Секој обид од страна на Владата или на политичките партии, да докажат дека има политика во протестите или во работата на Синдикатот, ќе им биде залуден, рече попладнево на протестот пред Министерството за култура, претседателот на Синдикатот на УПОЗ, Трпе Деаноски.

– Да ја замолам сегашната опозиција да не се лепи на протестите на вработените, бидејќи имаа седум години да го решат овој проблем, но, наместо решение, направија сѐ што можеа, да го забранат колективното договарање, па дури беа и првата влада, што поништи колективен договор. И да ја поправам вчерашната изјава на Владата, бидејќи очигледно го има помешано Синдикатот на УПОЗ со некој друг синдикат. За потсетување, Синдикатот на УПОЗ само во 2022, 2023 и 2024 година, има организирано три штрајка и најмалку 20 протести, од кои на протестот во декември 2023 година, над 5.000 вработени од управата и правосудството, излегоа на улица и побараа достоинствени плати за живот – истакна Деаноски.

Тој додаде дека нивните барања биле исти со години наназад.

– Не случајно на вториот ден од протестите сме пред Министерството за култура. Во 2023 година, токму овие вработени 21 ден по ред протестираа пред Владата на Република Македонија, со истите барања како и денес, потпишување колективен договор и зголемување на платите на вработените – рече Деаноски.

Портпаролката на Владата, Марија Митева на вчерашната прес-конференција посочи дека не биле исполнети законските услови за протестот. Таа напомена оти постојат сомнежи дека истиот е политички мотивиран. Според Митева, Владата е партнер на сите и е отворена за сите предлози и сугестии.

– Платите на 70 отсто од вработените во Министерството за култура се под просечната плата во Република Северна Македонија, а разликата со платите на вработените на истите позиции во државните органи кои го добија додатокот на основна плата, е 30 проценти. Ние го поздравуваме покачувањето на платите на нашите колеги од останатите државни органи, но истовремено бараме од министерот за финансии, Владата и премиерот да не дозволат нерамноправен третман на вработените во државните органи. Одговорноста на колегите секаде е огромна, но да потсетиме, Министерството за култура и туризам ја сервисира работата на 72 национални и 49 локални институции од областа на културата, а во рамките на годишните конкурси на Министерството, се обработуваат просечно околу 5.000 апликации, од кои, од барем од половината, следат обврски – потпишување на договори и следење на истите – рече денеска Бранко Костовски, претседател на Синдикална организација при Министерството за култура и туризам на УПОЗ.

The post СИНДИКАТОТ СЕ ОГРАДУВА ОД ОПОЗИЦИЈАТА, А НЕ БАРА ДИЈАЛОГ СО ВЛАДАТА Платата на 70% вработени во Министерството за култура е под просечната appeared first on plusinfo.mk.

„По доаѓањето на новата власт за јавнообвинителските службеници се исплаќаат додатоците на плата во износ од 20 отсто. Исплатата на платите за сите вработени – јавните обвинители и службата – не оди без проблеми. Според информациите со кои располагаме тешко се добива одобрувањето од Министерство за финансии за пренамена на парите, за да може да се земат додатоците на плата, што прави да се одолговлекува исплатата на платата“, објави синдикатот на фејсбук-страницата на УПОЗ.

Оттаму велат дека се свесни за целосно руинираниот буџетот на државата, но, додаваат дека ние не бараат повеќе од она што им следува по закон.

„Сакаме да ја запознаеме јавноста дека функционерите (обвинителите) и службениците воопшто не се исти. Службениците во обвинителствата ги извршуваат своите работни задачи чесно, ефективно и ефикасно, иако еден службеник извршува работни задачи за тројца или четворица, поради недостатокот на вработени. Ние како јавнообвинителски службеници не се мешаме во политиките на Владата, само бараме да се цени трудот на оние кои што си ја вршат работата ревносно и професионално и да не се дозволи да трпат сите оние кои што за ништо не се виновни ниту за довербата, ниту пак за функционирањето на обвинителството“ велат од синдикатот.

Просечната плата на вработените во јавнообвинителската служба, се посочува во објавата, е 28.000 денари.

