Венко Филипче најде да говори за слободата на медиумите и извештајот на Репортери без граници, се најде за кредибилен и легитимен на оваа тема, а нема медиум, портал и новинар со кого не се скара, реагира ВМРО-ДПМНЕ.

„Односот на Филипче и на СДСМ кон медиумите, по насока на пи-ар шефот на куќниот пријател на Зоран Заев, Зоран Башановиќ, е крајно арогантен, срамен и во одредени случаи и безобразен. Филипче треба да си стави прст на чело и да размисли што прави со новинарите и со медиумите и дали тој негов однос е правилен. Доколку смета дека така треба, следната година уште надоле ќе одиме“, соопшти ВМРО-ДПМНЕ.

Филипче на платформата Икс објави дека со Христијан Мицкоски Македонија падна за 3 места во Индексот за слобода на медиуми на Репортери без граници, а во објавата продолжи со обвинувања кон медиумите.

„Сега сме во групата земји со проблематична состојба. Ова е уште еден доказ како Орбановата медиумска мрежа во служба на Мицкоски „исполнува“ една од клучните реформски точки за ЕУ – слобода на медиуми. Цела мрежата, особено Алфа ТВ, сигурно е многу горда на овие резултати. Браво! Доаѓа времето на вистината“, објави претседателот на СДСМ.

The post ФИЛИПЧЕ СЕ ИСПОКАРА СО НОВИНАРИ И СО МЕДИУМИ, ТОЈ ЛИ НАЈДЕ ДА ЗБОРУВА ЗА СЛОБОДАТА НА МЕДИУМИТЕ Односот му е крајно арогантен, срамен и безобразен appeared first on plusinfo.mk.

Европската унија остро го осудува секој чин на насилство, вклучително и заканите кон новинарите, и повикува на прекин на секоја ескалација на тензиите, изјави денеска портпаролот на Европската комисија, Гијом Мерсие, како реакција на настаните за време на синоќешните протести во Србија.

Мерсие нагласи дека ЕУ „многу внимателно“ ја следи ситуацијата, потсетувајќи дека правото на мирни демонстрации и слободата на собирање мора да се почитуваат, а властите имаат обврска да ги заштитат учесниците на собирите од штета или насилство.

Во својата изјава, тој ја истакна и важноста на слободата на медиумите и изразувањето, нагласувајќи дека независните медиуми мора да можат да ја извршуваат својата улога како контролори на власта, со цел зголемување на транспарентноста и одговорноста на јавните личности и институциите.

ЕУ најави дека внимателно ќе ги следи овие прашања во контекст на преговорите со Србија за членство во Унијата.

– Фундаменталните права и вредности се во сржта на нашиот заеднички европски проект и мора да се почитуваат – порача Мерсие.

Загриженост изрази и еврокомесарката за проширување, Марта Кос, која оцени дека извештаите за насилство на протестите се сериозен сигнал за внимавање.

– Извештаите за насилство за време на неодамнешните протести во Србија се многу загрижувачки. Напредокот на патот кон ЕУ бара граѓаните слободно да ги изразуваат своите ставови и новинарите да можат да известуваат без заплашување или напад – напиша Кос на социјалната мрежа X.

The post БРИСЕЛ СО ОСТРО ПРЕДУПРЕДУВАЊЕ ДО СРБИЈА Медиумите и граѓаните мора да бидат заштитени appeared first on plusinfo.mk.

Во извештајот се дадени наодите и препораките што произлегуваат од меѓународната мисија за проценка на медиумската состојба во земјава што се одржа од 5 до 7 јуни годинава во организација на Здружението на новинарите на Македонија (ЗНМ). Проценката на состојбата ја вршеа Европскиот центар за слободата на печатот и медиумите (ЕЦПМФ), Европската федерација на новинари (ЕФЈ), Фри прес анлимитид (ФПУ),  Меѓународните институт за печат (ИПИ) и Обсерваторијата за Балкан и Кавказ Трансевропа (ОБЦТ) кои одржаа состаноци со носителите на одлуки во земјава релевантни за медиумскиот сектор.

