Осум лица добиле медицинска помош поради повреди здобиени за време на денешниот протест во Тирана, се наведува во прелиминарниот извештај на албанското Министерство за здравство и социјална заштита, јави албанската новинска агенција АТА.

Според соопштението на Министерството, еден пратеник во албанскиот Парламент, еден новинар и четворица демонстранти побарале помош во Универзитетскиот болнички центар „Мајка Тереза“. Сите шестмина се веќе пуштени од болницата откако им била укажана лекарска помош.

Во меѓувреме, еден полицаец и еден новинар добиле медицинска помош во Универзитетската болница за трауматологија. Нивната здравствена состојба е стабилна.

Претходно демонстрантите ја запалија општината, како и влезната врата на Министерството за животна средина во центарот на Тирана, додека безбедносните сили употребија големи количини солзавец за да ја растераат толпата на плоштадот Скендербег. Пламенот на вратата на Министерството набрзо е изгаснат, додека пламен се појави и на прозорецот од истата зграда.

Масовните антивладини протести во албанската престолнина денеска ескалираа во судири меѓу демонстрантите и полицијата, откако учесници на протестот фрлаа камења и пиротехнички средства кон безбедносните сили и државните институции. Полицијата интервенираше со водени топови и солзавец, додека на повеќе локации во градот беа запалени контејнери и поставени барикади.

Тензиите во Тирана се високи, а протестите се одвиваат во услови на зголемено политичко и социјално незадоволство насочено кон владата на премиерот Еди Рама. Во последните месеци опозициската Демократска партија, предводена од Сали Бериша, организираше повеќе демонстрации со барање за предвремени избори, обвинувајќи ја Владата за корупција, лошо управување и влошување на животниот стандард.

Во исто време, студентски и граѓански групи изразуваат незадоволство поради економските услови, високите трошоци за живот, иселувањето на младите и состојбите во образовниот систем. Дел од демонстрантите сметаат дека Албанија се соочува со сериозни проблеми поврзани со вработувањето, социјалната сигурност и перспективите за младите.

The post 8 ЛИЦА ПОВРЕДЕНИ НА ДЕНЕШНИТЕ ПРОТЕСТИ ВО ТИРАНА Демонстрантите ја запалија општината appeared first on plusinfo.mk.

Ребалансот не е само техничка корекција на буџетските ставки, туку и инструмент преку кој се земаат предвид најновите економски показатели и досегашното извршување на Буџетот, а истовремено се обезбедуваат средства за законските обврски и приоритетните потреби на граѓаните и институциите рече министерката за финансии Гордана Димитриеска-Кочоска пред Комисијата за финасирање и буџет на Собранието во која почна амандманската расправа на вториот ребаланс на буџетот.

– Со вториот ребаланс на Буџетот за 2026 година ги усогласуваме проекциите со реалните економски движења, досегашната реализација и ефектите од мерките преземени во текот на годината. Продолжуваме со инвестиции во патната и железничката инфраструктура, образованието, животната средина, земјоделството, енергетската ефикасност и модернизацијата на јавните финансии, со поддршка од домашни и меѓународни финансиски извори. Очекувам дека во рамки на расправата ќе ги разгледаме предложените измени од аспект на нивната оправданост и потребата за одговорно извршување на Буџетот до крајот на годината- рече таа.

Димитриеска -Кочоска  додаде дека вториот ребаланс е подготвуван во услови на продолжена глобална неизвесност, геополитички тензии и нарушувања на меѓународните пазари на енергенси.

-Конфликтот на Блискиот Исток и движењата на светските цени на нафтата и другите примарни производи се одразуваат врз економските услови, врз трошоците на компаниите и домаќинствата, но и врз планирањето и реализацијата на буџетските приходи и расходи. Во вакви околности, одговорната фискална политика бара навремено следење на состојбите и усогласување на буџетските проекции со реалните движења- рече министерката.

Таа додаде дека мерките кои што ги презеде владата за ублажување на кризата имаат конкретна цел, но имаат и директен ефект врз приходната страна на Буџетот, што мора реално да се одрази во проекциите за остатокот од годината.

