Започна акција за чистење и уредување на Железничката станица во Скопје, која со децении, како што наведуваат надлежните, била оставена без соодветна грижа и станала визуелно и функционално запуштен објект во центарот на главниот град.

Директорот на ЈП „Железници Инфраструктура“, Синиша Ивановски, преку објава на својот Фејсбук профил информира дека веќе се преземаат конкретни мерки за подобрување на надворешниот и внатрешниот изглед на станицата, како дел од подолгорочен процес на реконструкција.

Според него, првичните активности опфатиле отстранување на билборди, светлосни реклами и постери кои со години биле поставени на објектот, како и започнување на генерално чистење на просторот.

„По декади запуштеност се чисти Железничката станица во Скопје. Железничката станица во Скопје треба да претставува гордост на главниот град. Декади запуштеност и немање институционална и општествена грижа, за жал, ја претвори во тотално не-репрезентативен објект“, наведува Ивановски.

Тој додава дека процесот нема да биде брз, но дека институцијата започнува систематски пристап кон враќање на функционалноста и изгледот на објектот.

„Превземаме мерки за подигнување на нивото на надворешниот и внатрешниот изглед преку долготрајна акција и сет на активности“, стои во објавата.

Во рамки на првите чекори, останал само еден светлосен рекламен панел, за кој, како што посочува, доколку не биде отстранет во рок од седум дена, договорот за закуп ќе биде раскинат.

Ивановски информира и дека паралелно се работи на поширок план – во соработка со Архитектонскиот факултет се подготвува проект за целосна реконструкција, додека ИЗИИС ја испитува конструктивната состојба на објектот.

„Процесот на враќање на нормалниот изглед нема да биде лесен, но да почнеме денес“, порача директорот.

Тој додаде и дека во рамки на објектот функционира полициска станица и се заблагодари за нивната соработка.

The post 📷 📽️ СЕ ЧИСТИ ЖЕЛЕЗНИЧКАТА СТАНИЦА ВО СКОПЈЕ По децении запуштеност започна акција за враќање на нејзиниот изглед appeared first on plusinfo.mk.

Изградбата на втората фаза на пругата од Бељаковце до Крива Паланка на источниот дел од Коридорот 8 се реализира со засилена динамика, објави директорот на ЈП Железници Инфраструктура, Синиша Ивановски.

„Градежни активности на изградбата на пругата кон Бугарија. Секција 2, од Бељаковце кон Крива Паланка. Должина 34 километри. Прогрес 35%. Бележиме зголемен интензитет на градежните активности“, објави Ивановски на својот профил на Фејсбук.

Министерството за транспорт соопшти дека е објавен јавниот повик за надзор за третата делница од Крива Паланка до границата со Бугарија. Следниот месец се очекува да се распише и меѓународниот јавен повик за избор на изведувач за делницата Крива Паланка-граница.

„Со ова Владата ја покажува јасната стратегија за изградба на железничкиот Коридор 8, како стратешко економски и безбедносен коридор со посебно значење за Македонија и регионот“, соопшти Министерството за транспорт.

The post 🎥 ИНТЕНЗИВНО СЕ ГРАДИ ПРУГАТА КОН БУГАРИЈА Се оформува делницата од Бељаковце до Крива Паланка appeared first on plusinfo.mk.

Директорот на Железница Инфраструктира Синиша Ивановски информира дека почна постапката за средување на железничката станица во Скопје.

„Во насока на ослободување на просторот и оригиналниот изглед на железничката станица, започнавме со отстранување на сите билборди, светлосни реклами и останати информативни реклами кои години и декади наназад го нарушуваат автентичниот изглед на станицата“, напиша тој на Фејсбук и им се заблагодари на компаниите кои се согласиле да ги тргнат билбордите.

Според директорот Железница Инфраструктура проектот за средување на железничката станица во Скопје ќе се одвива во фази и ќе заврши со генерално чистење на надворешниот изглед на станицата како и соодветна илуминација.

