Министерството за образование и наука засилено ги спроведува реформите во образованието. Согласно Реформската агенда, до декември 2026 година имаме обврска да стигнеме до бројка од 700 компании вклучени во дуалното образование. Веќе сега таа бројка е надмината и над 800 компании се вклучени во стекнување практично знаење на учениците директно кај работодавач. И, оваа бројка дополнително ќе расте, затоа што компаниите го гледаат бенефитот од учеството во квалитетното образување кадри според свои потреби, рече денеска министерката за образование и наука Весна Јаневска.

Како што истакна таа во обраќањето по повод доделувањето на грантот од 500.000 евра за УГД – Штип, училиштето „Кочо Рацин“ од Свети Николе и три компании, и учениците ја препознаваат предноста да влезат на пазарот на труд или во високото образование подготвени не само со теоретско, туку и со практично знаење од конкретни работни места.

– Затоа и бројот на ученици во дуалните паралелки во средните стручни училишта, од година во година е сѐ поголем. Во стручно образование се запишани 66 отсто од средношколците. Од нив, околу 30 проценти се запишани во дуално образование. Јасен е интересот на компаниите за раст на овие бројки – ним им се потребни квалификувани работници, кои знаат да ракуваат со опрема и ја познаваат технологијата. Тоа, меѓу другите предности, значи и намалување на трошоците за обука по вработувањето. Дополнително, дуалното образование го издигнуваме и на ниво на високото образование. Со новиот Закон за високото образование, што наскоро ќе биде пред пратениците, се дава можност практичната настава во задолжителните наставни предмети, за подрачјата каде што е тоа применливо, да се изведува како дуално образование под менторство на стручни лица од реалниот сектор и ментор од соодветната студиска програма на универзитетот. Оваа измена е согласна со европското разбирање на стручното образование не само како одговор на недостигот на вештини на пазарот на трудот и несовпаѓањето на вештините, туку и како двигател на социјалната инклузија, дигиталната трансформација, територијалната кохезија и долгорочната општествена отпорност – истакна министерката.

Таа изрази задоволство што образованието и бизнис заедницата продолжуваат да создаваат можности за младите и да градат конкурентен човечки капитал.

– Со поддршка од нашите меѓународни партнери: Германската и Швајцарската влада, преку Регионалниот фонд за предизвици, Земјоделскиот факултет при Универзитетот „Гоце Делчев“ во Штип и средното општинско училиште „Кочо Рацин“ од Свети Николе, заедно со шест претпријатија, добиваат грант од речиси 500.000 евра за реализација на проектот „Паметна обука во преработката на производи од млеко и месо“. Ќе се изгради и опреми современ Центар за обука за преработка на млеко и месо, ќе се изработат наставна програма и материјали за учење, со што ќе бидат поддржани две квалификации: млекопреработувач и преработувач на месо и месни производи. Во Македонија, со гордост говориме за успешноста на моделот на дуално образование, во рамки на средното стручно образование. Во овој грант се препознаваат сите негови добри практики: можноста за партнерство меѓу средни училишта и факултетите, активната улога на компаниите, вклученост на стопанските комори, практичната обука на учениците со ментори, како и соработка со меѓународни партнери. Заедничка цел е директно решавање на структурните предизвици на пазарот на труд, како што се младинската невработеност и недостигот на вештини, како и зголемување на конкурентноста на локалните компании – подвлече Јаневска.

На настанот присуствуваа и претседателот на Стопанската комора, Бранко Азески, германската амбасадорка, Петра Дрекслер, заменик амбасадорот на Швајцарија, Михал Харари, директорот на Германската развојна банка за Македонија и Косово, Мориц Реме, како и проектниот координатор на Регионалниот фонд на предизвици, Балша Чулафиќ.

Регионалниот фонд за предизвици е финансиска институција која има за цел зголемување на конкурентноста на претпријатијата во Западен Балкан преку финансирање инвестиции во опрема и инфраструктура за проекти за дуално и стручно образование изработени во партнерство на установи за стручно образование и претпријатија. Грантовите се доделуваат по пат на конкурентен регионален предизвик.

