Кога зборуваме за билатералниот аспект меѓу Софија и Скопје, она што секогаш го велам е дека заедничкиот интерес на двете земји е да се движиме напред по патот кон полноправно членство во Европската Унија, изјави шефот на македонската дипломатија Тимчо Муцунски, пред почетокот на самитот на Процесот за соработка во Југоисточна Европа (ПСЈИЕ) во Софија.

– И двете земји имаат многу да добијат од овој процес. Сакам да ве уверам дека имаме најпозитивни намери да соработуваме во областа на одбраната и безбедносната политика, да соработуваме во економијата, да соработуваме во образованието. Лично, како универзитетски професор, сум учествувал на безброј меѓународни конференции во Софија. Затоа верувам дека сите овие настани од последните години вештачки ги делат народите на двете земји. И она што е важно е да гледаме кон иднината, да не се фокусираме на прашања од минатото – прашања поврзани со идентитетот, историјата и јазикот, бидејќи имаме иднина што треба да нè обедини – рече Муцунски.

За договорот предложен од Франција во 2022 година, тој нагласи дека Македонија има поинакво гледиште за тоа.

– Треба да функционираме во систем што значи меѓусебна доверба. Нашето гледање е дека имаме различно толкување на она што се очекува од нашата земја во однос на одлуката од 2022 година – истакна Муцунски.

Според него, Северна Македонија подготвила, како дел од барањата, одличен акциски план за малцинствата.

– Не само за бугарското малцинство, туку за сите малцинства во земјата, во соработка со водечки експерти делегирани од Советот на Европа. Но, она што е важно, за да можеме да продолжиме напред, е да работиме во следниот период на градење меѓусебна доверба – посочи Муцунски.

Тој истакна дека „силните идентитети не треба да се градат преку напади врз туѓите идентитети, дека имаме капацитет да ги негуваме нашите различности, да се почитуваме едни со други и да не се врзуваме за прашања од минатото поврзани со идентитетот, историјата и јазикот“.

– Цврсто сум убеден дека силните идентитети немаат потреба да се градат преку напади на туѓите идентитети. Во Европа во 21 век треба да имаме капацитет да ги негуваме нашите различности и да не се врзуваме за прашања од минатото поврзани со идентитетот, историјата и јазикот. Нашата цел не е само да стигнеме до фаза на отворање на пристапните преговори, туку и успешно да ги затвориме. За да се постигне тоа, што е важно за нас? Да знаеме дека нема да има дополнителни барања за нашата земја поврзани со историјата, идентитетот и јазикот, како и други билатерални прашања кои би се појавиле по отпочнувањето на преговорите – прашања поврзани со историски комисии, тоа не се европски темелни прашања. Затоа велам, добро е да разговараме и да расчистиме што се очекувањата од двете страни бидејќи, сепак, има еден силен билатерален елемент во сето ова. Тука се најголемите недоразбирања – истакна Муцунски.

Според него, со дијалог и меѓусебно разбирање, нема предизвик што не може да се реши, ако има волја и ако сите страни се посветени на европската идеја.

The post ДОБРО Е ДА РАСЧИСТИМЕ КОИ СЕ ОЧЕКУВАЊАТА ОД ДВЕТЕ СТРАНИ Муцунски од Софија порача дека треба да се гради доверба appeared first on plusinfo.mk.

Претседателката Гордана Сиљановска-Давкова во интервју за 360 степени потврди дека ќе се сретне со бугарската колешка Илијана Јотова во рамките на самитот од Процесот за соработка на Југоисточна Европа в среда во Софија.

Таа вели дека средбата е природно продолжение на средбата во Ереван и дека очекува да се отворат и суштински прашања, бидејќи според неа нема нерешлив проблем.

– Ако граѓаните не контактираат, ако во проекти заеднички не учествуваме… морам да кажам, кога првпат го сретнав господинот Радев во Софија и се случи оној инцидент со знамињата, се заборави, но сите кои бевме присутни на работниот ручек каде што тој говореше за потребата од соработка во многу области во кои заедно би постигнале подобро, полесно, многу многу успеси. И јас мислам дека тоа е единствениот начин за да можеме ние bona fide да се однесуваме. Да не се навредуваме, да не се повредуваме, да се обидеме да ги мериме зборовите – вели Сиљановска Давкова.

