Еден автентичен вагон од славниот „Син воз“ на Јосип Броз Тито и денес превезува патници. Вклучен е во ноќниот воз меѓу Земун и Бар и летово носи туристи до црногорското приморје.

„Србијавоз“ за порталот „Мондо“ потврди дека станува збор за вагон за спиење од некогашната композиција.

„Како дел од возот бр. 433 Земун-Бар, односно возот бр. 432 Бар-Земун, во текот на летната сезона е планиран еден вагон за спиење од составот на ‘Син воз’“, соопшти „Србијавоз“.

Низ вагонот во една летна сезона поминуваат околу 800 патници.

Своевремено вагонот не бил наменет за Тито и за државниците, туку за придружниот персонал. Сепак, внатрешноста и надворешноста не се суштински променети.

Ќе биде ли реставриран во 2027 година?

Остатокот од „Син воз“ денес не сообраќа. Вагоните се наоѓаат во гаражата на „Син воз“, а за нивна реставрација годинава нема предвидени средства.

„Србијавоз“ смета дека поради нивната историска и репрезентативна вредност заслужуваат повторно да се вратат на шините.

Одлуката за реставрација во 2027 година ќе зависи од расположливите финансиски средства.

Може повторно да стане туристичка атракција

Целата композиција еден ден би можела повторно да сообраќа како специјален туристички воз. За тоа, сепак, прво треба да се обезбедат пари за нејзино обновување.

Првиот специјален воз за потребите на Тито почнал да се користи во 1946 година. Познатата композиција „Син воз“ била создадена во 1959 година.

Возот служел како своевидна подвижна државна резиденција. Имал претседателски салон, свечена трпезарија, кујна, ресторан и вагони за спиење.

The post ВАГОН ОД ТИТОВИОТ „СИН ВОЗ“ СÈ УШТЕ НОСИ ПАТНИЦИ ДО МОРЕ Низ него минуваат околу 800 патници appeared first on plusinfo.mk.