За јуни платата е исплатена  на 16 јули, за јули на 8 август, а за август на 18 септември, по донесувањето на ребалансот на буџетот.

The post ДОЦНИ СЕПТЕМВРИСКАТА ПЛАТА ВО ЈАВНОТО ОБВИНИТЕЛСТВО Работиме ефикасно, сакаме пари навреме, бара Синдикатот на УПОЗ appeared first on plusinfo.mk.

На денешната средба, како што изјави претседателот на Синдикатот на УПОЗ, Трпе Деановски, не добиле конкретен предлог од Владата.

– Волја има. Владата мисли дека ќе се изнајде решение за овој проблем меѓутоа конкретна понуда сѐ уште нема. Преговорите ќе продолжат уште еднаш или двапати. До петок треба да се финализира Буџетот за наредната година за да може и ние да добиеме поконкретни податоци што и како се планира од страна на Владата во врска со нашите барања – изјави Деаноски по средбата.

Од Синдикатот на УПОЗ се надеваат дека ќе се најде некоја, како што велат, златна средина, околу нивните барања.

По неколкунеделни протести на вработените во судската администрација, минатата недела Синдикатот на УПОЗ и Владата седнаа на разговори со цел да се изнајде заедничко прифатливо решение за нивните барања за 78% зголемување на платите и исплата на додатоците за плата.

The post ВОЛЈА ИМА, ДОГОВОР НЕМА Синдикатот на УПОЗ и Владата не се договорија ни на втората средба appeared first on plusinfo.mk.

Од Синдикатот на УПОЗ истакнаа дека не можат да го разберат, како што велат, незнаењето на Владата за начинот на пресметка и исплата на плата на сопствените работници.

– Со новата вредност на минималната плата Владата првпат во историјата на Македонија, ќе направи цела група вработени во администрацијата кои досега беа малку над минималната плата сега да примаат само минимална плата. Со самото тоа, Владата ги омаложува и понижува своите вработени, и второ го зголемува процентот на вработени кои примат минимална плата на државно ниво од 13,8 отсто на скоро 18 отсто – рече Деаноски.

До ваквата ситуација, дополни тој, дојдовме поради фактот дека од моментот на воведување на минималната плата во 2012 година па до последното зголемување во понеделникот минималната плата ќе се зголеми за неверојатни 120 отсто, а платите во администрацијата и правосудството од 2012 година досега се зголемени за 9 или 10 отсто. Исто така, во последните години со политиките на Владата во одредени сектори на јавниот сектор платите се зголемени дури до 25 отсто, а платите во администрацијата и правосудството не се зголемија ниту еднаш – посочи Деаноски.

Доколку Владата, рече тој , ги почитуваше сопствените закони и вршеше усогласување на платите со порастот на минималната плата, како што е предвидено во членот 8 од Законот за минималната плата до ваквата состојба воопшто немаше да дојде.

– Во администрацијата и правосудството системот на плати е базиран на бодови кои се добиваат по 2 основа. Бодови за образование и бодови за ниво за кое е распореден вработениот. Доколку не се спроведе скалесто зголемување на платите ќе се случи вработените од пониските нивоа да ги престигнат вработените од повисоките нивоа, или вработените со средно образование да ги престигнат вработените со високо образование – вели Деаноски.

Едно од клучните барање на УПОЗ упатено до Владата е заедно со измената на Законот за минималната плата во скратена постапка да се направат измени и на посебните закони кои ги регулираат платите на вработените во администрацијата и правосудството на начин што вредноста на минималната плата да се земе како основ на плата и сите вработени да имаат одредени бодови за ниво. На овој начин, според нив, ниту еден вработен во администрацијата не би бил на минимална плата и прв пат во историјата ќе имаме усогласување на платите со минималната плата во администрацијата и правосудството. Во спротивно, тие најавија дека ќе бидат приморени да ја активираат одлуката донесена во ноември и незадоволството на вработените да го изразат преку протести или преку други форми на притисок за други форми на штрајк.

The post УСОГЛАСУВАЊЕ НА ПЛАТИТЕ ИЛИ ШТРАЈК Синдикатот на УПОЗ тврди минималецот порасна 120 отсто, а другите плати само 10 отсто appeared first on plusinfo.mk.