Полицијата во текот на мај изрекла вкупно 16.885 казни за различни сообраќајни прекршоци низ државата, а најголем дел од нив се однесуваат на возачи кои возеле побрзо од дозволеното.

Според податоците на Министерството за внатрешни работи, дури 4.473 возачи биле санкционирани поради непочитување на ограничувањето на брзината, што го прави овој прекршок најчест меѓу учесниците во сообраќајот.

На второто место се непрописно паркираните возила, за што биле издадени 3.851 казна, додека 920 возачи биле фатени како користат мобилен телефон зад воланот.

Во текот на месецот полицијата санкционирала и стотици возачи за потешки прекршоци. Евидентирани се 241 случај на управување возило без возачка дозвола, 70 возачи биле затекнати како возат под дејство на алкохол, а 33 лица управувале возило и покрај претходно изречена забрана.

Посебно загрижува податокот дека во текот на мај биле одземени 238 возила согласно одредбите од Кривичниот законик.

Контролите покажале и дека голем број возачи на мотоцикли не користат заштитна опрема. Санкционирани биле 1.281 мотоциклист поради неносење кацига.

Казни добиле и 1.584 лица кои не користеле сигурносен појас, како и 295 пешаци поради прекршоци во сообраќајот.

Од сообраќај биле исклучени 240 нерегистрирани возила, додека 83 возила биле отстранети поради техничка неисправност. Дополнително, 55 возачи биле санкционирани поради неправилно затемнети стакла на возилата.

Од МВР најавуваат дека засилените сообраќајни контроли ќе продолжат и во наредниот период со цел зголемување на безбедноста на патиштата и намалување на бројот на сообраќајни несреќи.

The post ПОЛИЦИЈАТА НЕМАШЕ МИЛОСТ ВО МАЈ Изречени речиси 17.000 казни, одземени 238 возила appeared first on plusinfo.mk.

Возач фатен со телефон во рака во Грција веднаш останува без возачката дозвола на еден месец и плаќа казна од 350 евра. Секој следен прекршок носи уште построги санкции, кои достигнуваат до 4.000 евра и осум години без возачка дозвола.

Санкциите за мобилен во рака додека возите според новиот Закон за сообраќај кај нашиот јужен сосед се едни од најригорозните во Европа.

Секоја наредна казна е потешка

Санкциите растат со секој следен прекршок. Првиот прекршок носи казна од 350 евра и одземање на дозволата на еден месец. Вториот се казнува со 1.000 евра и шест месеци без дозвола.

Третиот прекршок веќе значи 2.000 евра казна и одземање на возачката дозвола на една година.

Несреќата ја множи сметката

Казните стануваат уште построги ако користењето телефон доведе до сообраќајна несреќа.

Во таков случај, втор прекршок носи 2.000 евра казна и четири години без возачка дозвола. Трет прекршок се казнува со 4.000 евра и одземање на дозволата на осум години.

Половина секунда што може скапо да чини

Експертите предупредуваат дека возачите кои користат телефон реагираат околу половина секунда побавно од останатите. При брзина од 110 километри на час тоа значи околу 14 метри подолго растојание за сопирање.

Токму поради ваквите ризици грчките власти решија значително да ги заострат казните. Целта е да се намали бројот на несреќи предизвикани од невнимание зад воланот.

Не е исклучена ниту затворската казна

Законот предвидува и затворски казни ако користењето телефон предизвика тешки последици.

Доколку има тешка телесна повреда, сторителот може да добие казна затвор до 10 години. Во случај на смрт, казната може да достигне до 20 години.

Ако во несреќата има голем број жртви или повредени, грчкиот закон предвидува и доживотен затвор.

The post ЕДЕН ПОВИК ДОДЕКА ВОЗИТЕ ВО ГРЦИЈА МОЖЕ ДА ВЕ ЧИНИ ДОЗВОЛА Новите казни достигнуваат и до 4.000 евра appeared first on plusinfo.mk.

Празничната атмосфера за 1 Мај не помина без проблеми на патиштата. Полицијата приведе 14 возачи поради безобѕирно управување, а дел од нив биле под дејство на алкохол.

Според информациите, седуммина возачи управувале возило во алкохолизирана состојба, петмина биле без возачка дозвола, меѓу нив и еден малолетник, додека двајца возеле и покрај тоа што имале активна забрана.

Во главниот град, Скопје, еден возач бил фатен без возачка дозвола, а слични случаи биле регистрирани и во Велес, Демир Хисар, Охрид и Тетово. Во Охрид и Тетово, пак, по еден возач управувал возило и покрај изречена забрана.

