги имаме научено, а и сите истражувања и анализи зборуваат за тоа дека народот не е подготвен да ја повторува истата грешка на воен конфликт внатре во Македонија. Кулминацијата на овие инциденти е веќе достигната со вчерашните настани, па во следните денови работите ќе течат многу поинаку. Сепак, народот ќе продолжи да излегува на улиците и да го искажува својот револт против францускиот предлог и мислам дека Владата треба многу побрзо да реагира во смисла на носење одредени заклучоци во контекст на францускиот предлог. Колку поскоро би се решил тој однос Собрание-Влада-граѓани, толку побрзо ќе се расчисти ситуацијата во земјава. Повеќе од очигледно е дека граѓаните не се задоволни од овој предлог и затоа тој предлог треба да биде одбиен – изјави Марковски.

Сценарио за филм

Злате Димовски, професор по криминалистичко разузнавање и тероризам, во разговор за Плусинфо вели дека очекувал и сѐ уште очекува на Македонија да ѝ се случи нешто слично на „Диво насеље“ со цел да се оттргне вниманието од францускиот предлог, но и за да се задушат протестите против францускиот предлог.

– За очекување беше дека се крои некакво насилно сценарио. Не би можел да обвинам една или друга страна и не би можел да кажам кој би можел да биде креаторот на таквото сценарио, меѓутоа познавајќи ја македонската историја, односно нашите минати активности на ниво на влади и опозициони делувања, јас искрено очекував дека деновиве ќе се случи нешто многу пострашно. Во Македонија секогаш е сензитивно да се разговара за меѓуетничките односи и тука секогаш може човек да најде база за да обвинува и да очекува нешто да се случи. Меѓутоа, состојбата на терен е сосема поинаква. Факт е дека меѓуетничките односи кај нас се користат само за дневна политика, а граѓаните се веќе соживеани и еманципирани, па ниту едните ниту другите не посакуваат немири. Но, искористувајќи ја таа сензитивност, бидејќи ние сѐ уште ја имаме таа детска болест дека не можеме да се трпиме на етничка основа, а практично нема зошто да не можеме да се трпиме, едноставно јас очекував дека ќе ни се случи нешто многу полошо од тоа што ни се случи вчера. Искрено, очекував и сѐ уште очекувам да ни се случи нешто како кумановските настани со цел да се сврти вниманието од прифаќањето на францускиот предлог. Така, бегајќи од помало зло ќе влеземе во многу поголемо зло. На тој начин ќе постојат елементи за да се забранат протестите, да се укаже на опасноста којашто следува и практично да се прифати предлогот. И тоа се сценарија кои веќе ги имаме преживеано. Оти, и вчерашниот инцидент со пиштолите беше дел од нечие сценарио. Само што сега ќе се испостави дека пиштолите не биле вистински, дека зрното никаде не завршило… – објасни Димовски.

Многу е лошо кога одредени политичари ќе најават некакво сценарио и тоа сценарио за многу брзо време ќе стане реалност, додава професорот.

– Се сеќавате дека пред само една недела одредени политичари во земјава предупредија на меѓуетнички тензии доколку не се прифати францускиот предлог? И не дека тие политичари имале некакви сознанија, туку тие се подготвени да го спроведат сценариото. А зошто овие тензии би биле меѓуетнички? Овде воопшто нема потреба да се расправаат и да се тепаат Македонците и Албанците. Ние имаме проблем со Бугарија, односно проблемот е помеѓу државите. Ние никогаш не сме имале проблем со Албанија или со Косово. Сега имаме проблем со држава како Бугарија којашто нешто сака да ни наметне. Затоа, јас овде не гледам причина за меѓуетнички тензии. Дали можеби неприфаќањето на францускиот предлог ќе ја заглави Албанија на патот кон Европа? Апсолутно не е така. Албанија си има своја агенда, а ние си имаме своја агенда. Дали ќе нѐ одвојат од пакетот или нема да нѐ одвојат, најмногу зависи од оние актери од ЕУ коишто доаѓаат овде за да ни пеат песна – изјави Димовски.

Целта е поинаква

Албанците треба да докажат дека во Македонија има соживот со тоа што и политичките партии од албанскиот блок ќе ги поддржат барањата на Македонците во однос на францускиот предлог, вели Стефан Буџаковски, професор од областа на безбедносните науки и кривичното право.

– Во моментов нема клима за избувнување меѓуетнички конфликт во Македонија. Постојат поединци или групи коишто сакаат да предизвикаат меѓуетнички конфликт, меѓутоа, целта и барањето на оние коишто излегуваат на протест против францускиот предлог е сосема во друга насока. Но, ако некој сака да наметне меѓуетнички конфликт, тоа не може да вроди со плод. Тоа го забележавме и кај оние што протестираат против францускиот предлог, бидејќи нивната цел не е да се пресметуваат на меѓуетничка основа, туку целта им е да ги заштитат македонскиот народ, идентитетот, јазикот и сите оние бугарски барања коишто се актуелни во овој период. Албанците и албанските партии во земјава сега треба да ги поддржат барањата на Македонците, а не да се заканувааат дека нема да коалицираат со политички партии коишто нема да го поддржат францускиот предлог. Затоа, им препорачувам на Албанците да размислат, оти во одредени моменти во иднина ќе им треба нашата поддршка, а во одредени моменит нам ни е потребна нивната поддршка. Едноставно, соживотот значи поддршка во вакви клучни моменти за државата – ни изјави Буџаковски.

