Германскиот канцелар Фридрих Мерц веќе не очекува дека во блиска иднина ќе има средба меѓу рускиот и украинскиот претседател Владимир Путин и Володимир Зеленски, јавува ДПА.

За време на средбата со францускиот претседател Емануел Макрон во Форт де Брегансон, неговата летна резиденција на Азурниот Брег, двајцата разговарале за дипломатските напори за ставање крај на војната во Украина.

– Денеска повторно мора да се справиме со тоа прашање, имајќи предвид дека очигледно нема да има средба меѓу претседателот Зеленски и претседателот Путин – рече германскиот канцелар.

Ова „е различно од тоа што беше договорено минатата недела меѓу американскиот претседател Трамп и претседателот Путин, додека бевме во Вашингтон“, рекол Мерц, пренесе германската агенција.

По телефонскиот разговор со рускиот лидер на почетокот на минатата недела, Доналд Трамп објави дека Путин се согласил да се сретне со Зеленски.

Потоа, Москва зборуваше само за подготвеноста да ги покрене претходните билатерални мировни преговори на повисоко ниво.

Украина и нејзините сојузници го обвинуваат Кремљ за застојот. Германскиот министер за надворешни работи Јохан Вадефул во понеделникот во Загреб изјави дека „Путин само купува време“, изразувајќи сомнеж дека средбата со Зеленски ќе се одржи.

– Ако Путин мисли дека може да купи време, тогаш погрешно пресметува бидејќи нашата поддршка нема да се намали – рече германскиот шеф на дипломатијата за време на средбата со својот хрватски колега, потсетува ДПА.

The post МЕРЦ СЕ СОМНЕВА ДЕКА ПУТИН И ЗЕЛЕНСКИ НАСКОРО ЌЕ СЕ СРЕТНАТ „Тоа не беше договорено во Вашингтон“ appeared first on plusinfo.mk.

Во рок од две недели ќе знае дали е можен напредок во напорите за ставање крај на војната во Украина, рече денеска американскиот претседател Доналд Трампи. Тој повторно ја отвори можноста за воведување санкции врз Москва.

– Ќе видиме што ќе се случи. Мислам дека за две недели ќе знаеме во која насока одиме – рече Трамп на прес-конференција во Овалната соба.

Тој додаде дека по тие две недели ќе донесе одлука дали да воведе „масовни санкции“ или не.

Трамп рече дека не е задоволен од ниту еден аспект од мировните напори и дека има многу омраза меѓу завојуваните страни.

Истакна дека не би сакал да биде присутен на евентуална средба меѓу претседателите на Украина и на Русија, Володимир Зеленски и Владимир Путин.

– Ќе видиме дали Путин и Зеленски ќе соработуваат. Знаете, тие се како масло и оцет. Тие навистина не се сложуваат од очигледни причини, но ќе видиме. Ќе видиме дали ќе морам да бидам таму, што не би ми се допаднало – рече Трамп, додавајќи дека посакува Зеленски и Путин да одржат состанок сами.

Претходно, украинскиот претседател Володимир Зеленски изјави дека Русија прави сè што е во нејзина моќ за да спречи средба меѓу него и рускиот претседател Владимир Путин.

The post ТРАМП НЕ САКА ДА ПРИСУСТВУВА НА ЕВЕНТУАЛНИОТ СОСТАНОК МЕЃУ ПУТИН И ЗЕЛЕНСКИ За две недели ќе се знае дали е можен напредок во преговорите за Украина appeared first on plusinfo.mk.

Рускиот претседател Владимир Путин му рекол на американскиот претседател Доналд Трамп дека сака да се види насамо на средба со украинскиот претседател Володоир Зеленски, објави Политико.

Повикувајќи се на извор во администрацијата на Трамп, медиумот објави нови детали од телефонскиот разговор меѓу Доналд Трамп и Владимир Путин синоќа. Трамп направи пауза на состанокот со Зеленски и со европските лидери за да одржи телефонски разговор со Путин.

Според тој извор, рускиот лидер побарал неговата средба со Зеленски да се одржи еден на еден, без присуство на Трамп.

– Кога Трамп го поканил и му понудил да се сретне со него и со Зеленски, Путин одговорил: „Не мора да доаѓаш, сакам да го видам еден на еден – вели изворот на Политико.

Тимот на Трамп, според изворот, веднаш почнал да работи на тоа, а посебната задача за подготовка на сè му била дадена на советникот на Трамп, Стив Виткоф.

Досега и Трамп и Зеленски изразија подготвеност за трилатерален состанок, но Путин сè уште официјално не го објави тоа. Европските лидери бараат четиристран состанок, односно и претставник на Европа да учествува во  разговорите со Путин.

The post ПУТИН ПОБАРАЛ НАСАМО ДА СЕ ВИДИ СО ЗЕЛЕНСКИ Му рекол на Трамп дека не мора да доаѓа на трилатерален самит appeared first on plusinfo.mk.