Генералниот секретар на ЕФЈ, Рикардо Гутиерез, на денешниот настан во рамите на Деновите на медиумската писменост во Агенцијата за аудиовизуелни медиумски услуги (АВМУ) посочи дека во извештајот има позитивни наоди за работата на новинарите, но, како што рече, „постои простор во јавниот интерес во земјата што ги води јавните служби да донесат погрешни одлуки за вистинските работи“.

Нагласи дека политичарите не ги консултираат здруженијата на новинарите при носењето на одлуките и додаде дека треба да го прават тоа за да носат вистински решенија.

Во извештајот се посочува дека новинарите и натаму се соочуваат со тешкотии поврзани со нивната безбедност и се загрижени за говорот на омраза и негативното етикетирање на новинарите и медиумските работници. Условите за работа, како што се истакнува и натаму остануваат  неприфатливо лоши за многу новинари не само во однос на нивната плата и работниот статус, туку и во однос на почитувањето на нивните работнички права. Медиумите се барат за опстанок  на мал и заситен пазар, каде, како што се нагласува „плурализмот е под закана поради непромислениот притисок за повторно воведување на државното рекламирање“.

Се препорачува да се направи јавен фонд за поддршка на медиумите врз основа на објективни критериуми и со целосна независност, во согласност со постојните европски стандарди, да се задржи строгата забрана за државно рекламирање во медиумите, да се засили надворешниот мониторинг врз судовите, да се подобрат работните услови за новинарите и да се подобри одговорноста на политичарите и јавните службеници за непријателските изјави и однесување кон новинарите и медиумските работници.

Претседателот на Здружението на новинарите на Македонија (ЗНМ), Младен Чадиковски порача дека сега е вистинското време да се дојде до вистински системски решенија. Во спротивно, како што кажа, многу лесно од 38.место можеме повторно да се вратиме на 128.место по слободата на медиумите како што беше во 2015 година.

The post НАПРЕДОК НА „СТАКЛЕНИ НОЗЕ“ Извештај за слободата на медиумите во Македонија appeared first on plusinfo.mk.

Па споредете со 118. место во времето на ВМРО-ДПМНЕ. Само во времето на мојата Влада 19 места сме напреднати за 1 година. Па такво напредување ниедна држава нема – рече денеска претседателот на СДСМ и премиер, Димитар Ковачевски во македонското Собрание, во одговор на пратеничко прашање поставено од пратеникот Стојановски од ВМРО-ДПМНЕ.

– Како почитуван пратеник Стојановски вие ќе го ослободите судството? Па погледнете го извештајот на Прибе, заробена држава стои во времето на ВМРО-ДПМНЕ. Кажете како ќе го ослободите и од кого вие ќе го ослободите судството. Кажете која демократија вие ќе ја враќате во државата кога државата сега, сподер Фридом Хаус напредува благодарение на оваа Влада. Или ќе зборувате и за слобода на медиуми. Според Извештајот на Репортери без граници во ваше време државата беше 118 место во Светот според слободата на медиумите. Цела држава слушаше како вести редите, која вест да била прва која втора. Па се потрошиле вестите, па во спортски вести да кажеш нешто за економија пошто нема место више во економски вести. ВМРО-ДПМНЕ ќе враќале демократија во државата, во судството и во медиумите. Благодарение на тоа што никој денес не реди вести, благодарение на тоа што никој не праќа на новинари прашања, благодарение на тоа што секој новинар може да дојде слободно и да праша што сака на прес – конференција сме 38. во свет. Па споредете со 118. Само во времето на мојата Влада 19 места сме напреднати за 1 година. Па такво напредување ниедна држава нема. И да знаете дека ќе бидеме уште подобри. Ниту јас ниту министрите ниту редиме вести, ниту пак бараме кога ќе се пополни со редењето да одат економски теми во спортска редакција. Па место да се збори за спорт да се збори за постигнувањата на Владата како правеле статуи во центарот на Скопје, е тоа беа вестите порано и вие тоа добро го знаете, рече претседателот на СДСМ и премиер Димитар Ковачевски.

