Вардар бил под истрага на УЕФА цели 10 месеци по пријава поврзана со двојни договори и двојно книговодство, соопшти на брифинг извршниот директор Миленко Неделковски. Според него, клубот бил исправен пред реална опасност да биде исфрлен од европските натпреварувања. Случајот се однесувал на сезоната 2023/24.

Неделковски објасни дека постапката била покрената по пријава од поранешните фудбалери Глишиќ и Мартин Блажевски. УЕФА истражувала дали биле потпишувани двојни договори, практика што е строго забранета според европските правила.

– Десет месеци имавме процес со УЕФА. Се однесува за фалсификувани двојни договори и двојно книговодство. Имаше пријава од двајца играчи, Глишиќ и Мартин Блажевски. Постигнавме договор да платиме казна од 250.000 евра и засилен мониторинг. Ако во следните три години го повториме овој прекршок, ќе бидеме суспендирани од натпреварувањата на УЕФА. Ова се дела сторени пред да дојде новата управа, во сезоната 2023/24. Ние покренавме постапка против непознат сторител за извршување на тие нелегални активности – рече Неделковски.

Казната платена, опасноста останува

Според договорот со УЕФА, Вардар ќе биде под посебен надзор во следните 3 години. Нов прекршок од ист вид би можел да донесе автоматска суспензија од европските натпреварувања.

Раководството тврди дека спорните активности не биле направени во нивниот мандат. Поради тоа, клубот веќе покренал постапка против непознат сторител.

Неделковски истакна дека финансиската состојба денес е значително поинаква од претходно. Според неговите зборови, клубот бележи позитивни резултати и надвор од теренот.

Од шампионска титула до добивка од 700.000 евра

Вардар сезонава ја освои шампионската титула во Македонија по пауза од шест години. Покрај спортскиот успех, раководството се пофали и со позитивен финансиски биланс.

– Во 2025 година Вардар заврши со добивка од 700.000 евра, што само ја покажува разликата во работењето тогаш и сега – додаде Неделковски.

The post ДВОЈНИ ДОГОВОРИ ГО СТАВИЛЕ ВАРДАР ПОД ИСТРАГА НА УЕФА Клубот платил 250.000 евра за да избегне суспензија appeared first on plusinfo.mk.

Извршниот директор на ФК Вардар Миленко Неделковски по лавината реакции од јавноста и од Министерството за спорт на својот Фејсбук профил се извини за скандалозната прослава на победата на клубот.

Но, извинувајќи се на една жена за која срамно се пеело на прославата о извинувањето Неделковски навреди друга жена.

„Во мое име пред се, а и во име на клубот, и се извинувам на Каролина Гочева бидејки во еуфорична прослава испеавме стандардна, но за жал вулгарна, навивачка песна.

Но, од машка гледна точка, а имајќи ја предвид Битола, кому таква песна да пееме? Нa Весна Бендевска ли?

Во Вардар играат и работат мажи со префинет вкус“, напиша Неделковски во извинувањето во кое сподели слика од тренинг на фудбалерите во која тој е во главен план.

The post НЕДЕЛКОВСКИ СЕ ИЗВИНИ НА ЕДНА ЖЕНА, ПА НАВРЕДИ ДРУГА Извршниот директор на ФК Вардар се пофали со „мажите со префинет вкус“ во клубот appeared first on plusinfo.mk.

Големо признание и за македонската судиска организација. Фудбалската федерација на Македонија објави дека Сашо Даневски е назначен за главен фитнес тренер на елитните судии на УЕФА.

Со новата функција, Даневски од 1 јули ќе ја преземе одговорноста за физичката подготовка и мониторингот на најдобрите европски судии.

Даневски со години работи во системот на УЕФА. Кариерата ја почнал како асистент тренер на курсеви за млади судии, а подоцна бил дел од семинари и програми за елитни арбитри.

Бил ангажиран и на UEFA EURO 2024 и UEFA Women’s EURO 2025.

