Ја пишувам својата последна колумна. Првата ја објавив пред една година, но мислам дека го кажав своето. Во време на раѓање на третата светска војна, да не кобам, ова прашање е неважно, но за мене – најважно. Да образложам.

Во теоријата на правото, Уставот не е обичен закон. Тој е алфа и омега на една држава: највисокиот правен акт, штитот на суверенитетот и гаранцијата дека ниедна минлива политичка гарнитура нема да може да го прекрои темелот на државата според сопствените дневни потреби. Токму затоа, неговата измена не е оставена на проста парламентарна математика, туку на квалификувано мнозинство – две третини од пратениците, осумдесет гласа, како симбол и реална потврда на широк национален консензус.

Но, во македонската политичка лабораторија одамна функционира една чудна равенка во која 61 е поголемо од 80.

Рецептот за „Уставна стапица“

Механизмот е едноставен и затоа опасен.

Власт што располага со својот „биолошки минимум“ од 61 пратеник седнува на маса со друга држава и таму потпишува меѓународен договор со кој се обврзува дека ќе го измени сопствениот Устав. Договорот потоа се ратификува со истото тоа тенко мнозинство и, согласно член 118 од Уставот, станува дел од внатрешниот правен поредок.

Кога ќе дојде редот за вистинската уставна измена – онаа за која Уставот бара 80 гласа – квалификуваното мнозинство престанува да биде заштитен механизам и се претвора во формална пречка под политички и меѓународен притисок. Пратениците веќе не се прашуваат дали промената е исправна или штетна; тие се ставаат пред ултиматум:

„Или гласајте, или државата ќе прекрши меѓународен договор.“

Така, индиректно, 61 пратеник ја заложуваат државата на нешто за што директно немаат уставна надлежност. Го „уловиле уставот“ со закон, владина одлука или подзаконски акт. Да не беше трагично ќе беше смешно.

Зошто ова не е „европска практика“

За да не останеме само на домашен терен, а воедно и за да видиме како е кај оние кои инсистираат на уставна промена, вреди да се погледне како ова прашање е решено во сериозни уставни системи.

Во Германија, Основниот закон (Grundgesetz) експлицитно забранува меѓународен договор да наложи уставна измена ако таа измена не може да се изгласа со потребното квалификувано мнозинство. Договорот не смее да се потпише – додека Уставот не се смени по внатрешна процедура. Надворешната обврска не смее да ја заобиколи внатрешната заштита.

Во Шпанија, Уставниот суд има јасна пракса: меѓународен договор што имплицира уставна промена мора прво да помине уставна ревизија, па дури потоа да се ратификува. Обратниот редослед се смета за повреда на уставниот поредок.

Во Франција, пак, ако договорот е во судир со Уставот, тој не може да се ратификува без претходна уставна измена која доаѓа по референдум. Нема „правна шизофренија“ во која договорот станува повисок од Уставот само затоа што е потпишан.

Само кај нас, уставната заштита се третира како бирократска формалност што може да се прегази ако надворешниот притисок е доволно силен.

Султанскиот декрет и современиот апсурд

За да се сфати длабочината на оваа правна бесмислица, мора да се вратиме во април 1903 година. Тогаш османлискиот султан Абдул Хамид II издава декрет со кој строго ја забранува употребата на терминот „Македонија“ – во секој официјален и приватен контекст. Ако мислевте дека први се Грците што ни забранија, еве ви понова информација. А, ако сега мислите дека Грците се првите – не, не се. Први се римјаните, кои подоцна го вратиле името на провинцијата во „Македонија“ (прва и втора) од административна практичност. Но, да се вратиме на „пусто турско“.

Денес, наследниците на Османлиската империја се современите Турци и државата Турција. А Турција, како што е познато, има редовно комплицирани односи со Грција. Сега замислете една хипотетички невозможна, но правно целосно дозволена ситуација: Турција, како наш стратешки партнер, во име на „духот на пријателството“ и како официјално извинување за неправдата од 1903 година, ѝ нуди на Македонија билатерален договор. Бара во тој договор само едно – државата да си го врати уставното име кое султанот го забранил: Македонија. Договорот, како и секој друг, би бил ратификуван со просто мнозинство и, согласно член 118 од Уставот, би станал дел од внатрешниот правен поредок.

