Позитивните економски параметри, потврдени и од Евростат, му пречат на СДСМ, затоа што во негово време граѓаните живееја потешко, економијата стагнираше, а инфлацијата рушеше рекорди, реагира ВМРО-ДПМНЕ на прес-конференцијата на Фатмир Битиќи.

„Непријатно е да се слуша СДСМ и неговите првенци како се препелкаат зборувајќи за економија, инфлација, скапотија. Делува како да не сакаат Македонија да се движи на подобро, економијата да се стабилизира и постепено да заживува. Излегуваат на прес-конференција каде јавно признаат дека им пречи растот на БДП од 3,1%, кој впрочем е раст од 3 или над 3% седми квартал по ред, односно од заминувањето на СДСМ во длабока опозиција“, соопшти ВМРО-ДПМНЕ.

Фатмир Битиќи, кој еден од многуте во СДСМ кој сака оваа Влада предводена од ВМРО-ДПМНЕ да не успее, а со тоа да не успее и државата, не може да го скрие разочарувањето од стабилизирањето и постепениот, но одржлив развој на македонската економија, се додава во соопштението.

„Бруто-домашниот производ на Македонија во првиот квартал од 2026 година, со 3,1% раст повторно е меѓу првите 5 во Европа. Тоа не го зборува ВМРО-ДПМНЕ или пак Владата, тоа го потврдуваат релевантни европски институции, како што е Еуростат. Во услови на една од најголемите енергетски кризи, во април месец, споредбено со април минатата година, имаме раст на индустриското производство од 7,6%, додека, пак, за нецели 2 години власт на ВМРО-ДПМНЕ се креирани околу 16.000 нови работни места“, се вели во соопштението.

Нормално, додава ВМРО-ДПМНЕ, овие параметри и податоци не ги гледаат и не им се допаѓаат на СДСМ, Венко Филипче или, пак, на Фатмир Битиќи, кои за 7 години власт оставија економски пустош, уништени институции и држава пред банкрот.

„Сите тие, до пред 2 години имаа можност да направат многу повеќе и за државата и за граѓаните, но наместо тоа, државата ја опљачкаа, народот го осиромашија. Во нивно време инфлацијата рушеше двоцифрени европски и светски рекорди, народот живееше полошо, едвај преживуваше, економијата бележеше, ако може да се нарече, раст од 2 и нешто проценти, токму кога вицепремиер за економски прашања во тогашната влада на СДСМ беше експертот за набројување прехранбени производи, Фатмир Битиќи. Сега, кога сме кај куповната моќ за која зборува Битиќи, кој набројува производи, ќе му направиме една мала споредба со периодот кога тој беше на власт и кога можеше да направи многу повеќе за граѓаните да не живеат во беспарица. На пример, во 2022 година цената на компирот била 40,7 денари, а во 2026 година е 43,91 денари по килограм и со тогашната минимална плата можело да се купат 442 килограми, а сега 593 килограми компири“, соопшти ВМРО-ДПМНЕ.

Цената на јаболката во 2022 била 59 денари и со тогашната минимална плата можело да се купи 304,6 килограми, а во 2026 просечната цена на јаболката е 71,83 денари и со една минимална плата може да се купат 362 килограми, додава партијата.

„Ќе ја споредиме уште цената на шеќерот, која во 2022 година, кога Битиќи беше вицепремиер за економски прашања, била речиси иста со таа сега во 2026 година, односно тогаш 44,67 денари по килограм, а сега е 44,92, со таа разлика што сега граѓаните со една минимална плата можат да купат многу повеќе. Тогаш можело да се купат 403 килограми, сега 579,8 килограми шеќер. Ваквата тенденција, граѓаните да можат да купуваат повеќе, ја има кај скоро сите основни прехранбени производи. И ова јасно потврдува дека куповната моќ на граѓаните, споредено со периодот на власт на СДСМ е многу поголема. Така да, на Битиќи и на таквите како него во СДСМ кои не сакаат Владата и државата да успеат, им порачуваме дека ќе се разочараат, затоа што позитивните економски параметри, успесите и развојот на стопанството и државата ќе бидат секојдневие“, порача ВМРО-ДПМНЕ.

Пратеникот од СДСМ Фатмир Битиќи денеска рече дека „економската лага на Христијан Мицкоски се распаѓа на каса во маркет“ и обвини дека Владата со лаги се обидува од една статистичка бројка да создаде „економска бајка“, додека граѓаните секојдневно се соочуваат со сè поскапи производи и намалена куповна моќ. Рече дека „една илјадарка едвај покрива неколку килограми сезонско овошје, една табла јајца и мало парче месо“ и дека  инфлацијата изнесува 5,7 отсто и е повисока од просекот во ЕУ.

The post БИТИЌИ И СДСМ МОЖЕА ДА НАПРАВАТ НЕШТО ЗА ГРАЃАНИТЕ, АМА ЈА ОГРАБИЈА ДРЖАВАТА Им пречи стабилниот економски раст на Македонија appeared first on plusinfo.mk.