The post 🎥 ПОЧНА ЧИСТЕЊЕТО НА ЖЕЛЕЗНИЧКАТА СТАНИЦА ВО СКОПЈЕ Отстранет е првиот билборд appeared first on plusinfo.mk.

Железничката станица Скопје ќе добие изглед на модерна железничка станица, архитектонско решение на спој на стариот изглед од Кензо Танге со додадени нови модерни елементи, вели директорот на ЈП Железници инфраструктура, Синиша Ивановски, во неделното интервју за Радио Слободна Европа.

Проектот се работи заедно со Градежниот и со Архитектонскиот факултет, а во моментов се отстрануваат рекламните паноа.

– Почнавме проектирање за целосна реконструкција на железничката станица Скопје и внатрешно и надворешно. Станицата ќе се реконструира комплетно со нова електрика, комунална инфраструктура, машински дел, а надворешно ќе биде запазен првичниот изглед од Кензо Танге со имплементација на нови современи елементи. Овој проект треба да биде готов за година и пол до две од денес. Потоа ќе бараме финансирање за тој да се реализира – рече Ивановски.

Во меѓувреме е почната акција за отстранување на сите билборди што ја грдат станицата.

-Дел се постоечки, дел се пред дваесетина години. Потоа имаме една голема акција да ги отстраниме сите графити, сите постери и да ја вратиме првичната боја на столбовите и да го запазиме првичниот изглед без овие графити, постери итн. – вели Ивановски.

The post ЖЕЛЕЗНИЧКАТА СТАНИЦА ЌЕ ДОБИЕ МОДЕРЕН ЛИК Се отстрануваат билбордите кои ја грдат станицата appeared first on plusinfo.mk.

Планот е да има две пруги на релација север-југ. Сегашната пруга ќе се користи и ќе се исправат кривини на места каде што тоа е возможно за да се забрза сообраќајот, а втората пруга ќе се гради колку што е можно поблиску до сегашната за што веќе се прават испитувања, вели директорот на ЈП Железници инфраструктура, Синиша Ивановски, во неделното интервју за Радио Слободна Европа.

– Нашиот план има две компоненти. Првата е да ја задржиме постоечката пруга, но мораме да ја исправиме каде што има големи кривини. Големи брзини од преку 120 км и преку 160 км на час не може да се постигнат без исправање на кривините. Во моментов се вршат испитувања и тие студии ќе покажат колку од оваа траса ќе ја задржиме, каде ќе има простор кривините да се исправат. Втората компонета е колку што може поблиску до сегашната траса да биде изградена и втората линија. Затоа овие околу 200 км пруга би биле двоколосечен сообраќај, но нема да бидат како автопатите, на пример еден да оди во правец на Србија, друг во правец на Грција. Во управувањето на железничкиот собраќај има друг тип на управување на возовите, но нашата крајна цел е да има двоколосечна пруга за патнички сообраќај до 200 км на час и товарен до 120 км на час, како и да биде целосно електрифицирана. Токму во овој момент се прават физибилити студиите кои ќе покажат каде е најдоброда биде трасата на новата пруга, со тие исправување на старата пруга и паралелна до старата – вели Ивановски.

Тој истакнува дека изградбата би чинела околу 1,9 милијарди евра заедно со електрификација и сигнализација, а би се завршила за околу пет години.

The post ЌЕ СЕ ГРАДИ ДВОКОЛОСЕЧНА ПРУГА ПО КОЈА ЌЕ СЕ ВОЗИ 200 КМ НА ЧАС Ќе се исправаат кривини на постоечката пруга appeared first on plusinfo.mk.

Од Железничката станица Зелениково до центарот на Скопје наскоро ќе се патува за само 25 минути, а од Драчево до градот за околу 11 до 13 минути.