Покрај работата со елитните судии, Даневски ќе има и лидерска улога во координацијата на кондиционите тренери од 55 национални асоцијации членки на УЕФА.

Досега учествувал на 33 семинари и работилници на УЕФА. Како експерт на ФФМ бил ангажиран и во Швајцарија, Србија, Црна Гора и Саудиска Арабија.

Во соопштението на ФФМ се нагласува и поддршката од претседателот на ФФМ, Масар Омерагиќ, за развојот на судискиот кадар.

The post УЕФА МУ ДОВЕРИ ГОЛЕМА ФУНКЦИЈА НА МАКЕДОНЕЦ Даневски ќе ги спрема тренерите на сите 55 федерации appeared first on plusinfo.mk.

Македонската ракометна репрезентација ќе игра против Ракометна репрезентација на Словачка во баражот за пласман на Светско првенство во ракомет 2027, откако Словаците ја елиминираа Украина во драматичен двомеч.

Иако Украина славеше со 32-31 во реваншот, Словачка обезбеди пласман понатаму благодарение на победата од 27-24 во првиот натпревар. Украинците имаа одлична шанса да го свртат резултатот, откако во текот на натпреварот водеа и со шест голови разлика, а на полувреме заминаа со убедливи 20-15.

Сепак, во вториот дел следуваше пресврт. Словачка постепено ја топеше разликата, стигна и до водство, а и покрај минималниот пораз во реваншот, вкупниот резултат беше на нивна страна.

Сега, пред македонските ракометари стои последната пречка за пласман на големото натпреварување. Првиот натпревар ќе се одигра на 13 или 14 мај во Братислава, додека реваншот е закажан за 17 мај во Скопје.

The post ПОСЛЕДНА ПРЕЧКА ДО СВЕТСКОТО Македонија ќе се бори со Словачка за пласман appeared first on plusinfo.mk.

Македонските кошаркари вечерва блеснаа со убедлив триумф над Азербејџан 87:49, отворајќи ги претквалификациите за Евробаскет 2029 со моќен настап што врати вера во црвено-жолтата еуфорија.

Избраниците на селекторот Марјан Илиевски уште од првите минути го наметнаа својот ритам и целосно го контролираа натпреварот. Предводени од капитенот Војдан Стојановски и енергичниот Андреј Јакимовски, Македонија поведе со 25:15, а на полувреме замина со сигурни 40:21.

Меѓутоа, вториот дел донесе уште поголема доминација. Во 26. минута резултатот беше 52:32, а до крајот разликата порасна над 30 поени. Македонија заврши со +38, покажувајќи дисциплина и одбрана што не дозволи ниту миг на неизвесност.

Во македонскиот дрес дебитираше Американецот со македонски пасош Омари Мур, кој постигна 6 поени и неколку атрактивни асистенции. Стојановски забележа 16 поени и 11 скокови, а Јакимовски доминираше со 25 поени и 11 скокови — двајцата со „дабл-дабл“ учинок.

Понатаму, вториот меч во групата помеѓу Луксембург и Република Ирска е во тек, но селекцијата на Македонија веќе го потврди статусот на најсилен противник во групата.

Следниот натпревар ќе се одигра во недела во Даблин против Ирска, каде кошаркарите ќе ја бранат првата позиција и ќе се обидат да продолжат со победнички ритам.

The post БЛЕСКАВМЕ ПРОТИВ АЗЕРБЕЈЏАН, НÈ ЧЕКА ИРСКА Омари Мур дебитираше со неколку атрактивни асистенции appeared first on plusinfo.mk.

Македонскиот олимписки комитет ја претстави младинската олимписка делегација која ќе ја претставува Македонија на Европскиот младински олимписки фестивал – ЕМОФ Скопје 2025. Оваа година, земјата ќе настапи со рекорден број од 203 учесници, меѓу кои 181 спортисти, придружени од тренери, официјални лица и доктори.