-Затоа, со предложените измени ги усогласуваме приходните и расходните проекции со новите економски услови и со реализацијата во текот на годината. Притоа, буџетскиот дефицит останува непроменет на претходно утврденото ниво од 4,1 процент од бруто-домашниот производ, односно 46,3 милијарди денари. Корекциите се спроведуваат во рамките на постојниот фискален таргет, со внимателно усогласување на расходите со расположливите средства- напомена Димитриеска-Кочоска.

Таа се осврна на макроекономските проекции.

– Проекцијата за реалниот раст на БДП за 2026 година се задржува на 3,5%. Бруто-инвестициите се очекува да бидат еден од главните двигатели на растот. На тоа ќе влијаат реализацијата на капиталните инвестиции од Буџетот, вложувањата на претпријатијата во државна сопственост, развојот на патната и железничката инфраструктура, како и проектите на општините во образованието, здравството и животната средина. За 2026 година се очекува реален раст на бруто-инвестициите од 7,6%. Инвестициската активност на домашните компании се очекува да остане на солидно ниво, поддржана од кредитната активност и од поволните финансиски средства обезбедени преку владините мерки. Инвестициите создаваат услови за поголем производствен капацитет, нови работни места и подобра конкурентност на домашната економија- рече министерката.

Кај приватната потрошувачка, додаде, остварувањата беа подобри од очекуваното. Мерките насочени кон ублажување на ценовниот шок придонесоа да се намали притисокот врз расположливиот доход на домаќинствата.

-Во втората половина од годината се очекува потрошувачката да се одржи на солидно ниво. За целата 2026 година се проектира реален раст на приватната потрошувачка од 2,6 проценти, додека јавната потрошувачка се очекува да порасне за 2,5%. Извозот и увозот на стоки забележаа позасилена динамика во првата половина од годината, во услови на подобра глобална активност и поотпорна надворешна побарувачка од очекуваната. За 2026 година се очекува реален раст на извозот од 5,6%, додека увозот се проектира да порасне за 6 проценти. Инвестициите и активностите за отворање нови работни места, заедно со подоброто таргетирање на социјалната помош и активирањето на невработените корисници на социјална поддршка, се очекува да придонесат за понатамошно подобрување на состојбите. Стапката на вработеност се очекува да достигне 46,8 проценти, а стапката на невработеност да се намали на 11,2 проценти. Просечната нето-плата во 2026 година се очекува да порасне за 8,1 процент, под влијание на растот на платите во приватниот сектор и во одделни дејности во јавниот сектор, особено во образованието и здравството- посочи Димитриеска Кочоска.

Во врска со ценовните движења, таа рече дека за период од девет месеци инфлацијата беше поумерена од претходните очекувања.

Министерката рече дека вкупните приходи се планирани на 374,2 милијарди денари, а дефицитот останува на ниво од 46,3 милијарди денари или 4,1 отсто од БДП. Проекциите за економскиот раст и за инфлацијата се задржуваат на 3,5 проценти, додека најголемиот дел од корекцијата се однесува на акцизите, кои се ревидираат од 34,1 на 30,4 милијарди денари.

Во меѓувреме, не стивнуваат реакциите од СДСМ. Според опозициската партија, новото прекројување на државната каса е последица на нереалното планирање на приходите, а не само на мерките за намалување на акцизата и на ДДВ за горивата. ВМРО-ДПМНЕ, пак, тврди дека економските политики се водат одговорно и стратешки, со јасен фокус на фискалната консолидација и одржливиот развој, а платите и пензиите продолжуваат да растат.

За вториот ребаланс на буџетот се поднесени 120 амандмани.

The post РЕБАЛАНСОТ НА БУЏЕТОТ Е УСОГЛАСЕН СО РЕАЛНИТЕ ЕКОНОМСКИ ДВИЖЕЊА Димитриеска-Кочоска го бранеше вториот ребаланс пред пратениците appeared first on plusinfo.mk.

Собраниската Комисија за политички систем и односи меѓу заедниците едногласно ги усвои извештаите за работата на Судскиот совет и за реализацијата на судскиот буџет во 2025 година и ги проследи во понатамошна собраниска процедура. Годинава, за првпат согласно новото законско решение, јавната расправа ја следеа и претставници на невладини организации од областа на правосудството и човековите права.

