Светиот архијерејски синод (САС) на Македонската православна црква – Охридска архиепископија (МПЦ – ОА) денеска на редовна седница формира комисија за решавање на материјалната состојба на новоформираните епархии.

На седницата за нов член во постојаниот (работен) состав на Синодот е избран митрополитот Струмички г. Наум, а негов заменик митрополитот Европски г. Пимен.

„Светиот архијерејски синод (САС) на Македонската православна црква – Охридска архиепископија (МПЦ – ОА), на својата редовна седница во полн состав, одржана на 26 мај 2026 година, разгледа повеќе прашања и настани поврзани со животот на нашата Света Црква. Светиот синод ги разгледа и ги усвои годишните извештаи од епархиите на МПЦ – ОА во татковината и дијаспората при што обрна посебно внимание на оние показатели кои сведочат за демографската состојба кај македонскиот православен народ. Воден од пастирска грижа, Светиот архијерејски синод, одлучи да формира Фонд за поткрепа на многудетни семејства“, соопшти МПЦ-ОА по седницата.

Разгледувајќи ја состојбата на духовното и културно богатство на македонските храмови и манастири, Синодот со жалење констатирал дека заради немање доволно стручни кадри кои би го конзервирале, тоа се наоѓа во лоша состојба.

Светиот Синод апелира до надлежните институции неодложно да преземат соодветни мерки со цел да се зачува она што е оставено од нашите претходници.

Како основач на воспитно-образовните институции при МПЦ – ОА, Синодот ја поздравил работата на Управата на Богословијата, која учебната 2025/26 година спроведе наставна програма од 4 години, а денот за упис на нови ученици ќе биде на 19 јуни 2026 година.

The post МПЦ ЌЕ ФОРМИРА ФОНД ЗА ПОМОШ НА МНОГУДЕТНИ СЕМЕЈСТВА Нема кој да го конзервира духовното богатство appeared first on plusinfo.mk.

Светиот архијерејски синод (САС) на Македонската Православна Црква – Охридска Архиепископија (МПЦ – ОА) денеска на редовната седница изрази поддршка до Украинската православна црква, која беше укината од украинската власт.

„Синодот посвети особена грижа за состојбата со сестринската Украинска православна црква, која беше административно укината од украинскиот парламент, со предлог-законот 8371, и со тоа на милиони верници, кои се црквуваат во таа Црква, им е оневозможено основното право на верска припадност, исповедање на својата вера и вршење на богослужби“, соопшти Синодот на МПЦ-ОА.

Светиот синод, се додава во соопштението, сведочејќи ја евангелската вистина, искажува молитвена поддршка на Претстојателот на Украинската православна црква, Неговото блаженство митрополит Киевски и на цела Украина г. Онуфриј, на браќата архијереи и на нејзиниот верен народ.

„Се молиме семилостивиот Господ да им даде сила да истраат и да ги надминат овие искушенија. Истовремено, Светиот синод се моли за единство на сите помесни православни цркви, кои го сочинуваат Телото Христово“, се вели во соопштението.

The post НА МИЛИОНИ ВЕРНИЦИ ИМ Е ОНЕВОЗМОЖЕНО ПРАВОТО НА ВЕРСКА ПРИПАДНОСТ Синодот на МПЦ-ОА изрази поддршка на Украинската православна црква appeared first on plusinfo.mk.

„Ова е класична американска игра“.

Вака портпаролот на Синодот на Македонската православна црква (МПЦ-ОА), г. Тимотеј, во изјава за Плусинфо ги коментира вчерашните тврдења на професорот Марјан Ѓуровски од Институтот за безбедност на Филозофскиот факултет, кој на дебатата „Улогата и влијанието на религијата во современото општество“, рече дека македонски владици „се вмешани во шпионажа за незападни разузнавачки служби, а тоа претставува безбедносен ризик и закана и за македонската црква внатре, но и за државата, бидејќи поттикнува раздор, ја нарушува социеталната, идентитетската безбедност и е дополнителен товар и за признавањето на МПЦ-ОА“.

Ова е класична американска игра. Гледате, кога тие еднаш ќе кажат нешто, нашите не чекаат да им се каже двапати.