Германското сојузно министерство за економска соработка и развој додели 73,4 милиони евра на РЦФ, а швајцарската влада застапувана од страна на Швајцарската агенција за соработка и развој (SDC) кофинансираше дополнителни 10 милиони евра. Средствата беа доделени на kfW Развојната банка, а реализирани од страна на Коморскиот инвестициски форум на Западен Балкан 6 (ЗБ6–КИФ), како заедничка иницијатива на стопанските комори од регионот. Фондот е имплементиран од страна на консталтинг конзорциуми.

По четири отворени повици, Регионалниот фонд за предизвици се обврзува да поддржи вкупно 17 проекти со 91 партнер претпријатие во Северна Македонија во износ од 7,63 милиони евра. На четвртиот повик за предлог проекти, пристигнаа 187 изјави на интерес од земјите на Западен Балкан, од кои 14 беа од Северна Македонија. Комисијата за избор одлучи да финансира еден најуспешен проект од Северна Македонија со вкупен износ од 495,350 евра.

The post ПОВЕЌЕ ОД 800 КОМПАНИИ СЕ ВКЛУЧЕНИ ВО ДУАЛНОТО ОБРАЗОВАНИЕ Учениците и фирмите најдоа заеднички јазик преку овој модел appeared first on plusinfo.mk.

Едно младо девојче е убиено, а најмалку четворица се ранети од огнено оружје за време на хокејашки натпревар меѓу две средни училишта на лизгалиште во гратчето Потакет на Роуд Ајланд, во САД, јавија американските медиуми.

Канцеларијата на градоначалникот на Потакет соопшти дека и напаѓачот е ликвидиран, а полицијата не трага по други осомничени за нападот.

Како што пренесуваат локалните медиуми, до пукањето дошло по кавга меѓу родителите на децата кои учествувале во натпреварот. Според описот на сведоците, откако се слушнале истрели во арената Денис Линч, децата и родителите трчале да спасат жива глава, при што дошло до голема турканица.

The Pawtucket, Rhode Island Mayor’s office said that a young girl was killed and four people were injured in a shooting at the Dennis M. Lynch Arena ice rink during a high school hockey game between two co-op teams this afternoon.

The Mayor’s office said the shooter was dead and… pic.twitter.com/Kwsc3QXRF1

— Denn Dunham (@DennD68) February 16, 2026

The post СЀ ПОЧНАЛО СО КАВГА МЕЃУ РОДИТЕЛИТЕ Тинјџерка убиена, четворица ранети во пукање на средношколски натпревар во хокеј appeared first on plusinfo.mk.

Ако постои една фраза која ја слушаме премногу често, тоа е дека денешните млади се пасивни. Родители ја кажуваат, наставници ја потврдуваат, општеството ја прифаќа како општа вистина. А јас, после години работа со илјадници млади луѓе, ќе кажам нешто што веројатно ќе звучи контрадикторно за многумина, но за мене е апсолутна вистина: младите не се пасивни, туку системот кој ги „тренира“ е пасивен.

Секогаш кога некој родител ќе ми каже дека неговото дете „нема интерес“, „не знае што сака“ или „не се труди доволно“, на памет ми доаѓа едно исто едноставно прашање: кој им покажа со пример на тие млади деца што значи реално да се трудиш силно и напорно, во свет кој се менува со брзината на светлината? Тврдам дека не постои млад човек кој е природно мрзлив или апатичен, туку дека таквите стануваат незаинтересирани кога ќе почнеме да ги учиме, да ги „тренираме“ за иднината, во рамки што одамна се распаднати. Кога ги оценуваме со метрики што немаат врска со реалноста и кога од нив бараме да си ја градат својата иднина за 22 век врз образовни темели од минатиот век.

Токму затоа, оваа година преку „Средношколец Милионер“ добивме редок момент како општество, ретка можност вистински да ја видиме генерацијата што толку често ја потценуваат многумина, но не и јас, и нашиот образовен екосистем кој го градиме.