The post СИЉАНОВСКА ДАВКОВА ЌЕ СЕ СРЕТНЕ СО БУГАРСКАТА КОЛЕШКА ВО СОФИЈА „Не постојат нерешливи проблеми“ appeared first on plusinfo.mk.

Пендиков настрада во се уште нерасветлена тепачка во Охрид, при што се здоби со повреди и со бугарски владин авион итно беше пренесен на лекување во Софија.

– Бугарските власти можат да издадат државјанство, или да подарат стан, на кого било, а ние не можеме да се мешаме во нивните одлуки и активности кои ги преземаат, исто како што никој не може да се меша кај нас, доколку ние решиме да го направиме тоа со некој граѓанин – изјави денеска Ковачевски.

Техничкиот министер за надворешни работи на Бугарија, Николај Милков, на прес-конференција соопшти дека Пендиков во најбрз можен рок ќе добие бугарско државјанство. Тој ќе добие и времено живеалиште, додека престојува во Бугарија. Според Милков, Пендиков се плаши за својот живот и затоа се размислува и опцијата да му се даде и лично обезбедување.

Пендиков беше примен и од бугарскиот претседател Румен Радев. Во таа прилика, Радев изјави дека Бугарија веќе нема да толерира насилство од РСМ.

Радев ѝ честитал на мајката на Пендиков за тоа што „одгледала достоен син“, а на Христијан „за храброста да го одбрани своето бугарско име“.

– Бугарија ќе ги користи сите национални и меѓународни инструменти за заштита на нивните права – рече Радев, додавајќи дека Софија ги информирала и меѓународните партнери за уште една антибугарска кампања во РСМ.

Како потврда на заштитничкиот третман од официјална Софија, Пендиков, како што објавија бугарските медиуми, се сликал со претседателот Радев и потпретседателката Илијана Јотова.

Во стилот на Понг кој не одговара на Пинг, Ковачевски ги коментираше и навредите изречени од бугарскиот европратеник и поранешен амбасадор во земјава Александар Јорданов. Тој во објава на Фејсбук упати навреди и пцости за Македонците по чествувањето на Гоце Делчев на 4 февруари.

– Сметам дека во иднина треба да се остава што помалку простор за такви каков што е посочениот господин, но и за други коишто ги интересираат само провокации и нарушување на добрососедските односи на нашата држава со другите земји од регионот, бидејќи тоа се личности и политички партии кои не сакаат да го видат овој регион во ЕУ – рече Ковачевски.

Ваквите изјави доаѓаат откако вчера Стејт департментот на САД ја поздрави „деескалацијата на реториката“ меѓу Софија и Скопје.

Посматрачите во Скопје, за жал, засега не можат да видат никаква деескалација од софиска страна. Но ете, можеби Понг гледа нешто што ние не го гледаме.

БУГАРСКА ПОЛИЦИЈА ПРИВЕЛА 4 ЛИЦА ЗА ВАНДАЛИЗИРАЊЕТО НА МАКЕДОНСКИОТ КЛУБ „НИКОЛА ВАПЦАРОВ“ Демерџиев очекува да се најдат и напаѓачите на Пендиков

The post ПОНГ ГО ИГНОРИРА БУГАРСКИОТ ПИНГ Ковачевски не сака да го коментира тоа што Пендиков добива ВИП третман во Софија appeared first on plusinfo.mk.

На прашање од МИА дали САД сметаат дека бугарската реакција околу нападот во Охрид врз едно лице, како и декларацијата изгласана во Собранието на Бугарија, е преувеличување до невидени размери од страна на официјална Софија, Вашингтон одговори дека Софија и Скопје веќе работат на деескалација на реториката и го поздравија мирното чествување на роденденот на Делчев.

– Иднината на Северна Македонија е во ЕУ. САД продолжуваат да ја поддржуваат целосната евроатлантска интеграција на Северна Македонија – изјави официјален Вашингтон.

The post ЕДЕН ПОИНАКОВ ПОГЛЕД НА 4 ФЕВРУАРИ Стејт департментот ја поздрави деескалцијата на реториката меѓу Софија и Скопје appeared first on plusinfo.mk.

Со тоа, како што информира дописникот на МИА од Софија, Сабев, ги демантира информациите што се појавија дека авиокомпанијата „Гуливер“ ги прекинува редовните летови меѓу Софија и Скопје.

