Индија и Европската Унија направија голем чекор кон продлабочување на економските односи, откако постигнаа договор за слободна трговија, кој индискиот премиер Нарендра Моди го оцени како најзначаен досега.

Говорејќи на Неделата на енергијата во Индија, Моди договорот го опиша како „мајка на сите договори“, нагласувајќи дека тој ќе донесе сериозни придобивки за индиската економија и ќе отвори нови можности за клучните индустриски сектори.

Според него, овој договор се надоврзува на веќе постигнатите трговски аранжмани на Индија со Велика Британија и Европската асоцијација за слободна трговија, но има многу пошироко значење и поголем економски опфат.

Како што пренесува „Си-Ен-Би-Си“ (CNBC), договорот ќе создаде заеднички пазар од околу две милијарди луѓе – во период кога глобалната трговија е под силен притисок поради растечките геополитички тензии и економски неизвесности.

Се очекува индискиот премиер Нарендра Моди и претседателката на Европската комисија, Урсула фон дер Лајен, подоцна денеска на самитот Индија–ЕУ во Њу Делхи да дадат заедничка изјава, во која ќе ги откријат деталите од договорот што се подготвува речиси две децении.

The post „ОВА Е МАЈКА НА СИТЕ ДОГОВОРИ“ Индија и ЕУ создаваат пазар од две милијарди луѓе appeared first on plusinfo.mk.

Мал број привилегирани земји не треба да жнеат предности само врз основа на сопствените интереси, а светот не може да се врати на законот на џунглата каде што силните ги експлоатираат слабите, рече кинескиот вицепремиер Хе Лифенг на Светскиот економски форум во Давос, Швајцарија во контекст на меѓународните и трговските тензии.

Тој повика на одбрана и реформа на мултилатералните институции, како и на одбрана на слободната трговија, во време кога „меѓународниот трговски систем се соочува со најсериозните предизвици во последните многу години“.

-Едностраните дејствија и трговските договори на некои земји јасно ги кршат основните принципи и правила на Светската трговска организација (СТО), што има сериозно влијание врз глобалниот економски и трговски поредок – рече тој.

Како пример за решавање на спорови преку дијалог, Хе Лифенг го наведе привременото примирје што претседателите Доналд Трамп и Си Џинпинг го постигнаа во октомври во врска со трговската војна меѓу неговата земја и САД минатата година.

И покрај загриженоста за трговските практики на Кина, тој рече дека „Кина е трговски партнер за други земји, а не соперник“ и ќе продолжи да ги отвора „своите врати уште пошироко“ за странски економски активности.

The post НЕ СМЕЕМЕ ДА СЕ ВРАТИМЕ НА ЗАКОНОТ НА ЏУНГЛАТА Кина во Давос се заложи за слободна трговија appeared first on plusinfo.mk.

Постои сериозен интерес од страна на Обединетите Арапски Емирати за инвестирање во Македонија, како и за подготовка и склучување на два значајни договора во областа на економската и трговската соработка, соопшти синоќа министерот за надворешни работи и надворешна трговија Тимчо Муцунски во интревју за 360 степени на МТВ1.

– Нашата цел е со Обединетите Арапски Емирати да изградиме специфично и посебно партнерство, бидејќи станува збор за држава која има реализирано успешни капитални проекти и со која, од стратешка гледна точка, делиме многу исти ставови – истакна министерот Муцунски.

Тој информираше дека во моментов постои активен институционален дијалог меѓу двете страни.

– Со ОАЕ веќе водиме активен дијалог помеѓу нашето министерство и нивното министерство за два договора – договор за стратешко партнерство, кој ќе ги олесни меѓусебните инвестиции, и договор за слободна трговија – нагласи Муцунски.

Говорејќи за конкретните можности, министерот посочи дека интересот од страна на Обединетите Арапски Емирати е јасен и конкретен.

– Интересот е конкретен, а финансирањето може да се обезбеди од нивна страна. Портфолиото на интерес е широко. Товарот за реализација на овие проекти лежи кај нашето министерство и ние, како институција, заедно со претседателот на Владата и со другите надлежни институции, работиме максимално внимателно и одговорно на овој договорен аранжман со Обединетите Арапски Емирати – рече министерот.

Муцунски нагласи дека Владата има јасна амбиција за подобрување на животниот стандард на граѓаните, преку привлекување странски инвестиции и поддршка на домашните компании.

