По повеќедецениско чекање, почна асфалтирањето на булеварот Борис Трајковски во Скопје, соопшти градоначалникот Орце Ѓорѓиевски.

На трасата се поставува првиот слој асфалт, а според најавата на Ѓорѓиевски, по завршувањето на едната страна сообраќајот ќе биде пренасочен, по што ќе започне реконструкцијата и на другата страна.

Градоначалникот вели дека довршувањето на булеварот со години било само ветување, додека повеќе од 100.000 граѓани кои гравитираат кон овој дел од градот секојдневно се соочувале со сообраќаен метеж и гужви.

– Се сеќавам уште како дете, довршувањето на овој булевар беше ветување кое се повторуваше со години. Генерации граѓани слушаа ветувања, а повеќе од 100.000 луѓе кои секојдневно гравитираат во овој дел од Скопје живееја со гужви, нервози и сообраќајна голгота. Тоа време завршува – напиша Ѓорѓиевски.

Тој посочува дека пред почетокот на градежните работи бил решен и долгогодишниот проблем со експропријацијата.

– Ја ослободивме трасата и започнавме со изградба со силно темпо. И денес, нешто повеќе од три месеци подоцна, го поставуваме првиот слој асфалт – наведува градоначалникот.

Според Ѓорѓиевски, откако ќе заврши асфалтирањето на едната страна, сообраќајот ќе се пренасочи и ќе започне реконструкцијата на другиот дел од трасата.

Паралелно со изградбата на булеварот е поставена и нова атмосферска канализација.

– Нов булевар значи и трајно решение, правилно одведување на атмосферските води, поголема безбедност и инфраструктура која треба да служи со децении. Ова е крај на едно триесетгодишно чекање – порача Ѓорѓиевски.

Тој додава дека проектот, според него, е пример дека со работа и одговорност може да се реализираат и инфраструктурни проекти кои со години биле одложувани.

– Ветивме и остваривме. Мојот народ заслужува модерна и безбедна патна инфраструктура. Заслужува нормални услови за живот. Заслужува град кој се движи напред – вели скопскиот градоначалник.

The post ПОЧНА АСФАЛТИРАЊЕТО НА БУЛЕВАРОТ БОРИС ТРАЈКОВСКИ По 30 години чекање, се довршува една од најфреквентните сообраќајници appeared first on plusinfo.mk.

Град Скопје информира дека од денеска Јавното претпријатие за државни патишта започнува со реконструкција на главниот мост над Маркова Река во населбата Драчево.

Поради изведувањето на градежните работи, во наредниот период се очекува отежнато одвивање на сообраќајот на оваа делница. Од Град Скопје апелираат до жителите и сите учесници во сообраќајот да имаат трпение и да ја почитуваат поставената сообраќајна сигнализација.

„Ги известуваме граѓаните на населбата Драчево дека од денеска Јавното претпријатие за државни патишта започнува со реконструкција на главниот мост над Маркова Река. Поради изведувањето на градежните работи, во наредниот период може да има отежнато одвивање на сообраќајот. Ги замолуваме граѓаните за трпение, разбирање и почитување на сообраќајниот ред“, соопшти Град Скопје.

Од градските власти посочуваат дека реконструкцијата на мостот е значаен чекор за подобрување на патната инфраструктура и зголемување на безбедноста на граѓаните.

Се очекува во периодот додека траат работите возачите да се придржуваат до насоките на надлежните служби и да ја прилагодат брзината на движење согласно условите на патот.

The post ПОЧНУВА РЕКОНСТРУКЦИЈАТА НА МОСТОТ ВО ДРАЧЕВО Возачите да очекуваат отежнат сообраќај appeared first on plusinfo.mk.

Град Скопје соопшти дека градежните работи се одвиваат според планираната динамика, а по завршувањето повеќе од 100.000 жители ќе добијат модерен булевар со четири ленти, велосипедски и пешачки патеки.

Градежните работи на булеварот Борис Трајковски кон Драчево се одвиваат со засилено темпо, а трасата е речиси целосно пробиена, соопштија од Град Скопје. Станува збор за еден од најголемите инфраструктурни проекти во главниот град, кој со години беше меѓу најголемите барања на жителите од овој дел на Скопје.

Од Градот велат дека проектот се реализира според предвидената динамика и дека по неговото завршување повеќе од 100.000 жители ќе добијат современ и побезбеден булевар со четири сообраќајни ленти, пешачки патеки и велосипедска инфраструктура.

„Во рамките на проектот, трасата е речиси целосно пробиена, додека паралелно се реализира изградба на нова атмосферска канализација, со што трајно ќе се надминат долгогодишните проблеми со одводнувањето во овој дел од градот. Реализацијата на овој капитален проект претставува конкретен чекор кон подобрување на квалитетот на живот на граѓаните, намалување на сообраќајниот метеж и создавање модерна и функционална сообраќајна инфраструктура“, соопштија од Град Скопје.

