Европската Унија мора да го промени системот за пристапување на нови членки, за да одговори на потребите на Украина, вели еврокомесарката за проширување, Марта Кос.

Во интервју за „Фајненшл тајмс“ таа оцени дека Брисел мора да биде иновативен, но, без оглед на евентуалната реформа на процесот на проширување, ќе нема отстапки за основните принципи и стандарди поврзани со владеењето на правото, судската независност и борбата против корупцијата.

Таа побара од земјите-членки брзо да постигнат договор за различен систем за прием на нови земји, бидејќи Брисел стравува дека кандидатурата на Украина за членство ќе го преоптовари застарениот модел на пристапување.

Според Кос, ригидниот, децениски стариот пристап кон проширувањето во Брисел, со кој последен пат нова членка е примена во ЕУ во 2013 година, е во конфликт со верувањето дека приемот на нови држави е геополитичка неопходност, особено во случајот со Украина, која се бори против руската инвазија повеќе од 4 години.

– Ако постои вистинско време за забрзување на проширувањето, тоа е сега. Време е главните градови на ЕУ да преминат од зборови на дела. Не сум на оваа позиција за да управувам со статус кво – рече Кос.

Брањето на Марта Кос следува по предлогот на германскиот канцелар Фридрих Мерц за воведување статус на „придружна членка“ за Украина, со бенефиции и интеграција што би биле помалку од полноправно членство, додека Киев ги спроведува правните реформи потребни за формален влез во ЕУ.

Овие идеи наидоа на поделени реакции меѓу другите земји-членки на ЕУ, но и во самата Украина. Претседателот Володимир Зеленски рече дека предлогот на Мерц е неправеден, бидејќи ќе ѝ даде на неговата земја право да учествува на состаноците на ЕУ, без право на глас.

На прашањето дали Европската комисија го поддржува предлогот на Мерц, еврокомесарката Кос рече дека е „корисен, затоа што ни е потребна сериозна дебата“.

– Ја поддржувам дебатата. Ова е една од идеите и е добар почеток за разговорот… Доведувањето на проширувањето до крај е тема за лидерите. Не знам каде ќе води ова, но се согласувам дека мора да најдеме решение, нешто различно од она што го користиме денеска – рече Кос.

Таа додаде дека лидерите на ЕУ со кои таа разговарала приватно ѝ рекле дека сакаат „комбинација од принцип базиран на заслуги и повеќе можности за постепена интеграција“.

– Ако го направиме ова правилно, би можеле да изградиме силен континент, способен да им се спротивстави на противниците кои сакаат да нè видат како пропаѓаме. Но, ако не го направиме тоа правилно, другите ќе се вмешаат и нема да се двоумат да ја искористат целата своја моќ против нас – додаде таа.

Ова е навистина многу повеќе од само проширување, порача комесарката.

– Станува збор за нашата иднина. Затоа се надевам дека лидерите ќе го препознаат ова и ќе покажат решителност и единство во грижата за иднината на нашата Европска Унија – рече Кос.

Кос оцени дека барањето на Зеленски Украина да се приклучи на ЕУ веќе следната година е невозможно, но дека имало позитивен ефект, бидејќи донело итност во дебатата. Таа ја брани идејата за прилагодување на процесот на пристапување кон специфичната ситуација на Киев.

Навести и дека „вештачкото поврзување“ на процесот на пристапување на Украина и Молдавија би можело да заврши ова лето, со отворање на формални преговори за двете земји.

– Ќе видиме кој ќе испорача резултати, кој ќе може да направи повеќе. Украина е едноставно премногу голема за да пропадне. Затоа заслужува посебно внимание. Еден ден ќе имаме мир. Знаете, повеќе се плашам од тој ден, ако дојде пред да бидеме подготвени. Бидејќи тогаш ќе се постави прашањето: „Дали сме способни да испорачаме?“ Колку побрзо добиеме насоки, толку полесно ќе ни биде да се подготвиме – заклучи Кос.

Кос го даде интервјуто пред состанокот на шефовите на дипломатиите на ЕУ во Кипар, каде што главна тема е ставот на ЕУ кон Украина, Русија и кон војната, како подготовка за самитот на лидерите на ЕУ во јуни.

The post ЕУ ТРЕБА ДА ГО СМЕНИ СИСТЕМОТ ЗА ПРИЕМ НА НОВИ ЧЛЕНКИ Ако утре заврши војната во Украина, како ќе ѝ испорачаме членство на земјата? appeared first on plusinfo.mk.