Средношколците кои учествуваа на овој натпревар за најдобри бизнис идеи не дојдоа „да си играат стартап“ или да „утепаат време“ бидејќи им било досадно дома. Тие дојдоа со развиени идеи што решаваат реални проблеми, изградија прототипи, направија кампањи, креираа брендови, а дел од нив веќе и имаат приходи за сопствените идеи. На 16 години.

Во моментот кога им дадовме реални задачи, рокови и предизвици, целиот филм дека младите се немотивирани, мрзливи, апатични се распадна за 24 часа. Буквално. Оваа генерација не е пасивна и тоа е факт. Таа е само неиспровоцирана. Непредизвикана. Оставена на милост и немилост на трулоста на робустниот систем. Но, разбудете им го умот и ќе гледате како истите млади стануваат непобедливи.

Ако треба искрено да кажеме зошто училиштата генерално тешко успеваат да ја отклучат нивната амбиција, одговорот е едноставен. Нашиот систем на образование е дизајниран во времето кога Гугл не постоеше, вештачката интелигенција беше научна фантастика, а „сонот“ за професионална кариера се градеше со тулите на кои стои изгравирано: „од 9 до 5“ во иста фирма триесет години.

Ама денешните млади живеат во свет во кој пазарот на труд се трансформира секој месец, најбараните професии не постоеја пред само пет години, најбараните професии пред пет години пак, денес се најмалку барани. Вештачката интелигенција веќе не е само алатка туку за некого може да биде и конкуренција, а креативноста, претприемништвото и адаптибилноста се новите основни предмети, новите најважни вештини. И за што да ги обвинуваме младите кои живеат во ова време, а во образовниот систем поради неговата робустност и интертност, учат во дух кој е одамна застарен? Сите концепти и идеи за реформи ги поздравувам и како образовен екосистем активно и со радост учествуваме во сите тие иницијативи, но гол факт е дека за тоа да има ефект, треба да помине доста време, во време кога времето е сѐ поскапоцено, бидејќи минува – пребрзо, со сите промени кои се случуваат. И во центарот на тие космички брзини на промени на реалноста, ги имаме нашите млади деца. Иднината на оваа земја. Означени како пасивни, мрзеливи, неактивни, незаинтересирани.

Не, луѓе. Младите не бегаат од работа, туку бегаат од бесцелна работа. Младите сакаат да создаваат, да решаваат проблеми, да градат нешто што има фактичко значење, па и профит. Да, на 16-17 години сакаат да заработуваат и тоа не што не е лошо, туку е најдобрата вест за секој родител.

Токму затоа нашиот Бреинстер образовен екосистем со академиите, АИ курсевите, академијата за талентирани средношколци и факултетот сме дизајнирани како реалистична реакција на неправилно поставениот систем со децении. Она што го правиме таму не е револуција, туку здраворазумски проактивен пристап – нашите дечки учат преку реални проекти, работат со ментори кои доаѓаат од индустријата, развиваат вештини кои пазарот ги бара денес, градат портфолио уште во средно, се насочуваат кон кариера врз база на способност, и дипломците фиксно добиваат работа. Ова не е луксузирање и покажување мускули, туку е неопходност ако сакаме младите да останат тука, да создаваат тука и да успеваат тука. И ние апсолутно веруваме во потенцијалот и капацитетот на нашите млади. Затоа сме и ние тука, а не сме го продале бизнисот на некој кој ќе штанца дипломи, додека ние живееме лагодно на некоја плажа до крајот на работниот век.

Да се вратам назад, на младите и на „Средношколец Милионер“. Од овој натпревар научив дека имаме генерација која не треба да ја будиме, туку да ја ослободиме. Овие луѓе не бараа полесен пат, туку да им се даде шанса. И им ја дадовме, како што некој ми ја даде мене пред 10 години кога започнував и кога повеќето на мене гледаа со скепса и стереотипи, додека јас гледав дека имам идеја која ќе носи промени. Промени за генерациите кои знаат да работат во тим, да учат брзо, да се менуваат уште побрзо и да донесуваат одлуки со зрелост што ретко ја гледаме кај возрасните. И, најважно, генерации кои ќе ја променат оваа земја многу побрзо отколку што институциите и оние кои формално ги образоваат се подготвени тоа да го признаат.