The post НЕ РЕДИМЕ ВЕСТИ, НЕ НАРАЧУВАМЕ ПРАШАЊА! Ковачевски го објасни напредокoт на земјава во слобода на медиумите appeared first on plusinfo.mk.

Високиот претставник за надворешна политика и безбедност на Европската унија (ЕУ), Жозеп Борел, по повод Светскиот ден на слободата на медиумите, кој се одбележува денеска на 3 мај, ги осуди заканите и насилството врз новинарите.

– Секој има право на слобода на мислење и изразување, а тоа право подразбира да се има слобода на мислење без мешање, а исто така подразбира барање, примање и пренесување информации и идеи преку кој било медиум и без разлика на границите – рече Борел.

Високиот европски функционер рече дека „ЕУ ги осудува сите форми на закани и насилство врз новинарите и ги поддржува медиумските работници кои се изложени на ризик преку локални мисии и преку наменски програми, како што се платформата Безбедни новинари во Западен Балкан, проектот за поддршка на независни медиуми и основните слободи во Камбоџа и програмата Медиумска издржливост во Авганистан“, соопшти Европската служба за надворешни работи (ЕЕАС).

Додека зачувувањето на слободни, независни и плуралистички медиуми е од витално значење за отпорни и здрави демократии, слободата на медиумите сега е доведена во прашање во повеќето делови на светот, се додава во соопштението.

Според ЕЕАС, новинарите, медиумските работници и сите оние кои презентираат независни информации во јавноста, расветлуваат сериозни прекршувања на човековите права и злосторства и бараат одговорност од властите, се повеќе се соочуваат со дискредитација, закани и со напади.

Новинарите во нападнатата Украина, Белорусија и Авганистан, Блискиот Исток и Северна Африка, Централна Америка, добитниците на Нобеловата награда на Филипините и во Русија и многу други медиумски работници ширум светот, вклучително и Европа, продолжуваат да плаќаат висока цена за извршување на својата професија.

Новинарките се особено ранливи на закани, наведува ЕЕАС, додавајќи дека новинарките се изложени на стигматизација, сексистички говор на омраза, сексуално и родово насилство, па дури и убиства.

Според EEAS, околу 73 отсто од новинарките доживеале онлајн закани, злоупотреба и малтретирање за време на нивната работа.

Во исто време, „градиме критични капацитети за да се спротивставиме на манипулацијата со странски информации и мешање и да им помогнеме на граѓаните во Европа да го зајакнат својот отпор кон дезинформации, манипулации и пропаганда, со иницијативи како што се платформата EUvsDisinfo и Европската опсерваторија за дигитални медиуми“, додаде Борел.

Одбраната и промовирањето на слободата на печатот е универзална мисија која не познава граници.

ЕУ ќе остане посветена на ангажирање со владите, медиумите и граѓанското општество, како на меѓународни форуми, така и на локално ниво, за да преземе иницијатива и да ја зајакне слободата на медиумите ширум светот, додаде Борел.

Defending and promoting press freedom is a vital and universal mission.

The EU will continue to engage with governments, media, and civil society to strengthen press freedom around the world and to protect media workers.#WorldPressFreedomDay https://t.co/DXh1X9QWHn

— Josep Borrell Fontelles (@JosepBorrellF) May 2, 2023

ГУТЕРЕШ; СЛОБОДАТА НА МЕДИУМИТЕ Е НАПАДНАТА СЕКАДЕ ВО СВЕТОТ

Слободата на медиумите е нападната секаде во светот, изјави синоќа генералниот секретар на ОН, Антонио Гутереш, осудувајќи ги нападите врз новинарите, како и дезинформациите.