Ако логиката што денес ни се сервира е исправна – дека секоја ратификувана меѓународна обврска мора да се исполни без оглед на уставната процедура – тогаш и оваа промена би била „неминовна“. Ако, пак, одговорот е дека таков договор не може да произведе уставно дејство без двотретинско мнозинство, тогаш паѓа тезата дека меѓународниот договор може индиректно да го заобиколи Уставот. Во двата случаи, проблемот не е во примерот, туку во логиката што се обидува да се прогласи за европски стандард.

Смртта на суверенитетот

Кога Уставот ќе го изнесете на пазар и ќе го понудите како гаранција во меѓународни зделки, вие го претворате во обична салфетка на која секој посилен играч може да си ги допише своите желби. Директно пукате во Македонскиот суверенитет. Ако 61 глас можат да ја врзат државата со обврска што бара 80, тогаш улогата на квалификуваното мнозинство е исмеана и девалвирана.

Во таков систем, државата повеќе не се води по волјата на народот, туку по логиката на „потпишаното“. Македонија престанува да биде суверена уставна држава и станува правен полигон во кој меѓународните договори се судираат меѓу себе – врз грбот на домашното право. Математиката во која 61 е поголемо од 80 не е креативност во политиката. Таа е правна глупост која води во капитулација.

Затоа е неопходно јасно и недвосмислено преиспитување и поништување на тој опасен преседан – не од дневната политика, туку од институцијата што единствено има задача да го чува уставниот поредок, дури и кога сите други молчат: Уставниот суд.

Резиме

Се прашувате некогаш зошто народот бега од државата? Да ви одговорам – бега од изигрување. Бега зошто наместо стабилност, менуваме правила во лет. Бега затоа што општеството ни е глуво за интелигенцијата. Зошто чуварите на законите се прекршители, чуварите на уставот го третираат како тоалетна хартија за плата која обичниот човек може да ја сонува.  Ете затоа драги мои читатели народот бега. Во земја во која се купуваат станови за 2000 евра по квадрат, со просечна плата од 700 евра, очигледно проблемот не се парите.

Личната обврска „една година да пишувам колумни во јавно гласило“ – исполнета. Со почит, ваш Методија Анѓелкоски

The post Устав на тоалетна хартија appeared first on plusinfo.mk.

Македонската јавност добро знае дека затвореници, додека биле во затвор, биле учесници во сообраќајни незгоди, биле дел од кривично-правни настани надвор од затворот, а сето тоа ќе биде соодветно процесуирано, одговори министерот Панче Тошковски, прашан за состојбата во затворот „Скопје“.

– Ова што се случува во затворите е срам за Македонија. Факт тоа што беше констатирано во текот на изминатите денови е така како што е. Верувајте ми дека соодветно и навремено ќе реагираме за да го расветлиме и овој кривично-правен настан, бидејќи ова не е управна постапка. Не може затвореник, кој наводно е во затвор, да предизвика сообраќајка или да учествува во кражба – рече Тошковски.

Тој посочи дека МВР е должно да ги истражи сите овие постапки за случувањата во затворите во Македонија.

– Во делот на откривање на криминалот во затворите од вакви размери, за што сведочи и јавноста, ние сме надлежни и ќе постапиме и тоа наскоро – рече министерот.

Во понеделникот, на прес-конференција, в.д. директорот на Управата за извршување санкции Александар Пандов ја информираше јавноста за настаните во затворот „Скопје“. Тој истакна дека затворот бил како „хотел-промаја“, затвореници влегувале и излегувале кога сакале, а сето тоа со усно одобрение на директорот Филип Андов.

