„Скечерс“ објави дека двајца нејзини директори го избркале Канје Вест од нивното седиште во Лос Анџелес.

Компанијата објави дека Вест, кој законски го смени своето име во Је, „пристигнал ненајавено и непоканет“. Оттаму додаваат дека тој „неовластено снимал“ во зградата и дека бил испратен „по краток разговор“.

„„Скечерс“ не размислува и нема намера да работи со Вест“, се вели во соопштението на компанијата. „Ги осудуваме неговите неодамнешни изјави за поделби и не толерираме антисемитизам или која било друга форма на говор на омраза“, додаваат тие.

Посетата на Вест на „Скечерс“ доаѓа еден ден откако „Адидас“ ја прекина соработката со него. Причината се антисемитските коментари на раперот.

„Адидас не толерира антисемитизам или кој било друг вид говор на омраза. Неодамнешните коментари и постапки на Је беа неприфатливи, полни со омраза и опасни и ги нарушуваат вредностите на компанијата како што се почитување на различностите и меѓусебното почитување“, објавија тие во соопштението испратено до американските медиуми.

„Компанијата донесе одлука веднаш да го прекине партнерството со Јe, производството на производи од брендот Yeezy и да ги запре сите плаќања на Јe и неговите компании. „Адидас“ веднаш ќе ја прекине соработката со Adidas Yeezy“, објавија тие.

Портпаролот на музејот „Мадам Тисо“, пак, објави дека ја отстранил восочната фигура на Вест.

„Секоја славна личност го заслужува своето место во музејот „Мадам Тисо“ во Лондон, но ние ги слушаме нашите посетители и јавноста за тоа кого сакаат да видат во музејот“, објавија тие.

Фигурата на Вест првично беше откриена во музејот во 2015 година заедно со восочната фигура на неговата тогашна сопруга Ким Кардашијан.

Потсетуваме дека поради неговите антисемитски ставови, за кои упорно одбиваше да се извинува, договорот со Вест го раскина и модната куќа „Баленсијага“.

Имено, раперот на Инстаграм инсинуираше дека раперот Диди е контролиран од Евреи. Објавата на Вест се состоеше од слики од екранот од неговиот разговор со Диди за контроверзните маици „White Lives Matter“ што ги претстави на модна ревија во Париз.

Покрај тоа, тој напиша на Твитер дека наскоро ќе влезе во „defcon3 против Евреите“, мислејќи на скалата за подготвеност на американската војска позната како DEFCON. Објавата набрзо беше отстранета, а профилот на Вест на социјалните мрежи беше привремено блокиран.

The post КАНЈЕ ВЕСТ ИСФРЛЕН ОД ЗГРАДАТА НА „СКЕЧЕРС“ Раперот во нови проблеми appeared first on plusinfo.mk.