Николај Сабев, исто така, коментира дека остануваат и летовите меѓу Софија и Тирана. Во моментов, операторот на летот е пред промена, коментираше кратко бугарскиот министер за транспорт Сабев.

Од „ТАВ Македонија“ попладнево соопштија дека во моментов немаат информација од авиокомпанијата за прекин на авилинијата Софија-Скопје.

The post ЛЕТОВИТЕ МЕЃУ СКОПЈЕ И СОФИЈА НЕ ЗАПИРААТ Бугарија тврди ќе се лета и по 15 мај appeared first on plusinfo.mk.

Со само еден настап на „примадоната“ Илијана Јотова и нејзиниот „партнер“ Кирил Петков, заедно со пратечките „изведувачи“ Каракачанов и Захариева, Бугарија на Македонците им покажа каква иднина им посакува. Им ја посакува „културата“ на Ванчо Михајлов. Сатрапот на македонскота револуционерна организација и соработникот на фашистите и на нацистите, кој само во Бугарија шест пати бил осудуван на смртна казна.

Но и не треба да ни биде криво. Сега барем знаеме дека во третата декада од 21 век, Бугарите во добрососедските односи ја промовираат личноста од најмрачниот период на 20 век. Поминаа 70 години од Втората светска војна, а нашите соседи сè уште не можат да сфатат дека тогаш не биле добрите момци, а и дека нивната војска била окупаторска.

Тоа што на мене најмногу ми пречи во циркусот со Ванчо Михајлов е отсуството на навремена реакција на македонскиот државен врв. Си ги оставивме Бугарите со полициска придружба да ја забавуваат публиката во Битола, надевајќи се дека никој ништо нема да слушне или да види. Дека циркусот ќе се спакува и ќе отпатува, а веќе наредниот ден работите ќе се вратат на старо.

Рака на срце, претседателот Стево Пендаровски веднаш кажа дека соработник на фашистите не може да биде историската личност која ќе ги спојува двата народа, но надежите дека ова јуначење ќе биде поддржано и од Владата, спласнаа со оценката „Ванчо Михајлов е контроверзната историска личност“, објавена во соопштението од премиерот Димитар Ковачевски.

Истиот тој премиер знае да биде бескомпромисен во преговорите со синдикалните организации, одлучно да ги одбива предлозите за покачување на социјалната помош што ја добиваат децата со посебни потреби, но кога е во прашање бугарската политика кон Македонија, тогаш на него му се потребни денови за да ги пронајде вистинските зборови, за да дополнително не ги искомплицира последиците од провокацијата на Петков и на Јотова.

Очигледно е дека циркузантите од двете страни на граница сега со нетрпение чекаат некоја нова глупост да го сврти вниманието на јавноста, па тие да продолжат да си глумат преговори, да си се посетуваат, да разговараат, да позираат пред камери и да не прават ништо битно со што навистина ќе се развие добрососедството.

На сите треба да ни биде јасно дека Бугарија и Македонија треба да имаат извонредно добри врски на сите можни полиња на кои е потребна соработка. Економски, образовни, научни и инфраструктурни релации, како и соработка во туризмот, спортот и во културата. Епизодата со „Ванчо Михајлов“ ни ја покажа голата вистина на реалните, актуелни односи меѓу двете држави. Тоа мора да се промени и мора час поскоро да се изнајде сила конечно да се заврши со Втората светска војна. Да го потпишеме мирот.

За жал, во моментов односите меѓу Бугарија и Македонија може да се сведат само на наследството оставено од Ванчо Михајлов, за кого Македонците се само говеда и ништо повеќе.

The post Од толку многу полиња за соработка, Софија ја одбра ливадата што ја газат „говедата“ на Ванчо Михајлов?! appeared first on plusinfo.mk.

Бочварски во интервјуто посочува дека се работи за приватен авиопревозник или приватни авиопревозници коишто би можеле да сообраќаат на релација Скопје – Софија, но без субвенционирање или потпомагање од страна на владите.