– Сите наши слободи зависат од слободата на медиумите. Слободата на медиумите е витален елемент на човековите права, рече Гутереш во видео порака емитувана во пресрет на утрешниот Светски ден на слободата на медиумите.

Гутереш додаде дека „слободата на медиумите е нападната насекаде во светот“, наведувајќи дека новинарите и медиумските работници се директно цел на напади онлајн и вон социјалните мрежи, додека извршуваат важна работа.

Генералниот секретар на ОН се осврна и на дезинформациите.

– Вистината е загрозена од дезинформации и говор на омраза кои се обидуваат да ги замаглат границите меѓу фактите и фикцијата, меѓу науката и заговорот, додаде Гутереш.

The post ВИСОКА ЦЕНА СЕ ПЛАЌА ЗА СЛОБОДАТА НА ИЗРАЗУВАЊЕТО Mедиумите под атак во повеќе делови од светот appeared first on plusinfo.mk.

Од 2017 година, кога на власт доаѓа СДСМ на Зоран Заев, бележиме напредок од 21 место на светската ранг листа, што е разочарувачки резултат. Зошто разочарувачки? Еве, да се потсетиме. Во 2006 година, кога на власт дојде ВМРО-ДПМНЕ на Никола Груевски, Македонија беше на 46. место на ранг-листата. До 2009 година напредувавме до 32. место. Ситуацијата се влоши во 2011 година, кога се искачивме на 94. место и од 2013 до 2016 година Македонија се движи меѓу 116. и 118. позиција. Тоа се најцрните седум години од режимот на Груевски.

Очекувањата дека по промената на власта во 2017 година ќе дојде до значително подобрување во сферата на медиумските слободи не се остварија. Хибридниот режим на Зоран Заев донесе нови проблеми, а бевме сведоци и на крупни корупциски скандали, при што во најголемиот и најспектакуларниот директно беа замешани и познати новинарски имиња, цврсто поврзани со тогашниот и сегашен политички естаблишмент. Сериозни и суштински реформи во оваа област нема, а засилениот притисок на високи владини претставници врз медиумите и врз новинарите веројатно дополнително придонесува сѐ уште да се одржува перцепцијата за „заробените медиуми“ во нашата земја.

Во високо корумпирано и криминализирано општество, слободните медиуми се исклучок, а не правило

Инаку, не сум ја читал „Белата книга за глобалната состојба на новинарството“ на Меѓународната федерација на новинари, но искрено се сомневам во начинот на кој нашите локални новинарски здруженија го протолкувале драматичниот наслов на првото поглавје „Убиено и затворено новинарство“. Да, веројатно таму се говори и за илјадниците убиени и затворени новинари ширум светот низ годините, но претпоставувам дека кога се зборува за „убиено и затворено новинарство“ веројатно се мисли и на новинарство во „убиените“ и „затворени“ општества.

За жал, такво општество денес е Македонија. Денес и скоро патнесет години наназад. Како што веќе е рапортирано, ние сме регионални шампиони по корупција, а Балканот како регион самиот по себе е „ендемско“ подрачје за корупција во светски рамки. Годинава откривме дека сме земја во која трговијата со наркотици опасно е поврзана со луѓе од естаблишментот. Страхувавме дека Македонија тргува со сопствениот државен идентитетит, но не ни помислувавме дека тргува и со личните идентитети на своите граѓани, продавајќи им ги на босовите на регионалните криминални кланови. Се помиривме и со тоа дека во оваа земја не владее правото, дека правдата се дели арбитрерно, дека во затвор може да се замине и без докажана вина. Се уверивме дека тајната полиција сѐ уште има тајна моќ. Конечно, се уверивме дека мафијата во Македонија, една од најпогодените земји од пандемијата, се обиде да тргува дури и со вакцини, што е случај без преседан во светски рамки.