Претседателот на Комисијата, пратеникот Љупчо Пренџов, оцени дека вклучувањето на граѓанскиот сектор претставува дополнителен квалитет во работата на собраниското тело.

– За првпат, по новиот закон, имаме јавна расправа која ја следат невладини организации од областа на правосудството и човековите права, и тоа е нов квалитет во работата на Комисијата за политички систем и односи меѓу заедниците – нагласи Пренџов.

Двата извештаја пред пратениците ги презентираше претседателот на Судскиот совет, Александар Камбовски, кој се осврна на приходите и расходите во судството, но и на проблемите со човечките ресурси.

Податоците покажуваат значителен недостаток од судии и судски службеници. Од предвидените 639 судиски места, до крајот на 2025 година биле пополнети 418, односно околу 65 проценти. Тоа значи дека во судовите останале непополнети 221 судиско место.

Уште поизразен е кадровскиот недостаток во судската служба. Од систематизираните 4.751 работно место, пополнети биле само 1.803, односно 37,95 проценти. Според овие податоци, судовите работеле со 2.948 непополнети места за службеници.

Камбовски нагласи дека човечките ресурси се клучни за функционирањето, независноста и ефикасноста на судската власт, како и за довербата на граѓаните во правосудниот систем.

– Човечките капацитети се најважниот ресурс со кој располага секоја судска власт – истакна Камбовски, додавајќи дека обезбедувањето соодветни услови за работа на судиите е еден од приоритетите на Судскиот буџетски совет.

Пратеникот Антонијо Милошоски оцени дека извештајот објективно ја прикажува потребата од дополнителни финансиски средства и човечки ресурси во судството.

– Се надевам дека Судскиот совет, заедно со другите судови во државата, ќе успее во конструктивна соработка со надлежните власти да се избори за подобар буџет – рече Милошоски.

Тој предложи обезбедувањето поголеми буџетски и кадровски капацитети да биде заедничка цел на пратениците и судските институции, за потоа од судовите да може да се бараат подобри резултати и поголема ефикасност.

The post ЗЕЛЕНО СВЕТЛО ЗА ДВАТА ИЗВЕШТАИ ЗА СУДСТВОТО Судскиот совет предупреди за недостиг од кадар и на пари appeared first on plusinfo.mk.

Измените и дополнувањата на Законот за приватизација и закуп на градежно земјиште во државна сопственост денеска го поминаа првиот филтер. Пратениците во Собранието на седницата на Комисијата за финансирање и буџет го прифатија, по што ќе оди на понатамошно читање.

Директорот на Управата за имотно-правни работи, Зоран Крстаноски пред пратениците образложи дека цел на предложените законски измени е да се надминат утврдените проблеми во досегашната примена на законот, да се допрецизираат условите и постапките за приватизација на градежното земјиште и да се обезбеди поголема правна сигурност за граѓаните и за правните лица.

​Крастаноски посочи дека во текот на досегашната примена на законот се утврдило оти одредени законски решенија создаваат тешкотии во постапувањето, особено во случаите кога постојат повеќе сопственици на објекти на иста градежна парцела или кога станува збор за објекти во етажна сопственост, како и во постапки поврзани со претходно запишани права на користење на градежното земјиште.

Појасни дека има пет јасни и прецизни измени.

​- Првата значајна измена се однесува на укинувањето на одредбите за воспоставување на ограничен времен закон на градежното земјиште во државна сопственост. Досегашната практика покажа дека овие одредби се неприменливи и создаваат правна нееднаквост во однос на лицата што своите права ги остваруваат согласно Законот за градежно земјиште. ​Поради тоа се предлага нивно бришење и со соодветно на оваа измена, законот во иднина ќе го носи називот: Закон за приватизација на градежно земјиште во државна сопственост – рече тој.

Втората значајна измена, додаде, се однесува на допрецизирање на категориите лица кои можат да го остварат правото на приватизација на градежно земјиште.

– Со предложените решенија се опфаќаат лицата кои се прогласени за наследници на правата што произлегуваат од законот, како и лицата на кои им е пренесено правото за продолжување на постапката за приватизација во случаи кога и претходно било избришано правото на користење на земјиштето. ​На овој начин се создаваат појасни правни основи за продолжување на веќе започнатите постапки и за остварување на правата на лицата што ги исполнуваат законските услови – рече Крстаноски.