– Сакаме авиопревозниците да најдат своја исплатливост во оваа линија и заради тоа сме отворени да дискутираме, да се вклучат и туристички агенции, да се вклучат и сите заинтересирани страни, бизнис комори, компании коишто имаат некаква можност за соработка помеѓу двете земји за да се најде исплатливост на оваа линија – Софија – Скопје, можеби и Тирана, Софија – Скопје можеби Атина, или која било трета релација која што ќе даде плус можност на граѓаните, на бизнис компаниите, можеби на туристичките дестинации коишто би летале преку Софија или преку Скопје до конечната дестинација на граѓаните – нагласува Бочварски.

Бочварски, во интервјуто за БНР, вели дека имале одлични средби во Софија на коишто разговарале на повеќе теми, вклучително за поврзувањето по патна инфраструктура помеѓу двете земји, но и за железничката инфраструктура и отворањето на авинска линија.

– Ние веќе од нашата страна работиме на изградба на нов експресен пат на една делница меѓу Ранковце и Крива Паланка. Тоа е сериозна патна врска на една многу тешка делница каде што веќе работите се движат добро и се очекува втора половина, односно средината на 2023 година да го завршиме овој дел. Паралелно со тоа вршиме и рехабилитација на целата патна врска од Куманово кон границата со Бугарија. Секако и делницата од Крива Паланка до граничниот премин Деве Баир со Бугарија ќе биде целосно проширена, рехабилитирана со трета лента во тој планински превој што значи дека имаме сериозни активности во делот на поврзувањето на патната инфраструктура – вели Бочварски.

Во однос на железничкото поврзување меѓу Софија и Скопје, Бочварски вели дека се работи за сериозна финансиска конструкција и дека напролет ќе започне изградбата на првите две делници, инвестиција вередна околу 200 милиони евра и дека ќе остане во 2023 година да започне со изградба и третата и последна делница.

– Таа е крајната и најтешка делница помеѓу Република Северна Македонија и Бугарија каде што имаме голем број на тунели, мостови коишто треба да се изградат и тоа е уште еден чекор за којшто денеска и потпишавме Меморандум за соработка каде што двете земји со сите експерти ќе се вклучат и ќе работат заеднички на граничниот премин, на тунелите и на се она кое што е комплексно во делот на градбата на оваа железничка пруга.

Секое подобрување на патната врска помеѓу две земји, според Бочварски, значи и развој на економијата, развој на бизнис секторот, поврзување на компаниите, поврзување на граѓаните од двете страни на границата.

– Една од темите која што исто така ја дискутиравме е граничниот премин Клепало кај Берово што значи дека тоа е уште една многу важна тема за поврзување или конекција помеѓу граѓаните. И тука имаме серија на чекори коишто бугарската страна треба да ги преземе за поврзување и отворање на уште еден граничен премин помеѓу двете земји, посочува Бочварски.

Бочварски, во интервјуто, вели дека Коридорот 8 е сериозно прашање, стратегиски важно за целиот регион и за Европа, затоа што ја поврзува оската Исток – Запад, од Драч (Албанија) преку Струга – Охрид – Скопје, па се до Бугарија и Црното Море.

– Тоа е многу значајна оска и заради тоа треба да направиме максимум што е возможно, тоа е нашата задача како министерства за транспорт и врски на двете земји, секако и на Албанија за да оваа оска час поскоро да ја започнеме да ја градиме и да ја завршиме. Ние потпишавме и Меморандум заедно трите земји, но сега треба да конкретизираме и да влеземе во решавање на сите клучни точки за да овој процес се движи побрзо. Финансиската конструкција е делумно обезбедена и работиме на дообезбедување на сите оние финансиски средства коишто се потребни, објаснува Бочварски во интервјото.

The post АВИОПРЕВОЗНИКОТ ДА НАЈДЕ НАЧИН ЗА ДА МУ СЕ ИСПЛАТИ РЕЛАЦИЈАТА СКОПЈЕ-СОФИЈА Владите нема да ја субвенционираат линијата appeared first on plusinfo.mk.

Трасата која двапати беше затворена бидејќи беше неисплатлива, всушност е дел од поголеми планови на компанијата. Уште во март минатата година, GullivAir доби официјална дозвола од американското Министерство за транспорт да оперира со чартер и редовни летови од ЕУ до САД. Во март или април годинава компанијата ќе почне да лета на директна линија Софија-Њујорк. ГуливЕр е овластен да лета директно до меѓународниот аеродром „Пирсон“ во Торонто, Канада.