Ова го најави директорот на ЈП „Железници инфраструктура“, Синиша Ивановски, при увидот на ремонтните активности на пругата, во присуство на премиерот Христијан Мицкоски, вицепремиерот и министер за транспорт Александар Николоски и градоначалникот на Скопје, Орце Ѓорѓиевски.

Се работи за првата фаза од проектот „Градски воз“, која опфаќа ремонт на 25 километри железничка линија од Зелениково до Скопје. Според Ивановски, во тек се и активности на делницата Драчево – Илинден, долга 7,7 километри, која ќе биде наменета исклучиво за товарен сообраќај.

– Првата фаза на „Градски воз“ ќе биде завршена за најмногу шест месеци. Втората делница, од Драчево до Илинден, ќе биде готова до Нова година. И двете пруги се електрифицирани, што значи дека дизел-возовите нема да влегуваат во Скопје – изјави Ивановски.

На оваа траса се наоѓаат седум железнички станици, кои ќе овозможат побрзо, поефикасно и поеколошко патување до центарот на градот.

Ремонтот на делницата Драчево – Илинден чини 3 милиони евра, а реконструкцијата од Зелениково до Скопје 5,7 милиони евра.

– Ова е значаен проект кој ќе ја подобри мобилноста во регионот и ќе придонесе за намалување на загадувањето – додаде Ивановски.

Градоначалникот Орце Ѓорѓиевски истакна дека Град Скопје ќе се вклучи логистички во процесот, а новите железнички точки ќе се поврзат со мрежата на ЈСП „Скопје“ за подобра координација на јавниот превоз.

– Она што некогаш изгледаше како сон, денеска станува реалност. Конечно нудиме алтернатива за граѓаните, особено по проблемите со нефункционалноста на ЈСП – рече Ѓорѓиевски.

Вицепремиерот и министер за транспорт Александар Николоски нагласи дека визијата за „Градски воз“ конечно се реализира.

– Со ремонтот на делницата од Драчево до Илинден ќе се зголеми и карго сообраќајот, а со тоа и економската ефикасност – изјави Николоски.

Премиерот Христијан Мицкоски оцени дека проектот ќе помогне да се растовари сообраќајниот метеж во Скопје и да се намали емисијата на штетни честички во воздухот.

– Ова е еден од проектите што директно придонесуваат за почист воздух. Конечно го започнуваме и БРТ системот, кој ќе бара изградба на нов мост преку Вардар. Сите овие инфраструктурни проекти ќе имаат позитивно влијание врз животната средина и ќе го намалат загадувањето во текот на целата година – изјави премиерот.

Директорот Ивановски најави дека следната година ќе започне проектирањето на втората делница од „Градски воз“  од Волково до Скопје, а во 2027 година ќе започне изградбата на последниот дел, Миладиновци – Илинден – Скопје.

The post ОД ЗЕЛЕНИКОВО ДО СКОПЈЕ ЗА 25 МИНУТИ Почна првата фаза од „Градски воз“, ќе биде готова за половина година appeared first on plusinfo.mk.

Директорот на Железници инфраструктура, Синиша Ивановски, објасни дека пругата Скопје-Кичево ќе биде реконструирана со фокус на животната средина и на екологијата така што ќе биде целосно електрифицирана со што загадувањето ќе биде значајно намалено. Ивановски го имаше своето излагање на денешниот Саем-отчет по повод „4 години работа за тебе“.

– Во овој момент постоечка железница постои кон Скопје преку Тетово-Гостивар до Кичево меѓутоа години наназад не е во функција, оваа делница ќе биде целосно реконструирана и притоа мислејќи на животната средина, на екологијата, ќе биде целосно електрифицирана со што загадувањето ќе го намалиме премногу – рече Ивановски.

Ивановски потенцираше дека за една до 2 години ќе има зрел проект со цел државата да може да тендерира и да отпочне целосна реконструкција од Скопје завршувајќи до Кичево, со што рокот за завршување би бил во периодот од 2031-2032 година.