Алкохол зад волан бил регистриран кај возачи во Свети Николе, Кочани, Кавадарци, Струмица, Гевгелија и два случаи во Прилеп.

По документирање на случаите, против сите ќе следуваат соодветни пријави.

Од полицијата апелираат граѓаните да не седнуваат зад волан без возачка дозвола, под дејство на алкохол или додека им трае забрана, со цел да се избегнат несреќи и да се зголеми безбедноста во сообраќајот.

The post ОД СКАРА ВО ПОЛИЦИСКА СТАНИЦА Дел од возачите пиеле, па седнале зад волан appeared first on plusinfo.mk.

Повеќе од илјада сообраќајни прекршоци биле регистирани изминатиот викенд на патиштата низ државата, покажуваат податоците од полициските контроли. За само два дена биле издадени вкупно 1.198 платни налози, а најголем дел од казните, дури 465, се однесуваат на возачи кои ја надминале дозволената брзина.

Во акциите биле лишени од слобода 42 лица поради безобѕирно управување со возило. Од нив, осум возеле под дејство на алкохол, 20 управувале без возачка дозвола, а едно лице седнало зад волан и покрај претходно изречена забрана.

Полицијата одзела и 13 возила согласно Кривичниот законик. Покрај тоа, евидентирани се 173 прекршоци за неправилно паркирање, како и 40 санкции за возење под дејство на алкохол.

Контролите откриле и бројни прекршоци кај мотоциклистите и пешаците. Казнети се 59 возачи на мотоцикли поради неносење заштитен шлем, како и 31 пешак.

Дополнително, 112 учесници во сообраќајот биле санкционирани затоа што не користеле сигурносен појас. Од сообраќај биле отстранети и 20 нерегистрирани возила, како и четири поради техничка неисправност.

Од полицијата најавуваат дека засилените контроли ќе продолжат и во наредните денови со цел да се намали бројот на сообраќајни несреќи и да се зголеми безбедноста на патиштата.

The post РАДАРИТЕ „ГОРЕА“ ВИКЕНДОВ, РЕКОРДНИ 465 КАЗНИ ЗА БРЗО ВОЗЕЊЕ Приведени 42 безобѕирни возачи, одземени 12 возила appeared first on plusinfo.mk.

Казна од 20 до 10.000 евра им се заканува на возачите во Австрија, ако регистарските таблички, светлата, прозорците  и други важни делови од возилото се извалкани и невидливи.

Според важечкиот австриски Закон за моторни возила, регистарските таблички и сите светла секогаш мора да бидат чисти и без снег. Исто така, е пропишано дека возачот мора да има непречен поглед низ сите прозорци и ретровизори – само мал прозорец за гледање не е доволен.

Од Австрискиот авто-мото клуб (ÖAMTC) наведуваат дека ова важи и за странските возачи подеднакво како и за домашните.

-Валканите регистарски таблички се административен прекршок. Ова може да резултира со тоа возачот да биде казнет на лице место од страна на надлежниот орган – во овој случај зборуваме за казна од 20 евра или повеќе – вели  Валтер Фајхтнер од австрискиот државен оддел за транспорт.

Ако сте запрени и не сте го изгребале мразот од два прозорци на автомобилот, светлата се оштетени и има голема количина снег на покривот, лесно може да ве чини 1.500 евра.

Во случај возачот да не плати и против него се покрене прекршочна постапка, казната може да биде значително поголема – понекогаш и до 10.000 евра.

-Но, тоа зависи и од степенот на валканост на возилото и од сериозноста на прекршокот. Особено во случаи на пребрзо возење на австриските патишта, важно е за полицијата регистарските таблички да бидат јасно видливи. И, секако, во случај на сообраќајна несреќа, возачот често може да се идентификува само по регистарската табличка – вели тој.

Тој напоменува дека стоп-светлата и трепкачите мора да бидат чисти од нечистотија и сол од патот и затоа препорачува возачите „да ја проверат регистарската табличка и светлата на своето возило пред да влезат во автомобилот и повремено додека прават паузи на подолго растојание да ги ибришат регистарските таблички.

Од мото клубот објаснуваат дека  Законот за моторни возила не прави разлика помеѓу различните прекршоци. Ова значи дека постои максимална казна од 10.000 евра, но секако, ова не важи за секој поединечен прекршок. Затоа, оваа максимална казна опфаќа сè, од прекршокот за непочитување сообраќајните прописи до нечитлива регистарска табличка или изгребан трепкач.

