Министерот за внатрешни работи Панче Тошковски преку објава на социјалните мрежи реагираше на најавата за нова интерпелација против него, оценувајќи дека станува збор за политички координиран напад од страна на опозициските партии СДСМ, ДУИ и Левица.

– Денешниот ден повторно ја разоткри коалицијата СДСМ, ДУИ и Левица, кои синхронизирано и координирано повторно ги насочија сите свои сили кон мене – напиша Тошковски.

Тој тврди дека на пратеничките прашања СДСМ повторно, како што наведе, „со папагалско повторување на зборот оставка“, ДУИ со „традиционални измислени етнички прашања“, а Левица со нова интерпелација, настапиле усогласено.

– Три партии, наводно различни и наводно спротивставени, денес повторно усогласени и координирани за една единствена цел – посочи министерот.

Тошковски додаде дека Левица ја најавила третата интерпелација против него во период од помалку од две години.

– Левица ја најави третата интерпелација против мене за помалку од две години. Како и претходните две и оваа повторно беше најавена преку режирана прес-конференција, повеќе со евтин политички настап отколку со суштински аргументи – наведе тој.

Сепак, министерот порача дека интерпелацијата е демократско право и дека ќе се појави во Собранието.

– Интерпелацијата е демократско право на опозицијата и јас тоа право целосно го почитувам. Ниту сум бегал, ниту ќе бегам од расправа. Напротив, аргументите ќе ги соочам таму каде што треба, во Собранието, јавно, пред сите пратеници и пред граѓаните – истакна Тошковски.

Тој додаде дека одлуката, како што рече, треба да ја донесат избраните претставници на народот.

Министерот во објавата оцени дека Левица станува „најкорисен сојузник на СДСМ и ДУИ“, и покрај тоа што се претставува како нивна алтернатива.

– Левица уште еднаш покажа дека, свесно или несвесно, станува најкорисниот сојузник на СДСМ и ДУИ – рече тој.

Според Тошковски, партијата без конкретни резултати се насочува кон политички конфронтации.

– Вистината е дека Левица го достигна својот политички максимум без зад себе да остави ниту еден конкретен резултат, ниту една реализирана реформа, ниту едно решено прашање – оцени министерот.

Тој порача дека нема да отстапи од работата во Министерството.

– Јас ќе продолжам да работам, ќе продолжам да се борам со аргументи и со резултати. А конечниот суд, како и секогаш, ќе го дадат граѓаните – заклучи Тошковски.

The post „СДСМ, ДУИ И ЛЕВИЦА ВО КООРДИНИРАН НАПАД ПРОТИВ МЕНЕ“ Тошковски најави жестока одбрана во Собранието, не стравува од интерпелација appeared first on plusinfo.mk.

Претседателот на Владата Христијан Мицкоски денеска на собраниската седница за пратенички прашања порача дека реформската агенда се движи во добра насока и дека државата има шанса да се позиционира меѓу „фронтранерите“ во процесот.

Тој нагласи дека до 30 јуни е предвиден „грејс период“ за завршување на дел од обврските и изрази очекување дека резултатите ќе бидат видливи во претстојниот извештај.

– Имаме амбициозна агенда. Нашата цел е да испорачаме реформи дома, да ја завршиме реформската агенда и акцискиот план, и да покажеме дека имаме капацитет да бидеме меѓу водечките земји – рече Мицкоски.

Тој додаде дека Владата сака да се фокусира на внатрешните реформи и да ги стави во втор план, како што рече, барањата поврзани со уставните измени.

Во делот на енергетиката, премиерот најави дека се работи на модел кој би можел да донесе поевтина електрична енергија за граѓаните.

Според него, новите решенија, договорени во консултација со Европската комисија, би можеле да овозможат намалување на цената на струјата од 5 до 10 проценти.

– Иако пазарот е либерализиран, правиме допрецизирања во Законот за енергетика. ЕСМ нема да испорачува повеќе од 70% од потребите на снабдувачот од 1 јануари 2027 година. Целта е да добиеме поевтина и стабилна цена – истакна Мицкоски.

Тој појасни дека потрошувачката на електрична енергија е поделена во периоди од денот и годината, со различни цени во зимска и летна сезона, како и преку ден и ноќе, зависно од производството од обновливи извори.

– Сакаме да направиме модел што ќе биде вин-вин ситуација – и за системот и за граѓаните. Во одредени периоди струјата од соларните капацитети е речиси со нулта или дури негативна цена – рече премиерот.

Мицкоски додаде дека повеќето мерки од реформската агенда се во завршна фаза, а како отворено прашање останува Изборниот законик, кој зависи од политички договор со опозицијата.

The post НЕМА ДА ИМА ПОСКАПУВАЊЕ, ТУКУ ПОЕВТИНУВАЊЕ НА СТРУЈАТА Мицкоски најави пресврт со цената, се подготвува нов модел appeared first on plusinfo.mk.