Компанијата планира да започне со летови не само од Скопје, туку и од другите аеродроми на Балканот, од Тирана и од Солун за да обезбеди зафатеност од 335 седишта на нејзините три авиони „ербас А330-200“, кои ќе летаат до аеродромот „Џон Ф. Кенеди“ во Њујорк, првично двапати неделно, во среда и во петок. Така, дури и да се полупразни авионите на кратките линии од Балканот, ќе се гарантира исполнетост на директни летови преку океанот. За да имаат економска смисла во кратките летови, тие ќе се вршат со мали авиони – Гуливер има двомоторен европски АТР-72, а цената ќе биде до 50 евра.

Во моментов нема авиокомпанија која нуди директни летови од Софија до САД. Последниот директен лет на Балканот, кој полета за Њујорк, беше во 1999 година. Тогаш Федералната агенција за воздухопловство (FAA) им забрани на бугарските превозници да летаат до американските аеродроми, но во 2008 година оваа забрана беше укината.

Во моментов, GullivAir оперира само еден редовен лет до Бургас и неколку директни чартер летови од Бугарија до далечни дестинации како што се Малдивите и Доминиканската Република.

The post ЗА 50 ЕВРА ЌЕ СЕ ЛЕТА ДО СОФИЈА? Бугарската компанија Гуливер ќе лета и за Њујорк appeared first on plusinfo.mk.

Оваа теза, којашто денеска ја застапуваат најголемиот дел од официјалните претставници на Бугарија, за прв пат е поставена од Тодор Живков, лидерот на комунистичка Бугарија и човекот во чие владеење се исчезнати Македонците во Бугарија. Да, пред Живков во Бугарија опстојува македонско малцинство, кое ужива малцински права. Денеска речиси и да нема декларирани Македонци кај нашиот источен сосед.

Затоа треба да се биде внимателен кога во контекст на решавањето на спорот што денес го имаат Бугарија и Македонија, се предлага некакво наше соочување со „удбашкиот период“. Да, токму тоа го побараа група граѓани и интелектуалци од Македонија, кои се потпишаа на отвореното писмо упатено кон премиерите на Македонија и Бугарија, предупредувајќи ги да не бидат заложници на политиките поставени во периодот кога од двете страни на границата власта ја држат недемократски режими.

„Не треба да се дозволи да нè поделат гласовите на поранешните агенти на Државната безбедност и УДБА, научници и јавни личности кои соработувале со тоталитарните режими кои дејствуваат против интересите на двете земји. Ваквите луѓе инволвирани во наметнување на спротивставување и поделеност во политиката не треба да бидат дел од институционалниот и социјалниот дијалог меѓу двете држави и двата народа“, се наведува во писмото, испратено од граѓанското здружение за бугарско-македонско пријателство „Под едно небо“, заедно со Институтот за балкански перспективи, Бугарскиот културен клуб – Скопје и Бугарско-македонската стопанска комора.

Во писмото се збoрува и за постојаните обиди на екстремните националисти во двете земји да го нападнат преговарачкиот процес. „Нивниот пристап до јавните бугарски и македонски медиуми е особено загрижувачки, каде постојано сеат меѓусебна недоверба и омраза, настојувајќи да ги поткопаат новите напори за промена кои се во зародиш. Авторите на писмото зад ваквите постапки ги гледаат пипалата на поранешните агенти на Државната безбедност и УДБА, од кои некои во јавниот простор изложуваат стари и лажни идеолошки пароли, кои звучат примамливо, но се штетни за добрососедските односи“.

Интересно е што само ден претходно, во медиумите се појави и колумната на бугарскиот професор Ивајло Дичев, познат по своите „модерни“ ставови во изнаоѓањето на решение за проблемите врзани со историјата. Дичев, исто како и нашите интелектуалци се залага за надминувањето проблемите со модерни аршини, негодувајќи дека ни Бугарите, ни Македонците не се подготвени да се соочат со минатото. Но, за разлика од Бугарите, според Дичев, Македонците треба да се соочат со нешто многу поделикатно.

„Доколку постои проблем со историјата, тој е поврзан со профашистичкиот режим во Бугарија- соучесник во злосторствата на нацистите и раниот период на југословенскиот комунизам, кога бројни Бугари во југословенска Македонија биле присилно асимилирани“, пишува Дичев.

