Премиерот Христијан Мицкоски не сака да им се посветува внимание на реакциите од бугарска страна поврзани со Ива Михаилова, девојката од Кочани која пребега во Бугарија како обвинета за сообраќајка со смртни последици.

– Имам што да одговорам, но мислам дека поединци не заслужуваат да бидат во центарот на вниманието и ваков тип на естрада што денеска ја гледаме таму, а е поврзана со фолклорот за нивните претседателски избори, не заслужува коментар и мислам дека треба и да ги игнорирате и вие како поединци – рече Мицкоски.

Претседателските избори во Бугарија треба да се одржат на 25 октомври, а бегството на Михаилова се случи во текот на изборната кампања. Изјавата на Мицкоски доаѓа откако министерот за внатрешни работи на Република Бугарија Иван Демерџиев ги нарече македонски власти „српски“.

Бугарскиот амбасадор во Скопје, Желјазко Радуков обвини за различен третман поради нејзината бугарска припадност. Ова беше причина и македонското Министерство за надворешни работи и надворешна трговија да повика на разговор претставник на амбасадата порачувајќи дека ваквите изјави се навредливи и провокација.

The post СЛУЧАЈОТ СО ИВА МИХАИЛОВА Е БУГАРСКИ ПРЕДИЗБОРЕН ФОЛКЛОР Мицкоски вели дека не заслужува натамошно внимание appeared first on plusinfo.mk.

Случајот со Ива Михаилова се користи за создавање криза во односите меѓу Македонија и Бугарија во пресрет на изборите во Бугарија, оцени вицепремиерот и министер за транспорт Александар Николоски, посочувајќи дека истрагата што се води треба да утврди дали имало пропусти на македонските институции при нејзиното напуштање на земјата.

Во интервју за емисијата „360 степени“ на МРТ Николоски најави дека јавноста наскоро ќе биде запознаена со резултатите од истрагата. Коментирајќи ги наводите на бугарскиот амбасадор во земјава Жељазко Радуков, за наводна координација или знаење на македонските власти при нејзиното заминување, тој посочи дека постои синхронизација меѓу ставовите на Софија и опозициската СДСМ.

– Имам само една непозната во целата работа, а тоа е дали претставниците на СДСМ и бугарскиот амбасадор разговараат телефонски, се среќаваат лично или одржуваат конференциски разговори за да ги координираат ставовите. Минатата недела кажав дека станува збор за јасна координација на ставовите, што вчера се потврди, имајќи предвид дека тезите што ги изнесува СДСМ во врска со овој случај се исти или многу слични со тезите што ги слушнавме вчера од амбасадорот на Република Бугарија, кој е официјален претставник на Бугарија во државата. Јасно е дека постои координација. Јасно е и дека целта на СДСМ не е да го зголеми сопствениот рејтинг, туку да најде начин да го намали рејтингот на ВМРО-ДПМНЕ – истакна Николоски.

Според него, во позадина на случајот стои предизборниот амбиент во соседна Бугарија, каде што, вели, политичките субјекти повторно посегнуваат по прашања поврзани со Македонија за да наметнат криза во билатералните односи.

– Штом мора да се прави шоу со пренесување на коските на цар Самоил од Солун во Софија, очигледно нема друг начин, па мора да си поигруваат со судбината на едно младо девојче. Таа ќе биде заборавена, како што беа заборавени и други случаи и личности искористени во одредени моменти. Се обидуваат да предизвикаат наша емотивна реакција, мислејќи дека ќе кажеме оти ги напуштаме преговорите со ЕУ, но сериозно ја потценуваат нашата способност да ги разбереме работите – нагласи Николоски.

Во однос на прашањето за евентуална одговорност на македонските безбедносни институции, Николоски наведе дека резултатите од тековната истрага наскоро ќе бидат презентирани пред јавноста, но укажа и на поширокиот криминален контекст и семејното стебло на Михаилова.