Ако сакаме Македонија да биде силна држава, мора да започнеме со силни средношколци. Не со ученици што знаат да изрецитираат лекција научена скоро на памет, туку со млади луѓе кои знаат да создаваат вредност. Младите не се пасивни. Тие само чекаат некој да престане да ги воспитува во минатиот век и конечно да им ја отвори вратата кон иднината. И кога таа врата еднаш ќе се отвори, ништо, ама баш ништо, нема да ги сопре да бидат рамо до рамо со најдобрите во светот.

The post Не постои пасивна младина, туку пасивен систем appeared first on plusinfo.mk.

Уставниот суд повторно оформи предмет за бесплатниот превоз на средношколците од приватните средни училишта, на иницијатива на претседателот на Судот, Дарко Костадиновски.

Судот во 2023 година донесе одлука дека сите средношколци имаат право на бесплатен јавен превоз под определени услови, без разлика дали учат во државните или во приватните училишта, но Собранието со измените на Законот за средно образование од април 2025 година повторно предвиде дека превозот и сместувањето за учениците од приватните училишта ги плаќа основачот.

„Уставниот суд на 5 декември 2023 година го укина член 41-а став 1 во делот „јавно“ и став 3 во делот „јавното“ од Законот за средното образование. Судот ја укина оспорената одреба бидејќи допушташе нееднаков третман на лицата кои имаат ист, идентичен правен статус, односно статус на редовни ученици во средното образование, што е основ да им се обезбедат еднакви услови во образованието. Со членот 24 е изменет членот 41-а од Законот за средното образование, при што во став 9 е предвидено дека сместувањето и превозот за учениците од приватните средни училишта ги обезбедува основачот. Со оглед на содржината на одредбата, произлегува дека Собранието не ја испочитувало Одлуката на Уставниот суд (У.бр.81/2023)“, соопшти Уставниот суд.

Дополнително, се додава, со самиот факт што некој станува редовен ученик во средно училиште се стекнува со право на бесплатен превоз, бидејќи истото е предвидено со член 41-а став 1 од Законот за средното образование.

„Со фактот дека Законодавецот ги исклучил учениците од приватните средни училишта од користење на јавниот превоз се претпоставува дека постапил спротивно на член 8 став 1 алинеја 3, член 9 и член 51 од Уставот“, соопшти Уставниот суд.

Во укинувачката одлука од 2023 година Уставниот суд наведува дека Законодавецот различно постапил за редовните ученици во средното образование, кои се во еднаква правна положба, во однос на правото за користење на бесплатен превоз, кој им е достапен само на учениците од јавните училишта кои немаат сместување во ученички дом или пак местото на живеење им е оддалечено најмалку 2,5 километри од школото. Според Уставот, не постои можност за различен третман на учениците од средното образование.

Со оглед на укинувачката одлука од 2023 година, се очекува уставните судии да го укинат и неуставниот член од најновите законски измени и да им овозможи јавен превоз на учениците од приватните средни училишта што ќе го плаќаат локалните самоуправи, исто како и за средношколците од јавните училишта.

The post УСТАВНИОТ СУД ЌЕ ГО ВРАЌА БЕСПЛАТНИОТ ПРЕВОЗ ЗА СРЕДНОШКОЛЦИТЕ ОД ПРИВАТНИТЕ УЧИЛИШТА Собранието повторно донесе неуставна одредба, која еднаш беше укината appeared first on plusinfo.mk.

Фондацијата МК2025 го објави повикот за прием на апликации за стипендии во склоп на Фондот за поддршка на талентирани средношколци „Таленти денес – лидери утре“ за тековната 2025/2026 година.