-Во рамките на овој максимален опсег на казни од 10.000 евра, властите имаат дискреционо право да изречат соодветна казна – појаснуваат од клубот.

Властите не само што ги проценуваат фактите од тековниот случај, туку ги земаат предвид и сите претходни сообраќајни прекршоци и казни на споменатиот возач.

-Секако, казна од 10.000 евра не е пропорционална на валкана регистарска табличка, но може да се изречат неколку казни истовремено – велат од Авто клубот и додаваат дека највисоките казни се применуваат само во исклучително сериозни случаи, кога се извршени неколку сериозни прекршоци истовремено.

The post АКО ВОЗИТЕ ВО АВСТРИЈА ВНИМАВАЈТЕ ТАБЛИЧКИТЕ ДА НЕ ВИ БИДАТ ВАЛКАНИ За овој прекршок може да добиете казна од 20, но и од 10.000 евра appeared first on plusinfo.mk.

Во текот на вчерашниот ден (03.02.2026) преку системот „Безбеден град“ констатирани се вкупно 650 прекршоци. Од нив, за минување на црвено светло констатирани се вкупно 36 прекршоци, за возење со брзина поголема од дозволената констатирани се вкупно 590 прекршоци, а за нерегистрирани возила 24 прекршоци.

Изречени се вкупно 61 забрана за управување на моторно возило.

– Апелираме до сите учесници во сообраќајот да ги почитуваат сообраќајните правила и прописи и сите да придонесеме за безбеден сообраќај на територијата на целата земја – велат од МВР.

The post ГРАЃАНИТЕ СЀ УШТЕ ВОЗАТ ПРЕБРЗО Од 650 прекршоци вчера 590 биле за брзо возење appeared first on plusinfo.mk.

Измамниците повторно во акција, овојпат злоупотребувајќи го системот „Безбеден град“ за да извлечат пари од граѓаните преку лажни СМС-пораки.

Министерството за внатрешни работи ја информира јавноста дека изминатиов период е забележана појава на фишинг напади кои се изведуваат преку лажни СМС пораки, електронски пораки, веб-страници и пораки на социјалните мрежи.

Дополнителен сомнеж кај дел од оштетените предизвикал фактот што воопшто немаат возило регистрирано на свое име, што значи дека не можат да бидат евидентирани како сторители на сообраќаен прекршок во системот.

Она што јасно ја открива измамата е содржината на пораката. Во лажните СМС-известувања не е наведен бројот на регистерската табличка, што е задолжителен податок во сите официјални пораки кои ги испраќа Министерството за внатрешни работи.

Дополнително, измамата може да се препознае и по името на испраќачот. Во официјалните СМС-пораки испратени преку системот „Safe City“, како испраќач секогаш стои ознаката „MVR-SC“, додека кај лажните пораки се користат непознати или сомнителни имиња.

Од МВР ги повикуваат граѓаните да не кликнуваат на сомнителни линкови, да не внесуваат лични податоци или податоци од платежни картички и секој ваков обид за измама да го пријават во полиција.

The post ИЗМАМНИЦИ ГО ЗЛОУПОТРЕБУВААТ „БЕЗБЕДЕН ГРАД“ Граѓани добиваат лажни СМС пораки за казни appeared first on plusinfo.mk.

Сообраќајниот метеж и блокадите што со години се повторуваат во зимските туристички центри Маврово и Попова Шапка, годинава треба да се спречат со засилени полициски мерки и поинаков режим на движење. Од СВР Тетово информираат дека и оваа сезона се применува кружен тек на сообраќај, со цел да се избегнат застои и целосно блокирање на патиштата.

Сепак, најголем проблем и понатаму се несовесните возачи кои не ги почитуваат правилата, како и возилата паркирани покрај коловозот. Токму таквото паркирање, велат од полицијата, го оневозможува чистењето на снегот и на одредени делници кон Маврово и целосно го укинува двонасочниот сообраќај.

Пред почетокот на зимската сезона, СВР Тетово одржала повеќе средби со сопственици и менаџери на хотели и угостителски објекти во Маврово и на Попова Шапка. На нив им било укажано да преземат мерки за безбедноста на гостите, но и да обезбедат доволен број паркинг места за посетителите, за да се избегне хаосот на патиштата.

Од полицијата потсетуваат дека во минатите години честопати биле принудени дополнително да ангажираат полициски службеници од други подрачја, кои рачно го регулирале сообраќајот и ги расчистувале блокадите. За да не се повтори тоа сценарио, граѓаните се повикуваат строго да ги почитуваат сообраќајните правила, да не паркираат на коловоз и да не тргнуваат кон планинските центри без задолжителна зимска опрема.