– Рокот за завршување на целата работа би бил некаде 2031-2032 година поради тоа што градење пруги е доста комплексна работа, не е само желба да се гради, меѓутоа има многу студии коишто претходно мора да биде изработени, да бидат направени, да се запази екологијата, да се запази исплатливоста, да се одреди самата траса каде ќе се случува, тоа во соработка со европските банки се случува овој период со надеж дека некаде помеѓу 1 и пол до 2 години ќе имаме зрел проект и државата ќе може да тендерира и да почне целосна реконструкција од Скопје кон Гостивар-Тетово завршувајќи до Кичево – истакна Ивановски.

СЕ РАБОТИ НА ЦЕЛОСНО АВТОПАТСКО ПОВРЗУВАЊЕ НА СКОПЈЕ-БИТОЛА Штип ќе го добие првото вештачко туристичко езеро

The post ЌЕ СЕ ЕЛЕКТРИФИЦИРА ПРУГАТА СКОПЈЕ-КИЧЕВО Целта е драстично да се намали загадувањето appeared first on plusinfo.mk.

Македонија ќе има годишен приход од 100 до 120 милиони евра само во товарниот сообраќај со предвидената изградба на брзата пруга на Коридорот 10, изјави во гостување на Сител директорот на МЖ Инфраструктура Синиша Ивановски. Според него „целта е да имаме брз и ефикасен транспорт, да се забетонираме на мапата на карго Европа“.

– Се очекува годишен приход од 100 до 120 милиони евра само во товарниот сообраќај заради тоа што пристаништата во Атина, Солун, Александропулос и во Кавала постојано бележат нагорна линија, најбрзиот пат е преку Македонија, треба да ја искористиме нашата позиционираност – посочи Ивановски.

Набавката на брзите возови, како што рече, е одговорност на МЖ Транспорт.

– Сигурно дека за пет години од сега мора да имаме нови возови, не само тоа, ние со постоечките возови нема да можеме да влеземе во Европската унија. Мора да се набават возови и локомотиви што ги исполнуваат стандарите и тоа е во планот на Владата, да се набават нови возови – рече Ивановски.

Според директорот на МЖ Инфраструктура, за пет години ќе се заврши и реконструкцијата и изградбата на новата пруга, а и двете ќе се користат и за патнички и за товарен сообраќај.

Тој најави дека во септември ќе има првични геолошки активности и истражувања на терен, а механизација доцна наесен.

– Најидеален дел каде да се гради е до постоечката пруга, сигурно ќе има потреба од експропријација, но ќе се трудиме тоа да го сведеме на минимум и да нема проблеми. Од друга страна, тоа што ќе се гради до постоечката пруга е веќе пат што е трасиран и проблемите на терен се веќе познати. Постојните 235 километри ќе се трудиме да ги намалиме на 200 и под 200 километри, секаде каде ќе има можност ќе се исправат кривините – рече Ивановски.

Тој најави дека ќе бидат вградени 30 проценти британски компоненти, што, потенцира, ни одговара бидејќи се на второ место по квалитет во светот.

– Сигурен сум дека премиерот ќе има состаноци со сите стопански комори, ќе биде понудена соработка и ќе има простор за вклучување на секоја македонска компанија – посочи Ивановски.

Ивановски истакна дека во план на Владата е да се набават брзи возови кои ги задоволуваат европските стандарди и образложи како ќе се движат и на кои станици би застанувале патничките возови.

