Со најголема вознемиреност и гнев реагираме на информацијата за снимање и сликање на студентки во бањите на студентскиот дом „Гоце Делчев“. Ова не е „несреќен случај“ или „непромисленост“, туку акт на сексуално насилство и повреда на основните човекови права, вели Универзитетското студентско собрание при Универзитетот „Св. Кирил и Методиј“ – Скопје (УСС-УКИМ), во реакција за снимањето и сликањето на студентки додека се тушираат во студентскиот дом „Гоце Делчев“ во Скопје.

„Она што најмногу вознемирува не е само делото само по себе, туку фактот што ваквите ситуации повторно покажуваат колку е небезбеден просторот што треба да биде дом за младите, идната интелектуална и академска сила на нашата држава. Зад ваквото однесување стои систем што не ја препознава безбедноста на жените како приоритет, како и културата што често молчи пред понижувањето и траумата што тие ја преживуваат“, се вели во соопштението на УСС-УКИМ.

Бараме итна и темелна истрага, одговорност од сите инволвирани институции и јасен план за заштита на студентките, се додава во соопштението.

„Без одложување треба да се воспостават безбедносни протоколи, психолошка поддршка и механизми за пријава на вакви случаи и задолжителни обуки за родова чувствителност за управите на домовите. Нашите студентски домови мора да бидат катчиња на сигурност, не на страв. Секој кој мисли дека има право да ја наруши приватноста и да го сексуализира телото на една идивидуа треба да знае – ќе одговара“, се вели во соопштението.

Овој случај, се додава, ја разоткрива итната потреба од промена на културата што дозволува насилството врз жените да биде премолчено.

„Академската заедница има морална и институционална обврска да се постави против секоја форма на деградација и злоупотреба на женското тело. Безбедноста на студентките не е административна категорија. Ниту една жена не треба да се срами што некој ѝ ја повредил интимноста. Срамот треба да смени страна“, соопшти ниверзитетското студентско собрание при Универзитетот „Св. Кирил и Методиј“.

The post ОВОЈ СИСТЕМ НЕ ЈА ПРЕПОЗНАВА БЕЗБЕДНОСТА НА ЖЕНИТЕ КАКО ПРИОРИТЕТ Реакција на студентското собрание за снимањето студентки додека се тушираат appeared first on plusinfo.mk.