– Доколку истрагата утврди дека некој навистина направил пропуст, секако дека ќе има одговорност. Но, нереалистично е да се очекува на сите жители да им доделиме полицајци. Тука посуштинско е прашањето: како е возможно држава членка на НАТО и ЕУ да штити лица кои бегаат од правдата? Нејзиниот татко е правосилно осуден во акцијата „Детонатор“ за тешки кривични дела и се наоѓа во Бугарија каде што е заштитен и не се екстрадира. Сега станува збор за две лица од исто семејство – заклучи Николоски.

Прашан зошто институциите не го спречиле заминувањето и дали станува збор за институционално потфрлање, вицепремиерот информираше дека постапката за расчистување на настанот е во тек.

Како е возможно, вели, држава членка на НАТО и Европската Унија која тврди дека има функционален систем на владеење на правото да штити лица кои бегаат од правдата.

– Во овој случај станува збор за две лица од исто семејство. Намерата е јасна. Сакаат да предизвикуваат провокации и да ги користат во предизборни цели. Но, како што кажав, доволно сме паметни за да не подлегнеме на провокации – нагласи вицепремиерот Николоски во емисијата „360 степени“ на МРТ.

The post БУГАРИЈА ПРАВИ СЛУЧАЈ ОД ИВА МИХАИЛОВА ЗА ПРЕДИЗБОРНИ ЦЕЛИ Некому му одговара криза во односите со Македонија appeared first on plusinfo.mk.

Бугарија нема да ја предаде Ива Михаилова на Македонија, за која вчера Министерството за внатрешни работи распиша меѓународна потерница, откако викендов таа избега во Бугарија, а во судот во Кочани ѝ се суди за сообраќајна несреќа со смртни последици.

Бугарското министерство соопшти дека добило порака од ИНТЕРПОЛ – Скопје со барање за апсење и екстрадиција на Ива Михаилова – бугарска државјанка и државјанка на Македонија, која е обвинета за кривично дело казниво според член 300 од Кривичниот законик на Македонија и дека против неа е издадена потерница од страна на Судот во Кочани на 13 октомври 2026 година.

„Во моментов за Михајлова нема издадена црвена потерница. Бугарските власти не презеле дејства за утврдување каде се наоѓа Михајлова на територијата на Бугарија. Потсетуваме дека според член 25, став 4 од Уставот на Република Бугарија, државјанин на Бугарија не може да биде предаден на друга држава или на меѓународен суд заради кривично гонење, освен ако тоа е предвидено со меѓународен договор што е ратификуван, објавен и стапил во сила за Република Бугарија. Член 6, став 1, точка а од Европската конвенција за екстрадиција гласи: Секоја договорна страна има право да одбие екстрадиција на свои државјани“, соопштени бугарското МВР.

Министерот за внатрешни работи Панче Тошковски и вицепремиерот Александар Николоски вчера рекоа дека очекуваат Бугарија да ја почитува меѓународната потерница и ја уапси и да ја предаде обвинетата Михаилова.

The post БУГАРИЈА НЕМА ДА ЈА ПРЕДАДЕ ИВА МИХАИЛОВА НА МАКЕДОНИЈА Екстрадицијата на свој граѓанин може да се одбие appeared first on plusinfo.mk.

Во врска со бегството на Ива Михајлова во Бугарија и нејзиниот прием на високо ниво во Софија, Министерството за надворешни работи и надворешна трговија укажува дека ваквото постапување на бугарските државни институции ги подрива напорите што ги вложуваме за градење доверба и е спротивно на декларираните заложби за развој на добрососедските односи.

„Приемот на високо ниво на лице против кое се води судска постапка испраќа сериозно погрешна порака. Националната припадност и поседувањето друго државјанство не смеат да служат како заштита од одговорност пред надлежните институции. Секој има право на правично судење. Никој нема право на изземање од законите.

Од Република Бугарија, како членка на Европската Унија, очекуваме постапување во согласност со основните европски принципи: почитување на судските постапки, соработка меѓу надлежните институции и еднаквост пред законот. Постапките што создаваат впечаток на институционална заштита од судска одговорност се неспоиви со тие принципи. Владеењето на правото не смее да биде селективно, ниту да зависи од националната припадност на поединецот.