​Тој образложи дека третата значајна измена се однесува на приватизација на градежно земјиште на кое што се изградени објекти во етажна сопственост, односно објекти или посебни делови од објекти во сопственост на различни физички и правни лица.

​- Значајно во овој дел е што на етажните сопственици им се овозможува да го приватизираат земјиштето под зградата врз основа на податоци од Катастарот на недвижности, без обврска да доставуваат геодетски елаборати за нумерички податоци за формирање градежна парцела. ​Ова претставува конкретно административно олеснување со кое се поедноставува постапката и се намалува потребата од дополнителна документација за овој дел од земјиштето. Воедно, се уредуваат и случаите кога на една градежна парцела постојат два или повеќе објекти во сопственост на различни лица, со што се создаваат и појасни услови за утврдување на нивните сопственички права – рече Крстаноски.

​Четвртата измена се однесува на можноста за проширување на веќе поднесени барања за приватизација. Како што појасни Крстаноски, се овозможува, до донесување на првостепеното решение, барањето да се прошири и на други катастарски парцели кои што се дел во истата градежна парцела под условите утврдени во овој закон. Тој истакна дека се допрецизира и можноста кон веќе започната постапка да се приклучат и други лица што имаат соодветно право или правен интерес, вклучително и корисниците на земјиштето, сопствениците на објектите или етажните сопственици. Со тоа се овозможува посеопфатно решавање на имотно-правните односи во рамки на постојните постапки.

​- ​Петтата значајна измена се однесува на повторно отварање на можноста за промена на правото на користење во право на сопственост на градежното неизградено земјиште за определена категорија од законот кои што се поранешни сопственици.​ Имено, со предложените одредби се предвидува рок од една година од влегување во сила на законот овие лица да можат да поднесат пријава до Агенцијата за катастар на недвижности, согласно утврдените законски услови.​Истовремено, се предвидува и обврска за Агенцијата за катастар на недвижности, во рок од две години од влегување во сила на законот, да изврши решение на преостанатите запишани права на користење на градежното земјиште, со исклучок на оние права кои се заштитени со предвидените законски одредби – образложи Крстаноски.

​Тој потенцираше и дека на овој начин се создаваат и услови за поажурна и поусогласена катастарска евиденција и за надминување на дел од постојните имотноправни неусогласености.

​- Со овие предложени измени дополнително се прецизираат и одредбите кои што се однесуваат на потребната документација за постапката, во смисла на геодетски елаборати, се конкретизираат роковите за постапување и правото на жалба, а се врши и усогласување на законскиот текст со актуелните називи на надлежните институции и со уставното име на државата – вели Крстаноски.

The post НЕМА ВЕЌЕ РОКОВИ ЗА БАРАЊА ЗА ОТКУП НА ДВОРНО МЕСТО Пет значајни измени на Законот за приватизација и закуп на државното градежно земјиште appeared first on plusinfo.mk.

Поголема самостојност за државните ревизори, построги критериуми за административните службеници и враќање на независноста на собраниската служба предвидуваат законските решенија што денеска ги изгласа Собранието.

Промените опфаќаат две важни области од функционирањето на државните институции – контролата на трошењето јавни средства и одговорноста на вработените во администрацијата.

Со новиот Закон за државната ревизија се зајакнува независноста на Државниот завод за ревизија (ДЗР), кој самостојно ќе одлучува кои институции и субјекти ќе бидат опфатени со неговата годишна програма за работа.

„Основната цел на Предлог законот е да се создаде појасна, посовремена и поефикасна законска рамка за вршење на државната ревизија, усогласена со меѓународно прифатените стандарди и принципи за работа“, се наведува во соопштението на Министерството за финансии.

Една од најзначајните промени е што ревизорите ќе можат да ја прошират контролата и над субјекти поврзани со институциите што располагаат со јавни пари, доколку постои економски, финансиски или друг интерес поврзан со користењето јавни средства.

„Со Предлог-законот јасно се утврдува дека ДЗР самостојно и независно одлучува кои ревизии и кои субјекти ќе бидат вклучени во Годишната програма за работа“, соопшти Министерството.