Значи, Бугарија треба да се соочи со документираниот фашизам, со нешто што е непријатна вистина, но е неприкосновен факт. Додека, пак, Македонија, според Дичев, треба да се соочи со асимилирањето на Бугарите во периодот на раниот југословенски комунизам?!

Прво се спомнува раниот комунизам и асимилирањето на Бугарите – иако веќе рековме дека од другата страна на границата во тој период живеат Македонци кои се брутално асимилирани – за ден подоцна да се упати апел до премиерите на двете држави да се откажат од комунистичото минато, бидејќи пипците на Државната безбедност и на УДБА можеле да се видат постапките на модерните националисти.

Убави тие на Тодор Живков!

За време на фашистичката окупација на Македонија, во делот кој е управуван од Бугарија, се направени бројни злодела. По ослободувањето е воспоставена народна власт предодена од Комунистичката партија на Македонија, која во првите години воспоставува строг режим. Припадниците на тајната полиција (до 1946 година ОЗНА, која потоа се дели на УДБ и КОС) прават бројни пречекорувања на своите задолженија, како и поголем број на кривични дела кои останале неказнети. Сепак, ние немаме право да утврдиме дека агентите на УДБА ја создале македонската нација за да ги асимилираат Бугарите. Не смееме да утврдиме дека Македонија е чедо на Коминтерната или копиле на Резолуцијата на информбирото.

Тоа, едноставно, не е вистина!

Наредната недела бугарскиот премиер Кирил Петков ќе ја посети Македонија, за да ги претстави сопствените замисли со кои сака да ги забрза, но и да ги олесни прегеворите меѓу двете земји, во поглед на спорот со кој се кочат нашите евроинтеграции. Петков смета дека не треба да се разговара само за историјата, туку дека акцент во преговорите треба да стави на економските, инфраструктурните и на културните прашања и врски, кои ќе ги обединат двете земји.

Премиерот во Скопје се очекува да го пречека Димитар Ковачевски, кој би требало да ја состави владата во наредните неколку дена и спремно да се зафати за проблемот, за кој малкумина сметаат дека постои решение. Зошто? Зашто Македонија и Бугарија немаат спор за економијата или културната размена, туку проблемот е во тоа што Бугарите на Македонците гледаат како на фиданки на својот народ, кои по скитањето по беспаќето на историјата, сметаат дека е редно време да се вратат дома. Во Бугарија, во рамките на бугарската нација.

Баш би сакал да видам како ќе изгледа компромисот за овој спор, бидејќи, нели, сите преговори завршуваат со некаков компромис. Дали ќе завршиме како Бугари до пола и во ЕУ ќе влеземе како цели Македонци?

Во една прилика големиот Мирослав Крлежа има кажано дека Србите и Хрватите се едно исто гомно, кое тркалото на историјата го има поделено на пола. Тоа, претпоставувам, може да се каже за сите јужнословенски народи. Тоа дека сите сме едно гомно, само со различна историја.

The post Под живковистичкото „едно небо“ нема место за „удбаши“ appeared first on plusinfo.mk.

Што значи тоа?

Може да значи ништо, но може да значи и многу. Јас сум еден од оние што сакаат да веруваат во јасните пораки и одбивам во изјавата на Петков да барам некаква скриена агенда.

Сите знаеме дека решение на спорот меѓу Софија и Скопје нема да се најде ни во декември оваа година, а богами ни во јануари следната година. Таа приказна беше само обичен маркетиншки трик на Зоран Заев и на Али Ахмети, прво за да се добијат локалните избори, а потоа, по поразот, за да се сочува парламентарното мнозинство што ја крепи владата на СДСМ, на ДУИ и на другите коалициски сателити.

Искреноста на Петков треба да се поздрави, лагите на пропагандата на Заев мора да запрат

Нема брзо и лесно решение за овој спор. Бугарските позиции, дефинирани од бугарскиот парламент во 2019 година, од кои никој во Софија не е спремен да отстапи, значат суштинско оспорување на самобитноста на македонската нација и на македонскиот јазик. Таканаречената заедничка историја треба да се потврди со суштински промени на историските наративи во Македонија, при што во Софија владее уверувањето дека Македонија и Македонците треба да го прифатат своето бугарско потекло. Тоа е суштината на бугарските позиции. И сите што не се заблудени од пропагандата на владата на Зоран Заев и на Али Ахмети тоа многу добро го знаат.