– Владата има конкретни резултати во привлекувањето странски инвестиции и во промоцијата на нашите компании во странство, и ќе продолжи максимално фокусирано да работи на овие проекти – истакна тој.

Во однос на динамиката на инвестиционите одлуки, министерот посочи дека станува збор за сложен процес кој бара внимателен и одговорен пристап.

Како потврда за сериозноста на разговорите и насоката на соработката, Муцунски го издвои своето неодамнешно присуство во Обединетите Арапски Емирати и учеството на форум од затворен формат „Сир бани Јас“, нагласувајќи дека бил првиот министер за надворешни работи од нашата земја поканет да учествува на овој форум.

The post АРАПСКИТЕ ЕМИРАТИ СЕ ЗАИНТЕРЕСИРАНИ ДА ИНВЕСТИРААТ ВО МАКЕДОНИЈА Ќе се склучат договори за стратешко партнерство и за слободна трговија appeared first on plusinfo.mk.

Церемонијата на потпишување на Договорот за слободна трговија меѓу ЕУ и земјите од Меркосур, што требаше да се одржи утре во Бразил во присуство на претседателката на Европската комисија, Урсула фон дер Лајен, е одложена за јануари следната година.

Извори во Еврокомисијата информира дека ваквата одлука Фон дер Лајен синоќа лично им ја пренела на европските лидери присутни на Самитот во Брисел, посочувајќи дека таа е донесена во договор со бразилскиот претседател Луиз Инасио Лула да Силва, кој е актуелен претседавач со Меркосур.

Одлагањето е на барање на италијанската премиерка Џорџа Мелони, која инсистирала да добие дополнително време „за да успее да ги увери“ земјоделците во Италија дека нема да бидат погодени од приливот на евтино живинско и говедско месо од Јужна Америка.

Европските земјоделци стравуваат дека врз основа на Договорот, во ЕУ ќе може слободно да се увезуваат земјоделски производи, вклучително и живинско и говедско месо, од земјите од Меркосур – Аргентина, Бразил, Парагвај и Уругвај, по значително пониски цени од оние на производителите во Унијата.

Со цел да ги отстрани ваквите стравувања на европските земјоделци, ЕУ уште во средата вечерта изврши измени на Договорот, со кои се предвидува можност за повторно воведување на царини за живината и говедското месо од Латинска Америка, доколку нивниот увоз ги дестабилизира европските пазари.

Од друга страна, земјите членки на ЕУ што го поддржуваат договорот со Меркосур, на чело со Германија, бараат гаранции дека документот сепак ќе биде потпишан во јануари и дека нема да има понатамошни одлагања.

Тие стравуваат дека дополнителни одлагања би можеле да ги охрабрат противниците на Договорот во ЕУ во нивните обиди за блокирање на документот, како и дека целиот процес би можел да се искомплицира откако претседавањето со Меркосур на крајот од годинава ќе го преземе претседателот на Парагвај, Сантијаго Пења, кој е скептичен кон договорот.

The post МЕЛОНИ ГО СТОПИРА ПОТПИШУВАЊЕТО ДОГОВОР ЗА СЛОБОДНА ТРГОВИЈА ЕУ – ЈУЖНА АМЕРИКА Фон дер Лајен го презакажа за јануари appeared first on plusinfo.mk.

Бразилскиот претседател Луиз Инасио Лула да Силва жилаво го постави најострото барање досега за трговскиот договор меѓу Европската Унија и Меркосур.

Лула оцени дека ако европските лидери не ја одобрат спогодбата оваа недела, Бразил ќе се повлече од целиот договор и нема да продолжи со договори за време на неговиот мандат.

Преговорите за трговскиот договор меѓу ЕУ и Меркосур се протегаат од 1999 година и опфаќаат четири јужноамерикански земји: Бразил, Аргентина, Уругвај и Парагвај.

Европската Комисија очекуваше лидерите на ЕУ да ја финализираат и потврдат спогодбата на претстојниот самит оваа недела.

Нееднаквите ставови меѓу земјите членки на ЕУ, особено од Франција, отежнуваат конечната согласност. Франција инсистира на дополнителни подобрувања во условите на договорот пред да ја даде поддршката.

Лула јасно истакна дека очекува конечна одлука пред официјалното потпишување закажано за сабота во Бразил и предупреди дека нема да го поддржи договорот ако таа одлука се одложи.

– Веќе ги предупредив дека ако не го направиме тоа сега, Бразил нема да склучува нови договори додека јас сум претседател – рече Лула.