Какво општество, такви медиуми, драги мои.

Во едно длабоко криминализирано и корумпирано општество, не можете да очекувате медиумите да бидат слободни и независни. Повеќето од нив се ангажирани од пропагандните машинерии на центрите на моќ, а она што најчесто се заборава да се каже во реакциите на новинарските задруженија е дека најголем центар на политичка, но и на економска моќ, е токму владата.

Здруженијата не зуцнаа за притисоците на високи владини претставници врз медиумите

Внимателно ги прочитав коминикеата на нашите новинарски здруженија (со исклучок на Македонската асоцијација на новинари, бидејќи такво соопштение не сретнав) по повод 3 Мај, Светскиот ден на слободата на медиумите. За жал, во сите нив недостасуваат храбри, па дури и воинствени повици за ослободување на „заробеното“ новинарство во Македонија, какви што одговараат на неславната 90. позоција на ранг-листата на Репортери без граници. Ако ме прашате мене, дури ни воинствените повици не би биле доволни, време е за протести на новинарите.

Наместо тоа, во реакциите на новинарските здруженија, доминира еден друг дискурс. Во нив се попува дека „само со одговорно, етичко и квалитетно новинарство можеме да се бориме против сите закани кон медиумите и новинарите“ и дека „оваа формула е успешна и во борбата за економско-социјалната стабилност на новинарите, но и како одговор против малициозните фабрики за лаги кои се претставуваат како новинарство“. Вака размислува Самостојниот синдикат на новинарите на Македонија, на пример. Патем речено, кога веќе се препишува-преведува, треба да се знае дека придавката „malicious“ не се преведува како „малициозна“ туку како „штетна“ (мислам дека дури и она „фабрики“ е превод на збор кој веројатно значел производство или нешто слично, но не можам да тврдам, не го знам изворот).

И Советот за етика во медиумите во Македонија оценува дека „од суштинско значење како во сегашната, кризна, ситуација во државата, така и во редовни околности е и активната улога на професионалните медиуми во борбата против дезинформациите и неетичкото известување“. Со слична поента настапи и Здружението на новинарите на Македонија: „Борбата против дезинформациите кои се покажаа како особено штетни во вакви предизвикувачки времиња е можна само со производство на објективни и точни информации и транспарентна работа на Владата и на другите јавни институции“.

Тоа е таа нова мода, драги мои. Главната тема на НВО пристапот во медиусмкиот сектор се открива со клучните зборови – лажни вести, дезинформации, малициозни фабрики, сајбер закани итн. Тоа е сега „фенси“, особено во земјите кои веќе се имаат изборено за базичните медиумски слободи и во кои високи претставници на власта не си дозволуваат да се закануваат на медиуми и на новинари, како кај нас.

Разбирам зошто трите здруженија тераат мода (на мода се лапаат проекти, јасно), но не ми се допаѓа што ниту едно од нив не проговорило за оценката од извештајот на Репортери без граници. Во ниту едно од наведените коминикеа по повод Светскиот ден на слободата на медиумите не сретнав ни збор за заканите на високите владини претставници врз медиумите. А сега беше моментот…

Но, можеби и тоа не е големо изненадување. Познато е дека македонските новинарски здруженија секогаш биле и веројатно ќе си останат поблиски до социјалдемократите и со многу понагласена дистанца кон ВМРО-ДПМНЕ. Така беше и кога ВМРО-ДПМНЕ беше на власт. Поинакви соопштенија се пишуваа тогаш. А богами имаше и протести. Јас се сеќавам на неколку, бидејќи бев таму.