The post ЗАВЧЕРА ЛЕТАА МОЛОТОВИ, ВЧЕРА ЗАИГРАА ПИШТОЛИ, А ШТО ЌЕ БИДЕ ВЕЧЕРВА И УТРЕ? Распалувањето на меѓуетничките односи е секогаш во игра appeared first on plusinfo.mk.

Османи во одбрана на предлогот, со кој се очекува да биде кренато ветото за македонските евроинтеграции, меѓу другото кажа и дека евентуалното неприфаќање би можело да предизвика меѓуетнички тензии во Македонија.

Пензионираниот армиски полковник д-р Благоја Марковски, кого јавноста добро го памети од јавните настапи за време на конфликтот во 2001 година, смета дека изјавата на министерот е најблаго речено неодговорна.

– Тоа што Бујар Османи го кажа е многу неодговорно за еден политичар, кој наместо да работи на единството на земјата, прејудицира можни меѓуетнички тензии. По сите лекции што ги научивме, не е можно да дојде до нарушување на меѓуетничите односи во Македонија. Во државава сите етнички заедници ги уживаат највисоките права – вели Марковски, кој во моментов е претседател на Балканскиот форум за безбедност.

Во изјава за Плусинфо, тој потенцира и дека заговорниците на францускиот предлог немаат преголема причина за триумф.

– Во нивните објаснувања се наведува големата дипломатска победа за тоа дека издејствувале чиста формулација на јазикот. Тоа не е никаква победа, бидејќи нашиот јазик во ОН е веќе дефиниран како македонски и не може сега за тоа да се преговара со ЕУ или со Бугарија – додава Марковски.

Можни се тензии меѓу Македонците?

Слично размислува и политичкиот аналитичар Имер Селмани, кој смета дека времето на тензии помина.

– Граѓаните се доста свесни за да дозволат тензии. Ние сме созреано општество, а созревањето сме го платиле скапо во изминатите децении. Сепак, некој би можел за лични цели да посегне кон алката на меѓуетничките односи и тоа да се покаже како најслабата алка во општеството бидејќи ние сепак живееме во мултиетничко општество. Затоа кога имаме спротивставени мислења за одредени политички процеси, никој не би смеел да ги расипува меѓунационалните односи, без разлика какво мислење имаме за некоја конкретна работа – вели Селмани.

Дека нема опасности од тензии во Македонија, конкретно меѓу Македонците и Албанците, смета и аналитичарот Мерсал Биљали.

– Не верувам во меѓуетнички тензии. Повеќе е реално да дојде до тензии меѓу самите Македонци, бидејќи дел од населението е проевропско, а дел е дезинформирано. Нема потреба од страв, бидејќи клучот на преговорите со ЕУ е кај Македонија, која во секој момент може да ги прекине преговорите. Што се однесува до Албанците тоа нема никаква врска, бидејќи Албанија 20 години ќе преговара за членство во ЕУ, па дури тогаш ќе може да говориме за одредени проблеми – изјави Биљали.

Преспанскиот договор остави сомнеж?

Професорот по безбедност, д-р Стефан Буџаковски, објаснува дека иако безбедносната состојба на меѓународен план е доста сложена во моментов, не гледаме никакви знаци дека на Балканот е возможно да дојде до нарушување на безбедноста.

– Безбедносната состојба е стабилна и во Македонија, но не треба да се исклучи можноста поединци да се обидат да ја дестабилизираат. Тука мислам на партиски структури, патриотски здруженија и други групации, кои би можеле да го нарушат мирот и да предизвикаат тензии – вели професорот.

Буџаковски смета дека ваквата состојба може да се надмине само со целосна отвореност во претставувањето на францускиот предлог.

– Преспанскиот договор остави сомнеж меѓу граѓаните дека некои работи останаа скриени, затоа властите ќе мора да бидат крајно транспаренти во презентацијата на предлогогот – додава Буџаковски.

Лидерот на Демократски сојуз, Павле Трајанов, на своите коалициски партнери од владејачката коалиција им порача во текот на расправата во врска со предлогот, да се воздржат од закани за кривичен прогон на тие што имаат поинакви ставови, како и од меѓуетнички тензии. Договорената стратегија за широки консултации треба да се одвива во демократска атмосфера, одговорно и транспарентно, смета Трајанов.

The post ОДБИВАЊЕТО НА ПРЕДЛОГОТ НЕМА ДА ГИ СКАРА МАКЕДОНЦИТЕ И АЛБАНЦИТЕ Заплашувањата на Османи не држат вода appeared first on plusinfo.mk.