Со звуците на државната химна, во свечена и достоинствена атмосфера во Собранието, започна настанот посветен на оддавање почит на поранешниот претседател на Републиката, Борис Трајковски, државник чиј лик и дело оставија длабока трага во современата македонска историја.

На свеченоста присуствуваа членови на семејството на Трајковски, негови пријатели и соработници, пратеници и бројни гости, кои заеднички му оддадоа признание на претседателот препознаен по својата човечност, визија и стремеж кон обединето и демократско општество.

Во рамки на настанот беше откриен портретот на претседателот Борис Трајковски, дело на авторката Валбона Атанасовска. Портретот го откри претседателот на Собранието, Африм Гаши, кој истакна дека ова не е само омаж на еден претседател, туку и кон вредностите што ги застапуваше Борис Трајковски – мирот, толеранцијата, дијалогот, човечноста.

Во чест на Борис Трајковски беше отворена и изложбата „Животот и делото на Борис Трајковски низ фотографии“, која преку одбрани архивски фотографии го доловува неговиот животен пат, политичката дејност и трајното наследство што го остави зад себе.

Овој чин претставува симболична, но искрена почит кон вредностите што Борис Трајковски ги живееше и ги застапуваше – меѓусебно разбирање, демократско општество и европска визија.

The post ПОРТРЕТ НА БОРИС ТРАЈКОВСКИ ПРЕТСТАВЕН ВО СОБРАНИЕТО Оживеан споменот за трагично загинатиот претседател appeared first on plusinfo.mk.

Собранието попладнево донесе одлука со која се укинува моделот на техничка влада, познат и како „пржинска влада“, кој досега се применуваше како гаранција за фер изборни процеси.

Со 70 гласа „за“, 11 „против“ и без воздржани, пратениците го поддржаа законот по скратена постапка. Техничката влада ќе остане во сила само до следните парламентарни избори, по што повеќе нема да се применува.

Моделот беше воведен во 2016 година како дел од политичкиот договор за излез од кризата, со учество на дополнителни министри од опозицијата во 100-те дена пред избори.

Од владејачкото мнозинство порачаа дека времето на технички влади завршило и дека државата мора да функционира без ад хок решенија.

– Да престанеме да ја третираме македонската демократија како пациент на апарати. Техничката влада беше решение за криза во 2015, но денес е надмината – изјави координаторот на ВМРО-ДПМНЕ, Никола Мицевски.

Тој додаде дека во пракса моделот покажал слабости и политички злоупотреби, наведувајќи примери од претходни изборни циклуси.

Од опозицијата реагираа дека со укинувањето се урива еден од ретките механизми за контрола на изборниот процес.

Јованка Тренчевска од СДСМ порача дека одлуката е донесена без пошироки консултации.

– Техничката влада е минимална гаранција за фер избори. Наместо реформа, гледаме укинување без дијалог – рече таа.

СДСМ предупреди дека без овој модел се зголемува ризикот од политичко влијание врз институциите во изборен период.

За укинување се изјасни и коалицискиот партнер Вреди. Аднан Азизи оцени дека техничката влада е „остаток од минатото“ и дека државата веќе е во поинаков демократски контекст.

И од ЛДП дојде критика за моделот, но од поинаков агол – наместо техничка влада, тие предлагаат електронско гласање како поефикасно решение.

Седницата беше проследена со паузи и процедурални барања, а дел од опозицијата инсистираше на дополнителни собраниски расправи и консензус меѓу политичките партии.

ДУИ побара законот да се разгледа со Бадентерово мнозинство, но тоа не беше прифатено.

Претседавачот на седницата, Антонијо Милошоски, посочи дека законот претходно бил носен без квалификувано мнозинство и дека се следи постојната пракса.

По усвојувањето на овој закон, следна точка на дневен ред е измена на Законот за минерални суровини.

The post ПРЖИНСКАТА ВЛАДА ОДИ ВО ИСТОРИЈА Со 70 гласа „за“, 11 „против“ и без воздржани, мнозинството гласаше за укинување appeared first on plusinfo.mk.

Петар Ристески, пратеник од ВМРО-ДПМНЕ беше дел од дебатата во емисијата ,,Само вистини“ на телевизија Канал 5, каде се осврна на актуелните случувања периодов околу минималната плата и зголемување на платите, за што истакна дека Владата предводена од ВМРО-ДПМНЕ веќе склучи договор со синдикатите за зголемување на платите до 40% до 2028 година, а и потсети дека ова е историски најголемо зголемување во текот на еден мандат. Со оглед на тоа што ССМ најави блокади пред Собранието, Ристески истакна дека тој утре ќе биде присутен на своето работно место во Собранието.

– Го почитуваме правото на протест  како на сите така и на синдикатите и на работниците. Наша обврска е да се јавиме на работното место и утре секако ќе бидам присутен на моето работно место – вели Ристески.

Тој истакна дека приротитет на ВМРО-ДПМНЕ  како владејачко мнозинство е економски развој, повисоки плати и подобрување на животот на граѓаните.