Ова значи дека контролата нема да биде ограничена само на непосредните корисници на буџетски средства, туку под предвидените законски услови ќе може да опфати и други поврзани субјекти.

Со законот се прецизираат и критериумите за избор на главниот државен ревизор и неговиот заменик, а се прошируваат и надлежностите на главниот ревизор.

Министерството посочува дека посебно внимание е посветено на професионализацијата на ДЗР и на следењето дали институциите ги спроведуваат препораките добиени по ревизиите.

„Крајната цел на државната ревизија не е само да ги констатира слабостите, туку да придонесе тие да бидат отстранети и да се подобри управувањето со јавните средства“, се нагласува во соопштението.

Со тоа, според Министерството, ревизорските извештаи треба да добијат поголемо практично значење за отстранување на утврдените неправилности.

Во рамките на продолжението на 125. собраниска седница беа усвоени и две законски интервенции поврзани со административните службеници, со кои се менуваат правилата за нивниот статус, оценување, унапредување и одговорност.

Една од најважните новини е дека на службеник што две години последователно ќе добие оценка „1 – не задоволува“ ќе му престане работниот однос по сила на закон.

Со измените се укинува и можноста за унапредување без објавување интерен оглас, со цел да се обезбеди еднаков пристап до повисоките работни места и примена на системот на заслуги.

Се уредуваат дисциплинската и материјалната одговорност, се поедноставуваат одредени административни постапки, а се задржува правото на жалба.

Законските измени го уредуваат и статусот на вработените во собраниската служба и регулаторните тела, со цел зајакнување на нивната институционална самостојност.

Предвидено е и усогласување на правото на плата преку посебни закони за одредени категории службеници, додека примената на членот 80 се одложува до 1 јануари 2028 година.

За разлика од Законот за државната ревизија, измените што се однесуваат на администрацијата предизвикаа и политичка расправа во Собранието.

Опозициската СДСМ не гласаше за нив, оценувајќи дека дел од одредбите можат да се искористат за дисциплинирање и политички притисок врз административните службеници.

Координаторот на пратеничката група на СДСМ Оливер Спасовски тврдеше дека собраниската служба била независна до 2024 година и дека сегашните измени ја враќаат независноста што претходно била укината.

– Сè нешто се прави во завиена форма за да се остварат некакви цели – рече Спасовски, образложувајќи го противењето на неговата пратеничка група.

Од ВМРО-ДПМНЕ, пак, ги отфрлија критиките, оценувајќи дека со измените се исправуваат претходни пропусти во законските решенија.

– Една работа да пофалевте, да речете добро е – се исправи една работа – рече координаторот на пратеничката група на ВМРО-ДПМНЕ Никола Мицевски.

Тој посочи дека дел од проблемите постоеле уште од 2019 година и дека претходната власт имала можност да ги отстрани.

Во расправата беше отворено и прашањето за независноста на собраниското обезбедување, за кое Спасовски побара дополнителни реформи.

The post ПОГОЛЕМА НЕЗАВИСНОСТ ЗА РЕВИЗОРИТЕ, ПОСТРОГИ ПРАВИЛА ЗА АДМИНИСТРАЦИЈАТА Собранието усвои неколку законски измени appeared first on plusinfo.mk.

Собранието денеска одлучи да ја продолжи кризната состојба на барање на владата за уште шест месеци поради можноста за настанување на пореметување на снабдувањето со нафта и нафтени деривати.

Со одлуката кризната состојба се продолжува до 20 април 2027 година.

Цел на ова продолжување, според владата, е да се обезбеди стабилност и механизми за брза реакција во случај на непредвидени прекини или шокови во снабдувањето со нафта и нафтени деривати во земјата.

Од Владата посочуваат дека доколку дојде до трајна деескалација и стабилизирање на меѓународните пазари, кризната состојба може да биде прекината и пред април 2027 година.

Ова е трето продолжување на кризната состојба за снабдувањето со нафта и нафтени деривати. Владата прогласи кризна состојба на 21 април 2026 година поради ризиците и глобалните тензии (особено на Блискиот Исток) кои можат да предизвикаат нарушувања на пазарот на енергенси. По првичното воведување, Собранието на барање на Владата, ја продолжи двапати по три месеци (прво до 20 јули, а потоа до 20 октомври 2026 година).