Од таму потсетуваат дека булеварот Борис Трајковски повеќе од три децении беше симбол на неисполнети ветувања, недовршени работи и секојдневни сообраќајни проблеми.

Со завршувањето на проектот се очекува значително да се подобри проточноста на сообраќајот кон Драчево, како и безбедноста за возачите, велосипедистите и пешаците.

The post 📽️ СКОПЈЕ ДОБИВА НОВ БУЛЕВАР Трасата на Борис Трајковски речиси целосно пробиена appeared first on plusinfo.mk.

Во Скопје утре (сабота) ќе биде воведен посебен режим на сообраќај поради одржување на ревијална трка што ќе се одвива во централното градско подрачје.

Како што информираат од МВР, сообраќајот ќе биде регулиран од Единицата за безбедност на патниот сообраќај при СВР Скопје, во периодот од 17:00 до 18:00 часот, со цел безбедно и непречено одвивање на настанот.

Стартот на трката е предвиден кај Порта Македонија, од каде учесниците ќе се движат по улицата Димитрие Чупоски, потоа десно по Васил Главинов, па право по булевар ВМРО, и лево по булевар Илинден до крстосницата со улицата Наум Наумовски Борче, кај Градскиот парк, во близина на споменикот на Гоце Делчев.

Во текот на одржувањето на трката, сообраќајот ќе биде пренасочуван по околните улици.

Од МВР апелираат граѓаните да ги почитуваат наредбите и насоките на полициските службеници на терен, со цел да се избегнат застои и да се обезбеди безбедно одвивање на настанот.

The post ПОСЕБЕН РЕЖИМ ВО ЦЕНТАРОТ НА СКОПЈЕ В сабота се затвораат улици поради голема трка appeared first on plusinfo.mk.

Од денес, 1 јуни 2026 година, започнува летното работно време за зонското паркирање во Скопје, соопшти ЈП „Градски паркинг“.

Новото работно време важи за сите зони А, Б, Ц и Д, а граѓаните ќе можат да паркираат со наплата од понеделник до сабота, во периодот од 07:00 до 23:00 часот.

Од претпријатието апелираат возачите да внимаваат на промените и навремено да ја извршуваат наплатата при паркирање, согласно новиот временски режим.

The post ПАРКИРАЊЕТО ВЕЌЕ НЕ Е ИСТО ВО СКОПЈЕ Од 1 јуни важат нови часови за сите зони во главниот град appeared first on plusinfo.mk.

Многу скопјани утрово беа изненадени од новата сигнализација и измените на раскрсницата кај Тутунски комбинат. Причината е воведувањето на нов сообраќаен режим во овој дел од центарот на градот, кој треба да овозможи подобар проток на возилата и полесно функционирање на новата подземна сообраќајница.

Најголемата промена е што возачите повеќе нема да можат од Јужен булевар директно да свртат лево кон Аеродром и Тутунски комбинат, како што тоа беше можно досега.

Наместо тоа, сообраќајот ќе биде пренасочен по нови еднонасочни траси.

Возилата што доаѓаат од Јужен булевар и се движат кон Кисела Вода ќе поминуваат по улицата кај кафеаната „Ив“, која станува еднонасочна. На оваа локација ќе биде поставен и нов семафор што ќе овозможи лево вртење и приклучување кон улицата Есенинова и Општина Аеродром.

Истовремено, улицата покрај Пазарната инспекција, која води кон Тутунски комбинат, ќе функционира само во обратен правец. Тоа значи дека возилата ќе можат да се движат од Тутунски комбинат кон Јужен булевар и директно да се приклучуваат во новата подземна сообраќајница.

Како дел од реконструкцијата, веќе е изменет и дел од крстосницата на булеварот 11 Октомври. На потегот од Центар кон Кисела Вода и Тутунски комбинат, бројот на коловозни ленти е намален од три на две, поради поставување нова жардиниера.

Од Град Скопје велат дека овие измени се воведуваат за да се подобри протокот на возилата во централното градско подрачје, а во иднина на овој потег е предвидена и изградба на натпатник.

The post 📽️ КАЈ „ТУТУНСКИ“ ВЕЌЕ НЕ Е КАКО ПОРАНО Важат нови правила за движење на возилата appeared first on plusinfo.mk.

Поради верскиот празник Задушница, утре во Скопје ќе има посебен режим на сообраќај околу гробиштата, а полицијата најави кружно движење и пренасочување на возилата со цел да се избегнат метежи и застои.

Од 6 часот наутро, сообраќајот кон градските гробишта „Бутел“ ќе се одвива по изменет режим и во една насока. Возилата ќе се движат по улицата Бутелска, потоа лево по Александар Урдаревски, па повторно лево по Боца Иванова и оттаму кон влезот на гробиштата.

За излез од гробиштата, возилата ќе се движат по Боца Иванова, потоа кон кружниот тек на Бутелска, па лево по истата улица и десно по Кемал Сејфула.