„ХОТЕЛ-ПРОМАЈА“ Е ЗАТВОРОТ ВО ШУТКА Пандов најави кривична за Сокол, бидејќи тој усно давал наредби кој кога ќе влегува и излегува

The post ПОВЕЌЕ НЕМА ДА БИДАТ „ХОТЕЛ-ПРОМАЈА“ Она што се случува во затворите е срам за Македонија, ќе има одговорност! appeared first on plusinfo.mk.

Според синдикалците, одредени законски одредби или не се земени предвид, или истите погрешно се протолкувани, а кои треба да доведат до сосема поинаква препорака.

„Согласно Законот за буџетите, буџетот на единките корисници се состои од основен буџет, буџет на донации, буџет на заеми и буџет на самофинансирачки активности. Согласно Законот за сметководството за буџетите и буџетските корисници, признавањето на приходите и другите приливи, расходите и другите одливи содржани во главната книга на буџетите и на буџетските корисници се спроведува според сметководствено начело на парично искажување. Согласно член 18 став 4 од посочениот закон, приходи од член 18 став 1 од Законот за сметководството за буџетите и буџетските корисници се наплатените приходи остварени по видови и извори согласно со Законот за буџетите и Правилникот за класификација на приходите, како и приходите од самофинансирачки активности (сопствени приходи), приходи од кирии и закупнини, приходи од донации, приходи од кредити и позајмици и неданочни приходи“, соопштуваат од СКРМ.

Според нив, од овие законски одредби јасно произлегува дистинкцијата помеѓу доделените буџетски средства и приходите од самофинансирачки активности (сопствени приходи) со кои институцијата слободно може да располага заради остварување на своите активности и генерирање дополнителни приходи дури и по донесување на одлуката за распишување на избори, нешто кое, велат тие, го има вршено и МКЦ преку ангажирањето лица по договори за дело заради функционирањето на Киното Милениум, Планетариумот, Бифето и слично.

„Оттука, сметаме дека забраната за исплата на други исплати важи исклучиво за буџетските средства, а не и за располагањето со средствата обезбедени како сопствен приход“, нагласуваат од Синдикатот.

The post ЖИВОТ И КУЛТУРА ТРЕБА ДА ИМАМЕ И ВО ИЗБОРЕН ПРОЦЕС Синдикатот на култура со реакција за случувањата во МКЦ appeared first on plusinfo.mk.

Вчерашните одлуки на Владата го стопираа штрајкот што за денеска го најави Струковиот синдикат на контролори на летање. Одлуката за затворање на воздушниот простор е во мирување откако беа разрешени претседателот на УО Фахрудин Хамиди и секторскиот извршен директор Љубе Стаменковски и на нивно место Владата да ги именуваше Хекуран Асани и Милан Кораќ.

Основниот кривичен суд Скопје, пак, од денеска треба да одлучува за жалбата на Јавното обвинителство во однос на одлуката да не го прифати барањето за притвор за четворицата осомничени во врска со упадот во М-НАВ.

Во М-НАВ од вчера е присутна и Управата за финансиска полиција која врши контрола и увид во работењето на институцијата врз основа на направениот извештај.

По одлуката на Владата, ССКЛ од каде подолг период ја спорат работата на раководството во М-НАВ и процедурите и селекцијата на конкурсите за вработување, оценија дека смените се придвижување на работите во позитивна насока.

– Ќе ја анализираме целата состојба и случувања и ако има позитивна реализација на препораката од Владата до надзорниот одбор ќе ја повлечеме одлуката за штрајк. Очекуваме соработка со новите директори затоа што станува збор за долгогодишни оперативци – изјави Александар Тасевски, претседател на ССКЛ.

Случувањата ги коментираше и претседателот Стево Пендаровски кој во телевизиско гостување наведе дека биле „брука“. Дента кога се случувала, како што рече физичката пресметка, високи претставници на НАТО прашувале дали е безбедно небото и за авиони на НАТО бидејќи во тој период имало два авиона на НАТО.

– Исклучително е битно да имате гаранција за безбедноста на тие луѓе. Но, добро е што Владата влезе во расчистување – рече шефот на државата, порачувајќи дека М – НАВ е зрела за генерален ремонт.