Треба да се поздрави фактот што новиот бугарски премиер Петков потврди дека тој и неговата влада не можат, не смеат и засега сигурно нема да отстапат од тие позиции. „Со нашите коалициски партнери јасно запишавме во коалицискиот договор што треба да се очекува од нас во поглед на проблемот што го имаме со Северна Македонија“, искрено и категорично вели Петков. Да повторам, искреноста на Петков треба да се поздрави, бидејќи е добро конечно да знаеме каде сме и на што сме.

Долго време во Македонија за овие работи се шират лаги и неоснован „медиумски ентузијазам“, како што тоа неодамна беше правилно оценето во софиски кругови. Проблемот со лажните информации за тоа дека спорот ќе се решел уште оваа зима (прво се зборуваше за декември, па за јануари, потем за февруари) е проблем создаден во Скопје, а не во Софија. Лажните надежи ги поттикнаа Зоран Заев и Бујар Османи, како и неколку локални дипломати во Скопје, кои на медиумите им сервираа ноторни лаги дека американскиот „булдожер“ Габриел Ескобар е дојден да го реши спорот со дводневна турнеја во Скопје и во Софија (видовме и чувме, Ескобар мораше самиот да ги демантира тие лаги), а потоа дека постоела некаква француска иницијатива проблемот да се решел во јануари.

Што сè има кажано и ветено најголемиот прекупец на македонската политика?

Изворот на овие лажни вести и фабрикации е владата на Зоран Заев, која, да не заборавиме, е влада во некаква одложена, да не речам хибридна оставка.

А инаку, нема ништо од таа работа. Во една дебата на Алсат-М, речиси пред еден месец, тоа му го кажав во очи и на Бујар Османи – нема ништо од решение во декември, а во јануари можеме да добиеме само датум за скијање!

Не е само проблемот во лагите, кои во Скопје се сервираат од моментот кога батињата Зоран Заев и Бојко Борисов почнаа да го „решаваат“ спорот. Вистинскиот проблем, тоа што им ги врзува рацете на сите добронамерници коишто во иднина ќе ги бранат македонските позиции во преговорите, е што никој всушност не знае што сè Заев им ветил на Борисов и веројатно и на некои значајни фаци од меѓународната заедница. Во едно кобно интервју на Заев за агенцијата БГНЕС, видовме дека тој се обиде на сите нас да ни ја продаде приказната за македонскиот јазик создаден во 1945 година. Под силен притисок на јавноста, Заев го одрече она што го кажал, но кај сите нас чувството на горчина остана. Остана и клучната дилема – што сè има кажано, надробено, но и ветено најголемиот прекупец во македонската политика, во разни прилики и пред разни луѓе?

Како и да е, изборот на новата влада во Софија на чело со Кирил Петков е момент што треба да се искористи преговорите за деценискиот спор меѓу двете земји овој пат да се постават на вистински колосек. Зашто, до сега барем, преговорите шибаа двесте на саат, со две забревтани локомотиви, ама на пруга која воопшто не постои, баш како онаа замислена и никогаш неизградена пруга меѓу Скопје и Софија.

Ни треба нова преговарачка екипа од Македонија, сегашната го потроши својот мандат

Што треба да се стори сега?

Три клучни работи:

Прво, Македонија мора под итно да го смени својот преговарачки тим. Заев, Османи и специјалниот пратеник Владо Бучковски го потрошија својот мандат. Можеби со добра намера, но направија повеќе штета отколку корист. Заев го злоупотреби спорот, за да добие предност во битката на домашната политичка сцена. Потоа изгуби и си даде оставка. Заев веќе и формално не е лидер на СДСМ. Утре нема да биде премиер. Ќе имаме нова влада. Така стојат работите.

Умно би било да се сочека новиот мандатар, најверојатно Димитар Ковачевски, што поскоро да ја формира новата влада, а со тоа да добиеме и нов преговарачки тим, на чело со нов премиер, можеби со нов министер за надворешни работи и бездруго со нов специјален пратеник на премиерот на местото на Бучковски. Новите луѓе ќе внесат нови идеи и нова енергија, а тоа е фактор што не смее да се потцени.

