Премиерот Христијан Мицкоски во вечерашното интервју за јавниот сервис изјави дека не постои значително девијантно однесување со цените на пазарот, но призна дека животот е скап и тежок. Како што рече, Владата работи на тоа инфлацијата да се движи меѓу два и три проценти, а платите да имаат реален нето раст од пет до шест проценти.

– Се согласувам со граѓаните дека е скапо и се живее тешко, но тоа не е проблем што е создаден сега, туку нешто што трае со децении. Прашањето е дали како потрошувачи сакаме да учествуваме во овој процес рамноправно со продавачите – доколку нешто е погрешно декларирано, да го пријавиме, бидејќи има каде да се пријави – рече Мицкоски.

Тој додаде дека Владата досега применувала „ад хок“ мерки кои, според него, го намалиле растот на инфлацијата. Во моментов, инфлацијата повторно се зголемила и е над три проценти, но целта останува, стабилизација помеѓу два и три проценти.

– Кога ќе се одземат ефектите од инфлацијата, сакаме платите реално да растат со пет-шест проценти. Тоа можеме да го постигнеме со контроли, здрава бизнис средина, без политички притисоци и со покачување плати каде што е можно – истакна тој.

Премиерот предупреди дека нема инстант решенија и дека промени не се случуваат преку ноќ.

– Дури и ако просечната плата е над 1.000 евра, пак ќе се живее тешко. Но можеме да го ублажиме тоа – и токму тоа го правиме и ќе продолжиме да го правиме – порача Мицкоски.

Тој рече и дека не се согласува со цените што се прикажуваат на пазарите, како тврдењата дека доматите чинат 120 денари – што, според него, можеби било точно пред три-четири недели.

Во делот на транспарентноста и контролата, премиерот најави дека Владата работи на нова апликација за споредба на цени во маркетите. Претходниот модел со прикачување списоци во ПДФ-формат не бил ефективен, призна тој.

– Згрешивме во уредбата. Наместо вистинска транспарентност, маркетите лепеа илјадници артикли во ПДФ на своите веб-страници. Тоа е трик. Не знам зошто имаат потреба од трикови, не сме ние глупави – кажа Мицкоски, најавувајќи бесплатно софтверско решение.

Во врска со земјоделството, премиерот информираше дека се исплатени над девет милијарди денари субвенции – заостанати и тековни, а мерките, како што рече, ги стимулирале откупните цени за земјоделците.

– Порано се договараа со откупувачите, им дозволуваа монопол и им нудеа ниски цени. Сега не се договараме со нив, туку ги притискаме да дадат повисоки цени – изјави тој.

Како показател за успехот, Мицкоски го посочи соодносот меѓу импутот (трошоците) и аутпутот (продажната цена).

– Импутот е зголемен за 2%, а аутпутот за 11%, што е петпати повеќе. Тоа го покажуваат податоците на Заводот за статистика и тоа е резултат на новиот пристап – заклучи премиерот.

The post СКАПО Е, АМА TOA НЕ Е ОД ВЧЕРА Мицкоски вели дека нема девијантни цени, Владата сака реален раст на платитте appeared first on plusinfo.mk.