г. Тимотеј Портпарол на Синодот на МПЦ-ОА

Ваквото тврдење Ѓуровски го поткрепи со цитат на претседателот на државата Стево Пендаровски, кој изнел информации дека „членови на Синодот се соработници на руската разузнавачка служба врз основа на сознанија кои се строго доверливи“.

Митрополитот дебарско-кичевски и портпарол на Синодот на МПЦ-ОА, г. Тимотеј, нема информација дали некој македонски владика е повикан на разговор во однос на обвинувањата за шпионажа.

– За себе можам да тврдам дека не се занимавам со такви работи, а искрено, не мислам дека ниту другите владици и членови на Синодот се занимаваат со шпионажа. Има една српска поговорка која гласи: „у страху су велике очи“. Ова е класична американска игра. Гледате, кога тие еднаш ќе кажат нешто, нашите не чекаат да им се каже двапати. Немам информација дали некој македонски владика и член на Синодот е повикан на разговор поради обвинувања за шпионажа. На крајот на краиштата, секој владика си има име и презиме, па нека излезе претседателот на државата и нека каже дека конкретно тој и тој човек соработува со странски служби на штета на Македонија. Оти, вака, и ние би можеле да излеземе и да кажеме, на пример, дека шефот на државата е предавник на својот народ. Но, како ќе го докажеме тоа што го кажуваме? Затоа, и претседателот е должен да ги докаже тврдењата, а не само да ги каже – ни изјави г. Тимотеј.

Професорот Ѓуровски вчера посочи и дека има информации оти македонски владици одржуваат тајни средби во Белград со луѓе кои држеле литургии во македонските цркви, а кои се прогласени за непожелни личности од речиси сите земји-членки на НАТО.

– Верувам дека архиепископот на МПЦ-ОА е запознат и сѐ зависи од нив. Добронамерно и сериозно треба да се сфатат укажувањата од државата и да не се потценуваат затоа што оние кои ни шетаа во Архиепископијата и држеа литургии во македонските цркви денеска имаат забрана и се прогласени за непожелни личности од речиси сите земји членки на НАТО. Со нив се остваруваат контакти на тајни средби во Белград. Тоа е голем безбедносен ризик, можеби не сега веднаш, но долгорочно ќе ги имаме последиците – изјави Ѓуровски.

Плусинфо денеска испрати прашања до Кабинетот на претседателот Стево Пендаровски:

„Како претседателот Стево Пендаровски ги коментира тврдењата на професорот Марјан Ѓуровски? Каде и во која прилика шефот на државата го искажал тврдењето дека членови на Синодот на МПЦ-ОА соработуваат со странски безбедносни служби? Дали претседателот Стево Пендаровски, доколку навистина тврди дека членови на Синодот на МПЦ-ОА се вмешани во шпионажа, го информирал Основното јавно обвинителство и поттикнал започнување постапка?“.

Оттаму ни одговорија дека претседателот смета оти нема потреба од дополнително произнесување од тоа што веќе го кажал јавно за оваа тема.

„ЧЛЕНОВИ НА СИНОДОТ НА МПЦ-ОА СЕ ВМЕШАНИ ВО ШПИОНАЖА“ Професорот Марјан Ѓуровски предупредува за голем безбедносен ризик

The post „НИКОЈ ОД НАС НЕ СЕ ЗАНИМАВА СО ШПИОНАЖА, ОВА Е КЛАСИЧНА АМЕРИКАНСКА ИГРА“ Владиците на МПЦ-ОА бараат објаснување од Пендаровски appeared first on plusinfo.mk.

Ова за Плусинфо го тврдат високи црковни извори кои појаснуваат дека одлуката за признавање на општопризнатиот автономен статус на МПЦ-ОА доделен во 1959 година е резултат на саботното молбено писмо што го испратил Синодот на МПЦ-ОА до СПЦ.

Нашите соговорници посочуваат дека воопшто не се оправдани, ниту, пак, добронамерни, жестоките критики на дел од македонската јавност која неоправдано смета дека потегот на СПЦ всушност претставува „тројански коњ“ и назадување за МПЦ-ОА, бидејќи, како што објаснуваат, бидувањето автономна црква на макар и два дена е задолжителен дел од постапката која води до добивање автокефален статус.

– МПЦ-ОА во саботата испратила молба до Соборот на СПЦ, која вчера се прочита пред цел Собор, а со која моли да биде вратена во состојбата до 1959 година. На Соборот ја прифативме молбата да ги вратиме во литургиско и канонско единство како до 1959 година и отсега па натаму ќе се решаваат административните прашања – брифираше за Плусинфо владика кој е дел од Соборот на СПЦ.