– Ја прифаќаме пораката, право е на синдикатите да протестираат. Наш приоритет како политичка партија, како Влада, како пратеници од владејачкото мнозинство, е економскиот развој и подобување на животот на граѓаните и секако повисоки плати што и тоа го докажавме на дело, не само на зборови. Тоа беше и наше предизборно ветување и секаде онаму каде што се појавува Владата како работодавец, зголемени се платите, во здравството, во образованието, 10% повеќе во МВР, кај социјалните работници – рече Ристески.

Ристески потсети и на договорот кој Владата веќе  го склучи со УПОЗ и САДУ за зголемување на платите до 40% до 2028 година.

– Ова е историски најголемо зголемување на платите во еден мандат – посочи Ристески.

The post ПРАВО Е НА СИНДИКАТИТЕ ДА ПРОТЕСТИРААТ Владата веќе склучи историски договор за платите, вели Ристески appeared first on plusinfo.mk.

Во Собранието се доставени материјалите за избор на Сузана Јошевска-Анастасовска и Арлинда Кадри-Шахиновиќ за членови на Судскиот совет, како кандидати предложени од претседателката Гордана Сиљановска-Давкова, во рамки на реформите што ги носи новиот Закон за Судскиот совет.

Арлинда Кадри-Шахиновиќ е универзитетска професорка со долгогодишна академска кариера на Факултетот за правни и политички науки при ФОН и МИТ Универзитет, а во јавноста е позната и како поранешен член на Комисијата за помилување. Сузана Јошевска-Анастасовска е адвокатка со повеќегодишна пракса, особено во кривични предмети. Таа ја потврди информацијата за ТВ 24 и порача дека ѝ претставува сериозна одговорност.

Предлозите следат по усвојувањето на новиот Закон за Судскиот совет на 29 декември, кој носи измени за зголемување на транспарентноста и отчетноста, јавност во постапките, прецизирање на критериумите за избор на „истакнат правник“ и зајакнување на дисциплинската одговорност на членовите.

Судскиот совет брои 15 членови од кои осум ги избираат судиите, тројца Собранието, двајца ги предлага претседателот на државата, а двајца се членови по функција – претседателот на Врховниот суд и министерот за правда, без право на глас.

Се очекува предлозите на претседателката да влезат во собраниска процедура од понеделник.

The post ЈОШЕВСКА АНАСТАСОВСКА И КАДРИ ШАХИНОВИЌ ЗА НОВИ ЧЛЕНОВИ НА СУДСКИ СОВЕТ Сиљановска Давкова предлага адвокатка и универзитетска професорка appeared first on plusinfo.mk.

Министерот за правда Игор Филков во Собранието се пофали дека неговото министерство во последните 18 месеци изготвило повеќе од 20 закони и дека уште неколку се при крај. Според него, никогаш досега во историјата на ресорот немало толку интензивно законско производство за толку кратко време.

Филков имаше и директна порака до пратеничката Јована Тренчевска од СДСМ, која го праша зошто реформата во судството стои и кој ќе понесе одговорност за застојот. Тој ѝ возврати дека токму владата во која била и таа ги донела „штетните измени“ на Кривичниот законик, додавајќи дека новиот КЗ ќе биде донесен и дека очекува нејзина поддршка за сите други реформи.

Министерот нагласи дека сите закони биле изработени транспарентно, со јавни дебати и без „дубајски висококатници и халкидикски јахти“. Три од клучните законски решенија, за Судскиот совет, Советот на јавни обвинители и за Јавното обвинителство, веќе добиле позитивни оценки од Венецијанската комисија.

– Во Министерството за правда веќе нема закони за нечии фамилии или поединци. Сè се работи исклучиво во интерес на граѓаните – порача Филков.

Тој се осврна и на Законот за парнична постапка, кој, како што рече, морал да се доработува бидејќи „ако беше добар, ќе го донесевте“. Законското решение повторно е пуштено во владина процедура.

За АКМИС-системот, Филков призна дека постојат неколку дилеми кои треба да се расчистат, но напомена дека системот е воведен за правична и автоматска распределба на предметите. Министерството, како што откри, спровело две контроли во последната година и половина, нешто што, според него, не се случувало со години.

Филков презентираше и бројки за судиите: во последните пет години во пензија заминале 154 судии. Тој ја прозва опозицијата дека токму овие кадри се пензионирани во периодот додека тие биле на власт. Во истиот период во пензија отишле и 53 јавни обвинители.

Одговорот на министерот не ја задоволи пратеничката Тренчевска, која оцени дека наместо одговори добила изговори и предупреди дека земјата има „најлош извештај досега“. Таа побара забрзано носење на законите, потсетувајќи дека 12 важни реформи се уште го чекаат парламентот.

– Ако законите се добри, ќе ги поддржиме. Но мора да ги видиме. Во изминатите една година и седум месеци ништо не направивте – изјави таа од собраниската говорница.

The post 20 ЗАКОНИ ЗА 18 МЕСЕЦИ Филков со бројки удри по СДСМ, Тренчевска со остра реплика appeared first on plusinfo.mk.