– Мислам дека е особено важно Србија да гласа за оваа резолуција со цел да се признаат и промовираат фактите, бидејќи сите одлуки на меѓународните судови и тела покажуваат дека во Сребреница се случил геноцид. Сè додека тој се негира и не се признава, веројатно е можноста да се повтори – изјави минуистерот за надворешни работи Бујар Османи.

Но, српски политичари бурно реагираа на оваа информација од Скопје.

– Кога ги нарекуваа Поранешна Југословенска Република Македонија и Скопје, ние ги нарекувавме Македонија. Со нив делевме лекови за време на ковид-пандемијата, им ги дадовме нашите резерви од жито, брашно и шеќер, а СПЦ на Македонската црква ѝ овозможи независност и име. Македонија им се „заблагодари“ на Србите за сето тоа со признавањето на Косово и сега со ентузијазам учестува во резолуцијата која треба да ги прогласи Србите за геноциден народ – изјави Вулин, поранешен шеф на српската Безбедносно-информативна агенција и ексминистер за одбрана и за внатрешни работи на Србија.

Тој цинично додаде дека „Македонија навистина треба, покрај името и историјата, да го промени и јазикот, како што бараат Бугарите“.

– Северномакедонците знаат дека нивниот глас не значи ништо, дури ни кога станува збор за нивното име или јазик, а уште помалку за Србите, па затоа можеле барем да се воздржат доколку не можат да ја поддржат Србија. Македонија навистина треба да го смени јазикот, заедно со името и историјата, како што бараат Бугарите. Навистина е глупаво да користат речник во кој немаат зборови за чест, благодарност, пријателство, слобода, срам – рече Вулин, реагирајќи на изјавата на министерот Османи.

Шефот на српската дипломатија, Ивица Дачиќ го оцени како „дрскост“ ставот на Османи и го праша дали сака да поднесе Резолуција за геноцидот на Србите во Јасеновац, заедно со Србија.

– Тоа е цинизмот што постои на нашите простори, дека е важно да се води антисрпска политика и уште на сето тоа не повикуваат да учествуваме во тоа. Дали треба да бидеме на страната на нацистите, за да бидеме почитувани? – праша Дачиќ.

The post „МАКЕДОНЦИ, ЗНАЕТЕ ЛИ ВИЕ ШТО Е БЛАГОДАРНОСТ И СРАМ?“ Српски политичари разочарани од македонското коспонзорство на резолуцијата за Сребреница appeared first on plusinfo.mk.