Пендаровски потсети дека незадоволството на контролорите на летање трае подолго време и оти нивниот синдикат реагирал и пред година – две, кога имаше обиди на данскиот конкурс да се примат неквалификувани кадри.

– Се работи за дел од критичната инфраструктура. На неа се гледа со посебно внимание. Постои посебен закон за таа критична инфраструктура. Ние сме членка на НАТО и не смееше да се дозволи таков скандал. Во просториите на тој дел од критичната инфраструктура, да се пресметуваат физички луѓето како да е кафеана. Мислам дека од тука треба да тргнеме и извршните органи, пред сѐ Владата да влезе во процес на расчистување. Едно е обвинителство, друго е дисциплинска постапка, трето е кадровска политика. Мислам дека таа институција е зрела за генерален ремонт – рече претседателот Пендаровски.

Од Делегацијата на ЕУ, пак, информираа дека со загриженост ги следат случувањата М-НАВ. Наведоа дека императив е именувањата во националниот давател на услуги за воздухопловна навигација и сродните услуги, исто како и за другите институции, да се засноваат на заслуги, квалификација и искуство.

– Потсетуваме на фактот дека Северна Македонија се обврза да го имплементира законодавството на ЕУ што се однесува на давателите на услуги за воздушна навигација (ANSPs). Ова вклучува одредби кои имаат за цел да се обезбеди независност на ANSP од државата, дека персоналот – особено контролорите на летање – ги исполнуваат законските барања за такви работни места и дека обезбедувањето на услугата ги почитува целите во однос на безбедноста, економичноста, капацитетот и животната средина – наведоа од Делегацијата на ЕУ.

Упадот се случи на 4 јануари веднаш по прес-конференцијата на претседателот на ССКЛ на која тој информираше дека контролори на летање и нивни помошници во М-НАВ се очекува да почнат да поднесат оставки од раководните позиции, како поддршка на синдикалните активности и реакции за последниот оглас за вработувања во оваа институција. Претходно оставки поднесоа инженери од раководни инструкторски места поради селекцијата на кандидати на огласот. Раководството на М-НАВ тогаш ги отфрли обвинувањата и информираше дека се вработени двајца инженери и еден техничар, а поради неуреден статус во Агенцијата за вработување иако биле задоволени критериумте на М-НАВ не се вработени уште тројца инженери и еден техничар. Тасевски на прес-конференцијата информираше и дека телефонски бил повикан во Секторот за насилен криминал при Министерството за внатрешни работи и му била презентирна пријава од директорите во М-НАВ, Фахрудин Хамиди и Хасим Деари. Пријавата била врз база на доставена електронска порака поради „наводно чувствување загрозеност на нивната животна сигурност“ по член 144 став два од Кривичниот законик, а Тасевски ги отфрли наводите оценувајќи ги како како притисок и заплашување.

Еден ден по упадот во институцијата претседателот на Управниот одбор и извршен директор во М-НАВ, Фахрудин Хамиди, на прес-конференција рече дека се работи за „немил настан“ и „конфликт и кошкање помеѓу двајца колеги“.

– Поради фактот дека веќе органите што се повисоко од нас се занимаваат со таа работа, има камери, значи има многу работи што се внатре, нека си тече истрагата. Во интерес на истрагата не сакам да навлегувам понатака. Имаме закажан Комитет за безбдност во нашата компанија – рече Хамиди, истакнувајќи дека апсолутно гарантира за безбедноста на македонското небо во време на конфликтот.

За инцидентот истиот ден се огласи и Агенцијата за цивилно воздухопловство, оценувајќи дека „не постои никакво нарушување или загрозување на безбедноста на воздушниот сообраќај, а исто така не постои никаков пријавен настан, инцидент или сериозен инцидент во врска со одвивањето на безбедноста на воздушниот сообраќај“.

