Денеска и утре (7 и 8 јули) во Анкара се одржува Самитот на Северноатлантската Алијансата, каде нашата држава ќе биде претставена од највисока делегација, предводена од претседателката и врховен командант на Армијата, Гордана Сиљановска – Давкова, а составена од министерот за одбрана Владо Мисајловски, министерот за надворешни работи и надворешна трговија, Тимчо Муцински и началникот на Генералштабот на Армијата генерал-мајор Сашко Лафчиски.

На претстојниот Самит фокус ќе бидат неколку значајни теми меѓу кои и инвестициите наменети за одбраната, развојот на одбранбената индустрија и помошта за Украина.

Министерот Мисајловски во рамки на Самитот ќе учествува на Форумот за одбранбена индустрија; приемот за министри за одбрана организиран од турскиот министер за национална одбрана, Јашар Ѓулер и на церемонијата за приклучување на Франција, Финска и Шведска кон Мултинационалната соработка за воспоставување на НАТО обука за летање во Европа (NFTE – NATO Flight Training Europe).

Во Анкара министерот ќе оствари повеќе работни средби со неговите колеги министри за одбрана на сојузничките земји и ќе учествува на работниот состанок на Северноатлантскиот Совет со партнерите од Индо-пацифичкиот регион (Австралија, Јапонија, Нов Зеланд и Република Кореја).

Дводневниот самит во Анкара ги собира лидерите од 32-те земји членки на НАТО, меѓу кои се американскиот претседател Доналд Трамп, францускиот претседател Емануел Макрон, британскиот премиер Кир Стармер, германскиот канцелар Фридрих Мерц, италијанската премиерка Џорџа Мелони, канадскиот премиер Марк Карни, финскиот претседател Александар Стуб, словачкиот претседател Петер Пелегрини, албанскиот премиер Еди Рама, бугарскиот премиер Румен Радев, црногорскиот премиер Милојко Спајиќ…

На самитот ќе присуствуваат и генералниот секретар на НАТО, Марк Руте, и претседателот на Европскиот совет, Антонио Кошта.

Покрај 32 шефови на држави и влади на НАТО, на самитот се присутни и речиси 100 министри, високи дипломати, претставници на меѓународни организации, заедно со неклу илјади дипломати, новинари и други гости.

The post МАКЕДОНСКА ДЕЛЕГАЦИЈА ВО ПОЛН СОСТАВ НА САМИТОТ НА НАТО ВО АНКАРА Се очекуваат многу договори од обранбената индустрија appeared first on plusinfo.mk.

Српскиот претседател Александар Вучиќ на социјалните мрежи објави дека имал телефонски разговор со претседателката Гордана Силјановска-Давкова, на кој ја потврдиле подготвеноста за натамошно унапредување на билатералната соработка и добрососедските односи меѓу двете земји.

Во објава на Инстаграм Вучиќ пишува дека во разговорот се разменети мислења за важни регионални прашања, можностите за продлабочување на соработката и за посилно поврзување во областите од заеднички интерес.

„Содржајниот разговор со Гордана Сиљановска-Давкова потврди дека меѓу нашите земји постои подготвеност да продолжиме да ги развиваме блиските и пријателски односи. Разменивме мислења за важни регионални прашања, понатамошно унапредување на соработката и можностите за уште посилно поврзување во областите од заеднички интерес“, напиша Вучиќ на Инстаграм.

Според него, Србија останува посветена на зачувувањето на мирот и стабилноста во регионот, како и на јакнењето на соработката со Северна Македонија, оценувајќи дека тоа е во интерес на граѓаните на двете земји и на целиот регион.

Разговорот, како што објави српскиот претседател, претставува потврда на заедничката определба на Белград и Скопје за понатамошно унапредување на економската соработка, инфраструктурното поврзување и заедничките напори за зачувување на мирот и стабилноста во регионот.

 

View this post on Instagram

 

A post shared by Aleksandar Vučić (@buducnostsrbijeav)

The post ВУЧИЌ И СИЛЈАНОВСКА-ДАВКОВА РАЗГОВАРАЛЕ ТЕЛЕФОНСКИ Потврдена спремноста за унапредување на соработката appeared first on plusinfo.mk.

Претседателката Гордана Сиљановска-Давкова денеска во Софија учествува на Самитот на шефови на држави и влади на земјите од Процесот за соработка во Југоисточна Европа (ПСЈИЕ).

