Град Скопје спроведува засилени активности за уредување и подобрување на јавниот простор низ целата територија на градот, паралелно со тековните инфраструктурни проекти.

Во рамки на активностите се работи на обновување на хоризонталната сообраќајна сигнализација и замена на дотраените сообраќајни знаци, со цел зголемување на безбедноста и подобра организација на сообраќајот на градските булевари и улици.

Паралелно, долж клучните сообраќајници се поставуваат заштитни столпчиња со кои се штитат пешачките и велосипедските патеки, но и се спречува непрописно паркирање и узурпација на јавниот простор.

Од Град Скопје информираат дека засилено се работи и на одржување и уредување на зеленилото, при што се интервенира во парковите, булеварите и останатите јавни површини кои се под надлежност на градот. Дополнително, континуирано се спроведува чистење на коритото на реката Вардар на територијата на Скопје.

Во тек се и активности за уредување на пешачките зони во Зоолошката градина, како и за подобрување на пешачката и велосипедската инфраструктура низ градот.

Градоначалникот на Скопје Орце Ѓорѓиевски истакна дека овие активности се дел од поширока стратегија за враќање на урбаниот ред и функционалноста на јавниот простор.

– Наш приоритет е Скопје да биде почист, побезбеден и поуреден град за сите граѓани. Затоа паралелно работиме на инфраструктурата, сигнализацијата, зеленилото и чистењето на Вардар. Ова е континуиран процес кој нема да застане – порача Ѓорѓиевски.

Од Град Скопје додаваат дека сите јавни претпријатија се целосно ангажирани и работат со полн капацитет со цел подобрување на квалитетот на животот и урбаната слика на градот.

The post 📽️ ПРОЛЕТНАТА ГЕНЕРАЛКА ВО СКОПЈЕ СЕ ВРШИ СО ЗАСИЛЕНО ТЕМПО Градот во акција за чистење, сигнализација и уредување appeared first on plusinfo.mk.

Од утре (17 декември), со почеток во 9 часот ќе започне најавената измена на сообраќајниот режим од кружниот тек кај Полициската станица во Кочани, на дел од улиците Тодосија Паунов, Кеј на Револуцијата (во спротивна насока од течението на Кочанска Река) и Маршал Тито (во правец на течението на Кочанска Река) до кружниот тек кај Двојниот мост, информира попладнево надлежната служба во општинската администрација.

Изменетиот режим ќе се имплементира со поддршка од полициски службеници на Одделението за безбедност во сообраќајот на патиштата – Кочани, Општина Кочани, ТППЕ и ДПД Кочани.

Со пренасочување на сообраќајот продолжува поставувањето на хоризонтална и вертикална сигнализација, велат од Општина Кочани и упатуваат апел до граѓаните да не паркираат возила на улиците од двете страни на реката и да ги почитуваат сообраќајните правила, прописи и сигнализација.

The post ИЗМЕНЕТ СООБРАЌАЕН РЕЖИМ ВО КОЧАНИ Продолжува поставувањето хоризонтална и вертикална сигнализација appeared first on plusinfo.mk.

Директорот на Државни патишта Коце Трајановски изјави дека ги детектираат црните точки по патиштата и оти се во координација со МВР за нивно подобро означување. Апелираше и до граѓаните да внимаваат на сообраќајната сигнализација на патиштата.

За експресниот пат Градско-Прилеп каде за неколку месеци од пуштањето во употреба има пет жртви, Трајановски рече дека ќе има нова подобрена сообраќајна сигнализација.

– Тоа е еден од новите патишта што ги пуштивме во текот на изминатава година, сето тоа е направено според законски важечки прописи. Но, со оглед на тоа дека имаше повеќе жртви на овој пат, ние веќе направивме проект и тој е даден во Министерството за транспорт. Очекуваме за многу краток период да биде одобрен од Министерството по што ќе пристапиме кон поставување нова сообраќајна сигнализација за којашто сметаме дека ќе ги намали сообраќајните несреќи со што ќе се намалат шансите за евентуални жртви – рече Трајановски во гостувањето на „Вести плус“ на Канал 5 телевизија.

Во однос на лошата состојба на скопската обиколница, Трајановски рече дека наредната година се планира нејзина поголема реконструкција.

– Гледаме да ги детектираме сите овие критични точки, и најнапред на нив да реагираме. Кај клучката Хиподром имаше лоша состојба на патот – тоа веќе го решивме, кај хотелот „Белви“ ја решивме, а за обиколницата, којашто е приоритет, правиме проект согласно кој би требало да се направи една малку поголема реконструкција и за тоа правиме проекти. Сметаме дека таму треба да го решиме со кредити. И за тријаголникот Миладиновци-Петровец-Хиподром сме во преговори со Светска банка и други банки. Се надеваме дека следна година ќе почнеме со нивна реконструкција – рече Трајановски.

Посочи и дека во земјава се прават нови патишта, додека старите не е одржуваат, додавајќи дека мора да се одвојуваат повеќе средства од буџетот на ЈПДП и од Владата за одржување на постојните патни правци.

За состојбата на сообраќајните знаци на патиштата и дека има населени места коишто воопшто не се одбележани, рече дека се работи на тој проблем и оти се надева дека следната година ќе се реши.

Прашан за работата на автопатите, Трајановски рече дека во моментот се работи на три делници од договорот со „Бехтел и Енка“, а тоа е Прилеп-Битола, Тетово-Гостивар, Гостивар-Букојчани. Потсети дека е пуштен еден дел од делницата од автпатот Кичево-Охрид што го гради кинеската компанија Синохидро и најави дека многу скоро ќе биде пуштен и вториот дел до Охрид.

The post ЦРНИТЕ ТОЧКИ ЌЕ ДОБИЈАТ НОВА СИГНАЛИЗАЦИЈА Нови мерки по петте жртви на експресниот пат Градско-Прилеп appeared first on plusinfo.mk.