Според закон владата може да прогласи кризна состојба во траење од еден месец, а за подолго траење треба да одлучи Собранието.

The post КРИЗНАТА СОСТОЈБА ЗА НАФТАТА Е ПРОДОЛЖЕНА ДО 20 АПРИЛ 2027 ГОДИНА Собранието го прифати образложението на владата appeared first on plusinfo.mk.

Размена на обвинувања и меѓусебни прозивки имаше денеска на собраниската седница за опозициски пратенички прашања меѓу премиерот Христијан Мицкоски и лидерот на Левица, Димитар Апасиев. Апасиев го праша премиерот за бизнисите на неговиот баџанак Јорданчо Јанев, познат како Дано, неговите фирми во Македонија и во Бугарија и тендерот за угостителска услуга од Општина Струмица, а Мицкоски ги отфрли наводите и го повика да ги повтори јавно надвор од собраниската говорница, за да ги докаже пред суд.

Мицкоски упати остри критики кон Апасиев, обвинувајќи го дека преку собраниската говорница изнесува лаги и клевети без да сноси одговорност за кажаното.

– Овде сум јас инфериорен, бидејќи после мене вие ќе излезите и ќе фрлите уште нов грст лаги и клевети. И нормално како секоја кукавица ќе ја искористите или злоупотребите собраниската говорница, без притоа да немате некаква кривична одговорност ниту за клевета, ниту пак за нешто друго. Јас ве поканувам како голем маж, храбар маж, што не сте, а не обична кукавица да излезете ова што денеска го кажавте и надвор пред медиуми на прес-конференција да го кажете и тогаш ќе се најдеме во арената каде што вие сте најјак, а тоа е судот. Па ќе мора ова што денеска го кажавте, да го докажете – рече Мицкоски.

Тој рече дека Јорданчо Јанев е негов баџанак, односно, дека сопругата на Јанев е сестра на неговата сопруга.

– Не ви е точен податокот дека од 2017 има бугарски пасош, туку од 2003 година. Инаку, да тој е син на двајца стечајци, татко му кога останал без работа во тогашната Треска, му дава еден камион кој што тој го вози за да заработи, за да ја прехрани фамилијата која е останата без работа во времето на транзицијата. И потоа развива свој сопствен бизнис кој што трае повеќе од 25 години. Јас навистина не можам да сфатам што е грев, па дури и да е бугарски граѓани, па дури и да, еве, во Бугарија да прави бизнис во левови, милиони како што кажувате, и тие пари да ги донесе во Македонија и тука да ги троши. Јас навистина не можам да сфатам што е грев, парите кои што ги заработуваат луѓето надвор да ги донесат луѓето тука, наместо да ги изнесуваат или да речеме да летуваат во скапи хотели на егејското крајбрежје или да шопингуваат во Тесалоники, како што вие милувате да кажете, скапа гардероба која што ја носите вие и вашето семејство, и на тој начин да ги манипулирате овие околу вас кои што ви даваат каква таква поддршка. Јас навистина не разбирам, вие навистина не се разбирате од бизнис – рече Мицкоски.

Но, ај што не се разбирате од бизнис, туку и доаѓате овде како секоја обична кукавица доаѓате овде на говорница и истурате клевети кои никаква врска, додаде Мицкоски.

– Па дури и успевате да ја сквернавите и прославата на светите Тивериополски свештеномаченици која што е градска слава во Струмица и која што трае со децении. Добро, вие сте еретик, не ги разбирате тие работи, а еретиците не можат да ги сфатат тие верски обичаи – рече премиерот.

Мицкоски повторно го повика Апасиев да ги изнесе своите тврдења јавно,.

– Јас најчесно, најпријателски, најдругарски ве замолувам, за да ја оттргнеме оваа перцепција дека сте кукавица и дека немате срце, излезете после ова беседа што сега после мене ќе ја кажете на прес-конференција и кажете ја. Немојте вака сега да излегувате тука и да лажете, да измислувате итн – рече Мицкоски.