За развојот на случајот, Министерството за надворешни работи и надворешна трговија ќе ги информира меѓународните партнери, особено институциите на Европската Унија и Советот на Европа. Ваквите постапки, за кои постојат и претходни примери, директно ја нарушуваат довербата меѓу двете држави и отвораат сериозни прашања за доследноста во почитувањето на заедничките европски вредности.

Остануваме посветени на развојот на добрососедските односи, засновани врз меѓусебно почитување, доверба и европски принципи. Истата одговорност ја очекуваме и од бугарската страна. Почитувањето на правдата не е прашање на политички избор, туку основна европска обврска“ – се вели во соопштението на МНР и МТ.

The post БЕГСТВОТО НА МИХАИЛОВА ИСПРАЌА СЕРИОЗНО ПОГРЕШНА ПОРАКА! МНР ќе ги информира ЕУ и Советот на Европа за некоректното однесување на Бугарија appeared first on plusinfo.mk.

Бугарија категорично не учествува во никакви консултации за повторно преговарање на обврските преземени од Македонија на нејзиниот пат кон Европската Унија, рече денеска министерката за надворешни работи Велислава Петрова Чамова за време на денешната парламентарна контрола во Народното собрание.

Таа даде одговор на пратеничките прашања во врска со моменталната состојба на билатералните односи и европската интеграција на „западниот сосед“.

– Бугарија не е во процес на дискусија или консултации за промена на веќе утврдените услови и обврски преземени од Скопјe. Ставот на Софија останува непроменет – спроведувањето на договорот од 2022 година е најдиректниот и единствен можен пат за Република Северна Македонија да напредува кон членство во ЕУ. Бугарија не поставува нови барања надвор од општоприфатената европска рамка, туку инсистира на строго почитување на досега потпишаните договори и гарантирање на правата на Бугарите во соседната земја – рече Петрова.

Министерката ја бранеше доследноста на бугарската надворешна политика, нагласувајќи дека градењето трајно добрососедство и доверба може да се случи само преку реални акции и спроведување на преземените обврски.

Дискусијата во бугарското собрание следува по вчерашната средба на Петрова Чамова со македонскиот министер за надворешни работи Тимчо Муцунски во Софија. Муцунски ја оцени средбата како конструктивна и нагласи дека позициите на двете страни и натаму остануваат значително оддалечени, а во врска со европската интеграција на Македонија меѓу двете страни постои висок степен на недоверба.

По средбата МНР соопшти дека двајцата министри разговарале и за продолжување на дијалогот меѓу двете држави во периодот што следи, при што е потврдена подготвеноста комуникацијата да продолжи и покрај постојните разлики во позициите.

Муцунски нагласил дека прашањата поврзани со идентитетот, историјата и културата не смеат да претставуваат пречка на европскиот пат и истакнал дека без дијалог не може да се дојде до решение, но и дека самиот дијалог не е гаранција за надминување на разликите.

The post БУГАРИЈА НЕ УЧЕСТВУВА ВО ПОВТОРНО ПРЕГОВАРАЊЕ ЗА ОБВРСКИТЕ НА МАКЕДОНИЈА Петрова категорична дека уставните измени се единствениот пат за напредок кон ЕУ appeared first on plusinfo.mk.

Бугарија ја упатува Македонија да го решава проблемот со уставните измени во Брисел, но кога македонската Влада ќе предложи разговори со Европската Унија, Софија повторно бара договорот да се постигне со неа, вели премиерот Христијан Мицкоски.

Во интервју за телевизијата Алсат, тој оцени дека ваквите противречни пораки го отежнуваат излезот од евроинтеграциската блокада и повтори дека нема да прифати уставни измени без гаранции за граѓаните дека нема да следуваат нови вета.