Второ, треба да се прифати иницијативата на бугарскиот премиер Кирил Петков за „надградувањето на бугарската позиција“, како што вели тој. Надградувањето, објаснува Петков, треба да се случи преку заеднички групи, коишто ќе работат секој месец, најмалку еднаш месечно, а во нив ќе се зборува „за заедничка инфраструктура, за заедничка култура и за заеднички економски чекори“. Да се фокусираме на добрососедството, односно на тоа што и двете страни можат да го добијат како добри соседи едни кон други, нагласува Петков.

Мислам дека тоа е одлична идеја за разумно „надградување“ не само на позицијата на Софија, туку на преговарачкиот процес во целина!

Новата македонска влада мора да отвори дебата со опозицијата и со независните интелектуалци во Скопје

Во неколку полемики нагласувам дека за Скопје, но и за Софија, е исклучително важно да преминат од одбрана на своите позиции во спорот кон идентификацијата на сопствените, но и на заедничките интереси и придобивки од добрососедството меѓу двете земји и меѓу двата народа. Во овој момент е многу попаметно двете страни многу повеќе да разговараат за заедничките интереси одошто за заедничката историја. Не велам дека треба да се бега од суштинските теми на спорот, но мислам дека Петков сака да каже дека ни е потребна „надградба“ на платформата на која дипломатите и експертите од двете страни ќе можат да застанат посигурно и потоа пооптимистички да ги отворат спорните прашања за кои Скопје и Софија засега не можат да најдат заеднички јазик.

Дали така ќе се изгуби драгоцено време? Шест месеци можеби? Не, јас мислам дека времето потрошено за изградба на мостови на соработка никогаш не е изгубено. Мислам дека стратегијата на Петков може да биде многу поплодотворна одошто стратегијата на Заев, заснована на лажни ветувања и на обид да се изнуди некаков странски притисок, со кој, како со волшебно стапче, пред Нова година или можеби пред Божик, ќе сме се разбуделе со решение на спорот, кое тој само ќе го потпишел и ќе си заминел во историјата како херој. Тој филм сепак нема да се дава …

И трето, новата македонска влада треба итно да поведе сериозна и искрена политичка дебата со опозицијата, со независни експерти и интелектуалци и со сите кои можат да помогнат Скопје да изгради јасна преговарачка позиција, која нема да отстапи од резолуцијата што ја усвои македонскиот парламент (а која Заев, Османи и Бучковски како да не ја фермаат), но ќе биде доволно „надградена“, ако може така да се каже, за да ѝ овозможи со новата влада во Софија да разговара поотворено и со нови адути во рацете.

Стратегијата треба да биде искрен разговор, без лажни ветувања и без прематарски финти

И да не се лажеме веќе. Никаква меѓувладина конференција, никакви идни и неизвесни преговори за членство на нашата земја во Европската Унија и ничија политичка кариера или опстанок на власт не се и не смеат да бидат легитимна основа за прашањата кои ги засегаат нашиот идентитет, нашиот јазик и историските вистини за Македонија и за Македонците, кој било да разговара или да преговара под притисок и под уцени. Треба еднаш да се разбере дека бугарството не може да биде основа на новиот „европски“ идентитет на Македонија и на Македонците. И дека ние не можеме да отстапиме од вистината за себе.

Ако искрено и отворено се дефинираат интересите на Скопје и на Софија за добрососедство и за соработка, јас см убеден дека може да се дојде до решение за спорот. Тоа е цел за која треба да се вложи креативна енергија, независно дури и од пристапните преговори за членство на Македонија во ЕУ. Искрено се надевам дека новиот бугарски премиер Кирил Петков и новиот македонски премиер час поскоро ќе седнат на маса со намера да разговараат отворено и искрено, со нови идеи за процесот (каква што е идејата на Петков), но овој пат без лажни ветувања, без прематарски финти и секако без товарот што им го оставија Заев и Борисов.

Мислам дека ова треба да биде првата реплика со која мора да почне разговорот меѓу нив двајцата:

– Не е важно за што и како разговарале Заев, Борисов или некој трет, не е важно што си ветиле а не исполниле, не е важно кој е виновен што сме во ќорсокак, ајде сега да почнеме од почеток и да видиме што можеме да сториме ние за доброто на нашите две земји и на двата пријателски народа!

The post Иницијативата на Кирил Петков е разумна, потребен е нов фокус на преговорите меѓу Скопје и Софија appeared first on plusinfo.mk.