– Брзите возови се одговорност на МЖ транспорт, мора да се набават возови, локомотиви кои ги задоволуваат тие стандардите и тоа е во планот на Владата да се набават тие возови. Пред се постоечката пруга ќе се реконструира целосно, ќе ја искористиме трасата да дојде до 160 км на час и ќе се направи уште една паралелна согласно можности по двете ќе се користи и товарен сообраќај и патнички сообраќај. Ќе видиме согласно проектот што е можно помалку, но во исто време ќе имаме и конектори, Скопје сигурно ќе го поврземе, аеродромот Петровец, сигурно ќе биде во Велес и во Гевгелија, но во втора фаза ќе го пуштиме Кочани спрема Штип до Велес да има како луѓето да доаѓаат до овие централни станици на кои ќе можат да се качуваат за меѓународен сообраќај.

Бројот на станици за застанувања на патничките брзи возови ќе се утврди со проектот, но како што рече, што е можно помалку, но во исто време ќе има и конектори.

Целта е, појасни, да има брз и ефикасен транспорт поради што Министерството за транспорт во соработка со соседните држави ќе направат сè што е можно да има само едно застанување.

Во однос на изградбата на железницата на Коридорот 8 кон Бугарија Ивановски повтори дека и покрај многуте барања што ги испратил до раководството на бугарската железница да дојдат на средба за да се дефинира техичкото решение нема позитивен одговор. Во последниот допис што му го испратиле, рече дека му посочиле во иднина комуникацијата да биде преку Амбасадата и Министерствата за надворешни работи и за транспорт.

– Ми дојде непријатно, дури да се извинам што пишувам воопшто покана, ако нешто сакаат да работиме, да работиме. На крајот на денот ние и реално работиме. Првата фаза Куманово – Белјаковце со австриски „Штрабаг“ ја завршивме, на втората фаза од Бељаковце до Крива Паланка со турски „Ѓулермак“ војни водам, но пак работиме, споро но одиме напред. А нивното „домашно“ е само 500 метри од Ѓуешево до граница кое не се случува, а и од Софија до Ѓуешево нивната пруга е во страшно лоша состојба.

По надминување на проблемот со Бугарија, најави дека фокусот ќе биде на пругата кон Албанија со која користиме заеднички грант од ЕУ за техничко решение, а како што рече, имаме коректна комуникација.

The post ЌЕ ИМАМЕ 120 МИЛИОНИ ЕВРА ГОДИШНО ОД ТОВАРНИОТ СООБРАЌАЈ Ивановски вели дека градбата на брзата пруга ќе почне доцна наесен appeared first on plusinfo.mk.

Од македонска страна има желба и се преземаат конкретни активности за изградба на пругата од Коридорот 8 кон Бугарија, но нема соодветен одговор од другата страна, рече денеска директорот на МЖ Инфраструктура Синиша Ивановски на прес конференција.

Во делот кон Албанија рече дека има расположение од двете земји, но се чека насоката од УНЕСКО за делот кај Охридското Езеро.

– За Коридорот 10 даваме предност зашто може да има најголем економски бенефит за државата, бидејќи целата стока од грчките пристаништа кон Европа се превезува токму преку тој коридор. На Коридорот 8 веќе е завршена првата секција до Бељаковце, се работи на трасата од Бељаковце до Крива Паланка и има прогрес од околу 30 отсто, а третиот дел од Крива Паланка до граница со Бугарија сѐ уште е предмет на дискусии – рече Ивановски.

Тој нагласи дека во многуте средби што ги имал со Инфраструктура железница на Бугарија се усвоени ставови дека тунелот мора да биде пробиен само од една страна и на техничко ниво има решение кое им одговара на двете страни.

– Кога доаѓа политичкиот момент желбата изгледа постои само на една страна. Ние работиме на терен и веќе инвестираме сериозни средства за да се пробие пругата до Бугарија, додека во Бугарија за жал во овој момент нема градежни активности. Освен што треба да го пробијат тунелот од 1,5 километри треба да направат само 500 метри пруга до станицата Ѓуешево, а покрај тоа во лоша состојба е и пругата од Софија до Ѓуешево. Сѐ додека ние работиме, а Бугарија не гради ништо и ги избегнува десетиците покани кои јас лично ги пратив за средба, сметам дека имаме неуспешна приказна за двете страни – рече Ивановски.