Инспекторите од АЦВ во рамки на своите овластувања, како што информираше директорот Томислав Тунтев, извршиле вонреден инспекциски надзор и од областа на безбедноста и од областа на обезбедувањето на воздушниот сообраќај. Целта на ваквиот надзор е да се дојде до неопходни сознанија за евентуални недостатоци во системите за безбедност и обезбедување, кои би можеле да имаат евентуални последици врз сообраќајот и таквите последици да се отстранат. По завршување на надзорот ќе бидат преземени сите неопходни корективни мерки и утврдена евентуална конкретна одговорност, најави АЦВ.

По инцидентот во М-НАВ, Министерството за внатрешни работи распореди службени лица за заштита на безбедноста на објектот, но и на вработените бидејќи, како што алармираше Синдикатот станува збор за стратешки државен објект, но и поради фактот дека контролорите на летање нема да продолжат да работат под оправдан страв дека во секој момент некој од надвор би можел да влезе и да ги загрози нивните животи, а со самото тоа и животите на патниците во авионите кои ги опслужуваат.

На 21. минатиот месец ССКЛ го откажа штрајкот што го најави за почетокот на годинава поради оспорувањето на дел од позициите со огласот за вработувања и најави дека ќе ја следат реализацијата на конкурсите, постапките за селекција и евентуалните неправилности и ќе реагираат.

The post „ДРАМА ВО СКОПЈЕ, ИТНО РЕАГИРАШЕ И НАТО“ Упадот во М-НАВ беше пренесен и во медиумите од регионот appeared first on plusinfo.mk.

„Обвинителството ги има и ги приложи сите докази дека постои реална опасност четворицата осомничени кои се лишени од слобода да се дадат во бегство, да влијаат врз сведоци (вклучувајќи ги и оштетените, но и осомничените кои се уште се недостапни), како и да го повторат делото. Во однос на обележјата на кривичното дело – Загрозување на безбедноста на воздушниот сообраќај од член 303 од КЗ опишано во ставот 2 oд тој член, тие се исполнети со самата можност да се загрози безбедноста на аеродром за меѓународeн воздушен сообраќај со акт на насилство и не е неопходно да настапила катастрофална штетна последица во смисла на тешка повреда, смрт или уништување“, информираат од Јавното обвинителство.

Од Основен кривичен суд Скопје по реакциите кои произлегоа од неправосилните одлуки на Судот за случувањата во М-НАВ, денеска излезе со соопштение дека Судот постапува пред се врз основа на приложената документација/докази доставени од ОЈО и МВР и врз основа на слободно судиско убедување.

„Имено, неспорно е дека настан од кривично правен аспект постоел, па затоа со цел да се овозможи непречено водење на кривичната постапка односно истрага од страна на надлежен обвинител, судот смета дека е неопходно да се обезбеди присуство на осомничените лица. Но, потребно е да се знае дека во наредбата за истрага за конкретниот настан опфатени се 8 лица, а до овој момент доставен е предлог за определување мерки за обезбедување присуство, како и докази за нивна инволвираност, само за четворица“, се вели во реакцијата од Кривичен.

НЕМА ДОВОЛНО ДОКАЗИ ЗА ПРИТВОР Од Кривичен суд ја објаснуваат одлуката за случајот М-НАВ

The post ОСОМНИЧЕНИТЕ ЗА СЛУЧУВАЊАТА ВО М-НАВ МОЖЕ ДА СЕ ДАДАТ ВО БЕГСТВО Обвинителство ја објави жалбата за одлуката на Кривичен суд appeared first on plusinfo.mk.

„Полициски службеници на Управата за криминалистичка полиција извршија претрес во станот и другите простории на Милан Радоичиќ, кој е задржан до 48 часа“, соопшти Министерството за внатрешни работи на Србија.

Радоичиќ со кривична пријава е донесен во Вишото јавно обвинителство во Белград.

Тој јавно призна дека учествувал во организација на група која учествувала во вооружен конфликт со косовската полиција во Бањско на северот на Косово, при што загинале еден припадник на косовската полиција и тројца Срби, а неколку лица беа ранети.

Радоичиќ во петокот беше во Министерството за внатрешни работи каде да се изјаснил како граѓанин.