The post ЛУЛА СО УЛТИМАТУМ ДО ЕУ Сега или никогаш за договорот со Меркосур appeared first on plusinfo.mk.

Министерката деновиве учествува на 10. Делфи економски форум во Грција, каде што една од главните економски теми се царините од САД и новата одлука на американскиот претседател Доналд Трамп.

– Ние сме многу мали во однос на се ова што се случува и нашите одлуки не може да имаат директно влијание но ова можеби можеме да го искористиме како шанса за македонската економија, пред сè, од аспект на тоа дека Владата има добра комуникација со Вашингтон што е многу значајно иако ние во моментот имаме под еден процент од вкупната надворешна размена или трговија со САД секако тоа може да биде предност да искористиме во периодот што следи -вели Димитриеска Кочоска.

Паралелно, објаснува таа, најголемиот дел од трговската размена на земјава е со Европа и оти „повеќе би требало да се насочиме кон тоа како Европа ќе се однесува“.

Во однос на Европа, посочува дека она што е испратено како порака од форумот е дека треба малку повеќе да се промени во насока на тоа повеќе да разменува и да тргува меѓу себе, да се посвети малку повеќе внимание во насока на регулативите, побрза администрација, поекспедитивно работење итн.

За учеството на форумот вели дека како првични заклучоци кои ги констатирала се дека „пред сè, глобализацијата го има постигнато својот максимум и оти повеќе светот нема да биде ист како што го знаеме во однос на глобализацијата“.

– Она што е испратено како порака од форумот е дека треба малку повеќе да се промени во насока на тоа повеќе да разменува и да тргува меѓу себе да се посвети малку повеќе внимание во насока на регулативите, побрза администрација, поекспедитивно работење итн. Денес имаше и разговори во насока на тоа дека иако се дадоа 90 дена дури за некои држави тоа може да е и мал период имајќи ја предвид бавноста на администрацијата и бавната реакција и она што е клучно за Европа е Европа повеќе да се сврти кон иновации, вештачка интелигенција, да почне да функционира пазарот на капитал, посочи министерката.

Коментира дека „непредвидливост“ е зборот што во Делфи е најзастапен за карактеризирање на целата ситуација, но потенцира дека царините од САД што, се однесува на нашата земја, не мора да предизвикуваат паника, ниту да се толкуваат негативно.

The post МАКЕДОНИЈА ТРЕБА ДА ЈА ИСКОРИСТИ КРИЗАТА СО ЦАРИНИТЕ Димитриеска-Кочоска се залага за договор за слободна трговија со САД appeared first on plusinfo.mk.

„Веќе подолго време знаеме дека светот е во турбуленции. Бледнеат познатите обележја. Но сѐ уште не се гледаат контурите на новиот глобален систем.

Така, се наоѓаме во период на транзиција – неизвесна, несредена и растечки нестабилна. Неодамнешната објава за царините на “Денот на ослободувањето’ од страна на САД ја потврдува оваа сурова реалност: ерата на глобализација и слободна трговија заснована врз правила е веќе минато.

Ова означува значителна пресвртна точка. Влегуваме во нова фаза на глобалните прашања – фаза што е повеќе арбитрарна, протекционистичка и опасна.

Близу 80 години по Втората светска војна Америка беше сидрото за пазарните економии во светот. Таа ги величеше слободната трговија и отворените пазари и ги предводеше напорите за воспоставување мултилатерален трговски систем.

Системот на Светската трговска организација (СТО) придонесе за повеќедецениски глобален раст и стабилност. Тој овозможи трговијата да цвета и избави милиони луѓе од сиромаштија. Тој му користеше на светот – но придонесе и за економската моќ на САД.

Но, не сите Американци го делат ова чувство за нивната економија. Постојат пропаднати градови онаму каде што некогаш пулсираше американскиот индустриски појас. Има работници чиишто работни места исчезнаа и чиишто доходи стагнираа. Тие веруваат дека американската економија е во основа пропадната.

Фрустрациите се продлабочија по глобалната финансиска криза од 2008 година и по пандемијата со ковид во поново време.

Да сме начисто: на глобалниот економски систем му е неопходна реформа. Но ова што сега го прават САД не е реформа. Тоа е отфрлање на самиот систем што тие го креираа.

Според администрацијата на САД, енормните царини се неопходни за да се решат трговските дисбаланси. Но нема нешто што е инхрентно погрешно во остварувањето трговски дефицит. Тоа едноставно значи дека американските потрошувачи купуваат повеќе од остатокот од светот, одошто светот купува од Америка.