Домаќин на самитот е претседателката на Република Бугарија, Илијана Јотова.

На маргините на самитот, предвидени се билатерални средби на Сиљановска-Давкова со Јотова и со в.д. претседателката на Република Косово, Албулена Хаџиу.

Предвидено е Сиљановска-Давкова да се обрати на пленарната сесија на тема „Компас кон стабилност, безбедност и одржливост”.

Покрај македонската претседателка, на самитот учествуват и Претседателот на Република Албанија, Бајрам Бегај, претседавачот на Претседателството на Босна и Херцеговина, Денис Беќировиќ, в.д. претседателката на Република Косово, Албулена Хаџиу, претседателката на Репубика Словенија, Наташа Пирц Мусар, претседателот на Црна Гора, Јаков Милатовиќ, претседателот на Владата на Република Молдавија, Александру Мунтеану, министерот за надворешни работи на Република Турција, Хакан Фидан, министерот за надворешни работи на Република Грција, Јоргос Герапетритис, министерот за надворешни работи и европски работи на Република Хрватска, Гордан Грлиќ-Радман и генералниот секретар на Регионалниот совет за соработка, Амер Капетановиќ.

The post СИЉАНОВСКА-ДАВКОВА НА САМИТ НА ЗЕМЈИТЕ ОД ЈУГОИСТОЧНА ЕВРОПА ВО СОФИЈА Се среќава и со бугарската претседателка Јотова appeared first on plusinfo.mk.

Македонија во октомври треба да биде организатор на состанокот Брдо-Бриони, кој требаше да се одржи на Бриони, но беше откажан по заострувањето на реториката меѓу Хрватска и Србија.

​- Морам да кажам дека колегата Зоран Милановиќ го разбирам зошто ја откажа веќе договорената средба на Бриони. И двајцата секако почнавме да размислуваме каде да најдеме решение. Сите во рамките на процесот Брдо-Бриони се согласуваме дека ова е единствена платформа каде што сите држави на Западен Балкан и Словенија и Хрватска, еднаш годишно разговараме. И тоа е навистина битно – рече словенечката претседателка Наташа Пирц Мусар на заедничката прес-конференција со македонската претседателка Гордана Сиљановска-Давкова по средбата во Љубљана.

Пирц Мусар истакна дека не е одлучено во кој град во Македонија ќе се одржи но најави дека ќе биде во октомври.

– Сега до мај не можеме на брзина да го организираме, значи октомври, датумите ќе ги кажеме накнадно, тоа е во рацете на претседателката – рече словенечката претседателка.

Таа смета дека навистина е важно процесот да продолжи и сите да се присутни на состанокот.

– Значи тоа е навистина битно, и Косово и Србија се тука. И јас мислам дека некои задршки или проблеми на страна претседателот нема да има, бидејќи треба да се случи во Македонија и мислам дека тоа сега е веќе факт. И уште еднаш навистина благодарам на претседателката на Македонија дека ќе го организира овој процес- нагласи Пирц Мусар.

Процесот Брдо Бриони е инициран од Хрватска и Словенија во 2013 година. На него учествуваат земјите од Западен Балкан и Словенија и Хрватска.

The post МАКЕДОНИЈА ЌЕ БИДЕ ДОМАЌИН НА СОСТАНОКОТ БРДО-БРИОНИ Одбран „неутрален“ терен по кавгата Белград-Загреб appeared first on plusinfo.mk.

Генералниот секретар на НАТО Марк Руте денеска престојува во официјална посета на Македонија, што е негова прва посета на земјава како шеф на Алијансата.

Руте ќе биде пречекан од претседателката Гордана Сиљановска-Давкова со највисоки државни и воени почести. Потоа ќе следува тет-а-тет средба и пленарен состанок на македонската и делегацијата на НАТО, а нешто пред 13 часот попладнево Сиљановска-Давкова и Руте ќе одржат заедничка прес-конференција.

Во агендата на генсекот на НАТО се предвидени и средби со премиерот Христијан Мицкоски и со претседателот на Собранието, Африм Гаши, како и обраќање пред пратениците во законодавниот дом.

За време на престојот на Скопје, Руте ќе ја посети и касарната „Илинден“ каде што ќе присуствува на презентацијата на лесна пешадиска баталјонска група на Армијата и на дел од опремата на оваа единица. На настанот ќе присуствуваат министерот за одбрана Владо Мисајловски, началникот на Генералштабот генерал-мајор Сашко Лафчиски, генерали во Армијата и претставници од Министерството за одбрана.