The post СРПСКАТА ПОЛИЦИЈА ГО ПРИВЕДЕ РАДОИЧИЌ Лидерот на Српска листа и организаторот на случувањата во Бањско задржан 48 часа во станица appeared first on plusinfo.mk.

„Многу сме вознемирени од ситуацијата на северот на Косово: Апсења на Срби, маршот на Косовските безбедносни сили во јужна Митровица, проследен со тешка реторика од Србија“, напиша Борел на својот Твитер налог.

Борел по одвоените средби со српскиот претседател Александар Вучиќ и косовскиот премеир Албин Курти вчера во Брисел изјави дека произволните и незаконски апсења се неприфатливи и истакна дека ЕУЛЕКС ќе почне посилно да ја следи ситуацијата.

Тој повика на темелна истрага и проценка на апсењатат, како и да се преземат соодветни дејствија потоа.

„Му повторив и на Вучиќ дека тројцата косовски полицајци кои беа уапсени во Србија мора веднаш и безусловно да бидат ослободени“, рече Борел.

The post ЕСКАЛАЦИЈАТА ПРОДОЛЖУВА И СТАНУВА ОПАСНА Борел порача дека нема да ги толерираат случувањата на Косово appeared first on plusinfo.mk.

– Вучиќ да не заборави дека Албанците имаат јазик, историја и знаме што ќе го бранат до крај. Бараме КФОР и ЕУЛЕКС да дејствуваат во зачувување на суверенитетот, слободното движење во соработка со војската и полицијата на Косово – изјави Шпетим Положани, претседател на Здружението на поранешни политички затвореници.

Тој додаде дека Вучиќ ги користи косовските Срби како алатка за да остане на власт што е можно подолго.

– Дури и оваа грда копија на Путин оди по неговите стапки, тој ги користи и косовските Срби како алатка за да остане на власт во време кога српската опозиција е се погласна и посилна од ден на ден – рече Положани.

The post ВУЧИЌ Е ГРДА КОПИЈА НА ПУТИН Албанци протестираа пред српската амбасада во Скопје appeared first on plusinfo.mk.

Министерката за Европа и надворешни работи Олта Џачка, синоќа  преку објава на Твитер изрази загриженост за случувањата на северот на Косово, притоа истакнувајќи дека „напуштањето на институциите на Косово е чин на ескалација, во време кога е потребна соработка и конструктивен дијалог”.

„Загрижени од случувањата на северот на Косово. Повлекувањето од косовските институции е чин на ескалација, во време кога е потребна соработка и конструктивен дијалог. Ова не е моментот за откажување и бојкот. Ова е момент кога дијалогот е потребен повеќе од кога било”, напиша Џачка на Твитер.

Вчера телефонски разговор остварил претседателот Бајрам Бегај со неговата косовска колешка Вјоса Османи.

„И ја изразив мојата загриженост и истовремено го охрабрив продолжувањето на дијалогот меѓу страните, имајќи го предвид зачувувањето на мирот и стабилноста, како и територијалниот интегритет на Косово гарантиран од НАТО“, напиша Бегај.

Тој нагласува дека „останува голем интересот за евроатлантските интеграции на Косово и на целиот регион на Западен Балкан”.

The post СЕГА Е ПОТРЕБЕН ДИЈАЛОГ, А НЕ ЕСКАЛАЦИЈА Тирана е загрижена од случувањата во Косово appeared first on plusinfo.mk.

Двајца јавни обвинители од Јавното обвинителство на Република Северна Македонија, постапувајќи по претставка од Управата за финансиска полиција, во согласност со членот 28 од Законот на јавното обвинителство, извршиле надзор и увид во предмет оформен во Основното јавно обвинителство за гонење на организиран криминал и корупција.

Јавните обвинители изготвиле службена белешка за увидот во постапувањето во предметот и ја доставиле до Јавниот обвинител на Република Северна Македонија.