Владата, како што рече, веќе понудила решение со кое измените би стапиле во сила по завршувањето на пристапните преговори, но засега нема согласност за таквиот предлог.

Мицкоски нагласи дека македонската страна постојано нуди решенија, но дека од Бугарија нема подготвеност тие да бидат разгледани.

– Од другата страна, зборувам за нашиот источен сосед, за жал, нема желба за каков било напредок кога станува збор за тие решенија, да седнеме да ги разгледаме, да ги анализираме и да разговараме – рече премиерот.

Тој објасни дека токму затоа бара Европската комисија и Европската Унија поактивно да се вклучат во разговорите.

Според Мицкоски, бугарската страна од една страна тврди дека станува збор за прашање меѓу Македонија и ЕУ, а од друга страна инсистира Скопје да се договори со Софија.

– Ние велиме, во ред, тогаш оставете нè со Брисел да се договориме. И кога тоа им го велиме, велат не, треба со нас да седнете. Сме во чудна ситуација бидејќи од една страна пораката е да седнеме со Брисел, а од друга страна дека треба со нив да се договориме – изјави Мицкоски.

Премиерот смета дека ваквата состојба дополнително го усложнува процесот, особено поради, како што рече, погрешните одлуки донесени во минатото.

– Кога еден ќе направи катастрофална грешка, сто упорни и паметни многу потешко ќе ја поправат отколку што еден ќе ја направи – рече тој.

Мицкоски повтори дека ставот на Владата за уставните измени останува непроменет, но нагласи дека тоа не е последица на тврдоглавост.

Според него, Македонија веќе направила доволно отстапки на европскиот пат и сега е неопходно граѓаните да добијат гаранции дека нема да бидат соочени со нови блокади.

– Единствено што во овој момент очекуваме е одредена гаранција што треба да ја добијат граѓаните, а не јас како политичар, дека нема да има друго вето – порача премиерот.

Тој нагласи дека проблемот не е самото внесување на Бугарите во македонскиот Устав, туку можноста во текот на пристапните преговори да се појават дополнителни условувања.

Токму затоа Владата предложила уставните измени да имаат одложено дејство, односно да стапат во сила дури по завршувањето на преговорите за членство во Европската Унија.

– За нас не претставува проблем да се вметнат Бугарите во Уставот, туку проблем претставува условувањето понатаму во преговарањето за пристапување кон ЕУ. Затоа понудивме решение со одложено дејство, односно кога ќе го завршиме процесот на преговори, тоа да стане ефективно – објасни Мицкоски.

Според него, неприфаќањето на ваквиот предлог е сигнал дека уставните измени можеби нема да бидат последното барање кон Македонија.

Премиерот предупреди дека Владата нема да се откаже од разговорите, но и дека нема да преземе чекор без јасна претстава за неговите последици.

– Никогаш нема да влезам во авантура во која јасно нема да го видам крајот, а сега не само што не го гледам јасно крајот, туку напротив, тој станува сè помагловит и помагловит – рече Мицкоски.

Тој додаде дека разговорите ќе продолжат бидејќи барањето решенија преку дијалог е суштината на демократијата.

Во поширокиот контекст на евроинтеграциите, премиерот претходно во истото интервју оцени дека претседателката на Европската комисија Урсула фон дер Лајен ги пофалила реформите што ги спроведува Владата, но призна дека не е задоволен од динамиката на пристапниот процес.

И покрај позитивните оценки за реформите, уставните измени остануваат услов за понатамошно напредување, а македонската Влада инсистира на гаранции дека нивното спроведување нема да отвори простор за нови блокади.

The post ВЛАДАТА БАРА ЈАСНИ ГАРАНЦИИ ДЕКА НЕМА ДА ИМА НОВО ВЕТО Бугарија праќа мешани пораки за идејата ЕУ да учествува во преговорите appeared first on plusinfo.mk.

На маргините на Меѓународната конференција за Коридорот VIII, што денеска се одржа во Софија, министерот за надворешни работи и надворешна трговија, Тимчо Муцунски, оствари билатерална средба со министерката за надворешни работи на Република Бугарија, Велислава Петрова-Чамова.