Поради доаѓањето на Руте, денеска во Скопје важи посебен режим на сообраќај. Од СВР Скопје апелираат до возачите и пешаците да ги почитуваат насоките на полициските службеници и навреме да го планираат своето движење низ градот.

The post ПРВИОТ ЧОВЕК НА НАТО МАРК РУТЕ ВО ОФИЦИЈАЛНА ПОСЕТА НА МАКЕДОНИЈА Ќе биде пречекан со највисоки почести appeared first on plusinfo.mk.

Претседателката Гордана Сиљановска Давкова денеска напладне ќе има годишно обраќање во Собранието.

Се очекува претседателката да говори за актуелните и случувањата во изминатиот период, како и за очекувањата во следната година во внатрешната и надворешната политика, состојбата во економијата…

Обраќањето на претседателката е во рамките на 77. собраниска седница.

Ова ќе биде второ годишно обраќање на Сиљановска-Давкова пред пратениците од преземањето на претседателската функција во мај 2024 година, кога стана прва жена шеф на македонската држава.

The post ПРЕТСЕДАТЕЛКАТА СИЉАНОВСКА ДАВКОВА ЌЕ ГОВОРИ ВО СОБРАНИЕТО Годишно обраќање за состојбите во државата appeared first on plusinfo.mk.

Професор Георги Гоце Дуртаноски, експерт за христијанска палеографија, денеска ѝ врачи на претседателката Гордана Сиљановска-Давкова во нејзиниот кабинет копија од Привилегијата издадена на Македонците од Светиот римски цар Леополд Први Хабзбуршки во 1690 година во Виена.

Со овој документ, царот Леополд го прифатил барањето за заштита на Македонците од турското ропство, барајќи од нив да се приклучат во борбата против заедничкиот непријател.

Авторот на овој уникатен документ во калиграфски препис, проф. Дуртаноски, говореше за неговата важност за потврда на посебноста на македонскиот идентитет. Дуртаноски посочи дека оригиналниот записник бил пронајден во Воениот архив во Виена, а потем реконструиран во Центарот за ракописни студии при Европската христијанска академија, со којшто раководи.

Заблагодарувајќи се за копијата, Сиљановска-Давкова изрази почит кон неговата успешна работа во Летонија, кадешто Дуртаноски предава христијанска палеографија, како и кон ангажманот ширум Европа. Во Привилегијата, таа препознава документ од особено значење за македонскиот народ и неговиот идентитет.

– Документот го потврдува она што повеќепати е докажано, но добро е да имаме уште еден аргумент, соочени со обидите за негово оспорување – додаде претседателката.

Претседателката Силјановска-Давкова и професор Дуртаноски ја нагласија важноста и ефикасноста на културната дипломатија, особено за малите држави.

The post МАКЕДОНЦИ ВО ХАБЗБУРШКА КРАЛСКА ПОВЕЛБА ОД 1690 ГОДИНА Сиљановска-Давкова доби копија од документот откриен во Воениот архив во Виена appeared first on plusinfo.mk.

На средбата кај мене не стана збор ниту за топка, ниту за двор, ниту за игралиште, вака претседателката Гордана Сиљановска-Давкова ја искоментира објавата на претседателката на Европската комисија, Урсула фон дер Лајен која по последната посета на Скопје на Икс платформата напиша: „Следниот и единствен чекор пред отворањето на преговорите е јасен. Треба да ја направите договорената уставна промена. Топката е во вашиот двор. ЕУ е подготвена“.

– Топката е реквизит. Освен во уметничката гимнастика, сам со топка никој не игра. Значи, топката е инструмент за игра. За игра се потребни двајца. Играта секогаш се одвива по точно утврдени правила. Правилата не се менуваат во текот на играта, што ни се случи нам. Е сега, што ако е топката од офсајд или што ако е топката со фаул фрлена во игралиштето? Или, што ако голов е празен, нашиот беше празен, па го полнеа, го полнеа, мрежата се искина… Значи, правилата во играта се однапред утврдени. Тоа е прво. Второ, кога мене ме прашуваат однадвор – дали ќе го смените Уставот, јас не можам таква гаранција да дадам, јас велам не сум јас Јован Безземја, не сум јас апсолутен монарх. Значи, парламентот тоа го прави. А пратениците гласаат по сопствено уверување и ги претставуваат граѓаните, не мене и не ЕУ. Да бидам искрена. Значи кога вие велите сменете го Уставот, професорот во мене вели вака – ‘кога вака ми велите мене, морате да го смените Уставот’, вие ми велите – ‘заборавете на парламентарната демократија, оти таа има неизвесен резултат’… Е сега, тоа е нешто што ме тера на следново. Да подразмислиме, како можело во Преговарачка рамка и во заклучоци да влезат одредби од записник – рече Сиљановска-Давкова во гостувањето на емисијата 360 степени на МРТ.