Уште повеќе што фокусот се става единствено на стоковата размена. Ова е само дел од целосната слика. Всушност, САД бележат суфицит со повеќе свои трговски партнери во областа на услугите – извезувајќи софтверски услуги, образование, забава, финансиски и деловни услуги. Но овој факт целосно се игнорира.

Овие мерки ќе ја забрзаат фрагментацијата на глобалната економија. Наместо да се движат врз основа на економската ефикасност, капиталот и трговијата сѐ повеќе ќе се насочуваат според политичката поврзаност и стратегиските интереси.

Нашата длабока загриженост не е директниот удар со кој се соочуваат некои бизниси. Тоа се пошироките импликации врз глобалниот трговски систем и светската економија.

Прво, „реципрочните царини“ претставуваат фундаментално отфрлање на правилата на СТО. Доколку и други земји го применат истиот пристап како САД, трговскиот систем заснован врз правила ќе пропадне. Ова ќе предизвика проблеми за сите земји. Но помалите земји ќе се соочат со поголеми притисоци. Затоа што малите земји имаат ограничена преговарачка моќ во билатералните преговори еден-на-еден. Големите сили ќе ги диктираат условите, а ние ризикуваме да бидеме маргинализирани и ставени на страна.

Второ, расте веројатноста за целосна глобална трговска војна.

Некои сметаат дека новите царини се преговарачка тактика – преговарачко орудие за САД да извлечат отстапки во други области. Навистина, постои извесен простор за земјите да преговараат и да добијат некои поволности од САД пред ефектуирањето на новите царински стапки.

Но, мора да бидеме реалисти. Штом еднаш се зголемат трговските бариери, тие имаат тенденција да останат на високо ниво. Нивното враќање назад е многу потешко, дури и откако првичните причини за нивно воведување се надминати.

Ова посебно се однесува на универзалната царинска стапка од 10% која изгледа не е предмет на преговори. Таа по сѐ изгледа е минимална фиксна царина, без разлика на трговскиот биланс на земјата или постојните трговски аранжмани.

Трето, кој е ефектот врз глобалната економија? Довербата кај бизнисот и кај потрошувачите е намалена како резултат на воведените царини. Ќе страдаат меѓународната трговија и инвестициите. Дури и оние бизниси кои не се директно погодени од царините се загрижени поради намалената побарувачка од страна на нивните купувачи. Некои веќе ги замрзнаа новите проекти додека ги проценуваат целосните импликации од царините.

Изминатите денови бевме сведоци на остри негативни реакции на светските берзи. Прерано е да се каже дали сето ова ќе се прелие врз реалната економија. Но ризиците за надолен тренд јасно растат.

Бизнисите не се сигурни што би можеле да очекуваат. Сето ова создава окружување на длабока неизвесност кое би можело да ги втурне САД и глобалната економија во рецесија. Во меѓувреме, глобалните институции стануваат сѐ послаби, а се рушат постојните норми за соработка.

Мора да сме ментално подготвени. Предвидливиот и на правила заснован поредок што го знаевме го снемува. Новата ера ќе биде понестабилна, со почести и понепредвидливи шокови. Мора да сме подготвени да стоиме цврсто и да ги штитиме нашите интереси, без разлика какви надворешни ветришта може да дуваат.

Што значи ова за нашата земја?

На краток рок очекуваме послаб економски раст, што значи дека екстерната побарувачка за нашите услуги ќе опадне. Ќе бидат погодени нашите извозни сектори. На удар, исто така, ќе бидат трговијата на големо и транспортот. Глобалната неизвесност и зголемениот песимизам ќе погодат и некои сервисни сектори.

Оваа година може, но и не мора да влеземе во рецесија. Но не се сомневам дека нашиот раст ќе биде значително погоден. Побавниот раст ќе значи намалени можности за вработување и пониски покачувања на платите за работниците. Не е исклучена и загуба на работни места.

Мерките предвидени во овогодишниот Буџет ќе обезбедат поддршка за краткорочни потешкотии од каков било вид. Постојат таргетирани мерки за поддршка на поранливите групи од населението. Активните мерки на пазарот на труд ќе обезбедат поддршка за лицата кои евентуално би останале без работа за да може повторно да застанат на нозе.