– При вршењето на надзорот, јавните обвинители од Основното јавно обвинителство за гонење на организиран криминал и корупција кои постапувале во предметот беа задолжени да изготват информација за наводите во претставката. Меѓутоа, само еден од јавните обвинители постапи по задолжението и ја достави бараната информација. Одбивањето да се даде бараната информација за да се утврдат фактите за постапувањето по конкретниот предмет, го поткрепува сомнежот за недоследности во постапувањето – се вели во соопштението денеска од Jавно обвинителство на Република Северна Македонија.

Со надзорот во предметот е утврдено дека Основното јавно обвинителство за гонење на организиран криминал и корупција примило анонимна кривична пријава на 3.5.2022 година, а на 18.7.2022 година изготвено е барање за издавање наредба за претрес. Барањето истиот ден е доставено до Основниот кривичен суд Скопје.

Во согласност со утврдената состојба, Јавниот обвинител на Република Северна Македонија дал укажување до Основното јавно обвинителство за гонење на организиран криминал и корупција во кое се наведуваат констатираните неправилности во постапувањето во конкретниот предмет.

– При заведувањето на оформениот предмет нарушена е хоризонталната надлежност и организацијата на Јавното обвинителство. Кривичната пријава се однесува на лица од Управата за финансиска полиција, кои согласно чл.33 ст.2 од Законот за јавното обвинителство имаат полициски овластувања, а по таквите пријави надлежно е да постапува Специјализираното одделение за гонење на кривични дела извршени од лица со полициски овластувања и припадници на затворската полиција. Според тоа, тројцата јавни обвинители од Основното јавно обвинителство за гонење на организиран криминал и корупција кои постапувале по овој предмет, а не се дел од Специјализираното одделение, ненадлежно постапувале по кривичната пријава. Јавниот обвинител на Република Северна Македонија укажува дека предметот треба да се заведе во соодветен уписник и согласно распоредот да се додели на јавен обвинител кој е распореден во Специјализираното одделение – се појаснува во соопштението.​

Исто така, се подвлекува во соопштението, укажано е дека во образложението на барањето на Судот погрешно му се даваат податоци дека Јавното обвинителство има основи на сомнение дека е сторено кривично дело, а во списите од предметот има само анонимна кривична пријава.

– Анонимната кривична пријава и конкретните наводи во неа, непоткрепени со ниту еден доказ или со други средства, можат да бидат повод за поведување кривична постапка, но таа не обезбедува определен степен на веројатност дека ќе се пронајдат траги на кривичното дело или предмети важни за кривичната постапка за да има основи за барање на претрес на простории на државен орган и претрес на лице – стои во денешното соопштение од Jавно обвинителство на Република Северна Македонија.

Покрај тоа, во образложението на барањето за издавање на наредба за претрес се наведува дека во предметот се води предистражна постапка, а при увидот е констатирано дека во списите постои само барање за претрес и писмо, кои се први дејствија преземени во постапката по анонимната кривична пријава.

Исто така, укажано е дека од содржината и наводите во кривичната пријава не произлегуваат дејствија за кривично дело – Примање награда за противзаконито влијание по чл.359 ст.7 вв со ст.3 вв со ст.2 од Кривичниот законик.

При постапувањето по пријавата, за исти дејствија доставено е и писмено барање до Управата за финансиска полиција за да ги достави истите списи, кои исто така се бараат да се обезбедат со претресот.

Во согласност со чл.27 ст.4 од Законот за јавното обвинителство, со укажувањето, задолжен е јавниот обвинител на Основното јавно обвинителство за гонење на организиран криминал и корупција Скопје, целосно да го испита постапувањето по овој предмет, да ја утврди фактичката состојба и сите релевантни околности, пропустите во постапувањето и фактите за евентуална одговорност и за тоа да достави информација до Јавното обвинителство на Република Северна Македонија.

Укажувањето е во согласност со чл.7 ст.3 од Законот за јавното обвинителство и има за цел да се отстранат сите неправилности по предметот и во иднина да не се дозволат пропусти во постапувањето.​

The post НИЗА ПРОПУСТИ ПРИ ПРЕТРЕСОТ КАЈ МУАРЕМИ Информација од ОЈО за случувањата во Финансиската полиција appeared first on plusinfo.mk.