Во случај возилата да го попречуваат сообраќајот, ќе бидат ангажирани и пајак-службите од Тетово и Гостивар, а прекршителите ќе бидат санкционирани согласно законот.

Од СВР Тетово порачуваат дека само со одговорно однесување може да се обезбеди безбедно и непречено движење за сите посетители на зимските туристички центри.

The post 📽️ 📷 СТРОГ РЕЖИМ ВО МАВРОВО И НА ПОПОВА ШАПКА Кружен сообраќај и казни за несовесни возачи appeared first on plusinfo.mk.

Во текот на декември, полицијата изрече повеќе од 18 илјади казни за сообраќајни прекршоци на патиштата низ земјава, при што најчеста причина за санкционирање била непочитувањето на ограничувањата на брзината.

Според податоците од Министерството за внатрешни работи, во периодот од 1 до 28 декември биле издадени вкупно 18.318 платни налози, а дури 4.019 од нив се однесуваат на возачи кои возеле побрзо од дозволеното.

Поради безобѕирно управување со возило, согласно Кривичниот законик, полицијата лишила од слобода 123 лица. Од нив, 100 биле затекнати зад волан под дејство на алкохол, 13 возеле со преголема брзина во населено место, седум надвор од населено место, а три лица управувале возило во забранет правец.

Статистиката покажува и сериозен број други прекршоци. Во текот на месецот биле евидентирани 5.018 случаи на неправилно паркирање, додека 1.843 возачи биле санкционирани затоа што управувале возило без возачка дозвола. Дополнително, изречени се 679 казни за возење под дејство на алкохол.

Полицијата санкционирала и 18 мотоциклисти кои не носеле заштитен шлем, како и 415 пешаци кои не ги почитувале сообраќајните правила. Казнети се и 1.046 учесници во сообраќајот поради некористење сигурносен појас.

Од сообраќај биле исклучени 322 нерегистрирани возила, како и 172 возила поради техничка неисправност. Санкции добиле и 101 возач поради несоодветно затемнување на стаклата на возилата.

Од МВР најавуваат дека засилените сообраќајни контроли продолжуваат и во наредните денови, со апел до сите учесници во сообраќајот да ги почитуваат правилата и прописите, со цел зголемување на безбедноста на патиштата.

The post НАД 18.000 КАЗНИ НА ПАТИШТАТА ВО ДЕКЕМВРИ Алкохолот и брзината остануваат главни проблеми appeared first on plusinfo.mk.

Сè уште не се знае кога жителите на Тетово и на Куманово ќе почнат да добиваат СМС-пораки или електронско известување за сообраќаен прекршок регистриран со системот „Безбеден град“. Од Министерството за внатрешни работи за Плусинфо потврдуваат дека системот е веќе подготвен и дека неговото активирање во овие два града е прашање на време, но не посочуваат конкретен датум.

– Во моментов системот „Безбеден град“ функционира на територија на град Скопје, а планирано е наскоро да се активира и во Куманово и во Тетово. Опремата веќе е поставена и на Коридорите 8 и 10 и во секој момент се очекува да започне детектирањето на сообраќајните прекршоци – велат од МВР.

Возачите од Тетово и од Куманово, каде камерите се веќе поставени, во почетокот ќе бидат во пробен период, во кој за прекршоците се испраќа само опомена, без парична казна. Од полицијата објаснуваат дека овој тест-период има за цел граѓаните да се навикнат на новиот начин на контрола во сообраќајот, но не прецизираат колку тој период ќе трае во овие два града.

– Во моментов сме во пробен период во кој граѓаните добиваат само опомена за сторениот сообраќаен прекршок. Предвидено е во Скопје од 01.02.2026 година системот целосно да функционира и да се започне со санкционирање на граѓаните кои направиле прекршок детектиран од камерите – додаваат од МВР.

Системот „Безбеден град“ во текот на 2026 година треба да се прошири на целата територија на државата, со што електронското санкционирање ќе стане новата реалност за сите возачи.

The post ТЕТОВЦИ И КУМАНОВЦИ ВО НЕИЗВЕСНОСТ, КОГА ЛИ ЌЕ ПОЧНАТ ДА ПРИСТИГНУВААТ КАЗНИТЕ? Камерите се поставени, може да стартуваат во секој момент appeared first on plusinfo.mk.