Буџетот предвидува мерки за поддршка на бизнисите – како краткорочни мерки за поддршка преку намален данок на добивка и програми за зголемување на нивната продуктивност и конкурентност, и насочување кон нови пазари. Институциите се ангажирани со претпријатијата засегнати од царините за подобро да го разберат нивниот одговор и да увидат како можат да ги поддржат.

Владата ќе продолжи одблизу да го мониторира развојот на настаните. Подготвени сме да направиме повеќе доколку е потребно. Располагаме со ресурси за ова поради финансиската дисциплина и цврстината што ја практикувавме во текот на изминатите декади.

Ќе негуваме поблиски односи со партнери кои делат исти вредности и нашата посветеност за отворена и слободна трговија.

САД можеби одлучиле да станат протекционисти, но остатокот од светот не мора да ја следи истата патека. Ќе идентификуваме други партнери да ни се придружат во ова, за да обезбедиме отпорност и да ги одржиме критичните делови од мултилатералниот систем, додека ги поставуваме основите за можен нов и различен глобален систем што ќе биде можен подоцна

Влегуваме во променет свет. Единствен начин за Сингапур да ја преброди надоаѓачката бура е да останеме обединети – да ги здружиме нашите ресурси, нашата отпорност и нашата решителност.

Владата ќе стори сѐ Сингапур да плови низ немирните води, при што никој не смее да биде заборавен.

Над сѐ останато ќе ги ставиме интересите на Сингапур и на Сингапурците во центарот на сѐ што правиме. Патот пред нас ќе биде потежок. Опасностите се реални. Но исто таква е и нашата посветеност. На повеќе полиња се наоѓаме во подобра ситуација од пред шеесет години кога станавме независни“.

(Обраќање на премиерот на Сингапур Lawrence Wong пред парламентот на Сингапур за американските царини и импликациите од нив, 8 април 2025 година. Текстот е адаптиран од Трајко Славески).

The post Рецесијата можеби тропа на врата, што да се прави? appeared first on plusinfo.mk.

Американскиот мултимилијардер Илон Маск, член на администрацијата на американскиот претседател Доналд Трамп, денеска изрази надеж дека меѓу Европа и Северна Америка ќе се формира зона за слободна трговија, преку која бизнисот ќе се води без царини.

Маск ова го изјави говорејќи преку видео врска во Фиренца на Конгресот на италијанската партија Лига.

– Европа и САД би требало идеално да еволуираат, според мое мислење, кон ситуација со нула царини, со што ќе се создаде зона на слободна трговија меѓу Европа и Северна Америка – рече Маск, додавајќи дека САД и Европа би можеле да воспостават многу блиско партнерство.

Маск зборуваше на состанокот на партијата предводена од Матео Салвини, кој е еден од неговите поддржувачи.

Изјавата на американскиот мултимилијардер доаѓа три дена откако Трамп воведе царини од 20 отсто за стоките што пристигнуваат во САД од Европската унија.

The post БИЗНИСОТ ДА СЕ ВОДИ БЕЗ ЦАРИНИ Маск се надева дека во иднина ќе има слободна трговија меѓу САД и Европа appeared first on plusinfo.mk.

Американскиот претседател Доналд Трамп вчера најави 10% царини на целиот увоз во САД, плус повисоки царини за некои од најголемите трговски партнери на земјата. Оваа најава претставува интензивирање на трговската војна што започна по враќањето на Трамп во Белата куќа, оценуваат експертите.

Неговите советници велат дека царините ќе ги вратат стратешки важните производни капацитети во САД. Други економисти, пак, предупредуваат дека царините би можеле да го забават светското стопанство, да го зголемат ризикот од рецесија и за повеќе илјади долари да ги покачат животните трошоци за просечното американско семејство.

Есвар Прасад, професор на Универзитетот Корнел, за „Сиетл Тајмс“ ги опиша царините на Трамп како „почеток на нова ера на протекционизам што ќе одекне низ целиот свет“.

Тој истакна дека обемот на овие царини ги потврдува стравувањата на заговорниците за слободна трговија, означувајќи големо отстапување од принципите на глобализацијата воспоставени по Втората светска војна.

Фаисал Ислам, уредник за економија на Би-Би-Си, забележа дека овие царини претставуваат монументален пресврт во глобалната трговија, при што американските приходи од царини достигнуваат нивоа што не се видени речиси цел век. Тој предупреди на можни нарушувања на долгогодишните трговски рути и синџири на снабдување, особено во индустриите како автомобилската и фармацевтската.