По успешниот пилот-проект во 2019 година, Фондацијата МК2025 континуирано обезбедува средства за финансиска поддршка на талентирани млади од Македонија. Преку овој фонд, и оваа година ќе се стипендираате 10 млади таленти. Поддршката за секој/а стипендист/ка изнесува 60.000 (шеесет илјади) денари, исплатени во 10 (десет) еднакви месечни износи на годишно ниво. Стипендиите се доделуваат само за месеците во кои се одвива настава (почнувајќи од септември 2025 до јуни 2026г.).

Критериуми за аплицирање

– Средношколци (од прва до трета година) на редовни студии во државни средни училишта;

– Средношколци со успех над 4.70;

– Добитници на награди или учесници на државни и/или меѓународни натпревари во областа на природни и општествени науки, компјутерско програмирање и останати области; и

– Кандидати-ученици кои доаѓаат од социјално ранливи семејства со вкупен (бруто) финансиски приход во семејството до 800.000 МКД годишно.

Повеќе за програмата, начинот на аплицирање и потребна документација: https://www.macedonia2025.com/fondacija-mk2025-otvoren-povik/

Апликациите се поднесуваат на Е-scholarship Платформата https://e-scholarship.macedonia2025.com/#/scholarship-details/17

Осознајте ги импресиите на нашите поранешни и сегашни стипендисти:  https://macedonia2025.com/support-fund-for-talented-students-talents-today-leaders-tomorrow/

Покрај редовната стипендија, Фондот обезбедува менторство и обуки за личен и професионален развој на кандидатите, пракси во истакнати македонски компании, и слични активности/поддршка кои ќе бидат во интерес на професионалениот развој на корисниците. Стипендистите ќе бидат поканети на годишните настани и активности во организација на Фондацијата МК2025 и Македонија2025.

Фондот за поддршка на талентирани средношколци „Таленти денес – лидери утре“ досега има обезбедено 50 стипендии.

Крајниот рок за доставување на апликациите е 25.07.2025 година.

The post СТИПЕНДИИ ЗА СРЕДНОШКОЛЦИ ОД МАКЕДОНИЈА2025 Станете дел од семејството на идни лидери! appeared first on plusinfo.mk.

За здруженијата на наставници кои испраќаат средношколци на некоја од 15те меѓународни научни олимпијади, како и за семејствата на учениците, завршуваат грижите поврзани со учеството од финансиски аспект. Наместо самостојно да финансираат или да бараат спонзори, отсега трошоците за учество на овие престижни меѓународни натпреварувања, ќе ги покрива државата, соопшти Министерството за образование и наука.

„Ова е една од придобивките на измените на Законот за средно образование кои беа усвоени минатиот месец. Министерството за образование и наука на својата веб страна веќе објави јавен повик наменет за акредитирани здруженија на наставници кои организираат натпревари за средношколци, со цел покривање на трошоците за котизација и за пат, односно за учество на една од 15-те меѓународни научни олимпијади. Во зависност од правилата на организаторите на секоја поединечна меѓународна научна олимпијада, ќе се финансира учеството на најмногу шест ученици и двајца ментори“, соопшти МОН.

Едно акредитирано здружение може да добие финансиски средства за учество само на една олимпијада. Пријавувањето е електронски преку порталот e-uslugi.mon.gov.mk, најдоцна до 31.10.2025 година.

„Грижата кон младите се зголемува. Постојано се унапредуваат ученичкиот и студентскиот стандард, со воведување на нови и проширување на постојните права. Во изминатите неколку месеци беа прифатени повеќе барања на учениците и студентите, како поддршка на нивниот воспитно-образовен процес, а со воведувањето на оваа последна можност се поддржува потенцијалот на најталентираните“, соопшти МОН.

The post МОН ЌЕ ГИ ПЛАЌА ТРОШОЦИТЕ ЗА УЧЕСТВО НА СРЕДНОШКОЛСКИТЕ ОЛИМПИЈАДИ НИЗ СВЕТОТ Државна поддршка за најталентираните ученици appeared first on plusinfo.mk.

Во вториот по големина град во Србија, денеска ќе се одржи протест на средношколците против онлајн наставата. Ним им се придружија од синоќа нивни врсници од неколку градови во државата кои пристигнаа пеш или на велосипеди, јави дописникот на МИА од Белград.

