Полицијата во изминатите 24 часа привела 23 возачи поради безобѕирно управување со возило. Најголемиот дел од нив немале возачка дозвола, а меѓу приведените имало и тројца малолетници.

Полициските службеници во текот на изминатото деноноќие лишиле од слобода 23 возачи на територијата на целата држава поради безобѕирно управување со возило, соопшти Министерството за внатрешни работи.

Од приведените, 21 лице управувале возило без возачка дозвола. Меѓу нив имало и тројца малолетници. Дополнително, двајца возачи биле затекнати зад воланот под дејство на алкохол.

Најмногу случаи биле евидентирани во Скопје, каде што биле приведени осум лица, меѓу кои и еден малолетник. Во Гостивар биле затекнати четворица возачи без дозвола, од кои еден малолетник.

По двајца возачи биле приведени во Кичево, а по едно лице во Тетово, Куманово, Кочани, Неготино, Валандово, Битола и во Прилеп. Малолетник бил затекнат и во Неготино.

Во Битола и во Штип, пак, по еден возач управувал возило под дејство на алкохол.

Од МВР информираат дека по целосно документирање на случаите ќе бидат поднесени соодветни кривични пријави.

Министерството повторно апелира до граѓаните да не управуваат возила без возачка дозвола, под дејство на алкохол или во период кога имаат изречена забрана за управување.

The post МАЛОЛЕТНИЦИ ВОЗЕЛЕ БЕЗОБЅИРНО, АЛКОХОЛОТ НЕ ИЗОСТАНАЛ Во едно деноноќие приведени 23 возачи низ државата appeared first on plusinfo.mk.

Возачите кои викендов ќе патуваат кон Халкидики ќе се соочат со привремен променет сообраќаен режим поради градежни работи на обиколницата на Солун.

Според најавите, вечерва, 10 јуни, од 23 часот до 5 часот наутро, дел од обиколницата на потегот кон Халкидики ќе биде затворен за сообраќај.

Дополнително, од петок, 12 јуни, од 23 часот, па сè до недела, 14 јуни во 23 часот, истиот дел од патот ќе биде целосно затворен во двата правци. Во овој период се очекуваат големи гужви и забавен сообраќај низ Солун, а возилата ќе бидат пренасочувани по алтернативни правци.

Градежните активности се дел од големиот инфраструктурен проект „Fly over“, со кој се реконструира сообраќајната мрежа околу Солун. Проектот започна во 2023 година, а неговото завршување е планирано за следната пролет.

The post ПАТУВАЊЕТО КОН ХАЛКИДИКИ СЕ КОМПЛИКУВА Обиколницата во Солун се затвора 48 часа за викендот appeared first on plusinfo.mk.

Во текот на изминатото деноноќие, полициските службеници на територијата на целата држава лишиле од слобода седум возачи поради безобѕирно управување возило, меѓу кои има и малолетници и едно лице под дејство на алкохол.

Според информациите од Министерството за внатрешни работи, шест од возачите управувале без возачка дозвола, од кои четири се малолетници, додека едно лице било затекнато како управува возило под дејство на алкохол.

Во Тетово, двајца малолетници управувале мопед и патничко возило без дозвола, додека уште еден малолетник со мопед бил регистриран во Кочани, а еден во Кичево. Без возачка дозвола биле затекнати и возачи во Куманово и Кавадарци, каде што едно лице управувало мотоцикл.

Посериозен инцидент е регистриран во Битола, каде што лице управувало трактор со 1,77 промили алкохол во крвта и притоа учествувало во сообраќајна незгода со патничко возило во која била причинета материјална штета.

Од МВР информираат дека по целосно документирање на случаите ќе бидат поднесени соодветни кривични пријави. Од таму упатуваат и апел до сите учесници во сообраќајот да ги почитуваат правилата, да не управуваат возила без дозвола или под дејство на алкохол, со цел зголемување на безбедноста на патиштата.

The post ЧЕТВОРИЦА МАЛОЛЕТНИЦИ ФАТЕНИ БЕЗ ДОЗВОЛА Полицијата приведе седум возачи appeared first on plusinfo.mk.