Таа потврди дека побарала помош од францускиот претседател Емануал Макрон.

– Нормално, јас барам помош од претседателот Макрон, бидејќи придавкава е француски (предлог). Е па, сега, најдете решение. Јас мислам дека, не знам, дека мора да се најде излезно решение, а како што знаете, Европејците, особено и тие во Европската Унија, многу креативни знаат да бидат кога е потребно – истакна Сиљановска-Давкова.

На прашањето дали нешто во заднина се движи, а јавноста не го гледа, претседателката одговори потврдно.

– Секогаш се движи. Не секогаш движењето е јавно, бидејќи за да заслужите кредибилитет, статус на кредибилитет, не можете да раскажувате за сите работи што се случуваат. Се работи за сериозно прашање, за сериозна пречка во однос на нас. Верувајте ми, најголемиот дел од своето време јас го потрошив на објаснување за што всушност сме ние загрижени, бидејќи однадвор не изгледа така. Најчесто ќе чуете – па вие сами го усвоивте ова решение, и Владата и Собранието и претседателот застанаа зад него, тоа стана дел од Преговарачката рамка и од заклучоците, и сега зошто не го извршувате? Не е баш така. Јас сум била, за среќа или несреќа, пратеничка. Ние не гласавме за Преговарачка рамка или за заклучоци. Пред нас дојде само информација за заклучоците. И толку беше. Значи, таа постапка тотално беше нетранспарентна – рече Сиљановска-Давкова.

The post 🎥 ШТО АКО ТОПКАТА НА УРСУЛА Е ВО ОФСАЈД? Претседателката Силјановска-Давкова ѝ реплицира на еврокомесарката appeared first on plusinfo.mk.

Претседателот на Србија, Александар Вучиќ, кој учествува на самитот на европските лидери во Копенхаген, имаше проблем да го најде местото на кое треба да седне, пишува Нова.рс.

На социјалните мрежи кружи видео од српскиот претседател, на кое се гледа како тој влегува во просторијата каде што се одржува самитот, каде што сите присутни се сместени, освен тој. Наместо да седне на своето место, Вучиќ разгледуваше наоколу како да не му е јасно каде треба да седи.

Додека збунето разгледуваше низ просторијата, барајќи некој да му помогне, но бидејќи никој не му пријде на помош, тој се обиде да седне до македонската претседателка Гордана Силјановска Давкова, но лице од протоколот го предупреди дека тоа не е неговото место.

Stalna blamaža i neverovatan propust našeg protokola. Tužni sirak među vihorove dok izgubljena savetnica Jović pokušava da nađe mesto za baskuznu figuru.
Nije smešno jer oni vode i uništavaju Srbiju 13 godina i zaista tako bude kad nesposobne i alave stavite da vode važne državne… pic.twitter.com/UmAHUUSKgq

— Borko Stefanović (@BorkoStef) October 2, 2025

The post 🎥 ЗА СИТЕ ИМА СТОЛЧЕ ОСВЕН ЗА ВУЧИЌ? Збунето гледаше наоколу на самит во Копенхаген appeared first on plusinfo.mk.

Претседателката Гордана Сиљановска-Давкова им го додели признанието „Инженерски прстен 2025“ на 14 најуспешни студенти, дипломци на инженерски факултети во рамките на универзитетите: „Св. Кирил и Методиј“ – Скопје, „Св. Климент Охридски“ – Битола, „Гоце Делчев“ – Штип и Државниот универзитет – Тетово.

Свечената церемонија се одржа на платото пред црквата „Свети Климент и Пантелејмон“ – Плаошник, во Охрид, информира Кабинетот на претседателката.