Неколку илјади средношколци од цела Србија се собраа синоќа пред железничката станица во Нови Сад, каде што им оддадоа почит на жртвите кои загинаа на тоа место на 1 ноември лани откако се урна бетонска настрешница.

Протестот „Онлајн не е решение“  почнува денеска во 11:52 часот и ќе трае до полноќ.На протестот ќе зборуваат средношколци од неколку градови, а на учениците ќе им се обратат и професори.

На протестот дојдоа средношколци од Белград, Зрењанин, Суботица, Шабац, Обреновац, Ужице, Ваљево, Лозница, Чачак, Горњи Милановац, Пожаревац, Бајина Башта и други градови. Според организаторите, се очекуваат над 1.000 средношколвци од различни делови на земјата. Најголемата група, од околу 650 кандидати, пристигна синоќа од Белград.

„Да покажеме со пример за што се бориме овој пат“, рекоа средношколците од Нови Сад, поканувајќи ги сите да им се придружат на 26 април.

Средношколците од Нови Сад ги пречекаа своите врсници со извици на поддршка, а од Белград пристигнаа последни, по што синоќа имаше огномет.

The post НЕ ЗАПИРААТ ПРОТЕСТИТЕ ВО СРБИЈА Средношколците се борат против онлајн наставата appeared first on plusinfo.mk.

Насилник со нож денеска нападна средношколци и други лица, повредил обезбедувач и предизвикал голема драма на улиците во Кичево.

Полицијата го уапси.

„На 16.4.2025 во 11.45 часот на улицата Круме Угриноски во Кичево полициски службеници го лишиле од слобода Е.З.(28) од Кичево. На улицата 29 Ноември во Кичево тој со закана со остар предмет сопрел такси возило и се заканувал на возачот. Потоа, во две средни училишта агресивно се однесувал и физички нападнал ученици и вработени. Нападнал и случаен минувач на градскиот кеј на реката Сушица и вработен како обезбедување во Медицинскиот центар во Кичево, на кого му нанел повреда со остриот предмет“, соопшти полицијата од Кичево.

Подоцна, откако бил приведен, во службени простории на ОВР Кичево насилникот Е.З. физички нападнал и полициски службеник.

По целосно документирање на настанот, против лицето ќе биде поднесена соодветна пријава.

The post СО НОЖ НАПАДНА ДЕЦА И ПОЛИЦАЈЦИ, ПРОБОДЕ ОБЕЗБЕДУВАЧ ВО БОЛНИЦА Насилник предизвика голема драма во Кичево, полицијата го приведе appeared first on plusinfo.mk.

Сојузот на средношколци со задоволство информира дека Министерството за образование и наука и Државниот испитен центар го прифатиле нивното барање државната матура да се полага во училишните простории наместо во амфитеатрите на факултетите.

Согласно оваа одлука, како што е наведено во соопштението на Сојузот на средношколци, матурантите ќе полагаат во своите училишта, под услов тие да ги исполнуваат потребните стандарди за спроведување на испитите.

„За училиштата кои не ги исполнуваат овие услови, Државниот испитен центар ќе овозможи алтернативни простории врз основа на доставени барања од страна на засегнатите училишта“, информираше Сојузот на средношколци.

The post ДРЖАВНАТА МАТУРА ЌЕ СЕ ПОЛАГА ВО УЧИЛИШТАТА НАМЕСТО НА ФАКУЛТЕТИТЕ Прифатено е барањето на Сојузот на средношколци appeared first on plusinfo.mk.

Сочувство до семејствата на загинатите и порака за единство и човечност испратија средношколците од Тетово со перформанс со кој порачаа: „Говориме различен јазик, но плачеме исто“.

Тие порачаа дека тагата не познава етнички, верски или јазични разлики, бидејќи сите сме исти во болката и сочувството.

Погледнете го видеото:

The post 🎥 ГОВОРИМЕ РАЗЛИЧЕН ЈАЗИК, НО ПЛАЧЕМЕ ИСТО Емотивна порака од тетовските средношколци appeared first on plusinfo.mk.