Околу 228 милиони луѓе ширум светот, претежно деца, се изложени на ризик од заразување со други болести бидејќи програмите за вакцинација се стопирани поради пандемијата со ковид-19.

Педесет земји низ светот, на пример, не вакцинираат против сипаници, детска парализа или жолта треска, соопштија СЗО и УНИЦЕФ.

Сипаниците беа закана уште пред коронавирусот

Сипаниците беа закана дури и пред пандемијата предизвикана од ковид-19, но сега милиони деца не биле вакцинирани против оваа многу заразна болест.

– Пандемијата ја влоши претходно лошата состојба – рече извршната директорка на УНИЦЕФ, Анриета Форе.

Конго, Пакистан и Јемен се особено погодени.

Еден од проблемите е прекинот во синџирот на снабдување. УНИЦЕФ минатата година можеше да дистрибуира само 2,01 милијарди вакцини, наспроти 2,29 милијарди во 2019 година.

Нова иницијатива

СЗО и УНИЦЕФ покренаа нова иницијатива насочена кон вакцинирање 90% од сите малолетници во светот против сипаници, заушки, рубеола, хепатитис, туберкулоза и детска парализа.

Тоа треба да спречи 50 милиони смртни случаи до 2030 година.

Двете агенции на ООН ги повикуваат побогатите земји и фармацевтските компании да инвестираат повеќе во истражување на вакцините и да ги финансираат кампањите за вакцинација на жителите до кои е тешко да се стигне.

The post Милиони деца не примаат други вакцини поради пандемијата со ковид-19 appeared first on plusinfo.mk.