Министерот Муцунски ја оцени средбата како конструктивна и одржана во позитивен дух, притоа нагласувајќи дека позициите на двете страни и натаму остануваат значително оддалечени, информираше Министерството за надворешни работи и трговија.

„Во однос на европската интеграција, Муцунски посочи дека меѓу двете страни постои висок степен на недоверба, која, од наша перспектива, е поврзана со предвидливоста на процесот и со досегашното искуство со билатералните барања.

– Нашите позиции се апсолутно јасни. Стратешки интерес и на Бугарија е ние да се движиме напред по европскиот пат. Но, ние сме земја која низ годините постојано се соочувала со билатерални барања. Кога ќе се затворело едно билатерално прашање, потоа се отворало ново – истакна Муцунски.

На средбата беше разговарано и за продолжување на дијалогот меѓу двете држави во периодот што следи, при што беше потврдена подготвеноста комуникацијата да продолжи и покрај постојните разлики во позициите“, соопшти министерството по одржаната средба во Софија.

Министерот на средбата нагласил дека прашањата поврзани со идентитетот, историјата и културата не смеат да претставуваат пречка на европскиот пат. Тој истакнал дека без дијалог не може да се дојде до решение, но и дека самиот дијалог не е гаранција за надминување на разликите.

МАКЕДОНИЈА ДОЗВОЛИ БУГАРСКИ ЛЕКАРИ ДА ЈА ПРЕГЛЕДААТ ИВА МИХАЈЛОВА За Муцунски тоа е гест на добра волја од кој може да почне да се гради доверба

The post КОНСТРУКТИВНА СРЕДБА ВО СОФИЈА, НО БЕЗ ПРИБЛИЖУВАЊЕ НА ПОЗИЦИИТЕ Муцунски повтори дека прашањата за идентитетот не смеат да бидат пречка на европскиот пат appeared first on plusinfo.mk.

Сите кои тврдат дека нема никаква закана, нека ја отворат преговарачката рамка, вели претседателката Гордана Сиљановска-Давкова, посочувајќи дека во неа е внесена издвоената изјава на Бугарија за македонскиот јазик и прашувајќи зошто воопшто се инсистирало на такво прашање ако Европската Унија смета дека нема проблем со јазикот и идентитетот.

Во интервју за телевизија Сител, таа го отвори токму прашањето за содржината на преговарачката рамка кога беше прашана за односите со Бугарија и излезот од статус кво ситуацијата на македонскиот европски пат.

– Точно е дека ЕУ вели дека нема проблем со тој јазик, меѓутоа ако, спротивно на сите меѓународни норми во 21 век, од оние во Обединетите нации, влезе во една преговарачка рамка една ваква изјава, зошто да не се сомневам јас во заканата, затоа што зошто инаку би се инсистирало на вакво нешто? – рече Сиљановска-Давкова.

Претседателката смета дека спорот не завршува само со прашањето за македонскиот јазик, туку навлегува и во други области што таа ги смета за идентитетски.

– Ако нема проблем, извинете, тогаш што е прашањето врзано со Бугарите? Зар не е тоа идентитетско прашање? Кој досега преговарал во ЕУ за идентитет? Што е историјата ако не е идентитет, еве да прашам? Што е културата ако не е идентитет? – праша Сиљановска-Давкова.

Таа зборуваше и за обидот во земјава да се изгради политички консензус за прашањата од национален интерес. Според неа, Македонија не треба да настапува надвор без претходно усогласена позиција меѓу политичките фактори дома.

– Точно е дека во секоја демократска држава има разлики, помали или поголеми, помеѓу власта и опозицијата, но, за жал, во некои држави, дури и кога не се на страната на вистината, тие во еден глас говорат кон надвор. Почнавме ние, ако се сеќавате, преку средби, да создаваме една атмосфера. Јас не знам колку пати сум рекла дека не се оди надвор без да се постигне консензус дома и без да има договор – говорам за прашања од национален интерес – рече претседателката.