Молкот на МПЦ-ОА е добар знак

Според нашите соговорници, молкот на владиците на МПЦ-ОА по вчерашната одлука на СПЦ е само резултат на она што допрва треба да следува.

– Штом постои писмен акт, односно било испратено писмо со молба од МПЦ-ОА до СПЦ, и штом првата одлука за извлекување од расколот се носи на првиот ден на Соборот на СПЦ, тогаш треба да очекуваме други многу поважни одлуки да се носат во следните денови, сѐ додека трае Соборот. Постои голема веројатност МПЦ-ОА и СПЦ веќе да се имаат тајно договорено за доделување автокефалност, но процедурата вели дека за да се дојде до автокефалија мора претходно да се помине преку автономија. Доволни се и само два дена, не мора тоа да трае со месеци или со години. Ова не е легализација на дивоградба, туку враќање на една православна црква во единството. И затоа мора да постои ред и да се почитуваат правилата. Но, штом СПЦ донесе толку важна одлука уште рано наутро на првиот ден на Соборот, тогаш треба да очекуваме и други одлуки. Затоа и молкот на МПЦ-ОА е добар знак. Македонските владици чекаат да се реализираат договорените втор и трет чекор, па тие тогаш да излезат со официјално соопштение. Ако вчерашната одлука беше крајниот исход, тогаш Синодот на МПЦ-ОА ќе излезеше вчера со официјален став и ќе го бранеше крајниот исход. Затоа, да почекаме, оти очигледно се наоѓаме на самиот почеток, а не на крајот – објаснуваат нашите соговорници.

Злонамерни критики

Во однос со преговорите со Вселенската патријаршија, нашите извори уште еднаш ја потенцираат реченицата од неодамнешното соопштение од Цариград, којашто голем дел од македонските медиуми, намерно или случајно, ја беа прескокнаа и не ја пренесоа, а која е суштествена и која гласи: „Ве враќаме во канонското единство, но оставаме проблемот да си го решите со СПЦ“.

– Цариград имаше решение дека ја отстранува шизмата на црквата којашто не ја нарекува по име, а архиепископот г.г. Стефан не го нарекува по титула. Значи, не се знае г.г. Стефан на која црква е архиепископ, а и не се знае името на црквата на којашто тој е архиепископ. Вселенскиот патријарх јасно ни наведе дека ја отстранува шизмата, но сите проблеми да си ги решиме со СПЦ. Тоа во превод значи дека МПЦ-ОА нема друг избор, односно со Цариград веќе е донесена одлука дека решението треба да се бара во Белград. Затоа, паѓаат во вода сите жестоки критики од новинари, црковни аналитичари и експерти. Сите тие реакции се злонамерни и таквиот став не е во интерес на македонскиот народ и очигледно таквите напади се одвиваат под нечиј надворешен диктат. Прво, не постои друго решение. Цариград јасно ни соопшти дека решението е во СПЦ. Второ, Цариград вели дека црквата од Скопје не смее да делува надвор од рамките на Македонија и дека таа црква не смее да се нарекува со име коешто во себе го користи зборот „Македонија“. Критичарите нека им објаснат на луѓето колку е добро да имаме црква, а да не смееме да се нарекуваме со „тоа на М“. Исто така, во истата одлука на Цариград е наведено дека Македонската црква ќе може само да делува во границите на Македонија. Тоа значи дека МПЦ-ОА ќе ја загуби дијаспората. Од друга страна, пак, во вчерашното соопштение од СПЦ можете јасно да прочитате дека СПЦ нема да ѝ поставува услови на МПЦ-ОА во однос на именувањето и во однос на дијаспората – велат изворите.

ВЕ ВРАЌАМЕ ВО ЛИТУРГИСКО ЕДИНСТВО И НЕ ВИ ПОСТАВУВАМЕ УСЛОВИ Какви одлуки донесе Соборот на СПЦ за МПЦ-ОА?

The post ВЧЕРАШНАТА ОДЛУКА НА СПЦ БИЛА САМО ЗАГРЕВАЊЕ? Допрва ќе се влечат најважните потези во корист на МПЦ-ОА appeared first on plusinfo.mk.