Фестивалот што ќе се одржува од 20 до 26 јули во Скопје ќе обедини над 6000 учесници, вклучувајќи 4300 спортисти и тренери, 700 судии и официјални лица, како и голем број волонтери, со делегации од 50 земји.

Македонија досега учествувала со околу 50 спортисти, но овојпат прави историски чекор со далеку поголема екипа.

Македонските спортисти ќе се натпреваруваат во сите 14 спортови што се дел од ЕМОФ, меѓу кои се баскет, велосипедизам, ракомет, џудо, стрелаштво, пливање, таеквондо, одбојка, пинг понг, атлетика и други. Натпреварите ќе се одржуваат на повеќе локации во Скопје и Куманово, а единствено натпреварите по гимнастика ќе се одржат во Осиек, поради недоволни услови за организација во земјава.

И покрај тоа што Македонија досега нема освоено медал на овие игри, надежите се високи. Организаторите најавија дека очекуваат медал во минимум четири спортови.

Претседателот на Македонскиот олимписки комитет, Даниел Димевски, изјави дека најголем капитал што ќе остане од овие игри се младите надежи.

– Сигурен сум дека ова искуство што ќе го доживеат, кога ќе станат олимпијци, сигурно ќе им помогне побрзо да израснат во врвни спортисти. Правиме приказна што ќе се раскажува во наредните генерации – овие работи не се повторуваат и не се даваат на некоја земја многу брзо – рече тој.

Покрај натпреварувањата, фестивалот вклучува и церемонии на свеченото отворање и затворање, како и тренинзи, едукативни и културни активности.

Отворањето на ЕМОФ 2025 ќе се одржи в недела со почеток во 20:30 часот во Спортскиот центар „Јане Сандански“.

The post 181 МАКЕДОНСКИ СПОРТИСТ НА ЕМОФ ВО СКОПЈЕ На младинските игри ќе има 6000 учесници од 50 земји appeared first on plusinfo.mk.

Машката сениорска кошаркарска репрезентација на Македонија денеска и официјално ги започна подготовките за претстојните претквалификации за Европското првенство. Првиот тренинг се одржа попладнево во салата на СРЦ „Кале“, под водство на селекторот Марјан Илиевски и неговите соработници Мирко Петрески, Борче Даскаловски и Миодраг Тодоровиќ.

На првиот собир во Скопје присуствуваа:
Марин Петков, Андреј Магдевски, Амар Хот, Валмир Какруки, Лука Стојановски, Андреј Митревски, Максим Митревски, Лука Савичевиќ, Андреј Андоновски и Марко Миловановиќ.

Поради болки, Лејсон Зекири го пропушти првиот тренинг, но се очекува наскоро да се приклучи. На 17 јули, пред заминувањето за Гевгелија, во составот ќе влезе Адем Мекиќ, а два дена подоцна и Теодор Симиќ. Андреј Јакимовски е најавен за 23 јули.

Неколку играчи во моментов имаат обврски со младинските репрезентации. Марко Луканоски и Стефан Стојковиќ се со М20 селекцијата, а Никола Јаничиќ го чека настап за М18 тимот на Европското првенство во Србија.

Дополнителна сила на националниот тим ќе биде и Џејкоб Вајли, кој ќе се приклучи на подготовките во Гевгелија.

Во Гевгелија, нашата селекција ќе одигра два пријателски натпревара против Швајцарија – на 25 и 26 јули, по што следува преселба во Куманово, каде ќе започнат официјалните претквалификациски натпревари за Европското првенство.

Распоред на натпреварите во претквалификациите:

2 август: Македонија – Романија (во Куманово)

9 август: Унгарија – Македонија (во Шолнок)

13 август: Романија – Македонија (во Орадеа)

20 август: Македонија – Унгарија (во Куманово)

The post ПОЧНАА ПОДГОТОВКИТЕ ЗА ЕВРОПА Македонските кошаркари стартуваа во „Кале“, Вајли и Јакимовски се приклучуваат наскоро appeared first on plusinfo.mk.