Посебен режим на сообраќај ќе има и околу гробиштата во Камник, Драчево и Ѓорче Петров.

Од МВР информираат дека доколку има поголеми гужви и потреба од дополнителна регулација, изменетиот режим може да продолжи и во сабота и недела.

Полицијата апелира граѓаните да ги почитуваат насоките и наредбите на сообраќајната полиција за да се овозможи безбедно и непречено движење.

The post СКОПЈЕ СО ПОСЕБЕН РЕЖИМ ЗА ЗАДУШНИЦА Полицијата воведува посебен режим на сообраќај appeared first on plusinfo.mk.

Градоначалникот на Скопје, Орце Ѓорѓиевски, најави дека започнува финалната фаза од реализацијата на проектот за поврзување на мостот Љубљанска со улицата Скупи, со што ќе се овозможи нова сообраќајна врска преку реката Вардар.

„Довербата што ја добив од граѓаните за мене е обврска да се работи и да се решаваат проблемите што со години стоеле заглавени. Денес можам да информирам дека овој важен мост конечно ќе биде ставен во функција“, напиша Ѓорѓиевски.

Тој нагласи дека станува збор за проект од големо значење за градот, кој ќе овозможи подобра поврзаност меѓу северниот и западниот дел на Скопје.

„Со неговото завршување, граѓаните ќе добијат побрз и побезбеден пристап до Злокуќани, Бардовци и индустриската зона, а воедно ќе се растоварат булеварите Партизански одреди и Илинденска“, посочи градоначалникот.

Според него, проектот претходно бил стопиран поради потребата од дозвола од надлежните институции за заштита на локалитетот Скупи, но сега таа е обезбедена и градежните работи продолжуваат со засилен интензитет.

„Со сериозна работа и одговорен пристап обезбедивме дозвола, го заштитивме културното наследство и продолжуваме со реализација на проектот“, додаде Ѓорѓиевски.

Паралелно со изградбата, најавено е и ново сообраќајно решение на влезот во овој дел од градот, кое ќе вклучува кружен тек или адаптивна семафоризација, со цел да се намали метежот и да се подобри безбедноста.

Ѓорѓиевски потенцира дека унапредувањето на инфраструктурата останува приоритет на градските власти.

„Скопјани заслужуваат функционален, поврзан и модерен град. Продолжуваме со работа и конкретни резултати“, порача тој.

The post 📽️ 📷 МОСТОТ НА ЉУБЉАНСКА ЌЕ СЕ ЗАВРШИ Ѓорѓиевски најави големо олеснување за сообраќајот во Скопје appeared first on plusinfo.mk.

Во Скопје утре ќе има изменет режим на сообраќај поради протест што го организира Сојуз на синдикатите на Македонија.

Протестниот марш ќе започне во 12:05 часот пред седиштето на синдикатот на улицата Мирче Ацев, по што учесниците ќе се движат по улиците Филип Втори Македонски, 11 Октомври, Димитрие Чуповски и Васил Главинов, а потоа по булеварите ВМРО и Илинден сè до зградата на македонската Влада.

Поради протестот, сообраќајната полиција ќе воведе привремени ограничувања и пренасочувања на возилата по трасата на движење.

Од Министерство за внатрешни работи апелираат граѓаните да ги почитуваат упатствата на полициските службеници и да бидат внимателни при движење во централното градско подрачје.

The post ВОЗАЧИТЕ ДА СЕ ПОДГОТВАТ ЗА БЛОКАДА НА СКОПЈЕ Маршот на синдикалците ќе го затвори центарот на градот appeared first on plusinfo.mk.

Градоначалничката на Општина Кисела Вода, Бети Стаменкоска Трајкоска, информира дека е донесена одлука за итно затворање на еден патен правец по извршен повторен увид на терен и стручни анализи.

Таа на Фејсбук соопшти дека одлуката била донесена по заедничката проверка со градоначалникот на Општина Сопиште, Јане Мицевски, и во координација со надлежните институции.

– По денешниот повторен увид на терен со градоначалникот на Општина Сопиште, Јане Мицевски, и извршените стручни анализи, во координација со сите релевантни институции, донесена е одлука за итно затворање на овој патен правец – вели градоначалничката.

Од општината уверуваат дека веќе се работи на трајно решение.

– Интензивно се работи на изнаоѓање на најбрзото и најбезбедното техничко решение за трајна санација на оштетувањето – наведува Стаменкоска Трајкоска.

Воедно, таа упати апел до граѓаните да ја почитуваат поставената сигнализација.

– Апелираме до сите граѓани доследно да ја почитуваат поставената сигнализација и да ги користат алтернативните патни правци сè до целосно отстранување на дефектот. Посветени сме на изнаоѓање на најбрзо и сигурно решение за враќање на патот во нормална функција – порача Стаменкоска Трајкоска.

The post ИТНО ЗАТВОРЕН ПАТОТ КОН ТЕФЕРИЧ Властите бараат најбрза и трајна санација appeared first on plusinfo.mk.