Стигмата за „фабриките за лажни вести“

На новинарските здруженија им посакувам во иднина многу повеќе да се борат за сопствената независност од власта и за квалитетот на сопствените реформски иницијативи, бидејќи на тој начин посуштински ќе придонесат за независноста и за квалитетот на медиумите. И апелирам да не подлегнуваат на општиот фон на јавната дебата што ја наметнува пропагандата на власта, која сака да нѐ убеди во ноторната лага дека само нејзините медиумски апологети прават „одговорно, професионално и квалитетно новинарство“, а сѐ друго на сцената е „дно дна“.

Тоа е една од грозните лаги што им се продава и на странските дипломати во Скопје, на седенките со избрани македонски новинари. Во таа лага никој веќе не верува, па ни самите амбасадори. Еден од нив неодамна ми раскажуваше како самите си прават шеги со „брифинзите“ што ги добиваат од „избраните“ претставници на нашата седма сила. Дека е тоа така, зборуваат токму извештаите на непристрасните посматрачи, какви што се оние на Репортери без граници и на Фридом хаус, на пример, кои редовно ги изненадуваат нашите властодржци и нивните апологети со непријатни оценки и констатации.

Како и да е, јас сум апсолутно свесен дека нашите медиуми се соочуваат со многу сериозни проблеми. Дел од нив несомнено се последица на недостигот на внатрешни капацитети во секоја смисла – кадровски пред сѐ, но и финансиски, технички и инфраструктурни. Дел, пак, се последица на севкупниот општествен амбиент, кој е неповолен (економски и политички) и често дури и непријателски настроен кон медиумите, а најмногу кон оние кои денес доминантно го определуваат јавното мислење – кон интернет медиумите. Смислено и упорно се шири стигмата дека интернет порталите и социјалните мрежи се „фабрики за лажни вести“, кои посветено работат против нашата „добра“ власт и на ширење на незадоволството кај народот. А еден од водечките апологети на таа власт ќе напише: „Народот е незадоволен затоа што малку го онадат“.

Исто така, немам дилеми дека во сите политички „кампови“ има пропагандисти кои се претставуваат како новинари и кои му нанесуваат огромни штети на македонското новинарство. Има дури и такви кои тоа го прават од лични мотиви, за ситни или крупни кешарици и за привилегии, без никакви идеолошки или политички побуди.

Накусо, нѐ има секакви. Како што има секакви лекари, полицајци, инженери… Тажно е кога поради бесчестието на една мала група луѓе се создаваат стереотипи, а уште потажно е кога тие стереотипи масовно и „малициозно“ се шират во јавноста. Во случајов, за жал, стереотипот за македонскиот „неписмен“ и „корумпиран“ новинар што нема попаметна работа освен да шири „лажни вести“ наоѓа силна потпора и во оценките на новинарските здруженија. Па на човек му доаѓа да се запраша – добро, по ѓаволите, нема ли во тие здруженија некој да им каже дека постојат заради новинарите и заради медиумите, а не заради спиновите на „малициозните фабрики“ во власта?

Колеги, нека ни е честит денот и – почесто да зборуваме за слободата!

Нејсе, кога нема кој друг, еве, ја користам приликава на сите мои колеги, без исклучок, јас да им го честитам Светскиот ден на слободата на медиумите. Мојата честитка е искрена и чиста, без пораки за насочување на вниманието кон други „фенси“ теми. Сакам на сите новинари да им посакам во иднина, на овој ден, но и за делник а не само за празник, повеќе да се зборува за слободата отколку за другите проблеми со кои се соочуваме ние и кои веројатно и ние ги предизвикуваме во општеството.

Секако, сите проблеми се важни и си имаат своја тежина. Не заговарам бегство од одговорноста. Но, треба да развиеме силен рефлекс кој ќе биде одраз на сознанието дека слободата за новинарот е она што кислородот е за човекот – и без едното и без другото се може, ама не долго. И затоа, прво за слободата, а потоа за сѐ друго!

The post Нa Светскиот ден на слободата на медиумите треба да се зборува прво за слободата, а потоа за сѐ друго!! appeared first on plusinfo.mk.