„Царините за азиските земји навистина се извонредни. Тие ќе ги разбијат деловните модели на илјадници компании, фабрики, а можеби и цели нации. Некои од синџирите на снабдување што ги создадоа најголемите светски компании ќе бидат моментално прекинати. Неизбежниот ефект сигурно ќе биде да ги турне кон Кина“, пишува Ислам.

Според анализите на британскиот тинк-тенк „Чатам Хаус“, царините на Трамп придонесуваат за раст на цените и инфлациските очекувања, кои се искачија на највисоко ниво во последните три децении.

Иако би можеле да поддржат одредени сектори како производството на челик, истовремено ги загрозуваат работните места во индустриите што зависат од увозните суровини. Меѓу нив се и индустриите што користат челик.

Алан Дирдорф, професор по меѓународна економија од Универзитетот во Мичиген, предупреди дека потрошувачите ќе плаќаат повеќе за широк спектар на производи – од електроника до прехранбени артикли – поради повисоките трошоци за увоз. Тој исто така предупреди на можни противмерки од земјите погодени од царините.

– Сè на сè, можеме да очекуваме трајно повисоки цени и рецесија. Што се однесува до остатокот од светот, оние земји што во голема мера зависат од трговијата со САД, најочигледно Канада и Мексико, ќе почувствуваат силен удар, а и светот најверојатно ќе влезе во рецесија. Но, очекувам дека поголемиот дел од светот ќе се опорави од тоа пред нас, бидејќи, колку и да сме големи, остатокот од светот е многу поголем – вели Дирдорф.

Такахиде Киучи, главен економист во истражувачкиот институт „Номура“ смета дека царините на Трамп носат ризик од уривање на глобалниот систем на слободна трговија што токму САД го предводеа уште од Втората светска војна.

„Ројтерс“ пишува дека во наредните месеци ќе преовладуваат конкретните ефекти од зголемувањето на цените – а со тоа и слабеењето на побарувачката – предизвикани од новите давачки на илјадници производи што секојдневно ги купуваат и продаваат потрошувачите и компаниите низ светот.

– Гледам на ова како поместување на американското и глобалното стопанство кон послаби резултати, поголема несигурност и можен пат кон нешто што би можеле да го наречеме глобална рецесија – рече Антонио Фатас, макроекономист во бизнис школата ИНСЕАД во Франција.

Меѓународниот монетарен фонд (ММФ), чиј извештај го пренесува „Џеј Пи Морган Рисрч“, процени дека универзалното зголемување на американските царини за 10% – заедно со истовремени противмерки од трговските партнери – би можело да го намали американскиот БДП за 1%, а глобалниот за 0,5%, истакнувајќи ги пошироките економски ризици.

„Атлантскиот совет“ нагласува дека царините најверојатно ќе ги забрзаат напорите на американските трговски партнери да ги диверзифицираат своите извозни правци и да ја намалат зависноста од американскиот пазар. ЕУ, Велика Британија и Индија веќе бараат алтернативни трговски договори за да се заштитат од американската непредвидливост.

Џош Липски, виш директор на Центарот за геоекономија при „Атлантскиот совет“ и поранешен советник во Меѓународниот монетарен фонд, вели дека историското значење на вчерашниот ден е јасно.

– САД рекоа дека глобалниот трговски систем што помогнавме да го создадеме повеќе не функционира за нас – заклучи тој.

The post ДАЛИ САД ЈА НАПУШТААТ СЛОБОДНАТА ТРГОВИЈА ЗА КОЈА СЕ ЗАЛАГААТ 80 ГОДИНИ? Експертите се загрижени од последиците од царините на Трамп appeared first on plusinfo.mk.

Преференцијалниот пристап на производите од српско потекло на пазарот со повеќе од 1,4 милијарди жители ги става компаниите од Србија во многу подобра позиција во споредба со компаниите од Европа и околината и треба да доведе до значително зголемување на извозот, проширување на инвестициите и производството. капацитети во нашата земја, но и зголемување на конкурентноста, како и зајакнување на севкупната економска активност.

Договорот со Кина опфаќа околу 20.000 артикли, а околу 60% од нив ќе можат веднаш да се извезат без царина.

The post СРПСКИТЕ ПРОИЗВОДИ ДОБИЈА ПРИСТАП ДО ПАЗАР ОД 1,4 МИЛИЈАРДИ ПОТРОШУВАЧИ Стапи на сила договорот за слободна трговија на Србија со Кина appeared first on plusinfo.mk.