На прашањето дали во тие разговори бил вклучен и предлогот за уставни измени со одложено дејство, Сиљановска-Давкова рече дека конкретно за такво решение не се разговарало. Намерата, според неа, била да се изгради унифицирана позиција со која земјава би настапувала надвор.

Но, како што рече, процесот за постигнување консензус бил прекинат откако претставници на опозицијата не се појавиле на средбите.

– Околу консензусот приказната се прекина среде. Зошто? Бидејќи лидерот тогаш на Социјалдемократскиот сојуз отиде во Брисел и по враќањето почна да зборува гласно дека не гледа никакви проблеми, дека нема никаква закана по идентитетот – рече Сиљановска-Давкова.

Претседателката, сепак, гледа промена во односот на Европската Унија кон потребата од директен дијалог меѓу Скопје и Софија. Таа се повика на неодамнешниот јавен повик на претседателката на Европската комисија Урсула фон дер Лајен за продолжување на разговорите.

– Очигледно дека има промена кога отворено тоа е побарано од Европската Унија, преку претседателката на Европската комисија. Сите го чувме тоа. Да потсетам, и господинот претседател на Европскиот совет Антонио Кошта во Софија со слична дикција настапи, па дури и рече дека се потребни некакви гаранции – истакна Сиљановска-Давкова.

The post КОЈ ТВРДИ ДЕКА НЕМА ЗАКАНА НЕКА ЈА ОТВОРИ ПРЕГОВАРАЧКАТА РАМКА Зошто во документот се најде изјавата на Бугарија за јазикот? appeared first on plusinfo.mk.

Македонија и Бугарија најпрво треба да седнат на иста маса и отворено да ги соочат аргументите, а потоа билатералниот дијалог да прерасне во трипартитен разговор во кој ќе учествува и Брисел, смета пратеникот на ВМРО-ДПМНЕ Бојан Стојаноски.

Неговата порака доаѓа пред претстојната средба во Софија, каде што, според Стојаноски, македонската страна треба јасно да објасни зошто смета дека европската интеграција не смее да значи откажување од сопствениот идентитет.

– Она коешто е важно е прво да се седне на маса и ние да ги кажеме среде Софија нашите аргументи, зошто сметаме дека ако сакаме сите да бидат дел од ЕУ, дека треба таму да се почитуваме со тоа што сме, а не да креираме политики внатре во ЕУ, од Брисел, коишто прилегаат на 19 век – рече Стојаноски во емисијата „Колегиум“ на телевизија Алфа.

Тој смета дека во Софија треба отворено да бидат поставени и македонските црвени линии, но дека разговорите не треба да останат само меѓу двете земји.

– Потребно е ние таму да кажеме кои се нашите црвени линии, затоа што и ги имаме сега, а понатаму многу рационално, дипломатски, тој дијалог да го направиме еден трипартитен разговор, каде што ќе присуствува и некој од Брисел, бидејќи цело време јас лично имам чувство како на нашиот грб да се кршат сите копја – рече Стојаноски.

Пратеникот се осврна и на неодамнешната посета на претседателката на Европската комисија Урсула фон дер Лајен, оценувајќи дека покрај идентитетските прашања, важен дел од нејзините пораки биле и реформите и Планот за раст.

– Фон дер Лајен не ги споменуваше само идентитетските прашања, таму кажува и една работа која вреди да се напомене, дека е супер задоволна од начинот на којшто ние ги имплементираме реформите, особено за Планот за раст – кажа Стојаноски.

Според него, пристапот на власта е спорот да се решава преку дијалог, додека обврските што зависат од самата држава треба да продолжат да се исполнуваат.

– Нашата одлука беше ова прашање да го оставиме и да го решаваме со дијалог, додека сето она што ни е домашна задача, спроведувањето реформи, да покажеме дека оваа држава може да биде најдобра во регионот и сме многу подобри и од Косово и од Албанија и од сите земји во регионот, со што може да се види наравот на нашето владеење, сакаме да направиме реформи, сакаме да направиме мерки, сакаме да оставиме дела зад нас – рече Стојаноски.