Екипите на Јавното претпријатие „Улици и патишта“ – Скопје на 7 јуни 2026 година (недела), со почеток во 08:00 часот, ќе започнат со монтажа на нови портални семафорски столбови на булеварот Александар Македонски, на пешачкиот премин кај бензинската станица „Макпетрол“.

Од претпријатието информираат дека на оваа локација ќе бидат поставени и нови светлосни сигнали согласно одобрен сообраќаен проект, откако претходно биле оштетени во сообраќајна незгода.

„Станува збор за замена и поставување на нова семафорска опрема со цел зголемување на безбедноста на пешаците и учесниците во сообраќајот. Работите ќе се изведуваат фазно, со цел да се минимизира застојот“, велат од ЈП „Улици и патишта“ – Скопје.

Според најавата, изведбата ќе се одвива во две фази. Во првата фаза ќе се работи на страната од влезот во Скопје, при што возилата ќе бидат пренасочени кон клучката за Сингелиќ и Маџари. Во втората фаза, работите ќе се изведуваат на страната од излезот од градот, а сообраќајот ќе се пренасочува кон улицата Благоја Стефковски.

Од претпријатието додаваат дека на терен ќе биде поставена соодветна сообраќајна сигнализација, а ќе бидат ангажирани и редари за регулирање на движењето на возилата.

„Апелираме до граѓаните за трпение и внимателно возење во текот на изведувањето на работите. Сообраќајот ќе се одвива отежнато, но без целосни прекини, а нашите екипи ќе работат согласно предвидената динамика за што побрзо завршување“, велат од ЈП „Улици и патишта“.

The post НОВИ СЕМАФОРИ НА АЛЕКСАНДАР МАКЕДОНСКИ В недела ќе се монтираат на една од најфреквентните сообраќајници appeared first on plusinfo.mk.

Попладнево делови од скопските општини Центар и Карпош останаа без електрична енергија по сериозен дефект во дистрибутивната мрежа, јави Телма повикувајќи се на информации од ЕВН.

Проблемот, според првичните податоци, настанал на 10-киловолтен вод што го напојува поширокиот дел од градската мрежа.

Поради дефектот, дел од домаќинствата биле привремено без струја, додека останатите биле пренасочени на алтернативни линии за снабдување.

Ситуацијата најмногу се одрази врз сообраќајот – семафорите во повеќе крстосници во Центар и во Карпош престанаа да функционираат, што предизвика застои и зголемена нервоза кај возачите во попладневниот шпиц. На терен беа излезени полициски екипи кои го регулираа сообраќајот.

Покрај семафорите, без напојување остана и системот „Безбеден град“, кој се користи за автоматско следење и регистрирање сообраќајни прекршоци низ главниот град.

Станува збор за систем што од февруари 2026 година се користи за контрола на брзина, црвено светло, нерегистрирани возила и непрописно паркирање.

Екипи на ЕВН се на терен и работат на лоцирање и санација на дефектот, а од компанијата најавуваат постепено враќање на нормалното снабдување со електрична енергија.

До целосно стабилизирање на состојбата, од надлежните се апелира возачите да бидат особено внимателни на раскрсниците каде семафорите не работат.

The post ПОПЛАДНЕВО КОЛАПС НА „БЕЗБЕДЕН ГРАД“ Дефект ги блокира камерите и семафорите, хаос во сообраќајот appeared first on plusinfo.mk.

Градоначалникот на Општина Центар, Горан Герасимовски, синоќа во гостувањето во Дневникот на Сител телевизија говореше за новиот правилник и ценовник на Јавното претпријатие за паркинзи на Општина Центар, истакнувајќи дека целта е подобрување на условите за паркирање, поголем ред и фер пристап за сите жители.

Герасимовски посочи дека Центар е најфреквентната општина во државата, со огромен број возила кои секојдневно доаѓаат и транзитираат низ нејзината територија, но и со сериозен притисок врз паркинг-просторот од самите жители.

– Недозволиво е во еден стан да има три или четири автомобили и потоа да се чудиме зошто нема место за паркирање пред домот. Првото возило за жителите на Општина Центар останува бесплатно, но второто се наплаќа, а третото возило е луксуз. Нема доволно паркинг места за три или четири автомобили по стан – истакна Герасимовски.