Добитници на „Инженерски прстен 2025“ од УКИМ – Скопје, годинава се: Фросина Станковска – Архитектонски факултет, Марко Ѓорѓиоски – Градежен факултет, Харитина Сакова – Машински факултет, Васка Зарковска – Технолошко-металуршки факултет, Сара Ацковска – Факултет за земјоделски науки и храна, Димитар Пешевски – Факултет за информатички науки и компјутерско инженерство, Кирил Христовски – Природно-математички факултет, Теа Костадинова – Факултет за дизајн и технологии на мебел и ентериер, Рената Павлеска – Факултет за електротехника и информациски технологии.

Наградени студенти со „ Инженерски прстен“ 2025 од УКЛО – Битола се: Катерина Стојкоска – Технички факултет и Софи Гајтановска – Факултет за информатички и компјутерски технологии.

Од УГД Штип, носители на наградата се: Сара Панева – Факултет за природни и технички науки и Бојана Тасева – Факултет за информатика.

Од ДУТ, признанието го доби Гзим Дервиши – Факултет за применети науки.

Претседателката истакна дека за неа инженерството персонифицира нераскинлива врска со умот, знаењето, истражувачкиот дух, посветеноста, упорноста, компетитивноста. Сиљановска-Давкова, честитајќи им го на добитниците престижното признание, ја истакна важноста од континуираната подршка на образованието и науката, како најдобра општествена инвестиција.

Манифестацијата „Инженерски прстен” се одржува под покровителство на претседателката на државата, а во организација на „Инженерската институција на Македонија“ и на Комората на овластени архитекти и овластени инженери.

Во продолжение е интегралното обраќање на претседателката Сиљановска-Давкова:

Чинам дека нема подобар простор за промоција на најдоброто во инженерството од овој, на кој никнал Климентовиот универзитет. Причината лежи во фактот дека нашите цркви имаат традиција на црковно-училишни општини. Замислете град со 365 цркви, значи, со 365 училишни општини. Затоа мислам дека час поскоро, треба да се догради Универзитетот на Плаошник.

Прстенот не е само украс, туку значи врзување за нешто многу важно. Тој значи верност, значи посветеност, значи љубов. Сигурна сум дека дека овој прстен значи многу во вашиот, ама и во нашиот живот.

Кога прифатив да бидам покровителка на една ваква манифестација, како што е Инженерскиот прстен, почувствував голема чест. Да се доделуваат прстени на најуспешните студенти од инженерските дисциплини, не е само сатисфакција и надомест за вашиот труд, за младите инженери, ниту само е потстрек за продолжување по патот на науката и понатамошно усовршување, туку тој чин, мене барем, ми значи потсетување на човечкиот потенцијал кој го имаме, а нема повредно нешто од него, само не секогаш сме свесни за тоа. Ние сме должни да создадеме дополнителни услови за ваше напредување, се разбира, дома, не случајно се раѓаме некаде. Само една татковина секој има, вели Бернард Шо, каде и да одите, се враќате на крајот. За среќа денеска со дигитализацијата и со вештачката интелигенција, можете да бидете истовремено и тука. Одете, натпреварувајте се, докажувајте се, ама враќајте се. Беспредметно е за мене да се зборува за значењето на инженерските професии бидејќи вие не само што ја обликувате сегашноста туку, на сите ни е јасно дека ќе ја обликувате и иднината.

Вие сте тие кои го движите светот, а ние, државата, образовните, научните институции, бизнис-заедницата, граѓанските организации, сме должни да помогнеме да го реализирате она што го поседувате, највредното, знаењето.

Сакам да кажам збор, два и за самото списание „Инженерство”, и не само за него, туку и за посветеноста на Инженерската институција на Македонија. Да, досега вие бевте ветар, некогаш посилен, некогаш поблаг, ама секогаш дувавте во грбот на македонското инженерство. Вие сте своевидно инженерско огледало, инженерски гласник, просветител научен. Затоа ве охрабрувам и понатаму да соберете под тој прекрасен чадор повеќе инженерски здруженија, да продолжите да придонесувате за развојот на инженерството, преку вложување, не само во знаењето, туку, како што веќе рековте, во интегритетот, во професионалноста, во знаењето, во дигнитетот, во моралот, во етиката.