The post МАКЕДОНИЈА И БУГАРИЈА ДА НЕ ОСТАНАТ САМИ НА МАСАТА Стојаноски бара трипартитен разговор со претставник од Брисел appeared first on plusinfo.mk.

Претседателката Гордана Сиљановска-Давкова смета дека прашањето околу евроинтеграциите на Македонија и условувањата поврзани со Бугарија не може да се квалификува ниту исклучиво како билатерално прашање, ниту само како проблем меѓу Македонија и Европската Унија.

Во интервју за телевизија Сител, Сиљановска-Давкова се осврна на неодамнешната средба со претседателката на Европската комисија Урсула фон дер Лајен и на можноста ЕУ да посредува во разговорите со Бугарија.

Во однос на пораките од Брисел за продолжување на разговорите со Софија, таа потсети дека претходно се поставувало прашањето дали спорот е билатерален или станува збор за прашање во рамки на односите со ЕУ.

– Кога ние велевме дека прашањето по природа е билатерално, бидејќи ниту во Акцискиот план, ниту претходно, нема забелешки од другите држави, никоја не се заканува со вето, напротив, се истакнува потребата од merit system во евалуацијата… Бугарија велеше дека прашањето не е билатерално, туку дека ние имаме работа со Европската Унија. Многупати сум велела дека ако е така, тогаш оставете нè да преговараме со Европската Унија – рече Сиљановска-Давкова.

Според неа, во такви ситуации постојат механизми во европското право, вклучително и членот 7 од Договорот за Европската Унија, кој предвидува можност за ограничување на одредени права на земја-членка доколку се утврди сериозно прекршување на принципите и вредностите на Унијата.

Сепак, претседателката нагласи дека потребен е дијалог и размена на ставови, но оти не може да се оквалификува проблемот или процесот и како билатерален исклучиво, или како проблем што го имаме со Европската Унија.

Во однос на ставовите на европските претставници за преземените обврски, Сиљановска-Давкова се повика на европското уставно право и на основните документи на ЕУ.

– Јас не сум само претседателка, туку сум и професорка. Добро го познавам европското уставно право. И она на што деновиве се повикува (претседателката на Бугарија) г-ѓа Јотова, претседателката на Бугарија, кога вели дека ние мора да ги почитуваме принципите и вредностите на Европската Унија, се точно прашањата на кои и јас повикувам. Многу јасно пишува во Договорот за ЕУ, во Лисабонскиот договор, во Повелбата за фундаменталните права, дека ЕУ ќе го почитува националниот и културниот идентитет, не само на членките на ЕУ, туку на сите нации и држави – рече Сиљановска Давкова.

Таа додаде дека европските документи предвидуваат и почитување на уставните и политичките структури на државите.

Сиљановска-Давкова оцени дека токму овие принципи треба да бидат земени предвид и во процесот на евроинтеграција на земјава, особено кога станува збор за прашањата поврзани со националниот и културниот идентитет.

За барањето за уставни измени, претседателката рече дека не може да гарантира дека тие ќе бидат усвоени.

– Што велам јас кога ќе ме запрашаат дали ќе го смените Уставот? Јас не можам таква гаранција да дадам. Пратениците не ме претставуваат мене, ги претставуваат граѓаните и, како во секој европски парламент, гласаат по сопствено уверување – рече Сиљановска-Давкова.

Таа праша што ќе се случи доколку повторно бидат иницирани уставни измени, но пратениците не обезбедат двотретинско мнозинство, како и потребното мнозинство од пратениците од заедниците кои не се мнозинство.

The post СПОРОТ СО БУГАРИЈА НЕ Е САМО БИЛАТЕРАЛЕН Европските документи налагаат почитување на идентитетот на сите држави appeared first on plusinfo.mk.