Премиерот посочи дека ВМРО-ДПМНЕ има илјадници донатори, членови и симпатизери кои финансиски ја поддржуваат партијата. Притоа, упати критики кон политичките противници, обвинувајќи ги дека земаат хонорари и дневници од партијата, а потоа средствата ги вложуваат во угостителски објекти од кои остваруваат профит.

– За разлика од кај вас кои што земате од партијата хонорари и дневници, и тие потоа ги трошите, купувате објекти, кои потоа се кафе барови, ноќни клубови, ги регистрирате, го црпите профитот од таму, за да можете вашите хедонистички навики вие и вашето семејство да ги покажете на јавна сцена – рече Мицкоски.

Пратеникот Апасиев рече дека Јанев има 6 фирми, 4 во Македонија и 2 во Бугарија, и дека неговите бизниси се прошириле по доаѓањето на ВМРО-ДПМНЕ на власт, а дел од нив остваруваат милионски приходи. Посочувајќи фотографија од Јанев, лидерот на Левица рече дека ќе изнесува конкретни имиња и податоци.

– Денеска ќе ве прашам за тема во која што вие сте најак, а јас сум најслаб. А тоа е бизнис – рече Апасиев.

Апасиев ја поврза темата и со тендерот на Општина Струмица за подготовка на свечен ручек за 250 гости по повод празникот на Светите Петнаесет Тивериополски маченици. Тој тврдеше дека тоа бил првиот тендер на актуелниот градоначалник Петар Јанков и дека Јанев бил кум и покровител на славата, отворајќи прашање за можен судир на интереси.

Лидерот на Левица рече и дека, според јавно достапните информации, Јанев од 2019 година наваму донирал 20.000 евра на ВМРО-ДПМНЕ.

The post АПАСИЕВ СЕ ФАТИ ЗА БАЏАНАКОТ, МИЦКОСКИ ГО ОБВИНИ ДЕКА Е КУКАВИЦА И КЛЕВЕТНИК Жестока препирка меѓу лидерот на Левица и премиерот appeared first on plusinfo.mk.

Европската Унија останува стратешка цел на државата и во тој поглед нема никакво поместување, порача премиерот Христијан Мицкоски одговарајќи на пратеничко прашање на Арбана Пашоли од Европскиот фронт за стратегијата на Владата за деблокирање на евроинтегративниот процес и за отворање на преговарачките поглавја.

– Европската Унија останува наша стратешка цел и тука нема поместување ниту милиметар. Ние сакаме тој процес, како што сме кажале многупати во минатото, да го почнеме и да го завршиме, не само да го почнеме. Гледате како се менува постепено реториката во парламентот од седница на седница, од месец на месец, од година на година, кога и самите вие велевте дека ова е решение за членство, сега велите дека е решение за почеток на преговори, што е точно, ова е решение за почеток на преговори – истакна Мицкоски.

Тој нагласи дека Владата води дијалог со Бугарија и понуди опозицијата да биде директно вклучена во процесот.

– Во овој дијалог што го водиме со Бугарија, апсолутно, еве вие како здружена опозиција на неколку политички партии, предложете претставници да бидат дел од тимот што ќе го води тој дијалог со нашиот источен сосед. Ние апсолутно тоа ќе го почитуваме – нагласи премиерот.

Мицкоски рече дека актуелната состојба е последица на политиките на претходната власт на СДСМ и ДУИ. Посочи дека Владата во моментот работи на промена на перцепцијата кај европските партнери и на отворање простор за деблокирање на процесот.

– Тој процес е бавен, но се случува и тоа е реалност – рече тој додавајќи дека промените може да се видат и преку неодамнешните контакти меѓу министрите за надворешни работи на Македонија и Бугарија, како и средбите со еврокомесарката Марта Кос.

Премиерот најави дека следниот чекор ќе биде усогласување на акцискиот план за малцинства, документ што, како што посочи, е прифатен од 26 земји членки на Европската Унија, но не и од Бугарија.

– Зашто е важен овој акциски план за малцинствата. Дури и утре да одлучите да го промените Уставот на начин на кој сте одлучиле, повторно тоа нема да биде доволно за да ги продолжиме преговорите, бидејќи треба да имаме усогласен акциски план за малцинства. Така што, ние најпрвин ќе го усогласиме акцискиот план за малцинства – рече премиерот.