Тој нагласи дека новиот правилник е изработен врз основа на детална анализа која траела година и половина, спроведена од ЈП ПОЦ во соработка со Општина Центар, како и врз основа на бројни средби со граѓаните и нивните забелешки за проблемите со паркирањето.

– Имаме речиси 15.800 издадени одобренија, односно налепници, а околу 6.100 паркинг места. Тоа јасно покажува дека системот мора да се уреди. Во минатото имало злоупотреби, фиктивни адреси, лични карти оставени на адреси во Центар, како и користење на бенефиции без реално живеење во општината – рече Герасимовски.

Градоначалникот додаде дека со новите правила се штитат жителите кои имаат едно возило и реална потреба да паркираат во близина на својот дом.

– Целта е да обезбедиме еднакви услови за сите жители. Оној граѓанин што има едно возило треба да може да паркира пред својот дом. Секое наредно возило е дополнителен товар врз системот и нормално е да се наплаќа – посочи Герасимовски.

Тој се осврна и на потребата од одржливост на претпријатието, нагласувајќи дека квалитетната услуга подразбира редовно обележување, одржување, осветлување и контрола на паркинг-просторите.

– Не може за 100 денари годишно да се очекува паркингот да биде обележан, осветлен, одржуван и постојано контролиран. За да имаме добра услуга и подобри услови, мора да имаме одржлив систем – рече Герасимовски.

Градоначалникот потенцираше дека дел од градските паркинзи, особено во Капиштец, кај Нова Македонија и во близина на Цветен пазар, во вечерните часови остануваат полупразни, додека истовремено дел од граѓаните не сакаат да користат платени и безбедни паркинг-простори.

– Купуваат по две или три возила, кои чинат илјадници евра, а не сакаат да одвојат симболични средства за безбедно паркирање. Тоа создава хаос за останатите жители – додаде тој.

Герасимовски истакна дека секоја новина на почеток предизвикува реакции, но дека очекува новиот правилник за неколку месеци да даде видливи резултати.

– Сигурен сум дека ова ќе донесе подобрување. Нашата цел е ред, фер услови и повеќе слободни места за оние што навистина живеат во Центар – порача Герасимовски.

Општина Центар продолжува со политиките за подобрување на урбаната мобилност, уредување на паркинг-просторот, проширување на тротоарите и велосипедската инфраструктура, со цел граѓаните да имаат побезбедно и поквалитетно движење низ општината.

The post ЗА ВТОРО ВОЗИЛО ВО ЦЕНТАР СЕ НАПЛАЌА, ТРЕТОТО Е ЛУКСУЗ Нема простор за 3 или 4 паркинзи по стан appeared first on plusinfo.mk.

Од 15 јуни, лентите означени за „MTAG“ на патарините ќе можат да ги користат исклучиво возачи со електронски тагови, информира Јавно претпријатие за државни патишта.

Со новите измени во системот за наплата, плаќањето со „MCard“ на „MTAG“ лентите ќе биде укинато. Корисниците кои користат „MCard“ наплатата ќе ја вршат на останатите ленти на патарините, согласно со нивната намена.

Од ЈПДП апелираат возачите строго да ја почитуваат вертикалната и хоризонталната сигнализација, како и информативните електронски табли поставени пред и на самите наплатни станици, каде јасно е означено кои ленти се за електронска наплата (MTAG/MCard), а кои за готовинско плаќање.

Воедно, од претпријатието потсетуваат дека зелената стрелка означува активна, односно отворена лента, додека црвениот икс (X) означува затворена лента.

„Непочитувањето на означувањето и намената на лентите може да предизвика застои во сообраќајот и да влијае врз безбедноста и ефикасноста на сообраќајот“, соопштија од ЈПДП.

The post ПРОМЕНИ НА ПАТАРИНИТЕ ОД 15 ЈУНИ Се менува користењето на MTAG лентите appeared first on plusinfo.mk.

Во текот на изминатото деноноќие, полицијата низ целата држава приведе 14 возачи кои управувале возила на начин што сериозно ја загрозувал безбедноста во сообраќајот.

Меѓу нив, осуммина биле зад волан иако воопшто немале возачка дозвола. Тројца возеле под дејство на алкохол, еден возач игнорирал активна забрана за управување, еден бил фатен како вози со брзина над дозволената, а еден управувал без дозвола и во алкохолизирана состојба.