Јас ве уверувам дека во мене и во мојот Кабинет имате искрен поддржувач и партнер, а верувам дека е така и со сите други релевантни институции. Вам сакам да ви посакам да продолжите самите да ги следите соништата, ама и да си ги реализирате идеите, визиите, секогаш да знаете дека тоа што доаѓате од навидум мала земја, воопшто не значи дека не може да имате големи идеи. Тоа се докажало многу пати. Вие аплицирате и имате европско образовно досие, вие сте идејните творци и двигатели на модерниот европски и светски технолошки свет, вие сте идните технолошки лидери. Образованието и науката воопшто не се само професорска, истражувачка и студентска обврска. Нивниот обем, квалитет и домет се резултанта на содејството меѓу образованието, науката, политиката и општеството. Затоа нам ни треба координирана, одговорна и развојна образовна политика. Не е можно да ги задржиме најдобрите и најперспективните без соодветна, пред сѐ, реформирана финансиска политика, пријателска кон најдобрите и почитувачка кон најдобриот квалитет.

Копенхагенските критериуми, односно европските стандарди, мора да најдат место и примена во финансирањето на високообразовните и научните институции. Ние мора да исчекориме на релевантните високообразовни листи, каде што нè нема, наместо да паѓаме, преку преиспитување, односно реакредитација и реевалуација на образовната мрежа. Мора да се концентрираме на неутрален, објективен пристап, заснован на докази и факти, а не на еднопартиска позадина што продуцира образовна и научна мимикрија наместо валидно образование и наука.

Нам ни требаат европски критериуми за градење на академска кариера. Интензивна регионална и европска научна соработка, интеграција во европската истражувачка сфера и афирмација на меѓународниот образовен и научен пазар. Мора да го следиме успешниот модел на соседите. И како индивидуалци и како заедница, јас мислам дека веруваме, јас барем верувам во вашите знаења, вештини, креативност. Убедена сум дека не ви недостасуваат хуманизам, благородност и патриотизам. Создавајте модерен, напреден, но, пред сѐ, морален и поумен свет. ИТ-индустријата, континуирано цвета и расте. За среќа, расте и нејзината популарност кај младите и тоа ме радува. За да имаме дигитална иднина, нам ни треба стратегија како да ве задржиме вас, дигиталната младина тука дома – прстенот не е доволен. Или, како да бидеме во постојан контакт интегрирајќи ве како постојан сегмент на општествениот развој.

Мора похрабро да ја зголемиме поддршката на научните истражувања. Мора да ја осовремениме научната инфраструктура, односно лабораториската опрема, да го олесниме пристапот кон базата на податоци, да ги стимулираме фундаменталните истражувања. Научното истражување мора да биде секогаш поддржано со сигурни финансии. Нашите научници од дијаспората можат да бидат подвижен мост кон светската наука, затоа тие ќе добијат заслужено место во Советот за дијаспора, што набргу ќе се конституира.

Убедена сум, штом моите студенти многу се импресионираа од социјалутопистите и ги прашував зошто: Велат дека не само што биле богати луѓе, туку биле и многу умни, акцентот го ставале на науката, ама и на етиката и на моралот. Се откажувале од богатствата за да создадат градови на сонцето, фаланги… тоа е таа морална димензија.

Затоа мене многу ме бендисува ставот на Сен Симон, кога вели дека клучот за прогресот и за развојот е науката и дека без 10 кралеве или цареве, па светот можеби не би станал многу полош, ама без 10 научници сериозно би го почувствувал тоа. Дури и во Платоновата идеална држава управувањето се врзуваше за филозофите, за знаењето, за способноста, за мудроста. Понатаму, имаше дури и ставови според кои Исак Њутн беше рамен на еден светец, а се зборуваше за научна религија, толку веруваа луѓето во науката.

И јас посакувам меритократија покрај демократијата. Посакувам особено меритократија во администрацијата зашто таа некогаш ги носи клучните одлуки. Посакувам меритократија во дејностите од општ интерес. Посакувам конкурс за сите позиции. Посакувам транспарентна постапка на избор, посакувам одговорност. Цврсто верувам дека само учени луѓе може да разберат и да поддржат наука и научници како вас –носители на драгоцени инженерски прстени. Чувајте ги.

The post МОРА ДА ИСЧЕКОРИМЕ НА СВЕТСКИТЕ ВИСОКООБРАЗОВНИ ЛИСТИ, КАДЕ ШТО НЀ НЕМА Сиљановска-Давкова им врачи „Инженерски прстен“ на 14 најуспешни дипломирани инженери appeared first on plusinfo.mk.