The post МИЦКОСКИ ЈА ПОКАНИ ОПОЗИЦИЈАТА ВО ТИМОТ ШТО ЌЕ ВОДИ ДИЈАЛОГ СО БУГАРИЈА Нема поместување ниту милиметар од целта за членство во ЕУ appeared first on plusinfo.mk.

The post 🎥 КАЗНЕТ ВОЗАЧОТ КОЈ БЛОКИРАЛ РАСКРСНИЦА КАЈ СОБРАНИЕ Сопственикот на „голфот“ бил снимен од граѓани appeared first on plusinfo.mk.

Претседателката Гордана Сиљановска-Давкова смета дека прашањето околу евроинтеграциите на Македонија и условувањата поврзани со Бугарија не може да се квалификува ниту исклучиво како билатерално прашање, ниту само како проблем меѓу Македонија и Европската Унија.

Во интервју за телевизија Сител, Сиљановска-Давкова се осврна на неодамнешната средба со претседателката на Европската комисија Урсула фон дер Лајен и на можноста ЕУ да посредува во разговорите со Бугарија.

Во однос на пораките од Брисел за продолжување на разговорите со Софија, таа потсети дека претходно се поставувало прашањето дали спорот е билатерален или станува збор за прашање во рамки на односите со ЕУ.

– Кога ние велевме дека прашањето по природа е билатерално, бидејќи ниту во Акцискиот план, ниту претходно, нема забелешки од другите држави, никоја не се заканува со вето, напротив, се истакнува потребата од merit system во евалуацијата… Бугарија велеше дека прашањето не е билатерално, туку дека ние имаме работа со Европската Унија. Многупати сум велела дека ако е така, тогаш оставете нè да преговараме со Европската Унија – рече Сиљановска-Давкова.

Според неа, во такви ситуации постојат механизми во европското право, вклучително и членот 7 од Договорот за Европската Унија, кој предвидува можност за ограничување на одредени права на земја-членка доколку се утврди сериозно прекршување на принципите и вредностите на Унијата.

Сепак, претседателката нагласи дека потребен е дијалог и размена на ставови, но оти не може да се оквалификува проблемот или процесот и како билатерален исклучиво, или како проблем што го имаме со Европската Унија.

Во однос на ставовите на европските претставници за преземените обврски, Сиљановска-Давкова се повика на европското уставно право и на основните документи на ЕУ.

– Јас не сум само претседателка, туку сум и професорка. Добро го познавам европското уставно право. И она на што деновиве се повикува (претседателката на Бугарија) г-ѓа Јотова, претседателката на Бугарија, кога вели дека ние мора да ги почитуваме принципите и вредностите на Европската Унија, се точно прашањата на кои и јас повикувам. Многу јасно пишува во Договорот за ЕУ, во Лисабонскиот договор, во Повелбата за фундаменталните права, дека ЕУ ќе го почитува националниот и културниот идентитет, не само на членките на ЕУ, туку на сите нации и држави – рече Сиљановска Давкова.

Таа додаде дека европските документи предвидуваат и почитување на уставните и политичките структури на државите.

Сиљановска-Давкова оцени дека токму овие принципи треба да бидат земени предвид и во процесот на евроинтеграција на земјава, особено кога станува збор за прашањата поврзани со националниот и културниот идентитет.

За барањето за уставни измени, претседателката рече дека не може да гарантира дека тие ќе бидат усвоени.

– Што велам јас кога ќе ме запрашаат дали ќе го смените Уставот? Јас не можам таква гаранција да дадам. Пратениците не ме претставуваат мене, ги претставуваат граѓаните и, како во секој европски парламент, гласаат по сопствено уверување – рече Сиљановска-Давкова.

Таа праша што ќе се случи доколку повторно бидат иницирани уставни измени, но пратениците не обезбедат двотретинско мнозинство, како и потребното мнозинство од пратениците од заедниците кои не се мнозинство.

The post СПОРОТ СО БУГАРИЈА НЕ Е САМО БИЛАТЕРАЛЕН Европските документи налагаат почитување на идентитетот на сите држави appeared first on plusinfo.mk.