Случаите се регистрирани низ повеќе градови во земјата. Во Скопје се откриени тројца возачи без возачка дозвола, во Битола двајца, а по еден во Велес, Тетово и Кавадарци. Во Гостиварско е фатен возач кој возел пребрзо, додека во Тетово, Охрид и Куманово по едно лице било зад волан под дејство на алкохол. Во Берово, пак, еден возач бил затекнат како вози без дозвола и под дејство на алкохол.

Еден од посериозните случаи е регистриран во Скопје, каде возач управувал возило и покрај активна забрана за тоа.

Сите лица се лишени од слобода, а по целосно документирање на случаите ќе следуваат соодветни пријави.

Од полицијата упатуваат апел до возачите да ги почитуваат сообраќајните правила, да не седнуваат зад волан без дозвола, под дејство на алкохол или со активна забрана, со цел да се намали ризикот од сообраќајни несреќи и да се зголеми безбедноста на патиштата.

The post ВОЗЕЛЕ БЕЗ ДОЗВОЛА, ПОД АЛКОХОЛ И СО ЗАБРАНА Полицијата приведе 14 опасни возачи низ државата appeared first on plusinfo.mk.

Дел од мостот на граничниот премин Градишка меѓу Хрватска и Босна и Херцеговина се урнал рано утрово околу 3 часот.

Според босански „Кликс“, попуштил дел од оградата на мостот на стариот граничен премин, по што движењето на возила и пешаци било целосно запрено.

„Кликс“ објави дека структурата на оградата попуштила под засега непознати околности.

„Создаден е огромен безбедносен ризик“, наведува медиумот.

Поради големата фреквенција на товарен и патнички сообраќај на преминот, се очекуваат дополнителни метежи и застои.

Сообраќајот е целосно запрен

По инцидентот, преминот бил затворен и за автомобили и за пешаци.

Хрватските власти соопштија дека чекаат официјални информации од институциите во Босна и Херцеговина за обемот на оштетувањата и можноста мостот повторно да биде пуштен во употреба.

Возачите предупредени на застои

„Хрватски патишта“ најавија дека јавноста дополнително ќе биде информирана за сите промени во режимот на сообраќај.

Од таму побараа разбирање од возачите поради можните долги задржувања и пренасочувања.

The post 📽️ МОСТОТ МЕЃУ ХРВАТСКА И БиХ СТАНА БЕЗБЕДНОСЕН РИЗИК Попушти оградата, возила беа блокирани рано наутро appeared first on plusinfo.mk.

Во организација на Здружението за спорт и рекреација „Прв до врв“ – Скопје, утре ќе се одржи четиринаесеттото издание на традиционалниот спортско-рекреативен настан насловен како „Прв до врв“.

Во рамки на настанот ќе се реализира велосипедска трка со почеток во 09:45 часот, со траса на движење од пред Музеј на град Скопје по ул. „Св. Кирил и Методиј“, лево по бул. „Св. Климент Охридски“, право по бул. „Мајка Тереза“, лево по ул. „Тодор Александров“, а потоа по локалниот пат кон Средно Водно и до врвот на Водно (Милениумски крст).

Воедно, со почеток во 10:00 часот ќе се одржи и планинарска тура, која ќе стартува пред ООУ „Кочо Рацин“ на бул. „Мајка  Тереза“, ќе продолжи по ул. „Тодор Александров“, а кај ул. „Салвадор Аљенде“ учесниците ќе се движат десно по планинската патека кон Средно Водно и понатаму кон врвот на Водно (Милениумски крст).

Поради одржувањето на настанот, Одделението за безбедност на патниот сообраќај при СВР Скопје ќе преземе мерки за посебен режим на сообраќај, при што сообраќајот ќе се пренасочува по околните сообраќајници.

Министерството за внатрешни работи апелира до граѓаните да ги почитуваат наредбите и насоките што ќе ги издаваат полициските службеници на сообраќајниците каде што ќе се одвива настанот, со цел непречено и безбедно реализирање на истиот.

The post В НЕДЕЛА ПОСЕБЕН РЕЖИМ НА СООБРАЌАЈ ВО СКОПЈЕ Се одржува традиционалната трка „Прв до врв“ appeared first on plusinfo.mk.