За делот од пругата кон Албанија тој посочи дека поголем проблем е насоката што се чека од УНЕСКО за Охридското Езеро за што заедно со Албанија се користи грант од милион евра за наоѓање техничко решение.

– Има заедничко партнерство меѓу двете држави и ќе го активираме пролетва. Ако сѐ биде како што треба, за пет до шест години од сега треба да имаме завршен основен проект и ќе може да се гради пругата од Кичево кон Струга, а потоа и од Струга кон Лин – рече Ивановски и додаде дека на Албанија во моментов приоритет и изградба на пруга кон Црна Гора.

МЖ Инфраструктура има негативен годишен финансиски извештај, но не должи на коминтенти. Загубата најмногу се должи поради големата ставка за амортизација.

– Немаме повеќе од 10 до 15 милиони денари долг како МЖ Инфраструктура спрема коминтенти и добавувачи и секој со кој  соработуваме – прецизира Ивановски.

The post БУГАРИТЕ ТРЕБА ДА ПРОБИЈАТ ТУНЕЛ ОД 1,5 КИЛОМЕТРИ АМА НЕ СЕ ФАЌААТ ЗА ЛОПАТА Нема разбирање за Коридорот 8 appeared first on plusinfo.mk.

Со Договорот за стратешко партнерство со Велика Британија сериозен акцент се става на инвестициите во инфраструктурата, потенцирајќи ги инвестициите во железничката инфраструктура, особено брзата пруга на Коридорот 10 од Табановце до Гевгелија со што земјава ќе се бетонира како најдобриот, најбрзиот и најисплатливиот транзитен пат за товарен железнички сообраќај од грчките пристаништа до европските дестинации.

Како што најави директорот на МЖ Инфраструктура Синиша Ивановски на денешната прес-конференција во Владата, ќе се изврши целосна реконструкција на постојната траса со подигање на брзината на повеќе од 160 километри на час за патничкиот и до 120 километри на час за товарниот сообраќај. Паралелно со постојната ќе се изгради и целосно нова пруга со два колосека при што максимално ќе се исправат кривините и ќе се намали должината на пругата.

– Рокот за изградба е пет години од почетокот на градбата, а се очекува градбата да почне за околу 9 месеци по потпишувањето на договорот. Изведувачот истовремено ќе ја проектира и ќе ја изведува железничката линија. Прво ќе се гради новата траса која ќе биде паралелна со постојната, а потоа ќе се реконструира веќе постојната железничка линија од Табановце до Гевгелија. Со градежната активност ќе биде опфатена и пругата со која ќе се поврзе железничката станица во Скопје со аеродромот во Петровец – информира Ивановски.

Тој најави дека есенва ќе почне целосна реконструкција на делот од железничката пруга од Драчево до Илинден, како и делот од Зелениково до Скопје кој ќе биде во состав на градскиот воз, а воедно ќе се реконструира и железничката станица во Скопје.

– Со преземените активности и целосна модернизација и изградба на новата пруга планираме Македонија повторно да ја вратиме на железничката мапа. Македонија има одлична инфраструктурна, географска и стратешка позиционираност, а товарниот железнички сообраќај може да биде еден од главните двигатели на економскиот развој – рече Ивановски.

Тој потенцира дека во земјава Коридорот 10 се одвива по течението на реката Вардар во должина од околу 230 километри. Моменталната пруга е со еден колосек на кој се одвиваат и товарниот и патничкиот сообраќај. Пуштена е во употреба во 1873 година и досега претрпела измени, надградби и ремонти.

The post 5 ГОДИНИ ЌЕ СЕ ГРАДИ БРЗАТА ПРУГА ОД ТАБАНОВЦЕ ДО ГЕВГЕЛИЈА Железничката станица во Скопје ќе се поврзе со аеродромот appeared first on plusinfo.mk.